Ballina

Etiketë: Albin Kurti

  • Kurti në Rahovec: Para neve nuk ka pasur Qeveri për nënat lehona, as kryeministër për fëmijët

    Lëvizja Vetëvendosje në kuadër të fushatës zgjedhore ka mbajtur një tubim në Rahovec më 30.01.2025.

    Para qytetarëve, kandidati i LVV-së për kryeministër, Albin Kurti, deklaroi se më 9 shkurt nuk ka zgjedhje të zakonshme, as të jashtëzakonshme. Sipas tij, këto zgjedhje janë referendum për të vazhduar punët e mira ose për t’i rrënuar ato.

    Kurti ka kritikuar ish-qeveritarët, duke thënë se para Qeverisë së drejtuar para tij “nuk ka pasur Qeveri për nëna lehona e as kryeministër për fëmijë”.

    “Këtu në Rahovec i kemi mbështetur nënat lehona dhe gati 12 mijë fëmijë kanë përfituar shtesa. Këto janë për herë të parë në Republikën e Kosovës. Para neve nuk ka pasur Qeveri për nëna lehona e as kryeministër për fëmijë. Para neve këta nuk kanë parë as nëna, as fëmijë. Në vëmendjen, në zemrën e Qeverisë tonë ndodhen edhe nënat, edhe fëmijët. 255 të rinj janë punësuar në ‘Super Puna’”- ka thënë ai.

    “Ata që shkuan e nuk kthehen në pushtet, për 17 vjet, vetëm katër çerdhe. Për 17 vjet ata nuk kanë parë fëmijë në Kosovë përveç fëmijëve të tyre. Ata nuk i kanë parë fëmijët e juaj. Ata i kanë parë vetëm gratë e veta dhe fëmijët e vet, prandaj nuk kemi pasur çerdhe, as shtesa për nëna lehona e për fëmijë”- u shpreh tutje Kurti.

    Ai tutje tha se Qeveria po e mbështet Rahovecin me 8 milionë euro për ndërtimin e rrugës Rahovec-Xërxë.

    Kurti ka premtuar 1 miliard euro për ushtrinë, 1 miliard euro për prodhimtarinë dhe mbi 1 miliard euro investime kapitale në vit.

    Kryetari i Lëvizjes Vetëvendosje, Albin Kurti, në vitin 2021 pati premtuar se me ardhjen e tij në pushtet asnjë fëmijë nuk do të mbetet i uritur dhe nuk do të mbetet prapa.

    Në kuadër të programit për politikat sociale, kryetari i LVV-së në kohën e zgjedhjeve të kaluara ishte zotuar se të gjitha familjet do të përfitojnë shtesa mujore nga 20 euro për çdo fëmijë nën 2-vjeç dhe 10 euro për fëmijët mes moshës 2 deri 16-vjeç.

    Qeveria e Kosovës në mbledhjen 25.08.2021 pati marrë vendim për mbështetjen për lehonat e papunësuara, të punësuara dhe fëmijët nga 0 deri në 2-vjeç, duke ndarë 7 milionë euro.

    Në shtator të vitit 2021 për herë të parë është hapur aplikimi për mbështetjen për lehonat dhe shtesat për fëmijë.

    Kurti, bashkë me ministrin e Financave, Hekuran Murati, më 18.07.2024 kanë prezantuar skemën e re për shtesat mujore për fëmijët.

    “Për fëmijën e parë dhe të dytë, shtesat e reja do të jenë 20 euro në muaj secili, ndërsa për nënat që kanë tre fëmijë e më shumë shtesat do të jenë nga 30 euro në muaj për secilin prej fëmijëve. Pra edhe për të parin, edhe të dytin vlen shtesa 30 euro në muaj” – ka thënë Kurti para gazetarëve.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • LVV gjobitet me 10 mijë euro për gjuhën e Kurtit dhe Gërvallës ndaj Haradinajt

    Paneli Zgjedhor për Ankesa dhe Parashtresa (PZAP) ka dënuar me 10 mijë euro Lëvizjen Vetëvendosje, për shkelje të Kodit të Mirësjelljes për Subjektet Politike gjatë fushatës zgjedhore.

