Ballina

Etiketë: Albin Kurti

  • Kryeministri Kurti për presidentin Rugova: I ka lënë Kosovës një trashëgimi të madhe politike, institucionale dhe letrare e studimore

    Në 19-vjetorin e vdekjes së presidentit Ibrahim Rugova, kryeministri Albin Kurti e ka kujtuar duke e cilësuar si një njeri paqësor dhe besnik ndaj rrugës së dialogimit në politikë.

    Sipas Kurtit, Rugova luajti një rol kyç në ndërkombëtarizimin e çështjes së Kosovës në fillim të viteve 1990.

    “Në historinë moderne të Kosovës, një dekadë e gjysmë (1989-2006) e saj është e lidhur ngushtë me emrin e Presidentit Rugova, periudhë kjo që fillon me rezistencën paqësore të viteve ’90 dhe përfundon me periudhën e ndërtimit të institucioneve të Kosovës që kulmoi me shpalljen e pavarësisë së saj më 2008”- tha Kurti.

    Kurti tha se Rugova i ka lënë Kosovës një trashëgimi të madhe politike, institucionale dhe letrare e studimore, duke theksuar se është shtuar edhe një botim i veçantë për raportimet e shtypit italian dhe gjerman për presidentin Rugova.

    “Në muajt e fundit, korpusit të botimeve për Presidentin Ibrahim Rugova, u është shtuar dhe një botim i veçantë për raportimet e shtypit italian dhe gjerman për Presidentin Rugova. I përgatitur për botim nga studiuesi Bejtullah Destani, ky libër mund të merret si një hyrje e mirë për t’u njohur me profilin politik të Presidentit Rugova, parë nga perspektiva e raportimeve të mediave ndërkombëtare dhe si një mënyrë për ta kujtuar atë në këtë përvjetor të vdekjes së tij”- tha Kurti.

    I pari i Qeverisë shtoi se këto botime u bënë në shenjë mirënjohjeje dhe respekti për presidentin Ibrahim Rugova në 19-vjetorin e vdekjes së tij.

  • Kurti në Forumin Ekonomik në Davos do të nënshkruajë Marrëveshjen me shtetet e EFTA-s

    Kryeministri i Kosovës, Albin Kurti së bashku me dy ministret atë të Industrisë, Ndërmarrësisë dhe Tregtisë, Rozeta Hajdari dhe të Ekonomisë, Artane Rizvanolli kanë udhëtuar në Zvicër për të marrë pjesë në Forumin Ekonomik Botëror në Davos.

    Shefi i Ekzekutivit kosovar atje do të nënshkruajë Marrëveshjen e Tregtisë së Lirë me vendet anëtare të EFTA-s (Shoqatës Evropiane të Tregtisë së Lirë). 

    “Kosova është i vetmi vend në rajon që përveç negocimit për tregti të mallrave, ka negociuar edhe për tregti të shërbimeve me EFTA-n. Kjo Marrëveshje do të krijojë mundësi të reja për prodhuesit dhe kompanitë tona vendore dhe do të forcojë partneritetin ekonomik dhe tregtar ndërmjet vendit tonë dhe Norvegjisë, Zvicrës, Lihtenshtajnit dhe Islandës si shtete anëtare të EFTA-s.” – shkruan në njoftimin e Kryeministrisë.

    Pas katër raundeve negociata të filluara në vitin 2022, Kosova ka përmbyllur me sukses më 26.09.2024 kapitujt negociues për Marrëveshjen e Tregtisë së Lirë me shtetet e EFTA-s: Islandën, Lihtenshtajnin, Norvegjinë dhe Zvicrën.

    Shoqata Evropiane e Tregtisë së Lirë (EFTA) është një organizatë ndërkombëtare që promovon tregtinë e lirë dhe bashkëpunimin ekonomik ndërmjet shteteve të saj. EFTA ka si qëllim heqjen e barrierave tregtare dhe lehtësimin e fluksit të mallrave dhe shërbimeve midis vendeve anëtare. Organizata është e ndryshme nga Bashkimi Evropian (BE), megjithatë ajo bashkëpunon ngushtësisht me BE-në përmes marrëveshjeve të ndryshme.

