Ballina

Etiketë: Albulena Haxhiu

  • Kryeministri Kurti takohet me ekipin e QKRMT-së që u nominuan për Çmimin Nobel për Paqe

    Kryeministri i Kosovës, Albin Kurti ka pritur në takim përfaqësues të Qendrës Kosovare për Rehabilitimin e të Mbijetuarve të Torturës të cilët janë nominuar për Çmimin Nobel për Paqe.

    Kurti citohet të ketë përgëzuar QKRMT-në dhe aktivisten Feride Rushiti për nominimin.

    Nominimi u bë nga deputeti i Parlamentit të Suedisë, Magnus Jacobsson.

    “Kryeministri shprehu gatishmërinë për mbështetjen e parezervë të Qeverisë së Republikës së Kosovës për këtë nominim.” – thuhet mes të tjerash në komunikatën e Zyrës së Kryeministrit.

    Pjesëmarrëse në takim ishte edhe ministrja e Drejtësisë, Albulena Haxhiu e cila ka thënë se nominimi ka ardhur si pasojë e punës së madhe të Organizatës për adresimin e dhunës seksuale gjatë luftës në Kosovë.

    Haxhiu citohet të ketë folur për rëndësinë e vazhdimit të fuqizimit të bashkëpunimit të Ministrisë të cilën ajo e udhëheq me QKRMT-në.

    “Në vijim Kryeministri vlerësoi punën e çmueshme të QKRMT-së, duke veçuar rëndësinë e grumbullimit të bazës së të dhënave dhe dëshmive të të mbijetuarve të torturës e dhunës gjatë luftës në Kosovë.” – thuhet në fund të komunikatës.

    Më 16.01.2025, Feride Rushti, drejtoreshë e QKRMT-së njoftoi se së bashku me Qendrën Kosovare për Rehabilitimin e Viktimave të Torturës (QKRMT) është nominuar nga deputeti i Parlamentit suedez, Magnus Jacobsson, për çmimin Nobel për Paqe për vitin 2025.

    Rushiti tha gjatë Konferencës për media më 17.01.2025 se ky nominim është një vlerësim për punën 25-vjeçare që ka bërë QKRMT-ja për kauzën, konkretisht për rehabilitimin e të mbijetuarave të dhunës seksuale gjatë luftës, por edhe një vlerësim që i bëhet Kosovës. Ajo tha se ky nominim do të fuqizojë zërin e viktimave të dhunës seksuale.

    Ndërkaq, në një bisedë për KALLXO.com, deputeti suedez Magnus Jacobsson tha se gjatë një vizite që kishte pasur në Kosovë në vitin 2022 kishte parë edhe punën e mirë që po bënte QKRMT-ja për rehabilitimin e të mbijetuarave të dhunës seksuale gjatë luftës.

    “Shpresoj që Çmimi Nobel për Paqe, i cili shpesh shkon për OJQ-të të cilat punojnë për këto lloj çështjesh dhe mendoj që situata historike në Ballkan, por po ashtu edhe realiteti që akoma nuk kemi atë që ne në Skandinavi e quajmë “Paqe të ngrohtë”, kur ka paqe me marrëdhënie të mira. Akoma është një situatë që ka paqe, por jo marrëdhënie të mira. Shpresoj të ngrisë situatën dhe po ashtu të theksohet se sa është e rëndësishme të shohim situatën e grave në luftë. Mendoj që janë një Organizatë shumë e mirë dhe shpresoj që Komiteti i Çmimit Nobel për Paqe do të vazhdojë me sugjerimin tim.” – tha ndër të tjerash deputeti sudez, në një bisedë për KALLXO.com, më 17.01.2025.

    https://kallxo.com/lajm/nominimi-per-cmimin-nobel-per-paqe-rushiti-vleresim-per-kauzen-e-te-mbijetuarve-te-dhunes-seksuale-gjate-luftes/

  • Haxhiu në Podujevë flet për aksionin ndaj strukturave paralele: Ata prokurorë që nuk guxojnë le të rrinë në shtëpi

    Ministrja e Drejtësisë, Albulena Haxhiu, gjatë tubimit elektoral të mbajtur në Podujevë ka folur për aksionin e Policisë së Kosovës të zhvilluar sot, më 15.01.2025, ndaj strukturave paralele serbe në disa komuna të Kosovës.

