Ballina

Kategori: Arsim i Mesëm

  • Nxënësit e dy shkollave të mesme në Ferizaj ende s’e kanë filluar gjysmëvjetorin e dytë

    Nxënësit e Gjimnazit “Shaban Hashani” dhe ata të Shkollës së Mjekësisë “Elena Gjika” në Ferizaj ende nuk e kanë nisur gjysmëvjetorin e dytë.

    Të dy shkollat e mesme të larta, sipas drejtorit të Arsimit në Ferizaj, Afrim Llabjani, kanë funksionuar në objektin e ish-Shkollës Fillore “Gjon Serreçi” dhe pritet që të dalin në objektin e ri që është ndërtuar te salla e sporteve “Bill Clinton”.

    I pyetur se pse nuk ka nisur gjysmëvjetori i dytë për nxënësit e shkollave të mesme të larta “Elena Gjika” e “Shaban Hashani”, Llabjani tha se u kanë dalë disa probleme me objektin e ri që është ndërtuar për këto shkolla.

    Llabjani ka thënë se po përpiqen që nxënësit e të dy shkollave ta fillojnë mësimin më 20.01.2025, ndërsa gjysmëvjetori i dytë i vitit shkollor 2024/2025 ka nisur në Kosovë më 08.01.2025.

    Drejtoresha e Gjimnazit “Shaban Hashani”, Hajrije Nebihu, tha se nuk e kanë nisur gjysmëvjetorin e dytë pasi nuk janë kryer disa detaje të vogla tek objekti i ri i ndërtuar.

    “Do izolime të vogla rreth dritareve që ka ftoftë, këto na kanë pengu edhe bash sot kem me pastru. Karrika e banka i kemi mbushë klasat” – ka thënë Nebihu.

    Nebihu ka treguar se objekti i ri i Gjimnazit “Shaban Hashani” ka filluar të ndërtohet rreth katër vjet e gjysmë më parë.

    Ajo ka shpjeguar se deri më 24.12.2024 kanë mësuar në objektin e ish-Shkollës “Gjon Serreçi”, për të cilin tha se është objekt i vjetër dhe ka pasur kushte “të tmerrshme”  për ta zhvilluar procesin mësimor.

    “Dyert, dritaret s’ka mundësi me u renovu se e shtijnë të ftohtin në tana anët, një erë ato i qet… Tualetet m’i pa, i kemi renovu kur kemi hy, krejt tavanet kanë ra poshtë, pikin n’tana anët… Ajo ka ardhë veç t’u u demolu” – ka treguar Nebihu.

    KALLXO.com e kishte vizituar Gjimnazin “Shaban Hashani” në tetor të vitit 2023. Në atë kohë, muret në pamjen e jashtme të shkollës ishin të dëmtuara, dritaret në klasa, tualetet e shkollës në gjendje jo të mirë. 

    Nebihu nuk ka dhënë ndonjë datë se kur pritet nxënësit e Gjimnazit “Shaban Hashani” ta fillojnë gjysmëvjetorin e dytë.

    “U kam thënë (nxënësve) që duhet me pritë deri në njoftimin e ardhshëm… Ndodhë që në qershor (2025) me vazhdu zëvendësimin e orëve (mësimore)” – ka thënë Nebihu.

    Por kryetari i Këshillit të Prindërve të Gjimnazit “Shaban Hashani”, Besim Jashari, tha se mësimi nuk ka filluar për shkak se janë kthyer disa karrige që nuk kanë qenë të cilësisë së mirë e që i janë kushtuar objektit të ri të ndërtuar për gjimnazin.

    “Kanë ardhë karriget me jokualitet edhe janë kthy karriget, për atë arsye kanë mbetë pa karrige edhe nuk është fillu mësimi” – ka thënë Jashari.

    Për objektin e ish-shkollës “Gjon Serreçi”, Jashari tha se nuk ka objekt më të papërshtatshëm për të qëndruar në të e jo të zhvillohet mësim aty.

    “As s’kanë funksionu nxemjet qysh duhet, as dritare… Aty mund të marrësh sëmundje, d.m.th. nëse shkoni gjatë ditë ti merr sëmundje aty edhe kthehesh në shtëpi i sëmurë” – tha Jashari.

