Ballina

Kategori: Botë

  • Suedia: Plani i BE-së për migrantët mund të finalizohet në mars

    Bashkimi Evropian mund të finalizojë në mars propozimin për krijimin e të ashtuquajturave “qendra kthimi” për migrantët e paligjshëm, ka thënë të enjten kryeministri suedez, Ulf Kristersson.

    Ai i ka bërë këto deklarata pas një takimi në Vjenë me kancelarin austriak Karl Nehammer, gjithashtu konservator, prandaj dy burrat kanë bërë thirrje që Bashkimi Evropian t’i rrisë përpjekjet për të luftuar migrimin e paligjshëm.

    Rritja e mbështetjes për partitë e ekstremit të djathtë në Evropë, ka rezultuar me çuarje përpara të migrimit nëpër agjenda politike.

    Liderët e BE-së kanë thënë në tetor se janë duke analizuar një skemë, sipas së cilës, migrantët që nuk kanë të drejtë të qëndrojnë në bllokun evropian, të dërgohen nëpër disa qendra që konsiderohen të sigurta jashtë territorit të BE-së.

    Kristersson ka thënë se e ka diskutuar skemën me Komisionarin e BE-së për Migrim, Magnus Brunner, i cili e ka siguruar që propozimi do të finalizohet në këtë pranverë.

    “Ekziston një lloj momentumi tani”, ka thënë Kristersson.

    Nehammer e ka përgëzuar Kristerssonin që po e mban çështjen e migrimit lart në agjendën e BE-së, dhe që aktualisht janë 18 shtete brenda Zonës për lëvizje të lirë, Schengen, përfshirë Zvicrën dhe Norvegjinë, që kanë interes të përbashkët në luftimin e valës së migrimit.

    Kancelari austriak ka thënë se qeveritë që kanë shprehur shqetësim kanë arritur “të ndryshojnë plotësisht” diskutimin rreth migrimit, në mënyrë që shtetet pa kufij të jashtëm të BE-së, sikurse Austria, të jenë më të përfshira në diskutimet për këtë temë.

    “Vetëm kur e kuptojmë që problemi duhet zgjidhur bashkë, atëherë e kemi mundësinë që të shënojmë përparim”, ka thënë ai./REL

  • Zbulohet identiteti i të dyshuarit për sulmin në New Orleans, vazhdojnë hetimet

    Të dhënat paraprake lidhur me sulmin terrorist që shkaktoi vdekjen e 15 vetëve ditën e Vitit të Ri në New Orleans, flasin për një skenar të cilit forcat e rendit dhe zyrtarët e sigurisë i druheshin prej kohësh: Një komplot të paktën i frymëzuar nga grupi terrorist Shteti Islamik.

    I dyshuari është një veteran i ushtrisë amerikane dhe FBI-ja konfirmoi se ai kishte një flamur të ISIS-it në kamionin që përdori për të goditur turmën në Rrugën Bourbon në orët e para të mëngjesit të së mërkurës para se të vritej gjatë një shkëmbimi zjarri me policinë.

    42-vjeçari Shamsud-Din Jabbar ishte shtetas amerikan nga Teksasi dhe ish-rezervist i ushtrisë, i cili kishte shërbyer në Afganistan.

    Të mërkurën (01.01.2025) në mbrëmje presidenti Joe Biden shprehu ngushëllimet për familjet e viktimave dhe tha se i dyshuari kishte bërë disa veprime vetëm disa orë para sulmit që linin të kuptonin ideologjinë e tij. Presidenti Biden tha se organet e zbatimit të ligjit dhe komuniteti i zbulimit po vazhdojnë të kërkojnë për ndonjë lidhje apo bashkëpunëtor tjetër dhe se hetimi vazhdon të jetë aktiv.

    “Ai postoi video në mediat sociale duke treguar se ishte frymëzuar nga ISIS-i, duke shprehur dëshirën për të vrarë. Flamuri i ISIS-it u gjet në automjetin e tij, të cilin e kishte marrë me qira për të kryer këtë sulm. Në automjet janë gjetur edhe eksplozivë të mundshëm dhe aty pranë janë gjetur eksplozivë të tjerë” – tha ai.

    Hetuesit kanë gjetur armë dhe një mjet shpërthyes të improvizuar brenda automjetit. Po ashtu, në lagjen e njohur ku ndodhi shpërthimi, autoritetet kanë gjetur pajisje të tjera shpërthyese në një shtëpi në të cilën kishte rënë zjarr.

    “Ne besojmë se (me zjarrin) ata po përpiqeshin të zhduknin gjurmët. Ne besojmë se ka disa njerëz që janë të përfshirë. Një prej tyre ka vdekur në vendngjarje, por individë të tjerë janë ende të lirë” – tha ajo.

