Ballina

Kategori: Botë

  • Hamasi liron tetë pengje të tjera si pjesë e marrëveshjes së armëpushimit në Gazë

    Ushtria izraelite njoftoi se tetë pengje, përfshirë tre izraelitë dhe pesë shtetas tajlandezë, u liruan të enjten si pjesë e këmbimit të pengjeve dhe të burgosurve ndërmjet Izraelit dhe Hamasit të parashikuar me marrëveshjen e armëpushimit për t’i dhënë fund luftës 15 mujore në Gazë.

    Ushtarja izraelite Agam Berger iu dorëzua Kryqit të Kuq në kampin e refugjatëve Xhabalia në pjesën veriore të Gazës, prej nga shkoi në Izrael, ku u bashkua me prindërit e saj.

    “Falenderojmë Zotin për këtë moment dhe që heroina jonë Agam u kthye tek ne pas 482 ditëve në duart e armikut”, tha familja e ushtares Berger përmes një deklarate. “Tani Agami dhe familja jonë do të fillojmë procesin e shërimit, por shërimi nuk do të jetë i plotë pa kthimin e të gjitha pengjeve në shtëpi”.

    Pas disa orësh, autokolona e Kryqit të Kuq kaloi përmes një turme njerëzish dhe një skene kaotike në qytetin jugor Khan Younis ndërsa i i dorëzoi ushtrisë izraelite edhe dy pengje të tjera izraelite, si dhe shtetasit tajlandezë.

    Lirimi i tyre u vonua pasi militantët e armatosur patën vështirësi për të përmbajtur turmat e palestinezëve që kishin rrethuar makinat e Kryqit të Kuq. Më pas pengjet arritën të kalonin përmes turmës, të rrethuar nga persona të armatosur.

    “Po i shoh me ankth pamjet shokuese gjatë lirimit të pengjeve tona”, deklaroi Kryeministri izraelit Benjamin Netanyahu përmes një kumtese të lëshuar nga zyra e tij pak pas përfundimit të këmbimit. Ai tha se po “kërkon nga ndërmjetësit të sigurohen që skena të tilla të tmerrshme të mos ndodhin sërish dhe që siguria e pengjeve të garantohet”.

    Ushtria izraelite konfirmoi se grupi i pengjeve kishte kaluar në territorin izraelit. Pengjet e liruara u identifikuan si Arbel Yehoud dhe Gadi Moses dhe shtetasit tajlandezë si Thenna Pongsak, Sathian Suwannakhan, Sriaoun Watchara, Seathao Bannawat dhe Rumnao Surasak.

    Ushtria njoftoi se izraelitët do të bashkoheshin me familjarët e tyre, ndërsa zyrtarët qeveritarë tajlandezë do të takoheshin me shtetasit e tyre.

    Gjatë ditës, sipas marrëveshjes së armëpushimit, Izraeli pritet të lirojë 110 të burgosur palestinezë, përfshirë 30 të dënuar me burgim të përjetshëm për sulme të përgjakshme ndaj izraelitëve.

    Në bazë të marrëveshjes së armëpushimit, mbi 423,000 palestinezë janë kthyer në pjesën veriore të Gazës gjatë tre ditëve të fundit. Ata ishin në mesin e të zhvendosurve nën urdhrat e ushtrisë izraelite në fillim të luftës, në tetor të vitit 2023. Megjithatë, kthimi i tyre u përcoll me ndjenja të përziera meqë pothuajse se secili prej tyre ka të afërm apo miq që janë vrarë gjatë luftës dhe shumë prej lagjeve në këtë pjesë të Gazës janë shkatërruar gjatë luftimeve.

    Deri më tani shtatë pengje që po mbaheshin nga militantët në Gazë janë liruar në shkëmbim me 300 të burgosur palestinezë që po mbaheshin nga Izraeli.

    Hamasi pritet të lirojë edhe tre pengje të tjera të shtunën, ndërsa Izraeli dhjetëra të burgosur të tjerë palestinezë.

