Ballina

Kategori: Botë

  • Mike Johnson rizgjidhet kryetar i Dhomës së Përfaqësuesve

    Mike Johnson u rizgjodh kryetar i Dhomës së Përfaqësuesve të premten pas një raundi të gjatë votimi që vuri në dukje ndasitë e vazhdueshme mes Partisë Republikane në Kongres.

    Fillimisht ai u duk se nuk arriti të siguronte votat që i duheshin për të mbajtur rolin e udhëheqësit, por dy republikanë, që fillimisht nuk mbështetën atë, ndryshuan qëndrim duke votuar për të, pas më shumë se një orë e gjysmë negociatash. Ai u rizgjodh me 218 vota, minimumi i votave të nevojshme.

    Republikanët e kontrollojnë Dhomën e Përfaqesuesve me një shumicë të ngushtë 219 -215.

    Votimi ishte një provë e hershme mbi aftësinë e Partisë Republikane për të qenë e bashkuar ndërsa synon të çojë përpara agjendën e Presidentit të zgjedhur Donald Trump për shkurtim të taksave dhe forcim të sigurinë kufitare. Procesi po ashtu vuri në provë ndikimin e zotit Trump në Kapitol, ku një grusht republikanësh kishin shfaqur dëshirën për ta sfiduar.

    Republikanët në Dhomën e Përfaqësuesve janë përballur me ndasi të brendshme gajtë dy vjetëve të fundit.

    Zoti Johnson e mori detyrën pasi Partia Republikane e shkarkoi paraardhësin e tij Kevin McCarthy në mes të mandatit të këtij të fundit.

    Dy vjet më parë, zoti McCarthy u zgjodh në krye të Dhomës së Përfaqësuesve pas 15 raundesh votimi.

    Në këtë legjislaturë të re, republikanët do të kenë edhe kontrollin e Senatit, që deri më tani ishte mbajtur nga demokratët.

    Republikanët do të kenë shumicën 53 – 47, shumë më pak se 60 votat që nevojiten për miratimin e pjesës së më të madhe të akteve ligjore.

    Me betimin e zotit Trump në 20 janar, republikanët do kenë kontrollin e të tre degëve të qeverisjes në 2 dhomat e Kongresit dhe në Shtëpinë e Bardhë.

    Tradicionalisht, 100 ditët e para të Presidencës dhe Kongresit të ri paraqesin një periudhë për një agjendë legjislative ambicioze.

    “Presidenti i ri do të përqëndrohet tek tarifat, tek kufiri, urdhërat ekzekutivë të lidhur me emigracionin dhe emigrantët, veçanërisht ata nga Meksika dhe vendet myslimane. Dhe më pas ai do të përpiqet për çdo kompromis të mundshëm për të siguruar miratimin e ligjeve për çështje që lidhen me ekonominë, ushqimet, siç preferon ai t’i cilësojë”, shprehet për Zërin e Amerikës përmes platformës Zoom Casey Burgat, profesore pranë universitetit “George Washington”./VoA

  • Irani e qorton ambasadoren italiane në lidhje me arrestimin e një iraniani të kërkuar nga SHBA-ja

    Ministria e Jashtme e Iranit e ka thirrur në një takim ambasadoren italiane në Teheran të premten, për të protestuar në lidhje me ndalimin e një shtetasi iranian të kërkuar nga Shtetet e Bashkuara për rolin e tij të dyshuar në sulmin vdekjeprurës me dronë kundër forcave amerikane, raporton Reuters.

    Të enjten, Italia veproi ngjashëm duke e thirrur në takim protestues ambasadorin iranian në Romë, në lidhje me arrestimin e gazetares italiane Cecilia Sala, e cila u ndalua në Teheran më 19 dhjetor derisa po punonte me vizë gazetareske.

    Një zyrtar i Ministrisë së Jashtme të Iranit “i bëri thirrje Italisë të mos e përdor politiken amerikane pengmarrëse – e cila është në kundërshtim me ligjin ndërkombëtar, posaçërisht me të drejtat e njeriut – dhe ta lirojë sa më parë [Mohammad] Abedinin dhe ta parandalojë dëmtimin e marrëdhënieve dypalëshe”, raportuan mediat shtetërore në Iran.

    Të enjten, Ambasada iraniane në Romë tha se autoritetet iraniane janë duke ia ofruar Salas të gjithë kujdesin e nevojshëm humanitar, dhe për herë të parë, e lidhën rastin e saj me atë të Abedinit.

    Irani tha të hënën se Sala u arrestua për “shkeljen e ligjeve të Republikës Islamike”, duke mos dhënë hollësi shtesë.

    Sala u arrestua tri ditë pas Abedinit, biznesmenit iranian që u arrestua në aeroportin Malpensa të Milanos në bazë të një fletarrestimi të SHBA-së, pasi dyshohet se i kishte furnizuar me pjesë dronët që Uashingtoni thotë se u përdorën në sulmin e vitit 2023, ku u vranë tre ushtarë amerikanë në Jordani.

