Ballina

Kategori: Botë

  • Hamasi liron 4 ushtare izraelite në këmbim të 200 të burgosurve palestinezë

    Hamasi ia dorëzoi të shtunën Izraelit katër ushtaret izraelite të mbajtura rob në Gazë. Ndërkohë, Izraeli i liroi 200 të burgosur ose të paraburgosur palestinezë siç është paraparë në marrëveshjen e tyre për armëpushim në Rripin e Gazës.

    Militantët e Hamasit – grupit të shpallur terrorist nga SHBA dhe BE – së pari i parakaluan ato nëpër “Sheshin Palestinez” në qendër të qytetit Gaza, para se t’i dorëzonin te Kryqi i Kuq, i cili i dërgoi ato më pas në Izrael.

    Disa orë pasi Hamasi i liroi katër pengjet izraelite, Izraeli njoftoi se i liroi 200 të burgosur palestinezë. Ata përfshijnë 120 persona që kishin vuajtur dënime të përjetshme pasi ishin dënuar për sulme vdekjeprurëse kundër izraelitëve. Rreth 70 prej tyre u liruan në Egjipt, sipas televizionit shtetëror egjiptian, Qahera TV.

    Egjipti shërbeu si ndërmjetës kyç në bisedimet mbi njëvjeçare që çuan në marrëveshjen e armëpushimit. Njerëzit mblidhen pranë një autobusi që transporton të burgosur palestinezë të liruar nga një burg izraelit, si pjesë e një marrëveshjeje armëpushimi në Gazë midis Hamasit dhe Izraelit, në Bregun Perëndimor, 25 janar 2025.

    Zyra e kryeministrit të Izraelit, Benjamin Netanyahu, e publikoi më vonë një video që shfaqte pengjet e liruara duke u mirëpritur në një bazë ushtarake izraelite.

    Më vonë, zyra e Netanyahu tha se Arbel Yehoud, një penge civile e mbajtur nga Hamasi, duhej të ishte liruar të shtunën. Ajo deklaroi se Izraeli nuk do t’i lejojë palestinezët të fillojnë të kthehen në veri të Gazës, siç pritej të ndodhte të dielën, derisa ajo të lirohet.

    Një zyrtar i lartë i Hamasit tha se grupi ka njoftuar ndërmjetësit se Yehoud do të lirohet javën e ardhshme.

    Mbështetësit e pengjeve izraelite reagojnë ndaj lajmeve mbi negociatat për armëpushimin në Gazë, gjatë një proteste për të kërkuar marrëveshje për kthimin e çdo pengu në shtëpi, në Tel Aviv, Izrael, 15 janar 2025.

    SHIKONI EDHE:

    Izraeli dhe Hamasi arrijnë marrëveshje për armëpushim dhe pengje

    Armëpushimi mes Hamasit dhe Izraelit ka synon t’i japë fund luftës më vdekjeprurëse dhe shkatërruese që është zhvilluar ndonjëherë midis tyre. Marrëveshja e brishtë nuk është shkelur deri më tani, dhe ka bërë që të ndalen sulmet ajrore dhe raketore dhe ka mundësuar hyrjen e më shumë ndihmave në territorin e vogël bregdetar.

    Tri pengje të mbajtura nga militantët u liruan në këmbim të 90 të burgosurve palestinezë, të gjithë gra dhe fëmijë, fundjavën e kaluar kur hyri në fuqi armëpushimi.

    Kush janë ushtaret dhe të burgosurit që po lirohen?

    Katër ushtaret izraelite, Karina Ariev, 20 vjeçe, Daniella Gilboa, 20 vjeçe, Naama Levy, 20 vjeçe dhe Albag, 19 vjeçe, u u zunë rob gjatë sulmit të Hamasit më 7 tetor 2023, i cili shkaktoi luftën.

    Në këmbim të tyre, Izraeli duhej t’i lironte 200 të burgosur, përfshirë 121 që po vuanin dënime të përjetshme, sipas një liste të publikuar nga Hamasi.

    Ndër militantët më famëkeq që po lirohen janë Mohammad Odeh, 52 vjeç, dhe Ëael Qassim, 54 vjeç, të dy nga Jerusalemi Lindor. Ata akuzohen për kryerjen e një sërë sulmesh vdekjeprurëse të Hamasit kundër izraelitëve, përfshirë një sulm me bombë në një mensë në Universitetin Hebraik të Jerusalemit në vitin 2002, ku u vranë nëntë persona, përfshirë pesë shtetas amerikanë.