    Faza e parë e armëpushimit zgjat 42 ditë dhe një e katërta e saj tashmë ka kaluar. Gjatë kësaj faze parashihet lirimi i 33 pengjeve që po mbahen në Gazë, si dhe mbajtja e negociatave për të diskutuar detajet e fazës së dytë, që përfshin lirimin e pengjeve të tjera, përfundimin e konfliktit dhe tërheqjen e forcave izraelite.

    Këto negociata pritet të fillojnë javën e ardhshme.

    I dërguari amerikan për Lindjen e Mesme, Steve Witkoff u takua të mërkurën me Kryeministrin Netanyahu për të nënvizuar përkrahjen amerikane për armëpushimin.

    Witkoff, i cili luajti një rol kyç në arritjen e marrëveshjes për armëpushimin gjashtë javor, po ashtu vizitoi korridorin Netzarim, një pjesë territori me gjërësi prej 6 kilometrash që ndan Rripin e Gazës në dysh, ku kontraktorë amerikanë të sigurisë ndihmojnë në mbikëqyrjen e kthimit të palestinezëve të zhvendosur.

    Witkoff është zyrtari më i lartë amerikan që vizitoi Gazën pas shumë vitesh. Zyrtarët amerikanë i janë shmangur vizitave në Gazë, një pjesë territori përgjatë Detit Mesdhe, për shkak të sigurisë dhe politikës së Uashingtonit që ndalon kontaktet me Hamasin, grupin militant që qeveria amerikane e ka shpallur organizatë terroriste.

    Netanyahu do të udhëtojë për vizitë në Uashington gjatë kësaj jave. Presidenti amerikan Donald Trump e ka ftuar atë për bisedime në Shtëpinë e Bardhë të martën. Ky do të jetë edhe takimi i parë i zotit Trump me një udhëheqës të huaj në këtë mandat të dytë presidencial.

    Ndërkohë, gjatë armëpushimit në Gazë, Izraeli ka shtuar operacionet ushtarake në Bregun e pushtuar Perëndimor. Ministri i Mbrojtjes Israel Katz tha gjatë një vizite në Xhenin të mërkurën se Izraeli i ka “shpallur luftë terrorizmit palestinez” në Bregun Perëndimor.

    “Kampi i refugjatëve në Xhenin nuk do të kthehet kurrë në gjendjen e mëparshme”, deklaroi ai. “Pas përfundimit të operacionit, ushtria izraelite do të mbetet këtu për t’u siguruar që terrorizmi të mos kthehet”.

    Lufta në Gazë filloi me sulmin terrorist të Hamasit më 7 tetor të vitit 2023 ndaj Izraelit, që shkaktoi vdekjen e 1,200 personave dhe rrëmbimin e 250 pengjeve.

    Kundërofensiva e Izraelit në Gazë shkaktoi vdekjen e të paktën 47,400 personave, shumica e të cilëve gra dhe fëmijë, sipas ministrisë së shëndetësisë së Gazës. Ministria izraelite thotë se kjo shifër përfshin 17,000 militantë./VOA

  • Suedia ndan 1.2 miliardë dollarë ndihmë për Ukrainën

    Ministri suedez i Mbrojtjes ka thënë të enjten, më 30.01.2025, se vendi nordik është pajtuar që të ndajë një pako ndihme prej 1.23 miliardë dollarësh amerikanë për Ukrainën – raporton Agjencia amerikane e lajmeve Reuters.

    Kjo konsiderohet ndihma më e madhe nga shteti skandinav, prej se Rusia nisi pushtimin e Ukrainës në shkurtin e vitit 2022.

    Kjo pako ndihme është e tetëmbëdhjeta e Suedisë deri tani.

    Qeveria suedeze po negocion tani me furnizuesit në Suedi dhe në Europë për të siguruar pajisjet parësore, si artileria dhe dronët – ka njoftuar ministri i Mbrojtjes i Suedisë, Pal Johnson, në një Konferencë për media.

