Ballina

Kategori: Ligji

  • Trajtimi në proces disiplinor i sjelljes së gjyqtarit pas raportimit në media

    Situatat ku qytetarët i raportojnë sjelljet e gjyqtarëve në media sipas ligjit trajtohen në proceset disiplinore të Këshillit Gjyqësor të Kosovës (KGJK).

    Në arkivat e publikuara të KGJK-së, ku tregohen rastet disiplinore ndaj gjykatësve, haset një rast ku një gjykatës është ndëshkuar për shkak të sjelljes jo të mirë ndaj një qytetari.

    Qytetari kishte raportuar për sjellje të pahijshme të gjykatësit ndërsa pas publikimit të shkrimit KGJK kishte trajtuar rastin në disiplinë.

    Gjykatësi Veli Kryeziu nga Gjilani ishte pjesë e një procesi të tillë pasi gjatë një përgjigjeje për media kishte shkelur Kodin e Etikës.

    Këshilli Gjyqësor i Kosovës më 08.09.2022 kishte formuar panelin hetimor që do të shqyrtonte lëndën e Kryeziut nëse do kishte ose jo shkelje disiplinore.

    Më 25 nëntor 2022, paneli hetimor i kishte paraqitur Këshillit Gjyqësor të Kosovës raportin mbi hetimin për këtë lëndë disiplinore dhe marrëveshjen për pranimin e fajësisë lidhur me këtë rast.

    Pra, gjyqtari Veli Kryeziu në Këshillin Gjyqësor të Kosovës e kishte pranuar fajësinë për fjalët që i kishte thënë gjatë bisedës me gazetaren e KALLXO.com.

    “Sipas vlerësimit të panelit hetimor faktet kanë qenë jokontestuese për arsye se kanë qenë publike, subjekti i hetimit në bisedë telefonike me gazetaren e Kallxo.com kishte deklaruar se: “Me pasë kërcënu me arme e kisha vra” dhe nuk i ka kontestuar edhe subjekti i hetimit”-  thuhet në vendimin e KGJK-së më 14.12.2024.

    Gjyqtari kishte pranuar fajësinë dhe ishte pajtuar që t’i shqiptohet vërejtje me shkrim si sanksion disiplinor.

    “Gjyqtari i Gjykatës Themelore në Gjilan Veli Kryeziu është përgjegjës për shkelje disiplinore të përcaktuara në nenin S, paragrafi 1 dhe 2, pika 2.S, 2.1S, të Ligjit Nr.06/L-OS7 për Përgjegjësinë Disiplinore të Gjyqtarëve dhe Prokurorëve dhe të njëjtit i shqiptohet sanksioni disiplinor vërejtje publike me shkrim”- thuhet në vendimin e Këshillit Gjyqësor të Kosovës.

    Videon lidhur me këtë rast mund ta ndiqni në këtë LINK.

    Në korrik të vitit të 2022 KALLXO.com kishte raportuar se gjyqtari i Gjykatës Themelore të Gjilanit, Veli Kryeziu, dyshohej se kishte kërcënuar me armë një person.

    Ngjarja kishte ndodhur më 28 maj ndërsa ishte mbajtur vetëm brenda organeve të rendit dhe të drejtësisë.

    Kryeziu në një bisedë telefonike me KALLXO.com nuk kishte pranuar të ketë kërcënuar dikë, anipse ndaj tij tashmë kishte nisur procedurë ligjore në prokurori.

    “Nuk kam ide. Me pasë kërcënu me armë unë e kisha vra (nuk kuptohet mirë gjatë bisedës), nuk bëj budallakia. Nuk jap koment, ditën e mirë!”- kishte thënë shkurt gjyqtari Kryeziu.

    Me këto veprime, sipas KGJK-së, gjyqtari Kryeziu kishte shkelur nenin 5 të Ligjit për Përgjegjësinë Disiplinore të Gjyqtarëve dhe Prokurorëve.

    Në vendim thuhet se Kryeziu ka shkelur paragrafin 2.5 i cili thotë “ka keqpërdor pozitën zyrtare në çfarëdo forme për përfitime të paligjshme për veten”, paragrafin 2.15 i cili thotë “përfshihet në sjellje, qoftë kur është në detyrë apo privatisht, të cilat dëmtojnë reputacionin e gjykatës ose mund të dëmtojnë besimin e publikut në paanshmërinë ose besueshmërinë e gjyqësorit”.

