Ballina

Kategori: Prokuroria

  • Mungon dëshmitarja bashkëpunuese, nuk mbahet seanca ndaj të akuzuarve për rastin e ‘patentë-shoferëve’

    Seanca ndaj 31 të akuzuarve në rastin ‘patentë-shoferët’ ka dështuar të mbahet sot, më 10.01.2025, në Gjykatën e Prishtinës.

    Të akuzuar në këtë rast janë: Naser Llugaliu, Filloreta Ajvazi,  Flora Ferizi, Adem Binakaj, Leuart Shehu, Agim Restelica, Flamur Lekaj, Shaban Zuka, Eduard Brahimaj, Dragan Zhivkoviq, Naser Bislimi, Azem Miftari, Labinot Ajeti, Magbule Mehmeti, Avdush Topalli, Premtim Topalli, Selim Rrustemi, Fatos Ferizi, Besfort Pozhegu, Naim Thaqi, Sylë Bejta, Ekrem Latifi, Dritmir Islami, Murtez Rama, Hasan Hasani, Milazim Demolli, Lindita Hoxha, Enver Fazliu, Burim Jashari, Fejzullah Ejupi dhe Bashkim Jetullahu.

    Për tre të akuzuarit: Burim Jasharin, Fejzullah Ejupin dhe Bashkim Jetullahun, Gjykata kishte marrë Vendim që ndaj tyre të veçohej procedura penale.

    Në këtë seancë ishte paraparë të dëgjohej dëshmitarja bashkëpunuese e Prokurorisë, Adelina Gashi, e për të cilën gjyqtarja Fatime Dërmaku ka thënë se janë njoftuar nga Policia e Kosovës se dëshmitarja bashkëpunuese Adelina Gashi jeton në Republikën e Sllovenisë dhe e njëjta është njoftuar për mbajtjen e seancës. Por, kjo e fundit kishte thënë se për shkaqe shëndetësore të djalit të saj nuk mund të jetë prezente në seancën e datës 10.01.2025.

    Krytarja e Trupit Gjykues Fatime Dërmaku, tutje, ka thënë se edhe gjatë ditës së sotme Gjykata ka tentuar disa herë të komunikojë me dëshmitaren bashkëpunuese përmes telefonit, mirëpo e njëjta nuk i është përgigjur thirrjes së Gjykatës.

    Ndërkaq lidhur me këtë, prokurori Eset Rama ka thënë se do të insistojnë përsëri që ta sigurojnë prezencën e dëshmitares bashkëpunuese për seancën e radhës dhe nëse kjo formë nuk është e mundur, atëherë do të propozojnë rrugën e bashkëpunimit juridik ndërkombëtar.

    Prokurori Rama ka thënë, tutje, se konsideron se është e domosdoshme dëshmia e dëshmitares bashkëpunuese Gashi, propozoi ndërprerjen e shqyrtimit gjyqësor dhe të caktohet një datë tjetër.

    Tutje, mbrojtësi i të akuzuarit Enver Fazliu, avokati Bekim Kafexholli ka thënë se edhe në seancën e kaluar e kanë kontestuar legjitimitetin e marrjes në pyetje të dëshmitares bashkëpunuese, ngase e njëjta është marrë në kundërshtim me Kodin e Procedurës Penale, duke thënë se kjo dëshmi është marrë përmes video-linkut pa prezencën e organeve kompetente në vendin nga është marrë deklarata.

    Avokati Kafegjolli tha, tutje, se edhe nëse sigurohet prezenca e dëshmitares bashkëpunuese Adelina Gashi, dëshmia e saj nuk do të prodhojë efekt juridik.

    Tutje, mbrojtësi i të akuzuarit Naser Llugaliu, avokati Hamdi Ibrahimi i propozoi Gjykatës që të marrë Vendim që të bëjë revokimin e Vendimit për shpalljen e Adelina Gashit si dëshmitare bashkëpunuese. Këtë propozim të avokatit Hamdiu e refuzoi Trupi Gjykues.

    Trupi Gjykues e aprovoi propozimin e prokurorit Rama për ndërprerjen e seancës dhe obligoi Prokurorin që në seancën e radhës të sigurojë prezencën e dëshmitares Adelina Gashi.

    Seanca e radhës, për këtë çështje penale, u caktua për në muajin mars 2025.

    Trupi Gjykues në këtë çështje penale është i përbërë nga Fatime Dërmaku, kryetare dhe antarët, Naser Foniqi e Ertan Sejfulla.

     

    Çfarë thotë Dosja e Prokurorisë?

    Sipas Aktakuzës së ngritur më 31.03.2019, i pandehuri Naser Llugaliu (në pozitën e Koordinatorit të Qendrës së Patentë-shoferëve në Prishtinë), e pandehura Filloreta Ajvazi (në pozitën e Asistentes administrative të kësaj Qendre), Fejzullah Ejupi (në pozitën e Zyrtarit Administrativ në këtë Qendër), i pandehuri Shaban Zuka (në pozitën e Rojës së sigurimit të kësaj Qendre), si dhe të pandehurit, Adem Binakaj, Leuart Shehu, Agim Restelica, Flamur Lekaj, Shaban Zuka, Eduard Brahimaj, Dragan Zhivkoviq, Naser Bislimi, Azem Miftari, Labinot Ajeti, Magbule Mehmeti, Selim Rrustemi, Fatos Ferizi dhe Besfort Pozhegu (në pozitën e Ekzaminerëve të provimit teorik apo praktik, në kuadër të Ministrisë së Infrastrukturës) kanë keqpërdorur pozitën e tyre zyrtare në vazhdimësi dhe të njëjtit me qëllim të përfitimit të kundërligjshëm për vete apo tjetrin kanë bërë korrigjimin e testeve teorike, në zyrat e tyre pa monitorim të kamerave dhe pa Komisionin mbikqyrës.

