Ballina

Kategori: Botë

  • Von der Leyen për Trumpin: BE-ja do të jetë pragmatike, por do të mbrojë interesat e veta

    Bashkimi Europian do të mbajë qëndrim “pragmatik” ndaj Administratës së re të presidentit amerikan, Donald Trump, porse “gjithnjë” do të jetë në gjendje gatishmërie për t’i mbrojtur interesat e veta kundrejt ndonjë mase të pajustifikueshme – ka deklaruar shefja e Komisionit Europian, Ursula von der Leyen.

    Ajo e dha këtë deklaratë, më 21.01.2025, në një fjalim që ka përcaktuar tonin sesi Brukseli ka ndarë mendjen t’i qaset raportit me Uashingtonin në katër vjetët e ardhshme – raporton “Euronews.

    Gjatë fushatës së tij, Trumpi “kishte kërcënuar” se do të vendoste tarifa për të gjitha mallrat e huaja dhe se do të rishikonte thelbësisht ndihmën për Ukrainën – duke alarmuar Kryeqytetet e vendeve anëtare të bllokut europian. Presidenti republikan i ka zbutur, megjithatë, kërcënimet me të marrë pushtetin.

    “Shumë vihet në rrezik për të dy palët.” – ka deklaruar presidentja e Komisionit Europian në Forumin Ekonomik Botëror në Davos në Zvicër.

    “Prioriteti ynë do të jetë përfshirja e hershme, diskutimi i interesave të përbashkëta dhe të jemi gati për negocim. Ne do të jemi pragmatikë, por ne gjithnjë do të mbrojmë parimet tona. T’i mbrojmë interesat dhe t’i ruajmë vlerat tona – kjo është mënyra europiane.” – ka shtuar ajo, duke iu referuar mjeteve tregtare që Komisioni Europian i ka në dispozicion për t’iu kundërvënë tarifave dhe kuotave.

    Von der Leyen, e cila angazhohet për lidhje të fuqishme transatlantike, i ka përshkruar Shtetet e Bashkuara si “partnerët më të ngushtë” të BE-së me lidhje të ndërthurura thellësisht, prej investimeve dhe punësimit deri te prodhimi dhe shërbimet digjitale. Kjo, sipas saj, në vend të konfrontimit, do ta ndihmojë fuqizimin e bashkëpunimit.

    “Nuk ka ekonomi tjera në botë që janë të integruara si tonat.” – ka theksuar ajo.

    E pyetur nëse BE-ja mund t’i ofrojë përkrahje Ukrainës në rast të tërheqjes eventuale amerikane, Von der Leyen ka thënë se blloku do të vazhdojë mbështetjen “pa asnjë dyshim”.

    “Çfarëdo që do të ndodhë, për ne është e rëndësishme që Ukraina të mbetet vend i pavarur dhe se është Ukraina ajo që vendos për territorin e saj.” – është përgjigjur ajo.

    Fjalimi ka shënuar shfaqjen e parë të rëndësishme publike prej tërheqjes së saj për shkak të pneumonisë në fillim të janarit. Sëmundja e detyroi Komisionin që të anulonte të gjitha takimet e saj të jashtme dhe përkohësisht iu deleguan kompetencat zëvendësshefes ekzekutive, Teresa Ribera.

    Përgatiti: Rexhep Maloku – Kallxo.com

  • Presidentja Osmani ngushëllon popullin turk pas aksidentit në hotelin në Bolu të Turqisë ku vdiqën 66 persona

    Pas raportimeve të aksidentit që ka ndodhur në hotelin turk në Bolu të Turqisë, që la mbi 60 persona të vdekur e mbi 50 të tjerë të lënduar, presidentja e Kosovës, Vjosa Osmani ka shprehur ngushëllimet e saj në emër të popullit të Kosovës.

    Presidentja Osmani është shprehur thellësisht e mërzitur nga aksidenti në Bolu dhe u ka dëshiruar shërim të shpejtë të lënduarve.

    “Në emër të Republikës së Kosovës shpreh ngushëllimet tona më të thella te familjet dhe të dashurit e tyre – duke vuajtur për këtë humbje shkatërruese. Ne u dëshirojmë shërim të shpejtë dhe të plotë të lënduarve. Në këtë kohë të vështirë, solidariteti dhe mendja jonë është me presidentin Rexhep Taip Erdogan dhe popullin e Turqisë.” – ka shkruar Osmani në platformën X, më 21.01.2025.

    Rreth 66 persona kanë vdekur dhe 51 janë lënduar, pasi zjarri ka përfshirë një hotel në rezortin turk në Bolu, më 21.01.2025 – kanë konfirmuar zyrtarët turq – raporton të martën, më 21.01.2025, transmetuesi britanik BBC.

    Fillimisht u raportua se numri i të vdekurve ishte dhjetë persona në orët e para pas shpërthimit të zjarrit – njoftoi Ministria e Brendshme e Turqisë. Së paku dy prej viktimave kanë vdekur, pasi janë hedhur nga dritaret e hotelit – raportojnë mediat turke.

