Ballina

Kategori: Botë

  • Blinken paraqet planin për qeverisjen e Gazës pas përfundimit të luftës

    Sekretari amerikan i Shtetit, Antony Blinken, më 14 janar paraqiti planin për menaxhimin e Gazës në periudhën e pasluftës, duke thënë se administrata në largim e Joe Biden, do t’ia dorëzojë këtë plan ekipit të presidentit të zgjedhur, Donald Trump, nëse arrihet marrëveshje për armëpushim.

    Duke folur në Këshillin e Atlantikut në Uashington, në ditët e fundit të mandatit si kryediplomat i SHBA-së, Blinken tha se Uashingtoni ka parashikuar një Autoritet Palestinez të reformuar, që do të udhëhiqte me Gazën, dhe ftoi partnerët ndërkombëtarë që të ndihmojnë në krijimin e një administrate të përkohshme për enklavën palestineze.

    Sipas planit amerikan, një forcë e sigurisë do të formohej nga forcat e shteteve partnere dhe personeli palestinez që do të kalonte nëpër procese të verifikimit, tha Blinken gjatë fjalimit.

    Fjalimi i tij u ndërpre vazhdimisht nga protestues që e akuzuan atë se po mbështet, siç thanë ata, gjenocidin e Izraelit kundër palestinezëve në Gazë, Izraeli vazhdimisht ka mohuar akuzat për gjenocid.

    Fjalimi i Blinkenit erdhi pasi negociatorët u takuan në Katar me shpresën që të finalizojnë një plan për t’i dhënë fund luftës 15-mujore në Gazë, midis Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – që ka zhytur në krizë rajonin e Lindjes së Mesme.

    “Për muaj të tërë, ne kemi punuar në mënyrë intensive me partnerët tanë për të krijuar një plan të detajuar për periudhën e pasluftës që do të mundësojë që Izraeli të tërhiqet plotësisht nga Gaza, të parandalohet që Hamasi të marrë pushtetin dhe t’i japë qeverisje Gazës, siguri dhe rindërtim”, tha Blinken.

    Trump dhe ekipi i tij nuk kanë thënë nëse do ta zbatojnë këtë plan.

    Sipas Blinkenit, ky plan dhe “një horizont kredibil politik për palestinezët” kërkohet që Hamasi të mos rishfaqet në Gazë.

    SHBA-ja në të kaluarën e ka paralajmëruar Izraelin se Hamasi nuk mund të mposhtet vetëm me fushatë ushtarake, tha Blinken.

    “Ne vlerësojmë se Hamasi ka rekrutuar po aq militantë të rinj sa ka humbur”, tha ai.

    Lufta në Gazë nisi në tetor të vitit 2023, pasi Hamasi sulmoi Izraelin duke vrarë afër 1.200 persona dhe duke rrëmbyer afër 250 të tjerë.

    Ndërkaq, si pasojë e ofensivës izraelite, në Gazë janë vrarë më shumë se 46.000 palestinezë, shumica gra dhe fëmijë, ka thënë Ministria e Shëndetësisë në këtë enklavë./ REL

  • Zvicra neutrale do t’i bashkohet projektit të mobilitetit ushtarak të BE-së

    Zvicra do të bëhet anëtare e nismës së Bashkimit Europian për të lehtësuar mobilizimin e forcave dhe pajisjeve ushtarake, ku tashmë janë përfshirë edhe vende të treta si Mbretëria e Bashkuar, Shtetet e Bashkuara, Norvegjia dhe Kanadaja, ka raportuar të martën (më 14.01.2025) televizioni Euronews.

    Zvicra do t’i bashkohet projektit të mobilitetit ushtarak të BE-së që synon të sigurojë lëvizje të shpejtë dhe të pabujshme të personelit, pajisjeve dhe aseteve ushtarake pasi shtetet anëtare janë pajtuar të hënën që t’i dërgojnë shtetit helvetik ftesë zyrtare.

