Ballina

Kategori: Policia

  • Aksident trafiku në magjistralen Ferizaj-Prishtinë, lëndohen katër persona

    Një aksident trafiku ka ndodhur në magjistralen Ferizaj-Prishtinë, përkatësisht në fshatin Prelez i Muhaxherëve të Ferizajt.

    Kanun Veseli, zëdhënës i Policisë Rajonale të Ferizajt njofton se të lënduar kanë mbetur katër persona.

    Aksidenti ka ndodhur rreth orës 21:00 të 26.01.2025.

    “Në aksident janë përfshirë një autobus dhe tri vetura, të gjitha me targa vendore. Në vendngjarje menjëherë kanë dalë ekipet e policisë nga Njësia e Komunikacionit Rrugor, ndërsa hetuesit e aksidenteve kanë kryer ekzaminimin e plotë të vendit të ngjarjes” – deklaroi Veseli për KALLXO.com.

    Tutje ai thotë se të lënduarit janë dërguar në Qendrën Emergjente në Ferizaj për trajtim mjekësor.

    Automjetet e përfshira kanë pësuar dëme materiale.

    “Për të gjitha veprimet e ndërmarra nga policia, është njoftuar prokurori i shtetit” – thotë Veseli.

  • Zyrtari policor plagoset në një poligon qitjeje në rajonin e Gjilanit

    22:10 – Plagosja e policit, arrestohet instruktori i poligonit 

    Për rastin e plagosjes së një polici në rajonin e Gjilanit, është arrestuar edhe instruktori që punonte në poligon në momentin kur ndodhi incidenti.

    Këtë e ka konfirmuar Ismet Hashani zëdhënës i Policisë Rajonale të Gjilanit.

    I dyshuar për plagosjen e zyrtarit policor në një poligon në Pasjak të Novobërdës, është një i mitur.

    Të miturit dyshohet se i ka shkrepur arma aksidentalisht me ç’rast ka plagosur zyrtarin policor.

    I dyshuari është arrestuar dhe intervistuar në bazë të procedurave ligjore.

    I plagosur ka mbetur zyrtari policor E.Sh i lindur në vitin 2003.

    Njësia Rajonale po vazhdon hetimet për zbardhjen e rrethojave të rastit i cili është cilësuar “Plagosje”. Polici i plagosur vazhdon të trajtohet në QKUK.

    21:18 – Plagosja e policit në poligon, Policia jep detajet 

    Policia e Kosovës ka konfirmuar zyrtarisht rastin e plagosjes së një zyrtari policor në një poligon të qitjes në rajonin e Gjilanit.

    Ismet Hashani, zëdhënës i Policisë Rajonale të Gjilanit tka dhënë detaje se si ka ndodhur rasti.

    “Ju njoftojmë se sot mv datën 26.01.2025 rreth ores 19:12 në fshatin Pasjak – Novobërdë në poligonin e gjuajtjes ‘Target’, ka ndodhur një plagosje me armë zjarri. Në vendin e ngjarjes kanë dalë me urgjencë njësitet relevante. Nga hetimet e para mësohet se është plagosur zyrtari policor E. Sh. (2003) dhe i njëjti është transportuar për QKUK- Prishtinë” – deklaroi Hashani.

    Tutje Hashani thotë se deri tek rasti ka ardhur kur një personi që ishte në poligon me viktimën i shkrepet arma aksidentalisht.

    “I dyshimti i mitur është arrestuar me vendim të prokurorit të shtetit dhe është intervistuar në bazë të procedurave ligjore” – thotë Hashani.

    Njësia e hetimeve rajonale dhe Prokuroria po hetojnë rastin që të merren vesh të gjitha rrethanat e rastit.

    21:07 – Plagosja e zyrtarit policor – Policia e Kosovës në vendin e ngjarjes

    Plagosja e zyrtarit policor në poligonin e qitjes në dalje të Gjilanit – Policia e Kosovës në vendin e ngjarjes:

    20:54 – I mituri dyshohet për plagosjen e policit në një poligon qitjeje në Gjilan 

    KALLXO.com mëson se polici që ka mbetur i plagosur në një poligon qitjeje në Gjilan ka marrë plagë në zonën e nofullës.

    Policisë në vendin e ngjarjes i është bashkuar edhe Inspektorati Policor i Kosovës.

    Në bazë të burimeve të KALLXO.com, i dyshuar për plagosjen e policit është një person i mitur.

