Ballina

Etiketë: Albin Kurti

  • Fushata e Kurtit në Prizren – kritikon Prokurorinë

    Kandidati për Kryeministër i Lëvizjes Vetëvendosje, Albin Kurti bashkë me disa prej anëtarëve të listës me të cilën garon në Zgjedhjet parlamentare ka mbajtur tubim elektoral, në qytetin e Prizrenit, më 17.01.2025.

    Në tubimin në Prizren, Kurti ka folur për rrugën Prizren-Tetovë, punimet për të cilën tha se “kanë filluar dhe po ecin me shpejtësi.”

    Vlera e projektit të ndërtimit të rrugës Prizren-Tetovë është rreth 200 milionë euro – sipas Kurtit.

    “Tuneli pritet të kushtojë rreth 150 milionë euro. Me Qeverinë e Maqedonisë së Veriut kemi Marrëveshje për Financimin dhe Projektimin e Tunelit. Tuneli do t’i bie mes për mes malit të Vërdopit. Ai do të jetë i gjatë gati 6km e gjysmë dhe do të jetë pra edhe më i gjatë se sa tuneli i Kalimashit, përafërsisht 600 metra.” – ka thënë Kurti.

    Kurti, më 13.08.2024, si Kryeministër i Kosovës, pa nga afër fillimin e punimeve për ndërtimin e rrugës Prizren-Tetovë, përkatësisht në segmentin Struzhë – kyçja në autoudhën “Ibrahim Rugova” në Prizren.

    Sipas njoftimit të Qeverisë, vlera totale e projektit është paraparë të jetë 35 milionë euro, me gjatësi prej 20.3 km.

    Gjatë tubimit të tij elektoral në Prizren, Kurti i ka kritikuar krerët e Prokurorisë dhe ka folur për zgjedhjen e Kryprokurorit të ri.

    “Malli i huaj s’bahet i joti. Shtetin tënd s’bën me vjedh. Ktheni paret, fitoni shërbim e shpagim, ku është Z-mobile sot? Zyrtarisht Z-mobile veç një të punësuar e ka, sepse nuk iu duhen më, meqë e kanë kry plaçkitjen. E krerët e Prokurorisë qartazi kanë vdekë për së gjalli. Na duhet doemos, na nevojitet një Kryeprokuror i ri, profesionist, patriot, i ndershëm.” – ka thënë Kurti.

    Më 29.12.2024, Kurti në një intervistë në KTV e ka akuzuar kryeprokurorin e Prokurorisë Speciale, Blerim Isufajn se është “regjisor” i ftesës që i është dërguar Kurtit, për të dëshmuar në Prokurori në rastin e rezervave shtetërore.

    Para Kurtit ka folur ministri i Kulturës, Hajrulla Çeku, i cili edhe vjen nga Prizreni.

    Sipas Çekut, janë duke e mbrojtur trashëgiminë e Prizrenit, të cilin tha se po e bëjnë gati për UNESCO dhe po investojnë në sport, sepse Prizreni do të jetë mikpritës i Lojërave Mesdhetare.

    “Po e zhvillojmë kulturën, sepse Prizrenin do ta nominojmë për Kryeqytet kulturor evropian.” – ka thënë Çeku.

    E ministrja e Arsimit, Arbërie Nagavci tha se vetëm në arsim në këtë mandat kanë investuar mbi 6 milionë euro në Prizren.

    Sipas Nagavcit janë ndërtuar tashmë tri Çerdhe për 540 fëmijë të Prizrenit. Edhe dy Çerdhe të tjera janë në ndërtim e pritet të përfundojnë sivjet.

    “Në Prizren, brenda një mandati, deri në fund të këtij viti janë ndërtuar pesë Çerdhe për fëmijët e Prizrenit. A e dini se sa Çerdhe janë ndërtuar në Kosovë, në 17 vjetët e fundit? Vetëm 4 Çerdhe në të gjithë Kosovën.” – tha Nagavci.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Për njё muaj partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.

