Ballina

Kategori: Botë

  • Ish-senatori Bob Menendez dënohet me 11 vjet burg

    Ish senatori Bob Menendez u dënua të mërkurën me 11 vjet burg pasi u gjet fajtor se kishte marrë në formë ryshfeti para dhe kallëpe ari dhe kishte vepruar si një agjent në shërbim të qeverisë egjiptiane.

    Dënimi shënon aktin e fundit të rënies për zotin Menendez, i cili u dënua korrikun e kaluar për pasurim nëpërmjet një sërë aktesh korruptive.

    Prokurorët thanë se në këmbim të arit, mijëra dollarëve dhe një makine luksoze, demokrati u përpoq të mbronte bashkëpunëtorët nga hetimet penale, u takua me zyrtarë të inteligjencës egjiptiane dhe ndërmori hapa për ta ndihmuar Egjiptin të kishte qasje tek ndihma ushtarake e Shteteve të Bashkuara prej miliona dollarësh.

    Zoti Menendez, 71 vjeç, ka deklaruar më herët se do ta apelojë vendimin.

    Më herët, të mërkurën, gjykatësi Sidney H. Stein dha dënimin me shtatë vjet burg për Fred Daibes, 67 vjeç, një nga dy biznesmenët e Nju Xhersit, i cili u shpall fajtor se i kishte dhënë ryshfet senatorit Menendez.

    Prokurorët kishin kërkuar për të një dënim me nëntë vjet heqje lirie, ndërsa avokatët e tij thanë se ai duhej të dënohej me më pak se dy vjet burg.

    Po kështu gjykatësi Stein e gjobiti zotin Daibes, një investitor në fushën e pasurive të paluajtshme, me një gjobë prej 1.75 milionë dollarësh.

    Para shpalljes së dënimit, zoti Daibes, me lot në sy, i tha gjykatësit se vendimi i jurisë ishte “në kufijtë e një dënimi me vetëvrasje” duke i bërë thirrje atij të ketë mëshirë, në mënyrë që të kujdesej për djalin e tij 30-vjeçar autik.

    Po kështu gjykatësi shpalli masën e dënimit me tetë vjet heqje lirie për biznesmenin e dytë, Wael Hana, dhe e gjobiti atë me 1.25 milionë dollarë.

    Para vendimit, zoti Hana i tha gjykatësit se ishte i pafajshëm. Ai shtoi se nuk i kishte dhënë kurrë ryshfet senatorit Menendez, apo të kishte kërkuar shërbimet e tij.

    Një biznesmen i tretë u deklarua fajtor dhe dëshmoi kundër zotit Menendez në gjykatë, vitin e kaluar.

    Zoti Menendez dha dorëheqjen nga Senati pas shpalljes fajtor vitin e kaluar.

    Ai humbi shumë nga pushteti i tij që në vjeshtën e vitit 2023, ndërsa u bënë publike akuzat kundër tij dhe u detyrua të jepte dorëheqjen nga pozita e rëndësishme në Senat e kreut të Komisionit për Marrëdhëniet me Jashtë./ VOA

  • 20 të vdekur nga rrëzimi i aeroplanit në Sudanin Jugor

    Një fluturake e vogël që po bartte punëtorë të industrisë së naftës në Sudanin Jugor është rrëzuar të mërkurën, më 29.01.2025, duke lënë të vdekur 20 persona – bën të ditur për Reuters një zyrtar vendas.

    Aeroplani është përplasur në Aeroportin e Kompanisë shtetërore të naftës në mëngjes, derisa po ngrihej drejt kryeqytetit Juba – ka bërë të ditur ministri i Informacionit Gatvech Bipal.

    Bipal ka thënë se pasagjerët ishin punëtorë të Kompanisë GPOC – Konzorcium që përfshin Korporatën Kombëtare Kineze të Naftës dhe Kompaninë shtetërore të Sudanit.

    Ai ka thënë se në mesin e të vdekurve ishin edhe dy shtetas kinezë dhe një indus.

    Bipal nuk ka dhënë më shumë hollësi për rrethanat e përplasjes. Mediat raportuan fillimisht se numri i viktimave ishte 18 sosh, por Bipal ka thënë për Reuters se dy prej të mbijetuarve vdiqën më vonë. Një person ka mbijetuar.