    Ajo falënderoi Policinë dhe ministrin e Brendshëm, Xhelal Sveçla, ndërsa tha se Prokuroria i la vetë duke thënë se nuk kanë dorë në mbylljen e strukturave paralele.

    Haxhiu u “çoi” mesazh prokurorëve duke iu kërkuar të shkojnë në shtëpi.

    “Me lejoni të përshëndes Policinë e Kosovës dhe ministrin Sveçla. Sot ministri dhe Policia u la vetë nga Prokuroria. Ata thanë që ne s’kemi dorë në mbylljen e strukturave paralele. Por edhe nga Llapi u çojmë mesazh atyre që ata prokurorë që nuk guxojnë le të shkojnë sepse vendi i tyre nuk është në prokurori, le të rrinë në shtëpi, por nëse përnjëmend nuk i kryejnë detyrat duhet me dhënë përgjegjësi për këtë”- ka thënë Haxhiu.

    “Do të angazhohemi që në Kosovë me pasë shtet të së drejtës dhe të gjithë prokurorët që nuk veprojnë – me u përgjigj para ligjit”- shtoi tutje ajo.

    https://kallxo.com/lajm/policia-per-aksionin-ndaj-strukturave-paralele-thote-se-nderpreu-aktivitetet-e-disa-institucioneve-te-jashteligjshme/

    Mëngjesin e së mërkurës, Policia e Kosovës zhvilloi një aksion të gjerë në disa komuna të Kosovës, duke mbyllur dhjetëra objekte të strukturave paralele serbe, përfshirë objekte komunale, posta e zyra të Administratës Tatimore të Serbisë.

    Përmes një komunikate Policia njoftoi se qëllimi i aksionit ishte ndërprerja e aktiviteteve të disa institucioneve të jashtëligjshme që vepronin si komuna, posta, banka, etj.

    “Policia e Kosovës me njësitë e saja relevante, sot në orët e hershme të mëngjesit, në bashkëpunim dhe koordinim me institucionet përkatëse të Republikës së Kosovës, ka realizuar një operacion të gjerë policor, operacion ky i shtrirë në disa rajone të Kosovës: DRP Prishtinë, DRP Gjilan, DRP Gjakovë dhe DRP Mitrovicë Jugu, për ndërprerjen e aktiviteteve të disa institucioneve të jashtëligjshme që vepronin si komuna, posta, banka, etj., të cilat ofronin shërbime të jashtëligjshme, kundër rendit kushtetues dhe ligjeve pozitive të Republikës së Kosovës”- tha Policia përmes komunikatës.

    Por, Prokuroria e Prishtinës përmes një komunikate më 15.01.2025 ka njoftuar se prokurori i shtetit nuk ka autorizuar kryerjen e bastisjeve nga ana e Policisë në disa lokacione për shkak të dyshimit se ekzistojnë struktura paralele.

    https://kallxo.com/lajm/prokuroria-e-prishtines-konfirmon-se-nuk-qendron-prapa-bastisjeve-ne-objektet-e-strukturave-paralele/

  • Ministria e Drejtësisë dërgon komente në Kushtetuese rreth Ligjit për Konfiskimin e Pasurisë

    Pasi opozita e kishte dërguar Ligjin për Konfiskimin e Pasurisë së Pajustifikueshme në Gjykatë Kushtetuese, ministrja e Drejtësisë, Albulena Haxhiu njoftoi se ka dorëzuar në Kushtetuese komentet lidhur me Ligjin.

    Ministrja Haxhiu tha se përpjekjet e opozitës për ta ndalur konceptin e konfiskimit civil në Kosovë po vazhdojnë.

    “Sot, dorëzuam në Gjykatën Kushtetuese komentet lidhur me pretendimet e sërishme të opozitës kundër Ligjit për Konfiskimin e Pasurisë së Pajustifikueshme.” – shkroi Haxhiu në Facebook, më 14.01.2025.

    Meqë është hera e dytë që Ligji për Konfiskimin e Pasurisë së Pajustifikueshme përfundon në Gjykatë Kushtetuese, Haxhiu tha se shpreson që Kushtetuesja të tregohet më e shpejtë në nxjerrjen e Aktgjykimit.