    Një e burgosur palestineze përqafohet nga një grua tjetër pasi u lirua nga një burg izraelit si pjesë e një shkëmbimi pengjesh dhe të burgosurish dhe një marrëveshjeje armëpushimi në Gazë, më 20 janar 2025.

    SHIKONI EDHE:

    Izraeli i liron 90 të burgosur palestinezë, pasi Hamasi i ktheu 3 pengje

    Katër ushtaret e liruara u kapën në bazën Nahal Oz pranë kufirit me Gazën, kur militantët palestinezë e pushtuan atë, duke vrarë më shumë se 60 ushtarë atje.

    Çfarë pritet tjetër gjatë armëpushimit?

    Pritej që Izraeli të fillonte të tërhiqej nga korridori i Netzarimit – një rrugë lindje-perëndim që ndan Gazën në dy pjesë – dhe t’i lejonte palestinezët e zhvendosur në jug të ktheheshin në shtëpitë e tyre të mëparshme në veri, për herë të parë që nga fillimi i luftës.

    Por, kjo duket se është pezulluar deri në lirimin e Yehoud.

    Ministria e Brendshme e drejtuar nga Hamasi tha më herët se palestinezët e zhvendosur do të lejohen të kthehen në veri të Gazës duke filluar nga e diela. Ministria, e cila mbikëqyr forcat e policisë, tha se palestinezët do të mund të lëvizin midis jugut dhe veriut të Gazës në këmbë përmes rrugës bregdetare Rashid.

    Është e paqartë se çfarë do të ndodhë pas fazës së parë gjashtëjavore të marrëveshjes, por ka shumë shpresa se ajo do të çojë në përfundimin e luftës që ka shkatërruar pjesë të mëdha të Gazës, ka zhvendosur pjesën më të madhe të popullsisë dhe ka lënë qindra mijëra njerëz pa ushqim.

    Lufta filloi kur militantët e Hamasit thyen barrierat kufitare në jug të Izraelit më 7 tetor 2023, duke i vrarë rreth 1.200 njerëz, kryesisht civilë, dhe morën peng rreth 250 të tjerë.

    Më shumë se 100 pengje u liruan gjatë një armëpushimi njëjavor nëntorin e vitit 2023. Izraeli beson se të paktën një e treta e më shumë se 90 pengjeve që po mbahen ende në Gazë, u vranë në sulmin fillestar ose vdiqën në robëri./REL

  • Goditet rrjeti i drogës nga Shqipëria, Bullgaria, Kolumbia dhe Spanja, 6 tonë kokainë dhe 6 milionë euro të sekuestruara

    Organizata policore europiane e luftës kundër krimit “Europol” tha se në bashkëpunim me autoritetet spanjolle shkatërroi një rrjet të gjerë të trafikut të drogës duke sekuestruar 6 tonë kokainë dhe 6 milionë euro.

    Sipas Europol nga një hetim që përfshiu Bullgarinë, Kolumbinë, Kosta Rikën dhe Panamanë, nisur në qershor të vitit 2022, u zbulua se anëtarët e rrjetit ishin shtetas nga Shqipëria, Bullgaria, Kolumbia dhe Spanja, të cilët organizuan trafikimin e sasive të mëdha të kokainës nga vendi i origjinës në Evropë.

    Sipas Europol secili prej anëtarëve të organizatës mori rol të ndryshëm brenda zinxhirit të trafikut të drogës.

    “Anëtarët shqiptarë, me qendër në Dubai, vepruan si investitore dhe siguruan financat e nevojshme për të paguar prodhuesit për dërgesat nga Kolumbia”, thotë Europol, ndërsa shtetasit kolumbianë trajtonin dërgesat nga Kolumbia në Evropë, shtetasit bullgarë, kolumbianë dhe spanjollë mbikëqyrnin marrjen dhe shpërndarjen e mëtejshme të drogës.

