Ballina

Kategori: Arsim

  • Katër nxënës në Suharekë u sulmuan nga qeni, njëra vazhdon të trajtohet në Spitalin e Prizrenit

    Dy prej nxënësve që u sulmuan nga qeni, i cili hyri në oborrin e Shkollës Fillore të Mesme të Ulët “17 Shkurti” në Shirokë të Suharekës, janë dërguar në Spitalin Rajonal të Prizrenit, kurse dy të tjerë janë trajtuar në Qendrën Kryesore të Mjekësisë Familjare (QKMF) në Suharekë.

    Kështu ka treguar drejtoresha e shkollës “17 Shkurti”, Hidajete Bytyqi. Sipas Bytyqit, nxënësit që u sulmuan nga qeni janë të klasës së parë, të dytë, të pestë dhe të gjashtë.

    “Dy në Prizren janë edhe dy këtu në Suharekë. Ma mirë janë, e kanë tejkalu. Një rast është ma i randë.” – ka thënë Bytyqi, më 22.01.2025.

    Shefi i Emergjencës në Spitalin Rajonal të Prizrenit, Hekuran Veçgishti ka thënë se dy nxënësit e Shkollës Fillore “17 Shkurti”, që i kanë pranuar kanë pasur disa plagë në trup.

    “Janë përpunu plagët te na. Prej tyre, një është liru, një është pranu në Repartin e Infektives për trajtim të matutjeshëm.” – ka thënë Veçgishti.

    Gjatë kohës së pushimit të gjatë, nxënësit kanë dalë jashtë hapësirës së shkollës “17 Shkurti” për të blerë ushqim dhe më pas qeni i ka ndjekur pas kthimit të tyre në shkollë – sipas Bytyqit.

    “Knej rrugës duke ardhë (pasi kanë ble ushqim) i ka ndjek ai qeni, deri në oborr të shkollës. Fëmija tuj vrapu, edhe ai ka hy me atë fëmijë. E ka sulmu atë vajzën të parën. Kanë qenë kujdestarët, po ata derën e kanë mbyllë menjëherë. E kemi neutralizu, mos me lanë prapë me dalë jashtë – derisa erdhën Policia.” – ka treguar Bytyqi.

    Pasi kanë njoftuar Policinë, Bytyqi tha se ka ardhur edhe Ndihma e Shpejtë, kurse nxënësit janë shqetësuar shumë dhe u është dashur ta ndërprejnë mësimin për të gjithë.

    “Po, po e kemi ndërpre (mësimin). I kemi liru fëmijët, se nuk ke atmosferë e mësimit.” – tha Bytyqi.

    Bytyqi tha se prindërit e nxënësve që janë sulmuar nga qeni janë shqetësuar shumë dhe e kanë fajësuar stafin e shkollës për rastin që ka ndodhur. Ajo e ka pohuar se shkolla “17 Shkurti” ka psikolog shkollor dhe e ka trajtuar rastin.

    Bytyqi ka shtuar se nuk kanë pasur ndonjë rast tjetër në të kaluarën, kurse për atë që ka ndodhur të mërkurën, më 22.01.2025, e ka vlerësuar si rast “të tmerrshëm”. 

    Sipas Bytyqit, po mendojnë që të marrin vendim që nxënësit të qëndrojnë vetëm brenda oborrit të shkollës, gjatë pushimit të gjatë e të mos dalin jashtë hapësirës së shkollës.

    “Vetëm brenda oborrit. Me marr ushqimin me vete ose me porosit na, me ua marrë dikush. Nesër ma gjerësisht bisedojmë. Edhe këtë vendim do ta marrim.” – ka shtuar Bytyqi.

    Kurse, drejtori i Arsimit në Suharekë, Remzi Bajselmani ka thënë se e ka vizituar Shkollën “17 Shkurti”, nxënësit që janë sulmuar, si dhe familjen e nxënëses më të sulmuar nga qeni. 

    “Kryetari (Bali Muharremaj) ka shku në Prizren, në Spital me taku atë fëmijën, që është (atje)… Dy (nxënës) i vizitova në QKMF në Suharekë, veç për shqetësim. Nuk i ka prekë, bisedova me ta, shkuan në shtëpi. Dy kanë shku në Prizren. Njëri është prej shqetësimit më shumë, ndërsa një vajzë, ajo është e lënduar në kokë.” – ka thënë Bajselmani.

