Ballina

Kategori: Botë

  • Seuli: Koresë së Veriut i janë vrarë e plagosur mbi tremijë ushtarë në Ukrainë

    Koresë së Veriut  mund t’i jenë vrarë dhe plagosur më shumë se tremijë ushtarë në Ukrainë – duke përfshirë 300 vdekje dhe mbi 2.700 raste të plagosjes dhe lëndimit.

    Kështu i ka thënë një deputeti të Koresë Jugore Agjencia vendase e spiunimit – ka raportuar të hënën, më 13.01.2025, Agjencia e lajmeve Reuters.

    Autoritetet e Koresë Veriore duket se po u bëjnë thirrje ushtarëve të vet që të bëjnë vetëvrasje, duke hedhur veten në erë për t’iu shmangur rënies në duar të ukrainasve – ka thënë deputeti jugkorean, duke iu referuar Shërbimit Kombëtar të Inteligjencës (NIS).

    Ushtarët e kapur të Koresë Veriore nuk kanë treguar qëllimin për t’u kthyer në Korenë Jugore, megjithëse Seuli do të bashkëpunonte me Ukrainën nëse do të kishte një kërkesë të ngjashme – ka raportuar Agjencia e lajmeve Yonhap, duke iu referuar NIS-it.

    Përgatiti: Rexhep Maloku – Kallxo.com

  • Rikthehen erërat, shkon në 24 numri i viktimave të zjarreve në Los Anxhelos

    Parashikuesit e motit në Kaliforni po paralajmërojnë se erërat e forta që nxitën tmerrin përreth Los Anxhelosit pritet të rikthehen këtë javë, ndërsa ekipet e zjarrfikësve në terren po luftojnë për kontrollimin e tri vatrave të zjarreve – raporton BBC.

    Zyrtarët paralajmëruan se pas fundjavës me erëra relativisht të qeta, erërat e thata famëkeqe të Santa Anas do të kthehen përsëri nga e diela deri të mërkurën – duke shkuar në shpejtësi prej 60 kilometrash në orë.

    Përpara fuqizimit të erës është bërë njëfarë përparimi në ndalimin e përhapjes së zjarreve vdekjeprurëse në Palisades dhe Eaton, që po digjen në skajet e kundërta të qytetit. Zjarrfikësit lokalë po ndihmohen nga ekipet nga tetë shtete të tjera, si dhe nga Kanadaja dhe Meksika, të cilat vazhdojnë të mbërrijnë.

    Ekzaminuesi mjekësor i qarkut LA përditësoi numrin e të vdekurve të dielën në 24 sosh, ndërsa zyrtarët kanë deklaruar më herët se të paktën 16 të tjerë mbeten të zhdukur.

    Gjashtëmbëdhjetë nga të vdekurit u gjetën në zonën e zjarrit Eaton, ndërsa tetë u gjetën në zonën Palisades.

    Tri zjarre vazhdojnë të digjen rreth Los Anxhelosit.

    Zjarri më i madh është në Palisades, që tani ka djegur më shumë se 23 mijë hektarë dhe është 13 në kontroll.

    Zjarri i Eaton është i dyti më i madh dhe ka djegur më shumë se 14 mijë hektarë.

    Zjarri i Hurst është rritur në 799 hektarë dhe është frenuar pothuajse plotësisht.

    BBC më tej raporton se zjarret e egra janë rrugës për t’u kthyer, ndër më të kushtueshmet në historinë e SHBA-së.

    Përgatiti: Rexhep Maloku – Kallxo.com

  • Rumani, mijëra protestues demonstrojnë kundër anulimit të Zgjedhjeve presidenciale

    Dhjetëra-mijëra rumunë protestuan të dielën në kryeqytetin Bukuresht, kundër vendimit të muajit të kaluar të Gjykatës Kushtetuese për anulimin e Zgjedhjeve presidenciale, pasi një kandidat i panjohur fitoi raundin e parë.

    Demonstruesit u ranë borive të makinave, valëvitën flamurin kombëtar dhe mbajtën pankarta ku shkruhej, “Duam Zgjedhje të lira” dhe bënë thirrje për demokraci. Shumë nga protestuesit kërkojnë vazhdimin e raundit të dytë të Zgjedhjeve presidenciale.

    Protesta vjen një muaj pasi Gjykata Kushtetuese mori vendimin e pashembullt, për të anuluar Zgjedhjet vetëm dy ditë përpara balotazhit të 8 dhjetorit.

