Ballina

Kategori: Botë

  • BBC: Armëpushimi mund t’i ndalë vrasjet, por nuk i jep fund konfliktit

    Një zyrtar palestinez i ka thënë BBC-së se “Hamasi” do t’i lirojë tri ushtare në ditën e parë të armëpushimit. Ndërmjetësit në Doha po mundohen që sa më parë të nisë zbatimi i armëpushimit. Madje qysh të enjten mbrëma, e jo të dielën – shkruan Jeremy Bowen, në një analizë në BBC.

    Derisa armëpushimi nuk do të hyjë në zbatim, lufta që nisi kur “Hamasi” sulmoi Izraelin më 7 tetor 2023, ende po vazhdon. Së paku, 12 palestinezë janë vrarë prej sulmeve izraelite në Gazë veriore në kohën kur po bëhej i njohur lajmi për armëpushimin.

    Në atë që ka qenë pothuajse ritual për pesëmbëdhjetë muaj me radhë, pamjet nga Gaza veriore kanë treguar trupat e viktimave që po barteshin me ambulanca dhe të shtrirë në rresht para një Spitali.

    Armëpushimi është një arritje e konsiderueshme diplomatike – vlerëson BBC në analizën pas lajmit për arritjen e ujdisë për armëpushimin. Versione të Marrëveshjes janë vendosur në tavolinë, prej njoftimit të presidentit Joe Biden në maj vjet. “Hamasi” dhe Izraeli fajësonin njëri-tjetrin për vonimin e arritjes së Marrëveshjes.

    Në Khan Younis në Gazë, gazetarët që po punonin për BBC-në kanë filmuar palestinezët duke vallëzuar e brohoritur, derisa po bëhej e qartë se ishte arritur Marrëveshja për armëpushimin.

    Izraeli nuk i lejon gazetarët e huaj të hyjnë në Gazë për të rpaortuar lirisht, kështu që BBC-ja dhe organizatat e tjera informative mbështeten te gazetarët e besueshëm palestinezë, për të mbledhur informacione për BBC-në. Raportimi prej 15 muajsh nga lufta do të ishte i pamundshëm pa ta. Izraeli ka vrarë më shumë se 200 gazetarë palestinezë në Gazë.

    “Njerëzit janë lodhur me shpirt”

    Umm Muhammed, një grua e moshuar palestineze, i ka thënë njërit prej gazetarëve që punojnë për BBC-në se po ndihej e lumtur dhe e lehtësuar.

    “Dhimbja është davaritur pak, megjithëse ende dhemb. Shpresojmë se do t’ia marrë anën gëzimi. Le të lirohen të burgosurit dhe të trajtohen të plagosurit. Njerëzit janë lodhur me shpirt.” – ka thënë ajo.

    Pos mbijetesës nuk është se kanë për çfarë tjetër të festojnë palestinezët në Gazë. Izraeli ka vrarë pothuajse 50 mijë palestinezë. Më shumë se dy milionë persona janë detyruar të zhvendosen prej shtëpive të tyre, prej aksioneve të ushtrisë izraelite.

    Kundërpërgjigjja e Izraelit ndaj sulmeve të “Hamasit” më 7 tetor 2023, ku u vranë pothuajse 1.200 persona, shumica izraelitë, e ka kthyer Gazën në gërmadhë. Sipas Ministrisë së Shëndetësisë, të udhëhequr nga “Hamasi”, sulmet izraelite kanë vrarë pothuajse pesëdhjetë mijë persona – luftëtarë dhe civilë. Një studim i kryer së fundmi nga revista shkencore për mjekësi, “Lancet” ka treguar se kjo shifër mund të jetë edhe më e madhe.

    Shpresë edhe në Tel-Aviv

    Në Tel-Aviv kishte gjithashtu momente lehtësimi dhe frymëmarrjeje për familjet dhe përkrahësit e pengjeve izraelite, të gjallë apo të vdekur. Në fazën fillestare 33 gra, pleq dhe të sëmurë e të plagosur pritet të lirohen në gjashtë javët e ardhshme në këmbim të qindra të arrestuarve dhe të burgosurve palestinezë, por e ardhmja e pengjeve të tjera varet prej negociatave të ardhshme.