  • “Pse po bohesh mangup?”,”Çu dajë se të vrajtën” – Andi Pajaziti jep versionin e tij si kishte ndodhur vrasja në “Bon Vivant” në vitin 2023

    I akuzuari për rastin e vrasjes në lokalin “Bon Vivant” Andi Pajaziti ka dhënë mbrojtjen, lidhur me akuzat që Prokuroria i vë në barrë.

    Pajaziti akuzohet se ka kryer vrasje në gjendje të tronditjes së fortë mendore, ku ka mbetur i vrarë një person më 04.08.2023.

    Andi Pajaziti tha se atë ditë ishte zgjuar në gjendje të rëndë emocionale dhe nuk kishte dalë nga shtëpia deri në ora 21:00 të mbrëmjes, kur kishte dalë për të ngrënë bukë dhe kishte shkuar në lagjen Vranjevc, për të shikuar disa vetura për t’i blerë.

    Me t’u kthyer nga kjo lagje, të njëjtit ishin ndalur për të pirë në lokalin “Bon Vivant”, pasi që kishte kolonë të madhe rrugës ka “Qafa”.

    I njëjti tha se ai së bashku me tre persona të tjerë kishin hyrë në lokal, ku një kamarier iu kishte thënë “Pritni në këmbë deri të bëhet një vend për t’u ulur.”

    Tutje, Pajaziti tha se Dukagjin Lekaj e kishte ftuar për t’u ulur në tavolinë për të pirë, por që sipas Pajazitit rruga deri te tavolina ishte shoqëruar me një sjellje të cilën e kishte kuptuar pasi kishte ndodhur rasti.

    Sipas Pajazitit, Dukagjin Lekaj e kishte prekur në pjesët e poshtme të shpinës për të shikuar nëse kishte armë me vete, por ky tha se armën e kishte në pjesën e përparme të trupit.

    “Na ka thënë ‘A doni me prit pak në këmbë, deri t’ua gjej një tavolinë, se ka shumë kallabllak?’. Duke pritë në këmbë për një çast, më afrohet Dukagjin Lekaj dhe përshëndetemi dhe më thotë ‘Hajde, te tavolina jem, pije një pije se kam me të vet diçka’. Unë pranova, pasi që të njëjtin e njoh diku rreth 10 vjet dhe nuk kam pasë diçka të keqe asnjëherë me të. Dhe, shkoj se mendova që është duke më thirrë për një veturë, që më pati ofruar me ma shit dy ditë përpara. Dhe, pasi që shkojmë në tavolinë, te tavolina e tij, rrugës Dukagjini më prekte nëpër kuka. Por, në atë moment mua nuk më bëri përshtypje pse po më prek. Por, pasi që ka ndodhur ngjarja, duke e analizuar rashë në përfundim se ai më ka prek me këqyr a e kam armën, apo jo me vete. Unë armën e kisha përpara e ai s’ka mujtë me vërejt a e kisha armën, apo jo?” – deklaroi Pajaziti në Gjykatë, më 24.01.2025.

    Tutje, i njëjti ka treguar se e tërë ngjarja kishte filluar me bisedë miqësore, por më pas kishte ardhur një fjali “Pse po bahesh mangup?”.

    “Pasi që ulemi në tavolinë me Dukagjinin, në anën e majtë dhe një tjetër afër tij ul dhe një person tjetër përballë në anën e djathtë, afrohet Dukagjini tek unë dhe fillojmë të bisedojmë. Së pari, pyetemi për familjen e njëri-tjetrit dhe si po ecin punët në përgjithësi. Në atë moment afrohet sigurimi Hisni Geci dhe më pyet se ‘A është gjithçka në rregull?’. Unë i thashë: ‘Gjithçka në rregull’, tu mendu që po më vet se a u rahatut në tavolinë. Dhe, kthehet me shikim nga Dukagjini dhe u çudita me heshtjen e tij dhe shikimin e tij ndaj meje.” – tha tutje Pajaziti.