    Të njëjtit, sipas Aktakuzës, kanë mundësuar kalimin e kandidatëve për patentë-shoferë pa i plotësuar poenat e paraparë për kalueshmëri, ku kandidatëve të caktuar ua kanë plotësuar testet teorike, si dhe në disa raste ndërhyjnë në testet e kandidatëve, me qëllim që të njëjtit të kenë pikët e nevojshme për të kaluar testet për patentë shoferë të kategorive të ndryshme. E po ashtu edhe për kryerjen e provimit në pjesën praktike. Në këtë mënyrë i kanë sjellë vetes përfitime materiale.

    Me këtë rast të njëjtit akuzohen se në vazhdimësi kanë kryer veprën penale “keqpërdorimi i pozitës apo autoritetit zyrtar në vazhdimësi dhe në bashkëkryerje”.

    Sipas Dispozitivit të Dytë të Aktakuzës, i pandehuri Avdush Topalli, pronar i Autoshkollës “Flora” në seli në Prishtinë, ndërsa i pandehuri tjetër Premtim Topalli në pozitën e Instruktorit në të njëjtën Autoshkollë, njëherësh edhe djali i të pandehurit të parë, në cilësinë e subjektit të sektorit privat, në mënyrë të drejtëpërdrejtë kanë kërkuar dhe marrë dhuratë të pamerituar.

    Të njëjtit akuzohen se u kanë mundësur kandidatëve të cilët kanë qenë të interesuar për t’u pajisur me patentë shoferë të kategorive të ndryshme, kryesisht të kategorisë “D” duke iu marrë të holla nga 100 deri 1,000 euro, në atë mënyrë që në bashkëpunim edhe me zyrtarët e Ministrisë së Infrastrukturës – Departamenti i Patentë-shoferëve në Prishtinë, të pandehurve të lartpërmendurve u kanë mundësuar kandidatëve kryerjen e testit teorik dhe praktik, duke u dhënë të holla.

    Me çka në bashkëkryerje kanë kryer veprën penale “pranimi i ryshfetit në sektorin privat”.

    Tutje, sipas Aktakuzës, e pandehura Flora Ferizi si Asistente administrative në Qendrën e Patentë Shoferëve në Prishtinë, nuk  e ka lajmëruar veprën penale të cilën e ka mësuar gjatë ushtrimit të detyrës së saj, edhe pse ka qenë në dijeni dhe ka qenë e pranishme, kur kanë ndodhur shumë veprime inkriminuese.

    Me çka e pandehura Flora Ferizi  ka kryer veprën penale “moslajmërim i veprave penale apo kryerësve të tyre”.

    Sipas Aktakuzës, të pandehurit Avdush Topalli, Premtim Topalli dhe Burim Jashari kanë lëshuar dokument në emër të personit tjetër pa autorizimin e tyre, respektivisht Certifikatë mjekësore, në të cilën kanë figuruar edhe nënshkrimet e disa mjekëve, në atë mënyrë që i pandehuri i tretë në cilësi të menaxherit në ordinancën “TRURI” me seli në Prishtinë në bashkëpunim me të pandehurin e parë, pronar të Autoshkollës “Flora” dhe të pandehurin e dytë, Instruktor nga kjo Autoshkollë iu kanë mundësuar kandidatëve që të pajisen me Certifikata mjekësore, pa qenë fare prezent.

    Me çka me këto veprime të pandehurit në bashkëkryerje kanë kryer veprën penale “rastet e posaçme të falsifikimit të dokumenteve”.

    Të pandehurit Naim Thaqi dhe Sylë Bejta po akuzohen se më 15.05.2019 si persona zyrtarë kanë shfrytëzuar detyrën zyrtare, në atë mënyrë që në cilësinë e personave zyrtarë, të dy zyrtarë policorë, në mënyrë të kundërligjshme me qëllim të përfitimit të kundërligjshëm, ashtu që pandehuri Naim Thaqi, derisa ka qenë në takim në zyrë me të pandehurin Naser Llugaliu, i cili mbante pozitën e koordinatorit të Qendrës për Patentë-shoferë në Prishtinë e njofton fillimisht atë në lidhje me një rast, i cili ishte duke u hetuar nga Njësia për Hetimin e Krimeve Ekonomike dhe Korrupsionit në Prishtinë, i cili rast ishte dhe atë duke e njoftuar në hollësi në lidhje me atë se çka kishte deklaruar në Polici personi i dyshimtë, si dhe duke e udhëzuar të pandehurin Llugaliu si të veprojë ai, nëse i kërkohet ndonjë dokument në lidhje me këtë rast.

    Po ashtu, në Aktakuzë thuhet se i pandehuri i parë e njofton të pandehurin Llugaliu, se në bazë të tremujorit ata kanë kërkuar edhe 60 ditë shtesë, ndërsa i pandehuri i dytë, më 25 qershor 2019, në bashkëveprim me të pandehurin e parë, gjatë takimit që kanë pasur me të pandehurin Llugaliu në zyrën e tij, i pandehuri i dytë fillimisht i kishte kërkuar që për një kandidat për patent-shofer ta ndihmojë për ta kaluar për shkak se të njëjtin i kishte thënë se e ka familjar.

    Tutje,  më pas të njëjtin e informon që të ketë kujdes sepse në atë zyrë mund të ketë diçka.

    Me këto veprime të pandehurit në bashkëkryerje kanë kryer veprën penale “keqpërdorimi i pozitës apo autoritetit zyrtar”.