    Prokuroria pritet që të ndjekë penalisht edhe instruktorin e poligonit, për shkak se dyshohet që nuk ka qëndruar afër personit që po gjuante me armë zjarri.

    Pritet që Prokuroria të ndalojë të miturin e dyshuar dhe instruktorin e poligonit.

     

    20:44 – Plagosja e policit në Gjilan, flasin nga Emergjenca e QKUK-së

    Dejtori i Emergjencës në QKUK, Naser Syla ka konfirmuar për KALLXO.com se gjendja e policit që dyshohet se ka marrë plagë nga arma në Gjilan, është stabile.

    “Në gjendje stabile e kemi pranuar, është plagë me armë zjarri. Tani jemi dukë i bërë ekzaminimet e duhura” – ka deklaruar shkurtimisht Syla.

    20:41 – Dyshohet se i përfshirë në incidentin në Gjilan është edhe një i mitur 

    Në rastin e plagosjes që ka ndodhur në Pasjak të Gjilanit, dyshohet se i përfshirë është edhe një person i mitur.

    I mituri dyshohet se ka qenë i shoqëruar nga një person i moshës madhore.

    Në bazë të informatave të para që ka ekipi i KALLXO.com në vendin e ngjarjes, i mituri ka dashur të gjuajë, arma i është bllokuar dhe se kur instruktori i është afruar që t’i ndihmojë, i mituri ka ngrehur armën dhe dyshohet se ka qëlluar zyrtarin policor.

    20:37 – Plagosja e një zyrtari policor në Gjilan – Pamje nga vendi i ngjarjes

     

    20:21 – Dyshohet se një zyrtar policor ka marrë plagë nga arma e zjarrit në Gjilan 

    Një zyrtar policor dyshohet se ka marrë plagë nga arma e zjarrit në një poligon privat në dalje të Gjilanit.
    Zyrtari policor është dërguar për trajtim mjekësor në Prishtinë.

    I përfshirë në rast dyshohet të jetë edhe një qytetar.

    Arsyet që sollën plagosjen në Gjilan nuk dihen akoma.

    Ekipet e Policisë janë në vendin e ngjarjes derisa është lajmëruar edhe ekipi i Inspektoratit Policor të Kosovës dhe Prokuroria.
    KALLXO.com merr vesh se polici i cili ka mbetur i plagosur është graduar në gjeneratën e fundit të Policisë të cilët u diplomuan më 24.01.2025.

    20:18 – Vendi ku ka ndodhur incidenti me armë zjarri në Gjilan

     

    Një incident me armë zjarri ka ndodhur në një poligon në Gjilan.

    KALLXO.com merr vesh se janë njoftuar ekipet e Hetuesisë të cilët kanë dalur në vendin e ngjarjes.

    Ende nuk ka konfirmim për ndonjë të lënduar.

    Rasti dyshohet që ka ndodhur pak minuta para orës 20:00 të datës 26.01.2025.

    Ekipi i KALLXO.com është në vendin e ngjarjes.

    Lajm në zhvillim…

  • Dyshohet se vodhi para në xhami, Policia kërkon ndihmë për identifikimin e të dyshuarit

    Polica po kërkohen ndihmë nga qytetarët dhe mediat për identifikimin e një personi, i cili dyshohet për vjedhjen e një shumë të parave në një xhami në Rahovec.

    Policia ka publikuar fotografinë e të dyshuarit për identifikimin e tij me qëllim të zbatimit sa më efektiv të procedurës penale dhe atë në drejtim të veprës penale – vjedhje e rëndë.

    Sipas Policisë, rasti ka ndodhur në një xhami në qytetin e Rahovecit më 07.12.2024, kur i dyshuari ka hyrë në objektin fetar dhe duke përdorur mjete të forta dyshohet se ka vjedhur paratë që ishin në arkën e objektit fetar, para të cilat, siç thuhet në njoftimin e Policisë, besimtarët i kishin lënë në baza vullnetare.

    “Hetimet intensive të zhvilluara deri më tani nga Sektori i Hetimeve në Stacionin Policor në Rahovec, në bashkëpunim me njësitë tjera policore, nuk kanë rezultuar ende në gjetjen dhe arrestimin e të dyshuarit, përkundër përpjekjeve të vazhdueshme hetimore dhe operative”.

    Policia fton qytetarët se nëse kanë ndonjë informacion mbi identitetin apo vendndodhjen e të dyshuarit të njoftojnë menjëherë Policinë, stacionin më të afërt policor, apo në numrat; 192 (pa pagesë) ose 0390 310 482.