    Për këto Zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.

  • Bojkotimi i tri kanaleve televizive nga LVV-ja – sekretari i saj i përgjigjet kritikave

    Sekretari i Përgjithshëm i Lëvizjes Vetëvendosje, Alim Rama i është përgjigjur letrës së hapur të Qendrës Europiane për Lirinë e Shtypit dhe Medias (ECPMF) që ia adresoi liderit të LVV-së, njëherazi kryeministrit të Kosovës, Albin Kurtit, në lidhje me vendimin e partisë së tij, që t’i bojkotojë tri kanale televizive në vend gjatë fushatës zgjedhore.

    Sekretari Rama i është përgjigjur letrës së ECPMF një javë pasi ajo u publikua, më 10.01.2025. Ndërsa, LVV ka bojkotuar kanalet televizive – T7, Klan Kosova dhe TV Dukagjini, gjatë fushatës zgjedhore që ka nisur më 11.01.2025.

    Ndonëse ECPMF ia kritikoi transparencën dhe llogaridhënien partisë në pushtet, Rama thotë se LVV mbetet e palëkundur në angazhimin e saj për këto dy çështje.

    Në letrën e saj, Qendra Europiane për Lirinë e Shtypit dhe Medias i ka bërë thirrje kryeministrit Kurti që ta anulojë vendimin për bojkotimin e këtyre mediave dhe të sigurohet që Vetëvendosja të sigurojë qasje të barabartë në informacione publike për këto media.

    “Na vjen keq për çdo keqkuptim ose dezinformatë rreth kontekstit të çështjes në fjalë. Kjo Qeveri, e udhëhequr nga partia jonë, përfaqëson udhëheqjen më demokratike që Kosova ka pasur. Ne mbajmë lirinë e fjalës, pavarësinë e medias dhe një mjedis të gjallë e të larmishëm mediatik si shtyllat themelore të demokracisë dhe parimet thelbësore që ne i mbështesim me krenari.” – ka shkruar Rama.

    Sipas Ramës, si parti politike kanë të drejtë të zgjedhin kanalet komunikuese “që më së miri përcjellin mesazhin e tyre dhe të sigurojnë se publiku është i mirë-informuar rreth Programit politik të tyre për mandatin e ardhshëm.”

    “Është esenciale të qartësojmë se ky nuk është një bojkot i medias. Vendimi për t’i përjashtuar tri kanale (televizive) specifike nuk e minon mjedisin e pasur dhe të larmishëm të medias në Kosovë, që përfshin platforma të numërta për debat dhe shumë gazetarë profesionistë në vend.” – ka theksuar Rama.

    Rama thotë madje se në tri studiot e kaneleve televizive të cilat i ka bojkotuar LVV ka ofendime të shpeshta e akuza të pabaza.

    “Gjuha toksike, ofendime të shpeshta dhe akuza të pabaza që mbizotërojnë në këto tri studio, të shoqëruara me raportim të njëanshëm dhe joobjektiv. Dështuan të ofrojnë një platformë të drejtë për partinë tonë, për të prezantuar planet e saj të fushatës dhe qëllimet.” – ka thënë Rama.

    Megjithatë, Rama përmend se LVV nuk është duke ia kufizuar ndonjë gazetari apo organizate mediatike mbulimin e periudhës së fushatës zgjedhore apo aktiviteteve të partisë.

    “Vendimi i përket vetëm mospjesëmarrjes në debate dhe programe që nuk ofrojnë një mjedis të favorshëm për t’i shprehur këndvështrimet tona.” – ka shtuar Rama.

    Rama shton po ashtu se kritika gjithmonë ka qenë një gur themel i Lëvizjes së tyre dhe se i mirëpresin mendimet e ndryshme edhe kur ato i sfidojnë.