    Sipas Aktakuzës së Prokurorisë, në Dispozitivin e Pestë Pika 2 të pandehurit Naim Thaqi dhe Sylë Bejta, pa autorizim, ia kumtojnë personit tjetër informatën që përbën fshehtësi zyrtare, ashtu që i pandehuri i parë më 15 maj 2019, derisa kanë qenë në takim me të pandehurin Naser Llugaliu i cili mbante pozitën e Koordinatorit të Qendrës për Patentë-shofer në Prishtinë, ndaj të cilit ishin duke u zbatuar masat e fshehta të hetimit në bisedë e sipër, të njëjtin e informojnë lidhur me veprimet hetimore që janë ndërmarrë nga Njësia për Hetimin e Krimeve Ekonomike dhe Korrupsion në një rast.

    Dy të pandehurit, gjatë takimit që kanë pasur me të pandehurin Llugaliu në zyrën e tij, gjatë bisedës në mes tyre të njëjtin e pyesin fillimisht nëse ka diçka në zyrë të vendosur, e më pastaj e informojnë atë se janë duke u përcjellë nga Njësia për Hetimin e Krimeve Ekonomike dhe Korrupsion, duke njoftuar të njëjtin se janë angazhuar nga Policia, njësitë përcjellëse dhe se masat e fshehta janë vazhduar edhe për 60 ditë tjera, andaj duhet të jetë i kujdesshëm në veprimet e tij.

    Me këto veprime, të pandehurit në bashkëkryerje akuzohen se kanë kryer veprën penale “zbulimi i fshehtësisë zyrtare”.

    Sipas Dispozitivit të Gjashtë të Aktakuzës, i akuzuari Ekrem Latifi akuzohet se në cilësinë e Ekzaminerit pranë Ministrisë së Infrastrukturës – Departamenti i Patentë-shoferëve i ka dhënë dhuratë apo përfitim të paarsyeshëm në mënyrë të tërthortë personit zyrtar, të akuzuarit Naser Llugaliu në mënyrë që ai person të veprojë ose jo, në pajtim me detyrën e tij zyrtare, ashtu që në ditën kritike të njëjtit përmes një personi i kishte dhënë 250 euro të vendosura në zarf, me një emër të kandidatit të shkruar në letër, që ka pasur të hyjë në provim për Patentë-shofer atë ditë.

    Nga këto veprime i pandehuri Ekrem Latifi akuzohet se ka kryer veprën penale “dhënie e ryshfetit”.

    Sipas Aktakzuës, Dispozitivit të Shtatë të saj, i pandehuri Bashkim Jetullahu akuzohet se në cilësinë e Autoshkollës “8 Marsi” në Prishtinë, si person i punësuar në këtë Autoshkollë, në mënyrë të drejtpërdrejtë ka kërkuar dhe ka marrë dhuratë të pamerituar ose ka keqpërdorur pozitën e tij duke marrë shpërblim për veten e tij, ashtu që nga një kandidat për patentë-shofer ka pranuar 100 euro për ta ndihmuar që ta kalojë testin praktik për patentë-shofer – duke e udhëzuar të njëjtin që nëse nuk e jep atë shumë të të hollave do ta rrëzojë në testimin e vozitjes.

    Nga këto veprime i pandehuri Ekrem Latifi akuzohet se ka kryer veprën penale “pranim i ryshfetit në sektorin privat”.

    Sipas Dosjes së Prokurorisë, Dispozitivit të Tetë të saj, i pandehuri Dritmir Islami akuzohet se në cilësinë e Instruktorit të Autoshkollës “Abis” në Prishtinë ka kërkuar drejtpërdrejt dhe ka marrë dhuratë të pamerituar ose ka keqpërdorur pozitën e tij duke marrë shpërblim për veten e tij, ashtu që nga një kandidate për patentë-shofer dhe bashkëshorti i saj ka pranuar 600 euro për ta ndihmuar që ta kalojë testin për patentë-shofer – sipas udhëzimeve të tij.

    Nga këto veprime i pandehuri Dritmir Islami akuzohet sa ka kryer veprën penale “pranim i ryshfetit në sektorin privat”.

    Në Dispozitivin e Nëntë të kësaj Aktakuze, i pandehuri Murtez Rama po akuzohet se në cilësinë e Instruktorit në Autoshkollën “Rinasi” me seli në Drenas, me dashje ka ndihmuar personat e tjerë në kryerjen e veprave penale, respektivisht Avdush dhe Premtim Topalli, ashtu që me veprimet e të njëjtëve u ka dhënë pajisje për të kryer veprën penale, si dhe atë kandidatëve që kanë pasur të hyjnë në teste teorike për patentë-shofer u ka vendosur mjete të fshehta fotografuese (stilolaps me kamerë), përmes të cilit ka arritur që të nxjerrë teste dhe të njëjtat ua ka dërguar të akuzuarve Avdush dhe Premtim Topallit, të cilat janë gjetur me rastin e ekzaminimit të telefonit të tyre.

    I njëjti akuzohet se ka kryer veprën penale “dhënie ndihme në kryerjen e veprës penale”, si dhe veprën penale “pranimi i ryshfetit në sektorin privat”.

    Tutje, sipas Dispozitivit të Dhjetë, i pandehuri Hasan Hasani akuzohet në cilësinë e kandidatit për aftësim profesional për patentë shofer, i regjistruar në Autoshkollën “Fati” në Prishtinë, i ka ofruar në mënyrë të tërthortë shpërblim ose përfitim të panevojshëm instruktorit të kësaj Autoshkolle Milazim Demolli, në  shumën prej 450 eurosh, në ditën kur kishte hyrë në test për patentë-shofer, e që ishin marrë vesh që ai t’i plotësojë vetëm disa pyetje, kurse pjesën tjetër të testit ta lërë të zbrazët.