    Negociatat në gazën e dytë të Marrëveshjes për Lirimin e pengjeve të mbetura izraelite në këmbim të palestinezëve të burgosur dhe tërheqja izraelite nga Gaza pritet të nisë 16 ditë pas fuqizimit të Marrëveshjes.

    Sfida e parë e madhe është që të sigurohet se Marrëveshja po zbatohet. Diplomatë të lartë perëndimorë druajnë se pas fazës së parë 42-ditëshe do të ketë rishpërthim të luftës.

    Dhe, lufta në Gazë ka pasoja të menjëhershme në mbarë Lindjen e Mesme. Nuk shpiu drejt asaj, që shumëkush i druante, një lufte të përgjithshme në rajon. Administrata e Bidenit ka marrë lavdatën për këtë, por shkaktoi kokëçarje të mëdha gjeostrategjike.

    Dobësimi i Boshtit të Rezistencës

    “Hamasi” është ende në gjendje të luftojë, por është hije e asaj çfarë ishte. Kryeministri izraelit, Benjamin Netanyahu dhe ish-ministri i tij i Mbrojtjes janë akuzuar për “krime lufte” prej Gjykatës Ndërkombëtare Penale. Gjykata Ndërkombëtare e Drejtësisë është duke hetuar një rast të ngritur nga Afrika Jugore, që e akuzon Izraelin për gjenocid.

    Pasi “Hezbollahu” në Liban ndërhyri në luftë, u shtyp pothuajse barabar prej ofensivës izraelite. Ky ishte një faktor që çoi drejt kolapsit të regjimit të Assadit në Siri. Irani dhe Izraeli shkëmbyen sulme të drejtpërdrejta – duke e dobësuar Iranin. Është shpartalluar rrjeti iranian i aleatëve dhe grupeve besnike, të njohura si Boshti i Rezistencës.

    Huthët në Jemen kishin ndërprerë shumicën e qarkullimit me anije ndërmjet Europës dhe Azisë përgjatë Detit të Kuq. Tani raportohet se ata kanë bërë të ditur armëpushimin e vetëshpallur. Prejse ata nisën të sulmonin anijet në fillim të luftës, kanë thënë se vetëm një ujdi armëpushimi në Gazë do t’i frenonte ata.

    Me fat, vullnet politik dhe përpjekje të madhe diplomatike mund të mbahet në fuqi edhe armëpushimi, pavarësisht shkeljeve të pashmangshme – raporton BBC.

    Por pas 15 muajsh të luftës në Gazë, konflikti, më shumë se njëshekullor, është po aq i hidhur dhe i vështirë për t’iu prerë udhë se kurrë më parë.

    Armëpushimi nuk i jep fund konfliktit. Pasojat e shkatërrimit dhe numrit kaq të madh të vdekjeve do t’i ndjejë së paku edhe një brez.

    Përgatiti: Rexhep Maloku – Kallxo.com

  • Polonia akuzon Rusinë se po planifikon akte terroriste kundër linjave ajrore në mbarë botën

    Kryeministri polak Donald Tusk akuzoi të mërkurën Rusinë se po planifikon akte sabotazhi në mbarë botën, mes tyre “akte terroriste” kundër linjave ajrore.

    Zoti Tusk i bëri komentet në Varshavë në një konferencë të përbashkët shtypi me Presidentin ukrainas Volodymr Zelenskyy.

    “Nuk do të hyj në detaje, por mund të konfirmoj se ekziston frika se Rusia po planifikon akte terrori kundër linjave ajrore, jo vetëm kundër Polonisë, por në mbarë botën”, tha ai.

    Kremlini i ka hedhur poshtë pretendimet e mëparshme perëndimore se Rusia ka paguar për akte sabotazhi dhe sulme në Evropë.

    Zyrtarët perëndimorë të sigurisë dyshojnë se zbulimi rus qëndron pas një disa komplotesh duke vendosur pajisjeve shpërthyese në aeroplanë që tranportonin mallra e produkte, e që fluturonin drejt Amerikës së Veriut. Mes tyre dy aeroplanë që morën flakë vitin e kaluar në Gjermani dhe Angli, ndërsa po ngarkonin pako për transport.

