Ballina

Kategori: Ligji

  • I kanosi prokurorët special të cilët e ftuan kryeministrin Kurti në intervistë, Gjykata ia aprovoi të akuzuarit Marrëveshjen për pranimin e fajësisë

    “Veç plumbi këta kriminelë të Serbisë i ndal” – kjo ishte fjalia që Merxhan Rexhepi kishte postuar dhe komentuar për dy prokurorët e Prokurorisë Speciale të Kosovës, Valdet Gashi dhe Milot Krasniqi, më 12.12.2024. I njëjti nga Prokuroria po akuzohet për “kanosje”.

    Në seancën e shqyrtimit fillestar të mbajtur më 27.01.2025 ndaj të akuzuarit Merxhan Rexhepi, i akuzuar për kanosjen e dy prokurorëve të Prokurorisë Speciale, është aprovuar Marrëveshja për pranim të fajësisë.

    Me pëlqimin e palëve në procedurë, Aktakuza u konsiderua e lexuar. Ndërsa, lidhur me Marrëveshjen e pranimit të fajësisë mbrojtësja e të akuzuarit Merxhan Rexhepi, avokatja Fehmije Gashi-Bytyqi tha se Marrëveshja e pranimit të fajësisë është bërë në mënyrë vullnetare nga i mbrojturi i saj dhe i propozoi Gjykatës që këtë Marrëveshje ta aprovojë.

    “Pas konsultimit të mjaftueshëm me të mbrojturin tim, duke i dhënë sqarime ligjore me pranimin e fajësisë dhe arritjes së Marrëveshjes, i mbrojturi im në mënyrë vullnetare ka pranu këtë Aktakuzë e këtë Marrëveshje dhe unë e përkrah. I propozoj Gjykatës që ta aprovojë këtë Marrëveshje.” – tha avokatja Gashi-Bytyqi.

    Propozimin për aprovimin e Marrëveshjes për pranimin e fajësisë e propozoi edhe prokurorja, Ardiana Veseli.

    “I propozojmë Gjykatës që ta aprovojë Marrëveshjen për pranimin e fajësisë dhe të pandehurit t’i shqiptohet dënimi – siç është propozuar në Marrëveshje.” – tha prokurorja Veseli.

    Ndërkaq, gjyqtari i vetëm gjykues Sabit Sadikaj mori Aktvendim – duke aprovuar Marrëveshjen për pranimin e fajësisë.

    Tutje, mbrojtësja e të akuzuarit Rexhepi, avokatja Fehmije Gashi-Bytyqi kërkoi nga Gjykata që të pandehurit Rexhepi t’i ndërprehet masa e arrestit shtëpiak, me arsyetimin se i njëjti është mbajtës i familjes e ka punë në Gjermani dhe qëndrimi i mëtutjeshëm në këtë masë po i pengon punën në Gjermani.

    Në seancë të pranishëm nuk ishin pala e dëmtuar, prokurorët Valdet Gashi dhe Milot Krasniqi.

     

    Çfarë thotë Aktakuza?

    Sipas Aktakuzës së datës 23.01.2025, Merxhan Rexhepi po akuzohet se më 12.12.2024, në kohë të pacaktuar në Prishtinë, kanos seriozisht personat zyrtarë, me fjalët se do t’i privojë nga jeta dhe atë lidhur me punën e pozitën e tyre si Prokuror të Shtetit.

    Sipas Aktakuzës në ditën kritike në mediumin “Gjakovarë” është publikuar një shkrim “Prokurori i PDK-së, Valdet Gashi është i njëjti Prokuror që kishte pamundësuar Albin Kurtin me qenë bartës i listës në Zgjedhjet 2021. Sot i njëjti ka nisur një luftë të re ndaj demokracisë në Kosovë. Ky është një sulm frontal i kastës së vjetër… L Haliti.” – ku këtij shkrimi i është bashkëngjitur një foto e prokurorit Valdet Gashi me mbishkrimin në foto “Prokurori i PDK-së Valdet Gashi”, e që shkrimi në fjalë ka të bëjë me ftesën dërguar kryeministrit të Republikës së Kosovës, z.Albin Kurti për intervistë nga prokurorët e PSRK-së, Valdet Gashi dhe Milot Krasniqi”.

