Ballina

Kategori: Botë

  • AfD-ja, me votimin e mocionit ndaj azilit, dridh Parlamentin gjerman

    Parlamenti gjerman është përfshirë në fjalosje dhe akuza fajësie, pasi u shkërmoq “muri i zjarrtë” që ishte ngritur kundër bashkëpunimit me partinë e së djathtës ekstreme – raporton transmetuesi britanik BBC.

    Një mocion jodetyrues që bën thirrje për rregulla më të serta të kontrollit kufitar dhe të azilit kaloi me mbështetje të partisë së djathtë ekstreme, Alternativa për Gjermaninë (AfD). Gjatë seancës së zjarrtë, politikanë të partive të ndryshme patën kritika dhe fajësuan njëra-tjetrën.

    Lideri i konservatorëve të CDU-së, Fiedrich Merz, i cili shtroi planet, i ka mbrojtur si “të domosdoshme”. Por, kancelari socialdemokrat, Olaf Scholz, e qortoi lëvizjen si “gabim të pafalshëm”.

    Merzi planifikon të propozojë sot legjislacion – përsëri me mbështetje të AfD-së – me synim të frenimit të numrit të emigrantëve dhe të drejtave të bashkimit familjar.

    Por, masat e tij të propozuara zor se do të futen në fuqi para Zgjedhjeve të parakohshme të shkurtit – dhe nëse po – atëherë do të binin ndesh me legjislacionin e Bashkimit Europian.

    Duke iu referuar mbështetjes së AfD-së për mocionin, lideri i CDU-së ka deklaruar në Bundestag se një politikë nuk është e gabuar vetëm pse “e mbështesin njerëzit e gabuar”.

    “Sa fëmijë janë bërë viktima të akteve të tilla të dhunës para se ju të besoni se ka një kërcënim për sigurinë dhe rendin publik?” – ka pyetur ai.

    Lideri i CDU-së, i cili llogaritet se do të jetë Kancelari i ardhshëm i Gjermanisë, pasi partia e tij prin në anketime, ka ngulmuar gjithashtu se as nuk e ka kërkuar e as nuk e dëshiron përkrahjen e AfD-së.

    “Të mendosh se si fraksioni i AfD-së do të gëzohet dhe fytyrat e tyre do të lumturohen, më bën të ndihem në siklet.” – ka deklaruar ai para deputetëve.

    Kancelari Scholz – një socialdemokrat koalicioni i të cilit ra vjet – i ka qortuar ashpër veprimet e Merzit.

    “Që nga themelimi i Republikës Federale të Gjermanisë mbi 75 vjet më parë ka pasur gjithmonë konsensus të qartë midis të gjithë demokratëve në Parlamentet tona: ne nuk bëjmë kauzë të përbashkët me të djathtën ekstreme.”

    Debati tashmë i tensionuar i Gjermanisë mbi emigracionin është ndezur pas një serie sulmesh fatale, ku të dyshuarit ishin azilkërkues, së fundmi në qytetin Aschaffenburg.

    Është kthyer në çështjen qendrore në fushatën për Zgjedhjet – shkaktuar nga prishja e koalicionit qeverisës të Scholzit.

    Mocioni i CDU-së i së mërkurës, i mbështetur nga AfD-ja dhe FDP-ja liberale, bën thirrje për “ndalim” të kujtdo që tenton të hyjë në Gjermani pa dokumentet e duhura, por nuk mund të detyrojë Qeverinë aktuale të pakicës të veprojë.

    Është e vështirë të mbivlerësohet rëndësia e murit të zjarrit kundër së djathtës ekstreme në kulturën politike gjermane. Përkujtimi i Holokaustit luan një rol themelor në Gjermaninë moderne.

    Para votimit të së mërkurës, Bundestagu mbajti përkujtimin e tij vjetor për viktimat e nazistëve, ku 88-vjeçari i mbijetuar i Holokaustit, Roman Schwarzmann iu drejtua Parlamentit.

    Përgatiti: Rexhep Maloku – Kallxo.com

  • Përpjekjet e presidentit Trump për të hequr të drejtën e shtetësisë përmes lindjes

    Urdhri Ekzekutiv i presidentit Donald Trump për t’i dhënë fund të drejtës së shtetësisë përmes lindjes në Shtetet e Bashkuara ka shkaktuar një debat ligjor dhe politik rreth kompetencave të pushtetit ekzekutiv dhe Amendamentit të 14 të Kushtetutës amerikane, i cili garanton shtetësinë për këdo që lind në tokën amerikane. Ky rregull ka qenë shumë i rëndësishëm për të drejtat civile, që nga ratifikimi i tij në vitin 1868.