    Në Vendim thuhet se AAK-ja është ankuar se kandidatja për Deputete, Donika Gërvalla dhe kandidati për Kryeministër, Albin Kurti kanë përdorur gjuhë të papërshtatshme gjatë fjalimit të tyre në një tubim në Deçan, më 26.01.2025.

    “Sipas parashtruesit të Ankesës, gjatë këtij fjalimi, Donika Gërvalla-Schwartz, duke aluduar për Ramush Haradinajn, të njëjtin e quan ‘Gjeneralë të vetëshpallur’ (në shumës), e më pas vazhdon e njëjta ‘Prandaj, unë mendoj që aq më pak meriton respekt kush sakrificën personale apo familjare e përdor për arsyetim për krim, për korrupsion, për vrasje apo mashtrim’.” – thuhet në Vendimin e PZAP-së.

    Sipas Vendimit ankuesi ka theksuar se deklaratat e bëra nuk janë asgjë tjetër, veçse një tentativë për të manipuluar opinionin publik, pasi sipas tyre shihet qartë se Gërvalla e akuzon liderin e një partie opozitare për “vrasës dhe kriminel.”

    Për këtë rast PZAP-i ka pranuar Ankesën e AAK-së dhe partnerëve të Koalicionit dhe e ka gjobitur LVV-në me 10 mijë euro.

    Sipas Vendimit LVV-ja ka afat prej 15 ditësh që ta paguajë gjobën.

    Lëvizja Vetëvendosje e gjobitur në këtë rast ka thënë se konsiderojnë që Ankesa është pabazuar.

    Sipas LVV-së sa i përket pjesës së parë të deklaratës së kandidates Gërvalla në të cilën pos tjerash kinse e ka quajtur Haradinaj “Gjeneralë të vetëshpallur” sipas tyre në asnjë formë nuk cenon Nenet.

    Ndërsa, sa i përket pretendimeve të parashtruesve lidhur me deklaratat e kandidatit për Kryeministër Albin Kurti, kinse “respekt për pushkën që ia kanë kthyer Serbisë, por nuk ia bëjmë hallall për paret që ia kanë marrë popullit”, e cila sipas pretenduesit aludohet për Ramush Haradinajn, LVV konsideron se Kurti në asnjë moment nuk e ka përmendur Haradinajn apo AAK-në.” – thuhet në përgjigjen e LVV-së për PZAP-në.

    Vendimin e plotë të PZAP-së mund ta shihni në këtë: LINK.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Për këto Zgjedhje janë certifikuar 28 subjekte politike, me 1,280 kandidatë.

    Zgjedhjet e vitit 2025 për Kuvend të Kosovës janë Zgjedhjet e gjashta me radhë që do mbahen në Kosovë, që nga shpallja e pavarësisë së Kosovës më 17 shkurt 2008.
     

  • Kryeministri Kurti takohet me ekipin e QKRMT-së që u nominuan për Çmimin Nobel për Paqe

    Kryeministri i Kosovës, Albin Kurti ka pritur në takim përfaqësues të Qendrës Kosovare për Rehabilitimin e të Mbijetuarve të Torturës të cilët janë nominuar për Çmimin Nobel për Paqe.

    Kurti citohet të ketë përgëzuar QKRMT-në dhe aktivisten Feride Rushiti për nominimin.

    Nominimi u bë nga deputeti i Parlamentit të Suedisë, Magnus Jacobsson.

    “Kryeministri shprehu gatishmërinë për mbështetjen e parezervë të Qeverisë së Republikës së Kosovës për këtë nominim.” – thuhet mes të tjerash në komunikatën e Zyrës së Kryeministrit.

    Pjesëmarrëse në takim ishte edhe ministrja e Drejtësisë, Albulena Haxhiu e cila ka thënë se nominimi ka ardhur si pasojë e punës së madhe të Organizatës për adresimin e dhunës seksuale gjatë luftës në Kosovë.