    Gjatë qëndrimit atje, kryeministri Kurti do të ketë takime me përfaqësues shtetërorë të vendeve mike e partnere dhe me investitorë potencialë – sipas Zyrës së Kryeministrit (ZKM). Gjithashtu, ai do të marrë pjesë në Panelin e diskutimit me titull “Demokracitë e qëndrueshme në një epokë të ndryshimit” dhe Panelin “Inteligjenca Artificiale për Njerëzimin: inovacioni etik në epokën e Inteligjencës”. 

    “Të dy këto Panele do të mbahen në Shtëpinë e Kosovës (House of Kosova) në Davos, e cila është hapur për herë të parë.” – njofton ZKM.

    Më 18.12.2024, gjatë mbledhjes Qeveria e Kosovës ka ndarë 350 mijë euro për pjesëmarrje në Forumin Ekonomik në Davos, e përfaqësuar nga Kosova House.

    Prej 20 deri më 24 janar 2024, derisa Konferenca e Davosit mbledh lojtarët kryesorë ekonomikë dhe përfaqësuesit qeveritarë, Kosova ka hapur hapësirën e saj “House of Kosovo”, kryesisht fal dy zhvilluesve të suksesshëm të patundshmërive, Esat Lika nga fshati Carrabreg në Kosovë dhe Ertion Axha nga Durrësi në Shqipëri.

    Këta dy merren me biznesin e patundshmërive dhe ia kanë dalë të sigurojnë një shesh prej 11.500 metrash katrorë të një ish-Sanatoriumi, që ndodhet rreth 800 metra larg prej Sallës së Kongresit të FEK-ut, me synim ta kthejë në një resort luksoz.

  • Kurti në Obiliq: Vetëm për dy vjet, KEK-ut ia kemi shtuar 745 punëtorë të rinj

    Lëvizja Vetëvendosje në vazhdën e aktiviteteve të fushatës për zgjedhjet që pritet të mbahen më 09.02.2025 ka mbajtur tubim në Obiliq. 

    Sipas faqes zyrtare të LVV-së, kandidati për deputet nga kjo parti, Halil Thaçi, ka thënë se gjatë katër viteve në qeverisje është punuar në punësim, barazi, zhvillim dhe sovranitet.

    “Kryeministri i Republikës së Kosovës, z. Albin Kurti, u shpreh se ashtu siç është shtëpia për familjen, është edhe shteti për popullin. Ai theksoi se si qeveri kemi zhvilluar ekonominë dhe kemi mbrojtur sovranitetin e Republikës cep më cep territorit”- thuhet në njoftimin e tyre. 

    Sipas njoftimit, kandidati për kryeministër, Albin Kurti, gjatë këtij tubimi ka theksuar se Qeveria e tij ka investuar në KEK dhe në komunën e Obiliqit, duke thënë se kanë hapur vende të reja të punës. 

    “Vetëm për dy vjet, KEK-ut ia kemi shtuar 745 punëtorë të rinj. E prej këtyre 745 punëtorëve të rinj, mbi 400 janë banorë të Kastriotit; pra, më shumë se gjysma e të punësuarve të rinj në KEK janë nga komuna juaj e dashur. Ky nuk është favorizim, kjo është drejtësi, është meritë. Kush më mirë se banorët e Kastriotit e njeh KEK-un dhe terrenin e tij? Kush punon me më shumë zell për KEK-un sesa banorët e Kastriotit? Askush.44 gra, ose 22% e të gjitha grave që punojnë sot në KEK, janë punësuar gjatë mandatit tonë qeverisës. Ndërkaq, në mandatin e ri do të kemi programe të reja, posaçërisht për gra e vajza, për punësim në sektorin e energjisë dhe në KEK. Ne punësojmë në KEK, sepse ne investojmë në KEK”- citohet të ketë thënë Kurti, sot më 20.01.2025. 

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj partitë politike pritet të mbajnë tubime elektorale me qytetarët për të fituar besimin e tyre në garën për zgjedhjet parlamentare të 09.02.2025.Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

     

  • Murati në Ferizaj: Qeveria Kurti e ka thyer rekordin e investimeve kapitale me 654 milionë euro në vitin 2024

    Lëvizja Vetëvendosje ka vazhduar fushatën për zgjedhjet e 09.02.2025 me një tubim elektoral në Ferizaj më 19.01.2025.