    Kushtetuta e Shteteve të Bashkuara, e hartuar në fund të shekullit të 18-të, ia la Kongresit pjesën më të madhe të vendimmarrjes për çështjen e imigracionit dhe shtetësisë.

    Por, presidenti Donald Trump ka nënshkruar një Urdhër Ekzekutiv që i jep fund të drejtës automatike të shtetësisë për ata që lindin në Shtetet e Bashkuara.

    “Ne jemi i vetmi vend në botë që ofrojmë këtë të drejtë në lindje. Kjo është absolutisht qesharake. Ne mendojmë se kemi baza shumë të mira dhe disa njerëz kanë dashur ta bëjnë këtë për dekada.” – tha ai.

    Kritikët e Urdhrit Ekzekutiv të presidentit Trump thonë se Amendamenti i 14 është një gurthemel i të drejtave civile dhe nuk mund të ndryshohet nga një President i Shteteve të Bashkuara.

    “Fillimisht, synimi i Amendamentit ishte që skllevërit afrikano-amerikanë të merrnin shtetësinë dhe më pas kjo e drejtë u çimentua me një Vendim të Gjykatës së Lartë. Amendamentet e Kushtetutës dhe të drejtat kushtetuese nuk mund të hiqen nga një President. Ato mund të hiqen vetëm nga Kongresi dhe për këtë arsye Urdhri Ekzekutiv është i paligjshëm.” – thotë Tuyet Duong nga Forumi Kombëtar i Grave Amerikane të Azi-Paqësorit.

    Megjithatë, mbështetësit e Urdhrit Ekzekutiv argumentojnë se është e nevojshme të rivendoset drejtësia në Sistemin e imigracionit.

    “Presidenti Trump e ka bërë të qartë se rivendosja e drejtësisë në sistemin tonë të imigracionit dhe mbrojtja e qëllimit të vërtetë të Amendamentit të 14 janë thelbësore për vizionin e tij, për ta bërë Amerikën sërish madhështore. Urdhri i tij Ekzekutiv historik për t’i dhënë fund të drejtës së shtetësisë përmes lindjes, përbën një hap kritik përpara.” – thotë ligjvënësi republikan nga Teksasi, Brian Babin.

    Urdhri Ekzekutiv përballet me sfida të mëdha ligjore – përfshirë shumë padi për bllokimin e tij. Prokurorët e përgjithshëm demokratë nga 22 shtete kanë ngritur një padi – duke argumentuar se Urdhri shkel Amendamentin e 14 të Kushtetutës amerikane.

    “Gjykata e Lartë e rikonfirmoi atë në një rast që përfshinte një grup të madh emigrantësh kinezë – duke pohuar se Amendamenti i 14 vlente edhe për këta njerëz dhe ata më pas ishin në gjendje të merrnin shtetësinë.” – thotë Tuyet Duong nga Forumi Kombëtar i Grave Amerikane të Azi-Paqësorit.

    Një gjykatës federal në Siatëll e ka bllokuar përkohësisht zbatimin e Urdhrit të Presidentit Trump për shtetësinë përmes lindjes. Nëse çështja arrin në Gjykatën e Lartë, Vendimi i saj mund të krijojë bazën ligjore në vend për çështjen e shtetësisë. Nëse Urdhri lejohet të hyjë në fuqi, të sapolindurit dhe ata që nuk kanë marrë çertifikatat e lindjes dhe numrat e sigurimeve shoqërore do të ndikoheshin menjëherë nga zbatimi i tij./ VOA

  • Osaka e ndalon duhanin edhe në hapësira publike

    Njëra prej qyteteve më të mëdha të Japonisë po e “zbukuron” veten para mbajtjes së Panairit Botëror: jo vetëm duke mbjellë lule, por edhe duke ndaluar duhanin – raporton të mërkurën, më 29.01.2025, televizioni amerikan CNN.

    Osaka do të jetë së shpejti nikoqire e Expo 2025, që zgjat prej prillit deri në tetor, me përfaqësues të 158 shteteve dhe rajoneve, të cilët do të marrin pjesë në diskutime, demonstrime dhe ekspozita.

    Ndalimi i duhanit në hapësira publike, që ka nisur të zbatohet prej 27 janarit, përfshin rrugët, parqet, sheshet dhe hapësirat e tjera publike dhe vlen jo vetëm për cigaret, por edhe për vepat. Ata që nuk e respektojnë ndalesën, do të gjobiten me rreth gjashtë dollarë.