    Nga hetimet policore, siaps Europol, ka rezultuar se anëtarët e rrjetit u fshehën në një kontejner për të hyrë fshehurazi në port dhe me ndihmën e punëtorëve të korruptuar nxorrën kokainën gjatë natës. Europol thotë se anëtarët e rrjetit pastronin të ardhurat nga krimet e tyre dhe sipas policsë rrjeti kriminal kishte kapacitet për të marrë deri në një ton kokainë në javë.

    Në tetor 2024, autoritetet kapën 4.1 ton kokainë në Panama, me destinacion Spanjën, në lidhje me këtë rrjet.

    Sipas Europol rrjeti dyshohet se është i lidhur me konfiskimet e kokainës me një total prej rreth gjashtë tonësh. Gjithashtu, autoritetet e zbatimit të ligjit kishin sekuestruar edhe dy ton kokainë në Spanjë që nga fillimi i hetimeve.

    Në rezultatet e aksionit, të realizuar në tre faza, midis dhjetorit 2024 dhe janarit 2025 Europol thotë se janë kryer 22 arrestime në Spanjë si dhe 27 bastisje shtëpish.

    Europol thotë se krahas sasive të drogës sekuestroi 6.5 milionë euro cash, 35 automjete, përfshirë 8 makina luksoze (vlerësuar rreth 2.5 milionë euro), orë luksoze dhe stoli (vlerësuar rreth 1.5 milionë euro) 48 armë si dhe 53 llogari bankare të ngrira nëpër banka.

    Siaps Europol rritja e dërgesave të kokainës nga Amerika e Jugut në Evropë, si dhe depërtimi i rrjeteve kriminale në biznese të ligjshme dhe të paligjshme në Bashkimin Europain nxiti krijimin e një Task Force Operacionale në Europol.

    Europol tha se koordinoi gjatë hetimit, shkëmbimin e informacionit midis autoriteteve kombëtare, duke i bashkuar ato për të synuar në mënyrë efikase të gjithë rrjetin e trafikut të drogës./VoA

  • Putin thotë se është i gatshëm të bisedojë me Trumpin për Ukrainën

    Presidenti rus, Vladimir Putin, tha se është i gatshëm për bisedime me homologun e tij amerikan, Donald Trump, për Ukrainën, duke e quajtur atë udhëheqës “të mençur” i cili do të mund ta kishte parandaluar nisjen e konfliktit më 2022.

    Kievi reagoi menjëherë, duke paralajmëruar kundër përjashtimit të tij nga negociatat.

    Udhëheqësi rus nuk tha se kur këto bisedime do të mbaheshin dhe Kremlini ka thënë më herët se po pret për “sinjale” nga Uashingtoni, pavarësisht se Trump një ditë më herët paralajmëroi se është i gatshëm të takohet “menjëherë” me Putinin.

    “Ne gjithmonë kemi thënë, dhe unë dua ta theksoj sërish, se ne jemi të gatshëm për këto negociata sa i përket çështjes ukrainase”, tha Putin për një gazetar të televizionit shtetëror rus.

    Duke e lavdëruar Trumpin dhe duke e quajtur njeri “të mençur” dhe “pragmatik”, Putin po ashtu përsëriti pretendimin e pabazuar të presidentit amerikan se kishte fituar zgjedhjet presidenciale amerikane kundër Joe Biden më 2020.

    Pothuajse tre vjet më parë nisja e konfliktit në Ukrainë bëri që raportet mes dy fuqive bërthamore të ishin në pikën më të ulët që nga Lufta e Ftohtë.

    Trump, që u inaugurua të hënën, e ka quajtur konfliktin “qesharak” dhe e ka kërcënuar Rusinë me sanksione ekonomike nëse nuk pajtohet të ndalë luftën.

    Ai po ashtu ka thënë se nëse ulen çmimet e naftës, atëherë lufta do të përfundonte shpejt, pasi Rusia përdor të ardhurat nga nafta për të financuar luftën e saj kundër Ukrainës.

    Asnjëra palë nuk duket se po jep shenja për uljen e armiqësive që nga inaugurimi i Trumpit, i cili gjatë fushatës zgjedhore kishte thënë se do t’i jepte fund luftës brenda “24 orëve” pasi të merrte detyrën e presidentit.

    Pas deklaratave të Putinit, Kievi reagoi të premten dhe tha se nuk duhet të përjashtohet nga bisedimet.