    Haxhiu citohet të ketë folur për rëndësinë e vazhdimit të fuqizimit të bashkëpunimit të Ministrisë të cilën ajo e udhëheq me QKRMT-në.

    “Në vijim Kryeministri vlerësoi punën e çmueshme të QKRMT-së, duke veçuar rëndësinë e grumbullimit të bazës së të dhënave dhe dëshmive të të mbijetuarve të torturës e dhunës gjatë luftës në Kosovë.” – thuhet në fund të komunikatës.

    Më 16.01.2025, Feride Rushti, drejtoreshë e QKRMT-së njoftoi se së bashku me Qendrën Kosovare për Rehabilitimin e Viktimave të Torturës (QKRMT) është nominuar nga deputeti i Parlamentit suedez, Magnus Jacobsson, për çmimin Nobel për Paqe për vitin 2025.

    Rushiti tha gjatë Konferencës për media më 17.01.2025 se ky nominim është një vlerësim për punën 25-vjeçare që ka bërë QKRMT-ja për kauzën, konkretisht për rehabilitimin e të mbijetuarave të dhunës seksuale gjatë luftës, por edhe një vlerësim që i bëhet Kosovës. Ajo tha se ky nominim do të fuqizojë zërin e viktimave të dhunës seksuale.

    Ndërkaq, në një bisedë për KALLXO.com, deputeti suedez Magnus Jacobsson tha se gjatë një vizite që kishte pasur në Kosovë në vitin 2022 kishte parë edhe punën e mirë që po bënte QKRMT-ja për rehabilitimin e të mbijetuarave të dhunës seksuale gjatë luftës.

    “Shpresoj që Çmimi Nobel për Paqe, i cili shpesh shkon për OJQ-të të cilat punojnë për këto lloj çështjesh dhe mendoj që situata historike në Ballkan, por po ashtu edhe realiteti që akoma nuk kemi atë që ne në Skandinavi e quajmë “Paqe të ngrohtë”, kur ka paqe me marrëdhënie të mira. Akoma është një situatë që ka paqe, por jo marrëdhënie të mira. Shpresoj të ngrisë situatën dhe po ashtu të theksohet se sa është e rëndësishme të shohim situatën e grave në luftë. Mendoj që janë një Organizatë shumë e mirë dhe shpresoj që Komiteti i Çmimit Nobel për Paqe do të vazhdojë me sugjerimin tim.” – tha ndër të tjerash deputeti sudez, në një bisedë për KALLXO.com, më 17.01.2025.

    https://kallxo.com/lajm/nominimi-per-cmimin-nobel-per-paqe-rushiti-vleresim-per-kauzen-e-te-mbijetuarve-te-dhunes-seksuale-gjate-luftes/

  • LVV mban tubim me vajza dhe gra, Kurti: Zotohemi që do të jemi përherë pranë juve

    Kandidati i Lëvizjes Vetëvendosje për kryeministër, Albin Kurti, bashkë me disa prej anëtarëve të listës me të cilën garon në zgjedhjet parlamentare, më 29.01.2025 ka mbajtur tubim elektoral me vajza dhe gra në Prishtinë.

    Kurti tha se gratë shqiptare përgjatë gjithë historisë kanë luftuar kundër pushtuesve të jashtëm, kanë flakur tutje konceptet partiarkale, janë angazhuar për ndërtimin e një shoqërie të lirë e të drejtë, bashkë më shumë burra.

    Ai ka bërë thirrje t’u jepet guxim vajzave që votojnë për herë të parë dhe mbështetje për gratë e moshuara që të degjohet edhe zëri i tyre.

    “Më 9 shkurt çohuni herët, merrni nënat, motrat, vajzat, shoqet, gjyshet, vjehrrat, baballarët, dilni në votime dhe tregoni se gratë e Kosovës e kanë vendosur të lëvizin vetë. Me vendosmëri, me guxim për veten tuaj. Numri 118 sjell barazi, liri, sovranitet e dinjitet”- u shpreh ai.

    “Zotohemi që do të jemi përherë pranë juve e bashkë me juve”- tha ai.