    Me këtë rast i njëjti akuzohet se ka kryer veprën penale “dhënie të ryshfetit në sektorin privat”.

    Sipas Dispozitivit të Njëmbëdhjetë të kësaj Aktakuze, i pandehuri Milazim Demolli akuzohet se në cilësinë e punonjësit të Autoshkollës “Fati” në Prishtinë, si person i cili ka qenë i punësuar në këtë Autoshkollë, në mënyrë të tërthortë ka kërkuar dhe ka marrë dhuratë të pamerituar dhe ka keqpërdorur pozitën e tij – duke marrë shpërblim për veten e tij.

    Në këtë Dispozitiv të Aktakuzës thuhet se kandidati për patentë-shofer Hasan Hasani ka pranuar shumën e të hollave prej 450 eurosh për ta ndihmuar që ta kalojë testin teorik – duke e udhëzuar atë që me rastin e nënshtrimit të testit t’i plotësojë vetëm dy përgjigje e të tjerat t’i lërë të zbrazëta.

    I njëjti thuhet se më 02 korrik 2019 shkon në zyrën e të pandehurit Naser Llugaliu dhe së bashku me të i shikojnë listat e kandidatëve të cilët kanë për t’iu nënshtruar dhe së bashku e identifikojnë kandidatin Hasan Hasani,

    Me këtë, i njëjti po akuzohet se ka kryer veprën penale “pranimi i ryshfetit në sektorin privat”.

    Në Dispozitivin e Njëmbëdhjetë në Pikën e Dytë thuhet se më 02 maj 2019, si punëtor i Autoshkollës “Fati” në Prishtinë i ka ofruar dhe i ka dhënë dhuratë apo përfitim të paarsyeshëm në mënyrë të drejtpërdrejtë për vete apo tjetrin personit zyrtar Naser Llugaliu, në atë mënyrë që i njëjti të veprojë ose të mosveprojë në pajtim me detyrën e tij zyrtare,

    Me këtë rast, i njëjti po akuzohet se ka kryer veprën penale “dhënia e ryshfetit”.

    Tutje, sipas Dispozitivit të Dymbëdhjetë të kësaj Aktakuze, e pandehura Lindita Hoxha akuzohet se nga data 27 qershor 2019 e deri më 05 korrik 2019, në cilësinë e Instruktores për aftësim profesional për patentë-shofer në Autoshkollën “Atlantida”, në vazhdimësi i ka ofruar dhe i ka dhënë dhuratë apo përfitim të paarsyeshëm në mënyrë të drejtpërdrejtë për vete apo tjetrin personit zyrtar Naser Llugaliu, koordinator i Qendrës për Patentë-shoferë në Prishtinë, në mënyrë që i njëjti të veprojë ose të mos veprojë në pajtim me detyrën e tij zyrtare.

    Me këto veprime e pandehura Lindita Hoxha po akuzohet se ka kryer veprën penale “dhënia e ryshfetit në vazhdimësi”.

    Sipas Dispozitivit të Trembëdhjetë të kësaj Aktakuze, i pandehuri Enver Fazliu në cilësinë e Instruktorit të Autoshkollës “AAB” në Prishtinë si person i punësuar në këtë subjekt të sektorit privat, në mënyrë të drejtpërdrejtë ka kërkuar dhe marrë dhuratë të pamerituar ose ka keqpërdorur pozitën e tij – duke marrë shpërblim për veten e tij.

    Në Dosjen e Prokurorisë thuhet se nga një kandidate për patentë-shofer e ka pranuar shumën e të hollave prej 450 eurosh, për ta ndihmuar që ta kalojë testin teorik për patentë-shofer, duke e udhëzuar atë me rastin e mbushjes së testit që ajo t’i shkruajë vetëm të dhënat personale në test dhe pjesën tjetër të testit ta lërë të zbrazët dhe e njëjta ashtu edhe  kishte vepruar dhe kishte arritur që ta kalojë testin për patentë-shofer.

    Me çka i pandehuri Enver Fazliu po akuzohet për veprën penale “pranim i ryshfetit në sektorin privat”.

     

     

  • Avokatja Shemsie Sheholli dhe përmbaruesi Isak Islami, të dyshuar për ushtrim ndikimi dhe keqpërdorim të detyrës, lirohen nga arresti shtëpiak

    Avokatja Shemsie Sheholli dhe përmbaruesi Isak Islami, janë liruar nga masa e arrestit shtëpiak.

    Këtë për KALLXO.com e ka konfirmuar zëdhënësja e Gjykatës së Prishtinës, Mirlinda Gashi.

    Shemsie Sheholli dyshohet për veprën penale ‘ushtrimi i ndikimit’, ndërsa Isak Islami për veprën penale  ‘keqpërdorim i pozitës apo autoritetit zyrtar’.

    “Ju njoftojmë se Prokuroria Themelore në Prishtinë nuk ka parashtruar kërkesë për vazhdimin e masës së arrestit shtëpiak ndaj të pandehurve SH. SH. dhe I. I.,  të caktuar nga Gjykata Themelore në Prishtinë –  Departamenti për Krime të Rënda, e cila masë ka qenë në fuqi deri më datë 02.01.2025 dhe në këto rrethana të njëjtit nga kjo datë janë në mbrojtje në liri”- thuhet në përgjigjen e Gjykatës së Prishtinës.

    Më 03.12.2024 Prokuroria Themelore e Prishtinës kishte kërkuar që të caktohet masa e paraburgimit ndaj avokates Shemsie Sheholli dhe përmbaruesit Isak Islami, mirëpo Gjykata e Prishtinës ndaj të njëjtëve kishte caktuar masën e arrestit shtëpiak.