    Sipas Jasharit, nxënësit e Gjimnazit “Shaban Hashani” një orë mësimi e kanë zhvilluar 30 minuta në objektin e vjetër të ish-shkollës “Gjon Serreçi”, për shkak të kushteve të saj.

    Jashari tha se bashkë me Këshillin drejtues të Gjimnazit “Shaban Hashani” janë duke e shqyrtuar mundësinë që të dalin prapë në objektin e ish-shkollës “Gjon Serreçi” nëse nuk dalin në objektin e ri të ndërtuar.

    Si Këshill i Prindërve, Jashari tha se janë pro zëvendësimit të mësimit për ditët e humbura.

    Kurse, zëvendësdrejtori i Shkollës së Mjekësisë “Elena Gjika” në Ferizaj, Bardhyl Xheladini, nuk ka pranuar të japë shumë detaje, por ka kërkuar që për këtë çështje të pyetet Drejtoria e Arsimit.

    “Në rregull është ama drejtori i Arsimit e ka përgjegjësinë për me dhanë këtë deklaratë, se prej atij varet” – ka thënë Xheladini.

    Sipas Xheladinit, ata nuk e dinë se kur do ta fillojnë mësimin nxënësit e Shkollës së Mjekësisë në Ferizaj.

    Drejtori i Arsimit në Ferizaj, Afrim Llabjani, tha se u kanë dalë telashe me kulm të objektit të ri që është ndërtuar për të dy shkollat e mesme.

    “Ka piku kulmi edhe kena pasë pak problem me, ujë edhe me energji elektrike. Sidomos me ujë, kur e kemi lëshu, ka pasë ngapak do rrjedhje” – ka thënë Llabjani.

    Kur u pyet se si ka pasur problem me kulmin objekti i ri që është ndërtuar, ai ka shpjeguar se problemi ka qenë te ndërtimi i kullueseve të kulmit.

    “Kur kanë fillu m’i ndërtu ulluqet aty, ai operatori që i ka rregullu ulluqet, unë po flas sipas atyre të cilët ma kanë shpjegu… aty pastaj ka lëvizë një llamarinë edhe është dashtë me rregullu, atë e kemi rregullu javën e kalume” – tha Llabjani. 

    Ndërsa, për karriget, Llabjani ka thënë se Ministria e Arsimit ua ka premtuar, mirëpo para tre-katër javësh objekti është furnizuar vetëm me bankat shkollore.

    “Ata janë arsyetu me një mendim se është prishë tenderi apo nuk kanë qenë të kënaqur me cilësinë e karrigeve edhe ne jemi detyruar që gjatë këtyre ditëve d.m.th. sa kemi pritë kaq shumë, jemi detyru që karriget e vjetra m’i çu atje” – ka treguar Llabjani.

    Sipas Llabjanit, ata janë detyruar që t’i bartin karriget e komodinat e mëparshme që i kanë shfrytëzuar të dy shkollat te objekti i ri.

    Llabjani tha se edhe sikur të kishte buxhet Komuna e Ferizajt t’i blejë bankat shkollore dhe karriget nuk ka të drejtë pasi i takon Autoritetit Qendror të Prokurimit përmes Ministrisë së Arsimit.

    Ndërtimi i objektit të ri të Gjimnazit “Shaban Hashani” dhe Shkollës së Mjekësisë “Elena Gjika” i ka kushtuar Komunës së Ferizajt rreth një milion e 200 mijë euro, sipas Llabjanit.

    KALLXO.com e ka pyetur Ministrinë e Arsimit për furnizimin e objektit të ri me banka shkollore e karrige, por nuk ka pranuar përgjigje deri në publikimin e këtij lajmi.

    Lokacioni ku është ndërtuar objekti i ri, Llabjani ka shpjeguar se ka qenë i AKP-së, e cila për dy vjet ua ka ndalur punimet, e ato kanë filluar në vitin 2019 deri më 2021.

    “Shumicën e kohës na e ka marrë pastaj Agjencioni Kosovar i Privatizimit me ndërrimin e Qeverisë nga Qeveria Hoti në Qeverinë Kurti, d.m.th. Qeveria Kurti ka nxjerrë vendim edhe i ka shfuqizu krejt vendimet e mëparshme, i cili ua ka leju tokat e AKP-së, komunave edhe na i ka marr pronat AKP-ja prapë. Pastaj, është dashtë me ndjek shumë procedura për me na leju fillimin e punimeve. Rifillimi i punimeve ka fillu para 4-5 muajve” – tha Llabjani. 

