Ballina

Kategori: Botë

  • Të paktën 30 të vrarë nga sulmet izraelite në Gazë

    Të paktën 30 persona, përfshirë fëmijë, janë vrarë në Gazë nga sulmet izraelite të kryera gjatë natës dhe mëngjesin e 03.01.2025 – thanë zyrtarët spitalorë.

    Stafi i spitalit “Martirët e Al-Aksës” tha se gra dhe fëmijë janë në mesin e të vrarëve në sulmet ajrore që goditën disa vende në Gazën qendrore, përfshirë në Nuseirat, Zavaida, Magazi dhe Deir al Bala. Edhe një ditë më parë kishte pasur viktima nga sulmet, duke bërë që numri i të vrarëve në 24 orë të arrijë në 56.

    Ushtria izraelite nuk ka komentuar sulmet e fundit ajrore. Megjithatë, në një deklaratë të premten tha se gjatë ditës paraprake kishte sulmuar dhjetëra pika kontrolli dhe qendra të komandës të Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në mbarë Gazën, nga ku tha se Hamasi po planifikonte të kryente sulme. Ushtria izraelite tha se ka ndërmarrë masa për të minimizuar dëmet ndaj civilëve – duke përdorur municione precize dhe teknologji të vëzhgimit nga ajri.

    Teksa lufta në Gazë po vazhdon, bisedimet për arritjen e një armëpushimi pritet të rinisin të premten.

    Zyra e kryeministrit izraelit, Benjamin Netanyahu tha se ka autorizuar një delegacion nga Agjencia e inteligjencës, “Mossad”, nga agjencia për siguri të brendshme “Shin Bet”dhe ushtria për të vazhduar negociatat në Katar.

    Bisedimet, që udhëhiqen nga SHBA-ja, vazhdimisht kanë ngecur gjatë 15 muajve luftë, që u nxit pasi Hamasi sulmoi Izraelin më 7 tetor 2023. Hamasi vrau afër 1.200 persona, shumica civilë dhe rrëmbeu afër 250 të tjerë. Afër 100 pengje ende janë brenda Gazës dhe të paktën një e treta e tyre besohet se kanë vdekur.

    Ofensiva hakmarrëse e Izraelit ka lënë të vrarë më shumë se 45.500 palestinezë në Gazë – sipas Ministrisë së Shëndetësisë në këtë territor. Kjo Ministri thotë se mbi gjysma e viktimave janë gra dhe fëmijë./REL

  • Bideni bllokon shitjen e ‘US Steelit’ për rivalin japonez të çelikut

    Presidenti amerikan, Joe Biden ka bllokuar blerjen e ofertuar të prodhuesit të çelikut “US Steel” nga kompania rivale japoneze “Nippon Steel” në vlerë prej 14.9 miliardë dollarësh amerikanë – ka raportuar, më 03.01.2025, transmetuesi britanik BBC.

    Në një komunikatë të Shtëpisë së Bardhë është bërë e ditur se urdhri ekzekutiv ka cituar “dëshmi të besueshme” se firma “mund të ndërmarrë veprime që kërcënojnë të dëmtojnë sigurinë kombëtare të Shteteve të Bashkuara të Amerikës”.

    Bideni ka vendosur të bllokojë ujdinë pavarësisht prej përpjekjeve për ta ndikuar ditëve të fundit prej disa këshilltarëve të tij kryesorë, të cilët raportohet se kishin paralajmëruar se refuzimi i një investimit të tillë nga një korporatë e fuqishme japoneze, si “Nippon Steel” do të mund të dëmtonte marrëdhëniet e Uashingtonit me Tokion.

    BBC-ja ka kontaktuar “Nippon Steelin” dhe “US Steelin” për komentim të këtij lajmi.

    Vendimi i ishte lënë Presidentit amerikan në largim, pasi një panel qeveritar amerikan dështoi të arrinte konsensus në fund të dhjetorit nëse pranimi i ofertës së “Nippon Steelit” mund të kërcënojë sigurinë kombëtare të Uashingtonit.

    Bidenit i ishte kërkuar që të vepronte brenda pesëmbëdhjetë ditësh pas një ngërçi në Komitetin për Investime të Huaja në Shtetet e Bashkuara (CFIUS).

    Ai vazhdimisht e kishte kritikuar ujdinë, duke anuar në krahun e një morie politikanësh amerikanë të cilët e kishin vënë në dyshim këtë tranzicion.

    Ata përfshinin presidentin e zgjedhur amerikan, Donald Trump dhe zëvendëspresidentin e ri, JD Vance.

    Marrëveshja u bë pjesë e debatit të Zgjedhjeve presidenciale amerikane të vitit 2024, kur Pensilvania u kthye në njërin prej shteteve kritike të lëkundura dhe sindikalistët e “United Steelworkers” e kundërshtuan zëshëm Marrëveshjen.

    “Nippon Steel” e kishte përshkruar më parë transaksionin si vendimtar për industrinë goxha të dëmtuar të çelikut në të kaluarën në Pensilvani.

