Ballina

Kategori: Botë

  • Kapelat “Kanadaja nuk është në shitje” bëhen virale pas kërcënimeve të Trumpit

    Kërcënimet verbale të Donald Trumpit ndaj Kanadasë po i shpaguhen një sipërmarrësi, pasi qasja grindavece e presidentit amerikan ia dha atij një ide.

    Liam Moneey, themelues i firmës së dizajnit në Otavë, ka reaguar me kapela me mbishkrimin “Canada is Not for Sale” (Kanadaja nuk është në shitje), si reagim ndaj kërcënimit të Trumpit për vendosje të tarifave dhe sugjerimeve që Kanadaja të bëhet shteti i 51-të i Shteteve të Bashkuara të Amerikës – raporton të premten, më 24.01.2025, Agjencia e lajmeve Reuters.

    Kapelat kanë rrokur vëmendjen e madhe, pasi kryeministri i Ontarios, Doug Ford po e mbante gjatë një takimi me kryeministrin kanadez, Justin Trudeaum dhe me Kryeministrat e tjerë javën e kaluar në Otavë, gjatë takimit për të diskutuar zotimin e Trumpit për t’i vendosur tarifa importeve kanadeze.

    Sipas Mooneyt, dhjetëra-mijëra kapela janë porositur online prej asaj paraqitjeje.

    Mooney ka thënë për Reutersin se i kishte dizajnuar kapelat si kundërpërgjigje kreative ndaj retorikës së presidentit Trump, me synimin për t’ia prerë udhën diskutimit politik me një mesazh nacionalizmi dhe uniteti.

    “Është një mundësi për t’i bërë njerëzit tok nga krejt shoqëria civile, pavarësisht prej bindjeve të tyre politike.” – ka thënë Mooney.

    Tarifat do ta dërrmonin ekonominë kanadeze dhe do të ngrehnin edhe çmimin e naftës e mallrave të tjera në Shtetet e Bashkuara.

    Trump ka kërcënuar me tarifa, në kohën kur Kanadaja po përballet me shkundje politike, me liderin liberal, Trudeau i cili pritet të japë dorëheqjen në mars, pothuajse një dekadë pas ardhjes në pushtet dhe opozitës konservatore që po prin në matjet e opinionit publik para Zgjedhjeve federale të sivjetme.

    Mooney ka thënë se ai dhe partneri i tij i biznesit i dizajnuan kapelat, pasi panë njërën prej intervistave të fundit të Fordit në Fox News. Moderatori i kishte kërkuar të shqyrtonte aneksimin – duke sugjeruar se do të ishte “privilegj” për Kanadanë që t’i bashkohej SHBA-së.

    Ford reagoi duke theksuar se Kanadaja nuk është në shitje.

    Trump duke folur nëpërmjet një videolidhjeje për Forumin Ekonomik Botëror në Davos në Zvicër të enjten ka thënë se ka kërkuar respekt nga Kanadaja. Ai më parë i ishte adresuar Trudeaut si “guvernator”.

    “Sovraniteti ynë kërcënohet kur nuk respektohet dinjiteti ynë.” – ka thënë Mooney. “Ne kemi aleatë dhe kemi miq anembanë botës, të cilët janë të gatshëm t’i përgjigjen thirrjes dhe të na mbrojnë dhe të na bashkohen”.

     

    Përgatiti: Rexhep Maloku – Kallxo.com

  • Digjet rafineria ruse e naftës pas sulmit më të madh ukrainas sivjet

    Një rafineri e naftës në qytetin Riazan në Rusi është përfshirë plotësisht nga zjarri, pasi Kievi e kreu një sulm të madh me dronë të premten.

    Ky sulm – më i madhi i Ukrainës që nga fillimi i këtij viti – u krye ndaj më shumë se dhjetëra rajoneve të Rusisë – përfshirë Moskën.

    Dëshmitarët dhe videot e verifikuara shfaqin një zjarr shumë të madh në rafinerinë e naftës së Rosneftit në Kazan.

    Një video, e postuar në Telegram, shfaq zjarrin e madh e njerëzit duke bërtitur dhe duke ikur nga një zonë industriale e përfshirë nga flakët.

    Për zjarre u raportua gjithashtu edhe në afërsi të Termocentralit Novo-Riazan.

     

    Nuk është raportuar për viktima, ndërsa Ministria e Mbrojtjes e Rusisë tha se i ka shkatërruar mbi 120 dronë ukrainas në të gjithë territorin rus.

    Sipas kryetarit të Moskës, Sergei Sobyanin, gjashtë dronë u rrëzuan mbi Moskë dhe disa të tjerë u rrëzuan në zonat përreth: Shchyolkovo, Kolomna, Ramenskoye dhe Podolsk.