    “Ai [Putini] dëshiron të negociojë për fatin e Evropës, pa Evropën. Ai dëshiron bisedime për Ukrainën, pa Ukrainën”, tha, Andriy Yermak, shefi i zyrës së presidentit të Ukrainës.

    “Kjo nuk do të ndodhë. Putin duhet t’i kthehet realitetit apo do të bëjë kthim prapa. Kjo nuk ndodh në botën moderne”, tha ai./REL

  • A duhet të brengoset Putini nga kërcënimet e Trumpit me sanksione të reja?

    Shumë kohë para se ta merrte detyrën këtë javë dhe para Zgjedhjeve të Nëntorit, presidenti Donald Trump është zotuar se do ta lehtësojë një Marrëveshje, për t’i dhënë fund luftës së Rusisë kundër Ukrainës, megjithëse ka dhënë shumë pak hollësi se si do ta arrinte një gjë të tillë.

    Më 22 janar, dy ditë pasi e nisi mandatin e dytë, Trumpi tregoi një veprim që do ta ndërmerrte për ta bërë Rusinë të ulet në tavolinën e bisedimeve, që është hap fillestar por vendimtar dhe sfidues drejt një Marrëveshjeje. Ai tha se do të vendosë sanksione shtesë ndaj Moskës – nëse ajo nuk bindet.

    “Nëse nuk bëjmë ‘Marrëveshje’ së shpejti nuk do të kem zgjidhje tjetër, përpos të vendos taksa, tarifa dhe sanksione të nivelit të lartë ndaj çdo gjëje që shitet nga Rusia në Shtetet e Bashkuara dhe ndaj vendeve të ndryshme pjesëmarrëse.” – shkroi Trump në rrjetin e tij social, Truth Social.

    Në të kaluarën, Trumpi e kishte lavdëruar Putinin, e kishte kritikuar SHBA-në për mbështetjen e Ukrainës dhe kishte ngulur këmbë për përfundimin e shpejtë të luftës – duke ngritur shqetësime në mesin e përkrahësve të Ukrainës se ai mund t’i flijojë interesat e Kievit, në emër të një Marrëveshjeje, e cila në fund do ta fuqizonte Rusinë.

    Por, Trumpi ka folur ashpër këtë javë. Postimi i 22 janarit ishte më i fundit në një varg komentesh, përmes së cilave ai tha se lufta po e rrënon Rusinë dhe se Putini duhet të kërkojë paqe – para se të bëhet tepër vonë. Ekonomia e Rusisë “po dështon” – shkroi Presidenti amerikan.

    “A e kemi armikun në prag të shtëpisë?”

    Toni dhe përmbajtja e komenteve të Trumpit janë mirëpritur nga Kievi, por edhe nga Perëndimi, i cili kërkon trysni ndaj Rusisë. Ministri i Jashtëm i Ukrainës, Andriy Sybiha tha se deklaratat e Trumpit dërguan “sinjal të fuqishëm”.

    Ndërkohë, Moska nuk humbi kohë për të për t’u përgjigjur – duke thënë se kërcënimi me sanksione të reja nuk do të kryejë punë. Zëdhënësi i Putinit, Dmitry Peskov tha më 23 janar se Kremlini nuk sheh “asgjë veçanërisht të re këtu”.

    Moderatori pro-Kremlinit, Vladimir Solovyov reagoi ngjashëm, por përdori gjuhë më të ashpër – një përpjekje e zhurmshme për t’u thënë rusëve se nuk duhet të shqetësohen.

    “Çfarë? A është e mundur të flitet me Rusinë në atë mënyrë?” – tha ai në një koment të postuar në Telegram.

    “A po e humbim luftën? A na ka ardhur armiku te pragu i derës?” – pyeti ai.

    Këto deklarata e pasqyrojnë vetëbesimin e jashtëm të Putinit, se lufta po shkon mirë për Rusinë, me të gjitha humbjet e mëdha që Rusia i ka pësuar, derisa është duke bërë përparime graduale në fushën e betejës dhe se ekonomia po i përballon sfidat – pavarësisht inflacionit të lartë dhe problemeve të tjera.

    Megjithatë, nën atë pamje të jashtme mund të fshihen shqetësime në të dyja drejtimet dhe disa ekspertë thanë se kërcënimi i ri i Trumpit për sanksione do t’i rrisë shqetësimet e tyre.

