Ballina

Etiketë: Albin Kurti

  • LVV nё Gjakovё pёr hapjen zyrtare tё fushatёs, Kurti: Qeveria jonë nuk do të ju gënjej

    Lëvizja Vetёvedosje e ka hapur zyrtarisht sot mё 11.01.2025 fushatёn pёr zgjedhjet e 9 shkurtit, me njё tubim tё mbajtur nё sallёn e sporteve “Shani Nushi, nё qytetin e Gjakovёs.

    Numri dy në listën e deputetëve të LVV-së, Glauk Konjufca e mori fjalën për të falënderuar të gjithë të pranishmit, duke folur për “dallimin mes Vetëvendosjes dhe atyre që kanë qeverisur 20 vjet”.

    Ai ka përmendur shtesat për fëmijë e lehona, mbështetjen për gra, për punëtorë, rritjen e pensioneve e të tjera.

    E kandidati për kryeministër i LVV-së, Albin Kurti u tha qytetarëve që Qeveria e tij nuk do t’i gënjej e zhgënjej asnjëherë.

    “Për rininë e kemi punësimin, për gratë barazinë, për opozitën e kemi opozitë, për fëmijët i kemi shtesa, për Serbinë e kemi policinë e ushtrinë e dialogun, për pleqtë e kemi pensionin, për të gjithë e kemi shëndetësinë”- u shpreh ai.

    Sipas tij, me qeverinë e tij partnerja tregtare është Shqipëria e orientimi është europian dhe euroatlantik.

    Kryeministri aktual i ka ftuar të pranishmit të votojnë, duke thënë se në këtë fushatë do të ju vjetrohen këpucët e do të ju rinohet vullneti duke takuar qytetarët lagje më lagje.

    “Janë dy parti që kanë udhëhequr më gjatë herë të ndarë e herë bashkë. LDK-ja i thotë presidentit të Serbisë ‘razume’, e PDK-ja i thotë ‘ëe are not problematik gajs”, por koalicioni jonë ne i themi ashtu siç është ‘minister i Millosheviqit”- u shpreh ai.

    Ai premtoi kompletim të infrastrukturës sportive, mbështetje deri në 1 miliard euro në ndërmarrje të mëdha prodhuese, rritje të eksportit, program multidimensional për turizmin, 10 profile të reja të mësimit dual e të tjera.

    Fushata pёr zgjedhjet parlamentare nё Kosovё ka filluar zyrtarisht sot, mё 11.01.2025. Për njё muaj, partitë politike pritet të mbajnë tubime elektorale me qytetarët për të fituar besimin e tyre në garën e 9 shkurtit 2025.

    Për këto zgjedhje janë certifikuar 28 subjekte politike me 1280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes të cilave ata mund t’i shprehin lirisht mendimet e tyre me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; dhe të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

     

  • Kanosja ndaj kryeministrit Kurti, Policia konfirmon arrestimin e një personi

    Një person me iniciale M.R. është arrestuar nga Policia e Kosovës si i dyshuar për veprën penale – kanosje.

    Këtë e konfirmoi për KALLXO.com zëvendësdrejtori i Drejtorisë Rajonale Mitrovicë- Veri të Policisë së Kosovës, Veton Elshani.

    “E konfirmojmë arrestimin e M.R. (i lindur më 2004) për rast kanosje. Arrestimi është kryer për interesa të Krimeve të Rënda në Prishtinë”- tha Elshani.

    I pyetur nga KALLXO.com se a është i njëjti rast ku një qytetar serb është ndaluar për 48 orë pasi përmes rrjetit social “Instagram” ka kanosur kryeministrin Albin Kurti, Elshani tha se nuk e di nëse është për kryeministrin.