    KALLXO.com raportoi se disa nxënës dhe disa zyrtarë policorë kanë marrë lëndime, pasi janë sulmuar nga një qen i cili kishte hyrë brenda objektit të shkollës “17 shkurti” në Shirokë të Suharekës.

    Policia ka dhënë detaje për ngjarjen duke njoftuar se rasti është raportuar të mërkurën, më 22.01.2025, rreth orës 09:50 minuta.

    “Patrullat policore i janë përgjigjur rastit me urgjencë, ku kanë arritur në shkollë. Kanë vërejtur një qen brenda shkollës, i cili kishte sulmuar nxënësit e shkollës dhe paraqiste rrezik potencial ende. Qeni ka sulmuar edhe policët, mirëpo në shpejtësi është asgjësuar – duke e mënjanuar rrezikun e mëtutjeshëm.” – ka thënë për KALLXO.com, zëdhënësi i Policisë në Prizren, Vesel Gashi.

    Për ngjarjen është njoftuar Prokurori kompetent, Hetimet Rajonale në Prizren, IPK-ja, si dhe është identifikuar pronari i qenit dhe i njëjti është arrestuar.

    Rasti është iniciuar, si: “shkaktim i rrezikut të përgjithshëm”.

    https://kallxo.com/lajm/detaje-nga-policia-pervec-nxenesve-qeni-sulmoi-edhe-disa-police-arrestohet-pronari/

  • Me 10 ditë të humbura e mungesë të karrigeve fillon Gjysmëvjetori i dytë në dy Shkollat e mesme në Ferizaj

    Pasi u bën dy javë që ka filluar Gjysmëvjetori i dytë për nxënësit në Kosovë, për ata të Gjimnazit “Shaban Hashani” dhe të Shkollës së Mjekësisë “Elena Gjika” në Ferizaj ka filluar të mërkurën, më 22.01.2025. 

    Drejtoresha e Gjimnazit “Shaban Hashani” në Ferizaj, Hajrije Nebihu e ka konfirmuar fillimin e Gjysmëvjetorit të dytë në objektin e ri, që është ndërtuar për këtë Gjimnaz dhe për Shkollën e Mjekësisë “Elena Gjika” te Salla e Sporteve “Bill Clinton”.

    Nxënësit e të dy Shkollave të mesme në Ferizaj nuk e filluan Gjysmëvjetorin e dytë, më 08.01.2025, pasi u dolën disa probleme me objektin e ri të ndërtuar për to.

    Dy ditë më parë, drejtori i Arsimit në Ferizaj, Afrim Llabjani njoftoi për KALLXO.com se është shtyrë fillimi i Gjysmëvjetorit të dytë deri më 22.01.2025, për nxënësit e dy Shkollave të mesme, për shkak se nuk ishte ngrohur në tërësi ambienti i objektit të ri të këtyre Shkollave.

    Në mesin e problemeve që kishte përmendur Llabjani se pse nuk kishte filluar me kohë Gjysmëvjetori i dytë ishte edhe furnizimi me banka shkollore dhe karrige të objektit të ri, të ndërtuar për të dy Shkollat e mesme, që është pritur të bëhet nga Ministria e Arsimit.

    Furnizimi me banka shkollore i objektit të ri u bë në muajin tetor të vitit 2024 – sipas Ministrisë së Arsimit, në një përgjigje të tyre të datës 15.01.2025, por furnizimin me karrige kanë thënë se do ta bëjnë deri në fund të muajit janar 2025.

    E, drejtoresha Nebihu tha se kanë mungesë të karrigeve në objektin e ri të ndërtuar për Gjimnazin “Shaban Hashani” dhe Shkollën e Mjekësisë “Elena Gjika” në Ferizaj, edhe pse i kanë bartur karriget e vjetra të objektit të ish-Shkollës Fillore “Gjon Serreçi”, në të cilin kishin mësuar më parë nxënësit e dy Shkollave.

    Nebihu e ka pohuar se është ngrohur ambienti në objektin e ri.

    “Bankat i kemi të reja, karrige kemi mungesë, d.m.th se kemi pasë edhe atje mungesë të vjetrave. Si dhe, nëpër shkollat e tjera kapak kemi marrë të vjetra. I kemi kompletu.” – tha Nebihu, më 22.01.2025.