    Kandidatja për deputete e LVV-së, Albulena Haxhiu, e nisi fjalimin duke thënë se ky është tubimi më i madh ndonjëherë i mbajtur vetëm me vajza dhe gra.

    “Në këto katër vite kemi ndërtuar politika që kanë krijuar më shumë mundësi për gratë. Me qeverinë Kurti 3 do të bëjmë edhe më shumë për gratë e vajzat e vendit tonë. Ne nuk kërkojmë favore, as përparësi. Ne gratë dhe vajzat e Kosovës kërkojmë barazi, që puna jonë të vlerësohet, zëri ynë të dëgjohet, vendimet të mos merren pa vajzat dhe gratë. Ka ende barriera dhe mungesë të barazisë të cilën do ta ndryshojmë me votën e 9 shkurtit”- ka thënë ajo.

    Haxhiu u ka kërkuar grave të dalin masivisht në votime për zgjedhjet e 09.02.2025.

    Kandidati për deputet, njëherazi ministër i Financave, Hekuran Murati, ka folur për shtesat për lehona dhe fëmijët dhe rritjen e pagës minimale.

    “Jemi Qeveria e vetme që ka pasur në qendër të prioriteteve fuqizimin ekonomik të vajzave dhe grave. Shumica e grave në vend e bëjnë punën e gruas, nënës dhe punën prej të cilës marrin rrogë si profesioniste”- ka thënë Murati.

    Murati ka thënë se puna e nisur për fuqizimin e grave do të vazhdojë edhe në mandatin e ardhshëm, duke theksuar premtimin për platformën e punësimit “Superpuna për Gratë”.

    Partitë politike në Kosovë nuk kanë sjellë risi sa i përket barazisë gjinore në listat e kandidatëve për deputetë për zgjedhjet e 9 shkurtit 2025.

    Listat zgjedhore të subjekteve politike të publikuara më 11.12.2024 edhe në këto zgjedhje janë të dominuara nga burrat.

    Të gjitha subjektet politike janë kujdesur për respektimin e kuotës 30 për qind për përfaqësim të grave, por në këto lista gratë nuk janë të përfaqësuara barabartë 50/50 sipas Ligjit për Barazi Gjinore.

    Partia më e madhe në Kosovë, Lëvizja Vetëvendosje, nga 110 kandidatë ka 41 gra kandidate për deputete, që i bie 37 për qind.

    Liderët e partive politike në Kosovë jo rrallëherë kanë folur për rëndësinë e barazisë gjinore në shoqëri e institucione, madje disa prej tyre edhe kanë premtuar 50 për qind gra në pozita udhëheqëse.

    Kryetari i Lëvizjes Vetëvendosje, Albin Kurti, gjatë mbledhjes së Këshillit të Përgjithshëm të Grave të LVV-së më 15.09.2024, pati thënë se krenohet me përparimin që Kosova ka pasur kur vjen puna te Parlamenti e Qeveria.

    Fushata për zgjedhjet parlamentare në Kosovë ka filluar zyrtarisht më 11.01.2025.

    Partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 9 shkurtit 2025.

    Për këto zgjedhje janë certifikuar 28 subjekte politike, me 1,280 kandidatë.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Huqja se kryeministri Albin Kurti është ftuar që të intervistohet në Prokurori si i dyshuar

    Më 30.12.2024 një faqe në TikTok (Arkiva) ka postuar një video të Kryeministrit Albin Kurti, me mbishkrimin “Albini spo shkon me dëshmu për hajnin e rezervave shtetërore. Janë gjetë imellat, provat që e implikojnë direkt. Tash synon viktimizimin”. 

    Pretendimi se janë gjetur email-e se Kryeministri i vendit, Albin Kurti është i inkriminuar direkt në rastin e ‘Rezervave shtetërore’ del të jetë i pa vërtetë, pasi që Kurti është ftuar në cilësinë e dëshmitarit.

    Sipas Kodit të Procedurës Penale ka një dallim nga ftesa ndaj një të dyshuari dhe një dëshmitari në një procedurë hetimore.