    Në Gjykatore Pajaziti tha se personi me emrin Hisni Geci e kishte mbajtur armën e personit me dorë me qëllim për të mos shtënë, por që më pas Pajaziti tha se ka ndjerë një goditje të fortë në kokë dhe ka menduar që kjo goditje është nga arma.

    “Çu dajë se të vrajtën.” – ishin fjalët që Pajaziti tha se i ka dëgjuar nga dikush, pasi kishte ndjerë goditjet e forta në kokë.

    Pajaziti tha se pas kësaj nuk kishte mbajtur mend asgjë, përpos disa sirenave të Policisë.

    “Në atë moment më afrohet Dukagjini te veshi, e më thotë: ‘Pse po bohesh mangup?’. Unë u shtanga dhe u frikësova, pasi që nuk e pritja një fjalë të tillë prej tij. E dëgjova shumë mirë se çka më tha. Por, u bona kishe s’po e ni dhe i thashë ‘Çka po thu, se nuk po të nij.’ – mendova se nuk do ta përsërisë atë fjalë. Ai më tha ‘Ti më nite shumë mirë, po pse po bahesh mangup, a e din që unë ta bëjë kështu-kështu?’ dhe e nxjerri armën që e kishte pasë në mes të këmbëve. Dhe, unë i thashë: ‘Mos u ngut’ dhe në atë moment hyn sigurimi Hisni Geci, i cili dorën e djathtë ia qet Dukagjinit në dorën ku e mbante armën, me parandalu që me gjuajtë në drejtim temin. Dhe, dorën e majtë e qet prapa shpinës tem, në atë moment mendova që mënyra ma e mirë e mundshme është që të largohem nga aty. Jam ndjerë shumë i frikësuar kur ia pashë armën, por largimi im nga aty u pamundësua nga dora e Hysit që e kisha mbrapa shpinës dhe ishte punë momenti. Në ato momente, e kam dëgju një dhimbje të fortë në kokë, e cila më ka trondit dhe kam mendu që kjo goditje më ka ardhë nga arma e zjarrit dhe pas kësaj goditje më ka hup çdo ndjenjë rreth këtij rasti. Dhe, nuk mbaj mend shumë gjëra përveçse disa sekuenca të shkurta, ku në njërën prej tyre më kujtohet Gëzimi tu më thanë ‘Çu dajë se të vrajtën’. Dhe, më kujtohet disa alarma të Policisë. Dhe, mbaj mend vetëm disa tesha të bardha. Asgjë më shumë.” – rrëfeu Pajaziti.

    Si ishte kryer vrasja sipas Prokurorisë?

    Sipas Dosjes së Prokurorisë, rasti kishte ndodhur më 04.08.2023 rreth orës 23:15, ku paraprakisht ishin të ulur i pandehuri, i cili gjendet në arrati, Dukagjin Likaj, bashkë më tani të ndjerin K.R.

    Dosja përshkruan se Likaj ishte ai që e kishte ftuar të akuzuarin Andi Pajaziti të ulet te tavolina e tyre.

    Pas tensionimit të situatës – sipas Prokurorisë – ishte sigurimi Hisni Gecaj ai që ishte munduar ta qetësojë situatën, por nuk kishte arritur.

    Dosja e Prokurorisë përshkruan se tashmë i ndjeri K.R. e kishte sulmuar me shishe dy herë në kokë të akuzuarin Pajaziti.

    Pas këtij sulmi, i akuzuari e kishte nxjerrë armën nga brezi nga ana e djathtë, për shkak të tronditjes së fortë mendore, siç përshkruhet në Aktakuzë “pa fajin e tij, pa menduar për pasojat”, shtie me armë zjarri, me ç’rast e godet tashmë të ndjerin K.R.

    Sipas Dosjes së Prokurorisë, armën e kishte nxjerrë edhe Dukagjin Likaj. Gjatë kësaj kohe ia kishte mbajtur dorën sigurimi Hisni Gecaj, kurse arma ishte e drejtuar në drejtim të të akuzuarit Pajaziti.

    Dosja thotë se Dukagjin Likaj ka shtënë me armë në drejtim të të pandehurit Pajaziti, me ç’rast e “ka lënduar në bërrylin e dorës së majtë” dhe si të tilla bëjnë pjesë në lëndime të rënda trupore, me pasoja të përhershme shëndetësore.