    Sa i përket zëvendësimit të orëve mësimore të humbura, Nebihu tha se nuk e kanë diskutuar ende me Drejtorinë e Arsimit se si t’i zëvendësojnë. 

    Sipas Nebihut, bashkë me Shkollën e Mjekësisë “Elena Gjika” e kanë ndarë objektin e ri nga kati i parë tek i treti. Edhe për nxënësit e Shkollës së Mjekësisë, Nebihu tha se e kanë filluar Gjysmëvjetorin, më 22.01.2025.

    Nebihu ka thënë se rreth 1,900 nxënës janë gjithsej në objektin e ri – duke llogaritur 1,100 nxënës të Gjimnazit “Shaban Hashani” dhe 800 nxënës të Shkollës së Mjekësisë “Elena Gjika”. 

    Për mungesën e karrigeve, drejtori i Arsimit në Ferizaj, Afrim Llabjani përmes telefonit tha se Ministria e Arsimit u ka thënë se brenda kësaj jave pritet të furnizohet me karrige objekti i ri.

    “Ka mungesë pak të karrigeve të klasës në një shkollë: asaj të Gjimnazit. Kemi arritë pak m’i furnizu me disa karrige, që kemi mund m’i gjetë nëpër shkolla, po jo mjaftueshëm. E, pastaj ju bjen pakëz me lëviz (me karrige), po sido që të jetë me mundësitë tona, ato që i kemi pasë, ne si DKA (Drejtori Komunale e Arsimit), i kemi ofru.” – ka thënë Llabjani, më 22.01.2025.

    Llabjani tha se nëse Ministria e Arsimit nuk i sjell karriget këtë javë, të hënën, më 27.01.2025, do t’i njoftojë se kanë filluar procesin mësimor dhe se kanë mungesë të karrigeve.

    Kurse, për zëvendësimin e orëve mësimore, Llabjani tha se nuk është që ka arritur të bisedojë me Drejtoritë e të dy Shkollave të mesme, por e ka analizuar propozimin që do t’ua rekomandojë atyre.

    Llabjani planifikon që zëvendësimi i orëve mësimore nga nxënësit e Gjimnazit “Shaban Hashani” dhe të Shkollës së Mjekësisë “Elena Gjika” të ndodhë ndonjë ditë të shtunë apo në pushimin pranveror.

    “Besoj që nuk ka alternativa shumë. Pos kësaj, që e kam mendu unë me bë. Alternativa mundet me qenë pushimi pranveror, pak ma, si me thënë më specifik… Sido që të jetë, ditët do të kompensohen, nëse jo edhe gjatë pushimit pranveror, atëherë në fund të përfundimit të vitit shkollor.” – ka shtuar Llabjani.

    KALLXO.com është duke raportuar nga data 13.01.2025, për mosfillimin me kohë të Gjysmëvjetorit të dytë nga nxënësit e Gjimnazit “Shaban Hashani” dhe ata të Shkollës së Mjekësisë “Elena Gjika” në Ferizaj.

    Kryetari i Këshillit të Prindërve të Gjimnazit “Shaban Hashani”, Besim Jashari kishte thënë se mësimi nuk ka filluar për shkak se janë kthyer disa karrige, që nuk kanë qenë të cilësisë së mirë e që i janë kushtuar objektit të ri të ndërtuar për Gjimnazin.

    Për cilësinë e karrigeve ka folur edhe Llabjani – duke thënë se Ministria e Arsimit i kishte vonuar karriget, pasi nuk ishin ndarë të kënaqur me cilësinë e tyre.

    E, Ministria tha se afati i Kontratës ekzistuese ka qenë deri në fund të muajit tetor dhe për shkak të importit të artikujve – karrigeve, Kompania furnizuese nuk ka arritur të kryejë furnizimet brenda afatit ligjor të Kontratës.

    “Objekti i ri i Shkollës do të vazhdojë të furnizohet me karrige me Kontratën e re të lidhur nga AQP – furnizuesi i së cilës është në proces të sigurimit të artikujve për furnizim dhe pritet që deri në fund të muajit janar të kryhen furnizimet.” – ka thënë Ministria e Arsimit në përgjigjet e saj, më 15.01.2025.