    Kompania japoneze dhe “US Steel” më parë kishin sugjeruar se mund të ndjekin rrugën ligjore kundër Qeverisë, nëse Marrëveshja nuk realizohet.

    Përgatiti: Rexhep Maloku – Kallxo.com

  • Zelenskyy: Zgjedhjet në Ukrainë mund të mbahen këtë vit, nëse hiqet gjendja e luftës

    Presidenti i Ukrainës, Volodymyr Zelenskyy ka thënë se Zgjedhjet parlamentare dhe presidenciale mund të mbahen këtë vit, nëse bisedimet i japin fund “fazës së nxehtë” të luftës me Rusinë – duke e mundësuar heqjen e gjendjes së luftës.

    Duke folur në një intervistë të transmetuar në televizionin ukrainas, më 2 janar, Zelenskyy tha se mbajtja e Zgjedhjeve të shtyra për kohë të gjatë do të varet nga pozita në të cilën do ta gjejë veten Ukraina, pas ndonjë marrëveshjeje për përfundimin e luftës për zmbrapsjen e trupave pushtuese ruse.

    “Sa i përket vitit 2025, nëse ia dalim t’i japim fund fazës së nxehtë të luftës për Ukrainën; nëse e arrijmë këtë së bashku me një ushtri të fuqishme, me një paketë të madhe armatimi dhe me garanci të forta për sigurinë, atëherë ato [Zgjedhjet] do të ndodhin.” – tha Zelenskyy.

    “Pas kësaj, në parim, ne mund ta mendojmë shfuqizimin e gjendjes së luftës në Ukrainë. Sapo kjo të ndodhë, topi do të jetë në fushën e Parlamentit, i cili mund ta caktojë pastaj një datë për Zgjedhje. Mendoj se nuk ka nevojë të presim me vite [për Zgjedhje], kur të hiqet gjendja e luftës.” – shtoi ai.

    Mandati pesëvjeçar i Zelenskyyt përfundoi më 20 maj 2024.

    Zelenskyy, 46-vjeçar, nuk tregoi nëse do të kërkojë ndonjë mandat tjetër si lider i vendit.

    “Nëse bëj më shumë se çfarë mundem, atëherë mbase do ta marrë ketë vendim më me pozitivitet. Sot, ky nuk është synimi im.” – theksoi ai.

    Zgjedhjet presidenciale duhej të mbaheshin në mars apo prill 2024, por ato u shtynë për shkak se vendi është ende në gjendje lufte.

    Sipas Kushtetutës së Ukrainës, Zelenskyy duhet patjetër të vazhdojë t’i kryejë detyrat e Presidentit, derisa të zgjidhet lideri i ri i shtetit.

    Zgjedhjet parlamentare duhej të mbaheshin më 29 tetor 2023, por edhe ato u shtynë për shkak të zbatimit të gjendjes së luftës.

    Ukraina është në gjendje lufte prej se Rusia e nisi pushtimin e saj në shkurt të vitit 2022. Zbatimi i saj është zgjatur për një periudhë prej 90 ditësh, plot 13 herë nga Parlamenti.

    Ligjvënësit duhet ta ndryshojnë Ligjin për ta mundësuar mbajtjen e Zgjedhjeve gjatë gjendjes së luftës.

    Shumë analistë dhe politikanë kanë ngritur shqetësime mbi sigurinë, zhvendosjen e votuesve dhe infrastrukturën si pengesa kryesore për mbajtjen e Zgjedhjeve legjitime në Ukrainë në rrethanat e tanishme.

    Derisa Rusia e ka vënë në pikëpyetje legjitimitetin e Zelenskyyt për shkak të shtyrjes së Zgjedhjeve, Bashkimi Evropian ka deklaruar se nuk ka asnjë dyshim për statusin e tij si lider i Ukrainës, ndërsa Kombet e Bashkuara e kanë mbështetur duke thënë se Zelenskyy “mbetet… personi me të cilin Sekretari i Përgjithshëm komunikon kur ka nevojë të kontaktojë udhëheqësin ukrainas”./REL

  • Meloni refuzon largimin e simboleve fashiste nga logoja e partisë

    Kryeministrja e Italisë, Giorgia Meloni, përjashtoi mundësinë e largimit të simbolit të flakës tringjyrëshe nga logoja e partisë së saj – pavarësisht thirrjeve nga subjekti i saj, që të heqë dorë nga simbolet fashiste.

    “Largimi i flakës… kurrë nuk ka qenë temë.” – tha Meloni gjatë një interviste për gazetën italiane “Corriere della Sera”, më 3 janar.

    Deklaratat e saj vijnë pasi Luca Ciriani, anëtar i partisë së Melonit Vëllezërit e Italisë (Fdl) dhe ministër për raportet me Parlamentin tha se “do të vijë momenti që të shuhet flaka”.

    “Është një gjë simbolike dhe sikurse edhe shumë gjëra të tjera simbolike do t’i vijë dita, edhe nëse nuk heqim dorë nga to krejtësisht.” – kishte deklaruar ai në nëntorin e vitit të kaluar.

