Ballina

Kategori: Botë

  • Izraeli kryen sulme hakmarrëse ndaj rebelëve Huthi

    Avionët luftarakë izraelitë kanë shënjestruar rebelët Huthi në Jemen më 10 janar, përfshirë një stacion të energjisë dhe portet detare, në përgjigje të sulmeve me dronë dhe raketa të kryera nga rebelët.

    Izraeli po ashtu ka paralajmëruar se do të shënjestrojë udhëheqësit e grupit.

    Që kur ka nisur lufta në Gazë në tetor të vitit 2023, rebelët Huthi, që mbështeten nga Irani, kanë gjuajtur dhjetëra raketa dhe dronë drejt Izraelit, për, siç kanë thënë, t’u solidarizuar me palestinezët në Rripin e Gazës.

    Sulmet ajrore izraelite vijnë pasi ushtria e Izraelit rrëzoi dy dronë që besohet se ishin lëshuar nga Jemeni një ditë më parë.

    Ushtria izraelite tha se ka shënjestruar caqe ushtarake të rebelëve Huthi në zonën bregdetare dhe në pjesë të tjetra të Jemenit.

    Sulmet, sipas Izraelit, ishin kundërpërgjigje ndaj sulmeve të rebelëve kundër këtij shteti.

    Izraeli tha se në këtë sulm morën pjesë mbi 20 avionë luftarakë.

    Më pas, kryeministri izraelit, Benjamin Netanyahu, tha përmes një deklarate se rebelët jemenas u ndëshkuan për sulmet e tyre të vazhdueshme ndaj shtetit të tij.

    “Siç kemi premtuar, rebelët Huthi po paguajnë dhe ata do të vazhdojnë të paguajnë çmim të lartë për agresionin kundër nesh”, tha ai, duke u zotuar se nuk do të tolerojë sulme ndaj Izraelit.

    Pavarësisht dëmeve minimale, për shkak se sistemet izraelite të mbrojtjes kanë rrëzuar shumicën e raketave dhe dronëve të rebelëve, rebelët jemenas kanë penguar në mënyrë të ndjeshme jetën e civilëve në Izrael.

    Ndërkaq, rebelët Huthi thanë se në 48 orët e fundit kanë shënjestruar Jafan, emrin që ata përdorin për t’iu referuar qytetit Tel Aviv të Izraelit.

    Që nga 7 tetori 2023, Izraeli lufton në Gazë kundër Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – grup që ka dënuar sulmet e fundit izraelite në Jemen.

    Rebelët Huthi që nga nisja e luftës në Gazë po ashtu kanë shënjestruar anijet në Detin e Kuq dhe Gjirin e Adenit, duke nxitur sulme hakmarrëse nga Shtetet e Bashkuara dhe Britania./REL

  • Trumpi i shpëton burgut dhe gjobës

    Presidenti i zgjedhur amerikan, Donald Trump, është dënuar, por nuk do të vuajë në burg për çështjen e pagesave. Madje nuk do të ketë as gjobë për të, ka raportuar televizioni britanik BBC.

    Ai, derisa po qëndronte afër avokatit tij, është lidhur me gjykatën njujorkeze nëpërmjet një videolidhjeje, ka raportuar gazetari i BBC-së nga objekti i gjykatës.

    Prokuroria kishte nuk kishte kërkuar dënim me burgim, lirim me kusht ose gjobë si dënim – saktësisht që ka vendosur edhe gjykatësi në verdiktin e tij.

    Trumpi ka thënë se kjo ka qenë “një përvojë e tmerrshme” dhe se ai është “krejtësisht i pafajshëm”, derisa pala mbrojtëse ka thënë se asnjëherë nuk është dashur të ngriheshin akuzat.

    Gjyqtari Merchen e ka quajtur rastin si “të jashtëzakonshëm” dhe paradoks me shumë vëmendje, por me procedura të rregullta gjyqësore.

    Në majin e kaluar, Trumpi u dënua për 34 pika të akuzës lidhur me çështjen e pagesave që ia kishte bërë aktores së njohur të filmave për të rritur, Stormy Daniels, dhe se si pagesat ishin riimbursuar më vonë.

    Përgatiti: Rexhep Maloku / Kallxo.com

  • Smogu shkakton kaos në trafikun e Delhit

    Mjegulla e dendur dhe cilësia e përkeqësuar e ajrit kanë shkaktuar kaos në kryeqytetin e Indisë, Delhi.