    Në Dosjen e Prokurorisë thuhet se lidhur me këtë postim i pandehuri Merxhan Rexhepi komenton dhe poston mbishkrimin “Veç plumbi këta kriminelë të Serbisë i ndal”, e që këto fjalë te personat e kanosur, prokurorët Valdet Gashi dhe Milot Krasniqi shkaktojnë shqetësim dhe ankth.

    Me këto veprime i pandehuri Merxhan Rexhepi po akuzohet se ka kryer veprën penale “kanosja”.

     

     

  • IPK rekomandon suspendimin e policit i cili dyshohet se shkaktoi aksidentin me fatalitet në Çubrel

    Inspektorati Policor i Kosovës i ka rekomanduar Policisë së Kosovës që ta suspendojë zyrtarin policor i cili dyshohet se shkaktoi aksidentin me fatalitet në Çubrel të Skenderajt, të dielën në mbrëmje, më 26.01.2025, nga i cili vdiqën tre persona.

    Rekomandimi i IPK-së u bë si pjesë e procedurave administrative dhe në interes të hetimit në lidhje me aksidentin me fatalitet i cili u regjistrua në rrugën Mitrovicë-Pejë, më saktësisht në fshatin Çubrel.

    KALLXO.com mëson se në veturën e Policisë e cila u aksidentua me një veturë civile ishin katër zyrtarë policorë të Njësisë Speciale Kufitare.

    Të njëjtit në kohën e aksidentit ishin duke u kthyer nga puna në drejtim të Pejës.

    Në aksidentin që ndodhi më 26.01.2025 vdiqën tre persona, një burrë dhe dy gra.

    Sipas një hetimi preliminar dyshohet se aksidenti u shkaktua nga mospërshtatja e shpejtësisë së veturës së Policisë.

    Inspektorati Policor i Kosovës ka njoftuar se rreth orës 19:00 janë njoftuar nga Policia e Kosovës për një aksident trafiku, ku ishte përfshirë një automjet zyrtar i Policisë dhe një veturë civile.

    Pas pranimit të informacionit hetuesit e IPK-së kanë dalë në vendin e ngjarjes – duke iu bashkëngjitur edhe ekipeve tjera policore dhe Prokurorisë në këqyrjen e vendit të ngjarjes.

    “Bazuar në veprimet fillestare hetimore dyshohet se aksidenti ka ndodhur si rezultat i mospërshtatjes së shpejtësisë së lëvizjes së automjetit me kushtet e rrugës nga drejtuesi i automjetit zyrtar të Policisë, i cili  ka kaluar në shiritin e kundërt duke goditur veturën civile.” – thuhet në njoftimin e IPK-së.

    Si pasojë e aksidentit tre persona të cilët kanë qenë në veturën civile, një burrë dhe dy gra, kanë vdekur.

    Trupat e pajetë të tre viktimave janë dërguar në Institutin e Mjekësisë Ligjore për obduksion.

    Lëndime të rënda trupore kanë pësuar katër zyrtarë policorë dhe një qytetar nga vetura civile, të cilët janë dërguar në QKUK për tretman mjekësor.

    “Si pjesë e procedurave administrative dhe në interes të hetimit, IPK ka rekomanduar suspendimin e zyrtarit policor i cili ka qenë drejtues i automjetit zyrtar të Policisë në momentin e aksidentit, përderisa lidhur me aksidentin janë duke u ndërmarrë veprime hetimore në koordinim me Prokurorin kompetent.” – thuhet tutje në njoftimin e IPK-së.