    Ndihma ka ardhur në kohën kur Ukraina ka mëdyshje për ndihmën e aleatëve perëndimorë. Presidenti i ri amerikan, Donald Trump kishte premtuar gjatë fushatës se do ta ndalte luftën në Ukrainë menjëherë pas marrjes së timonit të Shtëpisë së Bardhë, më 20.01.2025.

    Megjithatë, këshilltarët e tij e kanë pranuar për mediat amerikane se mbase do të duhen muaj të tërë derisa të arrihet një Marrëveshje armëpushimi dhe për përfundimin e luftës.

    Presidenti Volodymyr Zelensky i ka bërë thirrje presidentit Trump gjatë javës që t’ia mbajë anën Kievit – duke theksuar se presidenti rus Vladimir Putin nuk i frikësohet Europës.

    Përgatiti: Rexhep Maloku – Kallxo.com

  • Nuk pritet të ketë të mbijetuar të aksidentit në mes të aeroplanit dhe të helikopterit në SHBA

    Askush nuk besohet se ka mbijetuar pas përplasjes së një aeroplani dhe një helikopteri në qiell mbi lumin Potomac në Uashington DC, në Shtetet e Bashkuara të Amerikës – kanë thënë zyrtarët amerikanë – raportoi televizioni BBC.

    64 persona ndodheshin në aeroplanin e “American Airlines” dhe tre në helikopterin ushtarak në momentin kur fluturaket u ndeshën afër Aeroportit kombëtar “Ronald Reagan”.

    Shefi i Shërbimeve të Emergjencave, John Donnelly ka thënë se 29 trupa janë gjetur deri tani.

    Ishte një “natë e kthjelltë”, pilotët ishin “të sprovuar” dhe gjithçka ishte sipas standardit, para përplasjes në qiell – ka bërë të ditur sekretari amerikan i Transportit, Sean Duffy, “por qartazi se diçka ndodhi”.

    Një prej fushave që po e hetojnë prokurorët është ajo se pse helikopteri po fluturonte në atë lokacion. Më herët presidenti Donald Trump ka vënë në dyshim gjithashtu se pse helikopteri është “ngritur, ulur ose kthyer” para aksidentit.

    Zyrtarët në Wichita, Kansas, prej nga ishte ngritur aeroplani, kanë thënë se zemrat “e njerëzve janë thyer” pas aksidentit. Mediat amerikane raportojnë se shumica e pasagjerëve ishin të këtij vendi. Edhe Federata amerikane e Patinazhit Artistik ka konfirmuar se në mesin e pasagjerëve kishte edhe shumë anëtarë të saj.

     

    Përgatiti: Rexhep Maloku – Kallxo.com

  • Babai vret të bijën në Pakistan shkaku i videove në TikTok

    Një burrë, i cili kohët e fundit e ktheu familjen në Pakistan nga Shtetet e Bashkuara, ka rrëfyer se ka vrarë të bijën e tij adoleshente, sepse nuk i pëlqenin videot e saj në TikTok – ka konfirmuar Policia pakistaneze për televizionin britanik BBC.

    Anwar ul-Haq akuzohet për vrasje, pasi pranoi se të martën, më 28.01.2025, e qëlloi për vdekje të bijën Hira në qytetin jugperëndimor Quetta. Ai u deklaroi fillimisht hetuesve se vrasjen e kishin kryer burra të paidentifikuar.

    Babai, i cili ka nënshtetësi amerikane, ka thënë se ishte kundër postimeve të së bijës.

    Policia ka bërë të ditur se po e heton rastin në të gjitha pistat e mundshme – duke përfshirë mundësinë e një vrasjeje nderi, e cila nuk është e pazakontë në vend.

    Qindra njerëz – shumica prej tyre gra – vdesin shkaku i të ashtuquajturave vrasje nderi në Pakistan çdo vit – thonë grupet për të drejtat e njeriut. Këto vrasje kryhen zakonisht nga të afërm, të cilët thonë se po veprojnë në mbrojtje të nderit të familjes.