    Sipas kërkesës për caktimin e masës së paraburgimit të cilën e ka siguruar KALLXO.com thuhet se ekziston dyshimi i bazuar se e pandehura Shemsie Sheholli, në cilësinë e avokates dhe përfaqësueses së palës së dëmtuar Besim Sopi, i cili ishte në cilësinë e paditësit në kontest civil, me qëllim të përfitimit të kundërligjshëm për veten, më 15.08.2023, ka kërkuar drejtpërdrejt shumën prej 25,000 mijë euro nga i dëmtuari Besim Sopi.

    Në kërkesë thuhet se avokatja, kishte tentuar ta bënte këtë duke premtuar ushtrimin e ndikimit të padrejtë mbi vendimmarrjen e kolegjit të gjyqtarëve të Gjykatës së Apelit, Burim Shala- kryetar dhe anëtarëve Nehat Idrizi dhe Huanida Pasuli, për t’ia dorëzuar aktgjykimin e çështjes, edhe pse i njëjti ishte nxjerrë më 12.07.2023 dhe i ishte dorëzuar tashmë të dyshuarës në cilësinë e avokates së palës

    Tutje në kërkesë thuhet se më datë 14.08.2023, e pandehura, përkundër faktit që aktgjykimi ishte tashmë i nxjerrë dhe dorëzuar, kishte kërkuar shumën prej 25,000 euro për ushtrimin e ndikimit të padrejtë mbi vendimmarrjen e kolegjit të Gjyqtarëve të Gjykatës së Apelit, me çka dyshohet se ka kryer veprën penale “Ushtrimi i ndikimit”.

    Ndërsa i dyshuari tjetër, përmbaruesi Isak Islami sipas kërkesës, thuhet se në cilësinë e përmbaruesit privat, duke keqpërdorur detyrën zyrtare, me qëllim përfitimi të kundërligjshëm pasuror për veten dhe për tjetrin, ka tejkaluar kompetencat e tij zyrtare pasi që më 21.12.2023, kishte caktuar dhe ekzekutuar përmbarimin ndaj debitorit Besim Sopi në emër të përmbushjes së obligimeve sipas faturës së datës 04.12.2023, shumën prej 25,454.00 euro, përshirë të gjitha shpenzimet procedurale.

    Tutje sipas kërkesës së prokurorisë të cilën e ka siguruar KALLXO.COM thuhet se Islami përmes bllokimit të llogarisë bankare dhe transferimit të mjeteve në llogarinë e tij, e cila procedurë ishte kryer në kundërshtim me Ligjin për Procedurën Përmbarimore dhe Ligjin për Procedurën Kontestimore dhe pa dijeninë e debitorit, për çka i njëjti ishte vënë në dijeni vetëm pasi kishte vërejtur mungesën e mjeteve në llogarinë bankare.

    Gjithnjë sipas kërkesës fatura e lëshuar në fjalë nga kreditorja e në këtë rast nga e pandehura Shemsie Sheholli jo vetëm se është e panënshkruar nga debitori, por në shkresat e lëndës nuk gjendet asnjë provë shkresore që ndonjëherë është njoftuar debitori paraprakisht për detyrimet që pretendohej që i kishte ndaj kreditores Shemsie Sheholli.

    Tutje në kërkesë, thuhet se të dëmtuarit Sopi nuk i ishte dhënë ndonjëherë mundësia që eventualisht ta përmbushë në mënyrë vullnetare detyrimin, kjo pasi në shkresat e lëndës i pandehuri Islami dy herë kishte provuar përmes Postës t’ia dërgojë propozimin për përmbarim dhe atë më datë 21.12.2023 dhe 04.01.2024 e në të cilat fletë kthesa shkruhej adresa jo e plotë, me çka vërtetohej fakti se debitori nuk kishte qenë i njoftuar asnjëherë për procedurën e përmbarimit.

    Kështu, ai dyshohet se ka kryer veprën penale “Keqpërdorimi i pozitës apo autoritetit zyrtar”.

    KALLXO.COM kishte raportuar më 02.12.2024 se avokatja Shemsie Sheholli dhe përmbaruesi Isak Islami janë ndaluar nga Prokuroria e Prishtinës për 48-orë.

    Ndërsa më 03.12.2024 KALLXO.COM kishte raportuar se Prokuroria Themelore e Prishtinës kishte kërkuar 1 muaj paraburgim ndaj avokates Shemsie Sheholli dhe përmbaruesit Isak Islami ndërsa pas disa orësh  më 03.12.2024 kishte raportuar se ndaj të njëjtëve është caktuar masa e arrestit shtëpiak.

  • Dosja e Prokurorisë Speciale ndaj të dyshuarit për terrorizëm që iu gjetën zolla dhe drogë

    Burim Dibrani është i arrestuari nën dyshimin për terrorizëm, në banesën e të cilit Policia gjeti armatim luftarak, tri zolla, municione dhe drogë.

    Policia i ra në gjurmë këtij të dyshuari për terrorizëm, pasi i njëjti ishte raportuar për “dhunë në familje”.

    Ndaj të njëjtit Prokuroria Speciale ka kërkuar në Gjykatën e Prishtinës masën e paraburgimit si masë të sigurisë ndaj tij.

    Dibrani u ndalua më 09.01.2025, pasi në banesën në rrugën “Sali Nivica” në Prishtinë gjatë kontrollit policor i janë gjetur tri zolla dhe lëndë narkotike.

    Sipas Prokurorisë Speciale, nga koha e pavërtetuar e deri më 08.01.2025, i pandehuri ka përgatitur veprime terroriste në atë mënyrë që paraprakisht ka siguruar tri armë të rënda – armë këto të parapara për akte terroriste.