    Sobyanin tha se nuk pati dëme të mëdha apo lëndime në vendet ku kishin rënë mbetjet e dronëve, por sulmi shkaktoi ndërprerje të dukshme në trafikun ajror civil – duke pezulluar përkohësisht operacionet në tri Aeroportet kryesore të Moskës: Vnukovo, Domodedovo dhe Zhukovsky.

    Sipas Ministrisë ruse të Mbrojtjes, në rajonin Briansk u rrëzuan 37 dronë, ndërsa në rajone të tjera si Kursk dhe Saratov u rrëzuan nga 17 dronë. Numër më i vogël dronësh u rrëzuan në rajonet Rostov, Belgorod, Voronezh, Tula, Oryol dhe Lipetsk.

    Kufizime të përkohshme u vendosën gjithashtu për uljet dhe nisjet e fluturimeve në Aeroportet në Kazan, Nizhnekamsk, Penza, Samara dhe Saratov, për shkak të kërcënimit të vazhdueshëm nga dronët.

    Shkalla e sulmeve të Ukrainës me dronë kundër Rusisë përkoi me një seri sulmesh ajrore ruse mbi territorin ukrainas.

    Në Kiev një sulm rus shkaktoi vdekjen e tre civilëve. U raportuan gjithashtu dëme në zona banimi – duke përfshirë shkatërrime të konsiderueshme në qytetet Fastiv dhe Brovari, pranë Kryeqytetit ukrainas.

    Forcat ruse përdorin rregullisht lloje të ndryshme armësh – përfshirë dronë, raketa dhe artileri, për t’i sulmuar rajonet ukrainase – duke goditur shpesh infrastrukturën civile dhe zonat e banuara.

    Derisa autoritetet ruse e mohojnë se e sulmojnë qëllimisht infrastrukturën civile, Ukraina dhe Organizatat Ndërkombëtare i kanë dënuar këto veprime si krime lufte – duke theksuar frekuencën dhe natyrën e qëllimshme të sulmeve ndaj Spitaleve, Shkollave dhe objekteve energjetike./REL

  • Trump i kërkon OPEC-ut të rrisë prodhimin e naftës për t’i bërë presion Putinit

    Presidenti amerikan, Donald Trump nuk ka arritur që ta bindë liderin e Kremlinit, Vladimir Putin, për bisedime që t’i japë  fund luftës në Ukrainë. Prandaj, ai po kërkon ndihmë për këtë çështje nga Arabia Saudite.

    Gjatë fjalimit më 23 janar në Forumin Botëror Ekonomik në Davos të Zvicrës, Trump u bëri thirrje Arabisë Saudite dhe aleatëve të Organizatës së Vendeve Eksportuese të Naftës, OPEC, që të rrisin prodhimin e naftës – një lëvizje që do të ulte çmimet e naftës së papërpunuar – duke ngufatur burimet e të ardhurave që Moska përdor për luftën kundër Ukrainës.

    “Unë do t’iu kërkojë po ashtu Arabisë Saudite dhe OPEC-ut që t’i ulin kostot e naftës. Do t’i ulim çmimet, që në fakt jam i befasuar që nuk i kanë ulur para Zgjedhjeve. Isha i befasuar nga ky fakt. Nëse çmimet ulen, lufta mes Rusisë dhe Ukrainës do të merrte fund menjëherë.” – tha Trump.

    Gjatë fushatës zgjedhore për Zgjedhjet presidenciale të vitit 2024, Trump e bëri prioritet përfundimin e pushtimit trevjeçar rus të Ukrainës dhe ka deklaruar se do që të takohet me presidentin Putin.

    Megjithatë, Kremlini duket se po heziton që të përfshihet në bisedime, teksa analistët thonë se Putini beson se po fiton luftën dhe prandaj nuk sheh arsye që të ndalë luftimet.

    Së fundi, Rusia është duke marrë territor në lindje të Ukrainës me ritmin më të shpejtë që nga nisja e luftës, teksa Ukraina po përballet me sfida të rekrutimit të ushtarëve të rinj.

    Një ditë pas inaugurimit më 20 janar, Trump tha se do të vendosë më shumë sanksione ndaj Rusisë, që ta detyrojë që të ulet në tavolinën e bisedimeve. Por, ai nuk tregoi se çfarë do të shënjestronin sanksionet e reja eventuale.

    Një ditë më vonë ai përsëriti këtë paralajmërim. Por, zëdhënësi i Kremlinit, Dmitry Peskov tha më 23 janar – para se Trump të fliste në Davos – se Moska “nuk sheh asnjë element të ri”, në atë që Trump ka deklaruar.

    Gjatë mandatit të paraardhësit të Trumpit, Joe Biden, SHBA-ja vendosi një sërë sanksionesh ndaj ekonomisë ruse – përfshirë edhe ndaj industrisë së naftës.