    “Ne kategorikisht refuzojmë pretendimet e pavërteta se Qeveria jonë ka kërkuar t’i kontrollojë mediat dhe se  përfaqësuesit tonë kanë sulmuar gazetarët e pavarur, profesionistë. Mjedisi i larmishëm i medias dhe prezenca e zërave dhe qëndrimeve të ndryshme – duke përfshirë edhe kritikat më të ashpra të Qeverisë dhe Lëvizjes Vetëvendosje si dëshmia më e fortë e kësaj.” – ka thënë Rama.

    Gjatë mandatit të tyre, Rama thotë se Kosova ka bërë hapa të rëndësishëm për lirinë e medias, siç shprehet ai, që këto reflektojnë në indeksët ndërkombëtar.

    “Ky progres megjithatë është sfiduar nga presionet e jashtme, duke përfshirë tensione të eskaluara dhe sulme në veri më 2023. Këto sulme, të ushqyera nga fqinji ynë verior nuk i ka rrezikuar vetëm gazetarët, por gjithashtu e pengoi aftësinë e tyre për të performuar punën e tyre kritike.” – ka potencuar Rama.

    “Ne mbetemi të përkushtuar për t’u angazhuar në diskutimet publike rreth Programit, ideve dhe vizionit tonë për të dy mandatet, të tanishmin dhe të ardhshmin. Lëvizja Vetëvendosje dhe Qeveria e saj do të vazhdojnë ta mbrojnë lirinë e fjalës, lirinë e medias dhe komunikimit transparent me publikun përmes medias.” – ka thënë në fund Rama.

    Në anën tjetër, në letrën e saj, ECPMF ka theksuar se duke i bojkotuar kanalet kryesore televizive, minohet e drejta e publikut për informacion dhe roli esencial i gazetarëve në promovimin e transparencës dhe llogaridhënies.

    “Të gjithë gazetarët duhet të jenë në gjendje të raportojnë lirisht dhe në mënyrë të drejtë për periudhën zgjedhore. Mbrojtja e lirive të medias dhe e drejta e publikut për një proces të informuar dhe demokratik duhet të jetë prioritet.” – thuhet në letrën e ECPMF-së për Kurtin.

    ECPMF tha se gjatë katër vjetëve të kaluara, derisa Reagimi i Shpejtë i Lirisë së Medias (MFRR) nga afër ka monitoruar zhvillimet në lirinë e medias, kanë qenë dëshmitarë të një rënie shqetësuese të lirisë së mediave në Kosovë. 

    “Në vitin 2022, partnerët e Platformës për Sigurinë e Gazetarëve të Këshillit të Europës vizituan Kosovën për të vlerësuar gjendjen e lirisë së medias dhe mbrojtjen e gazetarëve në vend. Derisa pak progres është vërejtur, misioni konstatoi se “retorikë toksike dhe fushatat e shpifjeve kundër medias, financimi i pamjaftueshëm i transmetuesit publik dhe mungesa e transparencës rrezikojnë të minojnë progresin.” – ka thënë ECPMF.

    Më tej, ECPMF bazohet edhe në të dhënat e Asociacionit të Gazetarëve të Kosovës për sulmet dhe kërcënimet ndaj gazetarëve, të cilat thotë se janë dyfishuar.

    “Shumica e këtyre sulmeve përfshijnë sulme verbale nga anëtarë të partisë suaj, të cilët i kanë etiketuar gazetarët si “spiunë serbë” ose bashkëpuntorë dhe i kanë akuzuar që kanë lidhje me interesat serbe.” – i ka adresuar ECPMF Kurtit.

    Qendra Europiane për Lirinë e Shtypit dhe Medias ia ka përmendur Kurtit edhe miratimin e Projektligjit për Komisionin e Pavarur për Media (KPM) në Kuvendin e Kosovës, më 12.07.2024.

    Sipas Qendrës, ky Ligj i ri për Median dështoi të përfshijë rekomandimet kritike të Këshillit të Europës, Komisionit Europian dhe shoqërisë civile.