    “Mendoj se kjo me të vërtetë e ka tronditur Kremlinin.” – tha për Radio Evropa e Lirë, Nigel Gould-Davies, hulumtues për Rusinë dhe Euroazinë në Institutin Ndërkombëtar për Studime Strategjike në Londër.

    Gould-Davies tha se Trumpi “në momentin e parë të mundshëm, po tregon se e ka seriozisht këtë” – duke shtuar se Ukraina dhe mbështetësit e saj janë shqetësuar se “mënyra kryesore e tij për t’i dhënë fund luftës do të ishte trysnia ndaj Ukrainës dhe kufizimi i mbështetjes”.

    Të paktën në këto deklarata – sipas Gould-Davies – Trumpi “po tregon se problemi i përfundimit të luftës duhet të zgjidhet sipas kushteve që e detyrojnë Putinin të bëjë lëshime, në vend se ta detyrojnë Ukrainën… Nuk ka qenë aspak e qartë se ai do ta bënte këtë”.

    Më 23 janar Agjencia e lajmeve Reuters citoi “pesë burime”, të cilat thanë se Putini “po shqetësohet gjithnjë e më shumë për deformimet në ekonominë e kohës së luftës në Rusi”. Po ashtu, Reuters citoi ish-zëvendëskryetarin e Bankës Qendrore të Rusisë, Oleg Vyugin, i cili tha: “Rusia, natyrisht, është e interesuar ekonomikisht për të negociuar një fund diplomatik të konfliktit”.

    Problemet ekonomike në rritje “kanë kontribuar në krijimin e një pikëpamjeje brenda një pjese të elitës ruse, se një zgjidhje e negociuar për luftën është e dëshirueshme.” – citoi Reuters dy nga burimet që folën në kushte anonimiteti.

    Kërcënimet e Trumpit “e vendosin Putinin në një situatë të vështirë” – shkroi në platformën X, ish-ministri i Jashtëm i Lituanisë, Gabrielius Landisbergis.

    “Tani, Putini duhet të zgjedhë, ta pranojë se ai ka frikë nga sanksionet e reja, sepse ekonomia e tij është në kolaps, ose të dëshmojë se ambiciet e tij imperialiste nuk do të kufizohen nga këto kërkesa.” – shtoi ai.

    Disa analistë janë shumë më skeptikë, duke thënë se problemet ekonomike nuk do ta shtyjnë Putinin të heqë dorë nga qëllimi i nënshtrimit të Ukrainës, edhe nëse një armëpushim ose Marrëveshje paqeje do të bënte që Rusia ta ketë nën kontroll jozyrtarisht afërsisht 20% të territorit të Ukrainës që e ka pushtuar.

    “Ne duhet të shmangim mbivlerësimin e ndikimit të këtyre shqetësimeve ekonomike në planet e Putinit për Ukrainën.” – tha në X Tatyana Stanovaya, hulumtuese në Qendrën Carnegie. “Sipas mendimit tim, pavarësisht nga situata ekonomike, Putini do të vazhdojë të kërkojë përfundimin e luftës sipas kushteve të Rusisë. Për të, ky është konflikt ekzistencial. Ai është thellësisht i bindur se, pa një ‘Ukrainë miqësore’, mbijetesa afatgjatë e Rusisë është në rrezik”.

    Sanksionet dytësore dhe “flota e errët”

    Disa ekspertë të tjerë argumentojnë se sanksionet e rënda ndaj ekonomisë ruse ka mundësi t’i ndryshojnë përllogaritjet e Putinit.

    Megjithatë, skeptikët përmendin faktin se rundet e njëpasnjëshme të sanksioneve që Perëndimi i ka vendosur, që kur Putini e nisi pushtimin e plotë të Ukrainës në shkurt 2022, nuk e kanë dobësuar atë. Një tjetër pyetje është ajo se çfarë masash të mundshme ndëshkuese kanë mbetur, pasi Administrata Biden vendosi pak ditë para inaugurimit të Trumpit sanksionet, që zyrtarët amerikanë i cilësuan si më të rëndat deri më tani.

    Sanksione të mundshme substanciale ka ende – sipas Gould-Davies.