    “Duke qenë që për herë të dytë radhazi ky Ligj po kontestohet nga opozita në Gjykatën Kushtetuese dhe kur tashmë kemi adresuar secilën kërkesë të Gjykatës në raport me të njëjtin, urojmë që Gjykatës nuk do t’i duhen sërish 16 muaj për të nxjerrë Aktgjykim.” – shtoi ministrja Haxhiu.

    Kryetari i Grupit Parlamentar të Partisë Demokratike të Kosovës, Abelard Tahiri, më 13.12.2024, kishte dërguar në Gjykatën Kushtetuese 16 Ligje të miratuara në seancat e mbajtura më 05.12.2024 – duke i kontestuar ato për shkelje procedurale dhe njërën prej tyre edhe për shkelje të përmbajtjes.

    https://kallxo.com/lajm/pdk-dergon-ne-kushtetuese-16-ligje-te-miratuara-ne-seancen-e-5-dhjetorit/

    Tahiri kishte njoftuar se nga 16 Ligjet e kontestuara, 15 Ligje ishin kontestuar për shkelje procedurale, ndërsa Ligji për Byronë Shtetërore për Verifikimin dhe Konfiskimin e Pasurisë së Pajustifikueshme është kontestuar si në procedurë, ashtu edhe në përmbajtje.

    Ndërkaq, Gjykata Kushtetuese e Kosovës, më 26.06.2024, kishte marrë vendim për të shpallur të pavlefshëm Ligjin për Konfisikimin e Pasurisë së Pajustifikueshme – duke gjetur shkelje kushtetuese në disa Pika të këtij Ligji. Më 21.02.2023, Partia Demokratike e Kosovës (PDK) kishte dërguar këtë Ligj në Kushtetuese për herë të parë, për vlerësim të kushtetutshmërisë.

    https://kallxo.com/lajm/kushtetuesja-rrezoi-ligjin-per-konfiskimin-e-pasurise-se-pajustifikueshme/

  • Ministrja Haxhiu: Blerim Isufaj e di se kush nga prokurorët ka shkuar në zyret e ish-kryeministrave

    Ministrja e Drejtësisë, Albulena Haxhiu, ka thënë se kryeprokurori i Prokurorisë Speciale, Blerim Isufaj, e di se kush nga prokurorët në të kaluarën ka shkuar në zyret e ish-kryeministrave.

    Deklarata e ministres Haxhiu vjen pas debatit rreth ftesës së Prokurorisë Speciale ndaj kryeministrit Albin Kurti, për t’u intervistuar si dëshmitar në rastin e rezervave shtetërore dhe mosparaqitjes së këtij të fundit dhe këmbënguljes për t’u intervistuar në zyret e Kryeministrisë.

    “Blerim Isufaj e di shumë mirë ndonëse në konferencën për media tha nuk kam informacione. Blerim Isufaj e din shumë mirë  kush nga prokurorët kanë shkuar në zyrëet e ish-kryeministrave, por nuk flet për këtë. Prandaj ju lutem si gazetar që të insistoni që përgjigjet e tilla t’i merrni nga kryeprokurori Blerim Isufaj” – tha Haxhiu para gazetarëve më 10.01.2025.

    “Blerim Isufaj e di, ata prokurorë disa prej tyre janë aty, disa jo, për shkak se janë kërcënuar dhe janë detyuruar që të lëshojnë Kosovën”.

    Në anën tjetër, kryeministri i Kosovës, Albin Kurti kishte deklaruar se nuk i është përgjigjur thirrjes së Prokurorisë Speciale për intervisim si dëshmitar në rastin e rezervave shtetërore, pasi sipas tij, qëllimi është që vetë ai të bëhet lajm ndërkombëtar duke hyrë në objektin e Prokurorisë.

    Për këtë kryeministri e akuzoi kryeprokurorin e Prokurorisë Speciale, Blerim Isufajn, të cilin e quajti “regjisor” të asaj pamjeje që Kurti nuk po e pranon ta bëj.