    “Kosova urgjentisht ka nevojë të marrë masa për të mbrojtur lirinë e medias, të promovojë transparencë dhe të sigurojë llogaridhënien e zyrtarëve publikë. Publiku, veçanërisht gjatë fushatave zgjedhore ka të drejtën themelore të qaset në informacione të ndryshme, të shqyrtojë me kujdes premtimet politike dhe t’i mbajë politikanët llogaridhënës.” – ka theksuar ECPMF.

    Organizatat e shoqërisë civile reagojnë ndaj Vetëvendosjes për bojkotin e “Debat Përnime”

    KALLXO.com ka raportuar gjithashtu se një grup prej dhjetëra organizatave joqeveritare kanë reaguar ndaj bojkotit të subjektit politik, Lëvizja Vetëvendosje për mos të marrë pjesë në emisionin “Debat Përnime” – prodhim i dy organizatave, Rrjetit Ballkanik të Gazetarisë Hulumtuese (BIRN) dhe Internews Kosova.

    Në reagimin e tyre, OJQ-të kanë theksuar që bojkoti për mospjesëmarrje në “Debat Përnime” e cenon interesin publik dhe informimin e drejtë të qytetarëve në kohë Zgjedhjesh.

    “Ne, organizatat e poshtëshënuara e kemi marrë me shumë shqetësim vendimin e Lëvizjes Vetëvendosje, me të cilin kjo parti ka vendosur të bojkotojë debatin zgjedhor të organizuar nga organizatat e shoqërisë civile, Rrjeti Ballkanik për Gazetari Hulumtuese – BIRN dhe Internews Kosova, organizata anëtare e International Fact-checking Network – IFCN dhe European Factchecking Standards Network – EFCSN dhe fituese e çmimeve ndërkombëtare për gazetari hulumtuese.” – thuhet në reagim.

    Partia Lëvizja Vetëvendosje mori vendim bojkotimin e tre televizioneve në vend, duke përfshirë edhe formatin e debateve zgjedhore “Debat Përnime”.

    “Vendimi për të bojkotuar debatin e organizuar nga organizata të certifikuara të verifikimit të fakteve dhe organizata me renome në gazetari hulumtuese cenon interesin publik dhe informimin e drejtë të qytetarëve për ofertën politike të partive politike dhe llogaridhënies.” – thuhet tutje në reagim.

    Ndaj bojkotimit të “Debat Përnime” ka reaguar edhe drejtoresha e Rrjetit Ballkanik të Gazetarisë Hulumtuese dhe drejtuesja e emisionit “Debat Përnime”, Jeta Xharra.

  • Gërvalla në Istog: LDK-ja e Rugovës ka vdekur, shpirti i tij jeton në Partinë Guxo

    Kryetarja e Partisë Guxo, Donika Gërvalla, gjatë tubimit në Istog më 16.01.2025 i ka ftuar votuesit tradicionalë të Lidhjes Demokratike të Kosovës ta votojnë partinë e saj në zgjedhjet që mbahen më 09.02.2025.

    Sipas saj, qytetarët duhet t’u besojnë atyre që përfaqësojnë presidentin tashmë të ndjerë Ibrahim Rugova me dinjitet e jo atyre që, sipas saj, e përdorin atë si figurë marketingu.

    Ajo ka thënë se “LDK-ja e Rugovës ka vdekur”.

    “LDK-ja e Rugovës ka vdekur të nderuar zonja e zotërinj, por shpirti i tij jeton në Partinë GUXO. Kushdo që pyet nga vjen GUXO dhe çka na shtyn përpara mund ta shohë që Rugova është në GUXO jo më në lidhjen e re, rrugën e re, në qorrsokak. Unë i ftoj votuesit tradicionalë të LDK-së, nëse ende besoni në vizonin e presidentit Rugova, në një të djathtë të qëndrueshme që ndjek në radhë të parë interesin e Kosovës, derën e keni të hapur në Partinë Guxo. Besojuni atyre që përfaqësojnë Rugovën me dinjitet, jo atyre që e përdorin si figurë marketingu apo atyre që e luftuan, si Isa”- ka thënë ajo.