    Sipas Dosjes së Prokurorisë Speciale ekziston dyshim i bazuar se i njëjti ka kryer veprën penale: “përgatitja e veprave terroriste ose veprave kundër rendit kushtetues dhe sigurisë së Republikës së Kosovës” – nga Neni 138 i Kodit Penal.

    I njëjti dyshohet edhe për veprën penale: “mbajtja në pronësi, kontroll ose posedim të paautorizuar të armëve”.

    Po ashtu, ndaj tij ekziston dyshim i bazuar se i njëjti ka blerë dhe shitur substanca narkotike.

    Sipas Prokurorisë, të dyshuarit më 08.01.2025 në banesën dhe objektet përcjelllëse të tij gjatë kontrollit policor i janë gjetur dhe sekuestruar 269.3 gram narkotikë, që dyshohet të jetë marihuanë.

    Me këtë sipas PSRK-së, i njëjti dyshohet se ka kryer veprën penale: blerje, posedim, shpërndarje dhe shitje e paautorizuar e narkotikëve – nga Neni 267 i Kodit Penal.

    Sipas Kërkesës së Prokurorisë Speciale në të cilën pati qasje KALLXO.com, dyshimi i bazuar për këto vepra penale vërtetohet nga provat të cilat janë gjetur në banesën e të dyshuarit, Burim Dibranit.

    Si i ra në gjurmë Policia Burim Dibranit, i dyshuar për terrorizëm?

    KALLXO.com kishte mësuar nga burimet e saj se Stacioni Policor – Qendra në Prishtinë kishte pranuar fillimisht një informatë për një rast të dhunës në familje.

    Më pas një njësi e reagimit ishte dërguar në vendin e ngjarjes në Bregun e Diellit. Ngjarja u trajtua menjëherë, ndërsa ekipi reagues i Policisë kishte kërkuar të hyjë brenda në banesë, për të vërtetuar informatën.

    Me lejen e personit të dyshuar kanë hyrë brenda dhe kanë hasur në një sasi të lëndës narkotike, të dyshuar marihuanë, e vendosur në një tavolinë.

    Më pas kanë kryer edhe një kontroll sipërfaqësore, gjatë së cilës kanë hasur në pajisje, municion dhe armë të tipit zolla. Menjëherë pasi u identifikuan këto armë, u thirr edhe Drejtoria e Anti-terrorit për të trajtuar rastin.

    Prokuroria Speciale i ka kërkuar Gjykatës Themelore të Prishtinës caktimin e masës për paraburgim ndaj të pandehurit Burim Dibrani, shtetas i Kosovës, i cili dyshohet për vepra terroriste.

    https://kallxo.com/lajm/rruga-se-si-arriti-policia-deri-te-zollat-dhe-terrorizmi-ne-bregun-e-diellit/

  • Dosja ndaj të akuzuarve për 400 kg kokainë – dështon seanca gjyqësore

    Ka dështuar të mbahet seanca e sotme, më 10.01.2025, ndaj të akuzuarve: Izet Sheqiri, Kadri Sheqiri, Faton Vrajolli, Kadri Brahimi dhe Fehmi Bytyçi.

    Izet Sheqiri, Kadri Sheqiri, Faton Vrajolli, Kadri Brahimi dhe Fehmi Bytyçi nga Prokuroria po akuzohen se përmes kompanisë “MC FOOD” kishin lidhur marrëveshje me një kompani “SEARA”, për importin e produkteve të mishit të pulës së ngrirë, por sipas Prokurorisë në to ishin vendosur substanca narkotike.

    Arsyeja pse ka dështuar të mbahet kjo seancë është për shkak se nuk pati kushte, pasi që ka munguar i akuzuari Kadri Sheqiri.

    Avokati i tij Xhafer Maliqi bëri të ditur se me klientin e tij kishte biseduar dhe i njëjti e kishte njoftuar se ndodhet në Shqipëri, ndërsa sot kishte tentuar disa herë por nuk kishte pasur qasje.

    Shqyrtimi gjyqësor i radhës pritet të mbahet më 16.01.2025.

    Kryetari i Trupit Gjykues, Ngadhnjim Arrni bëri të ditur se për të akuzuarin Kadri Sheqiri kjo Gjykatë do të lëshojë urdhërarrest për shoqërim për këtë datë.

    Ky rast po trajtohet në Departamentin Special të Gjykatës së Prishtinës nga Trupi Gjykues, i përbërë nga gjyqtarët Ngadhnjim Arrni (kryetar i Trupit Gjykues) dhe dy anëtarët, Valon Kurtaj dhe Rrahman Beqiri.

    Ndërsa, aktakuza po përfaqësohet nga prokurori special Valdet Gashi.

    Pesë të akuzuarit nuk e kanë pranuar fajësinë për veprat penale të cilat po u vihen në barrë nga Prokuroria, ndërsa i akuzuari Izet Sheqiri kishte thënë se ndihet fajtor vetëm për veprën penale “armëmbajtje pa leje”.

    Sipas aktakuzës, të akuzuarit përmes bashkëpunimit me persona nga shteti i Brazilit duke shfrytëzuar kompaninë “MC Food” kanë lidhur marrëveshje me kompaninë “SEARA”, për importimin e produkteve të pulës së ngrirë dhe në brendi të pakove është vendosur substancë narkotike.

    Kjo substancë e llojit kokainë u gjet më 17.05.2021, në sasi prej 400 kilogramësh.

    Aktakuza ndaj të akuzuarve është ngritur më 14.11.2022.

    Emisioni “Kallxo Përnime” ka transmetuar pamje ekskluzive të aksionit të Policisë, me rastin e sekuestrimit të kësaj sasie të drogës.

