Presidentja e Kosovës, Vjosa Osmani është takuar me kongresistin amerikan Ritchie Torres gjatë qëndrimit të saj në New York.
Osmani ka bërë të ditur se me Torres-in kishin një diskutim përmbajtësor për zhvillimet e fundit në Kosovë dhe rajon.
“Mirënjohës për mbështetjen e tij të palëkundur për Kosovën dhe për forcimin e vazhdueshëm të marrëdhënieve tona me Shtetet e Bashkuara”- ka shkruar Osmani.
Në të njëjtin postim, Osmani ka falëndëruar mërgatën për organizimin dhe që sipas saj, vazhdon të luajë rol kyç në kultivimin dhe fuqizimin e vazhdueshëm të kësaj aleance.
Gjatë vizitës së saj në SHBA, e para e vendit është takuar me përfaqësues të Google dhe Amazon.
Presidentja Vjosa Osmani është duke qëndruar në Shtetet e Bashkuara të Amerikës, ku do të marrë pjesë edhe në Agjendën për gratë, paqen dhe sigurinë.