Ballina

Kategori: Gjykata

  • Dardan Krivaça e Arbër Sejdiu për herë të dytë në Gjykatën e Apelit, lidhur me rastin e vrasjes së Marigona Osmanit – VIDEO

    Të akuzuarit, Dardan Krivaça dhe Arbër Sejdiu për herën e dytë kanë dalë para Gjykatës së Apelit, lidhur me rastin e vrasjes së Marigona Osmanit, më 22.08.2021.

    Në këtë seancë pritet që të prezantohen ankesat e palëve lidhur me Aktgjykimin dënues: “me burgim të përjetshëm” për Krivaçën dhe “dënimi prej 15 vjetësh burgim” për Arbër Sejdiun, të datës 29.07.2024.

    Siç njoftoi kryetari i Kolegjit të Gjykatës së Apelit, Xhevdet Abazi, kjo seancë do të jetë e mbyllur për publikun dhe mediat për arsye të natyrës së rastit.

    Kështu, publiku, mediat dhe monitoruesit janë obliguar të dalin nga Salla e Gjykimit.

    Rasti i Dardan Krivaçës gjendet për herën e dytë në Gjykatë të Apelit. Herën e parë për Krivaçën Gjykata në Ferizaj kishte shqiptuar “dënim me burgim të përjetshëm” për “vrasje të rëndë në bashkëkryerje”, kurse Arbër Sejdiu ishte dënuar “me 15 vjet dënim me burgim” për “ndihmë në vrasje të rëndë”. Për veprën penale “dhunim dhe “ndihmë në dhunim” Krivaça e Sejdiu ishin liruar nga akuza me arsyen se nuk ishte provuar kryerja e veprës penale.

    Dardan Krivaça dhe Arbër Sejdiu akuzohen për “vrasje të rëndë në bashkëkryerje”. Krivaça në Shkallë të Parë ishte dënuar me “burgim të përjetshëm” për “vrasjen e Marigona Osmanit”, kurse për “ndihmë në vrasje të rëndë” ishte dënuar me “15 vjet dënim me burgim” Arbër Sejdiut.

    Në Aktakuzën e Prokurorisë, të siguruar nga KALLXO.com, tregohet se si kamerat e sigurisë që kanë qenë të vendosura në banesën e të pandehurit Krivaça ka bërë që Prokuroria të sigurojë prova të forta për netët para ngjarjes fatale e për mënyrën se si u organizua dhunimi. E më pas vrasjen e 18-vjeçares. Sipas konstatimit të Prokurorisë, në korridor të banesës së të pandehurit ka pasur të vendosur një kamerë sigurie, e cila regjistronte 24 orë e që ka xhiruar edhe momente të ngjarjes.

    “Regjistrimi ka kohën e saktë. Kamera ka pamje nga dera e hyrjes së banesës dhe banjo. E njëjta ka pamje edhe të një pjese të derës së një dhome gjumi, si dhe një dhomë tjetër të cilën e kap vetëm një qosh. Kjo e fundit edhe është dhoma ku janë kryer veprat penale.” – përshkruhet në Aktakuzë.

    “Policia ka marrë DVR. E njëjta është dërguar për ekzaminim, ku janë tërhequr pamjet për periudhën kohore prej 72 orë dhe atë nga data 19.08.2021, në ora 00:05 deri më 23.08.2021, në ora 00:18.” – përshkruan Aktakuza e Prokurorisë, e cila detajon edhe kohën e saktë dhe veprimet e dy të pandehurve brenda banesës.

    Në Aktakuzë theksohet se Prokuroria e ka konsideruar videon të besueshme dhe ngjarja është regjistruar prej datës 19.08.2021.