    “Pikërisht ky prokurori (Blerim) Isufaj, ky është regjisori i një pamjeje kur unë hyj në Prokurorinë e Shtetit dhe prodhohet një lajm ndërkombëtar që kryeministri hyn në Prokurori të intervistohet për një rast të korrupsionit. Aty nuk thuhet që si dëshmitar. Ky është qëllimi” – tha Kurti në një emision në Kohavision më 29.12.2024.

    Kurse kryeprokurori Isufaj, duke mos dashur të japë përgjigje të drejtpërdrejtë rreth këtij pretendimi të kryeministrit Kurti, në një konferencë për media me 30.12.2024, tha se “të gjithë janë të barabarë para ligjit” dhe se “nuk i interesojnë deklarimet e tilla”.

    “Ligji është i njëjtë për të gjithë qytetarët e Kosovës, përfshirë edhe zyrtarët e lartë shtetërorë. Ftesa për dhënie dëshmie është një procedurë e rregullt dhe çdo person që ftohet ka përgjegjësi ligjore të bashkëpunojë me institucionet e Drejtësisë. Ju bëj thirrje të gjitha institucioneve publike – përfshirë Qeverinë – të tregojnë përkushtim ndaj sundimit të ligjit dhe të shmangin retorikën që synon politizimin e Drejtësisë”- u shpreh ai.

    Ndonëse nuk ishte paraqitur dy herë për të dhënë dëshminë e tij për ‘rastin e rezervave shtetërore’, kryeministrit të vendit Albin Kurtit i është bërë thirrja për herë të tretë që të paraqitet në objektin e Prokurorisë Speciale – për të dhënë dëshminë e tij në cilësinë e dëshmitarit.

    Edhe hera e tretë për Prokurorinë ka rezultuar njëjtë si dy thirrjet paraprake, pasi kryeministri i vendit nuk i është përgjigjur pozitivisht edhe thirrjes së tretë për t’u paraqitur para prokurorëve të Prokurorisë Speciale, Milot Krasniqi e Valdet Gashi.

    Më 06.01.2025 dhe më 08.01.2025 KALLXO.com ka dërguar pyetje në Prokurorinë Speciale, lidhur me ftesën për kryeministrin Kurti, por nuk ka pranuar përgjigje.

    Po ashtu KALLXO i ka dërguar pyetje edhe Zyrës së Kryeministrit Kurti të mërkurën, më 08.01.2025 dhe më 30 e 31 dhjetor 2024, por nuk kanë kthyer përgjigje.

    Sipas burimeve të KALLXO.com nga Prokuroria, thirrja e tretë i ishte bërë Kurtit rreth një javë para Vitit të Ri.

    Burimet e KALLXO.com kanë konfirmuar se meqenëse tri herë nuk kanë marrë përgjigje pozitive nga dëshmitari, në këtë rast kryeministri Albin Kurti, prokurorët pritet që të procedojnë tutje – duke bërë kërkesë te gjyqtari i procedurës paraprake që i njëjti të sillet me detyrim për të dhënë dëshminë e tij.

    Sipas informacioneve që posedon KALLXO.com, është planifikuar që procedimi për dhënien e dëshmisë së kryeministrit Kurti të bëhet pasi të mbahen Zgjedhjet qendrore, të cilat janë të parapara të mbahen më 09.02.2025, me arsyen që të eliminohen pretendimet se veprimet po merren për qëllime politike.

    Më 11.12.2024 ishte bërë e ditur që kryeministri Kurti ishte ftuar për të dëshmuar, më 16.12.2024, nga Prokuroria Speciale.

    Ndonëse ftesa e Prokurorisë Speciale ka qenë që kryeministri Albin Kurti të paraqitet për intervistim si dëshmitar më 16.12.2024, në ora 09:30, një gjë e tillë nuk kishte ndodhur.

    Zëdhënësja e Prokurorisë, Liridona Kozmaqi, në një deklarim para mediave kishte thënë se është informuar nga Kabineti i Kurtit se Kryeministri gjendet në udhëtim jashtë vendit.