    KALLXO.com raportoi për kërcënimin ndaj kryeministrit Kurti dhe se për këtë rast është arrestuar një qytetar i nacionalitetit serb në veri të vendit.

    https://kallxo.com/lajm/kercenohet-kryeministri-albin-kurti-arrestohet-nje-qytetar-serb-ne-veri/

     

  • ECPMF i bën thirrje Kurtit ta anulojë vendimin për bojkotim të tri kanaleve televizive gjatë fushatës zgjedhore

    Qendra Europiane për Lirinë e Shtypit dhe Medias (ECPMF) i ka shkruar një letër të hapur liderit të Lëvizjes Vetëvendosje, njëherazi kryeministrit të Kosovës, Albin Kurtit, në lidhje me vendimin e partisë së tij që t’i bojkotojë tri kanale televizive në vend gjatë fushatës zgjedhore.

    Sipas Qendrës Europiane për Lirinë e Shtypit dhe Medias, nuk ka pasur një arsyetim formal rreth kanaleve televizive  T7, TV Dukagjini dhe Klan Kosova për vendimin e LVV-së.

    Në letrën e saj, Qendra Europiane për Lirinë e Shtypit dhe Medias i ka bërë thirrje kryeministrit Kurti që ta anulojë vendimin për bojkotimin e këtyre mediave dhe të sigurohet që Vetëvendosja të sigurojë qasje të barabartë në informacione publike për këto media. 

    “Të gjithë gazetarët duhet të jenë në gjendje të raportojnë lirisht dhe në mënyrë të drejtë për periudhën zgjedhore. Mbrojtja e lirive të medias dhe e drejta e publikut për një proces të informuar dhe demokratik duhet të jetë prioritet” – thuhet në letrën e ECPMF-së për Kurtin.

    ECPMF ka theksuar se duke i bojkotuar kanalet kryesore televizive, minohet e drejta e publikut për informacion dhe roli esencial i gazetarëve në promovimin e transparencës dhe llogaridhënies.

    Më tej, ECPMF i ka cituar në letër dy prej udhëheqësve të kanaleve televizive se si janë njoftuar për vendimin e bojkotimit të kanaleve të tyre nga LVV.

    “Zyrtarët nga Vetëvendosja më informuan se nuk do të marrin pjesë në programet e televizionit T7 gjatë fushatës zgjedhore. Ata nuk ofruan ndonjë arsyetim bindës për këtë vendim që më la të besoj se është një përpjekje për t’iu shmangur llogaridhënies publike” – ka shpjeguar drejtori i kanalit televiziv T7, Leonard Kerquki. 

    “Zyrtarët nga Vetëvendosja më informuan se nuk do të marrin pjesë në TV Dukagjini gjatë fushatës zgjedhore. Arsyetimi i tyre për këtë vendim gjatë takimit nuk ishte i qartë dhe ne kemi kërkuar sqarime të mëtejshme. Për ne, kjo reflekton frikën e partisë në pushtet për t’u ballafaquar me pyetjet e gazetarëve dhe komentatorët politikë në studio” – ka shtuar Ermal Panduri nga TV Dukagjini.

    Tutje, ECPMF ka përmendur edhe shembuj të tjerë që vlerëson se tregojnë një shembull shqetësues të rënies së lirisë së medias në Kosovë.

    ECPMF thotë se gjatë katër viteve të kaluara, derisa Reagimi i Shpejtë i Lirisë së Medias (MFRR) nga afër ka monitoruar zhvillimet në lirinë e medias, kanë qenë dëshmitarë të një rënie shqetësuese të lirisë së mediave në Kosovë. 

    “Në vitin 2022, partnerët e Platformës për Sigurinë e Gazetarëve të Këshillit të Europës vizituan Kosovën për të vlerësuar gjendjen e lirisë së medias dhe mbrojtjen e gazetarëve në vend. Derisa pak progres është vërejtur, misioni konstatoi se “retorikë toksike dhe fushatat e shpifjeve kundër medias, financimi i pamjaftueshëm i transmetuesit publik dhe mungesa e transparencës rrezikojnë të minojnë progresin” – ka thënë ECPMF.

    Më tej, ECPMF bazohet edhe në të dhënat e Asociacionit të Gazetarëve të Kosovës për sulmet dhe kërcënimet ndaj gazetarëve, të cilat thotë se janë dyfishuar.