    “Ne e konsiderojmë videon të besueshme dhe të saktë. Videoregjistrimet tregojnë se në fillim, konkretisht, më 19.08.2021, raportet në mes të pandehurit Dardan Krivaça dhe të ndjerës kanë qenë të mira. Këto raporte fillojnë të përkeqësohen kur aty paraqitet i pandehuri Arbër Sejdiu, i cili vjen në orën 16:18, së bashku me Dardanin, ku me vete ka një çantë me rroba. Në orën 19:02, të pandehurit bisedojnë lidhur me kamerat, si dhe shikojnë se cilat pjesë të korridorit i kap kamera. Lëvizin në pjesë të ndryshme për të verifikuar se cilat pjesë të korridorit i kap kamera dhe vërehet se rolin apo fjalën kryesore për këtë e ka Arbër Sejdiu. Në orën 19:56, Arbëri merr rrobat e tij dhe del nga banesa së bashku me Dardanin.” – shkruhet në Aktakuzën e Prokurorisë.

    Prokurori, në Aktakuzën e përpiluar, ka përshkruar se si është organizuar dhunimi e më pas vrasja e Marigona Osmanit.

    “Më 21.08.2021, në ora 02:40, Dardan Krivaça, pas mesnate derisa është në banjë me të ndjerën Marigona Osmani, e godet me dorë në fytyrë. Në ora 04:52 dalin nga banesa; 09:53 – i pandehuri Dardan Krivaça dhe e ndjera Marigona Osmani kthehen ku vërehet se e ndjera nuk ka kontroll të plotë, i merren mendtë; 10:02 – i pandehuri e dërgon në banjë të ndjerën Marigona Osmani, del në ora 10:14, ku vërehet se e njëjta reziston. Mirëpo, është kapur me duar dhe shtyhet me forcë drejt sallonit; 10:48 – e dërgon me forcë në banjë, ku e ndjera është e zhveshur. Ndërsa i pandehuri është veshur ku qëndrojnë deri në orën 11:09. Kur dalin i pandehuri është zhveshur dhe të ndjerën e nxjerr me dhunë nga banja dhe e dërgon në dhomën e gjumit; 13:43 – i pandehuri i cili është zhveshur i vendos kamerës një kapelë, e cila mbulon pamjen deri në orën 19:57.” – përshkruhet në Aktakuzë.

    Raportimet e KALLXO.com, lidhur me këtë rast, mund t’i lexoni në këtë LINK.

  • Rasti “Brezovica”, dëshmitari bashkëpunues i Prokurorisë u përgjigjet pyetjeve të mbrojtësve të të akuzuarve

    Seanca për rastin “Brezovica” në Gjykatën e Pejës më 13.01.2025 ka vazhduar me dëgjimin e dëshmitarit bashkëpunues të Prokurorisë, Alban Çuka.

    Të akuzuar në këtë rast janë Bratisllav Nikoliq, Dimitrije Raçiçeviq, Dragomir Millosavleviq, Hysni Bajrami, Sasha Millosavleviq, Arben Çitaku, Bedri Halimi, Husein Ajdini, Sasha Spasiq dhe Jardan Kostiq.

    Në lidhje me rastin “Brezovica”, Prokuroria e Ferizajt pretendon se janë keqpërdorur pozitat, ka pasur ushtrim ndikimi, marrje ryshfeti, dhënie ryshfeti, me qëllim të lëshimit të lejeve ndërtimore në zonën e Brezovicës.

    Dëshminë e tij dëshmitari Alban Çuka e kishte filluar më 06.11.2024 dhe e kishte vazhduar më 08.01.2025, më 09.01.2025 dhe më 10.01.2025.

    Në këtë seancë Çuka ka vazhduar të japë dëshminë e tij duke iu përgjigjur pyetjeve të mbrojtësve të të akuzuarve.

    Në seancën e datës 06.11.2024 me të filluar dëgjimi i dëshmitarit, kryetarja e trupit gjykues, Nushe Kukaj-Mekaj, kishte njoftuar mediat se dëshmia e dëshmitarit nuk mund të bëhet publike deri në përfundim të dëgjimit edhe të dëshmitarëve të tjerë.