    Dëshmitari është palë e cila ftohet qoftë nga Gjykata apo Prokuroria ose mbrojta e të akuzuarit që të dëshmoj lidhur me një çështje penale. Dëshmitari ka për obligim të tregoj të vërtetën, të mos fsheh asgjë, në të kundërtën mund të ndiqet penalisht për dëshmi të rreme. Tutje dëshmitari ka të drejtë që në rast se e inkriminon veten nga deklarimi i tij, të mos përgjigjet. Dëshmitari nuk ka të drejtë të heshtë. 

    Kurse i dyshuari ka statusin një personi ndaj të cilit prokuroria ka pretendime se është kryer një vepër penale, ndaj të cilit merr aktvendim për të filluar hetimet dhe mund të përfundoj me aktakuzë. I akuzuari ka të drejtë të përfaqësohet nga mbrojtësi, të paraqes prova e të propozoj që të ftohen dëshmitarë me qëllim që t`i kontriboj mbrojtjes së tij nga akuzat e prokurorisë.

    Dallim tjetër mes të pandehurit dhe dëshmitarit është se, për të akuzuarin fillon një proces gjyqësor, ku kemi prokuroinë në njërën anë e cila mundohet të argumentoj ngritjen e aktakuzës dhe në anën tjetër të akuzurin i cili me çdo mjet juridik mundohet ta godet aktakutzën e prokurorisë.

    Dallim tjetër qenësor është se i akuzuari ka të drejtën të deklarohet për akuzat, mund t`i pranoj ato, mund të mos i pranoj, ndërsa dëshmitari nuk e ka këtë të drejtë. Heshtja si një e drejtë që e ka i akuzuari e për të cilën nuk mund të ndëshkohet nuk vlen për dëshmitarin i cili nuk ka të drejtë të hesht, por duhet të përgjigjet në çdo pyetje që i adresohet atij. 

    Këto të drejta dhe detyrime janë të përcaktuara me Kodin penal të Kosovës në nenin 122 dhe nenin 126, i cili flet për udhëzimet që i jepen dëshmitarit para se të jap dëshminë e tij.

    Kurse të drejtat që i ka i akuzuari në procedurë penale gjenden në nenet, 10, 11, 12, 13 të Kodit të procedurës penale.

    KALLXO.com ka raportuar për ftesat që  i janë dërguar kryeministrit, Albin Kurti nga Prokuroria Speciale për të dëshmuar për rastin e ‘Rezervave shtetërore’. 

    Ftesën e parë kryeministri Kurti e kishte marrë në dhjetor të vitit 2024. Zëdhënësi i Qeverisë, Përparim Kryeziu, e kishte bërë publike ftesën e Prokurorisë. 

    “Thirrje për dëshmitarin, dëshmitari, Albin Kurti, data e paraqitjes 16.12.2024, objekti i Prokurorisë Speciale”- përshkruhet në ftesën e Prokurorisë Speciale e cila është e nënshkruar nga dy prokurorët e rastit, Milot Krasniqi dhe Valdet Gashi. 

    Kësaj ftese Kryeministri, Kurti nuk i ishte përgigjur duke e shtyrë prokurorinë që të dërgoj edhe ftesën e dytë dhe ftesën e tretë që i njëtji të paraqitet për të dëshmuar.

    Rezultati përsëri ka qenë i njëjti, pasi Kurti nuk ka pranuar të shkoj dhe të dëshmoj në cilësinë e dëshmitarit para prokurorëve për këtë çështje penale.

    https://kallxo.com/lajm/prokuroria-speciale-planifikon-ti-drejtohet-gjykates-per-kryeministrin-albin-kurti/

    Për rastin e ‘Rezervave shtetërore’ janë të dyshuar zyrtari i Ministrisë së Industrisë, Ndërmarrësisë dhe Tregtisë, Irfan Lipovica, afaristi Ridvan Muharremi dhe Hafiz Gara.

    Por, më 15.04.2024 Prokuroria Speciale kishte zgjeruar listën e personave të dyshuar duke e intervistuar si të përfshirë në këtë rast edhe ministren kësaj ministrie, Rozeta Hajdari.

