Ballina

Kategori: Film – Teatër

  • Shpallen nominimet për çmimet “Oscar 2025”, prin filmi “Emilia Pérez” i ndjekur nga “The Brutalist” dhe “Wicked”

    Akademia Amerikane e Arteve dhe Shkencave të Filmit “OSCAR” ka shpallur të enjten, më 23.01.2025, listën e filmave të nominuar për ceremoninë e 97-të të çmimeve të Akademisë.

    Filmi “Emilia Perez” ka thyer rekordin me 13 nominime, ndërsa pas tij vijnë “The Brutalist” dhe “Wicked” me nga 10 nominime secili.

    Sipas njoftimit të “OSCARS”, filmi “Emilia Pérez”, që tregon historinë e një bosi meksikan, i cili vendos të zhduket duke kaluar në një tranzicion gjinor për t’u bërë Emilia Pérez, është nominuar në 13 kategori, duke përfshirë edhe regjinë më të mirë, për aktorë më të mirë, kinematografia më e mirë, kostumografia, dizajni më i mirë, etj.

    Kurse, filmi “The Brutalist”, që flet për historinë e arkitektit hungarez i cili emigron në SHBA pas Luftës së Dytë Botërore për të ndjekur ëndrrën amerikane, është nominuar në 10 kategori, duke përfshirë nominimin për fotografinë më të mirë, regjisorin më të mirë, aktorin më të mirë, etj.

    Edhe “Wicked” një film muzikor fantastiko-shkencor amerikan që rrëfen historinë e Elphaba Thropp (Cynthia Erivo), e njohur si “Shtriga e Keqe e Perëndimit”, dhe miqësinë e saj me Galinda Upland (Ariana Grande), e cila bëhet Glinda e Mirë, është nominuar në 10 kategori për çmimin më të mirë, ndër të cilat edhe fotografia më e mirë, aktorja më e mirë, regjisori më i mirë, etj.

    Ceremonia e edicionit të 97-të ndarjes së çmimeve “OSCAR” do të mbahet më 02.03.2025 në Teatrin “Dolby” në Hollywood, në Los Anxhelos në SHBA.

  • Shfaqja e Teatrit të Gjakovës hap Edicionin e 34-të të Festivalit ‘Talia e Flakës’

    Shfaqja “Bëje ose vdis” e Teatrit “Hadi Shehu” të Gjakovës, me regji të Blerta Nezirajt do të hapë Edicionin e 34-të të Festivalit të Dramës Origjinale shqipe, “Talia e Flakës”.

    Festivali “Talia e Flakës 2025” hapet sot, e mërkurë, më 22.01.20025, në ora 20:00 në Teatrin e Qytetit në Gjilan.

    Festivali “Talia e Flakë” mbahet nga 22 deri më 27 janar 2025 – në kuadër të manifestimit mbarëkombëtar “Flaka e Janari”, që po mbahet në Gjilan.

    Edicioni i 34-të i manifestimit mbarëkombëtar “Flaka e Janarit” është hapur me 11 janar dhe mbyllet me Gala mbrëmje, në “Vali Ranch Resort”, më 31.01.2025.

    Anvi Shkodra, nga Organizata “Varg e Vi” ka thënë për KALLXO.com, se në Edicionin e sivjetmë të “Talias së Flakës” do të shfaqen gjithsej 6 shfaqje teatrore nga Kosova, Shqipëria e Maqedonia e Veriut. Të gjitha shfaqjet jepen në Teatrin e Gjilanit.

    Ai ka thënë se Festivali ka karakter garues dhe do të ndahen edhe disa çmime. Shkodra tha se risi e Edicionit të sivjetmë të “Talias së Flakës” është themelimi dhe ndarja edhe e çmimit për “Dramën më të mirë origjinale të shkruar”.

    “Ideja (për themelimin e këtij çmimi) është që të përkrahet drama origjinale shqipe – duke krijuar mundësi që të paktën dikush t’ua lexojë dramat tekstshkruesve tanë. Tutje stimulimit dhe shpërblimit për dramë fituese e po ashtu me shumë gjasë edhe inskenimin e saj në Teatrin e Gjilanit.” – ka thënë ai.