  • Kërkesa e prindërve drejtuar partive politike: Mos i përdorni fëmijët tanë për agjenda partiake dhe rrini larg shkollave dhe nxënësve!

    Pas raportimit të KALLXO.com se nxënësve të Gjimnazit “Kuvendi i Arbërit” në Ferizaj u ka shkuar një mesazh njoftues për mbajtjen e një mbledhjeje të Lëvizjes Vetëvendosje në këtë qytet, më 09.01.2025, ka reaguar Këshilli i Prindërve të Kosovës.

    Këshilli i Prindërve të Kosovës thotë se kanë pranuar ankesa nga disa këshilla komunalë të prindërve për disa raste të keqpërdorimit të këshillave të nxënësve në disa shkolla.

    “Këshilli i Prindërve të Kosovës reagon dhe shpreh shqetësimin lidhur me keqpërdorim e grupeve të këshillave të nxënësve, të cilat janë të krijuara si trupa të pavarur për të kontribuar për përmirësimin dhe mbrojtjen e të drejtave të nxënësve dhe kushteve të tyre të mësim-nxënies dhe jo për qëllime politiko-partiake” – thuhet në reagimin e Këshillit të Prindërve të Kosovës në Facebook më 10.01.2025.

    Si Këshill i Prindërve të Kosovës e kanë dënuar çdo keqpërdorim të tillë nga çdokush dhe u kanë bërë thirrje këshillave të nxënësve që të përdoren vetëm për qëllimin mbi të cilin janë themeluar, e po ashtu ata kanë një thirrje edhe për partitë politike.

    “KPK, bënë thirrje Këshillave të Prindërve dhe Këshillave të Nxënësve që t’i kryejnë detyrat e tyre konform qëllimit për të cilin janë themeluar dhe ekzistoj dhe mos të bien pre e agjendave partiake. Po ashtu KPK, bënë thirrje të gjitha partive politike që mos t’i përdorin fëmijët tanë për agjenda partiake dhe partitë të rrinë larg shkollave dhe nxënësve!” – ka theksuar Këshilli i Prindërve.

    Po ashtu, Këshilli i Prindërve të Kosovës u ka kërkuar edhe këshillave komunalë të prindërve në Kosovë që të jenë vigjilentë gjatë kohës së fushatës zgjedhore, duke ruajtur pavarësinë dhe paanshmërinë e tyre dhe të denoncojnë te ta çdo rast potencial të përdorimit të nxënësve për qëllime elektorale.

    Fushata elektorale pritet të fillojë të shtunën, më 11.01.2025.

    Në anën tjetër, mesazhi që iu dërgua nxënësve të Gjimnazit “Kuvendi i Arbërit” në Ferizaj, ka bërë bujë të madhe në gjithë qytetin.

    Pretendohej se mesazhi u dërgua nga kryetarja e Këshillit të Nxënësve të Gjimnazit “Kuvendi i Arbërit”, e cila është nxënëse.

    “Nesër me datë 09.01.2025 do të ketë një mbledhje në kafen X prej orës 18:30. është një lloj organizimi nga Lëvizja Vetëvendosje, ku do të jetë prezent edhe kryeministri i Kosovës. Do të ketë muzike dhe pije. Mundësisht dërgojeni këtë mesazh nëpër klasët e juaja dhe m’i dërgoni sot emrat e nxënësave të cilët do të jenë pjesëmarrës” – thuhet në mesazhin që pretendohet se u është dërguar nxënësve të Gjimnazit “Kuvendi i Arbërit”.

    Zëvendësdrejtori i Gjimnazit, Adnan Hashani, ka thënë për KALLXO.com se kanë mbajtur një mbledhje me Këshillin e Nxënësve, në të cilin është deklaruar kryetarja e këtij Këshilli në lidhje me dërgimin e mesazhit.

    Drejtori i Arsimit në Ferizaj, Afrim Llabjani, tha se është informuar në mbrëmje të datës 08.01.2025 se nga kryetarja e Këshillit të Nxënësve të Gjimnazit “Kuvendi i Arbërit” u është dërguar mesazhi nxënësve.