    Vdekja e K.R. – sipas Prokurorisë – ka ardhur si pasojë e gjakderdhjes së brendshme dhe të jashtme, e cila ka çuar në shok hemorragjik, si pasojë e predhës së armës së zjarrit.

    Arma e cila është përdorur – sipas Prokurorisë – është tip “Smith” e kalibrit 9mm.

    Për këtë, i akuzuari përveç kryerjes së vrasjes, akuzohet edhe për “armëmbajtje pa leje”.

    Pajaziti është duke qëndruar nën masën e paraburgimit. Pajazitit i ishte shqiptuar masa e paraburgimit më 07.08.2023, së bashku me të dyshuarit, Hisni Gecaj dhe Gëzim Zakuti.

    Por Gecaj dhe Zakuti ishin liruar nga kjo masë, pas kërkesës së Prokurorisë.

    Sipas Prokurorisë në këtë rast në rrezik ishin jetët e personave të tjerë, të cilët kishin pësuar lëndime trupore nga predhat e armëve të zjarrit.

    Të plagosur të tjerë kishin mbetur edhe Andi Pajaziti e Hisni Gecaj, ndërsa plagëve të armës së zjarrit nuk kishte arritur t’u mbijetonte K.R., i cili kishte vdekur në QKUK.

    13 persona sipas Prokurorisë ishin lënduar nga gotat e thyera të qelqit, gjatë përpjekjes për t’u larguar nga vendi i ngjarjes.

    Të gjitha raportimet e tjera lidhur më këtë rast, mund t’i lexoni në këtë LINK.

  • Fondi sekret i ushtrisë së Kosovës

    Në vitin e fundit të mandatit katërvjeçar, “Qeveria Kurti 2” i ndau 202.8 milionë euro për Forcën e Sigurisë së Kosovës. Këto mjete u planifikuan për t’u shpenzuar për vitin 2025, më qëllim që ushtria t’i kryejë detyrat me efikasitet të plotë. Kryeministri, Albin Kurti, jo rrallë u krenua se buxheti për ushtrinë ishte rritur nga viti në vit, prej se ai kishte marr drejtimin e Qeverisë.

    “Buxheti i përgjithshëm për Ministrinë tonë të Mbrojtjes dhe Forcën e Sigurisë vitin tjetër [2025] do të jetë që në fillim në nivel të 2% të Bruto Produktit Vendor, sipas standardit të NATO-s. Me shtesat përgjatë vitit do ta tejkalojë vlerën prej 208 milionë euro”, pati deklaruar ai, më 31 tetor 2024, kur qe miratuar buxheti 3.6 miliardë eurosh nga ana e kabinetit të ministrave. Derisa këto të dhëna për mbrojtjen dhe sigurinë nuk u klasifikuan si konfidenciale, krejt në fshehtësi po ruhen shifrat e parave të mbledhura në Fondin e Sigurisë, i cili u themelua më 1 mars 2022.

    Në vendimin e themelimit të këtij Fondi thuhet se mjetet do të buxhetohen tek Ministria e Mbrojtjes si buxhet shtesë dhe do të përdoren për mbështetjen e prioriteteve të Qeverisë, duke përfshirë fushën e mbrojtjes dhe sigurisë shtetërore, infrastrukturën e sigurisë, menaxhimin e katastrofave natyrore apo ngjashëm.

    E pyetur nga KALLXO.com, për shumën e mbledhur, donatorët më të mëdhenj dhe nëse paratë e dhuruara vullnetarisht nga qytetarët janë shfrytëzuar deri më tani, kjo ministri ka refuzuar të përgjigjet. “Sa i përket pyetjeve për Fondin e Sigurisë duhet t’i drejtoheni Ministrisë së Financave të cilët janë përgjegjës si për fondin ashtu dhe për ndarjen buxhetore” – ka qenë  përgjigja e Liridona Gashit, zëdhënëse në Ministrinë e Mbrojtjes. Edhe më të mbyllur janë treguar në Ministrinë e Financave. Nga kjo ministri nuk kanë kthyer kurrfarë përgjigje në pyetjet e dërguara nga KALLXO.com, që nga data 20.01.2025.