    Irani i ka mohuar përfshirjen në sulm.

    Abedini po mbahet në paraburgim dhe gjykata do të vendosë këtë muaj nëse do t’i vendoset në arrest shtëpiak, derisa gjyqtarët ta shqyrtojnë kërkesën e SHBA-së për ekstradim.

    Në vitet e fundit, forcat e sigurisë të Iranit kanë arrestuar dhjetëra të huaj dhe njerëz me shtetësi të dyfishtë, kryesisht për akuza që lidhen me spiunazhin dhe sigurinë. Grupet për të drejtat e njeriut e ka akuzuar Iranin se po përpiqet të nxjerrë koncesione nga shtetet e tjera përmes këtyre arresteve.

    Irani e mohon këtë./REL

  • Ndryshimet në kurrikulën shkollore në Siri nxisin reagime

    Qeveria e re e Sirisë po përballet me reagime pasi bëri të ditur ndryshimet në kurrikulën shkollore, përfshirë futjen e asaj që kritikët thonë se është prirje islamike në mësimdhënie, ka raportuar më 03.01.2025 televizioni amerikan, CNN.

    Ndryshimet, të publikuara në një listë në faqen zyrtare të Ministrisë së Arsimit në Facebook, përfshijnë ndryshimin e frazave “rruga drejt së mirës” në “rrugën islamike”, dhe “ata që janë mallkuar dhe kanë humbur udhën”, duke iu referuar “hebrenjve dhe të krishterëve” – që është një interpretim ultra-konservator i një ajeti të librit të shenjtë islamik, Kuranit.

    Kuptimi i ri i “martirit”

    Modifikimet kanë ridefinuar edhe shprehjen “martir”, prej kuptimit që kishte për dikë që kishte vdekur për atdheun në fjalë për qikdë që ka sakrifikuar veten “për hir të Zotit”.

    Disa kapituj janë hequr krejtësisht, tregon lista, përfshirë një kapitull për “prejardhjet dhe evolucionin e jetës”.

    Ende nuk është e qartë nëse ndryshimet kanë nisur të zbatohen, por do të zbatohen për të gjithë nxënësit nga gjashtë deri në tetëmbëdhjetë vjeç.

    Përderisa heqje e disa ndryshimeve nga regjimi i ish-presidentit Bashar al-Assad, ishin mirëpritur për ata që kanë reaguar online, modifikimet e kapitullit fetar shkaktuan zemërim në mediat sociale.

    Ministria e re ka marrë muajin e kaluar detyrën pasi Assadi u rrëzua nga kryengritësit e prirë prej “Hayat Tahrir Al-Sham” (HTS), një grup që doli prej kryengritësve të lidhur me “Al-Qaedan”. Prijësi i saj, Ahmed al-Sharaa, është munduar javëve të fundit të distanconte HTS-në nga “Al-Qaeda”, duke u zotuar se do të ketë një qeveri të etur për tolerancë dhe gjithëpërfshirje.

    Për dhe kundër ndryshimeve

    Para se të rrëzohej, Assadi kishte prirë Partisë Bathe, parti shekullare nacionaliste që kishte qenë në krye të pushtetit në Siri prej grusht shtetit të vitit 1963.

    Disa përdorues të mediave sociale kanë vënë në dyshim se pse një qeveri e përkohshme po bën ndryshime në kurrikulë, derisa të tjerë kanë hedhur poshtë ato që i kanë quajtur përpjekje për të “shlyer” pjesë të historisë së vendit.

    “Qeveria aktuale është qeveri kudjestare që nuk e ka të drejtën për t’i bërë këto ndryshime në kurrikulë”, ka komentuar një përdorues në faqen e Ministrisë së Arsimit në Facebook. “Kurrikula duhet të ndryshohet në pajtim me kushtetutën e re”.

    Të tjerët kanë kritikuar çfarë e kanë parë si prirje islamike në aspektin gjuhësor.

    Pas reagme të ashpra, Ministria e Arsimit është munduar t’i hidhte poshtë ndryshimet, duke theksuar se :kurrikula në të gjitha shkollat në mbarë Sirinë mbetet e pandryshuar derisa komisionet e specializuara të formohen për t’i rishikuar dhe hartuar”.

    Në një deklaratë të lëshuar në emër të ministrit të Arsimit, Nazir Mohammad al-Qadri, thuhet se Ministria “vetëm ka instruktuar heqjen e përmbajtjes që lavdëronte regjimin e rrëzuar të Assadit dhe ka zëvendësuar imazhet e flamurit të regjimit me ato të flamurit të revolucionit sirian në të gjitha tekstet shkollore”.