    Policia thotë se çdo informacion i ofruar që do të ndihmojë në zbardhjen e këtij rasti do të trajtohet në mënyrë konfidenciale.

  • Obiliq, Policia sekuestron dy armë zjarri, u ekspozuan nga i dyshuari në rrjete sociale

    Policia ka njoftuar se gjatë kontrollit në një shtëpi në Breznicë të Obiliqit ka sekuestruar dy armë zjarri dhe municion.

    Sipas Policisë, armët e sekuestruara ishin ekspozuar më parë në rrjetet sociale.

    “Njësitet e Stacionit Policor të Obiliqit, me autorizim të Prokurorit të Shtetit, në fshatin Breznicë të Obiliqit, kanë ushtruar kontroll në një shtëpi, (pronë e të dyshuarit që kishte ekspozuar armët në rrjete sociale), ku kanë gjetur  dhe sekuestruar: dy armë zjarri dhe municion”- thuhet në njoftimin e Policisë.

    Policia thotë se ndaj personit të dyshuar është hapur rast për veprën penale – armëmbajtje pa leje.

     

     

  • Katër herë u anulua, tash tenderi për Stacionin Policor në Zubin Potok përfundoi në OSHP

    Që nga fundi i vitit 2023, Policia e Rajonit të Zubin Potokut funksionon në kontejner. Para kësaj periudhe si Stacion Policor ishte përdorur një shtëpi private, e cila nuk i ofronte as kushtet minimale.

    Zëvendësdrejtori i Policisë për Rajonin e Veriut, Veton Elshani, për KALLXO.com, thotë se kushtet në të cilat operojnë policët në Zubin Potok janë të vështira.

    “Në fakt Policia atje ka qenë duke punuar në një shtëpi private dhe më kujtohet një herë në vitin 2022 kur kam qenë për t’i vizituar në atë shtëpi, kushtet kanë qenë shumë të rënda. Pastaj, Kontrata me pronarin e shtëpisë përfundoi dhe me vendim të Komunës së mëhershme është ndarë ajo toka aty. Ne u vendosem në atë pjesë, ku edhe planifikohet ndërtimi. Veç me tregu që jemi në kontejner, kjo tregon mjaft, sepse nuk je në ndërtesë. Pra, nuk ke zyrë, nuk ke Qendër të ndalimit; viktimën ose dëshmitarin nuk ke ku e merr në pyetje e shumë gjëra të tjera.” – tha Veton Elshani, për KALLXO.com.

    Por, policët e këtij Rajoni verior, punën dhe angazhimin e tyre zyrtar do ta vazhdojnë në kontejner edhe për një kohë. Tenderi me vlerë të parashikuar prej 1.164.000.00, i hapur me 01.11.2024, për ndërtimin e Stacionit Policor dhe objektit në këtë qytet u pezullua – pas Ankesës së “AZ Building Development L.L.C.”, dorëzuar në Organin Shqyrtues të Prokurimit, më 10.01.2025.

    Fillimisht për dallim nga katër tenderët paraprakë ku u përdor procedura e mbyllur, pa publikim të njoftimit për Kontratë, tenderi me procedurë të hapur, për herë të pestë, u iniciua më 31.10.2024. Në këtë aktivitet të prokurimit aplikuan katër Operatorë Ekonomik.

    Më 31.12.2024, Autoriteti Kontraktues, në këtë rast Policia e Kosovës, në tenderin dypjesësh, ku parashihet ndërtimin i Stacionit Policor në pjesën e parë dhe në pjesën e dytë, ndërtimi i objektit të Agjencisë së Regjistrit Civil kishte shpallur fitues dy Kompani. Për pjesën e parë fitues ishte Operatori Ekonomik “NBT – ING” dhe për pjesën e dytë u shpallën fitues grupi i Operatorëve Ekonomik “Pro & Co Group SH.P.K., 2A Group SH.P.K.”.

    Kompania “AZ Building Development L.L.C.” ishte e pakënaqur me Vendimin e Policisë, meqë pretendon se Autoriteti Kontraktues ka shkelur 9 Nene të Ligjit të Prokurimit Publik. Fillimisht, kishte kërkuar rishqyrtim të Vendimit, më 06.01.2025.

    Më 09.01.2025, Kërkesa për Rishqyrtim të Vendimit u refuzua nga Autoriteti Kontraktues, kësisoj Vendimi i datës 31.12.2024 mbeti në fuqi.