    Qeveria e Varshavës, me qasje pro Bashkimit Evropian, thotë se Rusia po kryen akte të luftës hibride kundër Polonisë dhe vendeve të tjera perëndimore si hakmarrje për mbështetjen që ato po i japin Ukrainës, në luftën e saj kundër agresionit rus.

    Polonia ka akuzuar Rusinë dhe aleatin e saj Bjellorusinë, për nxitje të një krize emigracioni në kufirin lindor të BE-së me Bjellorusinë, në mënyrë që të krijojë kaos dhe përçarje në Evropë.

    Vitin e kaluar, ministri i jashtëm i Polonisë urdhëroi mbylljen e një prej tre konsullatave ruse në këtë vend, si përgjigje ndaj akteve të sabotazhit, që përfshinin ndër të tjera, zjarrvënie të qëllimta, që siç tha ai, ishin porositur nga Moska./VOA

  • Biden konfirmon marrëveshjen e armëpushimit mes Izraelit dhe Hamasit

    Presidenti i Shteteve të Bashkuara Joe Biden konfirmoi të mërkurën arritjen e marrëveshjes së armëpushimit dhe për lirimin e pengjeve mes Izraelit dhe Hamasit.

    “Mund të deklaroj që marrëveshja e armëpushimit dhe pengjeve është arritur ndërmjet Izraelit dhe Hamasit,” deklaroi Presidenti Biden nga Shtëpia e Bardhë. Ai tha se marrëveshja ishte arritur pas 15 muaj vuajtjesh dhe do të shoqërohet me shtimin e ndihmave humanitare në Gazë.

    “Luftimet në Gazë do të ndërpriten dhe së shpejti pengjet do të kthehen në shtëpi tek familjet e tyre”, tha ai.

    “Sot, pas shumë muajsh diplomacie intensive nga Shtetet e Bashkuara me Egjiptin dhe Katarin, Izraeli dhe Hamasi arritën një marrëveshje armëpushimi dhe për lirimin e pengjeve. Kjo marrëveshje do t’i ndalë luftimet në Gazë, do të shtojë ndihmat shumë të nevojshme humanitare për civilët palestinezë dhe do t’i bashkojë pengjet me familjet e tyre pas më shumë se 15 muajsh”, tha Presidenti Biden nga Shtëpia e Bardhë.

    Kryeministri i Katarit Sheikh Mohammed bin Abdulrahman Al Thani gjithashtu njoftoi se marrëveshja e armëpushimit ndërmjet Izraelit dhe Hamasit do të hyjë në fuqi të dielën. Sipas tij, negociatorët po punojnë me Izraelin dhe Hamasin për hapat që duhet ndërmarrë drejt zbatimit të marrëveshjes.

    Palestinezët festuan nëpër rrugët e Gazës, ku po përballen me krizë humanitare për shkak të mungesës së ushqimeve, ilaçeve dhe karburanteve.

    “Jam e lumtur, po qaj, po janë lot gëzimi”, tha Ghada, një nënë palestineze e pesë fëmijëve.

    Familjarët e pengjeve izraelite dhe miqtë e tyre po ashtu e pritën me gëzim lajmin e armëpushimit.

    “Ne, familjet e 98 pengjeve, e mirëpresim me gëzim të jashtëzakonshëm dhe me lehtësim marrëveshjen për të na i kthyer të dashurit tanë në shtëpi”, thanë ata përmes një deklarate.

    Presidenti Joe Biden gjithashtu vlerësoi “punën e fortë të diplomacisë amerikane” për arritjen e marrëveshjes.

    “Kam paraqitur kornizën e saktë të këtij plani më 31 maj 2024, pas së cilës ai u mbështet unanimisht nga Këshilli i Sigurimit i OKB-së”, theksoi Presidenti Biden. “Diplomacia ime nuk pushoi kurrë në përpjekjet për ta realizuar këtë.”