    Arsyeja pse u mor vendimi për të mos e bërë publike dëshminë e këtij dëshmitari sipas gjyqtares ishte për shkak të ruajtjes së konfidencialitetit të deklarimit të dëshmitarit dhe për të mos pasur ndikim te dëshmitarët e tjerë që pritet të dëshmojnë në këtë rast.

    Çuka është dëshmitar bashkëpunues i Prokurorisë.

    Dëshmitari Alban Çuka kërkoi nga gjykata që seanca e nesërme të anulohet për shkak se i njëjti kishte probleme shëndetësore.

    “E lus gjykatën që për nesër ta anuloj seancën për shkak se kam probleme shëndetësore” – tha Çuka

    Andaj gjykata mori aktvendim që seanca e nesërme të anulohet ndërsa e radhës u caktua për muajin shkurt 2025.

    Më 04.11.2024 dhe 05.11.2024 prokurori, avokatët dhe të akuzuarit kanë dhënë fjalën hyrëse lidhur me këtë rast.

    Çka thotë aktakuza e Prokurorisë?

    Sipas aktakuzës së Prokurorisë së Ferizajt, kryetari i Komunës së Shtërpcës, Bratisllav Nikoliq nga 21 janari 2016 e deri më 10 shtator 2018 ka keqpërdorur detyrën zyrtare me qëllim të përfitimit të dobisë pasurore për vete dhe i ka mundësuar një investitori marrjen e lejeve ndërtimore në mënyrë të kundërligjshme për të cilin shërbim ka marrë 200 mijë euro për 19 leje ndërtimore, për një shtëpi vikendi dhe një pëlqim rrugor dhe 100 mijë euro për lejen ndërtimore për objektin e hotelerisë “Rimida”.

    Ish-kryetari i Komunës së Shtërpcës akuzohet edhe në disa dispozitiva të tjerë të aktakuzës për keqpërdorim të detyrës zyrtare.

    Në pikën dytë të aktakuzës i njëjti akuzohet se nga 30 janari i vitit 2015 e deri më 27 maj 2019 përsëri sipas Prokurorisë ka keqpërdorur detyrën zyrtare me qëllim të përfitimit të pasurisë për vete duke i mundësuar një personi tjetër përfitimin e lejes ndërtimore në mënyrë të kundërligjshme për të cilin shërbim ka marrë 140 mijë euro për 14 leje ndërtimore dhe për shtëpi vikendi.

    60 mijë euro të tjera akuzohet nga Prokuroria se i ka marrë ish-kryetari i Komunës së Shtërpcës për lëshimin e 5 lejeve ndërtimore në mënyrë të kundërligjshme për ndërtimin e shtëpive të vikendit. Këto objekte ishin ndërtuar në zonën e tretë të mbrojtur të Parkut “Sharri”.

    Në pikën katër të aktakuzës thuhet se nga 23 nëntor 2018 deri më 6 gusht 2019 ish- kryetari i Komunës së Shtërpcës kishte marrë 40 mijë euro për lëshimin e 6 lejeve ndërtimore për shtëpi vikendi.

    Aktakuza kësisoj vazhdon për keqpërdorim të detyrës zyrtare për ish-kryetarin e Komunës së Shtërpcës edhe në pikën 5, 6, 7, 8, 9.

    Në po këtë aktakuzë Bratisllav Nikoliq akuzohet edhe për marrje ryshfeti e ushtrim ndikimi.

    Në këtë aktakuzë të përfshirë janë edhe Dimitrije Reqiçeviq – si drejtor i Urbanizimit, inspektorët komunalë të ndërtimit Hysni Bajrami dhe Dragomir Millosavleviq dhe Arben  Çitaku si ish-sekretar i përgjithshëm i Ministrisë së Mjedisit, Mustafë Hyseni si shef i Departamentit për Mbrojte dhe Mjedis të Ujërave, Husen Ajdini si investitor, Raif Bajrami si shef i Inspeksionit të Shtërpcës dhe të akuzuarit Sasha Spasiq, Bedri Halimi i akuzuar në cilësinë e kryeinspektorit, Sasha Millosavleviq si shef i Drejtorisë së Kadastrës.