    Qyteti i Osakës do të zgjerojë hapësirat e veta të ndalimit të duhanit në mbarë qytetin, për të rritur sigurinë, pastërtinë dhe imazhin e tij si destinacion ndërkombëtar turizmi – kanë vlerësuar zyrtarët e qytetit në një deklaratë të shkruar në fillim të muajit. “Kjo nismë synon jo vetëm që të zbukurojë qytetin, por edhe të ofrojë siguri dhe mjedis të rehatshme jetese për banorët dhe vizitorët”.

    Ligjet kombëtare në fuqi ndalojnë pirjen e duhanit në hapësira, si restorantet, zyrat dhe transporti publik dhe disa qytete kanë ndalesa për hapësira publike. Me Ligj ndalohet duhani edhe për njerëzit nën 20 vjeç, të cilëve nuk lejohet as t’u shiten cigaret.

    Megjithatë, në mbarë Japoninë është e zakonshme që në Aeroporte, Stacione trenash dhe ndërtesa të tjera publike të ketë dhoma të veçanta për duhan.

    Organizata Botërore e Shëndetësisë (OBSH) llogarit se numri i japonezëve të cilët tymosin duhan dhe cigare të llojeve të ndryshme pothuajse është përgjysmuar, në dy dekadat e fundit – duke rënë prej 32% në vitin 2000 në 16% më 2022.

    Një anketim i kryer prej Ministrisë japoneze të Shëndetësisë ka treguar se 14.8% e të rriturve tymosin. Qeveria vendase synon që kjo shifër të bjerë në 12% në shkallë vendi.

    Krahasuar me atë në Shtetet e Bashkuara të Amerikës, ku më 2022, 19.8% – ose një në 5 persona – e amerikanëve të rritur konsumonin produkte duhani – ka bërë të ditur Qendra për Kontroll dhe Parandalim të Sëmundjeve.

     

    Përgatiti: Rexhep Maloku – Kallxo.com

  • Përplasen një aeroplan dhe një helikopter në SHBA, dyshohet për dhjetëra të vdekur

    Një aeroplan i “American Airlines” është ndeshur me një helikopter ushtarak në fluturim në Uashington DC, me aksidentin ajror që ka shkaktuar rënien e dy fluturakeve në Lumin Potomac, ka raportuar të enjten (më 30.01.2025) transmetuesi britanik, BBC.

    Aeroplani kishte 60 pasagjerë në bord dhe katër anëtarë ekuipazhi, derisa tre ushtarë të Ushtrisë amerikane ndodheshin në helikopter.

    Rreth treqind pjesëtarë të ekipeve të shpëtimit kanë dalë në vendin e ngjarjes, duke përfshirë edhe zhytës të njësiteve të policisë dhe varka për kërkimin e të mbijetuarve në kushte të ftohta dhe me erëra.

    Përplasja ka ndodhur afër pistës 33 në Aeroportin Kombëtar të Uashingtonit, “Reagan”, rreth orës 9 të mbrëmjes, sipas kohës lokale, ka njoftuar Administrata Federale e Aviacionit në një deklaratë të shkruar për CBS News.

    Presidenti amerikan, Donald Trump, ka thënë se është njoftuar për “aksidentin e tmerrshëm” dhe ka falënderuar ekipet e reagimit emergjent për “punën e jashtëzakonshme”.

    CBS News ka raportuar duke cituar një zyrtar policie se deri tani janë nxjerrë trupat e 18 pasagjerëve.

    Të afërmit e pasagjerëve janë mbledhur në aeroport. Ata kanë thënë për Reutersin se nuk kanë informacione nga zyrtarët për incidentin. Ata kanë thënë se më shumë kanë dëgjuar informacione prej mediave.

    Një grua i ka thënë një zyrtari aeroporti se nuk ishte e sigurt nëse një e afërm e saj kishte hipur në aeroplan. Ajo pastaj është shkrehur në vaj.

    Hammad Raza ka deklaruar për partnerin informativ të CBS, WUSA se kishte dalë në aeroport për ta pritur gruan.

    “Ajo më shkroi se brenda 20 minutash do të aterronte”, ka thënë ai. “Pjesa tjetër e mesazhit tim nuk i shkoi. Atëherë e mora vesh se diçka nuk ishte në rregull. Tani po shpresoj se dikush do ta nxjerr nga lumi”.

    Ushtria amerikane ka njoftuar në një deklaratë se “mund të konfirmojë se fluturakja e përfshirë në incidentin e mbrëmjes ishte një helikopter ushtrie UH-60 i ngritur nga Fort Belvoir, Virxhinia”.