    Mes “transparencës” dhe “konfidencialitetit”

    Ramadan Ilazi, udhëheqës i Hulumtimeve në Qendrën Kosovare për Studime të Sigurisë thotë Fondi është mbuluar nga një fshehtësi e panevojshme. “Neni 120 i Kushtetutës përcakton qartë se fondet publike duhet të mblidhen dhe të shpenzohen në mënyrë transparente e të përgjegjshme, mirëpo Fondi i Sigurisë mbetet një mister për publikun. Të paktën, qeveria duhet të publikojë informacione bazë: kategoritë e përgjithshme të shpenzimeve, shifrat totale të buxhetit dhe raporte periodike—nëse jo për publikun e gjerë, atëherë të paktën për Komisionin Parlamentar përgjegjës për Mbrojtjen” – thotë Ilazi. Në Nenin 120 të Kushtetutës së Kosovës shprehimisht thuhet: “Shpenzimet publike dhe mbledhja e të hyrave publike duhet të bazohen në parimet e llogaridhënies, efektshmërisë, efikasitetit dhe transparencës”.

    Skender Perteshi, Drejtor Ekzekutiv i Institutit ‘Prevent’ thotë se informacionet për Fondin e Sigurisë janë të klasifikuara për shkak të asaj se nëse informacionet e shumës së Fondit apo se për çfarë janë shpenzuar mjetet, mund të cenojnë sigurinë kombëtare. “Në atë buxhet mund të kenë qasje vetëm individët të cilët argumentojnë arsyen pse kërkojnë këtë qasje në ato informata, të cilët janë të pajisur me certifikatë të sigurisë prej nivelit të konfidencialitetit deri tek niveli ‘Top Secret’, nivele që janë të bazuar tek ligji për klasifikimin e informacionit” – thotë Perteshi.

    Megjithatë, ditën ku është miratuar buxheti për vitin 2025, për ministrin e Mbrojtjes, Ejup Maqedonci, nuk ka qenë problem të flasë për paratë që janë ndarë për ushtrinë dhe për qëllimin e shfrytëzimit të tyre. “Rritja e dukshme e buxhetit dhe investimi në resurse humane, përgatitje të personelit ushtarakë dhe ngritje të kapaciteteve operacionale përmes investimit në armatime, është tregues i qartë që ky sektor ka vëmendjen e duhur dhe do të fuqizohet në vazhdimësi, jo vetëm për të mbrojtur shtetin por dhe për të kontribuar në çdo operacion ndërkombëtar me qëllim të ruajtjes së stabilitetit dhe paqes”, pati deklaruar Maqedonci.

    Nga komentimet nuk ishte rezervuar as Lëvizja Vetëvendosje. Rritjen e buxhetin për ushtrinë, kjo parti e ka shfrytëzuar edhe për t’i goditur partitë që kanë qeverisur më herët. “Një krahasim i thjeshtë midis ndarjeve buxhetore të vitit 2021 dhe atyre të vitit 2025 tregon qartazi ndryshimin e madh në qasjen ndaj ushtrisë. Më parë, gjatë qeverisjes së Klubit të Stërvjetëruar Politik, ushtria nuk merrte vëmendjen e duhur, siç dëshmojnë rekrutimet e pakta, pajisjet ushtarake të vjetëruara dhe buxheti i ulët”, shkruan në një postim që LVV e kishte publikuar në rrjete sociale më 1 nëntor 2024. Sipas partisë në pushtet, “sot, kjo gjendje ka ndryshuar drastikisht” pasi “janë bërë investime të mëdha në rritjen e numrit të ushtarëve, modernizimin e pajisjeve ushtarake dhe blerjen e sistemeve më të reja të armatimit”. Por, sa i përket Fondit të Sigurisë nuk është thënë gjë!

    Kur, si dhe pse krijohen fondet?

    Ramadan Ilazi ka bindjen se kjo iniciativë e cila u promovua shumë në fillim, duket se është zbehur. Kjo, sipas tij, lë përshtypjen se nuk ka pasur strategji të qartë prapa iniciativës. “Zakonisht kur krijohen fonde të tilla, ato krijohen në një situatë emergjente, kur burimet e qeverisë mund të jenë të pakta, ose nevojiten më shumë burime, siç janë fondet, për të trajtuar një kërcënim në zhvillim”, thotë ai për Kallxo.com.