    Mëngjesin e të enjtes, më 09.01.2025, Llabjani tha se e ka takuar drejtorin e Gjimnazit  “Kuvendi i Arbërit”, Bajram Rexhepi. Nga ky takim, Rexhepi ka thënë se ishte informuar për këtë rast.

    “Kërkova nga drejtori [i Gjimnazit] që t’i thirrin kryetarët e këshillave të klasëve, secilës klasë, edhe kryetaren e Këshillit të Nxënësve, ta bisedojnë këtë çështje, pastaj duhet m’i shiqu edhe pjesët e tjera, aspektet e tjera ligjore, udhëzimet administrative se çka mund të bëjmë ne në këtë drejtim” – ka treguar Llabjani përmes telefonit për KALLXO.com.

    Sipas Llabjanit, nxënësit nëse janë në proces mësimor gjatë kohës që mbahet mbledhja e LVV-së, nuk kanë të drejtë të marrin pjesë në atë mbledhje.

    “Unë po besoj që nxënësit nuk marrin pjesë edhe nuk duhet të marrin pjesë në këto aktivitete, sepse ata janë, e para janë të mitur që nuk i takojnë moshës madhore për të votuar, e dyta – mund të jenë të manipuluar” – ka theksuar Llabjani.

    Zëvendësdrejtori Hashani ka treguar se çka kanë biseduar në mbledhjen që ka mbajtur Këshilli i Nxënësve të Gjimnazit.

    Sipas Hashanit, nxënësja është mashtruar prej Këshillit të Nxënësve në nivel komunal.

    Hashani tha se nxënëses i është kërkuar nga kryetari i Këshillit të Nxënësve të Ferizajt që ta shpërndajë mesazhin te nxënësit, i cili sipas tij edhe është shpërndarë te të gjithë nxënësit e Gjimnazit.

    “Kryetarja e ka sqaru se si ka rrjedhë çështja. U kanë kërkesë, kjo ka ra pre e mashtrimit me thanë edhe e ka shpërnda mesazhin. Nxënësit e mirëkuptuan edhe nuk pat naj kërkesë për naj masë diçka” – tha Hashani.

    “Ata kanë kërku ose ai ka kërku me shpërnda mesazhin tek kryetarët e klasëve, nëse dëshirojnë me shku në takim me kryeministrin… Ajo e pranoi që ka gabu, s’e ka mendu që është çështje politike edhe e ka shpërnda” – ka shtuar Hashani.

    Hashani tha se nxënësja vazhdon të jetë kryetare e Këshillit të Nxënësve të Gjimnazit, pasi nuk kishte kërkesë për ta shkarkuar nga kjo pozitë.

    Hashani pretendon se mesazhi që u është dërguar nxënësve të Gjimnazit “Kuvendi i Arbërit” është shpërndarë edhe në shkollat e tjera të Ferizajt.

    KALLXO.com ka kontaktuar me kryetarin e Këshillit të Nxënësve të Ferizajt. Ai është nxënës i Shkollës Ekonomike “Faik Konica” në Ferizaj dhe ka thënë se e ka parë në internet lajmin që Lëvizja Vetëvendosje do të jetë në Ferizaj më 09.01.2025.

    Ai tha se e ka dërguar mesazhin në mënyrë shoqërore në një grup në Viber në të cilin janë të gjithë kryetarët e këshillave të nxënësve të shkollave në Ferizaj.

    “Ia kam çu mesazhin, ata nuk e kanë kuptu, kanë shku te drejtorat, t’u mendu që jam t’u dashtë m’iu thanë – shkoni patjetër… Tani drejtorat më kanë kontaktu krejt mua përveç drejtorit të Arsimit, ama unë u kam tregu edhe drejtorave tjerë edhe drejtorit të shkollës tem që ai nuk u kanë tendencë, se na jena institucion, na s’kena drejt m’u përzi me parti politike hiç” – ka treguar nxënësi.

    Drejtori i Shkollës Ekonomike “Faik Konica” dhe Këshilli i Nxënësve të kësaj shkolle e kanë mbajtur një takim me kryetarin e Këshillit të Nxënësve në nivel komunal. Nxënësi tha se pritet që të merret ndonjë masë ndaj tij nga ana e Këshillit të shkollës.

