Ballina

Etiketë: aneks kontrata

  • Ura e Badovcit u testua 10 ditë pas hapjes për qarkullim

    Dhjetë ditë pasi u lëshua në qarkullim, për disa orë ura te liqeni i Badovcit u bllokua për qarkullim të enjten më 09.01.2025.

    Pas raportimit të KALLXO.com se ura ishte lëshuar pa u testuar struktura e saj, një gjë e tillë u bë sot.

    Fillimisht, poshtë u vendosën pajisjet që regjistronin lëvizjet e strukturës së urës, kur katër kamionë me ngarkesa deri në 30 tonë, kalonin mbi urë. Proces ky që zgjati rreth 2 orë.

    Ndërkohë, disa nga qytetarët që frekuentonin magjistralen Prishtinë – Gjilan nuk e dinin që ura nuk ishte e testuar.

    “Jo, nuk e kam ditë. Veç le të ndreqet mirë sepse është për krejt qytetarët”- tha Rexhep Maloku për KALLXO.com.

    Një tjetër qytetar faktin se ura ishte lëshuar në qarkullim pa u testuar struktura e saj e kishte kuptuar përmes mediave.

    “Po, e kam kuptu. Kjo me të vërtetë është katastrofë”- tha Enver Gashi.

    Rezultatet e testimit të urës pritet të publikohen gjatë javës në vijim.

    Ura që shtrihet në magjistralen Prishtinë – Gjilan ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar “by-pass”-in që shfrytëzohej si rrugë alternative, deri në përfundimin e urës.

    Ndërsa, në tetor të vitit 2023 kishin filluar procedurat e prokurimit për ndërtimin e urës së re.

    Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” është nënshkruar më 10.01.2024. Vlera e kontratës së nënshkruar me kompaninë fituese “Dreni Inginiering” ishte 468 mijë e 522 euro.

    Kurse, testimi parashihej në aneks-kontratë dhe kushtoi 6,000 euro.

    Pas raportimit ekskluziv të KALLXO.com, Prokuroria e Prishtinës më 08.01.2025 kishte konfirmuar se ka kërkuar nga Policia e Kosovës të mbledhë informacione për lëshimin në qarkullim të urës te liqeni i Badovcit pa u testuar fare struktura e saj.

    Këtë e kishte konfirmuar kryeprokurori i Prishtinës, Zejnullah Gashi.

     

    https://kallxo.com/lajm/ekskluzive-ura-e-badovcit-u-leshua-ne-qarkullim-pa-u-testuar-video/

     

  • Lëshimi i Urës së Badovcit pa u testuar – reagon zëvendësministri Hysen Durmishi

    Pas raportimit ekskluziv të KALLXO.com se Ura e Badovcit është lëshuar për qarkullim pa u testuar – ka reaguar zëvendësministri i Infrastrukturës, Hysen Durmishi.

    Përmes një statusi në profilin e tij në Facebook, zëvendësministri Durmishi ka shkruar se Ura është projektuar e ndërtuar me standardet më të larta dhe është stabile.

    Zëvendësministri vazhdon të këmbëngulë se testimi të cilin e ka paralajmëruar për nesër është vetëm formal, meqë sipas tij gjatë gjithë këtyre ditëve aty kanë kaluar shumë makineri me pesha të rënda dhe nuk ka pasur asnjë problem për Urën.

    “Dje dhe sot po mundohen të ngjallin pasiguri te qytetarët, me rastin e hapjes së Urës së Badovcit. Ura e Badovcit është projektuar e ndërtuar me standardet më të larta të projektimit e ndërtimit. Gjatë të gjitha fazave janë kryer inspektimet profesionale – përfshirë këtu atestet paraprake të materialeve, testimet të vazhdueshme të betonit e armaturës deri në finalizimin e saj. Prandaj, me përgjegjësi të lartë profesionale deklaroj se Ura e Badovcit është shumë stabile. Gjatë gjithë këtyre ditëve aty kanë kaluar shumë makineri me pesha të rënda, pa asnjë problem për Urën, e këtë do ta dëshmojë edhe testimi formal që do të bëhet nesër.” – ka shkruar Durmishi në Facebook.

    Ura e Badovcit është lëshuar për qarkullim më 31.12.2024.

    Ndonëse Aneks-Kontrata parashihte që testimi të kryhej, Ura ishte lëshuar në qarkullim pa u testuar.

    Kompania përgjegjëse për kryerjen e testimit “Dreni Inginiering” ditë më parë tha për KALLXO.com se Ura ishte lëshuar për qarkullim për shkak të festave.

    Sipas Aneks-Kontratës, ky testim i ka kushtuar buxhetit të shtetit 6,000 euro, kurse i gjithë projekti ka kushtuar mbi gjysmë milioni euro.

     

  • Ekskluzive: Ura e Badovcit u lëshua në qarkullim pa u testuar – VIDEO

    355 ditë pas nënshkrimit të kontratës, ura e re mbi liqenin e Badovcit u asfaltua. Megjithatë, edhe pse u lëshua për qarkullim, nuk dihet për stabilitetin e strukturës së saj.

    Në urën tek liqeni i Badovcit, tash e tetë ditë kalojnë autobusë, kamionë e vetura. Por, struktura e urës nuk është testuar. Këtë e ka pranuar vetë kompania e cila e ka ndërtuar urën.

    Nga kompania “DRENI INGINERING” e cila është përgjegjëse për kryerjen e testimit, thonë se ura është hapur për qarkullim për shkak të festave të fundvitit.