    Për 18-vjeçarin Zion Parsons, ishte hera e parë në New Orleans. Ai tha se skena dukej si zonë lufte.

    “Kishte trupa në gjithë rrugën. Të gjithë bërtisnin. Shihje dikë që po përpiqej të shpëtonte dikë tjetër, shikoje njerëz që qanin, pjesë trupash gjithandej. Ishte e dhimbshme të shihja një nga shoqet e mia të ngushta që u godit” – tha ai.

    Zona turistike e New Orleans vazhdon të jetë nën masa të rrepta sigurie.

    Sulmi në New Orleans është shembulli i fundit kur një automjet përdoret si armë për të kryer vrasje masive dhe sulmi më vdekjeprurës i frymëzuar nga ISIS në territorin e Shteteve të Bashkuara prej vitesh.

    Clara Broekart, një eksperte për grupet terroriste i tha Zërit të Amerikës se në vitin 2024 kishte pasur një rritje të ndjeshme në përpjekjet e frymëzuara nga ISIS globalisht, përfshirë në Shtetet e Bashkuara.

    “Ndonjëherë autori i mundshëm thjesht ishte frymëzuar nga ISIS-i, konsumonte propagandë nga Shteti Islamik dhe synonte të kryente një sulm në mbështetje të Shtetit Islamik. Por kemi parë edhe përpjekje kur persona me bazë në SHBA ishin në kontakt me rekrutuesit e ISIS-it në internet” – thotë ajo.

    Ndërkohë autoritetet po hetojnë një shpërthim tjetër në një makinë Tesla ‘Cybertruck’, në Las Vegas para hotelit Trump, nga i cili gjeti vdekjen personi brenda tij.

    “Organet e zbatimit të ligjit dhe komuniteti i hetimit po e hetojnë ngjarjen, përfshirë për të përcaktuar nëse ka ndonjë lidhje të mundshme me sulmin në New Orleans” – tha presidenti Biden.

    Personi brenda makinës e kishte marrë me qera automjetin nga i njëjti aplikacion që kishte përdorur edhe autori i sulmit në New Orleans./VoA

  • Adoptimi i IA-së: I kujdesshëm, por i pashmangshëm

    Dy vjet pas mbërritjes dramatike të ChatGPT-së, kompanitë janë të entuziazmuara nga mundësitë e inteligjencës artificiale (IA) gjenerative, por po futen në vitin 2025 me hapa të kujdesshëm, në vend se të nguten me transformimin e operacioneve të tyre.

    Tuneli i La Manshit, një prej rrugëve më të ngarkuara të udhëtimit në botë, përbën një shembull të qartë të kufizimeve aktuale dhe të aplikimeve praktike të IA-së.

    Çdo ditë, 400 prej lokomotivave më të mëdha të botës kalojnë nëpër tunelin që lidh Francën dhe Britaninë, duke bartur rreth 11 milionë pasagjerë trenash dhe 2 milionë automjete çdo vit.

    Për GetLink-un, kompaninë që menaxhon trenat me gjatësi prej 800 metrash, kujdesi me aplikimin e IA-së mbetet i rëndësisë parësore.

    “Jemi në një biznes tejet të rregulluar. Nuk bëjmë marifete. Këto janë procedura shumë të rrepta”, shpjegoi Denis Coutrot, shef i departamentit për të dhëna dhe inteligjencë artificiale në GetLink.

    Në vend se të kontrollojë operacionet e trenave, IA-ja e tyre kryesisht merret me detyra më të thjeshta, si kërkimi i rregullave dhe rregulloreve.

    Sektori ligjor, i cili konsiderohej fillimisht si fushë që do të prekej ndjeshëm nga IA-ja, tregon një histori të ngjashme.

    “ChatGPT-ja, sigurisht, është e jashtëzakonshme. Por, është vërtet shumë e vështirë ta aplikosh atë në punët e përditshme në mënyrë domethënëse”, ka thënë James Sutton, themelues dhe shef ekzekutiv i Avantia Law.

    Verifikimi i çdo gjëje

    Përderisa AI-ja shkëlqen në kryerjen e detyrave bazike, si kërkimi në baza të dhënash ligjore dhe në gjenerimin e përmbledhjeve të thjeshta, punët më komplekse kërkojnë mbikëqyrje më të kujdesshme njerëzore.

    Sutton ka shpjeguar se mungesa e konsistencës nga IA-ja mbetet sfidë: “E kërkoj përgatitjen e një kontrate dhe IA-ja e përpilon për mrekulli. E kërkoj një tjetër, dhe del 40 për qind mirë. Kjo mungesë sigurie nënkupton që avokatët ende duhet të verifikojnë gjithçka”.