    “Shumica e këtyre sulmeve përfshijnë sulme verbale nga anëtarë të partisë suaj, të cilët i kanë etiketuar gazetarët si “spiunë serbë” ose bashkëpuntorë dhe i kanë akuzuar që kanë lidhje me interesat serbe” – i ka adresuar ECPMF Kurtit.

    Qendra Europiane për Lirinë e Shtypit dhe Medias ia ka përmendur Kurtit edhe miratimin e Projektligjit për Komisionin e Pavarur për Media (KPM) në Kuvendin e Kosovës më 12.07.2024.

    Sipas Qendrës, ky ligj i ri për median dështoi të përfshijë rekomandimet kritike të Këshillit të Europës, Komisionit Europian dhe shoqërisë civile.

    “Ky ligj tashmë është në pritje të shqyrtimit nga Gjykata Kushtetuese. Zhvillime tjera alaramante përfshijnë një rënie në transparencë, mohimin e shpeshtë të qasjes në informacion dhe rritjen e ndërhyrjes politike në politikat editoriale të transmetuesve publikë. Këto veprime kanë kontribuar në rënien e Kosovës me 19 vende në Indeksin e Lirisë së Shtypit të Reporterëve pa Kufij dhe kanë tërhequr kritika të gjera nga organet ndërkombëtare, duke përfshirë Raportin Vjetor të Komisionit Evropian 2024 që pretendon përpjekjet e qeverisë për të kontrolluar median” – ka thënë Qendra Evropiane.

    “Kosova urgjentisht ka nevojë të marrë masa për të mbrojtur lirinë e medias, të promovojë transparencë dhe të sigurojë llogaridhënien e zyrtarëve publikë. Publiku, veçanërisht gjatë fushatave zgjedhore ka të drejtën themelore të qaset në informacione të ndryshme, të shqyrtojë me kujdes premtimet politike dhe t’i mbajë politikanët llogaridhënës” – ka potencuar ECPMF.

    Asociacioni i Gazetarëve të Kosovës kishte reaguar pas miratimit të Projektligjit për Komisionin e Pavarur të Mediave (KPM).

    Sipas AGK-së, votimi i Projektligjit për KPM është prej goditjeve më të mëdha që Qeveria e Kosovës dhe Vetëvendosje i ka bërë kundër lirisë së medias në Kosovë. Po ashtu sipas tyre ky është tentim për disiplinim e kontroll të mediave.

    “Partia politike në pushtet nuk i ka marrë parasysh vërejtjet e shoqërisë civile e mediave dhe ka shpërfillur Raportin e ekspertes së Këshillit të Europës, që ka konstatuar se pjesa më e madhe e Ligjit nuk i përmbushë standardet europiane, duke përfshirë ato të Këshillit të Europës ku Kosova synon anëtarësimin. Një gjë e tillë, u theksua para votimit edhe nga kryetari i Kuvendit, Glauk Konjufca”- thuhet në reagimin e AGK-së.

    Pas miratimit të këtij Projektligji ka reaguar edhe Misioni i OSBE-së në Kosovë.

    “Rekomandimet kryesore të ekspertëve që nuk janë marrë parasysh kanë nxitur shqetësime rreth dispozitave të reja të cilat do të kenë ndikim në përbërjen, rolin dhe përgjegjësitë e KPM-së, si dhe në procedurat për zgjedhjen e anëtarëve të rinj dhe kushtet e shërbimit për të zgjedhurit. Nuk janë marrë parasysh as rekomandimet për rolin dhe përgjegjësitë e KPM-së gjatë fushatave zgjedhore”- thuhet në deklaratën e OSBE-së, të lëshuar më 11.07.2024.

  • Kërcënohet kryeministri Albin Kurti, arrestohet një qytetar serb në veri

    21:24

    Kanosja ndaj kryeministrit Kurti, Policia konfirmon arrestimin e një personi

    Një person me iniciale M.R. është arrestuar nga Policia e Kosovës si i dyshuar për veprën penale – kanosje.

    Këtë e konfirmoi për KALLXO.com zëvendësdrejtori i Drejtorisë Rajonale Mitrovicë- Veri të Policisë së Kosovës, Veton Elshani.