    Të lartcekurit akuzohen për vepra penale si marrje ryshfeti, keqpërdorim i pozitës zyrtare, ushtrim ndikimi dhe për vepra si armëmbajtje pa leje.

    Më 17.09.2023 prokurori që po përfaqëson këtë rast, Rasim Maloku, kishte ndarë detaje ekskluzive për KALLXO.com lidhur me hetimin e këtij rasti.

  • Çka thuhet në Dosjen e Prokurorisë për të arrestuarin i cili kërcënoi kryeministrin Albin Kurti?

    Një muaj paraburgim i është caktuar nga Gjykata të dyshuarit për kanosje ndaj kryeministrit Albin Kurti.

    M. R. – sipas Dosjes së Gjykatës së Mitrovicës që ka siguruar KALLXO.com – e kishte pranuar fajësinë.

    M. R., i nacionalitetit serb, sipas Vendimit të Gjykatës kishte postuar fotografi në rrjetin social Instagram në faqen “Kani Zv”: njëra foto e të dëmtuarit, kryeministrit Albin Kurti me pikat e shënjestrës së armës, ndërsa fotografia e dytë me flamurin e shtetit të Serbisë me mbishkrim “Ja ku jemi, o bozhiq!” dhe logon e organizatës terroriste “Brigada e Veriut”.

    Më 11.01.2025, Prokuroria kishte kërkuar masën e paraburgimit për M. R., por që avokatja e të dyshuarit e kishte kundërshtuar këtë kërkesë – duke kërkuar që t’i caktohet masa e arrestit shtëpiak.

    Sipas të dyshuarit, M. R., veprimet që i ka bërë kanë ardhur si pasojë e ndikimit të alkoolit.

    I njëjti ka pranuar veprën penale dhe ka premtuar që nuk do të përsërisë veprime të tilla.

    “Pajtohem dhe e pranoj veprën në tërësi dhe premtoj se nuk do ta përsërisë një vepër të tillë. Nuk kam asnjë mendim të keq për Kryeministrin e nuk kam asnjë interesim për organizatën “Brigada e veriut” dhe nuk është në interesin tim, pasi që kam jetën time. Këto veprime kanë qenë në gjendje të alkoolizuar. I propozoj Gjykatës që të më caktoj arrest shtëpiak për të cilin premtoj se do ta respektojë.” – kishte thënë në seancën dëgjimore i dyshuari për kanosjen e kryeministrit Kurti.

    Avokatja të dyshuarit, Jelena Kriokapie ka kundërshtuar masën e Prokurorisë, duke kërkuar që t’i caktohet masë tjetër e jo paraburgimi, pasi sipas saj M. R. ka qenë nën ndikim të alkoolit.

    “Me vetë faktin se i mbrojturi im e ka pranuar veprën, ajo nuk është dyshim i bazuar mirë. Nuk ekziston rreziku i përsëritjes së veprës penale, sepse natën paraprake ka qenë në gjendje të alkoolizuar dhe nuk ka qenë i vetëdijshëm se çfarë është duke vepruar; dhe, vetëm kur ka hyrë në faqen e tij në Instagram, në mëngjes, e ka kuptuar se çfarë foto gjenden aty.” – ishin arsyet për kundërshtimin e paraburgimit nga avokatja, Jelena Kriokapie.

    Sipas avokates së tij ato foto janë fshirë menjëherë nga i dyshuari, e ka mbyllur llogarinë e tij në Instagram dhe nga ndërgjegjja e ka thyer telefonin.

    “E ka vrarë ndërgjegjja për atë që ka bërë dhe e ka thyer telefonin.” – kishte shtuar tutje avokatja.