    Lajmin e ka konfirmuar edhe ministri i Brendshëm turk, Ali Yerlikaya.

    Zjarri ka shpërthyer në orën 03:27 në hotelin 12-katësh “Grant Kartal”, gjatë një periudhe të ngarkuar pushimesh në kohën kur në bujtinë ndodheshin 234 persona – ka shtuar ai.

    Pamjet që kanë qarkulluar në Turqi tregojnë çarçafë të varur për kornizat e dritareve, që tregon se njerëzit ishin munduar të shpëtonin prej zjarrit që kishte përfshirë ndërtesën.

    Guvernatori i Bolut, Abdulaziz Aydin ka thënë se raportet e para sugjerojnë se zjarri kishte shpërthyer prej pjesës së restorantit që ndodhej në katin e katërt dhe se ishte përhapur në katet e sipërme.

    Hoteli po hetonte nëse mysafirët ishin ngujuar në dhoma, derisa zjarri kishte përfshirë pjesë të tjera.

    Malet Bolu janë të njohura për skijatorët nga Stambolli e kryeqyteti Ankara dhe hoteli po operonte me numër të lartë vizitorësh, për shkak se porsa kishte nisur pushimi dimëror dyjavor i shkollave.

    Ministri turk i Drejtësisë, Yilmaz Tunc ka thënë se prokurorët kanë dalë në vendin e ngjarjes për ta hetuar shkakun e zjarrit.

  • Shkon në 66 numri i viktimave të zjarrit në hotelin e rezortit turk

    Një zjarr që ka përfshirë një hotel në rezortin turk në Bolu ka lënë të vdekur 66 persona dhe të lënduar 51 të tjerë – kanë konfirmuar zyrtarët turq – raporton të martën, më 21.01.2025, transmetuesi britanik BBC.

    Fillimisht u raportua se numri i të vdekurve ishte dhjetë persona në orët e para pas shpërthimit të zjarrit – njoftoi Ministria e Brendshme e Turqisë. Së paku dy prej viktimave kanë vdekur, pasi janë hedhur nga dritaret e hotelit – raportojnë mediat turke.

    Lajmin e ka konfirmuar edhe ministri i Brendshëm turk, Ali Yerlikaya.

    Zjarri ka shpërthyer në orën 03:27, në hotelin 12-katësh “Grant Kartal”, gjatë një periudhe të ngarkuar pushimesh, në kohën kur në bujtinë ndodheshin 234 persona – ka shtuar ai.

    Pamjet që kanë qarkulluar në Turqi tregojnë çarçafë të varur për kornizat e dritareve, që tregon se njerëzit ishin munduar të shpëtonin prej zjarrit që kishte përfshirë ndërtesën.

    Guvernatori i Bolut, Abdulaziz Aydin ka thënë se raportet e para sugjerojnë se zjarri kishte shpërthyer prej pjesës së restorantit që ndodhej në katin e katërt dhe se ishte përhapur në katet e sipërme.

    Hoteli po hetonte nëse mysafirët ishin ngujuar në dhoma, derisa zjarri kishte përfshirë pjesë të tjera.

    Guvernatori ka thënë para gazetarëve se distanca ndërmjet hotelit në Kartalkaya dhe qendrës së Bolut, bashkë me temperaturat e acarta, kanë vështirësuar edhe më shumë arritjen e zjarrfikësve që janë vonuar më shumë se një orë.

    Përpjekjet e shpëtimit kanë vazhduar edhe në mëngjes dhe ministri i Brendshëm ka thënë se shërbimet emergjente kanë dërguar 267 persona për t’iu përgjigjur situatës.

    Edhe në mëngjes ka pasur ende përpjekje për të arritur në pjesë të caktuara të hotelit të djegur.

    Malet Bolu janë të njohura për skijatorët nga Stambolli e kryeqyteti Ankara dhe hoteli po operonte me numër të lartë vizitorësh, për shkak se porsa kishte nisur pushimi dimëror dyjavor i shkollave.

    Qyteza veriperëndimore ndodhet 170 kilometra larg kryeqytetit Ankara. Ende nuk dihet zyrtarisht se cilat ishin shkaqet e zjarrit.

    Ministri turk i Drejtësisë, Yilmaz Tunc ka thënë se prokurorët kanë dalë në vendin e ngjarjes për ta hetuar shkakun e zjarrit.

     

    Përgatiti: Rexhep Maloku – Kallxo.com

     

  • Vendimet e para të Trumpit si President: zhbën dhjetëra politika të Bidenit

    Presidenti amerikan, Donald Trump ka ndërmarrë të hënën – sipas kohës lokale amerikane – hapat e parë për të treguar ndikimin me një mori Urdhrash Ekzekutivë, që pritet t’i hapin rrugë atij që e ka quajtur transformim të qeverisjes federale – raporton, më 21.01.2025, televizioni CNN – duke njoftuar se lideri republikan tashmë ka zhbërë 78 politika, shumica prej të cilave ishin nënshkruar prej ish-presidentit demokrat, Joe Biden.

