Policia e Kosovës ka njoftuar se ka arrestuar një person të premten në Prishtinë, më 24.01.2025 pasi i njëjti dyshohet se ka ushtruar dhunë në vazhdimësi ndaj gruas së tij dhe vajzës.
I njëjti, sipas forcave të rendit, me vendim të prokurorit është dërguar në mbajtje.
“Është arrestuar i dyshuari mashkull kosovar, pasi që në vazhdimësi kishte ushtruar dhunë psikike ndaj bashkëshortes dhe vajzës së tij, viktimave femra kosovare” – thuhet në raportin 24-orësh të policisë.
Prokuroria Themelore në Gjakovë ka kërkuar masën e paraburgimit prej një muaji, ndaj tre inspektorëve të Administratës Tatimore të Kosovës (ATK), të cilët u arrestuan për marrje ryshfeti.
Këtë për KALLXO.COM e ka konfirmuar zyrtari për Komunikim publik i Prokurorisë Themelore në Gjakovë, Drini Domi.
I njëjti konfirmoi se seanca dëgjimore pritet të mbahet gjatë së martës, më 21.01.2025, në Gjykatën Themelore në Gjakovë.
KALLXO.com ka raportuar, më 20.01.2025, lidhur me aksionin që rezultoi me tre persona të arrestuar – nën dyshime për marrje ryshfeti.
Sipas Prokurorisë, pas pranimit të informatës, ndaj të dyshuarve janë ndërmarrë edhe masat e fshehta hetimore.
“Lidhur me rastin në fjalë, ju njoftojmë se Prokuroria Themelore – Gjakovë, pas pranimit të informatës se 3 (tre) të dyshuarit, në periudha të ndryshme kohore dhe në lokacione të ndryshme në Gjakovë, kishin kërkuar dhe pranuar ryshfet nga pronarë të ndryshëm të bizneseve, ku me këto veprime dyshohet se kanë kryer veprën penale ‘marrja e ryshfetit’, Neni 421 i KPRK-së, ka ndërmarrë veprime hetimore – duke zbatuar edhe masa të fshehta hetimore, ndaj të njëjtëve.” – thuhet në njoftimin e Prokurorisë së Gjakovës.
Kurse, me urdhëresë të Gjykatës Themelore të Gjakovës janë kryer edhe bastisje në disa lokacione.
“Ndërsa, më 20.01.2025, me urdhëresë të Gjykatës Themelore – Gjakovë, është kryer bastisje në 3 (tri) lokacione të ndryshme dhe, me vendim të Prokurorit të Shtetit, janë ndaluar 3 (tre) persona, në kohëzgjatje prej 48-orësh, për shkak të veprës penale ‘marrja e ryshfetit’, Neni 421 i KPRK-së.” – thuhet, tutje, në njoftimin e Prokurorisë.
Policia e Shtetit ka arrestuar një 21-vjeçar L.Gj., në Tiranë, nën dyshimet se i njëjti në mënyrë të përsëritur vodhi aksesorë e pjesë të një veture.
Këto veprime sipas Policisë u kryen në periudha të ndryshme por te e njëjta veturë.
Pas arrestimit u bë edhe kontrollimi në banesën e të njëjtit, ku edhe policia më pas gjeti një armë zjarri pistoletë me mulli.
Në vendbanimin e të dyshuarit u gjetën dhe pjesët e vjedhura në automjet.
“Shërbimet e Komisariatit të Policisë Nr.3, në bazë të informacioneve të marra se një shtetas kryente vjedhje, bazuar dhe në inteligjencën policore, kanë organizuar dhe finalizuar operacionin të koduar “Përsëritësi” si rezultat i të cilit u bë kapja dhe arrestimi i shtetasit L.Gj, 21 vjeç, banues në Laç”-thuhet në njoftimin e Policisë së Shtetit.
Materialet procedurale të policisë i kaluan Prokurorisë, për veprime të mëtejshme ligjore.
Policia e Kosovës njoftoi se më 18.01.2025 kishte ndërmarrë një operacion kundër narkotikëve në regjionin e Prishtinës.
Përveç narkotikëve e municionit që ishin gjetur në bastisjet që ka kryer Policia është gjetur edhe një veturë që dyshohet se ishte përdorur në një rast të vrasjes në tentativë.
Policia ka njoftuar se në një bastisje në fshatin Suhodoll të Lipjanit në një garazh në pronësi të të dyshuarit Xh.S., është gjetur një veturë “Golf 7”, ngjyrë e kaltër, me targa vendore, e cila dyshohet se ishte përdorur në një rast të vrasjes në tentativë.
Në operacionin e Policisë kundër narkotikëve, tre persona janë arrestuar nën dyshimin për shpërndarje të narkotikëve.
Të dyshuarit janë dërguar në qendrën e mbajtjes për 48 orë, ndërsa rasti vazhdon të hetohet nga Anti-Droga e Policisë në Prishtinë në bashkëpunim me Prokurorinë Themelore Prishtinë.
Në një njoftim, Policia ka dhënë detaje për aksionin i cili u realizua gjatë datës 18.01.2025.