    “E konfirmojmë arrestimin e M.R. (i lindur më 2004) për rast kanosje. Arrestimi është kryer për interesa të Krimeve të Rënda në Prishtinë”- tha Elshani.

    I pyetur nga KALLXO.com se a është i njëjti rast ku një qytetar serb është ndaluar për 48 orë pasi përmes rrjetit social “Instagram” ka kanosur kryeministrin Albin Kurti, Elshani tha se nuk e di nëse është për kryeministrin.

    KALLXO.com raportoi për kërcënimin ndaj kryeministrit Kurti dhe se për këtë rast është arrestuar një qytetar i nacionalitetit serb në veri të vendit.

    19:26

    Kërcënohet kryeministri Albin Kurti, arrestohet një qytetar serb në veri

    Burime brenda Prokurorisë Themelore në Mitrovicë kanë konfirmuar se një qytetar serb është ndaluar për 48 orë pasi i njëjti përmes rrjetit social “Instagram” ka kanosur kryeministrin Albin Kurti.

    Siç mëson KALLXO.com, i riu serb, që dyshohet nga Prokuroria, në profilin e tij në “Instagram” ka bërë një postim kërcënues ndaj Kurtit.

    Lidhur me rastin, KALLXO.com ka kontaktuar edhe Policinë e Kosovës dhe është në pritje të përgjigjes.

    Kjo nuk është hera e parë që kryeministri përballet me kërcënime.

    KALLXO.com kishte raportuar më 2021 se për shkak të një kërcënimi serioz ishin shtuar masat e sigurisë për sigurinë e kryeministrit Kurti.

    Atëherë, afër shtëpisë ku banonte Kurti ishte dërguar Njësia Speciale e Policisë së Kosovës.

    https://kallxo.com/lajm/kercenohet-albin-kurti-njesia-speciale-e-ruan-shtepine-e-tij-foto/

    www.kallxo.com

  • Ministrja Haxhiu: Blerim Isufaj e di se kush nga prokurorët ka shkuar në zyret e ish-kryeministrave

    Ministrja e Drejtësisë, Albulena Haxhiu, ka thënë se kryeprokurori i Prokurorisë Speciale, Blerim Isufaj, e di se kush nga prokurorët në të kaluarën ka shkuar në zyret e ish-kryeministrave.

    Deklarata e ministres Haxhiu vjen pas debatit rreth ftesës së Prokurorisë Speciale ndaj kryeministrit Albin Kurti, për t’u intervistuar si dëshmitar në rastin e rezervave shtetërore dhe mosparaqitjes së këtij të fundit dhe këmbënguljes për t’u intervistuar në zyret e Kryeministrisë.

    “Blerim Isufaj e di shumë mirë ndonëse në konferencën për media tha nuk kam informacione. Blerim Isufaj e din shumë mirë  kush nga prokurorët kanë shkuar në zyrëet e ish-kryeministrave, por nuk flet për këtë. Prandaj ju lutem si gazetar që të insistoni që përgjigjet e tilla t’i merrni nga kryeprokurori Blerim Isufaj” – tha Haxhiu para gazetarëve më 10.01.2025.

    “Blerim Isufaj e di, ata prokurorë disa prej tyre janë aty, disa jo, për shkak se janë kërcënuar dhe janë detyuruar që të lëshojnë Kosovën”.

    Në anën tjetër, kryeministri i Kosovës, Albin Kurti kishte deklaruar se nuk i është përgjigjur thirrjes së Prokurorisë Speciale për intervisim si dëshmitar në rastin e rezervave shtetërore, pasi sipas tij, qëllimi është që vetë ai të bëhet lajm ndërkombëtar duke hyrë në objektin e Prokurorisë.

    Për këtë kryeministri e akuzoi kryeprokurorin e Prokurorisë Speciale, Blerim Isufajn, të cilin e quajti “regjisor” të asaj pamjeje që Kurti nuk po e pranon ta bëj.