    Për objektin e ish-Shkollës “Gjon Serreçi”, prindi Jashari ka thënë se nuk ka objekt më të papërshtatshëm për të qëndruar në të e lëre më të zhvillohet mësim aty.

    Sipas Jasharit, nxënësit e Gjimnazit “Shaban Hashani” një orë mësimi e kanë zhvilluar 30 minuta në objektin e vjetër të ish-Shkollës “Gjon Serreçi”, për shkak të kushteve të saj.

    KALLXO.com e kishte vizituar Gjimnazin “Shaban Hashani” në tetor të vitit 2023. Në atë kohë, muret në pamjen e jashtme të Shkollës ishin të dëmtuara, dritaret në klasa e tualetet në gjendje jo të mirë. 

  • Lipjan, mbyllet një Qendër për Fëmijët e Komunitetit Ashkali për shkak të mungesës së fondeve

    Organizata joqeveritare ‘Arsimi i Hershëm Ndriçim i së Ardhmes’ ka njoftuar se është detyruar të mbyllet Qendra për Fëmijët e Komunitetit Ashkali në fshatin Gadime të Lipjanit për shkak të mungesës së fondeve.

    Sipas organizatës joqeveritare, Qendra për Fëmijët e Komunitetit Ashkali ka operuar për një vit të plotë dhe ka ofruar ndihmë për fëmijët e moshës 3 deri në 5 vjeç në arsimimin e tyre joformal, përgatitjen për parashkollor dhe klasën e parë.

    “Gjatë funksionimit të saj, qendra ka ndihmuar në zhvillimin e aftësive sociale të këtyre fëmijëve dhe ka krijuar një mjedis të sigurt ku ata mund të kalojnë kohën, duke i larguar nga rreziku i kalimit të kohës në rrugë”– thuhet në njoftimin e Organizatës, më 20.01.2025.

    Arlinda Krasniqi themeluese e OJQ ‘Arsimi i Hershëm Ndriçim i së Ardhmes’ përmes telefonit ka thënë për KALLXO.com se Qendra për Fëmijët e Komunitetit Ashkali në Gadime është hapur nga OJQ ‘Zëri i Romëve, Ashkalive dhe Egjiptianëve në Kosovë’ (VoRAE).

    Sipas Krasniqit, Qendra është mbështetur financiarisht për gjashtë muaj nga VoRAE, pastaj për një kohë nga OJQ “The Ideas Partnership UK” në Angli dhe nga një biznes në Kosovë.

    “Ata (VoRAE) janë themeluesit e saj (Qendrës për Fëmijët e Komunitetit Ashkali), unë jam veç si udhëheqëse… Ata janë kanë iniciatorë për me hap, ata i kanë furnizu me krejt ato pajisjet e mësimit edhe gjashtë muaj ata e kanë sponsorizu pagesën”- ka thënë Krasniqi.

    Përveç mësimit të disa numrave dhe shkronjave, Krasniqi tha se fëmijët e komuniteteve ashkali i kanë dërguar edhe në vizita, ekskurzione. Sa i përket stafit që ka punuar në Qendër, Krasniqi tha se ka punuar bashkë me një mësimdhënëse.

    “Fëmijët po dojnë me ardhë në shkollë, unë iu thash – me gjithë qef edhe neve na ka marrë malli për fëmijë e me majt mësim, po për shkak që nuk kena pare për me mirëmbajtë për Qendrën e për krejt, nëse lajmërohet ndonjë donator mujna me rihapë, për çdo rast ju njoftojmë” – i ka thënë Krasniqi një prindi të fëmijëve të komunitetit ashkali në Gadime. 

    Krasniqi vlerëson se Qendra i ka motivuar fëmijët e komuniteteve ashkali për shkollim të mëtutjeshëm. Ajo ka treguar se 35 fëmijë të komunitetit ashkali kanë qenë pjesë e Qendrës në Gadime.

    “Po, prej aty d.m.th 17 nxënës janë shku atje në shkollë, për shkak që këta edhe që e braktisin shkollën, kjo kogja u kanë njëfar shtytje për me vazhdu shkollën”- ka treguar Krasniqi.