    Ekonomia ruse varet shumë nga eksportet e naftës, që përbëjnë mbi 30% të të ardhurave të buxhetit federal. Një rënie, qoftë e eksporteve të naftës ruse apo e çmimeve të naftës, do të shtrëngonte edhe më shumë ekonominë ruse, që veçse po përballet me vështirësi.

    Megjithatë, sanksione të reja ndaj industrisë së naftës ruse mund të çojë në rritje të çmimeve globale të naftës – nëse shtetet e tjera nuk rrisin prodhimin.

     

    Arabia Saudite dhe disa nga aleatët e saj në OPEC janë të aftë të rrisin prodhimin për një periudhë të shkurtër kohore. Arabia Saudite prodhon aktualisht 3 milionë fuçi nafte në ditë, ndërkaq Emiratet e Bashkuara Arabe rreth 1 milion fuçi.

    Prodhimi në sasi të tilla është rezultat i Marrëveshjes mes shteteve të OPEC-ut, që të prodhojnë aq sa çmimet e naftës të mbesin të larta.

    Rusia, anëtare e OPEC+, eksporton rreth 6.6 milionë fuçi nafte dhe produkt të naftës në ditë.

    Para fjalimit virtual në Davos, Trump bisedoi me Princin e Kurorës të Arabisë Saudite, në bisedën e parë telefonike të realizuar me një udhëheqës të huaj, që kur mori mandatin në fillim të javës.

    Të dy diskutuan për stabilitetin në Lindjen e Mesme, luftën kundër terrorizmit, rritjen e tregtisë – tha Shtëpia e Bardhë.

    Chris Weafer, ekspert për industrinë e naftës dhe themelues i firmës këshilluese, Macro-Advisory tha se nuk mendon që Trumpi mund të bindë sauditët dhe anëtarët e tjerë të OPEC-ut që të rrisin prodhimin, me qëllim që t’i bëhet presion Kremlinit për Ukrainën.

    “Ka pak gjasa që Arabia Saudite, Emiratet apo ndonjë prodhues tjetër i OPEC-ut që të përfshihen në një lëvizje të tillë politike kundër anëtares së OPEC+, Rusisë, apo të ndërmarrin ndonjë veprim që do të bënte që ata të humbin të ardhura nga eksportet dhe t’i japin hise më të madhe në treg prodhuesve të SHBA-së.” – tha Weafer për Radio Evropa e Lirë.

    David Oxley, ekonomist për klimën dhe mallrat në Capital Economics, tha se përderisa Arabia Saudite është “larguar” nga SHBA-ja viteve të fundit, Trump ka lidhje të forta me udhëheqjen e vendit.

    “Ka pasur shenja së fundi të ngrohjeve të raporteve dhe Trump njihet si person që ka raporte të mira me Princin e Kurorës dhe me Fondin Publik të Investimeve të Arabisë Saudite.” – tha Oyley, më 23 janar.

    Ai shtoi se Arabia Saudite ka shprehur gjithashtu zhgënjimin me anëtarët e tjerë të OPEC-ut, për prodhimin e një sasie më të madhe të naftës sesa kuota e tyre dhe mund të “hapë portat” për të rimarrë pjesën e tregut global.

    “Kjo ftesë eksplicite nga Trumpi mund të jetë mbulesa që i duhet Arabisë, për të hapur portat.” – tha ai./REL

     

     

  • Palestinezët përgatisin tendat për kthimin e familjeve në Gazë pas armëpushimit

    Palestinezët në Gazën veriore po i përgatisnin të enjten kampet e najlonit për familjet e zhvendosura, dy ditë para se pritet të kthehen në zonat e tyre, në pajtim me afatin kohor të Marrëveshjes së Armëpushimit ndërmjet Izraelit dhe “Hamasit” – raporton të premten, më 24.01.2025, Agjencia e lajmeve Reuters.

    Në fushë të hapur rrethuar nga ndërtesa të shkatërruara, një grup burrash filluan të ngrenë rreshta çadrash të bardha, që të vendosnin familjet që po planifikojnë të kthehen në Veri të shtunën, kur grupi militant palestinez “Hamas” do të lirojë grupin e dytë të pengjeve në këmbim të dhjetëra palestinezëve të burgosur nga Izraeli.

    Shumë nga qindra-mijëra palestinezë, që pritet të kthehen në Rripin verior të Gazës, do të kthehen në shtëpitë e rrënuara pas ofensives ushtarake 15-mujore izraelite, që ka shkatërruar enklavën dhe ka vrarë më shumë se 47.000 palestinezë të Gazës.