    Këshilli Federal i vendit neutral ka vendosur në gusht që Zvicra të marrë pjesë në nismën e BE-së dhe që ta heqë shiritin e kuq kur ushtritë e mobilizuara kalojnë përgjatë ose ndërmjet shteteve anëtare të BE-së, qoftë nëpërmjet hekurudhave, rrugëve, ajrit ose detit – por vendet anëtare ende duhet t’i japin dritën e gjelbër Holandës, koordinatore e projektit, që ta dërgojë letrën zyrtare me ftesën për shtetin helvetik.

    “Pjesëmarrja e Zvicrës në projekt përkon me parimin e neutralitetit, derisa nuk përbën ndonjë zotim legal ose de fakto ndaj mbrojtjes kolektive” – ka njoftuar Departamenti Federal i Mbrojtjes, Mbrojtjes Civile dhe Sportit (DDPS) në një deklarim për Euronews.

    Vendet e tjera, joanëtare të BE-së, si Shtetet e Bashkuara, Kanadaja, Norvegjia dhe Mbretëria e Bashkuar, janë gjithashtu pjesë e projektit Bashkëpunimi i Përhershëm i Strukturuar (PESCO), që është dizajnuar për të thelluar bashkëpunimin e mbrojtjes ndërmjet shteteve anëtare (hiq Maltën neutrale, që nuk merr pjesë në PESCO) dhe partnerëve të NATO-s.

    Nisma e Mobilitetit Ushtarak e BE-së vepron si një Schengen për forcat e armatosura. Projekti ua mundëson trupave të shteteve anëtare të përgjigjen më shpejt dhe me efektivitet ndaj krizave në kufijtë e jashtëm të bllokut ose më gjerë, si për operacionet e BE-së ashtu edhe për dislokimet në mjedise të tjera shumëpalëshe si NATO-ja, duke përfshirë reagimin me një njoftim të shkurtër dhe në shkallë të gjerë.

    Plani i Veprimit për Mobilitetin Ushtarak (2022-26) synon gjithashtu të forcojë gatishmërinë dhe qëndrueshmërinë e infrastrukturës së transportit si hekurudhat, rrugët, rrugët ujore dhe aeroportet që përdoren për qëllime civile dhe ushtarake.

    Pas ftesës së shteteve anëtare, Zvicra tani vetë duhet të bëjë një marrëveshje administrative për të formalizuar anëtarësimin. Modalitetet e bashkëpunimit do të përcaktohen në marrëveshjen administrative e padetyrueshme.

    Zvicra gjithashtu synon t’i bashkohet projektit të Federatës së Rrjeteve Kibernetike, të koordinuar nga Estonia që nga viti 2021, që të përmirësojë cilësinë e trajnimit për Forcat e Armatosura Zvicerane dhe për të thelluar ndërveprimin e tyre.

    “Dy projektet – Federata e Rrjeteve Kibernetike dhe Mobilitetit Ushtarak – ofrojnë mundësinë për të zgjeruar bashkëpunimin ndërkombëtar midis forcave të armatosura dhe kështu të forcojnë aftësitë kombëtare të mbrojtjes së Zvicrës dhe kontributin për sigurinë europiane”, ka thënë DDPS-ja për Euronewsin.

    Për momentin, Zvicra nuk ka ndërmend të marrë pjesë në projekte të tjera të PESCO-s, por mundësia nuk përjashtohet për të ardhmen./Euronews

    Përgatiti: Rexhep Maloku/Kallxo.com

  • Ukraina thotë se ka kryer sulmin më të madh ndaj Rusisë prej nisjes së luftës

    Ukraina ka goditur disa objektiva thellë brenda territorit të Rusisë të martën (14.01.2025) në atë që pretendon se është sulmi i saj “më i madh” i luftës deri më tani, ka raportuar transmetuesi britanik, BBC.

    Depot e municioneve dhe fabrikat kimike ishin cak në disa rajone, disa prej të cilave ndodhen qindra kilometra larg kufirit, ka njoftuar Shtabi i Përgjithshëm i Forcave të Armatosura të Ukrainës.