    “Megjithatë, është e rëndësishme të dihet më dhe të kemi një politikë strategjike të qartë se çfarë është kjo më shumë, për të cilën ne kemi nevojë që publiku dhe palet e tjera të japin kontribute shtesë, përmes një buxheti të dedikuar, dhe për mua kjo nuk ka qenë e qartë deri më tani. Kjo sidomos kur kihet parasysh se qeveria ka pasur suficit buxhetor secilin vit” – shprehet Ilazi.

    Perteshi në anën tjetër thotë se Qeveria ka të drejtë që informacionet për këtë Fond t’i konsideroj si të klasifikuara. “Kjo nuk do të thotë që Qeveria apo institucionet mund t’i keqpërdorin këto fonde apo të ketë dyshime për mënyrën e shfrytëzimit të tyre, sepse edhe Ligji për Klasifikimin e Informacionit dhe Verifikimin e Sigurisë edhe legjislacioni në përgjithësi, ka rregulluar mënyrën se si mekanizmat e kontrollit civil dhe demokratik të sigurisë mund t’i kontrollojnë, monitorojnë dhe menaxhojnë fondet të cilat konsiderohen si të klasifikuara” – thotë Perteshi për KALLXO.com.

    Ai shton se janë Komisionet Parlamentare për Mbikëqyrjen e AKI-së, ai për Mbikëqyrjen e Ministrisë së Mbrojtjes dhe FSK-së, Inspektori i Përgjithshëm i AKI-së, Njësitë e Auditimit të Brendshëm dhe Agjencia për Klasifikim të Informacionit dhe Verifikim të Sigurisë si dhe mekanizma tjerë institucional, të cilët e kanë të rregulluar mënyrën se si menaxhohen dhe mbikëqyren këto fonde.

    Ilazi thotë se gjatë këtyre katër vjetëve ka qenë pozitive rritja e buxhetit për mbrojtje, ndonëse sipas tij kjo nuk është e mjaftueshme. “Siguria nuk përkufizohet vetëm nga investimet në armatim dhe pajisje. Për këtë arsye, trajnimet, ndërveprimi me NATO-n dhe një qasje e planifikuar e qëndrueshme duhet të jenë përparësi, në vend të një gare njëdimensionale armatimi” – thotë ai.

    Për blerjen e armatimit dhe pajisjeve për institucionet e Sigurisë, Perteshi thotë se ka arsyetim ligjor edhe në Ligjin e Prokurimit Publik, për shkak të interesit kombëtar.

    “Gjatë procedurave për blerjen e pajisjeve të ndryshme, mund të barten informacione sekrete dhe ligji i ka të rregulluara mënyrën se si institucionet mund të negociojnë kontrata apo mund të lidhin kontrata të klasifikuara me operatorë të ndryshëm ekonomikë, qoftë lokal apo ndërkombëtar. Brenda atyre Komisioneve është e rregulluar mënyra se si këto blerje të cilat i shmangen procedurave të rregullta të prokurimit publik mund të shkojnë duke u mbikëqyrur dhe duke garantuar integritet në këtë proces në përgjithësi” – shton Perteshi.

    E Ilazi thotë se Qeveria duhet të ketë qasje më transparente dhe të sigurojë që veprimtaria e Fondit përputhet me objektivat më të gjera të mbrojtjes dhe sigurisë. “Ta bëjë këtë në një mënyrë që respekton njëkohësisht Kushtetutën dhe besimin e publikut, por edhe reflekton edhe strategjinë më të gjerë të sigurisë së vendit në përputhje me qasjen e NATO-s, që është mbrojtja e zgjuar” – përfundon Ilazi.

    Më 01.03.2022 kur u themelua Fondi i Sigurisë, Kryeministri i Kosovës Albin Kurti pati shkruar se Fondi u themelua në përputhje me nevojat e Forcës së Sigurisë së Kosovës, situatës dhe pas konsultimeve me partnerët ndërkombëtar.

    “Mjetet e mbledhura financiare synohet të përdoren në përputhje me strategjinë e sigurisë shtetërore të Republikës së Kosovës që pritet të miratohet nga Qeveria e Republikës se Kosovës”, shkruante Kurti. Fondi, siç thoshte ai, do të përdorej ekskluzivisht për qëllimin e përcaktuar nga qeveria. Gjatë kohës së rezistencës paqësore në vitet ’90-ta ishte krijuar Fondi i 3 përqindëshit, ndërsa gjatë periudhës së luftës, ishte krijuar edhe Fondi “Vendlindja Thërret”. Mënyra e shfrytëzimit të parave të derdhura në këto dy fonde, në vazhdimësi është përcjell me dyshime për keqpërdorimin e tyre.

