Ballina

Kategori: Botë

  • Vriten dy gjykatës të Gjykatës Supreme në Iran

    Dy gjykatës të njohur të Gjykatës Supreme të Iranit janë vrarë në një sulm në selinë e kësaj gjykate, thanë zyrtarët.

    Viktimat janë identifikuar si Ali Razini dhe Mohammad Moghiseh. Një gjykatës tjetër po ashtu është plagosur gjatë sulmit që ndodhi në Pallatin e Drejtësisë në Teheran.

    Zyra për media e gjyqësorit të Iranit raportoi se një person i armatosur ishte “infiltruar në Gjykatën Supreme në një akt të planifikuar për vrasjen e dy gjykatësve.

    Motivi i sulmit ende nuk është i qartë.

    Hetimi fillestar gjeti se sulmuesi nuk kishte ndonjë rast gjyqësor para kësaj gjykate dhe as lidhje të tjera, tha zyra për media e gjyqësorit iranian.

    Gjykata Supreme është autoriteti më i lartë gjyqësor në Iran dhe kreu i saj emërohet nga lideri suprem. Selinë e ka në Teheran dhe degë ka në mbarë vendin.

    Detajet e incidentit mbeten të paqarta. Zyra për media e gjyqësorit raportoi se sulmuesi “u vetëvra” pas të shtënave, edhe pse ky informacion nuk është konfirmuar.

    Mediat tjera iraniane kanë raportuar se sulmuesi ishte anëtar i një “force infiltruese të sigurisë”, i cili fillimisht kishte plagosur me thikë një roje, ai kishte marrë armën dhe më pas kishte kryer vrasjet.

    Agjencia gjysmëzyrtare e lajmeve Mehr, duke cituar burime, raportoi se gjyqtarët u sulmuan me armë zjarri para se sulmuesi të bënte vetëvrasje.

    Dy viktimat kishin poste të rëndësishme në sistemin e fuqishëm gjyqësor të Iranit. Gjykatësi Mohammad Moghiseh kishte gjykuar disa raste politike, përfshirë rastet që përfshinin mbështetësit e Lëvizjes opozitare të Gjelbër më 2009. Ai ishte nën sanksione të Bashkimit Evropian dhe Shteteve të Bashkuara për shkelje të të drejtave të njeriut.

    Gjykatësi Ali Razini kishte mbajtur shumë poste të larta dhe ishte akuzuar nga opozita në Iran se ishte përfshirë në një sërë vrasjes pa gjyq të të burgosurve politikë më 1988/RadioEvropaeLirë/.

     

  • J.D Vance, profili i një prej nënpresidentëve më të rinj në moshë në historinë e SHBA

    Republikani JD Vance vjen nga një familje e thjeshtë amerikane me prejardhje modeste. Ai u rrit në mes vështirësish ekonomike një qytet industrial të shtetit Ohajo. Më pas ai ndoqi studimet në një nga universitetet më të mira të vendit dhe tashmë merr detyrën e nënpresidentit, si një prej tre njerëzve më të rinj në moshë që kanë mbajtur këtë post në historinë amerikane.

    Pak minuta pasi u zgjodh nënpresident i Shteteve të Bashkuara, JD Vance deklaroi se:

    “Pas rikthimit më madhështor politik në historinë amerikane, ne do të udhëheqim rikthimin më të madh ekonomik në histori, nën drejtimin e Donald Trump-it”.

    Skena kombëtare në të cilën ai është ngjitur, është larg prej rrugicave të pjesës qendrore të Amerikës. Qyteti Jackson në Kentucky, nuk është vendi ku lindi zoti Vance. Por ai e quan atë vendin e tij.

    “Kur i propozova bashkëshortes time, i thashë: ‘E dashur, vij me një borxh prej 120 mijë dollarësh nga studimet juridike dhe një parcelë të rezervuar në një varrezë në lindje të shtetit Kentucky”, tha zoti Vance gjatë kandidimit në zgjedhje.