    Komentet e Biden erdhën pakë kohë pasi presidenti i zgjedhur Donald Trump në një postim në mediat sociale pretendoi se fitorja e tij në zgjedhje ishte ajo që solli marrëveshjen.

    Presidenti i zgjedhur Trump mbështet marrëveshjen e armëpushimit

    Presidenti i zgjedhur Donald Trump përshëndeti marrëveshjene e armëpushimit në Rripin e Gazës, e cila përfshinë lirimin e një pjese të pengjeve përmes një postimi në rrjetin e tij social Truth Social.

    “Ne kemi një marrëveshje për lirimin e pengjeve në Lindjen e Mesme. Ata do të lirohen së shpejti. Faleminderit!”, thuhet në postimin e Presidentit të zgjedhur Trump.

    I dërguari i posaçëm i Presidentit të zgjedhur Trump iu bashkua këshilltarit të Presidentit Biden për Lindjen e Mesme në bisedimet e zhvilluara në Doha të Katarit.

    “Marrëveshja epike e armëpushimit u bë e mundur për shkak të fitores sonë historike në nëntor, që sinjalizoi të gjithë botën se administrata ime kërkon paqe dhe marrëveshje të nogociuara për të garantuar sigurinë e të gjithë amerikanëve dhe aleatëve tanë”, thuhet në postimin e zotit Trump. “Jam i gëzuar që pengjet amerikane dhe izraelite do të kthehen në shtëpi dhe do të bashkohen me familjet dhe të dashurit e tyre”.

    Presidenti i zgjedhur Trump u zotua javën e kaluar se nëse nuk do të arrihej një marrëveshje armëpushimi para fillimit të mandatit të tij, atëherë Hamasi do të përballej me pasoja të mëdha.

    Zoti Trump gjithashtu tha se i dërguari i tij për Lindjen e Mesme, Steve Witkoff do të vazhdojë “të punojë ngushtë me Izraelin dhe aleatët tanë për t’u siguruar që Gaza kurrë të mos bëhet strehë e sigurtë për terroristët”.

    Komentet e Biden erdhën pakë kohë pasi presidenti i zgjedhur Donald Trump në një postim në mediat sociale pretendoi se fitorja e tij në zgjedhje ishte ajo që solli marrëveshjen.

    Netanyahu: Marrëveshja e armëpushimit ende nuk është arritur

    Zyra e Kryeministrit izraelit Benjamin Netanyahu tha se marrëveshja e armëpushimit me Hamasin ende nuk është arritur dhe se detajet e fundit të kësaj marrëveshje ende janë duke u shqyrtuar. Njoftimi nga zyra e tij vjen pasi një numër ndërmjetësish thanë se Izraeli dhe Hamasi kishin rënë dakord për një marrëveshje armëpushimi në Gazë dhe lirimin e dhjetëra pengjeve pas luftës 15 mujore.

    Zyra e Kryeministrit Netanyahu tha përmes një deklarate se ka ende detaje të pazgjidhura dhe shpresonte se “zgjidhja e tyre do të përfundonte sonte”

    Marrëveshja pritet të ndërprej përkohësisht luftimet dhe jep shpresë për përfundimin e njërit prej konflikteve më të përgjakshme mes Izraelit dhe Hamasit, që destabilizoi tërë Lindjen e Mesme dhe nxiti protesta nëpër gjithë botën.

    Paraprakisht, zyrtarë pranë bisedimeve njoftuan më herët të mërkurën se Izraeli dhe Hamasi arritën marrëveshje për armëpushim në Gazë, pas konfliktit 15 muajsh me dhjetëra mijëra vikatima dhe që tronditi Lindjen e Mesme.

    Qeveria e Izraelit do të votojë për marrëveshjen ditën e enjte, sipas një zytari qeveritar izraelit.

    Marrëveshja, e cila ende nuk është shpallur zyrtarisht, parasheh një fazë fillestare të armëpushimit prej gjashtë javësh dhe përfshin një tërheqje graduale të forcave izraelite nga Gaza dhe lirimin e pengjeve që po mbahen nga Hamasi në këmbim të palestinezëve të burgosur nga Izraeli, i tha një zyrtar agjencisë së lajmeve Reuters.