    KALLXO.com raportoi në lidhje me aksidentin që u shënua mbrëmë, më 26.01.2025.

    https://kallxo.com/lajm/tre-te-vdekur-nga-aksidenti-ne-cubrel-te-skenderajt/

     

  • Dështon seanca fillestare ndaj Naim Murselit dhe të akuzuarve tjerë në rastin e vrasjes së Liridona Ademajt – Pamje

    11:54 – Pas ndërprerjes së seancës, Naim Murseli dhe të akuzuarit tjerë në rastin e Liridona Ademajt, janë larguar nga gjykatorja nën masa të rrepta të sigurisë për në qendrat e paraburgimit ku po mbahen aktualisht.

    11: 44 – Dështon seanca fillestare ndaj Naim Murselit dhe të akuzuarve të tjerë në rastin e vrasjes së Liridona Ademajt.

    11: 39 – Kryetarja e trupit gjykues, gjyqtarja, Fatime Dermaku e ka dënuar me 500 euro gjobë avokatin Ndrecë Dodaj, për mos përfillje të gjyqtares. Avokatit paraprakisht iu shqiptua një vërejtje me shkrim për pengim të gjyqtares.

    11:34 – Mungesa e shkresave të lëndës për palët e akuzuara, shtyhet seanca e shqyrtimit fillestar ndaj Naim Murselit dhe të tjerëve, të akuzuarve për vrasjen e Liridona Ademajt.

    11:33 – Prokurorja Prlinçeviq e demanton avokatin Dodaj për shkresat e lëndës

    Prokurorja e rastit, Javorka Prlinçeviq e demantoi avokatin Ndrecë Dodaj, pasi tha se për Ndrecë Dodajn “ka ardhë me i marrë shkresat avokati Skender Gojani që mbron Granit Plavën”, për të cilën tha se “ka dëshmi shkresën e cila është nënshkruar”.

    Kurse Gojani tha se po është e vërtetë që ka shku “me marrë lëndën për Ndrecë Dodajn”, të njëjtin e kishte kontaktuar dy herë që ta marrë lëndën, por që sipas tij  Dodaj i ka thëne “e marrë lëndën të hënën”.

    11:22 – Avokati Ndrecë Dodaj, që mbron Kushtrim Kokallën, deklaroi se nuk i ka pranuar në tërësi shkresat e lëndës, duke thënë që nuk mundet me këshillu klientin e tij e as me kundërshtu aktakuzën.

    Edhe avokati Agron Kuqi që mbon të akuzuarin Tom Doda, deklaroi se nuk janë në gjendje që sot të deklarohen lidhur me rastin.

     

    11:16 -Përgjigja e Naim Murselit për statusin martesor: E kom gruan e vrame

    I akuzuari në rastin e vrasjes së Liridona Ademajt, Naim Murseli në pyetjen e kryetares së trupit gjykues, Fatime Dermaku, për statusin martesor është përgjigjur se: “E kam Grun e vrame”.

    11:08 – Murseli dhe të akuzuarit tjerë në bankën e të akuzuarve

    Naim Murseli dhe të akuzuarit tjerë në bankën e të akuzuarve. Ndaj tyre pritet të nis senaca e shqyrtimit fillestar. Prokurorja e rastit, Javorka Prlinçeviq pritet t`ua lexojë aktakuzën që rëndon ndaj tyre.

    10:15 – Masa të rrepta sigurie – momenti kur Granit Plava sillet në Gjykatën e Prishtinës 

    Njëjtë sikurse Naim Murseli, nën masa të rrepta sigurie janë sjellë në Pallatin e Drejtësisë- në Gjykatën Themelore të Prishtinës edhe të akuzuarit tjerë në rastin e vrasjes së Liridona Ademajt, Kushtrim Kokalla, Granit Plava dhe Tomë Dodaj.

    10:43 – Naim Murseli sillet në Gjykatë i prangosur këmbë e duar – Pamje

    Naim Murseli dhe të akuzuarit tjerë në rastin e vrajses së Liridona Ademajt janë sjellur nën masa të rrepta të sigurisë në Pallatin e Drejtësisë. Ndaj tyre pritet të mbahet seanca e fillestare.