    Dukshmëria në shumë rajone është raportuar të jetë zero në orët e para të së premtes, më 10.01.2025, duke shkaktuar ndryshim të orareve të fluturimeve, trenave dhe trafikut rrugor – raporton BBC.

    Më shumë se 150 fluturime janë shtyrë dhe shumë trena janë nisur me vonesa të mëdha, për shkak të kushteve të liga të motit – raportojnë mediat vendase.

    Ky është një problem që përsëritet çdo dimër herë pas here në Indinë veriore, ku temperaturat e ulëta ndërmjet dhjetorit dhe janarit, u bëjnë presion ndotësve që të mbesin afër sipërfaqes tokësore – duke ndikuar dukshmërinë, duke vështirësuar udhëtimin dhe duke bërë më të rrezikshëm ajrin.

    Indeksi i cilësisë së ajrit në Delhi ishte mbi 400 në disa rajone – ka bërë të ditur uebfaqja shtetërore “Safar”. Kjo është 25-fish më shumë se kufiri i përcaktuar i sigurisë, i përcaktuar prej Organizatës Botërore të Shëndetësisë (OBSH).

    Autoritetet në Kryeqytet kanë thënë se kanë marrë masa për kontrollin e ndotjes, që përfshijnë ndalimin e aktiviteteve të shkatërrimit e ndërtimit, si dhe që mësimi në shkolla të mbahet online.

    Xhirimet e fotografitë nga Delhi dhe qytetet përreth kanë treguar se një batanije mjegulle ka mbuluar rrugët dhe ndërtesat.

    Aeroporti i Delit ka lëshuar një vërejtje këshilluese për pasagjerët për ndryshime itineraresh, për shkak të dukshmërisë së ulët.

    “Ndërsa uljet dhe ngritjet vazhdojnë në Aeroportin e Delhit, fluturimet që nuk janë në përputhje me standardet CAT III mund të preken.” – thuhet në paralajmërim. CAT III është një sistem i cili lejon aeroplanët të ulen gjatë kushteve të shikueshmërisë së dobët.

    Sipas faqes së internetit të gjurmimit të fluturimeve “flightradar24” ngritjet në Aeroportin e Delhit janë vonuar me më shumë se 30 minuta dhe mbërritjet deri  në 20 minuta.

    Disa pasagjerë u ankuan në rrjetet sociale për kaos në Aeroport.

    Ndërkohë, 26 trena për në qytet po vonohen për shkak të mjegullës – kanë njoftuar Hekurudhat e Indisë.

    Departamenti i Motit i Indisë ka parashikuar reshje të pakta gjatë fundjavës, të cilat pritet të përmirësojnë kushtet e dukshmërisë.

    Përgatiti: Rexhep Maloku – Kallxo.com

  • Së paku 10 të vdekur nga zjarret në Los Anxhelos

    Zjarret e egra në Los Anxhelos kanë lënë të vdekur së paku dhjetë persona, derisa meteorologët kanë paralajmëruar erëra të tjera më të fuqishme që do t’u fryjnë flakëve të zjarreve – ka raportuar të premten, më 10.01.2025, transmetuesi britanik BBC.

    Sherifi i kontesë së Los Anxhelosit, Robert Luna ka thënë se ende nuk është e sigurt që të shkohet në zonat më të goditura nga zjarret dhe se numri i viktimave “absolutisht do të ndryshojë”.

    Autoritetet kanë bërë të ditur se janë angazhuar punëtorë, për të shkatërruar rrugët, që të ndalet qarkullimi i gazit që po u jep hov flakëve.

    Njëherësh, një burrë është arrestuar me dyshimin se ia kishte vënë flakën vatrës së zjarreve në Kenneth, që shpërtheu të enjten në kufi të Los Anxhelosit dhe Venturës.

    Megjithatë, shefja e Brigadave të zjarrfikësve ka thënë për BBC-në se nuk ka asnjë dëshmi që sugjeron se zjarret e egra në Los Anxhelos të jenë ndezur qëllimshëm.

    Më shumë se 100 mijë persona janë urdhëruar të enjten që të evakuohen, derisa erërat e thata dhe të fuqishme kanë vështirësuar operacionet e zjarrfikësve dhe kanë përhapur edhe më shumë flakët e egra, që kanë djegur mijëra hektarë prejse zjarret shpërthyen të martën.