    Sipas tij, ky çmim dhe çmimet e tjera të Festivalit do të ndahen më 31.01.2025, në Gala mbrëmjen përmbyllëse të manifestimit “Flaka e Janarit”.

     

    “Talia e Flakës 2025” – Orari i shfaqjeve.

    Edicioni i 34-të i manifestimit mbarëkombëtar “Flaka e Janari” është hapur më 11 janar 2025.

    Deri më tani, gjatë këtij manifestimi janë mbajtur një sërë aktivitetesh, si: homazhe për heronjtë e Kosovës, Akademi e Tryeza kushtuar personaliteteve të njohura historike e aktivitete kulturore. Ndërsa, deri në mbyllje të manifestimit do të mbahen edhe një sërë aktivitetesh kulturore.

    Manifestimit Mbarëkombëtar “Flaka e Janarit” për të nderuar të rënët për liri.

    Edicioni i sivjetmë i “Flakës së Janarit” mbyllet me gala mbrëmje në “Vali Ranch Resort”, më 31.01.2025.

     

    ‘Flaka e Janarit 2025’- agjenda.

     

     

  • Problemet teknike në platformën online, QKK shtyn afatin e Konkursit për Mbështetje të projekteve për film të metrazhit të gjatë

    Qendra Kinematografike e Kosovës ka bërë të ditur se ka shtyrë për 24 orë afatin e aplikimit në Konkursin për Subvencionim të projekteve për film të gjatë artistik.

    Ky Konkurs mbetet i hapur deri në fund të datës 13.01.2025.

    Sipas QKK-së, shtyrja e afatit për aplikim për këtë Konkurs po bëhet për shkak të problemeve që kanë hasur aplikuesit gjatë aplikimit në platformën online, gjatë datës 12.01.2025.

    “Për shkak të problemeve teknike që aplikuesit kanë hasur në platformën online gjatë ditës së djeshme, afati për aplikim për Subvencionimin e projekteve filmike të metrazhit të gjatë është shtyrë. Afati i ri për dorëzimin e aplikimeve është deri sonte, më 13 janar 2025, në ora 00:00.” – thuhet në njoftimin e QKK-së, më 13.01.2025.

    Më 12.12.2024, QKK ka hapur Konkursin për Subvencionimin e projekteve filmike të metrazhit të gjatë artistik.

    Për dallim nga vitet e kaluara, QKK-ja nuk ka hapur Konkurs edhe për kategoritë tjera, si për filma dokumentar, filma të metrazhit të shkurtër e të animuar – duke lënë jashtë këtij Konkursi këto kategori filmike.

    Sipas Rregullores për Konkurset dhe Mbështetjen financiare të veprave filmike dhe audiovizuale, QKK-ja brenda vitit hap një apo më shumë Konkurse. Po, sipas saj, në Konkurset e QKK-së prioritet kanë veprat filmike dhe audiovizuale vendase.

    QKK-ja për vitin 2025 do të ketë një buxhet prej 2,139,694 euro.

     

  • Filmi i Alban Mujës shpalos në “Berlinale” mbijetesën e artit gjatë luftës në Kosovë

    Filmi “Mua besoj më shpëtoi portreti”/”I believe the portrait saved me” i regjisorit kosovar Alban Muja do të jetë pjesë e Festivalit Ndërkombëtar të Filmit “Berlinale”, në seksionin prestigjioz “Forum Expanded”.

    Filmi 10-minutësh “Mua besoj më shpëtoi portreti” trajton tema të mbijetesës, qëndresës dhe fuqisë transformuese të artit gjatë luftës në Kosovë.

    Studioja prodhuese e filmit “038STudio” ka bërë të ditur se filmi ofron një eksplorim të fuqishëm të krijimtarisë, si një mjet qëndrueshmërie përballë sfidave të jashtëzakonshme.