    Shumë rrëzime aeroplanësh kanë ndodhur viteve të fundit në Sudanin Jugor, të zhytur në luftë. Në shtatorin e vitit 2018, së paku 19 persona vdiqën kur u rrëzua një fluturake e vogël, që po bartte pasagjerë nga Juba në Yirol.

    Më 2015 shumë persona vdiqën kur u përplas një aeroplan rus bagazhi me pasagjerë në bord, pas ngritjes nga pista në kryeqytetin Juba.

    Përgatiti: Rexhep Maloku – Kallxo.com

  • Ambasadori i ardhshëm britanik në SHBA: Kritika ime ndaj Trumpit ishte e gabuar

    I përzgjedhuri i Mbretërisë së Bashkuar për Ambasador në Shtetet e Bashkuara, Lord Peter Mandelson i ka përshkruar kritikat e tij të mëhershme për presidentin amerikan Donald Trumpin si të bazuara mbi gjykime të gabuara – raporton më 29.01.2025 televizioni britanik BBC.

    Peter Mandelson ka thënë se tani gëzon “respekt të freskët” për presidentin amerikan – duke shtuar se është “goxha konfident” se Trumpi do ta aprovojë emërimin e tij Ambasador.

    Si pjesë e procesit, kredencialet e Lordit Mandelson duhet t’i dorëzohen Trumpit, për të cilat raportohet se Presidenti do t’i miratojë.

    Në vitet e mëhershme Lordi Mandelson e ka përshkruar Trumpin si “të pamatur” dhe “ngacmues”.

    Në një intervistë dhënë një gazetari italian më 2019, ai e kishte përshkruar Trumpin si “të pamatur dhe rrezik për botën”.

    Kjo pasoi një intervistë të vitit 2018 për “Evening Standard”, ku Trumpin e kishte përshkruar si “ngacmues”.

    Por ai ka deklaruar për Fox News: “I kam thënë ato fjalë gjashtë vjet më parë më 2019, prirë mbase prej një gazetari italian… ishte një kohë kur në Britani meqë ra kishte një politikë të ngarkuar dhe kishte emocione të mëdha për shumë gjëra në Britani atëherë”.

    Ai ka thënë se krahasuar me atëherë ka ndryshuar pikëpamje për Presidentin aktual amerikan.

    Duke e pranuar fitoren “e jashtëzakonshme” të mandatit të dytë të Trumpit, Lordi Mandelson ka thënë se Trump ka fituar “respekt të ri” prej tij dhe ka theksuar se nuk ka dëgjuar asnjë fjalë nga Shtëpia e Bardhë se do të përbëjë telash për emërimin e tij.

    “Mendoj se presidenti Trump do të vlerësojë kredencialet e mia dhe do të shqyrtojë cila do të jetë marrëdhënia më e mirë para nesh.” – ka thënë ai.

    “Presidenti është një person i këndshëm, person i drejtpërdrejtë dhe kjo është arsyeja pse kam besim se kur them se kur do të shikojë kredencialet e mia, ai do të thotë ‘Në rregull, mendoj se ky njeri mund të punojë mirë për të dy vendet tona dhe për marrëdhëniet tonë speciale’”.

    Përgatiti: Rexhep Maloku – Kallxo.com

  • Shkon në 30 numri i të vdekurve në turmën e Festivalit fetar në Indi

    Autoritetet kanë konfirmuar të mërkurën, më 29.01.2025, se të paktën 30 persona kanë vdekur dhe 60 të tjerë janë plagosur në një rrëmujë turme në Festivalin masiv “Kumbh Mela” në Indi – raporton BBC.

    Një prej të mbijetuarve i cili foli me ekipin e BBC-së në terren përshkroi se ishte shtyrë në lumin Gang, ndërsa po merrte pjesë në larje rituale.

    Samira Hussain e BBC-së ka përshkruar skena “kaosi absolut” në bregun e lumit: me rroba, këpucë, batanije dhe çanta shpine të shpërndara e të hedhura përtokë, ndërsa turmat po përpiqeshin të arratiseshin.

    Zyrtarët parashikuan që deri në 100 milionë njerëz pritej të merrnin pjesë në Ditën e Larjes në Festivalin fetar hind.