     

     

  • Mbrojtja pa shkresa të lëndës, dështon seanca fillestare ndaj 5 të akuzuarve për krime lufte

    Ka dështuar të mbahet shqyrtimi fillestar ndaj Dragan Cvetkoviq, Dragan Niçiq, Millosh Sosiq, Nenad Stojanoviq dhe Sllobodan Jevtiq, të akuzuar se në bashkëkryerje kanë kryer veprën penale ‘krime lufte kundër popullatës civile’.

    Arsyeja pse ka dështuar të mbahet seanca fillestare është për shkak se nuk kishte kushte, pasi që mbrojtja nuk ishin pajisur me shkresa të lëndës.

    Në momentin kur gjyqtari Rrahman Beqiri e pyeti prokurorin Atdhe Dema se a i ka dorëzuar provat të cilat i njëjti është i detyruar t’i dorëzojë sipas Kodit të Procedurës, prokurori Dema tha se duke qenë që akuza është dorëzuar më 27.12.2024 dhe shumica e stafit janë në pushime në momentin e dorëzimit nuk kanë mundur të dorëzohen të gjitha provat, por në fund të fundit në afat prej dy javësh ato prova janë bërë gati dhe sot mund të vijnë t’i tërheqin të gjithë avokatët mbrojtës.

    Ndërsa mbrojtësja e të akuzuarit Dragan Cvetkoviq, avokatja Jovana Filipoviq kërkoi që seanca e sotme të ndërpritet pasi e njëjta tha që nuk ishin pajisur me të gjitha shkresat e lëndës.

    “Prokuroria ka qenë në obligim që në momentin e ngritjes së Aktakuzës, të gjitha provat t’i dorëzojë së bashku me Aktakuzën, neve si mbrojtës si dhe të akuzuarve dhe kjo nuk është bërë.” – tha mbrojtësja e të akuzuarit Dragan Cvetkoviq, avokatja Jovana Filipoviq.

    “Unë më 03.01.2025 isha në Prokurorinë Speciale të Republikës së Kosovës dhe i kam kërkuar të gjitha shkresat e lëndës dhe më është thënë se ende të gjitha ato shkresat nuk ishin të përkthyera, ashtu që unë për klientin tim deklaroj se konsiderojmë që kjo seancë e sotme nuk mund të mbahet, sepse nuk mund të bëjmë këso praktika të këqija që aktakuza të ngritet pa dorëzimin e shkresave të lëndës.” – shtoi tutje avokatja Jovana Filipoviq.

    Gjyqtari Rrahman Beqiri mori Aktvendim që seanca e sotme të ndërpritet dhe e njëjta të shtyhet në afat të caktuar, meqenëse nuk ka kushte për të vazhduar, pasi që mbrojtja nuk i ka pranuar shkresat.

    Shqyrtimi fillestar pritet të mbahet më 15.01.2025.

    Ky rast po trajtohet në Departamentin Special të Gjykatës së Prishtinës, me gjyqtar Rrahman Beqiri.

    Ndërsa, aktakuza po përfaqësohet nga prokurori special Atdhe Dema.

    Dosja e Prokurorisë

    Sipas Dosjes së Prokurorisë ekziston dyshimi i bazuar mirë se të pandehurit Dragan Cvetkoviq, Dragan Niçiq, Millosh Sosiq, Nenad Stojanoviq dhe Sllobodan Jevtiq, si pjesë e grupit kriminal, në bashkëkryerje edhe me pjesëtarë të tjerë të paidentifikuar të këtij grupi të armatosur dhe të veshur me uniforma të kamufluara dhe uniforma jo të rregullta të Policisë apo Ushtrisë serbe, gjatë periudhës së luftës në Kosovë, konkretisht më 05.04.1999, në orët e para të mëngjesit, kishin ndërmarrë një aksion në fshatrat Inatoc (Kokaj), Llovcë, Pogragjë dhe Uglar.

    Sipas Aktakuzës thuhet se në mes të fshatrave Inatoc (Kokaj) dhe Llovcë te vendi i quajtur “Kisha e epërme”, fillimisht i kishin ndaluar viktimat Rr. I. dhe Xh. Z., kishin filluar që ta maltretonin viktimën Rr. I., duke e goditur pandërprerë në pjesë të ndryshme të trupit. Në po të njëjtin moment, derisa viktima Xh. Z. ishte duke ecur në drejtim të Rr. I., njëri nga pjesëtarët e këtij grupi, me armë kishte shtënë në drejtim të saj dhe e kishte goditur në stomak dhe si pasojë ishte rrëzuar dhe kishte mbetur e vrarë në vend.

    Tutje, sipas Aktakuzës, thuhet se pas këtij veprimi Rr. I. kishin vazhduar ta godisnin me thika në pjesë të ndryshme të trupit dhe pasi i njëjti kishte rënë në tokë, kishin vazhduar që ta godisnin me pjesën e pasme të armës automatike dhe me bajoneta të armëve, për të vazhduar tutje ashtu që në një grumbull të dushkut të ndezur, i kishin vendosur viktimat Xh. Z. dhe Rr. I., i cili në ato momente ishte ende gjallë dhe i kishin djegur trupat e tyre – ngjarje kjo e parë nga dëshmitari okular, Rifat Rexhepi.

    Gjithnjë, sipas aktakuzës, në drejtim të fshatit Llovcë në vendin e quajtur “Lugu i Elbishtës” i kishin ndaluar fillimisht viktimat R. D., S. Xh, Xh.H., A. R., të dëmtuarin Nazmi Hajdinin dhe Naser Halitin dhe nën kërcënimin e armëve i kishin detyruar që të shtriheshin në tokë, i kishin kontrolluar, e më pas e kishin liruar Naser Halitin dhe pastaj kishin shtënë me armë në drejtim të viktimave. Si pasojë e këtij veprimi kishin mbetur të vrarë R. D., S. Xh., Xh. H. dhe A. R.