Një hetim disamujor i Policisë në koordinim me Prokurorinë e Prishtinës ka përfunduar deri sa janë sekuestruar narkotikë, vetura e pajisje të tjera që do të hynë në kategorinë e provave për të vërtetuar veprat penale të cilat janë hapur tashmë për blerje, posedim, shpërndarje dhe shitje e paautorizuar e narkotikëve, substancave psikotrope si dhe vepra penale mbajtja në kontroll, posedim i paautorizuar i armës.
Zhvillimi i planit taktik kishte filluar në rrugën magjistrale Prishtinë-Ferizaj me që rast është ndaluar vetura Mercedes ngjyrë e bardhë me targa vendore me vozitës Sh.S., ku gjatë kontrollit në trup i është gjetur një qese me narkotik të llojit Kokainë me peshë 5.35 gramë. Plani ka vazhduar në rrugën ”Vicanum” ku është ndalur vetura Audi Q8 me targa vendore të cilën e drejtonte i dyshuari Xh.S., ku gjatë kontrollit të tij dhe veturës në një vend të fshehte janë gjetur 21 paketime me substancë të dyshuar narkotike të dyshuar si kokainë me peshë 20.1 gramë.
Në të njëjtin lokacion është ndaluar edhe vetura Volvo ngjyrë hiri me targa vendore të cilën e drejtonte i dyshuari F. S., i cili është shoqëruar në stacion policor si i implikuar në rast.
Pas veprimeve fillestare në konsultim me prokurorinë e krimeve të rënda në Prishtinë është realizuar një bastisje në shtëpitë e të dyshuarve në rrugën “Dëshmoret e Marecit” në Prishtinë ku gjatë kontrollit në një shtëpi, në banjo njësitet policore kanë gjetur, 219 qese/doza me narkotik të dyshuar si kokainë me peshë 114.4 gram të gatshme për shitje.
Në një veturë pronë e të dyshuarit Xh.S., nën timon është gjetur një paketim me narkotikë të llojit kokainë me peshë 171.5 gramë .
Tutje policia ka njoftuar se kanë gjetur, dy revole me dy karikatorë dhe nëntë fishekë, një granatë dore model F1 dhe 29 fishekë kalibrash të ndryshëm.
Përveç armëve e narkotikëve, policia ka sekuestruar tri vetura të dyshuara që dyshohet se janë përdorur në fshehje shpërndarje të narkotikëve, para të gatshme në vlerë 7900 Euro dhe 100 dollar amerikan, katër telefona dhe dy DVR.
Sipas vlerësimeve të bëra, vlera e Kokainës së konfiskuar, nëse do të shpërndahej në treg, arrin rreth 30,000 euro.
Yoon Suk Yeol i Koresë Jugore është bërë Presidenti i parë në detyrë që arrestohet, duke i dhënë fund një përplasjeje njëjavëshe ndërmjet prokurorëve dhe sigurimit të tij personal – raporton të mërkurën në mëngjes, më 15.01.2025, transmetuesi britanik BBC.
Yooni, përpjekja e dështuar e të cilit për të shpallur gjendje të jashtëzakonshme e zhyti vendin në trazira dhe rezultoi me shkarkimin e tij në Parlament, po hetohet me akuzën për kryengritje.
Megjithatë ai teknikisht është ende President, derisa Gjykata Kushtetuese të përcaktojë nëse shkarkimi ishte i vlefshëm.
Hetuesit kanë përdorur shkallë dhe gërshërë për prerjen e telave gjemborë, në një mëngjes të acartë dimri, për ta arrestuar Yoonin, me Shërbimin Presidencial të Sigurisë (PSS), që kishte ngritur barrikada në përpjekje për ta pamundësuar arrestimin.
64-vjeçari ka thënë se është pajtuar që të shkojë në Zyrën për Hetimin e Korrupsionin (CIO), për zyrtarët e lartë, për të shmangur gjakderdhjen. Në një xhirim prej tre minutash, Yooni ka thënë se do të bashkëpunojë me zyrtarët, megjithëse është kundër hetimit.
Ai vazhdimisht ka pretenduar se fletarrestimi nuk është i ligjshëm. Yoon ka thënë se e ka parë me sytë e tij sesi autoritetet “pushtuan” perimetrin e sigurisë së shtëpisë së tij me ekipe zjarrfikësish.
“Kam ndarë mendjen të dalë para CIO-s, megjithëse është një hetim ilegal, me qëllim që të parandalojë çfarëdo gjakderdhjeje të pandalshme.” – ka thënë ai.
Më shumë se njëmijë policë dhe zyrtarë janë angazhuar në operacionin e hershëm të së mërkurës. Ishte përpjekja e dytë për arrestimin e tij.
CIO, që po e heton Yoonin, më parë ishte munduar ta arrestonte atë më 3 janar.
Zyrtarët kishin marrë fletarrestimin, pasi ai i kishte urdhëruar disa kërkesa zyrtare për t’u lajmëruar në Prokurori.
Partia e Pushtetit Popullor e Yoonit e ka quajtur “ilegal” arrestimin. Lideri i saj, Kveon Seong-dong i ka përshkruar ngjarjet si aso “për të ardhur keq”.
Në anën tjetër, lideri i Grupit Parlamentar të Partisë Demokratike në opozitë, Park Chan-dae ka thënë se arrestimi i Yoonit ka treguar se “drejtësia në Korenë Jugore është gjallë”.
Përgatiti: Rexhep Maloku – Kallxo.com