    09:48 – Vrasja e Liridona Ademajt, sot pritet të filloj procesi gjyqësor ndaj Naim Murselit dhe të akuzuarve tjerë
    Më 27.01.2025 është caktuar data e nisjes së gjykimit për rastin e vrasjes së Liridona Ademajt, ndaj të akuzuarve: Naim Murseli, Kushtrim Kokalla, Granit Plava dhe Tomë Dodaj.

    Kjo konsiderohet seanca e parë për këtë gjykim, në të cilin parashihet që të bëhet leximi i Aktakuzës dhe deklarimi se a ndjehen apo jo fajtor të akuzuarit për veprat që rëndojnë mbi ta.

    Seanca është paraparë të fillojë në ora 11:00, në Gjykatën Themelore të Prishtinës.

    Gjykimi pritet të udhëhiqet nga kryetarja e Trupit Gjykues, Fatime Dermaku, kurse prokurore e rastit është Javorka Prlinçeviq.

    Katër persona tashmë po akuzohen nga Prokuroria Themelore në Prishtinë, në lidhje me vrasjen e Liridona Ademajt.

    Liridona Ademaj ishte vrarë më 29.11.2023, në ora 20:25, në rrugën “Dalip Alshiqi” në Prishtinë dhe – sipas Prokurorisë – dorasi ishte pajisur me armë dhe ishte inskenuar një grabitje.

    “E kishte mbajtur për krahu, në mënyrë që të mos iu shmangte plumbit.” – kështu e përshkruan ngjarjen prokurorja e rastit të vrasjes së Liridona Ademajt, derisa tregon veprimet e Naim Murselit, ish-bashkëshortit të viktimës, në natën kritike kur u krye krimi në një fshat të Prishtinës.

    Prokurorja e rastit, Javorka Prlinçeviq ka përshkruar se Naim Murseli planifikoi vrasjen e bashkëshortes së tij për shkak të raporteve të çrregulluara familjare dhe martesore. Prej këtyre problemeve – siç përshkruhet edhe në Aktakuzë – kishte lindur edhe dëshira për hakmarrje nga ana e Naim Murselit ndaj bashkëshortes së tij.

    Gjithmonë sipas Aktakuzës, pas datës 25.06.2022, kur ishte paguar një polisë e sigurimit jetësor në emër të Liridona Ademajt në vlerë prej 3 milionë kruna suedeze, me qëllim që pas vrasjes Murseli të përfitojë dobi financiare.

    Këtë plan Dosja e përshkruan se Naim Murseli e ndau me familjarin e tij Kushtrim Kokallën dhe se ky i fundit kishte refuzuar që të kryejë vrasjen, por tutje ka gjetur personin e tretë, Granit Plavën me të cilin e ka njoftuar Naim Murselin.

    Gjithmonë sipas Dosjes, më 29.11.2023, në orët e mesditës, Naim Murseli bashkë me Granit Plavën blejnë një armë të tipit “Zastava” me ngjyrë të zezë, nga Tom Dodaj, në vlerë 280 euro.

    E në të njëjtën ditë, Dosja shpjegon se në intervalin kohor: 20:11-20:18 minuta, në vendin me të cilin paraprakisht ishte dakorduar Naim Murseli me Granit Plavën – plan të dakorduar të cilin e kanë inskenuar që të duket si grabitje e armatosur – është kryer edhe vrasja.

    Në Dosje shkruhet se Naim Murseli e kishte lajmëruar fillimisht Granit Plavën me drita të veturës. Më pas e kishte kapur për dore Liridona Ademajn, që të mos i shpëtojë plumbit, pasi u shkrep nga Plava. E, që tutje Naimi ka dalë nga vetura me fëmijët dhe është larguar nga vendi i ngjarjes. Me të gjitha këto veprime që ka kryer Naim Murseli, Prokuroria e ka ngarkuar atë me veprën penale: “vrasje e rëndë”.