    Ndërsa, kandidati i LVV-së, për kryeministër, Albin Kurti, ka thënë se në rrugëtimin e tyre katërvjeçar nuk e kanë harruar asnjëherë Istogun.

    Sipas tij, në arsim i kanë ndarë 1.2 milion euro për dy shkolla në fshatrat e kësaj komune.

    “Përveç arsimit, bujqësisë, ushtrisë, kemi investuar dhe po investojmë në Istog edhe në shëndetësi. Për Qendrën Kryesore të Mjekësisë Familjare në Istog punimet kanë filluar”- ka thënë ai.

    Kurti ka thënë se komunat e Kosovës kurrë nuk kanë pasur kaq shumë ngritje të buxhetit sesa në Qeverinë Kurti.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Kurti merr pjesë në inaugurimin e Bankës në veri, në të cilën ka aksione edhe Behgjet Pacolli

    Kryeministri i Kosovës, Albin Kurti ka njoftuar se Banka Ekonomike sot, më 16.01.2025, ka hapur Degën e saj në Leposaviq.

    Përmes një postimi në Facebook, Kurti ka thënë se kjo Degë e Bankës ka aktualisht pesë punëtorë, tre serbë e dy shqiptarë.

    “Mbi 300 biznese janë hapur dhe afër 500 qytetarë nga komuniteti serb janë punësuar në Veri të Kosovës, gjatë vitit 2024. Sot, Banka Ekonomike e hapi Degën e 33-të të saj në Kosovë, kësaj radhe në Leposaviq – duke ofruar shërbime moderne për biznese dhe qytetarë, e të cilat i ofron edhe në secilën pikë tjetër në Kosovë. Vetëm se këtu tash me pajisje të reja të teknologjisë së fundit.” – ka shkruar Kurti në Facebook.

    Sipas të dhënave në Agjencinë e Regjistrimit të Bizneseve të Kosovës (ARBK), në Bankën Ekonomike ka aksione edhe kryetari i AKR-së, Behgjet Pacolli.

    Pacolli, sipas këtyre të dhënave, mban 34.82% të aksioneve të kësaj Banke komerciale, që është aksionari me përqindjen më të madhe të aksioneve.

    Gjithashtu, edhe sipas të dhënave të publikuara të Bankës Ekonomike në ueb-faqen e saj zyrtare, figuron që Behgjet Pacolli është aksionari më i madh në këtë Bankë.

    Kujtojmë që në tetor të vitit 2019, Pacollit i ishte publikuar një fotografi me Millan Radoiçiqin – fotografi që pretendohej se ishte shkrepur në vitin 2017.

    Rrjeti i Gazetarisë Hulumtuese në Serbi – KRIK kishte publikuar një foto në të cilën shihen bashkë kryetari i AKR-së, Behgjet Pacolli, Goran Rakiq dhe Millan Radoiçiq.

    Pacolli e kishte komentuar fotografinë me Millan Radoiçiq në Kallxo Përnime.

    “Unë kurrë s’e kam njohur kush është Millan Radoiçiqi. As emrin nuk ia kam dëgju. Unë kam shkuar në Budva dhe është parkuar jahti im në një vend afër, sepse ka qenë më i madhi prej tyre. Derisa është lidh jahti im, aty është parkuar një jaht tjetër.” – kishte thënë Pacolli.

    “Unë kurrë s’e kam njohur kush është Millan Radoiçiqi. As emrin nuk ia kam dëgju. Unë kam shkuar në Budva dhe është parkuar jahti im në një vend afër, sepse ka qenë më i madhi prej tyre. Derisa është lidh jahti im aty, është parkuar një jaht tjetër.” – thoshte Pacolli.