    Sipas avokates së tij, meqenëse i mbrojturi i saj e kishte pranuar fajësinë, ka menduar që Prokuroria do të procedojë menjëherë me Aktakuzë.

    Rrjeti social në Instagram – sipas Dosjes së Gjykatës – quhet “Kani Zv”, ku janë postuar dy fotografi: njëra foto e të dëmtuarit me pikat e shënjestrës së armës, ndërsa fotografia e dytë me flamurin e shtetit të Serbisë me mbishkrim “Ja ku jemi, o bozhiq!” dhe logon e organizatës së shpallur terroriste, “Brigada e Veriut”.

    Si rrethanë për caktimin e masës së paraburgimit, Gjykata ka marrë parasysh faktin se arma është gjetur në shtëpinë e të pandehurit. Por për këtë çështje është duke u zhvilluar një procedurë e ndarë, ndaj babait të të dyshuarit për kanosje ndaj kryeministrit Kurti.

    Sipas Vendimit të Gjykatës, fakti se i pandehuri ka jetuar në një ambient të tillë ku ka pasur lehtësisht qasje në armë, paraqet ekzistim të rrezikut se i pandehuri mund të përsërisë veprën apo të përfundojë veprën që është kanosur të kryhet e – sipas Gjykatës – pasojat do të ishin jashtëzakonisht të mëdha, pasi që është kanosur jeta e të dëmtuarit.

    Rrethanë tjetër – sipas Gjykatës Themelore në Mitrovicë – është se i pandehuri M. R. është person i njohur për Policinë sepse më 21.10.2024 është ndaluar nga zyrtarët policorë, duke shkruar grafite me përmbajtje nacionaliste në afërsi të Komunës së Zveçanit – për çka i është shqiptuar gjobë në shumë prej 300 eurosh.

    Vendimi lidhur me këtë rast është marrë më 11.01.2025 nga gjyqtarja, Marigona Lajqi.

    KALLXO.com, më 10.01.2025, raportoi se një qytetar serb ishte ndaluar për 48 orë, pasi i njëjti përmes rrjetit social “Instagram” ka kanosur kryeministrin Albin Kurti.

    Siç raportoi KALLXO.com, i riu serb, i cili dyshohet nga Prokuroria, në profilin e tij në Instagram ka bërë një postim kërcënues ndaj Kurtit.

    Një person me iniciale M. R. është arrestuar nga Policia e Kosovës si i dyshuar për veprën penale “kanosje”.

    Këtë e kishte konfirmuar për KALLXO.com zëvendësdrejtori i Drejtorisë Rajonale Mitrovicë – Veri të Policisë së Kosovës, Veton Elshani.

    “E konfirmojmë arrestimin e M.R. (i lindur më 2004) për rast ‘kanosje’. Arrestimi është kryer për interesa të Krimeve të Rënda në Prishtinë.” – kishte thënë Elshani.

    https://kallxo.com/lajm/kercenohet-kryeministri-albin-kurti-arrestohet-nje-qytetar-serb-ne-veri/

     

     

     

     

  • Skenderaj, akuzohet se e rrahu një 6-vjeçar, Gjykata e dënoi me dënim me burg pedagogun

    Gjykata Themelore e Mitrovicës – dega në Skenderaj e ka dënuar me dënim me burg prej 90 ditësh të pandehurin Z.F., i akuzuar se kishte sulmuar një fëmijë të moshës 6-vjeçare, të dëmtuarin A.B.

    Gjyqtar i lëndës ishte Valon Hajdini.

    Siç njofton Gjykata, rasti ka ndodhur më 11.09.2024 rreth orës 17:00 në rrugën “Sala e Hamit Jashari” në Skenderaj, saktësisht pranë kopshtit të fëmijëve “Foleja”.