    Pra për këtë rast deri më tani nuk ka aktakuzë, por që të dyshuar janë katër përsona duke e përfshirë ktu edhe ministren, Hajdari.

    Ridvan Muharremi, Irfan Lipovica dhe Hafiz Gara, të dyshuarit lidhur me keqpërdorimin e rezervave shtetërore ishin liruar nga masa e paraburgimit me vendimin e Gjykatës së Apelit vetëm pak ditë pasi Gjykata Themelore i kishte caktuar masën e paraburgimit, të njëjtit gjendeshin në paraburgim që nga 19 gushti i vitit 2023.

    Në dosjen 12-faqëshe të Prokurorisë janë përshkruar me detaje veprimet dhe mosveprimet e tre të dyshuarve, dy zyrtarë të Ministrisë së Industrisë, Ndërmarrësisë dhe Tregtisë dhe një afarist, nën dyshimin për keqpërdorimin e rezervave shtetërore.

    Aty thuhet se pavarësisht se janë paguar paratë te kompanitë turke e polake për grurë, vaj e sheqer, këto produkte nuk kanë ardhur në Kosovë dhe rrjedhimisht buxheti i Kosovës është dëmtuar mbi 600 mijë euro.

    Gjithmonë sipas dosjes së Prokurorisë, të cilën e ka siguruar KALLXO.com, thuhet se ka qenë i paraparë furnizimi në sasi prej 10 mijë tonë me çmim 4,834,778 euro; 200 mijë litra vaj dhe 120 mijë kilogramë sheqer, me çmim prej 276 mijë euro, shuma këto të paguara në tërësi në formë të avansit.

    Mirëpo, Prokuroria ka potencuar se edhe përkundër faktit se pagesat janë realizuar, MINT si autoritet kontraktues ka pranuar vetëm 9,947.5 tonë grurë, pra 52.5 tonë më pak se sasia e kontraktuar, ndërsa vaji dhe sheqeri nuk janë sjellë fare.

    “Si pasojë e këtyre veprimeve buxheti i Republikës së Kosovës i destinuar për rezerva shtetërore, është dëmtuar në vlerë prej 601 mijë e 940 euro” – thuhet në dosjen e Prokurorisë.

    Dosja: Lipovica me dijeni të plotë ka lejuar që të anashkalohet procedura e hapur e prokurimit

    Për zyrtarin e Ministrisë së Industrisë, Ndërmarrësisë dhe Tregtisë, Irfan Lipovica, në dosjen e Prokurorisë thuhet se ekzistojnë dyshimet e bazuara se nga muaji shkurt i vitit 2022, në Prishtinë, në Ministrinë e Industrisë, Ndërmarrësisë dhe Tregtisë së Kosovës, në cilësinë e personit zyrtar, me pozitë zv.sekretar i Përgjithshëm, me qëllim të përfitimit të dobisë pasurore për personin tjetër dhe shkaktim të dëmit të buxhetit të Republikës së Kosovës, ai ka tejkaluar autorizimet ligjore të parapara për pozitën që e ka ushtruar.

    Kësisoj sipas prokurorisë, Lipovica me dijeni të plotë ka lejuar që në kundërshtim me legjislacionin në fuqi, të anashkalohet procedura e hapur e prokurimit publik për blerjen e rezervave shtetërore.

    Në dosje thuhet se më 25 shkurt 2022 ai ka adresuar në Qeverinë e Kosovës kërkesën për përjashtimin e procedurave të rregullta të prokurimit si dhe klasifikimin e kësaj procedure si “sekrete” me qëllim për ta kufizuar konkurrencën dhe fshehur shkeljen e ligjit, e më pas, duke u bazuar në një vendim të Qeverisë së Kosovës, i cili e kishte bazën në kërkesën e kundërligjshme të të pandehurit, ka nxjerrë Vendimin për formimin e Komisionit për Negocimin e Kontratave për Furnizimin me Mallra të Rezervës Shtetërore për vitin 2022.  Me këtë vendim, sipas prokurorisë, është anashkaluar procedura e hapur e prokurimit publik.