    “Pasaktësitë” fetare

    Ministria ka bërë të ditur se vetëm është përpjekur të korrektonte disa “pasaktësi” që ishin të përfshira gjatë regjimit të Assadit në kurrikulën arsimore islamike, “si keqinterpretimi i disa ajeteve kuranore”.

    Ministri i ri i Arsimit kishte thënë më parë se kurrikula arsimore e Sirisë nuk do të ndryshojë përtej heqjes së referencave të ish-Partisë sunduese Bathe.

    Në një intervistë për Reutersin muajin e kaluar, Al-Qadri ka thënë se edhe religjioni islamik, edhe ai katolik, do të vazhdojnë të mësohen si lëndë në shkollë, dhe se shkollat fillore do të mbesin të përziera me djem e vajza. Shkollimi i mesëm do të mbetet kryesisht i ndarë, kishte deklaruar për Reutersin, sikur se ishin në kohën e Assadit.

    Kabineti i prirë prej HTS-së mendohet të jetë qeveri e përkohshme derisa vendi t’i mbajë zgjedhjet, lideri de fakto i së cilës, Al-Sharaa, ka thënë se mund të marrë deri në katër vjet për t’u organizuar.

    Mbetet e paqartë sesi qeveri teknike do ta dorëzojë pushtetin pasi më parë kishte thënë se do të qëndronte në detyrë vetëm deri në marsin e vitit 2025.

     

    Përgatiti: Rexhep Maloku – Kallxo.com

  • Dështojnë bisedimet për koalicionin austriak pas tërheqjes së partnerit liberal

    Bisedimet për formimin e qeverisë së re në Austri kanë dështuar pasi partneri më i vogël i mundshëm, partia liberale Neos, u tërhoq nga negociatat duke i lënë partitë e mbetura me shumicën më të vogël të mundshme, ka raportuar më 03.01.2025 televizioni Euronews.

    Neos, së bashku me Partinë Popullore Austriake (OVP) konservatore të kancelarit Karl Nehammer dhe Socialdemokratët e qendrës së majtë (SPO) po përpiqeshin të krijonin një koalicion qeverisës me tri parti pasi Partia e Lirisë e së djathtës ekstreme fitoi zgjedhjet kombëtare në shtator.

    Udhëheqësja e Neos, Beate Meinl-Reisinger, ka deklaruar se përparimi i negociatave ishte i pamundshëm dhe se nuk kishte dakordësim për “reformat themelore”. Ajo informoi liderët e tjerë të partisë se anëtarët e Neos “nuk do t’i vazhdojnë” bisedimet.

    Bisedimet ishin zvarritur pasi të gjitha partitë e tjera refuzuan të punonin me liderin e Partisë së Lirisë (FPO), Herbert Kickl, me 29.2 për qind të votave, duke detyruar OVP-në dhe SPO-në të përpiqeshin të rekrutonin një parti më të vogël për të fuqizuar shumicën.

    Reisinger, partia e së cilës fitoi 8.1 për qind të votave, ia atribuoi vendimin e partisë mosmarrëveshjeve mbi politikën fiskale. Partia e saj prej kohësh kishte platformë të reformës ekonomike dhe liderja ka deklaruar gjatë një konference shtypi të mbledhur me ngut se disa çështje – si rritja e moshës së pensionit – sollën ngecjen midis partive me pikëpamje të ndryshme ideologjike.

    Sekretari i OVP-së, Christian Stocker, ka fajësuar një  fraksion të caktuar të “forcave të prapambetura” midis socialdemokratëve që nuk kishin arritur të bënin kompromis me idetë e Neos.

    Nuk është e qartë se çfarë mund të ndodhë më pas pasi partia e Nehammerit dhe SPO tani kanë shumicën më të vogël të mundshme të nevojshme në parlament – ​​me 92 vende nga 183.

    Reisinger tregoi se bisedimet midis OVP-së dhe SPO-së do të vazhdojnë, duke thënë se partia e saj është ende e përgatitur për mbështetje në parlament për pikat për të cilat ishin pajtuar.

    Megjithatë, zgjedhjet e reja nuk janë krejtësisht të përjashtuar. FPO-ja e së djathtës ekstreme e mirëpriti menjëherë një mundësi të tillë pasi sondazhet tregojnë se mbështetja për ta është rritur që nga zgjedhjet. Në një sondazh të porositur nga gazeta “Der Standard”, FPO-ja rriti mbështetjen në 35 për qind në dhjetor.

    Sekretari i përgjithshëm i FPO-së, Michael Schnedlitz, i bëri thirrje Nehammerit të pranonte atë që e quajti humbje në zgjedhje dhe paralajmëroi kundër një koalicioni tjetër trepartiak mbi bazën e “modelit gjerman” – duke iu referuar koalicionit grindavec trepartiak në Gjermaninë fqinje që u ra vitin e kaluar pa e çuar deri në fund mandatin.