    I pandehuri, i cili sipas dosjes e ka të përfunduar Fakultetin e Pedagogjisë Sociale, punëtor në kopshtin “Foleja” në Skenderaj, kishte dalë nga objekti dhe e kishte rrahur fëmijën me pretendimet se ky i fundit i ka goditur pandërprerë xhamat e kopshtit.

    “I pandehuri me dashje e përdor forcën ndaj personit tjetër dhe atë e ka sulmuar viktimën e ndjeshme, fëmijën e moshës gjashtëvjeçare – të dëmtuarin A.B. në atë mënyrë që pasi që viktima ka qenë duke drejtuar biçikletën me shokët e tij pranë kopshtit, i pandehuri del nga objekti i kopshtit dhe godet me shuplakë në faqe si dhe dy herë mbrapa në kokë, me pretendimet se viktima i ka goditur pandërprerë xhamat e kopshtit dhe përkundër që i ka tërhequr vërejtjen disa herë”- thuhet në aktgjykim.

    Tutje, Gjykata njofton se me mbështetje dhe pëlqim të të pandehurit dënimi me burg i zëvendësohet me dënim me gjobë në shumën 1,300 euro, të cilin dënim i pandehuri është i obliguar që ta paguajë brenda afatit prej tre muajsh nga dita e plotfuqishmërisë së këtij aktgjykimi.

    “Në rast se i pandehuri dënimin e zëvendësuar me gjobë nuk e paguan brenda afateve të caktuara nga gjykata, atëherë e njëjta do të zëvendësohet me dënim me burgim siç përcaktohet me nenin 43 par.3 të Kodit Penal të Republikës së Kosovës, duke iu përllogaritur njëzet euro të dënimit me gjobë, ekuivalent me një ditë burgim”- theksohet në aktgjykimin e Gjykatës së Mitrovicës.

    Sipas aktgjykimit të lëshuar më 19.12.2024, i pandehuri Z.F. ka kryer veprën penale – sulm.

    Çka thuhet në aktakuzën e Prokurorisë?

    Prokuroria e Mitrovicës ka ngritur aktakuzë më 04.10.2024 pranë Gjykatës së Mitrovicës – dega Skënderaj ndaj të pandehurit Z.F. për shkak të veprës penale – sulmi.

    Si rrodhi procedura penale?

    Më 20.11.2024 Gjykata ka mbajtur seancën e shqyrtimit fillestar. Të pranishëm ishin prokurori Shaqir Sedolli, i pandehuri Z.F., mbrojtësi i tij, Liman Tahiraj, përfaqësuesi ligjor – prindi i të dëmtuarit A.B., A.B. dhe zyrtarja nga Qendra për Punë Sociale, Mirjeta Veliu.

    I pandehuri Z.F. është deklaruar se e pranon në tërësi fajësinë për veprën penale për të cilën akuzohet.

    I pandehuri shtoi se pranimin e fajësisë e bën në mënyrë vullnetare, pa imponim, sinqerisht i kërkon falje palës së dëmtuar dhe përfaqësuesit ligjor të tij – prindit A.B., duke i premtuar Gjykatës se në të ardhmen do jetë më i kujdesshëm dhe nuk do të përsërisë veprime të tilla.

    Arsyeja e goditjes, sipas tij, ka qenë se paraprakisht i ka tërhequr vërejtjen fëmijës mirëpo nuk ka dëgjuar dhe po të thyhej ai xham do të kushtonte 500 euro dhe në qoftë se i kishte goditur fëmijët xhami i thyer, pasojat do të ishin më të rënda.

    Prokurori Shaqir Sedolli i propozoi Gjykatës që pranimi i fajësisë të përdoret si masë lehtësuese për të pandehurin ndërsa si rrethanë rënduese të merret se ky i fundit me profesion është pedagog dhe përkundër këtij fakti ka kryer vepër penale ndaj 6-vjeçarit.