    Kandidati për deputet, Hekuran Murati, ka thënë se me Qeverinë Kurti për herë të parë në historinë e vendit ka pasur mbështetje për bizneset prodhuese duke ua subvencionuar kreditë investuese deri në 20 për qind.

    Ndërsa, ka thënë se Qeveria Kurti e ka thyer rekordin e investimeve kapitale me 654 milionë euro në vitin 2024.

    “Për herë të parë në historinë e vendit ka patur mbështetje për bizneset prodhuese, duke ua subvencionuar kreditë investuese deri në 20 për qind, ku vetëm në Ferizaj janë 71 biznese që janë mbështetë me 2.7 milionë euro për të investuar në kapacitete prodhuese… Ka qenë Qeveria Kurti ajo që e ka thy rekordin e investimeve kapitale me 654 milionë euro në vitin 2024, po për më tepër edhe e ka ulur borxhin e faturave të papaguara ndaj bizneseve nga 140 milionë në vetëm 30 milionë euro, pra kështu mbështeten bizneset”- ka thënë ai.

    Ndërsa, kandidati i LVV-së për kryeministër, Albin Kurti, ka folur për sistemin e drejtësisë në Kosovë.

    Sipas Kurtit, qytetari i thjeshtë i vendit pret me vite e vite për një lëndë që mrizon nëpër sirtarët e gjykatave dhe nuk i vjen asnjëherë rendi për adresim e trajtim.

    “Ndërkaq krimineli i cili arrestohet në veri të Kosovës, lirohet brenda pak ditëve nëse nuk ia kanë heqë urdhërarrestin paraprakisht sepse për këtë punë po gjejnë kollaj e shpejtë shumë kohë. Prandaj kjo gjë të dashur ferizajli nuk durohet më dhe duhet të marrë fund. Për të marrë fund padrejtësia, për të ardhë drejtësia e re, garancia jeni ju, mundësia jemi ne, shansi është 9 shkurti e numri është 118”- është shprehur Kurti.

    Fjalën e radhës e pati kandidatja për deputete, Albulena Haxhiu, e cila tha se “Reforma në drejtësi dhe ligji për Byronë për Konfiskimin e Pasurisë së Pajustifikueshme është bërë kërcënim për opozitën”.

    Lëvizja Vetëvendosje më 19.01.2025 ka mbajtur tubim edhe në Shtime.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Kurti në Gjilan, zotohet për investime milionëshe në 20 stadiume në komunat e Kosovës

    Kandidati për kryeministër i Lëvizjes Vetëvendosje, Albin Kurti, bashkë me disa prej anëtarëve të listës me të cilën garon në zgjedhjet parlamentare ka mbajtur tubim elektoral në qytetin e Gjilanit.

    Kurti ka thënë se gjatë katër viteve të qeverisjes së tij, Kosovën e kanë bërë të pavarur nga korrupsioni qeveritar dhe pazaret me Serbinë.

    “Në fund të këtij mandati tonë s’ka dyshim që këto katër vite ishin katër vitet më të mira jo vetëm në Kosovën e pa varur por që nga çlirimi”- u shpreh ai më 18.01.2025.

    Kurti ka theksuar se gjatë këtij mandati kanë rinovuar klinika, ndërsa thënë se për Spitalin e Gjilanit janë ndarë 8 milionë euro për renovimin e disa reparteve.

    Ai u zotua për investime milionëshe në 20 stadiume moderne në komunat e Kosovës.

    “Në mandatin tonë tjetër në përgatitje të Lojërave Mesdhetare me 200 milionë investime në total do t’i kemi 20 stadiume moderne në 18 komuna të Kosovës përfshirë stadiumin e Gjilanit. Stadiumin e Gjilanit do ta përfundojmë. Me na vonu na kanë vonu, me na ndalë nuk ka mundësi. Na kanë vonu ata që kontratën e kaluar e kanë bërë me shkelje”- u shpreh ai.

    Kurti tutje ka thënë se shqiptarët e Luginës me qeverinë e tij kanë linjë të rregullt buxhetore.

    Numri dy i listës së LVV-së, Glauk Konjufca gjatë fjalimit “ja uroi” Kurtit mandatin e tretë të Qeverisë që tash pasi tha se po e sheh përkrahjen e qytetarëve nëpër tubime.

    Sipas tij, Gjilani është ndër qytetet e para që është lidhur me Lëvizjen Vetëvendosje.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.