    Krasniqi ka thënë se i kanë kërkuar Komunës së Lipjanit që Qendra për Fëmijët e Komunitetit Ashkali në Gadime të jetë Qendër Komunale, por sipas saj, nuk kanë pranuar.

    “Komuna (e Lipjanit) na kanë thanë – nuk mujna komunale, për shkak që është një (Qendër mësimi) atje te shkolla “Zenel Hajdini”, ajo është me pagesë. Këta komuniteti (ashkali) nuk kanë mundësi me ba pagesë edhe kështu është mbetë pezull”- tha Krasniqi.

    Ambienti ku ndodhet Qendra për Fëmijët e Komunitetit Ashkali është e pa izoluar dhe kushtet në të nuk kanë qenë të mira, por kanë vazhduar të punojnë, sipas Krasniqit.

    Për komunarët e Lipjanit, Krasniqi tha se nuk e kanë vizituar asnjëherë Qendrën, përveç nënkryetarit për komunitete në Lipjan, Lulzim Qerimi.

    Qerimi në një bisedë për KALLXO.com tha se nuk ishte në dijeni se është mbyllur Qendra për Fëmijët e Komunitetit Ashkali në Gadime.

    Qerimi e ka pohuar se e ka vizituar disa herë Qendrën në Gadime dhe se gojarisht kanë biseduar për ta shndërruar atë në një qendër komunale. Ai madje tha se Komuna e Lipjanit ka ndihmuar në ndërtimin e Qendrës.

    “Gojarisht e kam fjalën, kemi bisedu, mirëpo për me ba në kuadër të Komunës mas pari Ministria e Arsimit duhet me na lëshu buxhet edhe janë do procedura për punëtorë…”- ka thënë Qerimi.

    “VoRAE dhe Komuna e Lipjanit jemi kanë në donacion të përbashkët edhe e kemi ndërtu këtë objekt, 20 mijë euro ka qenë”- ka shtuar Qerimi.

    Megjithatë, Qerimi nuk e ka pranuar se është mbyllur Qendra në Gadime. Qerimi tha se do të interesohet nëse kanë ndonjë projekt të gatshëm dhe nëse kanë aplikuar në ndonjë organizatë për ta vazhduar funksionimin e Qendrës për Fëmijët e Komunitetit Ashkali.

    “Iniciator për me hapë atë Qendër, për me ndërtu, kam qenë unë. Edhe tash po më befason, m’ia dhanë një term – u mbyllë ajo. Nuk u mbyll, u mbyll ndoshta projekti i asaj organizatës, po nuk u mbyll Qendra. Qendra është nën menaxhimin e VoRAE-së”- tha Qerimi.

    Ndërsa, Elizabeth Gowing, e cila është edhe anëtare bordit në OJQ “The Ideas Partnership UK” në Angli, e ka pohuar se e ka mbështetur Qendrën për Fëmijët e Komunitetit Ashkali në Gadime. Gowing po ashtu e ka parë edhe njofitmin se është mbyllur kjo Qendër. 

    Pasi e ka parë njoftimin për mbylljen e Qendrës, Gowing tha se e ka pyetur OJQ-në VoRAE se pse nuk kanë vazhduar ta mbështesin Qendrën dhe u ka kërkuar një takim.

    “Më është përgjigj sot, me thanë që u ka ardhë edhe si befasi për ta (mbyllja e Qendrës). Besoj që, ka thënë, që do të rishqyrtojmë si mund të ndihmojnë”- ka thënë Gowing.

    Gowing tha se e ka ndihmuar Qendrën në Gadime përmes një fondacioni në Angli, me një vlerë prej 1,000 euro si pjesë e fondeve.

    Gowing tha se ka provuar t’i ndihmojë edhe si këshilltare e kryeministrit Kurti për çështje të komuniteteve, po ashtu duke qenë edhe pjesë e panelit që i shqyrtojnë aplikimet nga komunat për ndihmën për projektet multietnike me fonde nga UNMIK që i dhurojnë përmes një organizate.

    Gowing tha se Komuna e Lipjanit kishte paraqitë kërkesë për mbështetje për këtë Qendër, dhe sipas saj, organizata joqeveritare nga fondet e UNIMK ka ndarë një fond për rrethimin e oborrit, hapësirës ku ndodhet Qendra.

