Ballina

Etiketë: AAK

  • Gjini i AAK-së: Gjakova nuk flet tinëz me askënd, as me Radoiçiqin

    Aleanca për Ardhmërinë e Kosovës dhe partnerët e saj të koalicionit më 13.01.2025 kanë mbajtur tubimi zgjedhor në qytetin e Gjakovës.

    Nënkryetari i AAK-së, Ardian Gjini, njëherazi kryetar i Komunës së Gjakovës, ka kritikuar kandidatin e LVV-së për kryeministër, Albin Kurtin.

    “Gjakova nuk flet tinëz, as me Radoiçiqin as me kurrkënd. Kur flasin tinëz, ata flasin në emër të Kurtit, se ai fshihet. I shtie të tjerët me folë. Por, Gjakova ka folë qysh është dashur, me gjashtë brigada edhe më 1998 edhe më 1999, edhe sot me këdo që flasin, edhe me armiqtë tanë, flasim në dritë, por kurrë nuk flasim për diçka që nuk është në interes të Kosovës”- tha Gjini.

    Kandidati i AAK-së për kryeministër, Ramush Haradinaj, deklaroi se Kurti e ka ndalur ndërtimin e rrugës për Gjakovë.

    Ndërsa përsëriti zotimin për anëtarësim në NATO.

    “Punën e parë që e bëri Kurti – e ndali rrugën deri në Gjakovë që e kishim filluar me ministrin Lekaj. Ju siguroj që gjashtë muaj ka me u kry rruga që vjen nga Dollci. Do ta bëjmë edhe kampusin universitar. Krejt bota është kah punon me mbërri sigurinë e madhe. Me anëtarësim në NATO e mbërrijmë edhe ne, për ketë duhet me ndërru qeverinë”- u shpreh Haradinaj.

    Ndërsa, kryetari i Nismës Socialdemokrate, Fatmir Limaj, ka thënë se janë bashkuar të gjitha gjeneratat në këtë koalicion për ta bërë Kosovën fituese.

    AAK-ja bashkë me partnerët e saj të koalicionit, Nismën Socialdemokrate, Konservatorët, Forumin Intelektual E-30, dhe Listën Ideal më 12.01.2025 e hapën zyrtarisht fushatën për zgjedhjet e 09.02.2025 me një tubim në sallën “1 Tetori” në Prishtinë.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Haradinaj e Limaj nisin fushatën në Prekaz: Zotohemi për fuqizimin e vendit

    Ramush Haradinaj, kandidati për kryeministër i koalicionit AAK, Nisma, Lista Konservatore dhe Forumi Intelektual E-30, ka hapur fushatën zgjedhore për zgjedhjet nacionale të 9 shkurtit 2025.

    Ai fushatën e hapi duke bërë homazhe në Kompleksin Memorial “Adem Jashari”.

    Haradinaj ka thënë se nga Prekazi niset për “Kosovën Fituese” me numrin 137.

    “Prekazi është vendi që na bashkon. Prekazi është betimi ynë për shtet e atdhe, liri e demokraci. Nga këtu nisemi për Kosovën Fituese me numrin 137. Rroftë Kosova”- ka thënë Haradinaj.

    Kryetari i Nismës Socialdemokrate, Fatmir Limaj, tha se fushatën po e nisin nga Prekazi i komandantit legjendar, Adem Jashari, prej aty ku nisën celulat e para të lirisë.

    “Nga Prekazi i Adem Jasharit, nga emblema e lirisë, nga ku nisën celulat e para të lirisë dhe pavarësisë së Kosovës, duke u zotuar për avancimin dhe fuqizimin e vendit tonë”- shkroi Limaj.

    Nga sot më 11 janar ka nisur zyrtarisht fushata zgjedhore e partive politike për zgjedhjet e 9 shkurtit.

