Ballina

Kategori: Botë

  • Së paku shtatë të vdekur në rrëmujën e Festivalit “Maha Kumbh” në Indi

    Të paktën shtatë persona kanë vdekur dhe rreth 10 të tjerë janë plagosur në një rrëmujë në Maha Kumbh Mela në Indinë veriore të mërkurën, ka njoftuar një zyrtar, ndërsa dhjetëra-miliona persona ishin mbledhur për zhytjen e shenjtë në ditën kryesore të Festivalit indus gjashtëjavor – raporton Agjencia e lajmeve Reuters.

    Ngjarja ndodhi ndërmjet 1 dhe 2 të mëngjesit pranë arenës ku ishin vendosur barrikada për menaxhimin e turmës gjatë zhytjes së tyre të shenjtë – ka theksuar Yogi Adityanath, kryeministër i shtetit Uttar Pradesh, ku mbahet Festivali.

    Kryeministri Narendra Modi, në një postim në X, ka shprehur ngushëllime për “adhuruesit që kanë humbur të dashurit e tyre”, por nuk specifikoi numrin e të vdekurve.

    “Administrata lokale është e angazhuar për të ndihmuar viktimat në çdo mënyrë.” – ka theksuar ai.

    Adityanath shtoi se situata ishte nën kontroll, por turma ishte ende masive.

    Një zyrtar i lartë shtetëror ka theksuar se “më shumë se shtatë persona janë vrarë në rrëmujë dhe rreth 10 të tjerë janë plagosur”. Zyrtari nuk deshi të identifikohej, pasi nuk është i autorizuar të fliste për media.

    Videot dhe fotografitë pas rrëmujës treguan trupat që merreshin me barela dhe njerëz të ulur në tokë duke qarë, ndërsa të tjerët kaluan mbi rroba, këpucë, çanta shpine dhe batanije të lëna nga ata që përpiqeshin t’i shpëtonin rrëmujës.

    Një dëshmitar ka theksuar për Reuters se ka parë disa trupa të pajetë, teksa dhjetëra ambulanca po nxitonin drejt bregut të lumit ku ndodhi incidenti.

    Dëshmitarët thanë se kishte një rrëmujë të madhe pranë bashkimit të tre lumenjve të shenjtë – ku zhytja konsiderohet veçanërisht e shenjtë – që bëri që besimtarët të binin mbi njëri-tjetrin. Kryeministri Adityanath u bëri thirrje qytetarëve të shmangin zonën.

    “Ne kishim barrikada para nesh dhe policë me shkopinj në anën tjetër. Shtytja nga pas ishte shumë e fuqishme… njerëzit filluan të binin.” – ka thënë Vijay Kumar, i cili shkoi në Festival prej qytetit lindor Patna.

    “Kishte njerëz të shtrirë përreth, nuk e di nëse ishin të vdekur apo gjallë.”

    Një grua që ishte pjesë e turmës, por nuk tregoi emrin, ka treguar për Agjencinë e lajmeve ANI se njerëzit “vazhdonin të shkelnin” nënën e saj dhe atë teksa ato kishin rënë përtokë.

    “Unë jam mirë, por nëna ka vdekur.” – ka thënë ajo.

    Përgatiti: Rexhep Maloku – Kallxo.com

  • Senati konfirmon Sekretarin e Thesarit, Scott Bessent

    Senati amerikan konfirmoi të hënën Scott Bessent-in si Sekretar të Thesarit, në Qeverinë e Presidentit Donald Trump, duke i dhënë kështu drejtuesit miliarder të fondeve të investimeve një rol qendror në hartimin e përparësive politike të Administratës së re në lidhje me uljen e taksave, të shpenzimeve qeveritare dhe menaxhimin e marrëdhënieve ekonomike me aleatët dhe kundërshtarët.

    Si Sekretari i 79-të i Thesarit, zoti Bessent do të ketë ndikim mbi mbledhjen e taksave dhe tregun e borxhit të thesarit prej 28 trilionë dollarësh, mbi politikën fiskale, rregulloret financiare, sanksionet ndërkombëtare dhe investimet nga jashtë.