    “Pikërisht ky prokurori (Blerim) Isufaj, ky është regjisori i një pamjeje kur unë hyj në Prokurorinë e Shtetit dhe prodhohet një lajm ndërkombëtar që kryeministri hyn në Prokurori të intervistohet për një rast të korrupsionit. Aty nuk thuhet që si dëshmitar. Ky është qëllimi” – tha Kurti në një emision në Kohavision më 29.12.2024.

    Kurse kryeprokurori Isufaj, duke mos dashur të japë përgjigje të drejtpërdrejtë rreth këtij pretendimi të kryeministrit Kurti, në një konferencë për media me 30.12.2024, tha se “të gjithë janë të barabarë para ligjit” dhe se “nuk i interesojnë deklarimet e tilla”.

    “Ligji është i njëjtë për të gjithë qytetarët e Kosovës, përfshirë edhe zyrtarët e lartë shtetërorë. Ftesa për dhënie dëshmie është një procedurë e rregullt dhe çdo person që ftohet ka përgjegjësi ligjore të bashkëpunojë me institucionet e Drejtësisë. Ju bëj thirrje të gjitha institucioneve publike – përfshirë Qeverinë – të tregojnë përkushtim ndaj sundimit të ligjit dhe të shmangin retorikën që synon politizimin e Drejtësisë”- u shpreh ai.

    Ndonëse nuk ishte paraqitur dy herë për të dhënë dëshminë e tij për ‘rastin e rezervave shtetërore’, kryeministrit të vendit Albin Kurtit i është bërë thirrja për herë të tretë që të paraqitet në objektin e Prokurorisë Speciale – për të dhënë dëshminë e tij në cilësinë e dëshmitarit.

    Edhe hera e tretë për Prokurorinë ka rezultuar njëjtë si dy thirrjet paraprake, pasi kryeministri i vendit nuk i është përgjigjur pozitivisht edhe thirrjes së tretë për t’u paraqitur para prokurorëve të Prokurorisë Speciale, Milot Krasniqi e Valdet Gashi.

    Më 06.01.2025 dhe më 08.01.2025 KALLXO.com ka dërguar pyetje në Prokurorinë Speciale, lidhur me ftesën për kryeministrin Kurti, por nuk ka pranuar përgjigje.

    Po ashtu KALLXO i ka dërguar pyetje edhe Zyrës së Kryeministrit Kurti të mërkurën, më 08.01.2025 dhe më 30 e 31 dhjetor 2024, por nuk kanë kthyer përgjigje.

    Sipas burimeve të KALLXO.com nga Prokuroria, thirrja e tretë i ishte bërë Kurtit rreth një javë para Vitit të Ri.

    Burimet e KALLXO.com kanë konfirmuar se meqenëse tri herë nuk kanë marrë përgjigje pozitive nga dëshmitari, në këtë rast kryeministri Albin Kurti, prokurorët pritet që të procedojnë tutje – duke bërë kërkesë te gjyqtari i procedurës paraprake që i njëjti të sillet me detyrim për të dhënë dëshminë e tij.

    Sipas informacioneve që posedon KALLXO.com, është planifikuar që procedimi për dhënien e dëshmisë së kryeministrit Kurti të bëhet pasi të mbahen Zgjedhjet qendrore, të cilat janë të parapara të mbahen më 09.02.2025, me arsyen që të eliminohen pretendimet se veprimet po merren për qëllime politike.

    Më 11.12.2024 ishte bërë e ditur që kryeministri Kurti ishte ftuar për të dëshmuar, më 16.12.2024, nga Prokuroria Speciale.

    Ndonëse ftesa e Prokurorisë Speciale ka qenë që kryeministri Albin Kurti të paraqitet për intervistim si dëshmitar më 16.12.2024, në ora 09:30, një gjë e tillë nuk kishte ndodhur.

    Zëdhënësja e Prokurorisë, Liridona Kozmaqi, në një deklarim para mediave kishte thënë se është informuar nga Kabineti i Kurtit se Kryeministri gjendet në udhëtim jashtë vendit.

