Një grua ka raportuar se dy vajzat e saj janë zhdukur.
Vajzat e mitura sipas ankueses kanë dalë nga shtëpia me datë 01.01.2025 dhe deri më sot nuk ka marrë asnjë informacion në lidhje me vendndodhjen e tyre.
Rasti është regjistruar në Fushë Kosovë dhe është iniciuar si person i zhdukur.
Një person është arrestuar nën dyshimin se ka kërcënuar një zyrtar policor.
Shkak i kërcënimit u bë një tiketë e trafikut që iu shqiptua fillimisht të dyshuarit.
Ngjarja u regjistrua në rrugën “Brigada 123” në Prizren më 03.01.2025.
Në lidhje me rastin është njoftuar edhe prokurori kujdestar.
Me vendim të këtij të fundit, i dyshuari pas intervistimit është dërguar në mbajtje.
Në formë të maskuar e i armatosur, një person ka tentuar që të kryej një grabitje në një pompë derivatesh në rrugën “Gjilani” në Prishtinë.
Më 03.01.2025 është regjistruar rasti si tentim grabitje deri sa rastin e kishte raportuar një punëtor i pompës së derivateve.
Punëtori ka raportuar se derisa ka qenë duke punuar në pompën e derivateve, një i dyshuar i maskuar dhe i armatosur i ka drejtuar armën pistoletë dhe ka kërkuar të hap derën.
Punëtori kishte refuzuar t’ia hap derën të dyshuarit që tentonte të grabiste pompën e derivateve dhe i njëjti më pas ishte larguar në drejtim të panjohur.
Deri më tani policia nuk ka njoftuar nëse ka arritur që të identifikoj ndonjë person të dyshuar për këtë rast por që rasti është duke vazhduar të hetohet.
Në raportet e para të fillim vitit, të Policisë së Kosovës evidentohen raste të cilat raportohen nga ana e qytetarëve në lidhje me të shtëna armësh që ndodhin gjatë ndërrimit të mot-moteve.
Edhe gjatë datës 03.01.2024 edhe gjatë datës 03.01.2025 në raportet policore u regjistruan raste të tilla.
Policia e Kosovës ka njoftuar se në Fushë Kosovë gjatë datës 03.01.2025 janë regjistruar dy raste që u raportuan nga qytetarët.
Njëri është regjistruar në rrugën “Nënë Tereza”. Ankuesi ka raportuar se derisa ka hyrë në lokalin e tij -kafe bar, ka vërejtur dy vrima të cilat dyshohet që janë shkaktuara nga predha e armës. Njësiti i forenzikës ka konfiskuar predhën e armës ndërsa rasti është duke u hetuar edhe më tutje.
Një rast tjetër është raportuar në rrugën “Theranda”. Ankuesi ka raportuar se para disa dite kishte parkuar veturën e tij, ndërsa më 03.01.2025 kishte vërejtur se xhami i parë i veturës ishte dëmtuar (shpuar) dyshohet nga predha e armës. Njësiti i forenzikës e ka konfiskuar predhën e armës.
Të dy rastet janë duke u hetuar si shkaktim i rrezikut të përgjithshëm.
Në gjendje të rëndë, ende pretendohet se është viktima që mbeti i plagosur në orët e mbrëmjes së 03.01.2024 në Lagjen Arbëria në Prishtinë.
KALLXO.com mëson se i dyshuari Sh.H., është vendosur në stop listë ndërsa nga vendi i ngjarjes ishte larguar me veturë.
Tutje siç mëson KALLXO.com, policia arriti deri te emri i të dyshuarit, pasi i plagosuri deri sa po transportohej në spital kishte përmendur emrin e tij dhe kishte treguar se i njëjti e kishte gjuajtur me armë.
Deri më tani prokuroria ka arritur që të siguroj një DVR që janë tërhequr nga policia dhe të njëjtat do të ekzaminohen dhe do të dalin në pah edhe pamjet që mund të zbardhin plagosjen se si ndodhi.
DVR është siguruar nga kamerat e sigurisë së një objekti/lokal në afërsi të vendit ku ka ndodhur plagosja.
Nga hetimet fillestare deri më tani, ende nuk është e qartë se çka dërgoi deri te plagosja ndërsa KALLXO.com mëson se familjarët e të plagosurit kanë konfirmuar se ky i fundit nuk ka treguar ndonjëherë se ka pasur ndonjë problem me dikë e edhe me të dyshuarin.
Një person është plagosur mbrëmë më 03.01.2025 rreth orës 18:30 në Lagjen Arbëria në Prishtinë.
Policia ka dhënë detaje në lidhje me plagosjen që ndodhi ndërsa ka njoftuar edhe se i dyshuari ndonëse është identifikuar vazhdon të jetë në kërkim nga njësitet policore.
Viktima në këtë rast për të cilin KALLXO.com kishte marrë vesh se ka inicialet F.J, sipas policisë është plagosur në shpinë me armë zjarri.
Sh.H., sipas policisë dyshohet se ka gjuajtur me armë në drejtim të viktimës më pas është larguar nga vendi i ngjarjes.
Pas marrjes së informacionit se në Lagjen Arbëria ka të shtëna armësh, njësitet policore relevante kanë dalë në vendin e ngjarjes.
Aty kanë gjetur dhe sekuestruar pesë gëzhoja.
Viktima është dërguar për tretman mjekësor në Qendrën Klinike Universitare të Kosovës ndërsa mjeku kujdestar Adem Jaha, i ka thënë KALLXO.com se nga salla operative ishte dërguar në kujdes intensiv duke shtuar se pacienti ka qenë në rrezik për jetë.
Në anën tjetër zëdhënësi i policisë për rajonin e Prishtinës, Agron Borovci ka thënë për KALLXO.com se përvec të dyshuarit, janë identifikuar edhe dy vetura të cilat u përkasin të përfshirëve në plagosjen që ndodhi në Lagjen Arbëria në Prishtinë.
Rasti është iniciuar si vrasje në tentativë.
Pas plagosjes, policia me urdhër të prokurorit kujdestar të Prokurorisë Themelore në Prishtinë, ka kryer edhe një bastisje në shtëpinë e të dyshuarit në Podujevë por nuk ka gjetur diçka të dyshimtë.