    “Unë e bëj testimin e urës, nuk është kryer. Kemi dashtë me e lëshu për qarkullim për shkak të festave dhe në një afat tjetër bahet testimi i urës”- tha Adnan Lushtaku për KALLXO.com.

    Kurse, zëvendësministri i Infrastrukturës, Hysen Durmishi, kur u pyet se pse ura është lëshuar për qarkullim pa u testuar struktura e saj, tha se testimi është vetëm formal sepse ura është stabile.

    “Dëgjo, duheni me e pyet menaxheren e kontratës, por ura testohet gjatë gjithë fazës se ndërtimit, do të thotë merren atestet paraprake sepse është material. Sasia e armaturës që vendoset aty, çfarë marke e betonit vendoset aty. Merren mostrat edhe dihet se a është ajo markë e beton a jo, a është ajo klasë e armaturës a jo, nëse gjatë këtyre fazave është vendos armatura, është vendos betoni sipas projektit, natyrisht që ura është stabile. Ai testimi është vetëm formal” tha ai për KALLXO.com.

    KALLXO.com tentoi të flasë edhe me menaxheren e kontratës, Florije Pajazitin, por deri në publikimin e storjes nuk ishte e qasshme.

    Testimi i urës që ka gjatësi rreth 40 metra, ishte paraparë në aneks kontrate të cilën Ministria e Infrastrukturës e nënshkroi kur punimet ishin në fazën fillestare. Sipas paramasës, vetëm testimi i urës do të kushtojë 6000 euro.

    Kurse, për testimin e urës së Ibrit që lidhë Mitrovicën e Jugut me atë të Veriut, që u bë në gusht të vitit 2024, e cila vazhdon të jetë e mbyllur për automjete, Ministria e Infrastrukturës pagoi 9 mijë e 640 euro.

    Ura që shtrihet në magjistralen Prishtinë – Gjilan, ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar bypass-in, që shfrytëzohej si rrugë alternative, deri në përfundimin e Urës.

    Ndërsa, në tetor të vitit 2023, kishin filluar procedurat e prokurimit për ndërtimin e Urës së re. Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” është nënshkruar më 10.01.2024. Vlera e Kontratës së nënshkruar me kompaninë fituese “Dreni Inginiering” ishe 468 mijë e 522 euro.

  • U keqplanifikua, shpenzohen 46 mijë euro shtesë për ‘Urën e Badovcit’ – VIDEO

    Ndonëse kontrata e nënshkruar kapte vlerën e 468 mijë e 522 eurove, komplet projekti për ndërtimin e Urës mbi Liqenin e Badovcit, Ministrisë së Mjedisit Planifikimit Hapësinor dhe Infrastrukturës i kushtoj 514 mijë e 806 euro.

    Edhe pse punimet ishin në fazën fillestare, Ministria e Infrastrukturës, kishte nënshkruar aneks-kontratë për punë shtesë.

    Sipas paramasës në të cilën pati qasje Kallxo.com, për pozicionin – “Punët e Dheut”, që parashihte mbushjen e shtratit të liqenit me material që mundësonte vendosjen e skeleve për të punuar pastaj, u shpenzuan 19 mijë e 440 euro.

    Ndërkohë, për pozicionin- “Punët Armaturës – Hekurit” sipas aneks-kontratës Ministria e Infrastrukturës shpenzoi 13 mijë e 783 euro.

    Përveç këtyre pozicioneve, ishin paraparë edhe punë të tjera.

    Në aneks ishin paraparë: testimi i urës dhe vendosja e mureve mbrojtëse. Pra këto dy punë nuk ishin paraparë me kontratën bazë.

    Zëvendësministri i Infrastrukturës tha se punët shtesë kanë rrjedhur si pasojë e ri-formatimit të projektit, megjithatë për detaje na udhëzoi të dërgojmë pyetje në Ministrinë e Infrastrukturës.

    “Çështja kryesore është se aty është bo edhe riformatim dhe ndryshim i projektit sepse ka qenë projekti me shtylla në mes të liqenit dhe është riprojektu me shtylla të pjerrëta anësore. Krejt kjo i ka sjellë këto ndryshime dhe ka pas riprojektim dhe aneks-kontratë”- tha për KALLXO.com.

    Kallxo.com i adresoi pyetjet në Ministrinë e Infrastrukturës, por deri në publikimin e lajmit, nuk mori përgjigje, pavarësisht premtimit të zëvendësministrit Durmishi.

    Nga kompania Dreni Inginering SH.P.K., thanë se riprojektimi i urës ishte i pashmangshëm meqë projekti i mëparshëm ishte i pamundur të realizohej.

    “Ministria e ka vendosur ashtu. Nuk ka qenë e mundur me u kry projekti ashtu sepse i ka pasur dy shtylla në ujë”- thonë nga kompania.

    “Jo, projekti ka qenë i hartuar mirë, por kanë ndryshuar kushtet në liqe. Niveli i ujit ka qenë maksimal”- tha ai kur u pyet nëse ka pasur gabime në hartimin e projektit.

    Sidoqoftë, ndërtimi i urës kishte përfunduar 355 ditë, pas nënshkrimit të kontratës dhe 20 muaj pasi që ishte mbyllur për qarkullimin e veturave.

    Ura që shtrihet në magjistralen Prishtinë – Gjilan, ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar rrugën ndihmëse, që shfrytëzohej si rrugë alternative, deri në përfundimin e urës. Ndërsa, në tetor të vitit 2023, kishin filluar procedurat e prokurimit për ndërtimin e urës së re. Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” ishte nënshkruar më 10.01.2024. Vlera e Kontratës së nënshkruar me kompaninë fituese “Dreni Inginiering” ishe 468 mijë e 522 euro.