    “Sot nga Kabineti i Kryeministrit Kurti, Prokuroria Speciale është informuar se kryeministri Kurti gjendet në udhëtim jashtë vendit dhe e ka të pamundur të paraqitet sot. Prokuroria Speciale, konform legjislacionit në fuqi, do ta përgatisë një ftesë tjetër për kryeministrin Kurti për një datë tjetër.” – kishte thënë Kozmaqi.

    KALLXO.com kishte raportuar më 20.12.2024 se Prokuroria Speciale kishte dërguar një ftesë të dytë në adresë të kryeministrit Albin Kurti për intervistim në cilësinë e dëshmitarit në ‘rastin e rezervave shtetërore’, por Kryeministri ka ritheksuar gatishmërinë që Prokurorët t’i presë në zyrën e tij.

    Rasti i rezervave shtetërore

    Të pandehur për rastin e rezervave shtetërore janë: Irfan Lipovica, Hafiz Gara e Ridvan Muharremi. Lipovica e Gara dyshohen për veprën penale “keqpërdorimi i pozitës apo autoritetit zyrtar”, ndërsa Ridvan Muharremi për veprën penale “dhënia e ndihmës në kryerje të veprës penale të keqpërdorimit të detyrës apo autoritetit zyrtar”.

    Dy zyrtarë të Ministrisë së Industrisë, Ndërmarrësisë dhe Tregtisë, Irfan Lipovica e Hafiz Gara, bashkë me afaristin Ridvan Muharremi, ishin arrestuar më 18.08.2023 nën dyshimin për veprat: “keqpërdorim i detyrës zyrtare” dhe “dhënie të ndihmës në kryerjen e veprës penale të keqpërdorimit të detyrës zyrtare”.

    Ridvan Muharremi, Irfan Lipovica e Hafiz Gara ishin liruar nga masa e paraburgimit me vendimin e Apelit më 31.08.2023, pasi të njëjtit gjendeshin nën këtë masë nga 19.08.2023.

    Si e dyshuar lidhur me keqpërdorimet e rezervave shtetërore është intervistuar edhe ministrja aktuale e Ministrisë së Tregtisë dhe Industrisë, Rozeta Hajdari më 15.04.2024.

    Çfarë thotë Dosja e Prokurorisë për Ridvan Muharremin?

    Dosja e Prokurorisë për Ridvan Muharremin thotë si ai në periudhën kohore nga muaji shkurt 2022 e në vazhdimësi, me dashje dhe me qëllim të krijimit të kushteve dhe mundësive për realizimin e veprimeve inkriminuese për të pandehurit Irfan Lipovica e Hafiz Gara i ka ndihmuar ata – duke i krijuar kushtet, propozuar e siguruar fillimisht për negocim për furnizim me rezerva shtetërore.

    Prokuroria ka thënë në Dosje se janë propozuar O. E. “Yafe Turizm Insaat Sanayi ve Ticaret Anonim Sirketi” me seli në Bursa të Turqisë për furnizim me grurë dhe “Xanto SP” ZO.O. In, me seli në Gdynia, Poloni për furnizim me vaj luledielli dhe sheqer. E më pas përmes përfshirjes pa autorizim në procesin e negocimit në mes të pandehurve Irfan Lipovica e Hafiz Gara me O. E.  ka luajtur rol kyç në negocimin e kushteve të Kontratave.

    Prokuroria: Lipovica ka lejuar me dijeni të plotë që të anashkalohet procedura e hapur e Prokurimit

    Për zyrtarin e Ministrisë së Industrisë, Ndërmarrësisë dhe Tregtisë, Irfan Lipovica, në Dosjen e Prokurorisë thuhet se ekzistojnë dyshimet e bazuara se nga muaji shkurt i vitit 2022, në Prishtinë, në Ministrinë e Industrisë, Ndërmarrësisë dhe Tregtisë së Kosovës, në cilësinë e personit zyrtar, me pozitë zv/sekretar i përgjithshëm, me qëllim të përfitimit të dobisë pasurore për personin tjetër dhe shkaktim të dëmit të buxhetit të Republikës së Kosovës, ka tejkaluar autorizimet ligjore të parapara për pozitën që e ka ushtruar.