    Gjyshen e zotit Vance e thërrisnin ‘Nëna’.

    “Vinte gjithnjë këtu me gjyshen. Ajo e sillte në mal, që ai të shihte se si ishte jeta dhe ishte e dukshme që atij i pëlqente”, thotë John Hollan, sherifi i kontesë Breathitt, Kentucky.

    Ai lindi në Middletown, të Ohajos dhe u rrit më shumë nga gjyshja e rreptë, që ngrinte zërin shpesh dhe mbante në shtëpi 19 armë të mbushura.

    Duke mbajtur mbiemrin e njerkut të tij, JD Hamel fitoi zgjedhjet e tij të para. Për rastësi ai ishte dhe nënpresident i klasës së tij në shkollën e mesme në Middletown. Ai shërbeu si marins dhe u diplomua me rezultate të shkëlqyera në Universitetin Shtetëror të Ohajos.

    Më pas, ai vazhdoi studimet në Universitetin Yale, ku u njoh me studenten Usha Chilukuri – bashkëshorten e tij të ardhshme.

    Zoti Vance u bë i njohur në nivel kombëtar për shkak të librit të tij të suksesshëm të vitit 2016 për klasën punëtore të Amerikës, që më pas u shndërrua edhe në film me titullin “Hillbilly Elegy”. Në film, aktorja Glenn Close luan rolin e gjyshes së tij të rreptë

    “Je ti që duhet të vendosësh nëse dëshiron të bëhesh dikush apo jo?”, i thotë ajo në film.

    Me mbështetjen e ish-Presidentit Donald Trump, djaloshi nga Ohajo që dashuron shtetin Kentaki u zgjodh senator i shtetit të Ohajos. Dhe vetëm dy vite më vonë u njoftua se zoti Trump e përzgjodhi për të kandiduar për nënpresident të Shteteve të Bashkuara. Zoti Vance pati megjithatë një fillim të vështirë, pasi e kishte quajtur në të kaluarën zotin Trump “moskokëçarës’ dhe pati deklaruar se “nuk do të bëhej kurrë mbështetës i tij”.

    Më pas, ndërsa kandidonte për nënpresident, politikat e zotit Vance reflektonin ato të zotit Trump. Dhe ai dha këtë përgjigje kur u pyet nëse “ish-presidenti i kishte humbur zgjedhjet e 2020-ës?”:

    “Jo, mendoj se ka probleme serioze me 2020-ën. Pra, duke iu pergjigjur pyetjes a i humbi Donald Trump-i zgjedhjet? Jo, do te thosha une”.

    Zoti Vance ka përqasje të ashpër në lidhje me Kinën dhe Azinë Lindore, kundërshton ndihmën ushtarake për Ukrainën dhe……i pyetur për konfliktin Izrael-Hamas tha se:

    “Kamala Harris, nga njëra anë thotë se shqetësohet vërtet për viktimat në radhët e civilëve. E megjithatë, ajo refuzon t’i japë Izraelit armët që i mundësojnë të minimizojë viktimat civile”.

    Në moshën 40-vjeçare, zoti Vance do të jetë nënpresidenti i tretë më i ri në historinë amerikane/VoA/.

  • Armëpushimi mes Izraelit dhe Hamasit hyn në fuqi mëngjesin e 19 janarit

    Ministria e Jashtme e Katarit tha se armëpushimi mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – do të hyjë në fuqi të dielën e 19 janarit në orën 06:30 sipas kohës lokale (07:30 sipas kohës në Kosovë).

    Kjo pasi, mëngjesin e së shtunës, Qeveria në Izrael miratoi marrëveshjen për armëpushim në Gazë.