    Ai e ka mohuar se do të shkojë në mbledhjen e Lëvizjes Vetëvendosje të enjten, më 09.01.2025.

    KALLXO.com ka kontaktuar edhe me Ditjon Fetahun, drejtor ekzekutiv i organizatës “Kosovo Youth Council (KYC)”.

    Në baza vullnetare KYC ndihmon në zgjedhjen e kryetarit të Këshillit të Nxënësve në nivel komunal.

    Fetahu përmes telefonit ka thënë se kanë dëgjuar për këtë rast dhe janë duke u frikësuar se nuk është vetëm në Ferizaj.

  • Si u shpërnda mesazhi te nxënësit e Gjimnazit “Kuvendi i Arbërit” për tubimin e LVV-së në Ferizaj?

    Një mesazh që pretendohet se u ka shkuar të gjithë nxënësve të Gjimnazit “Kuvendi i Arbërit” në Ferizaj, e në të cilin njoftohet se do të mbahet një mbledhje e Lëvizjes Vetëvendosje në qytet, më 09.01.2025, ka bërë bujë në gjithë qytetin.

    Pretendohej se mesazhi u dërgua nga kryetarja e Këshillit të Nxënësve të Gjimnazin “Kuvendi i Arbërit”, e cila është nxënëse.

    “Nesër me datë 09.01.2025 do të ketë një mbledhje në kafen X prej orës 18:30. është një lloj organizimi nga Lëvizja Vetëvendosje, ku do të jetë prezent edhe kryeministri i Kosovës. Do të ketë muzike dhe pije. Mundësisht dërgojeni këtë mesazh nëpër klasët e juaja dhe m’i dërgoni sot emrat e nxënësave të cilët do të jenë pjesëmarrës” – thuhet në mesazhin që pretendohet se u është dërguar nxënësve të Gjimnazit “Kuvendi i Arbërit”.

    Zëvendësdrejtori i Gjimnazit, Adnan Hashani, ka thënë për KALLXO.com se kanë mbajtur një mbledhje me Këshillin e Nxënësve, në të cilin është deklaruar kryetarja e këtij Këshilli në lidhje me dërgimin e mesazhit.

    Drejtori i Arsimit në Ferizaj, Afrim Llabjani, tha se është informuar në mbrëmje të datës 08.01.2025 se nga kryetarja e Këshillit të Nxënësve të Gjimnazit “Kuvendi i Arbërit” u është dërguar mesazhi nxënësve.

    Mëngjesin e të enjtes, më 09.01.2025, Llabjani tha se e ka takuar drejtorin e Gjimnazit  “Kuvendi i Arbërit”, Bajram Rexhepi. Nga ky takim, Rexhepi ka thënë se ishte informuar për këtë rast.

    “Kërkova nga drejtori [i Gjimnazit] që t’i thirrin kryetarët e këshillave të klasëve, secilës klasë, edhe kryetaren e Këshillit të Nxënësve, ta bisedojnë këtë çështje, pastaj duhet m’i shiqu edhe pjesët e tjera, aspektet e tjera ligjore, udhëzimet administrative se çka mund të bëjmë ne në këtë drejtim” – ka treguar Llabjani përmes telefonit për KALLXO.com.

    Sipas Llabjanit, nxënësit nëse janë në proces mësimor gjatë kohës që mbahet mbledhja e LVV-së, nuk kanë të drejtë të marrin pjesë në atë mbledhje.

    “Unë po besoj që nxënësit nuk marrin pjesë edhe nuk duhet të marrin pjesë në këto aktivitete, sepse ata janë, e para janë të mitur që nuk i takojnë moshës madhore për të votuar, e dyta – mund të jenë të manipuluar” – ka theksuar Llabjani.

    Ndërsa Rexhepi ka thënë për KALLXO.com se zëvendësdrejtori i Gjimnazit, Adnan Hashani, do ta mbajë një mbledhje me kryetaren e Këshillit të Nxënësve të enjten për ta biseduar këtë çështje.

    Zëvendësdrejtori Hashani ka treguar se çka kanë biseduar në mbledhjen që ka mbajtur Këshilli i Nxënësve të Gjimnazit.

    Sipas Hashanit, nxënësja është mashtruar prej Këshillit të Nxënësve në nivel komunal.