    Në mesin e politikave të revokuara përfshihen: një Urdhër që u kërkonte Agjencive federale që të vazhdojnë ndalimet për diskriminim gjinor, për të kërkuar orientimin seksual dhe identitetin gjinor; një Urdhër që u kërkonte të emëruarve nga sektori ekzekutiv të nënshkruanin një zotim etik; një Urdhër që ua lejonte transgjinorëve të shërbenin në Ushtrinë amerikane; një Urdhër që ndalonte ripërtëritjen e Kontratave të burgjeve private – shkruan CNN.

    Urdhra të tjerë të epokës Biden të revokuar nga Trumpi përfshijnë veprimet që shfuqizojnë përcaktimin e Kubës si sponsor shtetëror i terrorit, tërheqjen e sanksioneve ndaj kolonëve hebrenj në Bregun Perëndimor dhe ndaj atyre u përpoqën të reduktonin rreziqet e Inteligjencës Artificiale.

    Bideni vetëm së fundmi e hoqi Kubën nga Lista e Terrorizmit. Lista e Urdhrave të revokuar që Trumpi i nënshkroi të hënën nuk ka specifikuar arsyet individuale, për anulimin e Vendimeve të Bidenit.

    Bideni u vuri sanksione disa kolonëve hebrenj, të akuzuar për nxitje të dhunës në Bregun Perëndimor në shkurtin e vitit  2024.

    Dhe Urdhri i tij i AI-së, më 2023, synonte të monitoronte dhe rregullonte rreziqet e Inteligjencës Artificiale.

    Trump u rrek gjithashtu të përmbyste përpjekjet e epokës Biden për zgjerimin e përcaktimeve të identitetit gjinor – duke përfshirë edhe pasaportat. Një Urdhër tjetër i nënshkruar nga Trump, të hënën, kërkon që Agjencitë federale t’i trajtojnë burrat dhe gratë biologjike si gjini të ndara, të ndalojnë promovimin e “ideologjisë gjinore” dhe t’u kërkohet disa Agjencive që të rikthejnë vetëm format e njohjes me “mashkull” dhe “femër”.

    Përgatiti: Rexhep Maloku – Kallxo.com

  • Trump tërheq SHBA-në nga Organizata Botërore e Shëndetësisë

    Presidenti amerikan, Donald Trump e ka tërhequr SHBA-në nga Organizata Botërore e Shëndetësisë (OBSH) – një hap që ka nxitur kritika të ekspertëve të shëndetit publik, me të marrë detyrën në ditën e parë në Shtëpinë e Bardhë më 20 janar – sipas kohës lokale amerikane – raporton televizioni amerikan CNN.

    Trump ka qenë kaherë kritik ndaj Agjencisë së Shëndetësisë nën ombrellën e Kombeve të Bashkuara dhe Administrata e tij e kishte nisur zyrtarisht tërheqjen nga OBSH-ja në korrikun e vitit 2020, në kohën kur kishte nisur të përhapej pandemia COVID-19. Por katër vjet më parë, presidenti i atëhershëm, Joe Biden e kishte bllokuar tërheqjen amerikane nga kjo trupë e ngarkuar, me koordinimin e reagimit ndërkombëtar ndaj emergjencave shëndetësore, në njërin prej veprimeve të para që kishte ndërmarrë demokrati me të marrë timonin e Shtëpisë së Bardhë.

    Në tekstin e Urdhrit Ekzekutiv të Trumpit thuhet se “Organizata ka shpërdorur/menaxhuar keq pandeminë COVID-19, që buroi nga Vuhani në Kinë dhe krizat e tjera botërore të shëndetit”. Ka akuzuar OBSH-në edhe për dështim për të zbatuar reforma të nevojshme – duke vlerësuar njashtu se kjo Organizatë nuk ka demonstruar aftësinë për t’iu shmangur varësisë politike prej shteteve anëtare. Këto janë arsyet kryesore, sipas Administratës së re të Trumpit, pse SHBA-ja është tërhequr nga OBSH-ja.

    OBSH-ja nuk ka komentuar kërkesën e televizionit CNN, pas vendimit amerikan.

    Përderisa kongresistët e të dy krahëve politikë kishin kritikuar OBSH-në më 2020, kur Trumpi kishte ndarë mendjen për tërheqje. Shumë prej tyre kanë dënuar veprimin e Presidentit për tërheqje, në kohën kur bota po përballej me pandeminë më të madhe në shekullin e fundit.

    Shkencetari Ashish Jha, i cili kishte shërbyer si koordinator i Shtëpisë së Bardhë për reagim ndaj pandemisë gjatë Administratës së Bidenit, e ka quajtur vendimin e Trumpit si “gabim strategjik”. Ai ka parashikuar se Kina do të fuqizojë ndikimin në këtë Organizatë, në mungesë të përfaqësimit amerikan – duke ofruar fonde dhe lidership. Jha ka thënë se ko mund t’i japë Kinës më shumë “ndikim politik anembanë botës”.

    Përgatiti: Rexhep Maloku – Kallxo.com