    Në tetor forcat izraelite u kthyen në zonat e veriut në një operacion të madh kundër “Hamasit”, të fokusuar në kampin e refugjatëve “Jabalia” pranë qytetit të Gazës dhe qyteteve Beit Hanoun e Beit Lahiya – duke spastruar zonën nga banorët dhe rrafshuar shumicën e ndërtesave.

    “A është kjo tenda që kemi ëndërruar? Në të duhet të vendosen 10 persona. Kjo tendë është për fëmijët e mi, të cilët vijnë nga Jugu. Vërtet, a është kjo hapësirë ​​e përshtatshme?” – ka pyetur Vael Jundiya, ndërsa po përgatiste një tendë për fëmijët e tij të cilët do të kthehen nga zona bregdetare Maëasi në jug.

    “Të shtunën, njerëzit që do të vijnë nga Jugu dhe do të vërshojnë (Qytetin) Gazën, ku do të shkojnë? Ky kamp do të strehojë 100, 200 njerëz. Do të jenë 1.5 milionë, që do të vijnë nga Jugu.” – tha Jundiya për Reutersin.

    Izraeli filloi sulmin e tij në Gazë, pasi luftëtarët e “Hamasit” sulmuan përtej kufirit më 7 tetor 2023 – duke vrarë 1.200 njerëz dhe marrë peng më shumë se 250 persona – sipas të dhënave izraelite.

    “Hamasi” publikoi një deklaratë të enjten, duke thënë se kthimi i familjeve të zhvendosura do të fillojë pasi të përfundojë shkëmbimi i së shtunës dhe pasi forcat izraelite të tërhiqen nga rruga bregdetare në Veri. Të paktën katër pengje pritet t’i dorëzohen Izraelit të shtunën.

    Duke theksuar shqetësimet e shumë palestinezëve se sa serioz është armëpushimi me faza, një bombardim izraelit me tank vrau dy persona në Rafah në jug të enklavës të Gazës – njoftoi Shërbimi Lokal i Emergjencës Civile.

    Ushtria izraelite ka njoftuar në një deklaratë, se ushtarët qëlluan një individ të armatosur në Rafah, megjithëse nuk specifikoi nëse personi ishte goditur.

    Përgatiti: Rexhep Maloku – Kallxo.com

     

  • Trump i gatshëm të takohet “sa më shpejt” me Putinin për të përfunduar luftën në Ukrainë

    Presidenti amerikan, Donald Trump dëshiron ta takojë presidentin rus, Vladimir Putin, sa më shpejt që është e mundshme që të sigurojë përfundimin e luftës me Ukrainën. Ai ka shprehur edhe dëshirën që të punojë për reduktimin e armëve bërthamore – raporton Reuters.

    Në prag të fitores në Zgjedhjet e 5 nëntorit, Trumpi kishte deklaruar shumë herë se do të kishte një Marrëveshje midis Ukrainës dhe Rusisë në ditën e tij të parë në detyrë – nëse jo më parë. Këshilltarët e tij tani pranojnë se lufta do të marrë muaj për t’u ndalur.

    “Unë me të vërtetë do të doja të jem në gjendje të takohem me presidentin Putin së shpejti, për të përfunduar luftën.” – ka thënë Trump në Forumin Ekonomik Botëror në Davos, përmes video-lidhjes. Trump është kthyer të hënën në Shtëpinë e Bardhë.

    “Dhe kjo nuk është nga pikëpamja ekonomike, apo ndonjë gjëje tjetër. Nga pikëpamja e miliona jetëve që po humbin… Është një masakër. Dhe, ne me të vërtetë duhet ta ndalim atë luftë.”

    Duke folur në Shtëpinë e Bardhë më vonë gjatë ditës, Trumpi deklaroi para gazetarëve se është i gatshëm të takohet me Putinin sa më shpejt, që t’i jepet fund asaj që e quajti “luftë qesharake”.

    “Me sa dëgjoj, Putini do të donte të më takonte.” – ka thënë ai. “Do të takohesha menjëherë.” – ka thënë Trumpi. “Çdo ditë që kalon pa u takuar, ushtarët vriten në fushën e betejës.”

    Trump shtoi se presidenti ukrainas, Volodymyr Zelenskiy i kishte thënë se është gati të arrinte Marrëveshje, për t’i dhënë fund luftës.

    Trump u ka thënë pjesëmarrësve në Davos, se po bëhen përpjekje amerikane për zgjidhje paqeje, por nuk dha më shumë detaje. Rusia pushtoi Ukrainën në shkurtin e vitit 2022.

    Në fillim të kësaj jave, Trump kërcënoi se do të vendoste “nivele të larta” sanksionesh ndaj Rusisë dhe tarifa për importet nga atje nëse Moska nuk do zgjidhje.

    Përgatiti: Rexhep Maloku – Kallxo.com