    “Sot nga Kabineti i Kryeministrit Kurti, Prokuroria Speciale është informuar se kryeministri Kurti gjendet në udhëtim jashtë vendit dhe e ka të pamundur të paraqitet sot. Prokuroria Speciale, konform legjislacionit në fuqi, do ta përgatisë një ftesë tjetër për kryeministrin Kurti për një datë tjetër.” – kishte thënë Kozmaqi.

    KALLXO.com kishte raportuar më 20.12.2024 se Prokuroria Speciale kishte dërguar një ftesë të dytë në adresë të kryeministrit Albin Kurti për intervistim në cilësinë e dëshmitarit në ‘rastin e rezervave shtetërore’, por Kryeministri ka ritheksuar gatishmërinë që Prokurorët t’i presë në zyrën e tij.

    Rasti i rezervave shtetërore

    Të pandehur për rastin e rezervave shtetërore janë: Irfan Lipovica, Hafiz Gara e Ridvan Muharremi. Lipovica e Gara dyshohen për veprën penale “keqpërdorimi i pozitës apo autoritetit zyrtar”, ndërsa Ridvan Muharremi për veprën penale “dhënia e ndihmës në kryerje të veprës penale të keqpërdorimit të detyrës apo autoritetit zyrtar”.

    Dy zyrtarë të Ministrisë së Industrisë, Ndërmarrësisë dhe Tregtisë, Irfan Lipovica e Hafiz Gara, bashkë me afaristin Ridvan Muharremi, ishin arrestuar më 18.08.2023 nën dyshimin për veprat: “keqpërdorim i detyrës zyrtare” dhe “dhënie të ndihmës në kryerjen e veprës penale të keqpërdorimit të detyrës zyrtare”.

    Ridvan Muharremi, Irfan Lipovica e Hafiz Gara ishin liruar nga masa e paraburgimit me vendimin e Apelit më 31.08.2023, pasi të njëjtit gjendeshin nën këtë masë nga 19.08.2023.

    Si e dyshuar lidhur me keqpërdorimet e rezervave shtetërore është intervistuar edhe ministrja aktuale e Ministrisë së Tregtisë dhe Industrisë, Rozeta Hajdari më 15.04.2024.

    Çfarë thotë Dosja e Prokurorisë për Ridvan Muharremin?

    Dosja e Prokurorisë për Ridvan Muharremin thotë si ai në periudhën kohore nga muaji shkurt 2022 e në vazhdimësi, me dashje dhe me qëllim të krijimit të kushteve dhe mundësive për realizimin e veprimeve inkriminuese për të pandehurit Irfan Lipovica e Hafiz Gara i ka ndihmuar ata – duke i krijuar kushtet, propozuar e siguruar fillimisht për negocim për furnizim me rezerva shtetërore.

    Prokuroria ka thënë në Dosje se janë propozuar O. E. “Yafe Turizm Insaat Sanayi ve Ticaret Anonim Sirketi” me seli në Bursa të Turqisë për furnizim me grurë dhe “Xanto SP” ZO.O. In, me seli në Gdynia, Poloni për furnizim me vaj luledielli dhe sheqer. E më pas përmes përfshirjes pa autorizim në procesin e negocimit në mes të pandehurve Irfan Lipovica e Hafiz Gara me O. E.  ka luajtur rol kyç në negocimin e kushteve të Kontratave.

    Prokuroria: Lipovica ka lejuar me dijeni të plotë që të anashkalohet procedura e hapur e Prokurimit

    Për zyrtarin e Ministrisë së Industrisë, Ndërmarrësisë dhe Tregtisë, Irfan Lipovica, në Dosjen e Prokurorisë thuhet se ekzistojnë dyshimet e bazuara se nga muaji shkurt i vitit 2022, në Prishtinë, në Ministrinë e Industrisë, Ndërmarrësisë dhe Tregtisë së Kosovës, në cilësinë e personit zyrtar, me pozitë zv/sekretar i përgjithshëm, me qëllim të përfitimit të dobisë pasurore për personin tjetër dhe shkaktim të dëmit të buxhetit të Republikës së Kosovës, ka tejkaluar autorizimet ligjore të parapara për pozitën që e ka ushtruar.

    Kësisoj, sipas Prokurorisë, Lipovica ka lejuar me dijeni të plotë që në kundërshtim me legjislacionin në fuqi të anashkalohet procedura e hapur e Prokurimit publik për blerjen e rezervave shtetërore.