    Strategjia e Sigurisë e Kosovës 2022-2027 është miratuar në Kuvendin e Kosovës më 24.10.2022 dhe mund të qaset në këtë vegëz.

    https://kallxo.com/lajm/themelohet-fondi-i-sigurise-se-kosoves/

  • Andi Pajaziti fillon dhënien e mbrojtjes lidhur me rastin e vrasjes në loklain “BonVivant” në vitin 2023

    I akuzuari për rastin e vrasjes në lokalin “BonVivant”, Andi Pajaziti, ka filluar dhënien e mbrojtjes lidhur me akuzat që prokuroria i vë në barrë.

    Pajaziti akuzohet se ka kryer vrasje në gjendje të tronditjes së fortë mendor ku ka mbetur i vrarë një person më 04.08.2023.

    Procesi Gjyqësor tashmë gjendet në fazën e dhënies së mbrojtjes, ku më pas pritet të ipen fjalët përfundimtare dhe sipas afateve të përcaktuara me kodin e procedurës penale parashihet edhe shpallja e aktgjykimit për këtë rast.

    “Po dua të deklarohem”- janë fjalët e Andi Pajazitit në gjykatë më 24.01.2025.

    Mbrojta e Pajazitit është duke vazhduar në seancën që është duke u mbajtur më 24.01.2025.

    Si ishte kryer vrasja sipas Prokurorisë?

    Sipas dosjes së Prokurorisë, rasti kishte ndodhur më 04.08.2023 rreth orës 23:15, ku paraprakisht ishin të ulur i pandehuri, i cili gjendet në arrati, Dukagjin Likaj, bashkë më tani të ndjerin K.R.

    Dosja përshkruan se Likaj ishte ai që e kishte ftuar të akuzuarin Andi Pajaziti të ulet te tavolina e tyre.

    Pas tensionimit të situatës, sipas Prokurorisë, ishte sigurimi Hisni Gecaj ai që ishte munduar ta qetësojë situatën, por nuk kishte arritur.

    Dosja e Prokurorisë përshkruan se tashmë i ndjeri K.R. e kishte sulmuar me shishe dy herë në kokë të akuzuarin Pajaziti.

    Pas këtij sulmi, i akuzuari e kishte nxjerrë armën nga brezi nga ana e djathtë, për shkak të tronditjes së fortë mendore, siç përshkruhet në aktakuzë “pa fajin e tij, pa menduar për pasojat”, shtie më armë zjarri me ç’rast e godet tashmë të ndjerin K.R.

    Sipas dosjes së Prokurorisë, armën e kishte nxjerrë edhe Dukagjin Likaj, gjatë kësaj kohe ia kishte mbajtur dorën sigurimi Hisni Gecaj, kurse arma ishte e drejtuar në drejtim të të akuzuarit Pajaziti.

    Dosja thotë se Dukagjin Likaj ka shtënë me armë në drejtim të të pandehurit Pajaziti me ç’rast e “ka lënduar në bërrylin e dorës së majtë” dhe si të tilla bëjnë pjesë në lëndime të rënda trupore me pasoja të përhershme shëndetësore.

    Vdekja e K.R., sipas Prokurorisë, ka ardhur si pasojë e gjakderdhjes së brendshme dhe të jashtme e cila ka çuar në shok hemorragjik, si pasojë e predhës së armës së zjarrit.

    Arma e cila është përdorur, sipas Prokurorisë, është tip “Smith” e kalibrit 9mm.

    Për këtë, i akuzuari përveç kryerjes së vrasjes, akuzohet edhe për armëmbajtje pa leje.

    Pajaziti është duke qëndruar nën masën e paraburgimit. Pajazitit i ishte shqiptuar masa e paraburgimit më 07.08.2023, së bashku me të dyshuarit, Hisni Gecaj dhe Gëzim Zakuti.