    Avantazhi i politikanit populist, Calin Georgescu, i ekstremit të djathtë, tronditi shumë njerëz pas votimeve në raundin e parë më 24 nëntor. Më pas u ngritën akuza për shkelje zgjedhore dhe ndërhyrje të Rusisë.

    George Simion, udhëheqës i ekstremit të djathtë “Aleanca për Bashkimin e Rumunëve” tha gjatë protestës të dielën se: “Po protestojmë kundër grushtit të shtetit që ndodhi më 6 dhjetor”.

    Udhëheqësi i partisë që organizoi protestën të dielën tha për shtypin se: “Na vjen keq që zbuluam kaq vonë se po jetonim një gënjeshtër dhe se na udhëhiqnin njerëz që pretendonin se ishin demokratë, por që nuk janë. Kërkojmë rikthimin e demokracisë, përmes rifillimit të procesit zgjedhor – duke mbajtur raundin e dytë”.

    Anulim i Zgjedhjeve muajin e kaluar e ka zhytur Rumaninë në trazira. Vendi anëtar i Bashkimit Evropian dhe NATO-s është përfshirë edhe nga polemika të tjera – përfshirë rinumërimin e votave të raundit të parë.

    Rumania ka caktuar datën 4 maj për mbajtjen e raundit të parë të Zgjedhjeve të reja. Nëse asnjë kandidat nuk merr më shumë se 50% të votave, balotazhi do të zhvillohet dy javë më vonë, më 18 maj. Nuk është e qartë nëse zoti Georgescu do të mund të marrë pjesë në Zgjedhjet e reja.

    Populisti Calin Georgescu e ka apeluar vendimin për Zgjedhjet në një Gjykatë lokale, si dhe ka paraqitur një ankesë pranë Gjykatës Evropiane për të Drejtat e Njeriut.

    Vendimi i publikuar i Gjykatës Kushtetuese për anulimin e Zgjedhjeve përmendi përdorimin e paligjshëm të teknologjive dixhitale, përfshirë inteligjencën artificiale, si dhe përdorimin e “burimeve të padeklaruara” për financimin e fushatës. Zoti Georgescu kishte deklaruar zero shpenzime për fushatën./VOA

  • Biden bisedon me Netanjahun, lidhur me Gazën

    Presidenti amerikan, Joe Biden bisedoi të dielën me kryeministrin izraelit Benjamin Netanyahu, tha një burim në dijeni të kësaj çështje, ndërsa zyrtarët amerikanë po përshpejtojnë përpjekjet për të arritur një marrëveshje për lirimin e 98 pengjeve, si dhe për armëpushim në Gazë, përpara se zoti Biden të largohet nga detyra, më 20 janar.

    Në një deklaratë të Zyrës së Kryeministrit izraelit thuhej se zoti Netanyahu e informoi zotin Biden mbi progresin në bisedime, si dhe mandatin që i ka dhënë një delegacioni të nivelit të lartë që ndodhet në Doha të Katarit – me qëllim për të avancuar në arritjen e marrëveshjes.

    Këshilltari i Sigurisë Kombëtare i Presidentit Biden, Jake Sullivan tha për rrjetin televiziv CNN më herët të dielën se palët ishin “shumë, shumë pranë” arritjes së një marrëveshjeje.

    Ai tha se zoti Biden po informohej në mënyrë të vazhduar mbi bisedimet në Doha, ku sipas zyrtarëve izraelitë dhe palestinezë, që nga e enjtja se është bërë njëfarë përparimi në bisedimet indirekte mes Izraelit dhe grupit militant Hamas.

    “Ne jemi ende të vendosur të përdorim çdo ditë që kemi në detyrë për arritjen e një marrëveshjeje dhe nuk do ta lëmë mënjanë këtë çështje në asnjë mënyrë.” – tha zoti Sullivan.

    Ai shtoi se ka ende një shans për të arritur një marrëveshje, përpara se zoti Biden të largohet nga detyra, por sipas tij ekzistonte gjithashtu mundësia që “Hamasi, në veçanti, të mos pajtohej me kushtet e marrëveshjes”.

    Izraeli filloi sulmin e tij në Gazë, pasi luftëtarët e Hamasit sulmuan shtetin hebre në tetor të vitit 2023 – duke vrarë 1200 persona dhe marrë më shumë se 250 të tjerë.