    Ndërkohë zjarret në zonën e famshme të Hollywoodit kanë djegur 20 hektarë toke të mërkurën, kanë njoftuar Brigadat e zjarrfikësve të shtetit të Kalifornisë. Ekipe helikopterësh dhe kamionësh me personel duket se kanë nisur të shënojnë përparim në luftën e tyre me këto vatra zjarresh.

     

    Përgatiti: Rexhep Maloku – Kallxo.com

  • Protesta të dhunshme në Kinë pas vdekjes së dyshimtë të adoleshentit

    Vdekja e një adoleshenti ka shkaktuar protesta të dhunshme në një qytet në veri-perëndim të Kinës – ka konfirmuar BBC përmes një xhirimi të verifikuar.

    Në videot e shpërndara në mediat sociale, protestuesit mund të shihen duke hedhur objekte ndaj Policisë dhe policët duke rrahur disa demonstrues në Pucheng në provincën Shaanxi.

    Autoritetet kanë deklaruar se adoleshenti ra për vdekje më 2 janar, në një aksident në Konviktin e Shkollës së tij. Por, pas akuzave për vdekjen e tij filloi të përhapej në mediat sociale se e vërteta ishte ndryshe.

    Protestat shpërthyen menjëherë pas kësaj dhe zgjatën disa ditë, përpara se ato të shuheshin me sa duket në fillim të kësaj jave. BBC nuk ka parë asnjë provë tjetër të protestës në Pucheng, që atëherë.

    Demonstratat publike janë të rralla në Kinë, por autoritetet kanë qenë veçanërisht të ndjeshme ndaj tyre që nga protestat me letra të bardha të vitit 2022 kundër politikave të COVID-it, të cilat u shënuan me kritika të rralla ndaj Partisë Komuniste Kineze dhe presidentit Xi Jinping.

    Media shtetërore nuk e ka shkruar asnjë fjalë për protestat në Pucheng. Çdo xhirim ose referencë e demonstratave është censuruar kryesisht nga mediat sociale kineze – siç ndodh zakonisht për incidentet që konsiderohen të ndjeshme nga autoritetet.

    Por, disa video kanë dalë jashtë Kinës dhe janë postuar në X.

    Transmetuesi britanik BBC ka konfirmuar se ato janë filmuar në Qendrën e Arsimit Profesional Pucheng dhe nuk kanë gjetur versione të mëparshme në internet, përpara shpërthimit të raportuar të protestave gjatë ditëve të fundit.

    Kur u kontaktua nga BBC-ja, një përfaqësues nga Departamenti për Media i Qeverisë në Pucheng mohoi se kishte pasur protesta. Nuk kishte asnjë përgjigje kur BBC-ja telefonoi një zyrtar që trajtonte pyetjet e medias.

    Në një deklaratë të lëshuar në fillim të kësaj jave, autoritetet lokale thanë se adoleshenti me mbiemrin Dang ishte nxënës i vitit të tretë në Qendrën Arsimore në Pucheng.

    Para vdekjes së tij, Dang ishte zgjuar natën nga nxënës të tjerë duke biseduar në Konviktin e tij – thuhet në deklaratën e tyre. Ai ka hyrë në një debat dhe sherr me një djalë, të cilin e ka zgjidhur një zyrtar i Shkollës.

    Më vonë atë natë, trupi i tij u gjet nga një nxënës tjetër në këmbët e bllokut të Konviktit.

    Deklarata e përshkruan atë si “një aksident ku një nxënës u rrëzua nga një lartësi në Shkollë.” Ai shtoi se Policia kishte kryer hetime dhe një autopsi dhe “për momentin e përjashton atë si një çështje penale”.

    Por kanë qarkulluar akuza në internet prej ditës kur ndodhi rasti dhe Shkolla e autoritetet po fshihnin të vërtetën. Një llogari pretendonte, pa prova, se Dangu vrau veten pasi u ngacmua nga djali me të cilin ishte përleshur më parë.

    Kanë qarkulluar edhe deklarata të paverifikuara nga familja e tij, duke pretenduar se dëmtimet në trupin e Dangut nuk përputheshin me versionin e ngjarjeve të autoriteteve dhe se familjarët nuk u lejuan ta kontrollonin trupin e tij për një kohë të gjatë.

    Akuzat duket se kanë zemëruar shumë njerëz në Pucheng – duke shkaktuar protesta që nxorën të paktën qindra njerëz në rrugë.

     

    Përgatiti: Rexhep Maloku – Kallxo.com