    Por Gecaj dhe Zakuti ishin liruar nga kjo masë pas kërkesës së Prokurorisë.

    Sipas Prokurorisë në këtë rast në rrezik ishin jetët edhe të personave të tjerë të cilët kishin pësuar lëndime trupore nga predhat e armëve të zjarrit.

    Të plagosur të tjerë kishin mbetur edhe Andi Pajaziti e Hisni Gecaj ndërsa plagëve të armës së zjarrit nuk kishte arritur t’u mbijetonte K.R., i cili kishte vdekur në QKUK.

    13 persona sipas Prokurorisë ishin lënduar nga gotat e thyera të qelqit gjatë përpjekjes për t’u larguar nga vendi i ngjarjes.

    Të gjitha raportimet e tjera lidhur më këtë rast, mund t’i lexon në këtë LINK.

  • Vrasja e Agonis Tetajt, Zyra e Kryeprokurorit të Shtetit aprovon iniciativën për mbrojtje të ligjshmërisë në rastin e të pandehurit Shaban Gogaj

    Zyra e Kryeprokurorit të Shtetit më 04.12.2024 ka paraqitur dhe ka dorëzuar kërkesën për mbrojte të ligjshmërisë në Gjykatën Themelore të Pejës dhe njëkohësisht edhe e ka dorëzuar njoftimin në Prokurorinë Themelore të Gjilanit lidhur me rastin e Shaban Gogajt, i dënuar për vrasjen e Agonis Tetajt.

    Këtë për KALLXO.com e ka konfirmuar Zyra e Kryeprokurorit të Shtetit.

    “Ju informoj se me datën 19.11.2024 Prokuroria Themelore në Gjilan ka parashtruar iniciativë për mbrojtje të ligjshmërisë në Zyrën e Kryeprokurorit të Shtetit. Me datën 02.12.2024 Zyra e Kryeprokurorit të Shtetit e ka aprovuar iniciativën për mbrojtje të ligjshmërisë dhe me datën 04.12.2024 ka paraqitur dhe dorëzuar kërkesën për mbrojte të ligjshmërisë në Gjykatën Themelore në Pejë dhe njëkohësisht edhe e ka dorëzuar njoftimin në Prokurorinë Themelore në Gjilan”- thuhet në përgjigjen e Zyrës së Kryeprokurorit të Shtetit.

    Ndërkaq, Shaban Gogaj, i dënuar për vrasjen e Agonis Tetajt në vitin 2018, më 14.01.2025 kishte filluar vuajtjen e dënimit me burg.

    Gjykata e Apelit ia kishte zbutur dënimin Shaban Gogajt në 6 vjet e gjysmë burg.

    Këtë vendim e kishte marrë kolegji i Gjykatës së Apelit i përbërë nga Kadrie Goga-Lubishtani, Hashim Qollaku dhe Valbona Musliu-Selimaj.

    Gogaj nga Gjykata Themelore e Pejës për herën e dytë ishte gjetur fajtor për vrasje nga pakujdesia dhe për armëmbajtje pa leje dhe ishte dënuar me dënim unik prej 7 vjet e gjashtë muaj.

    Ndërsa me vendim të Gjykatës Supreme më 24.10.2024 ishte liruar nga masa e paraburgimit.

    Sipas aktakuzës se Prokurorisë, në vitin 2018, në kompaninë “Gogaj AG”, Shaban Gogaj mori një telefonatë nga një person tjetër, e cila në aktakuzë është cilësuar si dëshmitare, nga e cila bisedë më pas shihet se është acaruar.

    Tutje, aktakuza sqaron se Agonis Tetaj ishte larguar menjëherë në drejtim të rafteve të dyqanit përballë tij për gati 5 metra, ndërsa bashkë me të u larguan edhe dy dëshmitarët e rastit A.H. dhe F.Z.

    Sipas dosjes së Prokurorisë, me të përfunduar bisedën, Shaban Gogaj, nga karrigia e anës së majtë të banakut kaloi në karrigen tjetër e cila gjendej në mes të banakut dhe nga sirtari nxori revolen e tij të tipit “Beretta”, e vendosi karikatorin dhe e mori në shenjë Agonis Tetajn dhe e qëlloi me plumb në kokë, duke e vrarë.

    Viktima ishte punëtor në biznesin e të akuzuarit.