     

    Përgatiti: Rexhep Maloku – Kallxo.com

  • Ahmed Al-Sharaa bëhet president i përkohshëm i Sirisë

    Udhëheqësi i rebelëve të Sirisë që rrëzuan presidentin Bashar Al-Assad muajin e kaluar u emërua president i përkohshëm i vendit të mërkurën.

    Ahmad Al-Sharaa, një rebel dikur i lidhur me Al-Qaidan është kreu i grupit, Hayat Tahrir al-Sham (HTS) i shpallur terrorist nga Shtetet e Bashkuara.

    Emërimi i tij erdhi pasi ish-kryengritësit anuluan Kushtetutën ekzistuese, duke thënë se një e re do të hartohej së shpejti.

    Njoftimi u bë nga zëdhënësi për sektorin e ri të operacioneve ushtarake të qeverisë de fakto të Sirisë, kolonel Hassan Abdul Ghani, raportoi agjencia shtetërore e lajmeve SANA.

    Al-Sharaa pritej të shfaqej në një fjalim televiziv pas takimit, por nuk e bëri këtë menjëherë dhe mbeti e paqartë nëse do ta bënte.

    Mekanizmi i saktë sipas të cilit ai u zgjodh president të përkohshëm nuk ishte gjithashtu i qartë.

    Al-Sharaa, i njohur më parë si Abu Mohammed Al-Jolani udhëhoqi ofensivën e rrufeshme që rrëzoi Asadin në fillim të dhjetorit.

    Dikur grupi ishte i lidhur me Al-Qaidan, por që atëherë është distancuar dhe në vitet e fundit, Al-Sharaa është përpjekur të paraqitet si një kampion i pluralizmit dhe tolerancës dhe ka premtuar të mbrojë të drejtat e grave dhe pakicave fetare.

    Shtetet e Bashkuara kishin vendosur më parë një shpërblim prej 10 milionë dollarësh për kapjen e Al-Sharaas, por e anuluan atë muajin e kaluar pasi një delegacion amerikan vizitoi Damaskun dhe u takua me të.

    Diplomatja e lartë amerikane për Lindjen e Mesme, Barbara Leaf tha pas takimit se Al-Sharaa u konsiderua si “pragmatik”.

    Nuk pati asnjë reagim të menjëhershëm nga bota arabe apo më gjerë për emërimin e Al-Shaaras, gjë që pritej.

    Vendet perëndimore, megjithëse kanë lëvizur për të rivendosur lidhjet me Damaskun pas përmbysjes së Assadit, janë ende disi të kujdesshëm ndaj sundimtarëve të rinj islamikë të Sirisë.

    Abdul Ghani, zëdhënësi, njoftoi gjithashtu të mërkurën anulimin e kushtetutës së vendit – të miratuar në vitin 2012, nën sundimin e Asadit – dhe tha se Al-Sharaa do të autorizohej të formonte një këshill të përkohshëm legjislativ derisa të hartohet një Kushtetutë e re.

    Të gjitha fraksionet e armatosura në vend do të shpërbëhen, tha Abdul Ghani, dhe do të absorbohen në institucionet shtetërore.

    Që nga rënia e Assadit, HTS është bërë partia de fakto në pushtet dhe ka krijuar një qeveri të përkohshme të përbërë kryesisht nga zyrtarë të qeverisë lokale që ajo drejtonte më parë në provincën Idlib të kontrolluar nga rebelët.

    Autoritetet e përkohshme kanë premtuar se do të nisin një proces gjithëpërfshirës për të krijuar një qeveri dhe kushtetutë të re, duke përfshirë thirrjen e një konference të dialogut kombëtar dhe ftimin e komuniteteve të ndryshme të Sirisë, megjithëse nuk është caktuar një datë.

    Derisa ish-ushtria siriane u shemb me rënien e Asadit, Al-Sharaa ka bërë thirrje për krijimin e një ushtrie të re të unifikuar kombëtare dhe forcave të sigurisë, por pyetje janë ngritur mbi mënyrën se si administrata e përkohshme mund të bashkojë një grup të ish-grupeve rebele, secili me grupet e veta. liderët dhe ideologjinë.

    Në takimin vjetor të Forumit Ekonomik Botëror në Davos këtë muaj, Asaad al-Shibani, ministri i Jashtëm i Sirisë dhe zyrtari i HTS, tha se vendi ka nevojë për anëtarët e komunitetit ndërkombëtar ndërsa fillon rindërtimin pas 14 vjetësh lufte brutale civile./ REL