    Në Dosje thuhet se më 25 shkurt 2022 ai ka adresuar në Qeverinë e Kosovës kërkesën për përjashtimin e procedurave të rregullta të Prokurimit, si dhe klasifikimin e kësaj procedure si “sekrete”, me qëllim që ta kufizojë konkurrencën dhe fshehur shkeljen e ligjit. E më pas, duke u bazuar në një Vendim të Qeverisë së Kosovës, i cili e kishte bazën në kërkesën e kundërligjshme të të pandehurit, ka nxjerrë Vendimin për formimin e Komisionit për Negocimin e Kontratave për furnizimin me mallra të rezervës shtetërore për vitin 2022. Me këtë Vendim, sipas Prokurorisë, është anashkaluar procedura e hapur e Prokurimit publik.

    Në Dosjen e Prokurorisë thuhet se më pas edhe përkundër faktit se krijimi i këtij Komisioni nuk kishte bazë ligjore, i pandehuri në drejtim të funksionimit të këtij Komisioni për Negocim me operatorin ekonomik “Yafe Turizm Inseat Sanayi ve Ticaret Anonim Sirketi” dhe “Xanto SP” ZO.O. In, kishte anashkaluar në tërësi dy anëtarët e Komisionit. Sipas Prokurorisë, kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe operatorit ekonomik, përkatësisht firmave nga të cilat do të siguroheshin produktet e rezervës shtetërore.

    Dosja: Hafiz Gara ka adresuar te Irfan Lipovica kërkesën për përjashtimin e procedurave të Prokurimit

    Për zyrtarin tjetër të Ministrisë së Industrisë, Ndërmarrësisë dhe Tregtisë, Hafiz Gara, Dosja e Prokurorisë thotë se ai nga muaji shkurt i vitit 2022, në Prishtinë, në MINT, në cilësinë e personit zyrtar, në pozitën Drejtor i Departamentit të Rezervave Shtetërore të Mallrave (DRSHM/MINT), me qëllim të përfitimit të dobisë pasurore për personin tjetër dhe shkaktim të dëmit buxhetit të Republikës së Kosovës, ka tejkaluar autorizimet ligjore të parapara për pozitën që e ka ushtruar.

    Në Dosje thuhet se në kundërshtim me legjislacionin në fuqi, më datë 25 shkurt 2022 ka adresuar te Irfan Lipovica kërkesën për përjashtimin e procedurave të Prokurimit, edhe pse e ka ditur se kërkesa e tillë nuk ka bazë ligjore.

    Gjithnjë, sipas Prokurorisë, kjo kërkesë më pas i është adresuar Qeverisë së Kosovës, me qëllim që ta kufizojë konkurrencën dhe fshehur shkeljen e ligjit, përkundër faktit se ishte nxjerrë Vendimi për formimin e Komisionit për Negocimin e Kontratave për furnizimin me mallra të rezervës shtetërore për vitin 2022, me të cilin është anashkaluar procedura e Prokurimit publik. E më pas ishte anashkaluar edhe Komisioni, i cili ishte krijuar me qëllim të negocimit, porositjes dhe blerjes së produkteve të rezervës shtetërore të grurit, vajit të lulediellit dhe sheqerit. Dosja vazhdon duke thënë se kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe O. E., përkatësisht firmave nga të cilat do të siguroheshin këto produkte të rezervës shtetërore, pas të cilave ishin nënshkruar Kontratat me kompanitë në Turqi dhe Poloni për Furnizim.

    https://kallxo.com/lajm/prokuroria-speciale-planifikon-ti-drejtohet-gjykates-per-kryeministrin-albin-kurti/

    https://kallxo.com/lajm/kurti-kembengul-qe-te-intervistohet-nga-prokuroria-speciale-ne-kryeministri/

  • Vendimi i Arbitrazhit, ministrja e Drejtësisë: Hotel Grandi mbetet në pronësi të Republikës së Kosovës 

    Ministrja e Drejtësisë, Albulena Haxhiu, ka njoftuar se “Hotel Grandi” mbetet në pronësi të Republikës së Kosovës. 