    Votimi ishte 68-29, me 16 demokratë që mbështetën emërimin e tij.

    Zoti Bessent, 62 vjeç, tashmë është shfaqur si një mbrojtës i fuqishëm për agjendën ekonomike të Presidentit Trump, e cila përqendrohet tek ulja e taksave dhe vendosja e tarifave të larta, që demokratët dhe disa ekonomistë argumentojnë se mund të zhbëjnë një pjesë të përparimit që ka bërë Rezerva Federale në vendosjen e inflacionit nën kontroll.

    Në seancën e tij të konfirmimit zoti Bessent paralajmëroi se dështimi për të rinovuar një shkurtim prej 4 trilionë dollarësh nga taksat, që skadon në fund të këtij viti, do të ishte një “fatkeqësi” për amerikanët e klasës së mesme dhe argumentoi se tarifat do të ndihmonin në luftimin e praktikave të padrejta tregtare, rritjen e të ardhurave dhe do të forconin ndikimin e Shteteve të Bashkuara në negociatat ndërkombëtare.

    Ai kundërshtoi gjithashtu idenë se politikat e Presidentit Trump do të ishin inflacioniste dhe tha se përpjekjet e Administratës për të rritur prodhimin e naftës në fakt do të ndihmonin në uljen e çmimeve.

    Si zyrtari më i lartë ekonomik i Presidentit Trump, zoti Bessent do të përballet me një sërë sfidash, më urgjentja prej të cilave do të jetë menaxhimi i likuiditetit të Qeverisë federale, pasi Qeveria arriti kufirin e saj ligjor të borxhit në ditën e dytë të Presidentit Trump në detyrë. Edhe përpara se të bënte betimin, Departamenti i Thesarit po përdorte “masa të jashtëzakonshme” për të shmangur shkeljen e kufirit të borxhit dhe shkaktimin e një falimenti katastrofik. Zoti Bessent u tha senatorëve në seancën e tij të konfirmimit se nuk do të kishte mospagim nën drejtimin e tij.

    Sekretarit Bessent do t’i duhet gjithashtu të merret me perspektivën e rritjes së deficiteve buxhetore dhe borxhit të shtuar të Qeverisë që vlerësohet të arrijë në triliona dollarë – nëse rinovimi i uljes së taksave dhe lehtësimet e tjera të premtuara tatimore nuk mund të kompensohen nga rritja e të ardhurave ose shkurtimet e shpenzimeve. Nëse vazhdon precedenti i deritanishëm, ai do të jetë një aktor qendror që do të punojë me Kongresin për përmasat dhe trajtën e reformave tatimore./VOA

  • Policia suedeze arreston burrin i cili mësyu Ambasadën ruse në Stokholm

    Policia suedeze ka bërë të ditur të martën, më 28.01.2025, se ka arrestuar një burrë i cili po mundohej të hynte me forcë me një makinë nëpër portat e Ambasadës ruse në Stokholm, mëngjesin e sotëm – raporton Agjencia e lajmeve Reuters.

    Policia ka bërë të ditur se burri 45 vjeç ka dështuar në përpjekjen e tij dhe se është arrestuar nga autoritetet e rendit. Ai është arrestuar si i dyshuar për “shkelje të rëndë”. Policia nuk ka dhënë më shumë hollësi për identitetin e burrit.

    Një zëdhënës policie ka bërë të ditur se nuk ka indikacione të menjëhershme për motivin e mësymjes dhe se në makinë nuk kishte asgjë të dyshimtë.

    Reutersi nuk ka pasur mundësi që të merrte menjëherë një deklaratë prej Ambasadës ruse në Suedi.