    Industria e teknologjisë paraqet një lakore më agresive të adoptimit të IA-së.

    Google raporton se 25 për qind të programimeve i kryen përmes IA-së gjenerative.

    Shefi i JetBrains, Kirill Skrygan, parashikon se deri në fund të vitit të ardhshëm, IA-ja do të kryejë rreth 75-80 për qind të detyrave të kodimit.

    “Zhvilluesit po përdorin IA-në si asistentë për të koduar, dhe numrat po rriten çdo ditë”, ka thënë Skrygan në konferencën Web Summit, në Lisbonë.

    “Niveli i ardhshëm do të jenë agjentët kodues, të cilët mund të kryejnë detyra të plota, të cilat zakonisht u caktohen zhvilluesve”.

    Ai ka sugjeruar se, me kohë, këta agjentë mund të zëvendësojnë pothuajse të gjithë prej miliona zhvilluesve të botës.

    Industritë e dizajnit virtual, kryesisht ajo e modës, po shohin ndikimin e madh të gjeneratorëve me inteligjencë artificiale të imazheve, si DALL-E, Midjourney dhe Stable Diffusion.

    Këto mjete tashmë po i transformojnë shprehitë e punës dhe po e shkurtojnë kohën e daljes në treg të koleksioneve të reja.

    Në sektorin e kujdesit shëndetësor, pavarësisht një studimi që ka treguar për potencialin e IA-së – përfshirë një ku ChatGPT-ja ua ka kaluar mjekëve në diagnostikim përmes historisë së pacientëve – doktorët vazhdojnë të hezitojnë në përqafimin e plotë të teknologjisë.

    “Ata nuk e dëgjonin IA-në kur IA-ja iu thoshte atyre gjëra me të cilat ata nuk pajtoheshin”, ka treguar Adam Rodman, i cili ka udhëhequr studimin, në një prononcim për New York Times.

    Brengat e mëdha

    Kompanitë përballen me një kalkulim kompleks ndërmjet novacionit, maturisë dhe gatishmërisë për të shpenzuar.

    “Do të duhet kohë që tregu t’i zgjidhë këto çështje me kostot dhe përfitimet, veçanërisht në një mjedis ku kompanitë tashmë po përballen me hezitim për investime në teknologji”, ka vlerësuar Seth Robinson, zëvendësshef për hulumtime industriale në CompTIA.

    Anant Bhardwaj, shef i Instabase, beson se kufizimet e IA-së janë reale, por të përkohshme.

    “Novacioni i ri, i vërtetë, si fizika e re apo mënyrat e reja të eksplorimit të hapësirës, këto janë ende larg kapaciteteve të IA-së… Nëse njerëzit mendojnë se IA-ja mund ta zgjidhë secilin problem të njeriut, përgjigja sot është ‘Jo’”.

    Përderisa IA-ja shkëlqen në procesimin e mostrave dhe të dhënave ekzistuese, Bhardwaj ka argumentuar se asaj i mungon kurioziteti njerëzor që nevojitet për të eksploruar terrene krejtësisht të reja.

    Megjithatë, ai ka parashikuar se, brenda dekadës së ardhshme, shumica e industrive do të kenë një formë operacionesh të udhëhequra nga IA-ja, me njerëzit në rol dytësor, por që autonomia e plotë e IA-së mbetet shumë e largët.

    Sidoqoftë, ndikimi i IA-së po vjen shpejt dhe me të madhe, dhe vendet e botës duhet të jenë të përgatitura.

    “Puna administrative është prekur ndjeshëm, kjo tashmë po ndodh. Në qendrat e thirrjeve kjo tashmë po ndodh”, ka thënë Susan Athey, profesoreshë në Universitetin e Stanfordit, në një konferencë për statistika në Fondin Monetar Ndërkombëtar.

    Athey, ekonomiste e industrisë teknologjike, ka shprehur shqetësim për rrezikun e fshirjes nga IA-ja të profesioneve si operatorët e qendrave të thirrjeve.

    “Këto janë ato të cilat do t’i vështroja me shumë kujdes. Brengosem shumë për vendet që njihen për bizneset e qendrave të thirrjes”, ka thënë ajo./REL

  • 10 të plagosur si pasojë e të shtënave me armë pranë një klubi privat në Nju Jork

    10 persona mbetën të plagosur si pasojë e të shtënave me armë në Kuins të Nju Jorkut, mbrëmjen e parë të vitit të ri, njoftoi policia e Nju Jorkut të enjten (02.01.2025) në mëngjes.