    “Shtetet e Bashkuara e kanë këtë armë unike dhe të frikshme të sanksioneve dytësore.” – tha ai, duke iu referuar masave të vendosura jo ndaj vetë Rusisë, por për t’i penguar shtetet dhe entitetet e tjera që të kryejnë transaksione, që mund ta ndihmojnë Moskën në këtë luftë.

    Uashingtoni dhe Perëndimi mund t’i shtojnë gjithashtu sanksionet ndaj “flotës së errët” të Rusisë, anijeve shpesh të vjetra dhe të pasigurta, të cilat përdoren për t’i anashkaluar sanksionet dhe për ta vazhduar rrjedhën e të hyrave nga nafta.

    Rachel Ziemba, eksperte për sanksione në Qendrën për Sigurinë e Re Amerikane, tha se zbatimi me forcë i dënimeve ekzistuese ekonomike dhe vendosja e sanksioneve dytësore do të ishin hapat më të rëndësishëm që Administrata Trump mund t’i ndërmarrë.

    Rusia ka arritur ta zbusë ndikimin e sanksioneve të shumta të SHBA-së dhe ndalimeve të teknologjisë me ndihmën e ndërmjetësve në shtete të treta, si: Kina, Kazakistani, Uzbekistani dhe Kirgizia.

    Ziemba tha se këto shtete do të prekeshin nga sanksionet dytësore.

    Kina ka luajtur një rol veçanërisht të rëndësishëm në mbështetje të Rusisë, përmes lehtësimit të dërgesave të teknologjisë me përdorim të dyfishtë dhe blerjes së naftës.

    “Pyetja është, a do të ishte Administrata Trump më e gatshme se Administrata Biden për të sanksionuar bankat kineze, që mbështesin zinxhirët ushtarakë të Rusisë ose blejnë naftën ruse.” – tha ajo./REL

  • Televizioni CNN i largon 200 punëtorë nga puna në kuadër të transformimit digjital

    Televizioni amerikan CNN ka bërë të ditur, më 23.01.2025, se po kryen një ristrukturim – duke përfshirë largimin e 200 punëtorëve nga puna, në kuadër të kalimit në operacione digjitale dhe role të reja televizive për personalitete, si: Wolf Blitz, Jake Tapper dhe Audie Cornish – raporton Agjencia amerikane e lajmeve AP.

    Është ristrukturimi më i guximshëm deri më tani në mandatin 18-mujor të shefit ekzekutiv, Mark Thompson, ish-drejtor ekzekutiv në gazetën prestigjioze “The New York Times” dhe transmetuesin britanik BBC. Ai është angazhuar nga kompania amë “Warner Bros. Discovery”, për të rikthyer fitimet në rënie të mediumit amerikan.

    Largimet nga puna përqendrohen në pjesën e biznesit televiziv të CNN-it, ku vlerësimi ka rënë pasi shikuesit po heqin dorë prej kabllorit dhe po kërkojnë burime të tjera lajmesh. Largimet do të kompensohen përfundimisht me punësimet të reja në sektorin digjital, ku “Warner Bros. Discovery” po investon 70 milionë dollarë – ka njoftuar CNN.

    “Ky nuk është manifestim i kursimit të shpenzimeve.” – ka deklaruar Thompson në një intervistë. “Ne në fakt po anojmë për rritje investimesh”.

    Largimet nga puna ose janë bërë ose pritet të bëhen në të gjithë industrinë e lajmeve. Vlerësimi i CNN-it ka pësuar goditje që nga zgjedhja e presidentit Donald Trump, kritik i kahershëm i rrjetit televiziv kabllor. CNN-i pati rreth 1.7 milionë shikues gjatë inaugurimit të Trumpit në fillimjavë – krahasuar me 8 milionë për inaugurimin e Joe Bidenit katër vjet më parë, megjithëse audienca mund të luhatet bazuar në qëndrimin politik të personit që do të inaugurohet.

    CNN-i pësoi gjithashtu një goditje financiare – mbetet e paqartë sa e madhe ishte – kur javën e kaluar një Gjykatë në Floridë e shpalli rrjetin përgjegjës për shpifjen e një veterani të marinës amerikane, në një storie që përfshinte një përpjekje të paguar për nxjerrjen e afganëve të rrezikuar pas pushtimit të Afganistanit nga talebanët. Rrjeti e zgjidhi çështjen përpara se Gjykata të vendoste plotësisht për dëmet.