    Në dosjen e prokurorisë thuhet se më pas edhe përkundër faktit se krijimi i këtij Komisioni nuk kishte bazë ligjore, i pandehuri në drejtim të funksionimit të këtij Komisioni për negocim me OE “Yafe Turizm Inseat Sanayi ve Ticaret Anonim Sirketi” dhe “Xanto SP” ZO.O. In, kishte anashkaluar në tërësi dy anëtarët e Komisionit. Sipas Prokurorisë, kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe O.E., përkatësisht firmave nga të cilat do të siguroheshin produktet e rezervës shtetërore.

    “….Pas të cilave ishin nënshkruar Kontrata, datë 13.03.2022 me O.E. “Yafe Turizm Insant Sanayi ve Ticaret Anonim Sirketi” me seli në Bursa të Turqisë, për blerjen e grurit, në sasi 10,000 tonë, me çmim të kontraktuar 4,834,778 Euro dhe Aneks-kontrata nr.prot. 1960-02, datë 29.03.2022 dhe me O.E. “Xanto SP” ZO.O. In, me seli në Gdynia, Poloni, si dhe Kontrata nr.1548-02, datë 17.03.2022 për furnizim me vaj luledielli dhe sheqer, në sasi 200,000 litra vaj dhe 120,000 kg. sheqer, me çmim të kontraktuar 276,000 Euro, ku pas nënshkrimit të kontratave i pandehuri kishte urdhëruar dhe bërë trysni ndaj zyrtarëve financiar në MINT, për të realizuar ciklin e pagesave për O.E. të cekur në formë të avansit në lartësi 100% të vlerës së kontratës, mirëpo pavarësisht faktit se pagesa është realizuar në tërësi, në Kosovë si vend i destinimit janë sjellë vetëm 9,947.5 tonë grurë, ose 52.5 tonë më pak se sasia e kontraktuar, ndërsa vaji dhe sheqeri nuk janë sjellë fare, ku si rezultat i këtyre veprimeve është dëmtuar interesi publik në lartësi 601,940 Euro, përkatësisht buxheti i Republikës së Kosovës i destinuar për rezerva shtetërore”– thuhet në dosje.

    Dosja: Hafiz Gara ka adresuar te Irfan Lipovica, kërkesën për përjashtimin e procedurave të prokurimit

    Për zyrtarin tjetër të Ministrisë së Industrisë, Ndërmarrësisë dhe Tregtisë, Hafiz Gara, dosja e Prokurorisë thotë se ai nga muaji shkurt i vitit 2022, në Prishtinë, në MINT, në cilësinë e personit zyrtar, në pozitën Drejtor i Departamentit të Rezervave Shtetërore të Mallrave (DRSHM/MINT), me qëllim të përfitimit të dobisë pasurore për personin tjetër dhe shkaktim të dëmit buxhetit të Republikës së Kosovës, ka tejkaluar autorizimet ligjore të parapara për pozitën që e ka ushtruar.

    Në dosje thuhet se në kundërshtim me legjislacionin në fuqi, më datë 25 shkurt 2022 ka adresuar te Irfan Lipovica, kërkesën për përjashtimin e procedurave të prokurimit, edhe pse e ka ditur se kërkesa e tillë nuk ka bazë ligjore.

    Gjithnjë sipas Prokurorisë, kjo kërkesë më pas i është adresuar Qeverisë së Kosovës, me qëllim për ta kufizuar konkurrencën dhe fshehur shkeljen e ligjit, përkundër faktit se ishte nxjerrë Vendimi për formimin e Komisionit për Negocimin e Kontratave për Furnizimin me Mallra të Rezervës Shtetërore për vitin 2022, me të cilin është anashkaluar procedura e prokurimit publik, e më pas ishte anashkaluar edhe Komisioni i cili ishte krijuar me qëllim të negocimit, porositjes dhe blerjes së produkteve të rezervës shtetërore të grurit, vajit të lulediellit dhe sheqerit. Dosja vazhdon duke thënë se kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe O.E. përkatësisht firmave nga të cilat do të siguroheshin këto produkte të rezerves shtetërore, pas të cilave ishin nënshkruar kontratat me kompanitë në Turqi dhe Poloni për furnizim.