    Marrëveshja vjen pas përpjekjeve të vazhdueshme për të ndërmjetësuar një marrëveshje nga Egjipti dhe Katari, me mbështetjen e Shteteve të Bashkuara.

    Marrëveshja u arrit në prag të inaugurimit të Presidentit të zgjedhur amerikan Donald Trump, që do të mbahen me 20 janar.

    Hamasi i tha agjencisë Reuters se delegacioni i tij u ka dorëzuar ndërmjetësve miratimin e grupit militant për marrëveshjen e armëpushimit dhe për kthimin e pengjeve.

    Marrëveshja parasheh futjen e 600 kamionëve me ndihma humanitare çdo ditë në Gazë , 50 prej të cilëve me karburant, ndërkohë që gjysma e tyre do të dërgohen në pjesën veriore të Gazës.

    Negociatat për fazën e dytë të marrëveshjes pritet të fillojnë para ditës së 16 të fazës së parë dhe pritet të përfshijnë lirimin e të gjitha pengjeve të mbetura, si dhe të ushtarëve izraelitë të marrë peng nga Hamasi. Negociatat do të trajtojnë edhe armëpushimin e përhershëm dhe tërheqjen e plotë të ushtarëve izraelitë./VOA

  • Reuters: Izraeli dhe Hamasi arrijnë marrëveshje për armëpushim

    Negociatorët kanë arritur të mërkurën (më 15.01.2025) marrëveshje armëpushimi për luftën e Gazës midis Izraelit dhe Hamasit, i ka deklaruar Reutersit një zyrtar i informuar me negociatat.

    Marrëveshja ndodh pas 15 muajsh konflikti që ka vrarë dhjetëra mijëra palestinezë dhe ka ndezur flakët e luftës në Lindjen e Mesme.

    Marrëveshja, që pritet të shpallet edhe zyrtarisht, përshkruan një fazë fillestare gjashtëjavore të armëpushimit dhe përfshin tërheqjen graduale të forcave izraelite nga Gaza dhe lirimin e pengjeve që po mbahen nga Hamasi në këmbim të të burgosurve palestinezë që gjenden në burgjet e Izraelit, ka deklaruar për Reuters një zyrtar i përfshirë në procesin negociator.

    Marrëveshja arrihet pas disa muajsh negociatash të ndërmjetësuara nga ndërmjetësuesit e Egjiptit dhe të Katarit, me mbështetjen e Shteteve të Bashkuara dhe erdhi pak përpara inaugurimit të presidentit të zgjedhur të SHBA-së, Donald Trump, më 20 janar.

    Hamasi, grupi militant palestinez që udhëhiqte Gazën, i ka deklaruar Reutersit se delegacioni i tij u kishte dhënë ndërmjetësuesve miratimin për marrëveshjen e armëpushimit dhe kthimin e pengjeve.

    Një zyrtar palestinez, i cili kërkoi të mos identifikohej, i ka theksuar Reutersit më herët se Hamasi ka dhënë miratimin verbal për propozimin e armëpushimit dhe kthimit të pengjeve në negociatat e Katarit dhe ishte duke pritur për më shumë informacione për të dhënë miratimin përfundimtar me shkrim.

    Ministri i Jashtëm izraelit, Gideon Saar, ka njoftuar se do të ndërpresë vizitën në Europë dhe do të kthehet në Izrael gjatë natës për të marrë pjesë në votimet e kabinetit të sigurisë dhe qeverisë për marrëveshjen – që do të thotë se votimi do të zhvillohet sonte.

    Trupat izraelite pushtuan Gazën pasi persona të armatosur të udhëhequr nga Hamasi depërtuan nëpër barrierat e sigurisë dhe hynë në komunitetet izraelite më 7 tetor 2023, duke vrarë 1,200 ushtarë dhe civilë dhe rrëmbyer më shumë se 250 të huaj dhe izraelitë.