    Partitë politike në Kosovë, kanё nisur qё moti tё përgatiten për zgjedhjet parlamentare të 9 shkurtit, pёrmes para-fushatave qё kanё zhvilluar tash e disa muaj.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

    Sipas vendimit të fundit të KQZ-së, procesi i votimit do të zhvillohet në 17 Ambasada dhe 15 Konsullata, në 19 shtete të ndryshme të botës.

    Përmes shortit në Zgjedhjet e 9 shkurtit Lëvizja Vetëvendosje (LVV) do të ketë numrin 118, Lidhja Demokratike e Kosovës (LDK) 124, Partia Demokratike e Kosovës (PDK) 131, ndërsa Koalicioni AAK-NISMA-Lista Konservatore me numër 137.

    Nga këto zgjedhje do të vendoset përbërja e re e Kuvendit me 120 ulëse dhe deputetët më pas zgjedhin Qeverinë e re.

    Qeveria aktuale e formuar mё 2021 në Kosovë udhëhiqet nga Albin Kurti, kreu i Lëvizjes Vetëvendosje.

    KQZ e ka certifikuar më 04.01.2025 listën përfundimtare të votuesve brenda dhe jashtë Kosovës dhe ka bërë të ditur se 2 milionë e 75 mijë e 868 votues do të kenë të drejtë vote në Zgjedhjet e rregullta parlamentare më 9 shkurt.

  • AAK premton rritje të subvencioneve në bujqësi

    Kandidatët për deputetë nga radhët e Aleancës për Ardhmërinë e Kosovës (AAK) kanë shpalosur në “Debat Përnime” prioritetet në fushën e bujqësisë. 

    Me profesion ekonomiste, Emine Daci-Zejnullahu, tha se ka fakte që 300 milionë euro të Qeverisë të tanishme të cilat janë investuar në sektorin e bujqësisë nuk kanë rezultuar me rritjen e GDP-së (Bruto Produkti Vendor). 

    “Sektori i bujqësisë në vitin 2019 ka kontribuar në 7.4 % të GDP-së, kurse tani, nëse shkojmë në vitin 2023 e kemi të njëjtën. Kjo ka ardhur si pasojë e një qasjeje joprofesionale” – tha ajo.

    Kandidatja për deputete u zotua se në sektorin e bujqësisë do të fokusohen kryesisht te fuqizimi ekonomik i ndërmarrjeve të vogla, femerëve të vegjël si dhe atyre të mesëm.

    Ndërsa, Tahiri tha se në fushën e bujqësisë e para dhe më kryesorja do të jetë rritja e subvencioneve për fermer, pasi sipas tij, “armiku kryesor” i Kosovës pas Serbisë është “dobësimi i ekonomisë, dobësimi i prodhimit dhe dobësimi i atyre që bëjnë punë në fushë”.

    “Subvencionimi do të krijohet në mekanizmin jo të dhuratave për miqë e dashamirë, por subvencionimi do të kthehet në pika strategjike”- tha Tahiri, duke shtuar se nëse e marrin Qeverinë do t’i rrisim 20% krahasuar me Qeverinë aktuale.

    Për më shumë klikoni në link:

    https://kallxo.com/gjate/zotimet-e-aak-se-ne-debat-pernime-per-ckapje-te-sistemit-te-drejtesise/

  • AAK në “Debat Përnime”: Kosova s’ka nevojë për SPAK, e kemi Prokurorinë Speciale

    Në emisionin “Debat Përnime”, në të cilin është diskutuar për programin zgjedhor të Aleancës për Ardhmërinë e Kosovës (AAK), pjesë e diskutimeve ishte nevoja për një “reformim rrënjësor” të sistemit të drejtësisë.

    Kreshnik Gashi, kryeredaktor në KALLXO.com ka ballafaquar kandidatët e AAK-së me objektivat e tyre programore në këtë fushë.