    FPO-ja dhe lideri i saj i diskutueshëm, Hebert Kickl, zhvilluan një platformë anti-emigracioni dhe gjerësisht euroskeptike, duke premtuar se do të trajtonin imigracionin e paligjshëm dhe normën e lartë të inflacionit në Austri.

    Partitë e tjera refuzuan të punonin me Kicklin, i cili prej kohësh ka nxitur kritika për përdorimin e herëpashershëm të termave të epokës naziste – pasi e kishte quajtur dikur veten “Volkskanzler” – si dhe kundërshtimin e tij ndaj vaksinimeve dhe bllokimeve gjatë pandemisë.

    Partitë opozitare u bashkuan para së gjithash që ta mbanin Kicklin jashtë qeverisë. Kickl, në këmbim, diskutimet e koalicionit, i quajti “të rrëmujëshme”.

    Në vend të zgjedhjeve të reja, dy partitë më të mëdha mund të shtyjnë përpara diskutimet ose të kërkojnë të bëjnë për vete të Gjelbërit si partner të tretë.

    Qeveria në largim e Nehammerit aktualisht përbëhet nga koalicioni ndërmjet  OVP-së dhe të Gjelbërve – dy parti ideologjikisht të dallueshme që shpesh nuk pajtohen.

     

    Përgatiti: Rexhep Maloku – Kallxo.com

  • Kryeministri i Moldavisë paralajmëron krizë sigurie, denoncon ndaljen e gazit rus

    Moldavia po përballet me krizë sigurie pasi dhjetëra mija banorë në enklavën separatiste të Transnistrisë u është ndërprerë qarkullimi i gazit rus, ka paralajmëruar të premten (03.01.2025) Dorin Recean, raporton Reuters.

    Qarkullimi i gazit rus nëpërmjet Ukrainës, që furnizonte Europën Qendrore dhe Lindore, është ndërprerë në fund të vitit 2024, pasi Kievi refuzoi të vazhdonte bashkëpunimin e mëtejshëm biznesor me Moskën.

    Recean ka thënë se Moldavia do të mbulonte nevojat e veta të energjisë me prodhimin e brendshëm dhe me importe, por ka theksuar se rajoni separatist i Transnistrisë e ka pësuar më së rëndi pavarësisht raporteve të saj me Moskën.

    “Duke rrezikuar të ardhmen e protektoratit, ka mbështetur për tri dekada në një përpjekje për të destabilizuar Moldavinë, Rusia po e shpalos rezultatin e pashmangshëm për të gjithë aleatët e vet – tradhtinë dhe izolimin”- thuhet në një deklaratë të shkruar.

    “Ne e trajtojmë këtë si krizë sigurie që synon të mundësojë rikthimin e forcave pro-ruse në pushtet në Moldavi dhe për ta kthyer në armë territorin tonë kundër Ukrainës, me të cilin ndajmë kufi prej 1200 kilometrash”.

    Shteti i Europës Juglindore prej 2.5 milionë banorësh ka qenë në qendër të vëmendjes prej pushtimit rus të Ukrainës fqinje në një kohë tensionesh në ngritje ndërmjet Moskës dhe Perëndimit.

    Presidentja e saj pro-europiane, Maia Sandu, fitoi mandatin e dytë në zgjedhjet e vjetme dhe është zotuar se do ta zgjerojë reformën dhe se do ta konsolidojë demokratizimin. Moldavia planifikon të mbajë zgjedhje parlamentare në verë.

    Rajoni kryesisht rusishtfolës i Transnistrisë, i cili është ndarë nga Moldavia në vitet e nëntëdhjeta, merrte gazin rus nëpërmjet Ukrainës.

    Në këmbim, Moldavia përdori një hise të energjisë së saj elektrike nga Transnistria, por me Kievin që e bëri të qartë se do të hiqte dorë prej lejimit të territorit të tij për gazin rus, Çisinau u përgatit për ujdi alternative, me përzierje të prodhimit të brendshëm dhe importeve elektrike nga Rumania, ka bërë të ditur Recean.

    Ai ka thënë se Qeveria rumune mbetet e përkushtuar për ta ndihmuar enklavën. “Zgjidhjet alternative të energjisë, si sistemet e biomasës, gjeneratorët, ndihma humanitare dhe furnizimet mjekësore kritike janë të gatshëm për të ofruar ndihmë që ta pranojë lidershipi separatist”- thuhet në deklaratën qeveritare.

    Lideri pro-rus i Transnistrisë, Vadim Krasnoselsky, ka thënë se rajoni ka rezerva gazi që mund të përfundojnë brenda dhjetë ditësh në pjesët veriore, dhe se sasia e rezervave është dyfish më e madhe se në jug.

     

    Përgatiti: Rexhep Maloku – Kallxo.com