    I pandehuri i dytë është Granit Plava, i cili sipas Prokurorisë në ditën kritike në intervalin kohor: 20:11-20:18 minuta, në fshatin Bërnicë, pas marrëveshjes paraprake që kishte bërë me Naim Muselin, Dosja përshkruan se kreu vrasjen në formë të maskuar, kishte shtënë në drejtim të viktimës, e cila për pasojë edhe ka vdekur. E për të gjithë këtë rast, Plava do të kompensohej me një shumë prej 30 mijë eurosh.

    Sipas Dosjes së Prokurorisë, Plava ishte afruar drejtpërdrejt me viktimën dhe të njëjtën e ka qëlluar me armë, derisa krahun viktimës po ia mbante ish-bashkëshorti i saj, që të mos i shmangej plumbit.

    Arma që ishte përdorur në rast ishte gjetur në shtëpinë e tashmë të akuzuarit Granit Plava, në fshatin Cermjan në Gjakovë. Sekuestrimi i armës u bë pas bastisjes, që u krye në shtëpinë e të dyshuarit.

    Plava nga Prokuroria ngarkohet me veprat penale “vrasje e rëndë” dhe “posedim i armës pa leje”.

    I akuzuari i tretë është Kushtrim Kokalla, djali i tezës së Naim Murselit. Dosja tregon se Kokalla kishte refuzuar të kryente vrasjen, por që më pas kishte gjetur Granit Plavën dhe i kishte prezantuar Naim Murselit.

    Edhe Kokalla ngarkohet me veprën penale “vrasje e rëndë”. E, i pandehuri i katërt në këtë rast është Tom Dodaj. Ai po ngarkohet për “furnizim me armë” të tre të dyshuarve të parë, të cilët planifikuan dhe kryen vrasjen.

    Më 28.11.2023, në ora 19:41, sipas të dhënave në Dosje të Prokurorisë thuhet se Naim Murseli i ka dërguar mesazh Granit Plavës – duke i thënë “Shok, sigurt kryhet nesër, a të ka thënë Kuqa që paradite?”.

    Pas këtij mesazhi – sipas Prokurorisë – kanë vazhduar biseda me audio – një bisedë e tillë e regjistruar në telefonat e të akuzuarve ka ndodhur edhe më 29.11.2023, në ora 19:01, ku kishte pasur bisedë telefonike për 00:00:28 sekonda.

    Raportimet e tjera: LINK 

     

  • Çfarë është Komisioni Presidencial për Drejtësi Tranzicionale?

    Presidenca e Kosovës njoftoi më 25 janar se presidentja Vjosa Osmani është duke punuar për ta themeluar Komisionin Presidencial për Drejtësi Tranzicionale.

    Me gjithë iniciativat në të kaluarën, Kosovës i ka munguar një komision i tillë për zbardhjen e së vërtetës dhe fakteve për luftën edhe 25 vjet pas përfundimit të saj, sipas Bekim Blakajt nga Fondi për të Drejtën Humanitare në Kosovë.

    Osmani u takua më 25 janar me disa nga shefat e misioneve diplomatike dhe përfaqësues të organizatave ndërkombëtare në Kosovë, të cilët janë të angazhuar në fushën e drejtësisë, dhe pritet të takohet edhe me përfaqësues të tjerë nga organizatat përfaqësuese të viktimave, shoqërisë civile dhe komunitetit ndërkombëtar, për ta finalizuar fillimit sa më të shpejtë të punës së këtij komisioni, sipas njoftimit.

    Nisma për themelimin i këtij komisioni buron nga Strategjia për Drejtësi Tranzicionale e Kosovës, sipas Presidencës.

    Çka është ky komision?

    Qeveria e Kosovës e miratoi vitin e kaluar Strategjinë për Drejtësi Tranzicionale dhe ndër synimet e strategjisë është edhe themelimi i komisionit presidencial.

    Misioni i komisionit është t’i dokumentojë dhe t’i vërtetojë faktet për shkeljet e të drejtave të njeriut në të kaluarën, ta rivendosë dinjitetin e viktimave, ta rrisë vetëdijesimin dhe të kontribuojë në transformimin shoqëror. Ai ka mandat specifik dhe në përfundim të tij duhet ta nxjerrë një raport mbi gjetjet, thuhet në dokumentin e strategjisë.