    Fushata e Izraelit në Gazë ka vrarë më shumë se 46 mijë njerëz, sipas shifrave të Ministrisë së Shëndetësisë të Gazës, dhe e ka kthyer enklavën bregdetare në një shkretëtirë rrënojash me qindra mijëra që i mbijetuan të ftohtit të dimrit në tenda dhe strehimore të improvizuara.

    Ndërsa inaugurimi i tij afrohej, presidenti i zgjedhur Trump përsëriti kërkesën e tij që një marrëveshje të arrihej shpejt, duke paralajmëruar hakmarrje nëse pengjet nuk do të liroheshin. I dërguari i tij në Lindjen e Mesme, Steve Witkoff, punoi me ekipin e presidentit Joe Biden për ta arritur marrëveshjen.

    Përgatiti: Rexhep Maloku/Kallxo.com

  • TikTok-u përgatitet për mbyllje në SHBA prej të dielës – raporton Reuters

    TikTok-un planifikon të mbyllet për përdoruesit amerikanë prej të dielës, kur mund të hyjë në fuqi ndalesa federale për këtë media sociale – nëse Gjykata Supreme nuk vendos ta bllokojë zbatimin e Vendimit, kanë bërë të ditur të mërkurën, më 15.01.2025, për Agjencinë e lajmeve Reuters, burime të informuara me rrjedhat.

    Rezultati i mbylljes do të ishte ndryshe prej atij që tashmë është përcaktuar me Ligj.

    Ligji do të mandatonte ndalesën vetëm për shkarkimin e TikTok-ut në Apple, përderisa përdoruesit ekzistues do të mund të vazhdonin ta përdornin edhe për njëfarë kohe.

    Sipas planit të TikTok-ut, njerëzit që mundohen ta hapin aplikacionin do të shohin mesazhe, që i drejtojnë ata të qasen në uebfaqe me informacione për ndalesën, kanë bërë të ditur personat e informuar me rrjedhat – duke kërkuar që t’u ruhet identiteti për shkak të ndjeshmërisë së çështjes.

    Kompania planifikon, gjithashtu, që t’u japë përdoruesve një opsion për shkarkimin e të dhënave, me qëllim që të mund të kenë një databazë të të dhënave personale – kanë thënë burimet për Reuters.

    Mbyllja e shërbimeve nuk kërkon planifikim të mëtutjeshëm, kanë bërë të ditur burimet – duke theksuar se shumica e operacioneve kanë vazhduar si zakonisht edhe këtë javë.

    Nëse ndalimi përmbytet, TikTok-u do të ishte në gjendje të rikthente shërbimet për përdoruesit amerikanë në një periudhë relativisht të shkurtër – ka thënë njëri burim.

    TikTok-u dhe kompania e tij kineze mëmë, ByteDance nuk ka komentuar menjëherë kërkesat për koment.

    Mediumi amerikan i teknologjisë “The Information” raportoi së pari lajmin.

    60% e ByteDance është në pronësi të investitorëve institucionalë si BlackRock dhe General Atlantic, ndërsa themeluesit dhe punonjësit e tij zotërojnë 20% secili. Byte Dance ka më shumë se shtatë mijë punëtorë në Shtetet e Bashkuara.

    Presidenti Joe Biden prillin e kaluar nënshkroi një Ligj që i kërkonte ByteDancet të shiste asetet e saj në SHBA deri më 19 janar 2025, ose ndryshe do të përballej me ndalim mbarëkombëtar.

    Javën e kaluar, Gjykata e Lartë amerikane pritej të mbështeste Ligjin, pavarësisht thirrjeve të presidentit të sapozgjedhur, Donald Trump dhe ligjvënësit për të zgjatur afatin.

    Trump, inaugurimi i të cilit vjen një ditë pas hyrjes në fuqi të Ligjit, ka thënë se duhet të ketë kohë pasi të marrë detyrën për të ndjekur një “zgjidhje politike” të çështjes.

    TikTok-u dhe ByteDance kanë kërkuar, të paktën, shtyrje të zbatimit të Ligjit, për të cilin ata thonë se shkel Amendamentin e Parë të Kushtetutës amerikane, kundër cenimit të fjalës së lirë nga Qeveria.

    Përgatiti: Rexhep Maloku – Kallxo.com