    Burime nga agjencia e inteligjencës së Ukrainës, SBU, i kanë thënë BBC-së se sulmi brenda natës ishte një “goditje e dhimbshme” për aftësinë e Rusisë për luftë.

    Rusia ka thënë se ka rrëzuar raketat amerikane “Atacms”, si dhe raketa “Storm Shadow” të prodhuara në Mbretërinë e Bashkuar, duke u zotuar se do t’i kundërpërgjigjet sulmit.

    Të paktën nëntë aeroporte në Rusinë qendrore dhe perëndimore ndaluan përkohësisht trafikun, ndërsa bombardimet i detyruan shkollat të mbylleshin ​​në rajonin jugperëndimor, Saratov.

    Sulmet në rajonin kufitar, Bryansk, shkaktuan shpërthime në një rafineri, depo municionesh dhe në një fabrikë kimike që thuhet se prodhonte barut dhe eksplozivë, ka thënë një burim ukrainas i sigurisë për BBC-në.

    Por Kievi gjithashtu goditi shumë më thellë në vend, derisa Shtabi i Përgjithshëm pretendon se ka goditur objektiva deri në 1.100 kilometra nga kufiri.

    Në rajonin perëndimor Saratov, zyrtarët raportuan një sulm “masiv” me dronë.

    Dy fabrika industriale janë dëmtuar në qytetet Engels dhe Saratov, ka shkruar në rrjetin social “Telegram” guvernatori rajonal, Roman Busargin.

    Nxënësit mbajtën mësim online të martën pasi u mbyllën shkollat.

    Javën e kaluar, Kievi njoftoi se kishte goditur një objekt të magazinimit të naftës në Engels – duke shkaktuar një përpjekje disaditore për t’i shuar flakët, derisa në Busargin është shpallur gjendje e jashtëzakonshme.

    Zyrtarët në rajonin perëndimor Tula kanë raportuar gjithashtu një sulm gjatë natës, ku guvernatori rajonal, Dmitry Milyaev Russian, ka theksuar se mbrojtja ajrore ka rrëzuar 16 dronë.

    Diku tjetër, një vend depozitimi gazi pranë Kazanit u godit nga një sulm me dron në rajonin jugperëndimor të Tatarstanit, kanë bërë të ditur zyrtarët lokalë, pa raportuar për viktima.

    Ukraina ka njoftuar se Rusia gjithashtu lëshoi ​​dhjetëra dronë në të gjithë Ukrainën gjatë natës, derisa alarme të shumta për sulm ajror u dëgjuan brenda dhe përreth Kievit.

    Videot e postuara në internet duket se konfirmojnë të paktën disa nga pretendimet – megjithëse Ministria e Mbrojtjes në Moskë thotë se raketat e prodhuara nga SHBA-ja dhe Britania u rrëzuan mbi Bryansk dhe mbi Detin e Zi.

    Ukraina po përpiqet të zmbrapsë, sido që të mundet, përparimet ushtarake ruse në terren, një javë para inaugurimit të presidentit të zgjedhur amerikan, Donald Trump.

    Autoritetet në Kiev janë nën presion nga administrata amerikane për të ulur moshën e rekrutimit dhe për t’i mundësuar asaj dërgimin e më shumë ushtarëve në vijat e frontit. /BBC.

    Përgatiti: Rexhep Maloku/Kallxo.com

  • NATO-ja lanson mision special për mbrojtjen e kabllove kritike nënujore

    NATO-ja ka lansuar një mision të ri për të ngritur mbikëqyrjen e anijeve në Detin Baltik pas dëmtimit ose këputjes së disa kabllove nëndetare kritike vjet, ka raportuar të martën (14.01.2025) televizioni britanik, BBC.

    Shefi i NATO-s, Mark Rutte, ka thënë se misioni i njohur si “Roja Baltike” do të përfshijë më shumë patrullime ajrore, detare dhe dronësh.

    Njoftimi është bërë në një samit në Helsinki, ku po marrin pjesë të gjitha vendet e NATO-s që kanë dalje në Detin Baltik – Finlanda, Estonia, Danimarka, Gjermania, Letonia, Lituania, Polonia dhe Suedia.