    Blakaj tha se Kosova ende nuk ka ndonjë raport zyrtar për krimet që kanë ndodhur gjatë luftës dhe mbi dëmet e shkaktuara.

    “Në përgjithësi, mendoj se në Kosovë nuk është bërë sa duhet në fushën e drejtësisë tranzicionale. Kanë kaluar 25 vjet nga përfundimi i luftës dhe asnjëra nga shtyllat nuk është zbatuar në mënyrën e duhur. E drejta e viktimave në drejtësi nuk është realizuar”, tha Blakaj për Radion Evropa e Lirë.

    Edhe një çerekshekull pas përfundimit të luftës, shumë çështje që burojnë nga konflikti ende nuk janë zgjidhur, përfshirë mosndëshkueshmëria për krime lufte, personat e zhdukur që nuk janë gjetur ende, shkeljet e pandëshkuara të të drejtave të njeriut dhe ndarjet etnike.

    Sipas të dhënave të Fondit për të Drejtën Humanitare në Kosovë – i cili vëzhgon gjykimet për krime lufte para gjykatave vendore dhe atyre ndërkombëtar – për 25 vjet janë dënuar rreth 80-85 persona me aktgjykim të plotfuqishëm për krime të kryera në Kosovë gjatë luftës.

    Gjatë luftës së viteve 1998 dhe 1999 në Kosovë u vranë më shumë se 13.000 civilë, kryesisht shqiptarë. Sipas Kryqit të Kuq, në Kosovë janë ende 1.612 persona të pagjetur nga lufta.

    Sipas Blakajt në fushën e zbardhjes së të vërtetës është bërë edhe më pak.

    “Nuk ka pasur institucion shtetëror deri vitin e kaluar, i cili ka qenë kompetent për t’i mbledhur dhe zyrtarisht faktet. Instituti i kaluar nuk ka dhënë kurrfarë rezultati”, tha ai.

    Instituti për hulumtimin e krimeve të luftës ishte krijuar për herë të parë në vitin 2011, megjithatë, ai nuk kishte funksionuar siç duhet dhe i njëjti ishte mbyllur në vitin 2018, kur në krye të Qeverisë ishte Ramush Haradinaj.

    Më pas kryeministri Albin Kurti e themeloi Institutin për Hulumtimin dhe Dokumentimin e Krimeve të Kryera Gjatë Luftës në Kosovë, i cili hyri në fuqi në korrik 2023.

    Më 2017, presidenti i atëhershëm i Kosovës, Hashim Thaçi, e inicioi idenë e Komisionit të së Vërtetës dhe Pajtimit. Megjithatë, nisma nuk u realizua pasi Thaçi u dërgua në Hagë në vitin 2021 për t’u gjykuar për dyshimet për krime lufte dhe krime kundër njerëzimit.

    Kush do të jetë i përfshirë?

    Sipas dokumentit të strategjisë, Komisioni Presidencial do t’u japë mundësi të gjitha palëve të prekura nga lufta që të angazhohen drejtpërdrejt dhe gjerësisht në mbledhjen e të dhënave për përvojat e tyre.

    Komisioni do të ofrojë programe të informimit ose vetëdijesimit dhe mbajtjes së dëgjimeve publike për një sërë çështjesh kyçe, duke i lejuar viktimat nga të gjitha komunitetet e prekura t’i ndajnë rrëfimet e tyre me kombin, sipas dokumentit të strategjisë.

    Blakaj theksoi se është e rëndësishme që Komisioni Presidencial të jetë gjithëpërfshirës dhe t’i përfshijë edhe pakicat tjera në Kosovë, në mënyrë që puna e tij të cilësohet e mirëfilltë.