    Sipas Gowing, vetëm 9% e fëmijëve të komuniteteve rom, ashkali dhe egjiptian vijojnë mësim parashkollor në Kosovë. Ajo vlerëson se Qendra për Fëmijët e Komunitetit Ashkali në Gadime të Lipjanit ka qenë një mundësi shumë e mirë dhe se është vlerësuar nga prindërit e fëmijëve.

    KALLXO.com e ka pyetur edhe OJQ VoRAE për këtë rast, por nuk ka marrë përgjigje deri në publikimin e këtij lajmi.

    (Artikulli është edituar në pjesën te deklarata e Arlinda Krasniqit ku flet për mbështetësit e Qendrës. Koha e editimit: 21.01.2025, ora 17:20)

  • Shtyhet edhe për dy ditë fillimi i gjysmëvjetorit të dytë për nxënësit e dy shkollave të mesme në Ferizaj

    Nxënësit e Gjimnazit “Shaban Hashani” dhe të Shkollës së Mjekësisë “Elena Gjika” në Ferizaj nuk e kanë filluar as të hënën, më 20.01.2025, gjysmëvjetorin e dytë.

    Një javë më parë drejtori i Arsimit të Komunës së Ferizajt, Afrim Llabjani, kishte thënë për KALLXO.com se po përpiqen që nxënësit e dy shkollave të mesme ta fillojnë gjysmëvjetorin e dytë më 20.01.2025.

    Nxënësit e të dy shkollave të mesme që mësonin në objektin e ish-Shkollës Fillore “Gjon Serreçi” nuk e kanë filluar gjysmëvjetorin e dytë për shkak të disa problemeve që u kanë dalë me objektin e ri, i cili është ndërtuar te Salla e Sporteve “Bill Clinton”.

    Në momentin kur është kontaktuar nga KALLXO.com, Llabjani tha se ndodhej në objektin e ri që është ndërtuar për dy shkollat e mesme.

    Sipas Llabjanit, fillimi i gjysmëvjetorit të dytë është shtyrë edhe për dy ditë, për shkak të mosngrohjes së plotë të ambientit të objektit të ri. Rrjedhimisht, gjysmëvjetori i dytë pritet të fillojë më 22.01.2025.

    Në mesin e problemeve që kishte përmendur Llabjani se pse nuk ka filluar gjysmëvjetori i dytë ishte edhe furnizimi me banka shkollore dhe karrige të objektit të ri, të ndërtuar për të dy shkollat e mesme, që është pritur të bëhet nga Ministria e Arsimit.

    Llabjani kishte thënë më 13.01.2025 se para tre-katër javësh objekti i ri i të dy shkollave të mesme është furnizuar vetëm me banka shkollore nga Ministria e Arsimit, kurse vetë Ministria ka thënë se e kanë furnizuar objektin me banka në muajin tetor 2024.

    Pas dy ditësh, Ministria e Arsimit tha se deri në fund të muajit janar objekti i ri i Gjimnazit “Shaban Hashani” dhe Shkollës së Mjekësisë “Elena Gjika” në Ferizaj do të furnizohet me karrige.

    Por, Llabjani thotë se ende nuk u kanë ardhur karriget në objektin e ri.

    “Jena t’u fillu me karrige të vjetra, me të thanë të drejtën. Ato që i kena përdorë atje (tek objekti i ish-Shkollës Fillore “Gjon Serreçi) i kena pru këtu… Javën e kalume e kemi pasë ministren (Arbërie Nagavci) këtu (në Ferizaj) edhe kena bisedu, ata kanë thënë që shumë shpejt (do bëhet furnizimi me karrige), po datë s’kanë caktu” – tha Llabjani më 20.01.2025.

    Kryetari i Këshillit të Prindërve të Gjimnazit “Shaban Hashani”, Besim Jashari, ka thënë se mësimi nuk ka filluar për shkak se janë kthyer disa karrige që nuk kanë qenë të cilësisë së mirë e që i janë kushtuar objektit të ri të ndërtuar për Gjimnazin.

    “Kanë ardhë karriget me jokualitet edhe janë kthy karriget, për atë arsye kanë mbetë pa karrige, edhe nuk është fillu mësimi” – kishte thënë Jashari më 13.01.2025.