    “Artisti dhe regjisori kosovar Alban Muja prezanton premierën botërore të filmit të tij më të fundit, “Mua besoj më shpëtoi portreti”/”I believe the portrait saved me”, në kuadër të seksionit prestigjioz ‘Forum Expanded’ të Festivalit Berlinale – një nga ngjarjet më të rëndësishme të industrisë filmike botërore. Ky film prekës 10-minutësh trajton tema të mbijetesës, qëndresës dhe fuqisë transformuese të artit gjatë luftës së Kosovës.” – thuhet në njoftimin e produksionit “038Studio”

    Filmi rrëfen historinë e piktorit Skënder Muja, i cili gjatë luftës në Kosovës u kidnapua bashkë me disa qytetarë të Mitrovicës dhe u mbajtën për një kohë në një Qendër ndalimi.

    Filmi “Mua besoj më shpëtoi portreti” është prodhuar nga studioja “038Studio” në Prishtinë, në bashkëprodhim me AsfaltFilms nga Amsterdami dhe mbështetur nga Qendra Kinematografike e Kosovës.

    Edicioni i 75-të i Festivalit Ndërkombëtar të Filmit në Berlin (Berlin International Film Festival – Berlinale) do të mbahet nga 13 deri më 23.01.2025.

  • Festivali ‘Talia e Flakës 2025’, themelohet çmimi që nxit shkrimin e dramës shqipe

    Themelimi i çmimit për dramën më të mirë origjinale të shkruar është risia e Festivalit të dramës origjinale shqipe “Talia e Flakës 2025” që mbahet ndërmjet 22.01.2025 e 28.01.2025 në Gjilan.

    Festivali “Talia e Flakës” mbahet në kuadër të manifestimit tradicional mbarëkombëtar “Flaka e Janarit”, që hapet të shtunën, më 11.01.2025.

    Edicioni i 34-të i “Talias së Flakës” organizohet nga OJQ ‘Varg e Vi” në bashkëpunim me Teatrin e Qytetit të Gjilanit.

    Festivali ka karakter garues dhe përveç çmimit të sapothemeluar ndahen edhe disa çmimet të tjera.

    Konkursi për çmimin për dramën më të mirë origjinale të shkruar është hapur më 07.01,2025 dhe sipas organizatorëve të Festivalit, themelues të çmimit, konkursi mbetet i  hapur deri më 22.01.2025.

    Aktori Avni Shkodra, një nga themeluesit e “Varg e Vi’, ka thënë për KALLXO.com se çmimi do të stimulojë krijimin e dramës shqipe, e siç ka thënë ai, edhe të inskenimit të saj, qoftë në Teatrin e Gjilanit, teatrot kombëtare, etj.

    “Ideja (për themelimin e këtij çmimi) është që të përkrahet drama origjinale shqipe, duke krijuar mundësi që të paktën dikush t’ua lexojë dramat tekstshkruesve tanë, tutje stimulimit dhe shpërblimit për dramë fituese, e po ashtu me shumë gjasë edhe inskenimin e saj në Teatrin e Gjilanit”- ka thënë ai.

    Shkodra ka thënë se drama fituese e çmimit për dramën më të mirë origjinale të shkruar do të vlerësohet nga një komision tjetër e jo nga juria e “Talias”. Sipas tij, drama fituese e shkruar kompensohet materialisht nga mjetet e grumbulluara prej biletave të “Talias 2025”.

    “Drama fituese kompensohet materialisht në vlerë 1,000 euro dhe konsiderohet si dramë potenciale për inskenim në Teatrin e Qytetit në Gjilan. Çmimi dorëzohet në ceremoninë e ndarjes së çmimeve ‘Flaka e Janarit 2025’”- ka thënë Shkodra.

     ‘Flaka e Janarit 2025″

    Edicioni i 34-të i manifestimit mbarëkombëtar kulturor “Flaka e Janarit” do të nisë të shtunën, më 11.01.2025, në Gjilan.

    Sipas programit të publikuar nga Drejtoria për Kulturë, Rini dhe Sport e Gjilanit, gjatë këtij edicioni të  “Flakës së Janarit” do të mbahen një sërë aktivitetesh si: festival i muzikës, dramës, ekspozita, orë letrare.

    Manifestimi “Flaka e Janarit” mbyllet me një gala mbrëmje më 31.01.2025.