    “Pse po doni me e fuqizu Agjencinë për Parandalimin e Korrupsionit, një mekanizëm i cili është totalisht jofunksional edhe mbi bazën e ligjore në hetimin e pasurisë, dhe në anën tjetër mos me e fuqizu Prokurorinë e Shtetit, e cila i ka kompetencat për me i hetu- prej deklarimit, prej shpëlarjes së parave, prej krimit të organizuar, prej korrupsionit dhe elementeve të tjera. A po tentohet që sërish me u investu edhe katër vite të tjera në diçka që është mekanizëm i Kuvendit, i cili nuk ka përgjegjësi të mëdha në hetim të korrupsionit, por në parandalim, e me u shmangë investimi aty ku duhet- në krijimin e një SPAK-u të Kosovës” – pyetur Gashi.

    Përgjigje për këtë çështje ka dhënë kandidati për deputet nga radhët e AAK-së, Besnik Tahiri, duke thënë se Kosova nuk ka nevojë për një SPAK, pasi të njëjtin funksion e ka Prokuroria Speciale.

    “ Shqipëria, SPAK-un e ka themeluar jo për qef. E ka themeluar sepse e ka pasë parakusht themelor për më ecë përpara. Dhe, unë mendoj që SPAK-u është mrekullia që i ka ndodhë Shqipërisë, por nuk mendoj që këtu duhet të vijë një SPAKë, për shkak se ne e kemi SPAK-un. SPAK-u i Kosovës është Prokuroria Speciale”, ka deklaruar Tahiri.

    Madje, ai foli edhe për ngjashmëritë që kanë në përmbajtjen ligjore këto dy institucione.

    “Nëse i lexoni detyrat që i ka SPAK-u dhe i lexoni detyrat që i ka Prokuroria Speciale nuk dallojnë shumë. Ajo që ne duam është që ta rrisim integritetin e gjykimit, guximin dhe njëkohësisht përformancën, por jo duke marrur një model i cili për mendimin tim nuk i takon…”- ka deklaruar ai.

    Njëjtë mendon edhe kandidati tjetër për deputet, Arton Demhasaj. Prokuroria Speciale, sipas tij, është një lloj SPAK-u, vetëm se duhet të investohet në aspektin financiar dhe në kuadro profesionale.

    “Në momentin që ne investojmë me bazë ligjore, por edhe në aspektin financiar, por edhe me resurse njerëzore, Prokuroria Speciale është një lloj SPAK-u. Specialja i ka këto kompetenca, veç duhet me mbështet me financa, me burime njerëzore dhe profesionale. E ata pastaj e kryejnë punën si SPAK-u në Shqipëri”- tha Demhasaj.

    Si të nevojshëm, ai e sheh edhe rishikimin e sistemit prokurorial.

    “Së pari duhet me ndodhë një lloj rishikimi i sistemit prokurorial që me ardhë deri tek ajo që me pasë një profilizim të qartë të sistemit prokurorial. Specialja mos me pasë kompetenca për me hetu gjithçka, por me qenë e profilizuar”- tha Demhasaj.

    Për më shumë kilikoni në link:

  • Tahiri i AAK-së i quan të turpshme deklaratat e Kurtit për Blerim Isufaj

    Emri i Kryeprokurorit të Prokurorisë Speciale, Blerim Isufaj, është një nga emrat më të lakuar në fushën e drejtësisë në vitet e fundit. Krejt kjo për shkak të kritikave që i janë bërë veçmas nga kryeministri i Kosovës, Albin Kurti.

    Kandidati për deputet i Aleancës për Ardhmërinë e Kosovës (AAK), Besnik Tahiri thotë se me këtë instancë të lartë e shtetit duhet të merret vetëm Këshilli Prokurorial i Kosovës. 

    Sipas tij, “nuk është detyrë as e Albin Kurtit, as e Vjosa Osmanit, as e Glauk Konjufcës, as e Ramush Haradinaj e as dikujt tjetër” për me treguar se cili është personi që e emëron Kryeprokurorin.

    Kështu u shpreh Tahiri në debatin zgjedhor “DebatPërnime” përballë Jeta Xharrës, Kreshnik Gashit dhe Visar Prebrezës, aty ku kandidatët për deputetë të kësaj partie patën mundësinë që të shpalosin programin e tyre zgjedhor dhe në të njëjtën kohë të ballafaqohen me pyetje.