    “I propozoj Gjykatës që të aprovojë këtë pranim fajësie, kërkoj nga Gjykata që të njëjtit t’i shqiptojë një sanksion penal me të cilin do të arrihej qëllimi i dënimit, ndërsa me rastin e caktimit dhe llojit të dënimit si rrethanë lehtësuese të marrë për bazë pranimin e fajësisë nga ana e të pandehurit, kërkim faljen e shprehur ndaj palës së dëmtuar dhe prindit të tij në seancën e shqyrtimit fillestar, kurse si rrethana rënduese të marrë parasysh se i njëjti me profesion është pedagog dhe punon me fëmijë edhe përkundër këtij fakti ka kryer vepër penale ndaj fëmijës, viktimë e ndjeshme e moshës 6-vjeçare”- ka thënë Sedolli.

    Përfaqësuesi ligjor-prindi i palës së dëmtuar A.B. ka deklaruar se pajtohet me deklarimin e prokurorit të shtetit, teksa nuk pranoi kërkim faljen nga i pandehuri.

    “Pasi që i njëjti fëmijën tim nuk e ka rrahur para kamerave, por e ka qitë prapa banesave. Kur ka ardhur fëmija im në shtëpi ka qenë i traumatizuar dhe të dy nevojat fiziologjike i ka pasur të kryera, andaj këto janë arsyet që nuk pranoj kërkim faljen nga i pandehuri”- tha ai në seancën fillestare.

    Mbrojtësi i të pandehurit, avokati Liman Tahiri, ka thënë se si masë lehtësuese duhet të merret pendimi i thellë i klientit të tij e gjithashtu fakti se ai nuk ka qenë më i parë i dënuar.

    “I pandehuri pas konsultimit të mjaftueshëm me mua si mbrojtës i tij ka kuptuar pasojat dhe benefitet e pranimit të fajësisë, pranimin e fajësisë e bëri në mënyrë vullnetare andaj Gjykatës i propozoj që ta aprovojë këtë pranim të fajësie kurse si rrethana lehtësuese të merren pendimi i thellë i tij, po ashtu faktin se i njëjti më parë nuk ka qenë i dënuar e po ashtu kërkim faljen ndaj palës së dëmtuar”- tha ai.

    Gjykata njofton se ka shqyrtuar pranimin e fajësisë të cilin e ka deklaruar i pandehuri Z.F. e në mbështetje të nenit 242 par.6 të KPP-së vlerësoi se janë përmbushur kushtet ligjore për pranimin e fajësisë nga i pandehuri Z.F.

    Tutje Gjykata ka bërë të ditur se i kishte tërhequr vërejtjen të pandehurit se pas pranimit të fajësisë nuk mund të shfrytëzojë të drejtën në ankesë për shkak të konstatimit të gabuar të gjendjes faktike. I njëjti është njoftuar se nëse e pranon fajësinë e humb mundësinë e kundërshtimit të provave në aktakuzë dhe mundësinë për paraqitjen e provave të tjera si dhe për faktin se pranimi i fajësisë, sipas ligjit, është rrethanë lehtësuese që me rastin e matjes së llojit dhe lartësisë së dënimit, Gjykata mund të marrë si rrethanë lehtësuese.

  • Një muaj paraburgim për të dyshuarin për terrorizëm, të cilit në banesë iu gjetën armë anti-tank “Zola” e drogë

    Gjykata e Prishtinës ka caktuar masën e paraburgimit ndaj Burim Dibranit, i cili po dyshohet për terrorizëm, pasi në banesën e tij Policia gjeti armatim luftarak, tri armë anti-tank “Zola”, municione dhe drogë.

    Këtë për KALLXO.com e ka konfirmuar zëdhënësja e Gjykatës së Prishtinës, Mirlinda Gashi.

    Policia i ra në gjurmë këtij të dyshuari për terrorizëm pasi i njëjti ishte raportuar për dhunë në familje.