    Për objektin e ish-Shkollës “Gjon Serreçi”, Jashari ka thënë se nuk ka objekt më të papërshtatshëm për të qëndruar në të e lëre më të zhvillohet mësim aty.

    Sipas Jasharit, nxënësit e Gjimnazit “Shaban Hashani” një orë mësimi e kanë zhvilluar 30 minuta në objektin e vjetër të ish-Shkollës “Gjon Serreçi” për shkak të kushteve të saj.

    Kurse drejtoresha e Gjimnazit “Shaban Hashani”, Hajrije Nebihu, kishte thënë se nuk e kanë nisur gjysmëvjetorin e dytë pasi nuk janë kryer disa detaje të vogla tek objekti i ri i ndërtuar.

    “Do izolime të vogla rreth dritareve që ka ftoftë, këto na kanë pengu, edhe bash sot kemi me pastru. Karrige e banka i kemi mbushë klasat” – ka thënë Nebihu.

    Drejtoresha Nebihu ka treguar se objekti i ri i Gjimnazit “Shaban Hashani” ka filluar të ndërtohet rreth katër vjet e gjysmë më parë.

    KALLXO.com e kishte vizituar Gjimnazin “Shaban Hashani” në tetor të vitit 2023. Në atë kohë, muret në pamjen e jashtme të Shkollës ishin të dëmtuara, dritaret në klasa e tualetet në gjendje jo të mirë. 

  • Arsyetimi i MASHTI-t se pse nuk arriti t’i sigurojë karriget për objektin e ri të dy Shkollave në Ferizaj

    Pas raportimit të KALLXO.com se nxënësit e Gjimnazit “Shaban Hashani” dhe të Shkollës së Mjekësisë “Elena Gjika” në Ferizaj nuk e kanë filluar gjysmëvjetorin e dytë, Ministria e Arsimit është arsyetuar lidhur me mosfurnizimin me karrige të objektit të ri që është ndërtuar për këto dy Shkolla.

    Nxënësit e të dy Shkollave të Mesme që mësonin në objektin e ish-Shkollës Fillore “Gjon Serreçi” nuk e kanë filluar gjysmëvjetorin e dytë për shkak të disa problemeve që u kanë dalë me objektin e ri, i cili është ndërtuar te Salla e Sporteve “Bill Clinton”.

    Në mesin e problemeve që ka përmendur drejtori i Arsimit në Ferizaj, Afrim Llabjani është edhe furnizimi me banka shkollore dhe karrige të objektit të ri, të ndërtuar për të dy Shkollat e Mesme, që është pritur të bëhet nga Ministria e Arsimit.

    Ndonëse Llabjani ka thënë se para tre-katër javësh objekti i ri i të dy Shkollave të Mesme është furnizuar vetëm me banka shkollore nga Ministria e Arsimit, vetë Ministria ka thënë se e kanë furnizuar objektin me banka në muajin tetor 2024.

    “Objekti i ri i Shkollës është furnizuar me banka në muajin tetor 2024, me Kontratën që ka lidhur AQP (Agjencioni i Prokurimit Qendror), me afat deri në fund të muajit tetor.” – thuhet në përgjigjen e Ministrisë së Arsimit, më 14.01.2025.

    Sa i përket furnizimit me karrige, Llabjani ka thënë se Ministria e Arsimit është arsyetuar se nuk kanë qenë të kënaqur me cilësinë e karrigeve.

    Sipas Llabjanit, ata janë detyruar që t’i bartin karriget e komodinat e mëparshme, që i kanë shfrytëzuar të dy Shkollat tek objekti i ri.

    E Ministria e Arsimit po thotë se deri në fund të muajit janar objekti i ri i Gjimnazit “Shaban Hashani” dhe Shkollës së Mjekësisë “Elena Gjika” në Ferizaj do të furnizohet me karrige.

    Sipas Ministrisë, afati i Kontratës ekzistuese ka qenë deri në fund të muajit tetor dhe për shkak të importit të artikujve – karrigeve, kompania furnizuese nuk ka arritur të kryejë furnizimet brenda afatit ligjor të Kontratës.

    “Objekti i ri i Shkollës do të vazhdojë të furnizohet me karrige me Kontratën e re të lidhur nga AQP, furnizuesi i së cilës është në proces të sigurimit të artikujve për furnizim dhe pritet që deri në fund të muajit janar të kryhen furnizimet.” – ka thënë Ministria e Arsimit në përgjigjet e saj.