    Duke shpalosur zotimet e tij nëse arrinë që së bashku me partinë e tij të fitojnë zgjedhjet parlamentare që do të mbahen më 09.02.2025, Tahiri tha se është e pakuptimtë që Kryeprokurori i Prokurorisë Speciale të sulmohet në vazhdimësi prej kryeministrit dhe ministres të Drejtësisë në foltore të Kuvendit, “aty ku fjala e tyre është e mbrojtur ligjërisht”.

    “Ajo që është folë për sistemin e drejtësisë dhe kryeprokurorin Isufaj është e turpshme për një demokraci funksionale dhe për një shtet që kërkon llogari. Unë nuk e njoh Blerim Isufajn. Nuk e di kush është. A është i mirë a i keq, është sistemi që e përcakton. Por, deri më tani çka është parë, është që është shumë i guximshëm për të adresuar çështje”- tha Tahiri.

    Ndërsa, kandidati për deputet, Arton Demhasaj, tha se sa më shumë që flasin për sistemin e drejtësisë, aq më shumë ky sistem do të jetë i ndikuar politikisht. Kështu që, sipas tij, rruga e tyre është që të flasin sa më pak për këto çështje.

    “Ka ndodhë që me shkelje kushtetuese Presidentja e ka kthyer mbrapa një vendim të Këshillit Prokurorial për ta emëruar Kryeprokuror Blerim Isufajn. Mendoj që është shkelje, dhe këto shkelje nën qeverisjen tonë nuk do të ndodhin”- shtoi ai.

    Ministrja e Drejtësisë, Albulena Haxhiu, kishte deklaruar se kryeprokurori Blerim Isufaj, e di se kush nga prokurorët në të kaluarën ka shkuar në zyret e ish-kryeministrave.

    Deklarata e ministres Haxhiu pasoi pas debatit rreth ftesës së Prokurorisë Speciale ndaj kryeministrit Albin Kurti, për t’u intervistuar si dëshmitar në rastin e rezervave shtetërore dhe këmbënguljes së tij për të mos u paraqitur për intervistim në zyret e Prokurorisë.

    “Blerim Isufaj e di shumë mirë  kush nga prokurorët kanë shkuar në zyret e ish-kryeministrave, por nuk flet për këtë gjë. Prandaj, ju lutem si gazetarë që të insistoni që përgjigjet e tilla t’i merrni nga kryeprokurori Isufaj” – tha Haxhiu para gazetarëve më 10.01.2025.

    Së fundmi, kryeministri Albin Kurti kishte deklaruar se nuk i është përgjigjur thirrjes së Prokurorisë Speciale për intervisim si dëshmitar në rastin e rezervave shtetërore, pasi sipas tij, qëllimi është që ai të bëhet lajm ndërkombëtar duke hyrë në objektin e Prokurorisë. Për këtë kryeministri e akuzoi kryeprokurorin Isufaj, të cilin e quajti “regjisor” të asaj “pamjeje të mundshme”.

    Kurse, kryeprokurori Isufaj, duke mos dashur të japë përgjigje të drejtpërdrejtë rreth këtij pretendimi të kryeministrit Kurti, në një konferencë për media me 30.12.2024, tha se “të gjithë janë të barabarë para ligjit” dhe se “nuk i interesojnë deklarimet e tilla”.

    “Pikërisht ky prokurori (Blerim) Isufaj, ky është regjisori i një pamjeje kur unë hyj në Prokurorinë e Shtetit dhe prodhohet një lajm ndërkombëtar që kryeministri hyn në Prokurori të intervistohet për një rast të korrupsionit. Aty nuk thuhet që si dëshmitar. Ky është qëllimi” – tha Kurti në një emision në Kohavision më 29.12.2024.

    Për më shumë klikoni në link:

    https://kallxo.com/gjate/zotimet-e-aak-se-ne-debat-pernime-per-ckapje-te-sistemit-te-drejtesise/