    CNN-i njoftoi të enjten, më 23.01.2025, se po zhvillonte një produkt që do t’i lejonte konsumatorët të shikojnë videotransmetime të ngjashme me televizorin në çdo pajisje. Nuk është dhënë ndonjë datë se kur do të hidhet produkti në treg.

    Nën Thompsonin, CNN-i ka ridizajnuar dhe ofruar pa bujë elemente të reja në faqen e internetit CNN.com. Në fund të vitit të kaluar, televizioni ofroi abonim mujor prej 3.99 dollarësh dhe prej 29.99 dollarësh në vit për përdoruesit dhe po punon për nxjerrjen e produkteve të reja në internet në fusha, si: stili i jetesës, moti dhe sporti.

    Në disa aspekte, Thompsoni po përpiqet të bëjë në CNN çfarë bëri në gazetën Times, ku produktet e saj dixhitale modernizuan biznesin e së përditshmes. Shefat Ekzekutivë shpresojnë se komponenti i videove të CNN-it dhe audienca ndërkombëtare do të ofrojnë mundësi rritjeje – pa e kopjuar Times-in.

    Transformimi i CNN-it “nuk është dhe nuk mund të jetë një grup i vetëm ndryshimesh, por një proces investimi, eksperimentimi dhe përshtatjeje që do të zgjasë me vite” – ka deklaruar Thompson në një memo për stafin e CNN-it. “Objektivi ynë është i thjeshtë: të zhvendosim gravitetin e CNN-it drejt platformave dhe produkteve, ku vetë audienca po zhvendoset”.

    CNN-i po kursen në televizion me më pak staf dhe me transferim të disa prej operacioneve teknike në Zyrën qendrore në Atlanta.

    Rrjeti ka njoftuar tashmë një seri ndryshimesh në orarin e emisioneve: “Situation Room” e moderatorit veteran Blitzer do të zhvendoset nga koha e mbrëmjes në orën 10:00 të mëngjesit – sipas kohës së SHBA-së lindore – ku atij do t’i bashkohet Pamela Broën; Emisioni dyorësh i Tapperit do të fillojë në orën 17:00; Cornish me “CNN This Morning” do të nisë nga ora gjashtë e mëngjesit; Kasie Hunt do ta drejtojë emisionin e ri, “The Arena”, në orën 16:00 dhe Rahel Solomon e nis “5 Things”, në orën 5 të mëngjesit.

    Për momentin, jashtë kësaj skeme është lënë moderatori aktual i mëngjesit të vonë, Jim Acosta, partner i shpeshtë përplasjesh me Trumpin gjatë mandatit të tij të parë presidencial. Ai po negocion një emision të ri – ka konfirmuar televizioni CNN, pasi u raportua se ai nuk pranoi një emision të orëve të vonshme të natës.

    Përveç shkurtimeve të ashpra, sfida më e madhe e rrjetit televiziv mbetet depërtimi te mbështetësit e Trumpit, që rrjetin e konsiderojnë armiqësor. Shumë mbështetës, në fakt, kanë shprehur të enjten në internet gëzimin për pushimet nga puna në këtë televizion.

    “Jo vetëm që Trumpi është më i fortë se ndonjëherë në karrierën e tij politike, por ai edhe mund të ketë mbytur trashëgiminë mediatike, qysh e kemi njohur.” – shkroi moderatori dhe themeluesi i radios OutKick, Clay Travis në X.

    Thompson ka bërë të ditur se dëshiron që CNN-i të shquhet me gazetarinë e tij të fuqishme dhe për kontrollin e fakteve, me synimin që shikuesit të lihen të vendosnin vetë për çështjet. Ai ka spikatur se emisioni “Prime Time” i Abby Phillipit mbetet nga të paktat emisione informative kabllore, ku njerëzit me pikëpamje shumë të ndryshme mund të debatojnë çështje të ndryshme.

    “Unë mendoj se ne duhet të vazhdojmë me qetësi dhe durim punën tonë si gazetar.” – ka theksuar ai.

    Përgatiti: Rexhep Maloku – Kallxo.com