    Hashani tha se nxënëses i është kërkuar nga kryetari i Këshillit të Nxënësve të Ferizajt që ta shpërndajë mesazhin te nxënësit, i cili sipas tij edhe është shpërndarë te të gjithë nxënësit e Gjimnazit.

    “Kryetarja e ka sqaru se si ka rrjedhë çështja. U kanë kërkesë, kjo ka ra pre e mashtrimit me thanë edhe e ka shpërnda mesazhin. Nxënësit e mirëkuptuan edhe nuk pat naj kërkesë për naj masë diçka” – tha Hashani.

    “Ata kanë kërku ose ai ka kërku me shpërnda mesazhin tek kryetarët e klasëve, nëse dëshirojnë me shku në takim me kryeministrin… Ajo e pranoi që ka gabu, s’e ka mendu që është çështje politike edhe e ka shpërnda” – ka shtuar Hashani.

    Hashani tha se nxënësja vazhdon të jetë kryetare e Këshillit të Nxënësve të Gjimnazit, pasi nuk kishte kërkesë për ta shkarkuar nga kjo pozitë.

    Kur u pyet nëse nxënësit do të marrin pjesë në mbledhjen e Lëvizjes Vetëvendosje, Hashani e ka mohuar.

    Hashani ka treguar se nxënësit e përfundojnë mësimin në ora 19:05 dhe janë nxënës kryesisht të klasës 10 e gjysma e tyre të klasës 11.

    Para se të mbahej mbledhja e Këshillit të Nxënësve të Gjimnazit “Kuvendi i Arbërit”, Hashani tha se ka biseduar me prindin e nxënëses.

    “Edhe ajo [nëna e nxënëses] më tha që ka ra pre e kërkesës të një kryetarit të Këshillit të Nxënësve në nivel komunal. Edhe ajo e ka pasë shqetësim, pasi çika s’ka flejtë deri në dy të natës, ka qenë e shqetësuar” – ka thënë Hashani.

    Hashani pretendon se mesazhi që u është dërguar nxënësve të Gjimnazit “Kuvendi i Arbërit” është shpërndarë edhe në shkollat e tjera të Ferizajt.

    KALLXO.com ka kontaktuar me kryetarin e Këshillit të Nxënësve të Ferizajt. Ai është nxënës i Shkollës Ekonomike “Faik Konica” në Ferizaj dhe ka thënë se e ka parë në internet lajmin që Lëvizja Vetëvendosje do të jetë në Ferizaj më 09.01.2025.

    Ai tha se e ka dërguar mesazhin në mënyrë shoqërore në një grup në Viber në të cilin janë të gjithë kryetarët e këshillave të nxënësve të shkollave në Ferizaj.

    “Kjo punë u ba shumë e madhe. Unë e kam çu veç qysh me thanë hajt, nuk u kanë me shku me votu ose me shku me pa çka janë t’u bo. Ja, ja unë e kam pasë si qëllim shoqërie, jo obligim për ata, se nuk guxoj me dhanë kësi detyra as nuk është detyrë e jemja” – ka thënë ai.

    “Ia kam çu mesazhin, ata nuk e kanë kuptu, kanë shku te drejtorat, t’u mendu që jam t’u dashtë m’iu thanë – shkoni patjetër… Tani drejtorat më kanë kontaktu krejt mua përveç drejtorit të Arsimit, ama unë u kam tregu edhe drejtorave tjerë edhe drejtorit të shkollës tem që ai nuk u kanë tendencë, se na jena institucion, na s’kena drejt m’u përzi me parti politike hiç” – ka treguar nxënësi.

    Drejtori i Shkollës Ekonomike “Faik Konica” dhe Këshilli i Nxënësve të kësaj shkolle e kanë mbajtur një takim me kryetarin e Këshillit të Nxënësve në nivel komunal. Nxënësi tha se pritet që të merret ndonjë masë ndaj tij nga ana e Këshillit të shkollës.

    “Edhe drejtori i Shkollës tonë ka menu që është gabim. Më kanë kontaktu edhe disa drejtorë të tjerë, unë nuk e kam pasë qëllimin që me shku te Vetëvendosja… E kam mbajtë takimin me drejtorin, takim me Këshillin e shkollës” – tha ai.

    Ai e ka mohuar se do të shkojë në mbledhjen e Lëvizjes Vetëvendosje të enjten, më 09.01.2025.