    Të pakënaqur me refuzimin për Rishqyrtim të Vendimit, “AZ Building Development L.L.C.” iu drejtuan OSHP-së. Të kontaktuar nga KALLXO.com, përfaqësues të Kompanisë nuk pranuan të flasin, pasi që lënda është në shqyrtim – duke shtuar se pretendimet e tyre figurojnë në Ankesën drejtuar OSHP-së.

    Kompania në fjalë pretendon se u eliminuan padrejtësisht, sepse oferta e tyre ishte me çmimin më të lirë të përgjegjshëm.

    Sipas Ankesës së deponuar, “AZ Building Development L.L.C.” ka ofertuar për pjesën e parë me çmim prej 684,245.63 euro, ndërsa Operatori Ekonomik i rekomanduar për Kontratë ka ofertuar me çmim prej 684,660.99 euro.

    Ndërkaq, për pjesën e dytë “AZ Building Development L.L.C.”, sipas Ankesës, kishte ofertuar me çmim prej 305,457.30 euro, kurse Operatori Ekonomik i rekomanduar ofertoi me çmim prej 397,422.00 euro.

    Lënda është duke u shqyrtuar në Organin Shqyrtues të Prokurimit, teksa akoma nuk ka përgjigje të ekspertit shqyrtues.

    Teksa, tenderi i hapur së fundmi është në “dorë” të Organit Shqyrtues të Prokurimit dhe deri në marrjen e vendimit duhen të paktën 30 ditë nga parashtrimi i Ankesës, tenderi për ndërtimin e Stacionit të Policisë në Zubin Potok u anulua katër herë.

    Në Vendimin e datës 29.02.2024 ishte thënë se tre Operatorët Ekonomik “Pro&Co Group SH.P.K”, “U-UNIQUE SH.P.K”, “NNP EUROING SH.P.K” dhe grupi i OE-ve “BENI – COM SH.P.K. & Olti Trasing SH.P.K” në ofertat e tyre kishin kaluar vlerën e caktuar prej 997 mijë e 47 euro.

    Edhe, në tenderin e dytë kishin aplikuar tre Operatorë Ekonomik. Më 21.03.2024, Policia mori Vendim për anulim – duke thënë se që të tre OE-të: “HIDRO PROJECT SH.P.K.”; grupi i OE-ve: “Adnan Bislimi B.I. & N.N.SH. WORLD MEDIUM” dhe grupi i OE-ve: “BENI – COM SH.P.K. & Olti Trasing SH.P.K.”, në ofertat e tyre kishin kaluar prapë vlerën e caktuar, që përsëri ishte 997 mijë e 47 euro.

    Andaj, Policia u detyra që vlerën në tenderin e tretë ta rrisë për afër 70 mijë euro – duke tejkaluar njëmilionëshin. Vlera e përcaktuar nga autoriteti kontraktues, pra Policia ishte gjithsej 1 milion e 66 mijë e 765 euro.

    Megjithatë, kjo rritje në çmim prapë nuk qe e mjaftueshme që një nga dy Operatorët Ekonomik të dalin fitues, për të filluar ndërtimin e Stacionit Policor në Zubin Potok.

    Dy Operatorët “Pro & Co Group SH.P.K.” dhe grupi i OE-ve: “NIKA PrO – Ing SH.P.K. & LENTI LBC”, në ofertat e tyre tejkaluan përsëri vlerën e parashikuar. Vendimi për Anulimin e tenderit të tretë u mor nga Policia më 07.06.2024.

    Ndërkaq, për herën e katërt, tenderi u anulua më 11.10.2024

    Para fundit të 2023-tës, zyrtarët policorë funksiononin në një shtëpi të vjetër, që shfrytëzohej si Stacion Policor, por që objekti ishte vlerësuar se nuk i plotësonte kushtet e punës.

    Kah fundi i nëntorit autoritetet kosovare nisën punimet për ndërtimin e Nënstacioneve në Leshak të Leposaviqit, në Izvor të Zveçanit dhe tek Ura e Bistricës në Leposaviq.

    Policia e Kosovës ka thënë vazhdimisht se Stacionet apo Nënstacionet Policore janë planifikuar të plotësojnë nevojat e zyrtarëve policorë dhe se shërbejnë për të ofruar siguri publike e ruajtje të rendit kushtetues.

    Ndërtimi i Stacioneve dhe Nënstacioneve kundërshtohet nga Serbia dhe nga serbët lokalë.