    Në rastin e Hira Anwarit, e cila ishte ndërmjet 13 dhe 14 vjeç, një zëdhënës i Policisë ka thënë se familja e saj “kundërshtonte veshjen, stilin e jetesës dhe ndejat e saj shoqërore “.

    Familja jetoi në Shtetet e Bashkuara 25 vjet dhe Hira filloi të postonte përmbajtje në TikTok edhe para se me familje të kthehej në Pakistan.

    Hetuesit kanë thënë se kanë celularin e viktimës, por që është i kyçur.

    Në lidhje me vrasjen u arrestua edhe dhëndri i babait të saj – ka njoftuar Policia

    Nëse zbulohet se është vrasje nderi dhe të akuzuarit shpallen fajtorë do të përballen me dënim të detyrueshëm të përjetshëm – një ndryshim i bërë në Ligj nga Qeveria e Pakistanit, në vitin 2016. Më parë, fajtorët mund t’i shmangeshin dënimit me burg, nëse faleshin nga familja e viktimës.

    Në vitin 2023, një Gjykatë italiane dënoi një çift pakistanez me burgim të përjetshëm për vrasjen e vajzës së tyre 18-vjeçare, sepse ajo refuzoi një martesë të padëshiruar.

    Një vit më parë vëllai i yllit pakistanez të mediave sociale, Qandeel Baloch u lirua nga akuza për vrasjen e saj. Pas Ankesës në apel ai më herët ishte dënuar me burgim të përjetshëm, pasi pranoi vrasjen e vitit 2016 – duke thënë se kjo ishte për shkak se ylli e kishte turpëruar familjen.

    Përgatiti: Rexhep Maloku – Kallxo.com

  • Nxirren 30 trupa pas përplasjes së aeroplanit dhe helikopterit në SHBA

    Të paktën 30 trupa janë nxjerrë nga lumi Potomac në Uashington DC, pasi një fluturake e “American Airlines” u përplas në qiell me një helikopter “Black Hawk” të Ushtrisë amerikane – raporton BBC.

    Avioni kishte 60 pasagjerë dhe katër anëtarë të ekuipazhit nga Wichita, Kansas kur u rrëzua pranë Aeroportit Kombëtar “Ronald Reagan”. Në helikopter ishin tre ushtarë.

    Ekipet e shpëtimit po punojnë në kushte “jashtëzakonisht të vështira” – thonë Shërbimet e Urgjencës – derisa raportohet se temperaturat e ujit janë të ulëta.

    Federata amerikane e Patinazhit Artistik të SHBA-së konfirmon se “disa anëtarë të komunitetit të patinazhit” ndodheshin në bordin e avionit.

    Presidenti Donald Trump thotë se është informuar për “aksidentin e tmerrshëm” dhe ka pyetur se pse helikopteri nuk “u ngjit apo të ulej”.

    Të afërmit e pasagjerëve janë mbledhur në Aeroport. Një grua i ka thënë një zyrtari aeroporti se nuk ishte e sigurt nëse një e afërme e saj kishte hipur në aeroplan. Ajo pastaj është shkrehur në vaj – shkruan Reuters.

    Hammad Raza ka deklaruar për partnerin informativ të CBS, WUSA se kishte dalë në Aeroport për ta pritur gruan – raporton Reuters.

    “Ajo më shkroi se brenda 20 minutash do të aterronte.” – ka thënë ai. “Pjesa tjetër e mesazhit tim nuk i shkoi. Atëherë e mora vesh se diçka nuk ishte në rregull. Tani, po shpresoj se dikush do ta nxjerrë nga lumi”.

    Ushtria amerikane ka njoftuar në një deklaratë se “mund të konfirmojë se fluturakja e përfshirë në incidentin e mbrëmjes ishte një helikopter ushtrie UH-60, i ngritur nga Fort Belvoir, Virxhinia”.

     

    Përgatiti: Rexhep Maloku – Kallxo.com