    KALLXO.com ka kontaktuar edhe me Ditjon Fetahun, drejtor ekzekutiv i organizatës “Kosovo Youth Council (KYC)”.

    Në baza vullnetare KYC ndihmon në zgjedhjen e kryetarit të Këshillit të Nxënësve në nivel komunal.

    Fetahu përmes telefonit ka thënë se kanë dëgjuar për këtë rast dhe janë duke u frikësuar se nuk është vetëm në Ferizaj.

    “Këshilli i Nxënësve në nivel të Kosovës nuk ka kurrfarë të drejte ose të themi kurrfarë përgjegjësie mbi atë se çka ndodh me Këshillin e Nxënësve në nivel lokal… Sigurohemi që çdo vit me u siguru që zgjedhjet e Këshillit të Nxënësve qoftë në shkollë, qoftë nivel komunal e qoftë nacional, m’u ba në mënyrë demokratike, transparente” – ka shpjeguar Fetahu.

    Fetahu tha se nuk kanë fakte por vetëm disa informata se thirrja nxënësve për të qenë pjesëmarrës në mbledhjet e partive politike nuk është duke ndodhur vetëm në Ferizaj.

    “Fatkeqësisht e kemi këtë skepticizëm të informatave që jena t’u i marrë prej terrenit që potencialisht janë t’u u targetu prej grupeve rinore të partive, janë duke u targetu përfaqësuesit e nxënësave nëpër komuna të ndryshme edhe ne diskutime të ndryshme ata janë duke u motivu që me ba këtë angazhim” – ka thënë Fetahu.

    Ajo çfarë mund të bëjë KYC për rastin e Ferizajt, sipas Fetahut, është që t’i nisin një email grupit të nxënësve, të cilët e votojnë përfaqësuesin e tyre, që t’i informojnë mbi atë çka ka ndodhur në momentin që e konfirmojnë se është e vërtetë.

    “Që është ndesh komplet me mënyrën se qysh ata janë zgjedhur, me statutin të cilin e kanë në nivel komunal, të cilin e kanë aprovu si grup edhe automatikisht i bie që kuvendi i anëtarëve në atë komunë kanë bazë për m’i largu prej pozitës së përfaqësimit” – tha Fetahu.

    “Ne punojmë me gjenerata të përfaqësuesve të nxënësve tash e 25 vjet gati e përfaqësuesit e nxënësve në moment që i përfundojnë klasën e 12 çdoherë po na atakohen prej partive politike. Po tash kemi mbërri në një nivel ma nalt ku ata të cilët janë ataku në vitet paraprake po i atakojnë këta që janë në shkolla në periudhën e fushatës zgjedhore” – ka përfunduar Fetahu.

    KALLXO.com e ka pyetur zëdhënësin e Lëvizjes Vetëvendosje, Arlind Manxhuka, në lidhje me mbledhjen që pritet të mbahet nga LVV në Ferizaj, por nuk ka marrë përgjigje deri në publikimin e këtij lajmi.

    Në anën tjetër, ministri i Financave, Hekuran Murati, ka njoftuar në Facebook se sot është me kryeministrin Albin Kurti në Ferizaj.

  • Provimin për Licensim të Avancuar e kaluan 7 mësimdhënës – Nagavci e quan sukses të jashtëzakonshëm

    Ministrja e Arsimit, Arbërie Nagavci është shprehur se është e lumtur që e kanë përmbyllur me sukses procesin e avancimit të performancës së mësimdhënësve.

    Ashtu siç deklaroi ministrja Nagavci në Konferencën e fundvitit të datës 30.12.2024, provimit për licensim të avansuar të mësimdhënësve iu nënshtruan 54 mësimdhënës, prej tyre 7 kanë arritur pragun e kërkuar të kalueshmërisë.

    Megjithatë për Nagavcin, ky është një sukses i jashtëzakonshëm.

    “Për herë të parë javën e kaluar e përmbyllëm me sukses provimin për Licensën e avancuar, të cilit iu nënshtruan gjithsej 54 kandidatë. Ky është një sukses i jashtëzakonshëm në fushën e arsimit. Qëllimi i Sistemit të Licensimit është zhvillimi i vazhdueshëm profesional dhe avancimi në karrierë i mësimdhënësve përmes vlerësimit të performancës së tyre.” – ka shkruar Nagavci në Facebook, më 03.01.2025.