    Megjithëse nuk e ka drejtuar gishtin direkt kah Rusia për dëmtimin e kabllove, Rutte ka thënë se NATO-ja do të fuqizojë monitorimin e “flotës në hije” të Moskës – anije pa pronësi të qartë që përdoren për të bartur produkte që janë nën embargon e NATO-s.

    Tensionet ndërmjet vendeve të NATO-s dhe Rusisë janë ngritur vazhdimisht prejse Rusia ndërmori invazionin e saj në Ukrainë në shkurtin e vitit 2022.

    “Ka një arsye për këtë shqetësim të madh” për dëmin infrastrukturor, ka theksuar Rutte. Ai ka shtuar se NATO-ja do të kundërpërgjigjej ndaj aksidenteve të tilla me vendosmëri, me shoqërimin e pjesëtarëve të anijeve në bord dhe, nëse është e nevojshme, edhe me marrje të anijeve.

    Ai ka refuzuar të ndajë më shumë hollësi për numrin e aseteve që do të marrin pjesë në nismën e “Rojës Baltike”, duke thënë njëherësh se plani mund të ndryshojë rregullisht dhe se nuk dëshiron “ta bëjë armikun më të zgjuar sesa ai ose ajo është tani”.

    “Infrastruktura nënujore është thelbësore jo vetëm për furnizimin me energji elektrike, por edhe për shkak se 95 për qind e trafikut të internetit sigurohet nëpërmjet kabllove nënujore” – ka shtuar Rutte. Ai ka thënë se “1.3 milion kilometra kabllo garantojnë transaksione financiare ditore në vlerë prej 10 bilionë dollarësh”.

    Në një postim në “X”, ai ka thënë se NATO-ja do të bëjë çmos që “të sigurojë sigurinë e infrastrukturës tonë kritike” dhe të gjithçkaje që është e rëndësishme për vendet anëtare të saj.

    Muajve të fundit ka pasur ngritje të theksuar të dëmtimit të infrastrukturës nënujore në Baltik.

    Përgatiti: Rexhep Maloku / Kallxo.com

  • Ministri i Mbrojtjes kërcënon Netanyahun me dorëheqje shkaku i ujdisë së armëpushimit në Gazë

    Ministri i së djathtës ekstreme i Mbrojtjes i Izraelit, Itamar Ben-Gvir ka kërcënuar të martën, më 14.01.2025, se do të japë dorëheqje nga Kabineti i Qeverisë së Benjamin Netanyahu – nëse Kryeministri pajtohet që të ketë marrëveshje armëpushimi dhe për lirimin e pengjeve izraelite nga Gaza, në kohën kur po zhvillohen negociatat në Katar – raporton Reuters.

    Ben-Gvir, largimi i të cilit nuk do ta rrëzonte Qeverinë e Netanyahut, i ka bërë thirrje ministrit të Financave, Bezazel Smotrich që t’i bashkohen në përpjekjen e tij të fundit për ta pamundësuar arritjen e Marrëveshjes, të cilën e ka quajtur si kapitullim të rrezikshëm para ‘Hamasit’.

    “Kjo lëvizje është mundësia jonë e vetme për ta parandaluar ekzekutimin (e Marrëveshjes) dhe ia parandalon Izraelit dorëzimin para ‘Hamasit’ pas më shumë se një viti të luftës së përgjakshme, ku 400 ushtarë të IDF-së (Forcave Izraelite të Mbrojtjes) kanë rënë në Rripin e Gazës dhe për të siguruar se vdekjet e tyre nuk do të shkojnë huq.” – ka shkruar Ben-Gvir në X.

    Smotrich ka thënë të hënën, më 13.01.2025, se kundërshton ujdinë, por nuk ka kërcënuar se do ta prishë koalicionin me Netanyahun. Shumica e Ministrave pritet ta mbështesin një ujdi armëpushimi të ndarë në faza, që përfshin ndaljen e luftimeve dhe lirimin e pengjeve.

    Përgatiti: Rexhep Maloku – Kallxo.com