    Ngjarja ndodhi midis ndërmjet 1 dhe 2 të mëngjesit pranë arenës së asketëve, ku ishin vendosur barrikada për menaxhimin e turmës gjatë zhytjes së tyre të shenjtë – ka theksuar Yogi Adityanath, kryeministër i shtetit Uttar Pradesh, ku mbahet Festivali – raporton Reuters.

    Kryeministri Narendra Modi, në një postim në X, ka shprehur ngushëllime për “adhuruesit që kanë humbur të dashurit e tyre”, por nuk specifikoi numrin e të vdekurve.

    “Administrata lokale është e angazhuar për të ndihmuar viktimat në çdo mënyrë.” – ka theksuar ai.

    Adityanath shtoi se situata ishte nën kontroll, por turma ishte ende masive.

    Videot dhe fotografitë pas rrëmujës treguan trupat që barteshin me barela dhe njerëz të ulur në tokë duke qarë, ndërsa të tjerët kaluan mbi rroba, këpucë, çanta shpine dhe batanije të lëna nga ata që përpiqeshin t’i shpëtonin rrëmujës.

    Një dëshmitar ka theksuar për Reuters se ka parë disa trupa të pajetë, teksa dhjetëra ambulanca po nxitonin drejt bregut të lumit ku ndodhi incidenti.

    Dëshmitarët thanë se kishte një rrëmujë të madhe pranë bashkimit të tre lumenjve të shenjtë – ku zhytja konsiderohet veçanërisht e shenjtë – që bëri që besimtarët të binin mbi njëri-tjetrin.

    Përgatiti: Rexhep Maloku – Kallxo.com

  • Suedia synon të dërgojë të dënuar në Burgje jashtë vendit

    Suedia mund të dërgojë kriminelë për të vuajtur dënimet e tyre në Burgjet jashtë vendit – tha një Komision i emëruar nga Qeveria, më 29.01.2025.

    Ky shtet po përballet me vështirësi në menaxhimin e kapaciteteve në Burgje, për shkak të rritjes së numrit të të burgosurve të rinj – rritje që lidhet me një valë të krimeve të bandave.

    “Ka nevojë të punohet për gjetjen e zgjidhjeve të reja brenda Shërbimit të Burgjeve.” – tha ministri i Drejtësisë, Gunnar Strommer, gjatë një Konference për media.

    Strommer tha se Suedia veçse është në bisedime me shtetet e tjera, për marrjen me qira të Burgjeve të tyre, pa përmendur emrat e shteteve.

    Nga shtetet evropiane, edhe Danimarka – duke dashur të lehtësojë situatën me mbipopullimin e Burgjeve të saj – ka arritur Marrëveshje me Kosovën për të marrë me qira 300 qeli në Burgun në Gjilan. Megjithatë, kjo Marrëveshje 10-vjeçare, nga e cila Kosova do të përfitojë rreth 200 milionë euro, ende nuk ka nisur së zbatuari.

    Ndryshe Suedia po përballet me rritje të krimeve të bandave – krime që janë rritur në dy dekadat e fundit. Ky shtet është në mesin e shteteve me numrin më të lartë për kokë banori të dhunës me armë në Evropë.

    Me miratimin e Ligjeve të reja dhe rritjen e personelit dhe buxhetit, Policia suedeze ka korrur sukses në luftën kundër bandave dhe në dy vjetët e fundit ka pasur më pak të shtëna vdekjeprurëse e më shumë dënime.

    Përderisa ky sukses është mirëpritur, Sistemi i Burgjeve të shtetit është mbingarkuar. Sipas të dhënave të fundit, që i përkasin vitit 2023, Gjykatat suedeze kanë dënuar persona në një total prej pothuajse 200.000 muajsh burgim, që paraqet një rritje prej 25% me vitin paraprak dhe dyfishim krahasuar me dënimet e shqiptuara më 2014.

    Burgjet dhe Qendrat e Paraburgimit në Suedi janë në kapacitete të plota dhe Shërbimi i Burgjeve ka thënë se i duhen rreth 27.000 shtretër të rinj deri më 2033.

    Mattias Wahlstedt, kreu i Komisionit, tha se nuk ka pengesa ligjore që Suedia të marrë me qira qeli jashtë vendit, por propozimi për një gjë të tillë duhet fillimisht të miratohet nga Parlamenti./REL