    Përgatiti: Rexhep Maloku – Kallxo.com

  • Trump urdhëron riformësimin e Ushtrisë – përfshirë ndalimin e trupave transgjinore

    Presidenti amerikan, Donald Trump ka bërë të ditur se ka nënshkruar katër Urdhra Ekzekutivë që do të riformësojnë Ushtrinë – përfshirë ndalimin e shërbimit për pjesëtarët transgjinorë në forcat e armatosura të Shteteve të Bashkuara të Amerikës – duke davaritur Programet e diversitetit, barazisë dhe përfshirjes në Ushtri (DEI) dhe duke rikthyer pjesëtarët me pagesë të cilët ishin shkarkuar për shkak se kishin refuzuar të vaksinoheshin kundër COVID-19 – raporton televizioni amerikan CNN.

    Trump ka thënë, gjatë kthimit me aeroplanin “Air Force One” nga Florida në Uashington, se i kishte nënshkruar Urdhrat. CNN-i kishte raportuar më parë se Trump pritej t’i ndërmerrte këto masa – bazuar në informacione që ishin siguruar prej zyrtarëve brenda Shtëpisë së Bardhë.

    Urdhrat, për të cilët së pari raportoi “New York Post” kanë ardhur në kohën kur kandidati i Trumpit për t’i prirë Pentagonit, Pete Hegseth po betohej si Sekretar i Mbrojtjes, të shtunën. Hegseth ka thënë kaherë se planifikonte të rrënjoste ndryshime të mëdha kulturore në Ushtrinë amerikane.

    Disa momente pas arritjes të hënën në Pentagon, Hegseth u deklaroi reporterëve se ka edhe “Urdhra të tjerë që do të vijnë”.

    “Sot, ka më shumë Urdhra Ekzekutivë që do të merren… për heqjen e DEI-it brenda Pentagonit, rikthimin e trupave që ishin larguar për shkak të mandateve të COVID-it, kupolën e hekurt për Amerikën – kjo po ndodh shpejt e shpejt dhe si Sekretar i Mbrojtjes është nder të përshëndetësh me zgjuarsi, sikur kam bërë unë si Oficer Junior dhe tani si Sekretar i Mbrojtjes, që të sigurohem që këta Urdhra të përmbushen shpejt e shpejt.” – ka deklaruar Hegseth.

    Trump u kishte ndaluar amerikanëve transgjinorë të shërbenin në Ushtri më 2017 gjatë Administratës së tij të parë, por pastaj ish-presidenti Joe Biden lëshoi një Urdhër më 2021 që e shfuqizonte këtë ndalesë.

    Disa orë pas betimit javën e kaluar për mandatin e dytë, Trump nënshkroi një Urdhër që shfuqizonte Vendimin e vitit 2021 të Administratës së Bidenit, për t’i lejuar pjesëtarët transgjinorë që të shërbenin në Ushtri.

    Sidoqoftë Urdhri, që Trump ka bërë të ditur të hënën se e ka nënshkruar, shkon edhe më larg dhe përcakton standarde të reja lidhur me pjesëtarët transgjinorë dhe thekson se gatishmëria fizike dhe mendore kërkon që pjesëtarëve transgjinorë t’u ndalohet shërbimi në Ushtri.

    Përgatiti: Rexhep Maloku – Kallxo.com

  • Italia dërgon në Shqipëri 49 emigrantë

    Një anije e marinës italiane ka arritur më 28 janar në Shqipëri me 49 emigrantë në bord, të cilët u shpëtuan në ujërat ndërkombëtare.

    Në Shqipëri atyre do t’iu procedohen aplikimet për azil dhe më pas ata do të dërgohen në Qendrën në Gjadër.

    Kjo është përpjekja e tretë për strehimin e emigrantëve në Shqipëri, pasi paraprakisht Gjykatat italiane kishin ndaluar një gjë të tillë.

    Ministria e Brendshme italiane nuk ka specifikuar nacionalitetin e emigrantëve të cilët u dërguan në Portin e Shëngjinit, por mediat në Itali kanë raportuar se bëhet fjalë për persona nga Bangladeshi, Egjipti, Bregu i Fildishtë dhe Gambia.