    Ndërmjetësit e bisedimeve, Shtetet e Bashkuara dhe Katari njoftuan të mërkurën për marrëveshjen e armëpushimit, por pakti u vu në pikëpyetje për më shumë se një ditë, pasi kryeministri izraelit, Benjamin Netanyahu, insistoi se kishte pasur ndërlikime të minutës së fundit dhe fajësoi Hamasin për këtë. Të premten, kabineti i sigurisë i Izraelit i rekomandoi Qeverisë miratimin e marrëveshjes.

    Pakti parasheh lirimin e dhjetëra pengjeve dhe ndaljen e luftës 15-mujore me Hamasin, duke i sjellë të dyja palët një hap më pranë përfundimit të luftës më vdekjeprurëse dhe shkatërruese që kanë zhvilluar ndonjëherë.

    Sipas marrëveshjes, 33 pengje do të lirohen në gjashtë javët e ardhshme, në këmbim të lirimit të qindra palestinezëve të burgosur nga Izraeli.

    Netanyahu ka udhëzuar një task-forcë speciale që të përgatitet për pranimin e pengjeve.

    Nga pengjet që do të lirohen, 33 janë gra dhe fëmijë, burra mbi moshën 50-vjeçare, persona të sëmurë apo të plagosur.

    Pjesa e mbetur e pengjeve, përfshirë ushtarë, do të lirohen në fazën e dytë, e cila do të negociohet gjatë fazës së parë.

    Hamasi tha se nuk do të lirojë pengjet e mbetura, pas fazës së parë, pa një armëpushim afatgjatë dhe tërheqjen e plotë të Izraelit nga Rripi i Gazës.

    Grupi radikal palestinez është pajtuar për lirimin e tri pengjeve gra në ditën e parë të hyrjes në fuqi të marrëveshjes, katër në ditën e shtatë, ndërkaq të tjerët në pesë javët pasuese.

    Të burgosurit palestinezë do të lirohen po ashtu. Ministria e Drejtësisë e Izraelit ka publikuar listën e më shumë se 700 personave që do të lirohen në fazën e parë të armëpushimit. Të gjithë të burgosurit që gjenden në listë për lirim gjatë fazës së parë të marrëveshjes janë të rinj ose gra.

    Shërbimi i Burgjeve i Izraelit tha se do të transportojë të burgosurit, në vend të Komitetit Ndërkombëtar të Kryqit të Kuq, që u mor me transportin gjatë pauzës së parë të luftimeve në nëntorin e vitit 2023.

    Lufta në Gazë nisi më 7 tetor 2023, kur Hamasi sulmoi Izraelin duke vrarë afër 1.200 persona, shumica civilë, dhe duke rrëmbyer 250 të tjerë. Disa pengje u liruan gjatë një pauze njëjavore luftimesh në nëntorin e po atij viti.

    Ofensiva hakmarrëse e Izraelit ka lënë të vrarë më shumë se 46.000 palestinezë, shumica gra dhe fëmijë, sipas Ministrisë së Shëndetësisë në Gazë. Izraeli ka thënë se ka vrarë më shumë se 17.000 luftëtarë, por nuk ka ofruar dëshmi për këtë pretendim.

    Lufta në enklavën palestineze ka trazuar Lindjen e Mesme dhe ka nxitur protesta në gjithë botën/REL/.

  • Ceremonia e betimit të Trumpit do të mbahet brenda, për shkak të motit acar

    Presidenti i zgjedhur i Shteteve të Bashkuara, Donald Trump, njoftoi se inaugurimi i tij të hënën do të zhvillohet brenda ndërtesës së Kongresit amerikan në Uashington, për shkak të motit acar.

    Kjo do të jetë hera e parë në 40 vjetët e fundit që një president amerikan e bën betimin brenda dhe jo jashtë ndërtesës.

    “Një i ftohtë i Arktikut ka kapluar vendin. Nuk dua që njerëzit të dëmtohen, apo lëndohen në çfarëdo mënyre”, tha Trump të premten në rrjetin e tij social, Truth Social.