    Meloni, kryeministrja e ekstremit të djathtë, ka tentuar që ta distancojë veten nga trashëgimia e partisë së saj nacionaliste, që u themelua më 2012 dhe që ka rrënjët te Lëvizja neofashiste Socialiste italiane.

    Si aktiviste e re, më 1996, ajo kishte deklaruar se besonte se udhëheqësi fashist, Benito Mussolini kishte qenë “politikan i mirë”. Tani ajo pretendon se këto nostalgji për fashizmin “nuk kanë vend” në jetën politike italiane.

    Kundërshtarët e saj – përfshirë disa anëtarë të partisë së saj – vazhdimisht i bëjnë thirrje që të largojë simbolin e flakës nga logoja; simbol që është me tri ngjyrat e flamurit italian e që u inspirua nga partia e Jean-Marie Le Pen në Francë, i cili themeloi Tubimin Kombëtar më 1972.

    Sipas disa analistëve, baza e logos paraqet varrin e Mussolinit në Predapio, që tërheq ende dhjetëra mijëra vizitorë çdo vit.

    Flaka u inkorporua në logon e partisë, më 2014.

    Disa zyrtarë të lartë të Vëllezërve të Italisë nuk e fshehin admirimin e tyre për regjimin fashist, i cili kishte aplikuar “ligje raciste” kundër hebrenjve më 1938.

    Kryetari aktual i Senatit, njëherësh bashkëthemelues i partisë së Melonit, Ignazio La Russa është ish-aktivist i Lëvizjes Socialiste italiane.

    Muajin e kaluar, gazeta ultrakonservatore “Libero Quotidiano”, e cila udhëhiqet nga ish-zëdhënësi i Qeverisë së Melonit, publikoi në ballinë fotografinë e Mussolinit me titullin: “Njeriu i vitit”.

    Në një editorial, kjo gazetë akuzoi të majtën për shfrytëzimin e historisë për përfitime politike.

    Meloni u zgjodh kryeministre në tetor të vitit 2022. Partia e saj vazhdon të jetë partia me mbështetjen më të madhe në vend, edhe pse mbështetja ka rënë për 16 pikë dhe tani gëzon mbështetje prej 42% – sipas një sondazhi të publikuar ditë më parë.

    “Nuk kam asgjë nga e cila mund të turpërohem.” – tha Meloni për “Corriere della Sera”. /REL

     

  • Kryediplomatët e Gjermanisë dhe Francës vizitojnë Damaskun

    Ministrat e Jashtëm të Gjermanisë dhe Francës thanë se duan të krijojnë raporte të reja me Sirinë dhe bënë thirrje për tranzcion paqësor, teksa gjatë vizitës në Damask u takuan me liderin e ri de facto Ahmed al-Sharaa, në emër të Bashkimit Evropian.

    Kryediplomatja gjermane, Annalena Baerbock dhe ministri i Jashtëm francez, Jean-Noel Barrot janë ministrat e parë nga BE-ja që vizitojnë Sirinë, pasi rebelët morën kontrollin e Damaskut më 8 dhjetor dhe detyruan presidentin Bashar al-Assad të ikte për në Rusi pas më shumë se 13 vjetësh luftë civile – duke i dhënë fund sundimit dekadësh të familjes së tij.

    “Vizita ime sot… është mesazh i qartë për sirianët: se është i mundur një fillim i ri politik mes Evropës dhe Sirisë, mes Gjermanisë dhe Sirisë.” – tha Baerbock, para se të largohej nga Damasku.

    Barrot tha se shpreson për “për një Siri sovrane, të qëndrueshme dhe paqësore”. Ai në Damask, po ashtu, vizitoi Ambasadën franceze, e cila është e mbyllur që nga viti 2012.

    Që nga rrëzimi nga pushteti i Assadit, rebelët islamistë të udhëhequr nga Sharaa’s Hayat Tahrir al-Sham (HTS) – grup i shpallur organizatë terroriste nga Shtetet e Bashkuara – kanë kërkuar që të sigurojnë shtetet arabe dhe komunitetin ndërkombëtar se ata do të qeverisin në emër të të gjithë sirianëve.

    Qeveritë perëndimore kanë nisur gradualisht të hapin kanalet e komunikimit me Sharaa dhe HTS dhe po nisin debatin nëse duhet ta largojnë këtë grup nga lista e organizatave terroriste.

    Para vizitës në Siri, Baerbock tha se nga kjo vizitë kishte “pritje të qarta” nga sundimtarët e rinj, të cilët – sipas saj – do të gjykohen për veprimet e tyre.

    Qëllimi për Sirinë është që ky shtet të bëhet sërish një anëtar i respektuar i komunitetit ndërkombëtar – tha kryediplomatja gjermane.

    Ndërkaq, Barrot e cila u takua me patriarkun e Kishës Ortodokse Greke tha se Franca është e përkushtuar për një Siri, ku do të mbroheshin të drejtat e të gjithëve.

    Ai, po ashtu, qëndroi në ndërtesën e mbyllur të Ambasadës në Damask dhe tha se Parisi po punon drejt rivendosjes së pranisë diplomatike./REL.