    Kësisoj, sipas Prokurorisë, Lipovica ka lejuar me dijeni të plotë që në kundërshtim me legjislacionin në fuqi të anashkalohet procedura e hapur e Prokurimit publik për blerjen e rezervave shtetërore.

    Në Dosje thuhet se më 25 shkurt 2022 ai ka adresuar në Qeverinë e Kosovës kërkesën për përjashtimin e procedurave të rregullta të Prokurimit, si dhe klasifikimin e kësaj procedure si “sekrete”, me qëllim që ta kufizojë konkurrencën dhe fshehur shkeljen e ligjit. E më pas, duke u bazuar në një Vendim të Qeverisë së Kosovës, i cili e kishte bazën në kërkesën e kundërligjshme të të pandehurit, ka nxjerrë Vendimin për formimin e Komisionit për Negocimin e Kontratave për furnizimin me mallra të rezervës shtetërore për vitin 2022. Me këtë Vendim, sipas Prokurorisë, është anashkaluar procedura e hapur e Prokurimit publik.

    Në Dosjen e Prokurorisë thuhet se më pas edhe përkundër faktit se krijimi i këtij Komisioni nuk kishte bazë ligjore, i pandehuri në drejtim të funksionimit të këtij Komisioni për Negocim me operatorin ekonomik “Yafe Turizm Inseat Sanayi ve Ticaret Anonim Sirketi” dhe “Xanto SP” ZO.O. In, kishte anashkaluar në tërësi dy anëtarët e Komisionit. Sipas Prokurorisë, kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe operatorit ekonomik, përkatësisht firmave nga të cilat do të siguroheshin produktet e rezervës shtetërore.

    Dosja: Hafiz Gara ka adresuar te Irfan Lipovica kërkesën për përjashtimin e procedurave të Prokurimit

    Për zyrtarin tjetër të Ministrisë së Industrisë, Ndërmarrësisë dhe Tregtisë, Hafiz Gara, Dosja e Prokurorisë thotë se ai nga muaji shkurt i vitit 2022, në Prishtinë, në MINT, në cilësinë e personit zyrtar, në pozitën Drejtor i Departamentit të Rezervave Shtetërore të Mallrave (DRSHM/MINT), me qëllim të përfitimit të dobisë pasurore për personin tjetër dhe shkaktim të dëmit buxhetit të Republikës së Kosovës, ka tejkaluar autorizimet ligjore të parapara për pozitën që e ka ushtruar.

    Në Dosje thuhet se në kundërshtim me legjislacionin në fuqi, më datë 25 shkurt 2022 ka adresuar te Irfan Lipovica kërkesën për përjashtimin e procedurave të Prokurimit, edhe pse e ka ditur se kërkesa e tillë nuk ka bazë ligjore.

    Gjithnjë, sipas Prokurorisë, kjo kërkesë më pas i është adresuar Qeverisë së Kosovës, me qëllim që ta kufizojë konkurrencën dhe fshehur shkeljen e ligjit, përkundër faktit se ishte nxjerrë Vendimi për formimin e Komisionit për Negocimin e Kontratave për furnizimin me mallra të rezervës shtetërore për vitin 2022, me të cilin është anashkaluar procedura e Prokurimit publik. E më pas ishte anashkaluar edhe Komisioni, i cili ishte krijuar me qëllim të negocimit, porositjes dhe blerjes së produkteve të rezervës shtetërore të grurit, vajit të lulediellit dhe sheqerit. Dosja vazhdon duke thënë se kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe O. E., përkatësisht firmave nga të cilat do të siguroheshin këto produkte të rezervës shtetërore, pas të cilave ishin nënshkruar Kontratat me kompanitë në Turqi dhe Poloni për Furnizim.

    https://kallxo.com/lajm/prokuroria-speciale-planifikon-ti-drejtohet-gjykates-per-kryeministrin-albin-kurti/

    https://kallxo.com/lajm/kurti-kembengul-qe-te-intervistohet-nga-prokuroria-speciale-ne-kryeministri/