    “Nuk do të ishte e dëshirueshme që komisioni të jetë njëkombësi, që të mos i konsultojë komunitetet e tjera, si serbët dhe romët, etj. Për të qenë i suksesshëm një komision i tillë, duhet t’i marrë parasysh interesat e të gjitha palëve. Nëse nuk ndodh kjo, atëherë raporti përfundimtar i këtij komisioni mund të jetë i papranueshëm nga ndonjë palë, e nëse ndodh kjo, ai mund të cilësohet si komision i dështuar”, tha ai.

    Çfarë është drejtësia tranzicionale?

    Drejtësia tranzicionale shkon shumë përtej sallës së gjyqit, sepse qëllimi i saj thelbësor është ndërtimi i demokracive të qëndrueshme dhe paqësore përmes përpjekjeve për të vërtetën dhe pajtimin, sipas Qendrës Ndërkombëtare për Drejtësi Tranzicionale.

    Drejtësia tranzicionale i referohet mënyrës se si kombet përballen me shkeljet e të drejtave të njeriut në të kaluarën brenda shoqërive në tranzicion dhe ajo është vendosur në qendër të përpjekjeve për demokratizim nga organizatat ndërkombëtare.

    Drejtësia tranzitore mund të funksionojë si një lehtësues efektiv i pajtimit dhe stabilizimit pas konfliktit.

    Sipas Qendrës Ndërkombëtare për Drejtësi Tranzicionale, synimet e drejtësisë tranzicionale përfshijnë: sjelljen para drejtësisë ata që janë përgjegjës për abuzime përmes ndjekjes penale dhe formave jogjyqësore të hetimit (si mekanizmat për kërkimin e së vërtetës); ofrimin e dëmshpërblimeve për viktimat dhe adresimin në një farë mase të nevojave të tyre; transformimin e sistemeve të sigurisë, duke i bërë ato përgjegjëse për shkeljet e kaluara dhe duke larguar abuzuesit e të drejtave të njeriut nga institucionet publike; dhe reformimin e institucioneve publike për të parandaluar përsëritjen e shkeljeve të kaluara./Radio Evropa e Lirë

  • Dyshohet se vodhi ar e argjend me vlerë mbi 160 mijë euro, Prokuroria kërkon paraburgimin e tij

    Prokuroria Themelore e Prizrenit ka njoftuar se më 24.01.2025 ka arrestuar Sh.H., nga fshati Greme e Ferizajt për shkak të dyshimit të kryerjes së veprës penale “vjedhja e rëndë”.

    Prokuroria ka kërkuar paraburgimin për të arrestuarin.

    I arrestuari dyshohet se më 12.01.2025 rreth orës 03:45 në një argjendari në Prizren, në bashkëveprim me disa persona të tjerë, deri më tani të paidentifikuar kanë vjedhur 3 kilogramë ari dhe 1 kilogram argjend me vlerë prej 168 mijë euro.

    “Pas një planifikimi paraprak dhe koordinimi në mes vete, me qëllim që vetes t’i sjellin dobi pasurore të kundërligjshme, ia marrin pasurinë të dëmtuarit A.B., (pronar i argjendarisë), në atë mënyrë që duke shfrytëzuar momentin kur në lokalin e të dëmtuarit nuk ishte askush, me përdorim të forcës fizike dhe të pajisur me mjete të përshtatshme e hapin derën e lokalit dhe e dëmtojnë alarmin, ku hyjnë brenda në lokal” – thuhet mes tjerash në njoftimin e Prokurorisë.

    Të dyshuarit i janë kontrolluar objekti i banimit dhe objekte përcjellëse në fashtin Greme. Gjate kontrollit u gjetën prova të cilat jane sekuestruar, mes tyre edhe automjeti me të cilin u krye vepra.

    https://kallxo.com/lajm/dyshohet-se-vodhi-3-kg-ari-dhe-1-kg-argjent-ne-naten-e-vitit-te-ri-ne-prizren-arrestohet-nje-person-nga-nje-fshat-i-ferizajt/

    https://kallxo.com/lajm/detaje-nga-vjedhja-e-rreth-3-kg-ari-ne-nje-argjendari-ne-prizren-dyshohet-se-u-keput-kabllo-e-kamerave-te-sigurise/