Ballina

Kategori: Botë

  • Bli diçka ose ik – u drejtohet Starbucks myshterinjve

    Starbucks ka bërë të ditur se po i ndryshon krejtësisht rregullat për kafenetë e veta në Amerikën Veriore, që lejonin njerëzit të përdornin hapësirat e tyre edhe nëse nuk porosisnin asgjë – raporton të martën, më 14.01.2025, televizioni britanik BBC.

    Ndryshimet, që pritet të fuqizohen prej 27 janarit, janë një ndryshim radikal prej politikës së paraqitur gjashtë vjet më parë, sipas së cilës njerëzve u lejohej që të qëndronin në hapësirat e Starbucksit dhe të përdornin toaletet e tyre – pa blerë asnjë produkt.

    Lëvizja është konsideruar pjesë e strategjisë së “kthimit të Starbucks” – një plan i bërë i ditur prej Shefit të ri të firmës, derisa po mundohet t’ia presë udhën rënieve të shitjeve.

    Zinxhiri më i madh i kafes në botë bën të ditur se kodi i ri i sjelljes – që adreson edhe ngacmimet dhe ndalon duhanin e alkoolin edhe në hapësira të hapura – synon t’i bëjë dyqanet më mikpritëse.

    Një zëdhënës i Starbucks i ka thënë BBC-së se ky ishte një hap praktik, që e ndihmon kompaninë që t’i kenë prioritet myshterinjtë që ulen dhe paguajnë për shërbimet e ofruara. Ai ka thënë se kjo po bëhet në kuadër të një game më të gjerë ndryshimesh, për të avancuar përvojën e pirjes së kafesë në Starbucks.

    Kompania ka bërë të ditur se rregullat e reja do të shfaqen në çdo dyqan dhe stafi do të instruktohet që t’u kërkojë njerëzve të cilët shkelin rregullat të largohen nga kafenetë. Kjo u hap rrugë punëtorëve që nëse është e nevojshme edhe të kërkojnë ndihmën e Policisë.

     

    Përgatiti: Rexhep Maloku – Kallxo.com

  • “Trillim të kulluar” e quan TikTok-u Raportin se po i shitet Elon Muskut

    TikTok-u e ka quajtur “trillim të kulluar” një Raport se Kina po shqyrton që të lejojë shitjen e operacioneve amerikane të kompanisë së mediave sociale Elon Muskut – raporton të martën, më 14.01.2025, televizioni britanik BBC.

    Komentet e firmës janë kundërpërgjigje ndaj një Raporti të “Bloombergut”, se zyrtarët kinezë po peshojnë një opsion që do të mund të hapte rrugën që biznesi i tyre në Amerikë t’i shitet personit më të pasur në botë – nëse Gjykata Supreme amerikane e mban në fuqi ndalimin e aplikacionit.

    Gjyqtarët e Supremes pritet të nxjerrin një verdikt për një Ligj që ia përcakton 19 janarin si ultimatum për TikTok-un, që ose t’i shesë operacionet amerikane, ose të përballet me ndalesën në këtë vend.

    TikTok-u ka thënë vazhdimisht se nuk do t’i shesë operacionet amerikane.

    “Nuk mund të pritet prej nesh që të komentojmë një trillim të kulluar.” – ka deklaruar një zëdhënës i TikTok-ut për BBC-në.

    “Bloomberg” raportoi, duke cituar njerëz të informuar me çështjen, se një skenar i mundshëm po shqyrtohet prej zyrtarëve kinezë, që do të rezultonte me marrjen e kontrollit të operacioneve amerikane të TikTok-ut nga media sociale e Elon Muskut, X.

    X-i nuk ka dashur që menjëherë ta komentojë Raportin, pavarësisht kërkesës së BBC-së.

    Musku është aleat i ngushtë i presidentit të zgjedhur amerikan, Donald Trump, i cili pritet të kthehet në Shtëpinë e Bardhë më 20 janar. Trumpi e ka inkurajuar muajin e kaluar Gjykatën Supreme që ta shtyjë verdiktin, derisa ta marrë Presidencën që t’ia mundësojë që të gjejë një “zgjidhje politike”.

    Avokati i tij ka dorëzuar një shkresë në Gjykatë, duke theksuar se Trumpi “kundërshton ndalimin e TikTok-ut” dhe “kërkon aftësinë për të zgjidhur çështjen nëpërmjet mjeteve politike kur ta marrë detyrën”.

    Kjo ndodhi një javë pasi Trumpi e takoi shefin ekzekutiv të TikTok-ut, Shou Zi Chew, në pronën e tij Mar-a-Lago në Floridë.