    “…Pas nënshkrimit të kontratave, O.B. te kontraktuar, edhe pse ju ishin kryer pagesat në tërësi, në Kosovë si vend i destinimit i kanë sjellë vetëm 9,947.5 tonë grurë, gjithsej 52.5 tonë më pak se sasia e kontraktuar, ndërsa vaji dhe sheqeri nuk ishin sjellë fare” – thuhet në dosje.

    Çfarë thotë dosja e Prokurorisë për Ridvan Muharremin?

    Në anën tjetër dosja e Prokurorisë për Ridvan Muharremin thotë si ai në periudhën kohore nga muaji shkurt 2022 e në vazhdimësi, me dashje dhe me qëllim të krijimit të kushteve dhe mundësive për realizimin e veprimeve inkriminuese për të pandehurit Irfan Lipovica dhe Hafiz Gara, i ka ndihmuar ata, duke i krijuar kushtet, propozuar dhe siguruar fillimisht për negocim për furnizim me rezerva shtetërore.

    Prokuroria ka thënë në dosje se janë propozuar O.E. “Yafe Turizm Insaat Sanayi ve Ticaret Anonim Sirketi” me seli në Bursa të Turqisë për furnizim me grurë dhe “Xanto SP” ZO.O. In me seli në Gdynia, Poloni për furnizim me vaj luledielli dhe sheqer, e më pas përmes përfshirjes pa autorizim në procesin e negocimit në mes të pandehurve Irfan Lipovica dhe Hafiz Gara me O.E.  ka luajtur rol kyç në negocimin e kushteve të kontratave.

    “Ku si rezultat është lidhur Kontrata për furnizim me rezerva shtetërore në mes të Ministrisë se Industrisë, Ndërmarrësisë dhe Tregtisë (MINT) dhe O.E. “Yafe Turizm Insaat Sanayi ve Ticaret Anonim Sirketi” për blerjen e grurit, në sasi prej 10,000 tonë, dhe çmim prej 4,834,778 Euro, me të cilat kompani i pandehuri Ridvan Muharemi, edhe më parë ka pasur raporte kontraktuale dhe biznesore dhe Kontrata nr.1548-02 e datës 17.03.2022 me O.E. “Xanto SP ZO.O. In për furnizim me Vaj luledielli dhe sheqer, në sasi 200 mijë litra vaj dhe 120 mijë kg. sheqer, me çmim prej 276 mijë euro, shuma këto të paguara në tërësi në formë të avansit, mirëpo edhe përkundër faktit se pagesat janë realizuar, autoriteti kontraktues ka pranuar vetëm 9,947.5 tonë grurë, pra 52.5 tonë më pak se sasia e kontraktuar, ndërsa vaji dhe sheqeri nuk janë sjellë fare….” – thuhet në dosje.

    Gjykata e Prishtinës jua kishte caktuar nga 30 ditë paraburgim tre të dyshuarve për keqpërdorim me rezarvat shtetërore.

    Sipas njoftimit të Gjykatës së Prishtinës, caktimi i masës së paraburgimit për të pandehurit Irfan Lipovica dhe Hafiz Gara ishte dhënë për shkak të dyshimit të bazuar se kanë kryer veprën penale “Keqpërdorimi i pozitës apo autoritetit zyrtar”.

    Ndërkaq, paraburgimi për Ridvan Muharremin ishte dhënë për shkak të dyshimit të bazuar se ka kryer veprën penale “Dhënia e ndihmës në kryerje të veprës penale të keqpërdorimit të pozitës apo autoritetit zyrtar”.

    Në mëngjesin e 18 gushtit 2023, me urdhër të Prokurorisë Speciale ishin kryer arrestimet dhe bastisjet për disa orë në zyret e MINT dhe pronat e Ridvan Muharremit.

    Bastisjet dhe arrestimet erdhën pas publikimit të audioincizimeve të medias ‘Nacionale’ për rezervat shtetërore.