Ballina

Kategori: Policia

  • Kërkohej nga Gjykata, arrestohet 29-vjeçari i dënuar me tre vjet burg për lëndim të rëndë trupor

    Policia e Kosovës ka arrestuar një 29-vjeçar në Suharekë, i cili ishte i dënuar me tre vjet burg për “lëndim të rëndë trupor”.

    29-vjeçari, A.B është arrestuar më 14.01.2025, pasi ishte kërkuar me urdhëresë gjyqësore nga Gjykata në Suharekë.

    I njëjti është dërguar në vuajtje të dënimit, në kohë prej tri vjetësh.

    “Drejtoria Rajonale e Policisë në Prizren do të vazhdojë me realizimin e urdhëresave ndaj personave, që ende nuk i janë përgjigjur thirrjes së Gjykatave.” – thuhet në njoftimin e datës 15.01.2025.

  • Tre persona të arrestuar e një në arrati për “dhunë në familje” në 24 orët e fundit

    Policia ka bërë të ditur se shtatë raste të dhunës në familje janë raportuar në 24 orët e fundit.

    Sipas Policisë, tre persona janë arrestuar dhe një është në arrati.

    Rastet e dhunës në familje – sipas Policisë – kanë ndodhur në Prishtinë, Fushë Kosovë, Klinë, Rahovec e Gjakovë.

    Në Prishtinë Policia ka bërë të ditur se ka arrestuar një person, pasi dyshohet se ka sulmuar fizikisht ish të dashurën e tij.

    “Viktima ka pranuar tretman mjekësor. Me vendim të Prokurorit i dyshuari është dërguar në mbajtje.” – ka njoftuar Policia.

    Në një rast tjetër në Prishtinë, Policia ka njoftuar se pas një mosmarrëveshjeje dyshohet se një person ka sulmuar fizikisht bashkëshorten e tij.

    “I dyshuari është shoqëruar në Stacionin policor dhe pas intervistimit, me vendim të Prokurorit, rasti procedohet në procedurë të rregullt.”- ka bërë të ditur Policia.

    Ndërkaq, në Fushë Kosovë – sipas Policisë – është raportuar se një i dyshuar i ka shkaktuar dhunë psikike një gruaje.

    I dyshuari – sipas Policisë – është shoqëruar në Stacionin policor dhe pas intervistimit, me vendim të Prokurorit, rasti procedohet në procedurë të rregullt.

    Po në Fushë Kosovë – sipas Policisë – një person dyshohet se pas një mosmarrëveshjeje ka sulmuar fizikisht një grua. Viktima – sipas Policisë – ka pranuar tretman mjekësor, ndërsa i dyshuari është në arrati.

    Në Klinë, një person dyshohet se pas një mosmarrëveshjeje ka sulmuar fizikisht një grua.

    “Viktima nuk ka pranuar tretman mjekësor, ndërsa i dyshuari është arrestuar dhe pas intervistimit, me vendim të Prokurorit, është liruar në procedurë të rregullt.” – ka njoftuar Policia.

    Kurse në Rahovec – sipas Policisë – një femër është dërguar në Emergjencë, pasi që dyshohej se pas një mosmarrëveshjeje me bashkëshortin e saj dyshohet se ka përdorur medikamente dhe detergjentë të ndryshëm.

    “Viktima është dërguar për trajtim të mëtutjeshëm mjekësor. I dyshuari është arrestuar dhe pas intervistimit, me vendim të Prokurorit, është dërguar në mbajtje.” – ka thënë Policia.

    Në Gjakovë, Policia ka arrestuar një person, pasi dyshohet se ka sulmuar fizikisht bashkëshorten e tij

    Sipas Policisë, i dyshuari pas intervistimit është dërguar në mbajtje.

     

     

  • Detaje nga Policia për rastin e 27-vjeçarit që dyshohet se ka rënë nga Ura e Fshajt

    Kërkimet për 27-vjeçarin e zhdukur që dyshohet të ketë rënë nga Ura e Fshajt më 24.12.2024 kanë përfunduar pa sukses për këtë të premte, njoftoi zëdhënësi i Policisë në Rajonin e Prizrenit, Vesel Gashi.

    Gashi tha se kërkimet do të vazhdojnë përsëri.

    ”Prej datës 25.12.2024 hetuesit rajonalë kanë vazhduar kërkimet në mënyrë intensive në kërkim të tij. Të njëjtit në mënyrë intensive dhe në bashkëpunim me qytetarët i kanë ndërmarrë të gjitha veprimet për gjetjen e personit në fjalë por ka rezultuar pa sukses. Me datë 4-5 janar, nga Ura e Fshejt deri te një pjesë e tunelit është kërkuar por ka rezultuar pa sukses, është kërkuar ndihma e FSK-së dhe sot kanë nisë me kërkim deri te Ura e Rugovës, por edhe këto nuk kanë rezultuar me sukses. Kërkimi do të vazhdojë nesër por për sot kanë përfunduar kërkimet për shkak te kushteve dhe dukshmërisë”- tha Gashi për KALLXO.com.

    Personi i zhdukur me inicialet A.H. është nga komuna e Gjakovës.

    Më 10.01.2025, FSK-ja njoftoi se ka angazhuar ekipe të Gardës Kombëtare të Forcës së Sigurisë së Kosovës në operacionin e kërkim-shpëtimit malor dhe ujor në kërkim të një 27-vjeçari.