    Sipas Aktakuzës, Nazmi Hajdinin fillimisht e kishin urdhëruar që t’i grumbullonte trupat e viktimave dhe t’i vendoste mbi një grumbull të drunjve, pastaj e kishin urdhëruar që të shtrihej edhe vetë i dëmtuari mbi viktimat dhe posa ishte shtrirë, kishin gjuajtur me automatik mbi të dëmtuarin Nazmi Hajdinin, i cili i kishte marrë dy plagë: njërën në qafë dhe tjetrën në shpatullën e majtë. Mirëpo, iu kishte mbijetuar plagëve të marra.

    Tutje, në Aktakuzë, thuhet që pas një kohe i ishte kthyer vetëdija. Këta pjesëtarë të këtij grupi kriminal nuk ishin aty. Ashtu i lënduar arrin që të shkojë deri në fshatin më të afërt dhe më pas i ishte ofruar ndihma e parë mjekësore – ngjarje kjo e parë nga dëshmitarët okular, Behxhet Mehmeti e Menderes Ramushi.

    Sipas Dosjes së Prokurorisë, rreth orës 15:00 përderisa popullata civile ishte duke u larguar me traktorë nga fshati Llovcë në drejtim të fshatit Pogragjë, nga shkolla e fshatit Llovcë, pjesëtarë të këtij grupi kriminal kishin filluar që të gjuanin në drejtim të popullatës civile dhe si pasojë ishte plagosur viktima N. A. në shpinë dhe po ashtu ishte plagosur edhe M. A., po ashtu në shpinë, e moshës rreth dy vjeçare, të cilën e kishte pasur në dorë viktima N. A., e si pasojë e plagëve të marra N.A. kishte ndërruar jetë.

    Gjithnjë, sipas Dosjes së Prokurorisë, pjesëtarë të këtij grupi kriminal të cilët ishin duke lëvizur me traktor me rimorkio në drejtim të Gjilanit, në dalje të fshatit Pogragjë, derisa viktima N. R. ishte duke i ruajtur bagëtinë, të njëjtit pa e ndaluar traktorin gjuajnë në drejtim të N. R. me armë automatike. I njëjti kishte mbetur i plagosur dhe si pasojë e plagëve të marra të njëjtën ditë në mbrëmje kishte ndërruar jetë.

    Sipas Aktakuzës në hyrje të fshatit Llovcë derisa po ktheheshin në shtëpi me traktor, të dëmtuarit B. M., F. H. dhe M. R., pjesëtarë të këtij grupi i kishin marrë peng të dëmtuarit në fjalë dhe ishin nisur në drejtim të shtatit Pogragjë dhe në ndërkohë e kishin liruar Fetije Hazirin dhe duke shkuar në drejtim të Gjilanit, te vendi i quajtur “Goveni” në dalje të Pogragjës, kishin ndaluar dhe i kishin zbritur nga rimorkio e traktorit Behxhetin e Menderesin.

    Në Aktakuzë thuhet se ua kishin lidhur duart mbrapa me lidhëse të duajve dhe iu kishin thënë se po ju “ekzekutojmë sepse nuk na duheni më”. Tre herë kishin gjuajtur me breshëri mbrapa shpinës së tyre, nga ku ishte dëgjuar komanda “Pucaj”, po nuk i kishin vrarë.

    Me këtë, në bashkëkryerje kanë kryer veprën penale “krime lufte kundër popullatës civile”.

    Të akuzuarit Millosh Sosiq e Nenad Stojanoviq, po ashtu, po akuzohen edhe për veprën penale: “mbajtja në pronësi, kontroll ose posedim të paautorizuar të armëve”.

    Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur e të Serbisë.

    Ish-presidenti i Jugosllavisë, Sllobodan Millosheviq ishte akuzuar për “krime lufte dhe për krime kundër njerëzimit”, të kryera nga forcat serbe e jugosllave në Kosovë”. Millosheviq ishte akuzuar për “krime lufte dhe krime kundër njerëzimit të kryera edhe në luftërat në Bosnjë e Hercegovinë, si dhe në Kroaci”.

    Gjykimi i tij në Gjykatën Ndërkombëtare Penale për ish-Jugosllavinë (ICTY), me seli në Hagë, nuk kishte marrë epilog, pasi Millosheviq kishte vdekur më 11.03.2006 në qeli, teksa po mbahej në paraburgim.

    Millan Millutinoviq, ish-kryetari i Serbisë, ishte liruar nga akuzat për “krime lufte gjatë konfliktit në Kosovë”.

    Nikolla Shainoviq, zëvendëskryeministër i Republikës Federale të Jugosllavisë, ishte dënuar me 18 vjet burg për “krime kundër njerëzimit” dhe “shkelje të ligjeve apo zakoneve të luftës”.

    Dragolub Ojdaniq, ish-shefi i Shtabit të Përgjithshëm të Ushtrisë jugosllave, ishte dënuar me 15 vjet burg për “krime kundër njerëzimit”.

    Nebojsha Pavkoviq, ish-komandanti i Armatës së Tretë të Ushtrisë jugosllave, ishte dënuar me 22 vjet burg për “krime kundër njerëzimit” dhe “shkelje të ligjeve apo zakoneve të luftës”.

    Vlladimir Llazareviq, ish-komandanti i Korpusit të Prishtinës të Ushtrisë jugosllave, ishte dënuar me 14 vjet burg për “krime kundër njerëzimit”.

    Sreten Llukiq, ish-shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për “krime kundër njerëzimit” dhe “shkelje të ligjeve apo zakoneve të luftës”.

    Aktgjykimin të plotë, në gjuhën angleze, e gjeni këtu.