    Ngjarja ndodhi jashtë një klubi privat të mërkurën (01.01.2025) vonë. Të plagosurit, 6 gra dhe 4 burra, janë jashtë rrezikut për jetën, njoftoi policia.

    Autoritetet thanë se 3 ose 4 burra hapën zjarr ndaj turmës jashtë klubit privat.

    Dëshmitarët shprehën tronditjen e tyre duke përdorur mediat sociale ndërsa shpërndanë fotografi të momentit të mbërritjes në vendngjarje të punonjësve të rendit.

    Policia përjashtoi mundësinë e një sulmi terrorist.

    Ngjarja u regjistrua disa orë pas dy akteve të tjera të dhunës në Shtetet e Bashkuara.

    Në Nju Orlins një kamionçinë mori përpara turmën e njerëzve që po festonin Vitin e Ri duke vrarë 15 persona ndërsa në Las Vegas një person vdiq dhe shtatë të tjerë u plagosën pas shpërthimit të një makine Tesla jashtë hotelit të Presidentit të zgjedhur Donald Trump./VoA

  • Presidenti Biden nderon 20 amerikanë me Medaljen Presidenciale të Qytetarisë

    Presidenti amerikan Joe Biden do t’u japë 20 amerikanëve nderimin e dytë më të lartë civil të vendit në një ceremoni që do të mbahet në Shtëpinë e Bardhë të enjten.

    Në këtë grup përfshihen ligjvënësi Bennie Thompson dhe ish-ligjvënësja republikane Elizabeth Cheney, të cilët drejtuan hetimet e Kongresit për sulmin e 6 janarit të vitit 2021 në Kapitol. Sulmi i 6 janarit u bë nga një turmë e mbështetësve të zotit Donald Trump në përpjekje për të mos lejuar certifikimin e fitores së zotit Biden në zgjedhjet e vitit 2020.

    Presidenti i zgjedhur Trump, që fitoi zgjedhjet e vitit 2024 për një mandat të ri që fillon më 20 janar, ka thënë se zoti Thompson dhe zonja Cheney duhet të burgosen.

    Deklarata e Shtëpisë së Bardhë për të nderuarit e së enjtes thekson se republikania Cheney, “ngriti zërin e saj dhe u bë bashkë me palën kundërshtare në politikë për të mbrojtur vendin tonë dhe idealet mbi të cilat ne qëndrojmë: Lirinë. Dinjitetin dhe Integritetin”.

    E krijuar në vitin 1969, Medalja Presidenciale e Qytetarisë nderon shtetasit amerikanë“që kanë kryer vepra shembullore për vendin e tyre ose bashkëqytetarët e tyre”.

    “Presidenti Biden beson se këta amerikanë kanë të përbashkët integritetin dhe përkushtimin e tyre për t’u shërbyer të tjerëve. Vendi ynë është më i mirë për shkak të përkushtimit dhe sakrificës së tyre”, thuhet në njoftimin e Shtëpisë së Bardhë.

    Në mesin e atyre që do të nderohen janë edhe Mary Bonauto dhe Evan Wolfson, të cilët u angazhuan për legalizimin e së drejtës për martesë mes personave të së njëjtës gjini në Shtetet e Bashkuara.

    Frank Butler është një tjetër fitues i medaljes për përpjekjet e tij për të përmirësuar teknikat e ndihmës së shpejtë për ushtarët e plagosur në fushën e betejës.

    Mitsuye Endo Tsutsumi do të nderohet për padinë e saj të suksesshme ligjore kundër burgosjes së japonezëve amerikanë gjatë Luftës së Dytë Botërore.

    Presidenti Biden do të nderojë edhe zonjën Eleanor Smeal për punën e saj në udhëheqjen e protestave për të drejtat e grave dhe për paga të barabarta për gratë.

    Medalje do t’u jepen edhe ish ligjvënëses Carolyn McCarthy, si dhe një grupi ish-senatorësh: Bill Bradley, Chris Dodd, Nancy Kassebaum dhe Ted Kaufman.

    Në mesin e të nderuarve përfshihen edhe Diane Carlson Evans, themeluese e Fondacionit të Përkujtimit të Grave të Vietnamit, korrespondentin nga zonat e luftës Joseph Galloway, avokatin e të drejtave civile Louis Redding dhe fotografin Bobby Sager.

    Në këtë grup janë edhe gjykatësi Collins Seitz, themeluesi i Universitetit Fulbright të Vietnamit, Thomas Vallely, aktivisti i studimeve mbi kancerin e gjirit, Frances Visco dhe themeluesja e Fakulteti të Artit dhe Dizajnit në Savannah, Paula Wallace.
    Disa informacione për këtë artikull janë marrë nga agjencia e lajmeve ‘Associated Press’/VOA