     

    Përgatiti: Rexhep Maloku – Kallxo.com

  • “Shumë afër” ujdia për armëpushimin në Gazë – thotë Katari

    Bisedimet po rifillojnë në Doha për një Marrëveshje armëpushimi në Gazë dhe për lirimin e pengjeve izraelite, pasi ndërmjetësi kryesor, Katari thotë se një ujdi është “shumë afër” – raporton të martën, më 14.01.2025, BBC.

    Një zyrtar palestinez në rrjedhë me negociatat ka treguar për BBC-në se, për herë të parë prej nisjes së luftës, delegacionet nga Izraeli dhe “Hamasi” po mbajnë bisedime indirekte në të njëjtën ndërtesë.

    Korrespondenti i BBC-së në Gazë, Rushdi Abualouf, ka theksuar se Marrëveshja do të rezultonte me veprime të ndara në faza, me tri pengje të cilat do të liroheshin në ditën e parë dhe Izraeli do të fillonte të tërheqë trupat pas kësaj.

    Të dërguarit e Bidenit, ashtu edhe të presidentit të sapozgjedhur amerikan, Donald Trump, kanë pretenduar meritën për përparimin e bisedimeve, por inaugurimi javën tjetër i Trumpit ka sjellë presionin e një afati domethënës – shkruan Tom Bateman i BBC-së.

    Lufta u shkaktua nga sulmi i “Hamasit” në Izraelin jugor më 7 tetor 2023, në të cilin rreth 1200 njerëz u vranë dhe 251 të tjerë u morën në Gazë si pengje.

    Izraeli nisi një ofensivë ushtarake në Gazë si kundërpërgjigje dhe Ministria e Shëndetësisë e enklavës e drejtuar nga “Hamasi” thotë se më shumë se 46 mijë njerëz janë vrarë atje gjatë luftës.

     

    Përgatiti: Rexhep Maloku – Kallxo.com

  • Trumpi do të fajësohej nëse nuk do të zgjidhej President – thotë Prokurori Special

    Presidenti i zgjedhur amerikan, Donald Trump do të fajësohej për përpjekje ilegale për të përmbytur rezultatin e Zgjedhjeve presidenciale të vitit 2020, të cilat i humbi, nëse nuk do të rizgjidhej me sukses në vitin 2024 – ka thënë njeriu që i ka prirë hetimit qeveritar amerikan kundër tij – raporton të martën, më 14.01.2025, transmetuesi britanik BBC.

    Dëshmitë kundër Trumpit ishin “të mjaftueshme për të siguruar dhe mbrojtur një dënim në gjyq” – ka shkruar prokurori special, Jack Smith, në një Raport që është publikuar pjesërisht.

    Trumpi ia ka kthyer, duke thënë se Smithi është “i marrë” dhe se gjetjet e tij ishin “të rreme”.

    Trumpi ishte akuzuar se u kishte bërë presion zyrtarëve, që ta përmbysnin rezultatin e vitit 2020, duke e ditur se po përhapte rrena për mashtrim zgjedhor dhe se ishte munduar të shfrytëzonte trazirat e 6 janarit 2021 në Kapitolin Amerikan. Ai i ka hedhur poshtë të gjitha akuzat për keqpërdorim.

    Trumpi, i cili ishte President në kohën e akuzave të supozuara, i kaloi katër vjet pastaj jashtë Presidencës – por do të rizgjidhej suksesshëm për t’u rikthyer në Shtëpinë e Bardhë në Nëntor. Ai do të rikthehet në Presidencë javën e ardhshme.

    Pas suksesit në Zgjedhjet e vitit 2024, çështje të ndryshme legale janë rrëzuar. Edhe rasti i ndërhyrjes tashmë është hedhur poshtë. Smith thotë se i qëndron “plotësisht prapa” gjetjeve që i kishte sjellë gjatë hetimit dhe se mund ta mbronte rastin.

    Ai ka përmendur faktin se vetëm Kushtetuta amerikane ia ka ndaluar hetimin e një Presidenti në detyrë.

     

    Përgatiti: Rexhep Maloku – Kallxo.com

  • Pikat kryesore të propozimit për armëpushim në Gazë

    Ndërmjetësuesit nga Katari kanë dërguar një projekt-propozim për një Marrëveshje për Ndalimin e luftimeve në Rripin e Gazës dhe Shkëmbimin e pengjeve izraelite për të burgosurit palestinezë – si një hap i parë drejt përfundimit të luftës gjatë 15 muajve.

    Luftimet po zhvillohen në mes të Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

    Një javë para se presidenti i zgjedhur i SHBA-së, Donald Trump të marrë detyrën nga presidenti Joe Biden, zyrtarët thanë se ishte arritur një përparim në bisedimet në Doha dhe një Marrëveshje mund të jetë afër.