    FSK-ja theksoi se angazhimi i ekipeve erdhi me kërkesën e Qendrës së Situatave të Qeverisë së Republikës së Kosovës dhe në koordinim me Policinë e Kosovës të rajonit të Gjakovës.

    https://kallxo.com/lajm/dyshohet-se-nje-27-vjecar-i-zhdukur-ka-rene-nga-ura-e-fshajt-fsk-angazhon-ekipe-per-kerkim/

     

  • Dosja e Prokurorisë Speciale ndaj të dyshuarit për terrorizëm që iu gjetën zolla dhe drogë

    Burim Dibrani është i arrestuari nën dyshimin për terrorizëm, në banesën e të cilit Policia gjeti armatim luftarak, tri zolla, municione dhe drogë.

    Policia i ra në gjurmë këtij të dyshuari për terrorizëm, pasi i njëjti ishte raportuar për “dhunë në familje”.

    Ndaj të njëjtit Prokuroria Speciale ka kërkuar në Gjykatën e Prishtinës masën e paraburgimit si masë të sigurisë ndaj tij.

    Dibrani u ndalua më 09.01.2025, pasi në banesën në rrugën “Sali Nivica” në Prishtinë gjatë kontrollit policor i janë gjetur tri zolla dhe lëndë narkotike.

    Sipas Prokurorisë Speciale, nga koha e pavërtetuar e deri më 08.01.2025, i pandehuri ka përgatitur veprime terroriste në atë mënyrë që paraprakisht ka siguruar tri armë të rënda – armë këto të parapara për akte terroriste.

    Sipas Dosjes së Prokurorisë Speciale ekziston dyshim i bazuar se i njëjti ka kryer veprën penale: “përgatitja e veprave terroriste ose veprave kundër rendit kushtetues dhe sigurisë së Republikës së Kosovës” – nga Neni 138 i Kodit Penal.

    I njëjti dyshohet edhe për veprën penale: “mbajtja në pronësi, kontroll ose posedim të paautorizuar të armëve”.

    Po ashtu, ndaj tij ekziston dyshim i bazuar se i njëjti ka blerë dhe shitur substanca narkotike.

    Sipas Prokurorisë, të dyshuarit më 08.01.2025 në banesën dhe objektet përcjelllëse të tij gjatë kontrollit policor i janë gjetur dhe sekuestruar 269.3 gram narkotikë, që dyshohet të jetë marihuanë.

    Me këtë sipas PSRK-së, i njëjti dyshohet se ka kryer veprën penale: blerje, posedim, shpërndarje dhe shitje e paautorizuar e narkotikëve – nga Neni 267 i Kodit Penal.

    Sipas Kërkesës së Prokurorisë Speciale në të cilën pati qasje KALLXO.com, dyshimi i bazuar për këto vepra penale vërtetohet nga provat të cilat janë gjetur në banesën e të dyshuarit, Burim Dibranit.

    Si i ra në gjurmë Policia Burim Dibranit, i dyshuar për terrorizëm?

    KALLXO.com kishte mësuar nga burimet e saj se Stacioni Policor – Qendra në Prishtinë kishte pranuar fillimisht një informatë për një rast të dhunës në familje.

    Më pas një njësi e reagimit ishte dërguar në vendin e ngjarjes në Bregun e Diellit. Ngjarja u trajtua menjëherë, ndërsa ekipi reagues i Policisë kishte kërkuar të hyjë brenda në banesë, për të vërtetuar informatën.

    Me lejen e personit të dyshuar kanë hyrë brenda dhe kanë hasur në një sasi të lëndës narkotike, të dyshuar marihuanë, e vendosur në një tavolinë.

    Më pas kanë kryer edhe një kontroll sipërfaqësore, gjatë së cilës kanë hasur në pajisje, municion dhe armë të tipit zolla. Menjëherë pasi u identifikuan këto armë, u thirr edhe Drejtoria e Anti-terrorit për të trajtuar rastin.

    Prokuroria Speciale i ka kërkuar Gjykatës Themelore të Prishtinës caktimin e masës për paraburgim ndaj të pandehurit Burim Dibrani, shtetas i Kosovës, i cili dyshohet për vepra terroriste.

    https://kallxo.com/lajm/rruga-se-si-arriti-policia-deri-te-zollat-dhe-terrorizmi-ne-bregun-e-diellit/

  • Digjet një veturë në Prishtinë

    Policia ka bërë të ditur se të enjten, më 09.01.2025, një veturë është djegur në një parking nëntokësor në Prishtinë.

    Agron Borovci, zëdhënës i Policisë për Rajonin e Prishtinës, ka thënë për KALLXO.com, se rasti ka ndodhur në rrugën “Ukshin Hoti” dhe është raportuar rreth orës 22:30.

    “Rreth orës 22:30, është raportuar se në rrugën ‘Ukshin Hoti’ në Prishtinë, në parkingun nëntokësor të një objekti një veturë është përfshirë nga zjarri. Policia menjëherë ka dalë në vendin e ngjarjes, po ashtu janë ftuar edhe zjarrfikësit të cilët kanë lokalizuar zjarrin”- ka thënë Borovci.

    Zëdhënësi Borovci ka thënë se nuk është raportuar për persona të lënduar.

    Aktualisht, sipas tij, Policia ka nisur ndërmarrjen e veprimeve hetimore për sqarimin e plotë të rastit.