    “Është përgatitur sofra për me ngrenë darkë me fëmijët e mi, në atë tavernën aty. Në anën tjetër unë po i shoh deputetët e Republikës së Kosovës, nuk ua kam ditë emrat, por e kam njohur Goran Rakiqin. E kam kryer darkën dhe kemi dalë prej aty. Del Rakiqi prej aty, edhe vjen tek unë edhe thotë ‘A Behgjet, sa mirë që po të shoh?’. I kam thanë: ‘Prit, se e kam një befasi për ty, edhe e kam thirrë Agim Bahtirin, sepse ata janë shokë dhe takohen. Bile Agim Bahtiri m’u ka idhnu, se ka mendu që e kemi planifiku me u taku e s’e kam ftuar.” – vazhdon rrëfimi i Pacollit.

    “Rakiqi më thotë, eja te ne, te jahti ynë për pije. Pa asnjë paragjykim, unë hyj aty. Të betohem dhe ta japë fjalën e nderit. E kam pi një pije. S’e kam ditë jahta e kujt ka qenë. Sa kemi qenë aty, ka ardhur një person tjetër dhe është ul. Askush s’e ka prezantuar si Millan Radoiçiq. Unë jam dal, i kam marrë fëmijët e mi dhe jam dal në qytet. Unë i kam njohur veç 3 njerëz aty: Rakiqin dhe dy deputetë.” – kishte thënë Pacolli.

    Sipas tij, takimi kishte zgjatur vetëm 10 minuta dhe nuk e ka pasur ndonjë kërkesë ndaj tij.

     

  • AAK gjobitet më 12 mijë euro për deklaratat e Ramush Haradinajt kundër Albin Kurtit

    Paneli Zgjedhor për Ankesa dhe Parashtresa (PZAP) ka dënuar me 12 mijë euro Aleancën për Ardhmërinë e Kosovës, pas Ankesës së Lëvizjes Vetëvendosje me pretendimin se kryetari i AAK-së, Ramush Haradinaj ka drejtuar akuza të pabaza dhe të pavërteta.

    Ankesa e LVV-së ishte se Haradinaj ishte drejtuar me fjalët “Duhet me hek mashtruesin” dhe “Dojmë me e rrit mbrojtjen, nuk dojmë me bo lojna me sigurinë nacionale, pas shpinës së aleatëve tanë, e në interes të Rusisë dhe Serbisë nga argati i tyre”.

    Sipas Ankesës së LVV-së, më tej, shkelja e Kryetarit të këtij subjekti vazhdon “Shko Albin te Prokurori, se nuk po dojmë me u vjedhë rezervat shtetërore, buka e ushtarit, as energjia. Shko te Prokurori, bashkë me hajnat se je Shef i hajnave.”, e duke vazhduar me shprehjet “A jeni për me e çu mashtruesin në shpi?”, “UÇK nuk ka mercenarë, ti dhe soji yt jeni mercenarë”.

    Tutje, në Ankesë parashtruesi thekson se në tubimin e njëjtë kandidati tjetër për Deputet nga radhët e AAK-së, Ardian Gini thotë “është Byro e Korrupsionit”.

    Për këtë rast, PZAP ka pranuar Ankesën e LVV-së dhe ka gjobitur AAK-në me 12 mijë euro.

    Sipas Vendimit, AAK-ja ka afat prej 15 ditësh që ta paguajë gjobën.

    Aleanca për Ardhmërinë e Kosovës, e gjobitur në këtë rast, ka kundërshtuar Ankesën – duke thënë se Ankesa është parashtruar mbi bazën e një lajmi të publikuar në Gazetën Nacionale.

    “Tutje, në përgjigje të Ankesës theksohet se Gazeta Nacionale në artikull përkatësisht ka parafrazuar. Pra, kryetari i subjektit politik AAK, Ramush Haradinaj, në asnjë pjesë të fjalimit të tij politik të datës 12.01.2025 nuk ka përdorur shprehjet e specifikuara në Ankesë. AAK thekson se nuk kemi të bëjmë me shkeljet e pretenduara nga Ligji për Zgjedhjet e Përgjithshme në Kosovë.” – thuhet në Vendim.

    Vendimin e plotë të PZAP-së, mund ta gjeni në këtë LINK.