    Ajo deklaruar se sipas vendimit të Qendrës Ndërkombëtare për Zgjidhjen e Kontesteve Investimeve, ka gjetur që nuk ekziston asnjë premisë, dëshmi apo teori që do t’ia mundësonte Begjet Pacollit pronësinë mbi Hotel Grandin.

    Por Haxhiu ka thënë se Republika e Kosovës ka obligim t’ia kthejë Pacollit vlerën monetare që ai ia kishte dhënë Agjencisë Kosovare të Privatizimit (AKP) në emër të privatizimit.

    “E vetmja gjë për të cilën obligohet Republika e Kosovës, është kthimi i vlerës monetare të cilën Pacolli ia kishte dhënë AKP-së në emër të privatizimit. Edhe pse ai nuk ishte palë në procedurë, AKP kishte pranuar mjetet e tij. Këto tani ne detyrohemi t’i kthejmë.Për shkak të hajnisë 20 vjeçare nëpër institucione shtetërore, paguajmë pasoja ende. Por këto janë të fundit. Pronësinë mbi pronën publike nuk ia lejojmë askujt. Prandaj Grandi mbetet i Kosovës e i qytetarëve të saj”- ka shkruar Haxhiu në Facebook më 04.01.2025. 

    Për të njëjtën çështje, kryetari i Aleancës Kosova e Re (AKR), Behgjet Pacolli, ka thënë se kompania e tij “Mabco Construction Int”, ka fituar arbitrazhin ndërkombëtar të organizuar nga dhoma e posaçme e Bankës Botërore në Washington për rastin e Grandit, ndaj shtetit të Kosovës. 

    “Vendimi parashikon që Qeveria e Kosovës duhet: Të rikthejë shumën e paguar nga Mabco për objektin që, për shkak të refuzimit për të paguar haraç, nuk iu njoh kurrë e drejta e pronësisë, megjithëse pagesen Qeveria e kishte inkasuar në kohë (në vitin 2006). Ky triumf në arbitrazhin ndërkombëtar është një sinjal i qartë se e drejta vonohet, por gjithmonë del në dritë”- ka shkruar Pacolli më 04.01.2025. 

    Tutje, Pacolli ka deklaruar se “vendimi i arbitrazhit ndërkombëtar është obligim për Qeverinë që të kthejë shumën që kompania e tij thotë se  e pagoi në vitin 2006 në llogarinë e shtetit”.

    Sipas tij, qeveri ka refuzuar njohjen e Mabco si aksionare në objektin e blerë, ndonëse thotë se  marrëveshja ishte e qartë dhe qeveria ishte dy herë e informuar për këtë.

    “Ky vendim nxjerr në pah poashtu edhe tentativat për mashtrim të Zylqif Berishës, i cili, me skenarët dhe njerëzit e tij të “fortë”, për 18 vite më ka shkaktuar shumë kokëçarje.

    Hoteli Grand për herë të parë hapi dyert në prill të vitit 1978. Atë kohë konsiderohej si një nga ndërtesat ikonë të kryeqytetit, derisa sot thuajse e gjithë fasada e jashtme e tij është e mbuluar nga reklama të bizneseve e produkteve të ndryshme.

    “Grand Hotel” ishte privatizuar fillimisht në kohën e ish-Agjencisë Kosovare të Mirëbesimit. Për të janë paguar mbi 8 milionë euro, ndërsa investitori ishte zotuar se do të investonte 20 milionë euro dhe të punësonte 570 punëtorë.

    Hoteli ishte privatizuar nga kompania “Union Commerce”, me pronar Zelqif Berishën, mirëpo më vonë Behgjet Pacolli e Remzi Ejupi kishin pretenduar se kanë aksione në këtë hotel.

    Palët ishin përfshirë në një kontest gjyqësor për pronësinë. Por, pas dështimit për të realizuar investimet e zotuara, Agjencia Kosovare e Privatizimit kishte vendosur që t’i tërheqë aksionet dhe e kishte marrë hotelin në pronësi.

    Hapësirat e hotelit tash e disa vite shfrytëzohen për aktivitete e ekspozita të ndryshme, përfshirë Bienalen Manifesta në vitin 2022 që u organizua në disa prej hapësirave të këtij hoteli.