    Hera e fundit kur inaugurimi i zhvillua brenda ndërtesës për shkak të ftohtit të madh, ishte betimi i ish-presidentit republikan, Ronald Reagan, për mandatin e dytë presidenciale më 1985.

    Shërbimi Kombëtar i Motit ka parashikuar se temperatura do të jetë rreth -6 gradë celsius gjatë mesditës së hënë kur do ta bëjë betimin Trumpi. Gjatë inaugurimit të dytë të Reaganit, temperatura kishte rënë -14 gradë celsius.

    Trump tha se mbështetësit mund ta shikojnë ceremoninë në ekrane brenda Capital One Arena, një arenë sportive në qendër të Uashingtonit që ka kapacitet prej 20.000 ulësesh.

    Ai gjithashtu tha se parada e tij presidenciale, e cila ishte planifikuar të përfshinte bende muzikore dhe grupe të tjera që do të kalonin nëpër “Pennsylvania Avenue” pranë Shtëpisë së Bardhë, do të zhvendoset brenda Capital One Arena. Nuk është e qartë se si do të zhvillohet një paradë brenda arenës sportive.

    Trump tha se do t’i bashkohet turmës në arenën sportive pasi ta bëjë betimin.

    I ftohti acar ka ndikuar në disa inaugurime të të kaluarën.

    William Henry Harrison, presidenti i nëntë i SHBA-së, mbajti fjalimin më të gjatë të inaugurimit më 4 mars të vitit 1841, në kushte të lagështa dhe të ftohta, pa kapelë ose pallto.

    Ajo ngjarje dhe ai fjalim mendohet të kenë ndikuar në vdekjen e tij nga pneumonia. Ai vdiq një muaj pas marrjes së detyrës, duke e bërë presidencën e tij më jetëshkurtrën në historinë amerikane.

    Gjatë ceremonisë së dytë të betimit për presidentin, Ulysses S. Grant, më 4 mars 1873, disa kadetë dhe nënoficerë që qëndronin jashtë pa pallto, kolapsuan, ndërsa erërat e forta bënë që fjalimi i Grantit të mos dëgjohej as nga ata që ishin pranë tij në platformë, sipas një historie të botuar nga Shërbimi Kombëtar i Motit.

    Temperatura e ulët e mëngjesit prej -15 gradë celsius atë ditë mbetet dita më e ftohtë e marsit në e regjistruar ndonjëherë në Uashington/REL/.

  • Kabineti izraelit i Sigurisë miraton marrëveshjen me Hamasin

    Pasi miratimit nga Kabineti i Sigurisë pritet që edhe qeveria izraelite ta konfirmojë marrëveshjen e armëpushimit në Rripin e Gazës. Kjo marrëveshje pritet të hyjë në fuqi të dielën.

    Kabineti izraelit i Sigurisë rekomandoi miratimin e marrëveshjes së armëpushimit me me organizatën terroriste Hamas e cila dhe përfshin edhe kthimin e pengjeve.

    Kryeministri i Izraelit, Benjamin Netanyahu tha se pasi kabineti ta ratifikojë marrëveshjen, ajo do të hyjë në fuqi të dielën.

    Armëpushimi me organizatën terroriste Hamas është planifikuar të hyjë në fuqi të dielën në orën 11:15 (ora e Evropës Qendrore). Zyra e Netanyahut njoftoi gjithashtu se pritet që pengjet e parë izraelitë – tri gra – të lirohen nga Hamasi të dielën.

    Presidenti Isaac Herzog e përshëndeti miratimin e marrëveshjes së armëpushimit nga ana e kabinetit të sigurisë dhe tha: “Pres që qeveria të bëjë të njëjtën gjë së shpejti”.

    Sipas njoftimeve të “Times of Israel” Herzogu u shpreh se ky është një hap i rëndësishëm për përmbushjen e detyrimeve bazë që një shtet ka ndaj qytetarëve të tij/DW/.