    Sipas Nagavcit, Sistemi i Licensimit të Mësimdhënësve ka qenë i planifikuar me legjislacion, por nuk është zbatuar asnjëherë në plotni. 

    Si rezultat i kësaj, Nagavci thotë se gjatë mandatit të tyre kanë ndërmarrë disa veprime për ta funksionalizuar këtë Sistem. 

    “Kemi rishikuar Aktet nënligjore për ta funksionalizuar Sistemin e Licensimit: UA [Udhëzimin Administrativ] për Sistemin e Licensimit, UA për Zhvillim Profesional, UA për Vlerësim të Performancës. Pas më shumë se 10 vjetëve mësimdhënësit në Kosovë mund të marrin licensë të re (përtëritje e Licensës së Karrierës) ose të avancohen (Licensa e Avancuar).” – ka thënë Nagavci.

    Nagavci kishte thënë në Konferencën e datës 30.12.2024 se kanë aplikuar më shumë se 100 mësimdhënës, për t’iu nënshtruar provimit për Licensë të Avancuar në Mësimdhënie.

    E për mënyrën e aplikimit, ajo ka thënë se e kanë zhvilluar në formën online përmes platformës e-Kosova dhe se koha për aplikim deri në marrje të Licensës është shkurtuar nga 2-3 muaj në 2-3 ditë, nga momenti kur mësimdhënësi aplikon.

    “Kemi zhvilluar Udhëzues dhe Formularë përkatës për të ndihmuar Shkollat dhe Komunat në realizim të vlerësimit të brendshëm të performancës së mësimdhënësve. Udhëzuesit e procedurat janë prezantuar dhe sqaruar në më shumë se 20 takime/punëtori regjionale e komunale me më shumë se 1000 pjesëmarrës: drejtorë shkollash, pedagogë, koordinatorë të cilësisë, si dhe zyrtarë arsimi në Komuna.” – ka shtuar Nagavci.

    Tutje, Nagavci mburret me këtë arritje duke përmendur se për herë të parë pas 12 vjetësh, Shkollat dhe Komunat zbatojnë vlerësimin e brendshëm të mësmdhënësve për përtëritjen e Licensës së Karrierës.

    Mësimdhënësit të cilët e kanë kaluar provimin e Licensës së Avancuar për Mësimdhënie, pas një vlerësimi të fundit, do të përfitojnë nga Ministria e Arsimit vlerë monetare 1.2% të vlerës së koeficientit që kanë.

    “Kemi zbatuar Sistemin e Vlerësimit të Performancës për Licensë të Avancuar, për herë të parë nga viti 2012, kur është paraparë me legjislacion; Kemi planifikuar buxhetin për shtesën e performancës për mësimdhënësit. Mësimdhënësit të cilët përfunduan me sukses provimin, pas edhe një vlerësimi nga Inspektorati i arsimit, do të përfitojnë edhe shtesën e performancës në vlerë monetare prej 1.2 të vlerës së koeficientit. Bashkë, çdo ditë për rezultate të synuara e avancim të performancës në arsim!” – ka theksuar Nagavci.

    Nagavci kishte njoftuar se më 27.12.2024 ishte mbajtur provimi i Licensës së Avancuar për Mësimdhënie dhe se këtij provimi i janë nënshtruar mësimdhënës të mësimit klasor të Gjuhës shqipe dhe të Matematikës nga Shkollat e Mesme të Ulëta dhe Shkollat e Mesme të Larta.

    Disa minuta para se të fillonte protesta e Sindikatës së Bashkuar të Arsimit, Shkencës dhe Kulturës (SBASHK), më 04.12.2024, ministrja Nagavci kishte njoftuar se është hapur aplikimi për mësimdhënësit të cilët janë të interesuar të pajisen me Licensën e Avancuar për Mësimdhënie.

    “Janë gjithsej 7 mësimdhënës të cilët kanë arritur kalueshmërinë mbi 80%, që ishte pragu për të vazhduar tutje. Tashmë, pasi që të kenë edhe vlerësimin nga ana e Inspektoratit të Arsimit do të përfitojnë edhe shtesën e performancës në vlerën monetare prej 1.2% të koeficientit.” – ka deklaruar Nagavci, më 30.12.2024.