    KALLXO.com ka raportuar më 09.01.2025 se një person i dyshuar për përgatitjen e veprave terroriste dhe veprave të tjera penale kundër rendit kushtetues është arrestuar nga Policia e Kosovës në Prishtinë rreth orës 21:00.

    Ndërsa sot, më 10.01.2025, KALLXO.com ka raportuar se ndaj të njëjtit Prokuroria Speciale ka kërkuar masën e paraburgimit si masë të sigurisë.

    Dibrani u ndalua më 09.01.2025 pasi në banesën në rrugën “Sali Nivica” në Prishtinë gjatë kontrollit policor i janë gjetur tri “Zola” dhe lëndë narkotike.

    Sipas Prokurorisë Speciale, nga koha e pavërtetuar e deri më 08.01.2025, i pandehuri ka përgatitur veprime terroriste në atë mënyrë që paraprakisht ka siguruar tri armë të rënda, armë këto të parapara për akte terroriste.

    Sipas dosjes së Prokurorisë Speciale, ekziston dyshimi i bazuar se i njëjti ka kryer veprën penale – përgatitja e veprave terroriste ose veprave kundër rendit kushtetues dhe sigurisë së Republikës së Kosovës.

    I njëjti dyshohet edhe për veprën penale – armëmbajtje pa leje.

    Po ashtu, ndaj tij ekziston dyshimi i bazuar se ka blerë dhe shitur substanca narkotike.

    Sipas Prokurorisë, të dyshuarit më 08.01.2025 në banesë dhe objektet përcjellëse gjatë kontrollit policor i janë gjetur dhe sekuestruar 269.3 gramë narkotikë që dyshohet të jetë marihuanë.

    Me këtë, sipas PSRK-së, i njëjti dyshohet se ka kryer veprën penale – shitblerja e narkotikëve.

    Dyshimi i bazuar për këto vepra penale, sipas kërkesës së Prokurorisë Speciale në të cilën pati qasje KALLXO.com, vërtetohet nga provat të cilat janë gjetur në banesën e të dyshuarit Burim Dibrani.

    Lidhur me pretendimin e prokurorisë se i dyshuari ka kryer veprën penale të përgatitjes për terrorizëm, Gjykata ka konstatuar se prokuroria nuk ka arritur të argumentoj dyshimin e bazuar mirë se i dyshuari të ketë kryer këtë vepër.

    Sipas Gjykatës, Prokuroria nuk ka arritur të paraqes asnjë provë për këtë vepër penale për të vërtetuar dyshimin e bazuar mirë që është kryer kjo vepër penale.

    Paraburgimi të njëjtit i është caktuar për veprën penale narkotik dhe armëmbajtje pa leje.

    Si i ra në gjurmë Policia Burim Dibranit, i dyshuar për terrorizëm?

    KALLXO.com kishte mësuar nga burimet e saj se stacioni policor Qendra në Prishtinë fillimisht kishte pranuar një informatë për një rast të dhunës në familje.

    Më pas një njësi e reagimit ishte dërguar në vendin e ngjarjes në Bregun e Diellit. Ngjarja u trajtua menjëherë, ndërsa ekipi reagues i Policisë kishte kërkuar të hyjë brenda në banesë për të vërtetuar informatën.

    Me lejen e personit të dyshuar kanë hyrë brenda dhe kanë hasur në një sasi të lëndës narkotike, të dyshuar marihuanë, e vendosur në një tavolinë.

    Më pas kanë kryer edhe një kontrolle sipërfaqësore, gjatë të cilës kanë hasur në pajisje, municion dhe armë të tipit “Zola”. Menjëherë pasi u identifikuan këto armë, u thirr edhe Drejtoria e Anti-Terrorit për të trajtuar rastin.

    Prokuroria Speciale i ka kërkuar Gjykatës Themelore të Prishtinës caktimin e masës së paraburgimit ndaj të pandehurit Burim Dibrani, shtetas i Kosovës, i cili dyshohet për vepra terroriste.