    Që atëherë, më shumë se 46,000 njerëz janë vrarë në Gazë – sipas zyrtarëve palestinezë të Shëndetësisë, që kontrollohet nga Hamasi.

    Nënpresidenti i zgjedhur JD Vance tha për rrjetin televiziv “Fox News” se ai pret që një marrëveshje për lirimin e pengjeve amerikane që ndodhen në Lindjen e Mesme, të shpallet në ditët e fundit të administratës Biden, deri 2 ditë përpara.

    Presidenti i zgjedhur Donald Trump ka mbështetur fuqishëm objektivin e zoti Netanjahu për të shkatërruar Hamasin. Ai ka premtuar se do të sjellë paqe në Lindjen e Mesme, por nuk ka dhënë detaje se si do ta arrinte këtë qëllim./VOA

  • Studimi: Numri i vdekjeve në Gazë, 41% më i lartë se shifrat e bëra publike

    Një studim i ri i publikuar në revistën “The Lancet” arrin në përfundimin se numri i të vdekurve nga lufta e Izraelit kundër militantëve të Hamasit në Gazë është shumë më i lartë se shifrat zyrtare – të raportuara nga Ministria e Shëndetësisë e këtij territori, që kontrollohet po nga Hamasi.

    Korrespodenti i Zërit të Amerikës në Londër, Henry Ridgwell bisedoi me bashkautoren e këtij studimi.

    Një studim i ri i publikuar në revistën prestigjoze “The Lancet” thotë se numri i viktimave të luftës në Gazë është rreth 64 mijë, rreth 40% më i lartë se shifrat e publikuara nga Ministria e Shëndetësisë e Rripit të Gazës, që kontrollohet nga Hamasi.

    Studimi tregon se zyrtarët e Gazës e kanë ulur numrin e vdekjeve me më shumë se 40%, gjatë periudhës 7 tetor 2023 dhe 30 qershor 2024.

    “Në realitet, vdekshmëria mund të jetë më e lartë nëse përfshijmë gjithashtu ata të cilët kanë humbur jetën, pasi nuk kanë patur qasje te Kujdesi shëndetësor, vdekjet nga goditjet në zemër apo sëmundjet infektive, vdekjet e grave shtatzëna që nuk mund të kenë patur qasje te mjeku gjatë lindjes.” – thotë Zeina Jamaluddine, bashkautore e studimit në revistën “The Lancet” .

    59% e viktimave ishin gra, fëmijë dhe të moshuar, sipas Raportit të revistës “The Lancet” – shifër kjo pothuajse e njëjtë edhe me studimet e tjera.

    Studimi i fundit nuk përfshin numrin e luftëtarëve të Hamasit në mesin e të vdekurve.

    Ambasada e Izraelit në Londër i tha Zërit të Amerikës përmes një deklarate se “çdo informacion që rrjedh nga Gaza nuk mund të besohet dhe nuk mund të injorohet historia e revistës ‘The Lancet’ për njëanshmërinë kundër Izraelit”.

    Zëri i Amerikës nuk është në gjendje të verifikojë shifrat, pasi Izraeli nuk i lejon gazetarët në Gazë.

    Studiuesit ndërthurën tre burime: Ministrinë e Shëndetësisë së Gazës që drejtohet nga Hamasi, një studim në internet të vdekjeve të raportuara dhe nekrologjitë në mediat sociale – thotë bashkautorja e studimit.

    “Është e rëndësishme që brenda secilës listë të mos kemi dyfishime, kështu që nuk duam të kemi të njëjtin person të përmedur disa herë. Më pas i krahasuam listat.” – thotë Zeina Jamaluddine, bashkautore e studimit në revistën “The Lancet” .

    E njëjta teknikë është përdorur për të vlerësuar vdekjet në konflikte të tjera – thotë bashkautorja e studimit.

    “Është përdorur në Sudan dhe Jemen. Është përdorur edhe në Kosovë dhe disa nga këto prova janë përdorur në GJND [Gjykata Ndërkombëtare e Drejtësisë” – thotë Zeina Jamaluddine, bashkautore e studimit në revistën “The Lancet”].

    Izraeli e filloi luftën kundër Hamasit në Gaza pas sulmit të grupit militant më 7 tetor të vitit 2023, i cili vrau më shumë se 1200 njerëz, kryesisht civilë.

    Shtetet e Bashkuara, Mbretëria e Bashkuar, Bashkimi Evropian dhe të tjerë e kanë cilësuar Hamasin si organizatë terroriste./VOA