    Deri më tani, MASHTI thotë se ka paguar 33,444 euro për furnizimin me banka të objektit të ri, të të dy Shkollave të Mesme në Ferizaj, ndërsa ende nuk ka ekzekutuar pagesë për karrige dhe vetëm pas kryerjes së furnizimeve e pranimit nga Shkolla do të kryhet edhe kjo pagesë. 

    Kryetari i Këshillit të Prindërve të Gjimnazit “Shaban Hashani”, Besim Jashari ka thënë se mësimi nuk ka filluar për shkak se janë kthyer disa karrige që nuk kanë qenë të cilësisë së mirë e që i janë kushtuar objektit të ri të ndërtuar për Gjimnazin.

    “Kanë ardhë karriget me jokualitet edhe janë kthy karriget, për atë arsye kanë mbetë pa karrige, edhe nuk është fillu mësimi.” – ka thënë Jashari, më 13.01.2025.

    Për objektin e ish-Shkollës “Gjon Serreçi”, Jashari tha se nuk ka objekt më të papërshtatshëm për të qëndruar në të, e jo të zhvillohet mësim aty.

    Sipas Jasharit, nxënësit e Gjimnazit “Shaban Hashani” një orë mësimi e kanë zhvilluar 30 minuta, në objektin e vjetër të ish-Shkollës “Gjon Serreçi”, për shkak të kushteve të saj.

    Kurse drejtoresha e Gjimnazit “Shaban Hashani”, Hajrije Nebihu ka thënë se nuk e kanë nisur gjysmëvjetorin e dytë, pasi nuk janë kryer disa detaje të vogla tek objekti i ri i ndërtuar.

    “Do izolime të vogla rreth dritareve që ka ftoftë, këto na kanë pengu, edhe bash sot kem me pastru. Karriga e banka i kemi mbushë klasat.” – ka thënë Nebihu.

    Nebihu ka treguar se objekti i ri i Gjimnazit “Shaban Hashani” ka filluar të ndërtohet rreth katër vjet e gjysmë më parë.

    KALLXO.com e kishte vizituar Gjimnazin “Shaban Hashani” në tetor të vitit 2023. Në atë kohë, muret në pamjen e jashtme të Shkollës ishin të dëmtuara; dritaret në klasa e tualetet e Shkollës në gjendje jo të mirë. 

    E zëvendësdrejtori i Shkollës së Mjekësisë “Elena Gjika” në Ferizaj, Bardhyl Xheladini nuk ka pranuar të japë shumë detaje, por ka kërkuar që për këtë çështje të pyetet Drejtoria e Arsimit.

    Sipas Xheladinit, ata nuk e dinë se kur do ta fillojnë mësimin nxënësit e Shkollës së Mjekësisë në Ferizaj.

    Drejtori i Arsimit në Ferizaj, Afrim Llabjani ka thënë se u kanë dalë telashe me kulm të objektit të ri, që është ndërtuar për të dy Shkollat e Mesme.

    “Ka piku kulmi, edhe kena pasë pak problem me ujë edhe me energji elektrike. Sidomos me ujë, kur e kemi lëshu, ka pasë ngapak do rrjedhje.” – ka deklaruar Llabjani.

    Llabjani ka thënë se po përpiqen që nxënësit e të dy Shkollave ta fillojnë mësimin më 20.01.2025, ndërsa gjysmëvjetori i dytë i vitit shkollor 2024/2025 ka nisur në Kosovë më 08.01.2025.

    Kur është pyetur se si ka pasur problem me kulmin objekti i ri që është ndërtuar, ai ka shpjeguar se problemi ka qenë te ndërtimi i kullueseve të kulmit.

    Ndërtimi i objektit të ri të Gjimnazit “Shaban Hashani” dhe Shkollës së Mjekësisë “Elena Gjika” i ka kushtuar Komunës së Ferizajt rreth një milion e 200 mijë euro – sipas Llabjanit.

    Lokacioni ku është ndërtuar objekti i ri, Llabjani ka shpjeguar se ka qenë i AKP-së, e cila për dy vjet ua ka ndalur punimet, e ato kanë filluar në vitin 2019 deri më 2021.