    Përpjekja për procesimin në Shqipëri vjen pas dy përpjekjesh të dështuara tetorin dhe nëntorin e kaluar, kur gjykatësit italianë refuzuan të miratonin Urdhra për ndalimin e dy grupeve të vogla emigrantësh në Qendrat e ngritura në Shqipëri, sipas një Marrëveshjeje mes Italisë dhe Shqipërisë. Gjykatat vendosën se vendet e origjinës së emigrantëve nuk ishin të sigurta për ta, nëse aplikimet për azil do t’iu refuzoheshin dhe emigrantët do të ktheheshin në shtetet e tyre.

    Rastet janë dërguar në Gjykatën Evropiane të Drejtësisë, e cila më herët ka vendosur se azilkërkuesit nuk mund t’iu nënshtrohen procedurave të përshpejtuara që mund të çojnë në riatdhesim – nëse shtetet e tyre të origjinës nuk vlerësohet se janë plotësisht të sigurta.

    Seanca dëgjimore për këtë rast në Gjykatën Evropiane të Drejtësisë është caktuar për 25 shkurt.

    Qeveria e kryeministres italiane Giorgia Meloni është zotuar se do të rihapë dy Qendrat për Emigrantë në Shqipëri, pasi ato mbeten bosh pas Vendimeve të Gjykatave italiane.

    Qëndrimi i Melonit është mbështetur pjesërisht nga një Vendim i Gjykatës së Lartë të Italisë në dhjetor, në të cilin gjykatësit italianë thanë se nuk mund të zëvendësojnë politikat e Qeverisë sa i përket Vendimit se cilat shtete janë të sigurta për riatdhesimin e emigrantëve, të cilëve u është refuzuar Kërkesa për azil.

    Ky Vendim lejon që Gjykatat e niveleve më të ulëta të bëjnë përcaktime të tilla, në bazë të shqyrtimeve të rasteve individuale, pa vendosur për politikën e përgjithshme.

    Emigrantët priten të regjistrohen në Qendrën e pritjes në Portin e Shëngjinit dhe më pas të dërgohen në Qendrën e Strehimit në Gjadër.

    Marrëveshja mes Italisë dhe Shqipërisë për emigrantët, e arritur në nëntor të vitit 2023, lejon që deri në 3.000 emigrantë të kapur nga rojet bregdetare italiane në ujërat ndërkombëtare çdo muaj të strehohen në Shqipëri, ku do t’iu nënshtrohen procesit të verifikimit për marrjen e mundshme të azilit në Itali.

    Marrëveshja pesëvjeçare është thënë se do t’i kushtojë Italisë 160 milionë euro në vit.

    Sipas Marrëveshjes, procedurat për emigrantët do të kryhen në dy Qendra.

    Qendra e parë në Shëngjin do të përdoret për procedura të identifikimit të emigrantëve, ndërsa Qendra e dytë në Gjadër, rreth 20 kilometra larg Portit, do të shërbejë për strehim të tyre derisa të procesohen Kërkesat për azil.

    Qendrat do të funksionojnë sipas Ligjit italian, me staf italian të sigurisë, ndërsa gjyqtarët do t’i mbajnë seancat përmes video-lidhjes nga Roma.

    Emigrantët të cilët fitojnë azil do të mirëpriten në Itali, ndërkaq atyre që iu refuzohet Kërkesa për azil, sipas Marrëveshjes, do të riatdhesohen drejtpërdrejt nga Shqipëria.

    Aktivistët për të drejtat e njeriut kanë kritikuar Marrëveshjen – duke thënë se krijon një precedent të rrezikshëm.

    Deri më tani gjatë këtij viti 3.704 emigrantë kanë arritur në Itali, apo dyfish më shumë sesa në periudhën e njëjtë të vitit të kaluar, kur ishin 1.305 imigrantë.

    Vitin e kaluar 66.317 imigrantë arritën në Itali, apo 58% më pak se viti paraprak. Shumica e emigrantëve ishin nga Bangladeshi, Siria, Tunizia dhe Egjipti – sipas të dhënave të Ministrisë së Brendshme italiane./REL