    Ja pikat kryesore nga projekti, sipas një zyrtari izraelit dhe një zyrtari palestinez. Ndërsa Hamasi nuk ka dhënë detaje.

    Kthimi i pengjeve

    Në fazën e parë, do të lirohen 33 pengje izraelite. Në mesin e tyre janë fëmijë, gra, edhe ato ushtarake, burra mbi 50 vjeç, të plagosur dhe të sëmurë. Izraeli beson se shumica janë gjallë, por nuk ka pasur konfirmim zyrtar nga Hamasi.

    Sipas Marrëveshjes, faza e parë do të zgjasë 60 ditë. Nëse vazhdon siç është planifikuar, në ditën e 16 nga hyrja në fuqi e Marrëveshjes, do të fillojnë negociatat për një fazë të dytë, gjatë së cilës do të lirohen pengjet e mbetura gjallë: ushtarët burra e djemtë civilë më të rinj dhe trupat e pengjeve të vdekur do të kthehen.

    Tutje, në këmbim të pengjeve, Izraeli do të lirojë nga burgjet e tij më shumë se 1.000 të burgosur dhe të ndaluar palestinezë – përfshirë të dënuar me dënime të gjata për sulme vdekjeprurëse.

    Luftëtarët e Hamasit, të cilët morën pjesë në sulmin ndaj Izraelit më 7 tetor 2023, nuk do të lirohen.

    Tërheqja e Ushtrisë

    Tërheqja do të jetë me faza, me forcat izraelite që do të qëndrojnë në kufij për të mbrojtur qytetet dhe fshatrat izraelite.

    Do të ketë Marrëveshje sigurie në korridorin Filadelfi që kufizon Egjiptin, në anën jugore të Gazës, me Izraelin që do të tërhiqet nga disa pjesë të tij pas ditëve të para të Marrëveshjes.

    Banorët e paarmatosur në veri të Gazës do të lejohen të kthehen, me një mekanizëm për të siguruar që aty të mos lëvizin armë. Forcat izraelite do të tërhiqen nga korridori Netzarim, në pjesën qendrore të Gazës.

    Kalimi në Rafah mes Egjiptit dhe Gazës do të fillojë të funksionojë gradualisht – duke lejuar kalimin e atyre që janë të sëmurë dhe rasteve humanitare për trajtim jashtë enklavës.

    Shtim i ndihmave

    Do të ketë një rritje të konsiderueshme të ndihmës humanitare në Rripin e Gazës, ku organet ndërkombëtare, përfshirë Kombet e Bashkuara, thonë se popullsia po përballet me një krizë të thellë humanitare.

    Izraeli lejon hyrjen e ndihmave në enklavë, por ka pasur mosmarrëveshje për sasinë e ndihmës që lejohet dhe sasinë që arrin te njerëzit në nevojë – derisa plaçkitja nga bandat kriminale po bëhet një problem në rritje.

    Udhëheqësia e Gazës në të ardhmen

    Kush do ta drejtojë Gazën pas luftës është një nga pikat e panjohura të negociatave. Duket se raundi aktual i bisedimeve e ka lënë këtë çështje jashtë propozimit, për shkak të kompleksitetit të saj dhe mundësisë që ajo mund të pengonte një Marrëveshje të kufizuar.

    Izraeli ka thënë se nuk do ta mbyllë luftën duke e lënë Hamasin në pushtet. Ai ka refuzuar, gjithashtu, Administratën e Gazës nga Autoriteti Palestinez – organi i mbështetur nga Perëndimi, që u krijua sipas akordeve të paqes së Oslos 30 vjet më parë dhe që ka sovranitet të kufizuar në Bregun Perëndimor të pushtuar.

    Ai ka thënë, gjithashtu, që nga fillimi i fushatës ushtarake në Gaza se do të mbajë kontrollin e sigurisë mbi enklavën pasi të përfundojnë luftimet.

    Komuniteti ndërkombëtar ka thënë se Gaza duhet të drejtohet nga palestinezët, por përpjekjet për të gjetur alternativa nga fraksionet kryesore mes shoqërisë civile apo liderëve të klaneve kanë rezultuar kryesisht të pasuksesshme.

    Megjithatë ka pasur diskutime mes Izraelit, Emirateve të Bashkuara Arabe dhe Shteteve të Bashkuara për një Administratë përkohshme, e cila do të drejtonte Gazën deri në një reformim të Autoritetit Palestinez, që do të ishte në gjendje të merrte drejtimin./REL