Ballina

Kategori: Analizë

  • Trajtimi në proces disiplinor i sjelljes së gjyqtarit pas raportimit në media

    Situatat ku qytetarët i raportojnë sjelljet e gjyqtarëve në media sipas ligjit trajtohen në proceset disiplinore të Këshillit Gjyqësor të Kosovës (KGJK).

    Në arkivat e publikuara të KGJK-së, ku tregohen rastet disiplinore ndaj gjykatësve, haset një rast ku një gjykatës është ndëshkuar për shkak të sjelljes jo të mirë ndaj një qytetari.

    Qytetari kishte raportuar për sjellje të pahijshme të gjykatësit ndërsa pas publikimit të shkrimit KGJK kishte trajtuar rastin në disiplinë.

    Gjykatësi Veli Kryeziu nga Gjilani ishte pjesë e një procesi të tillë pasi gjatë një përgjigjeje për media kishte shkelur Kodin e Etikës.

    Këshilli Gjyqësor i Kosovës më 08.09.2022 kishte formuar panelin hetimor që do të shqyrtonte lëndën e Kryeziut nëse do kishte ose jo shkelje disiplinore.

    Më 25 nëntor 2022, paneli hetimor i kishte paraqitur Këshillit Gjyqësor të Kosovës raportin mbi hetimin për këtë lëndë disiplinore dhe marrëveshjen për pranimin e fajësisë lidhur me këtë rast.

    Pra, gjyqtari Veli Kryeziu në Këshillin Gjyqësor të Kosovës e kishte pranuar fajësinë për fjalët që i kishte thënë gjatë bisedës me gazetaren e KALLXO.com.

    “Sipas vlerësimit të panelit hetimor faktet kanë qenë jokontestuese për arsye se kanë qenë publike, subjekti i hetimit në bisedë telefonike me gazetaren e Kallxo.com kishte deklaruar se: “Me pasë kërcënu me arme e kisha vra” dhe nuk i ka kontestuar edhe subjekti i hetimit”-  thuhet në vendimin e KGJK-së më 14.12.2024.

    Gjyqtari kishte pranuar fajësinë dhe ishte pajtuar që t’i shqiptohet vërejtje me shkrim si sanksion disiplinor.

    “Gjyqtari i Gjykatës Themelore në Gjilan Veli Kryeziu është përgjegjës për shkelje disiplinore të përcaktuara në nenin S, paragrafi 1 dhe 2, pika 2.S, 2.1S, të Ligjit Nr.06/L-OS7 për Përgjegjësinë Disiplinore të Gjyqtarëve dhe Prokurorëve dhe të njëjtit i shqiptohet sanksioni disiplinor vërejtje publike me shkrim”- thuhet në vendimin e Këshillit Gjyqësor të Kosovës.

    Videon lidhur me këtë rast mund ta ndiqni në këtë LINK.

    Në korrik të vitit të 2022 KALLXO.com kishte raportuar se gjyqtari i Gjykatës Themelore të Gjilanit, Veli Kryeziu, dyshohej se kishte kërcënuar me armë një person.

    Ngjarja kishte ndodhur më 28 maj ndërsa ishte mbajtur vetëm brenda organeve të rendit dhe të drejtësisë.

    Kryeziu në një bisedë telefonike me KALLXO.com nuk kishte pranuar të ketë kërcënuar dikë, anipse ndaj tij tashmë kishte nisur procedurë ligjore në prokurori.

    “Nuk kam ide. Me pasë kërcënu me armë unë e kisha vra (nuk kuptohet mirë gjatë bisedës), nuk bëj budallakia. Nuk jap koment, ditën e mirë!”- kishte thënë shkurt gjyqtari Kryeziu.

    Me këto veprime, sipas KGJK-së, gjyqtari Kryeziu kishte shkelur nenin 5 të Ligjit për Përgjegjësinë Disiplinore të Gjyqtarëve dhe Prokurorëve.

    Në vendim thuhet se Kryeziu ka shkelur paragrafin 2.5 i cili thotë “ka keqpërdor pozitën zyrtare në çfarëdo forme për përfitime të paligjshme për veten”, paragrafin 2.15 i cili thotë “përfshihet në sjellje, qoftë kur është në detyrë apo privatisht, të cilat dëmtojnë reputacionin e gjykatës ose mund të dëmtojnë besimin e publikut në paanshmërinë ose besueshmërinë e gjyqësorit”.

  • Gjykatësit ndëshkohen nëse përdorin gjuhë të papërshtatshme në rrjetet sociale

    Sjellja e gjykatësve në Republikën e Kosovës është e rregulluar me Kodin e Etikës për gjykatat. Ky dokument parasheh rregulla strikte mbi të cilat gjykatësit sillen brenda sistemit dhe në publik.

    Rregullativa e etikës parasheh kufizime për jetën publike të gjykatësve, përfshirë hapësirat ku ata qëndrojnë, personat që mund t’i takojnë e deri te gjuha të cilën ata e përdorin në gjykime dhe në publik.

    Të dhënat tregojnë që Këshilli Gjyqësor i Kosovës ka vendosur që gjykatësit mund t’i përdorin rrjetet sociale mirëpo gjatë përdorimi të tyre ata duhet të respektojnë Kodin e Etikës.

    Në procedurat disiplinore që KGJK i ka zhvilluar evidentohen edhe situata ku gjykatësit janë ndëshkuar për një koment në rrjetet sociale.

    Më 31.03.2024 në  media ishte publikuar një lajm që shpërfaqte një veprim të një burri, i cili nuk e kishte lënë bashkëshorten e tij të futej në shtëpi pasi ajo kishte dalë për iftar me kolegët e saj.

    Mirëpo ajo çka e kishte karakterizuar këtë lajm ka qenë një koment i cili ishte bërë nga gjyqtari për kundërvajtje i Gjykatës së Ferizajt, Bahri Salihu.

    Salihu në komentin që kishte bërë në Facebook thotë që nuk miraton shëtitjet e grave në iftare, duke shtuar që gruaja nuk duhet ta ngushtojë burrin pasi që duhet t’i ketë mendët.

    “Edhe unë nuk e kisha miratu këtë shëtitje të gruas nëpër iftare të hamamit”- është vetëm një pjesë e komentit që Bahri Salihu e kishte lënë në lajmin e publikuar në faqen e KALLXO.com në Facebook.

    Më 17.04.2024 pas raportimit në media, KGJK ka nisur procedurë disiplinore ndaj gjyqtarit Salihu.

    Ndërsa pasi që autoriteti kompetent e në këtë rast kryetari i Gjykatës së Ferizajt e kishte vlerësuar se janë përmbushur elementet për inicimin e procedurës disiplinore ai i kishte dërguar kërkesë me shkrim Këshillit Gjyqësor të Kosovës.

    Më 07.06.2024, sipas Ligjit për përgjegjësinë disiplinore të gjyqtarëve, kryetari i Gjykatës së Ferizajt ka konsideruar se ka bazë të mjaftueshme që veprimet e gjyqtarit Bahri Salihu të trajtohen nga Këshilli Gjyqësor i Kosovës.

    Për ta hetuar rastin, KGJK duhet ta formojë një panel hetimor nga tre gjyqtarë të një gjykate tjetër, në afat prej jo më larg se 15 ditë prej kur është pranuar kërkesa për inicimin e procedurës disiplinore.

    Ky panel mbledh prova dhe u jep mundësinë palëve që të përgjigjen në pretendimet e ngritura.

    Këto hetime të panelit mund të zgjasin deri në pesë muaj.

    Ndërsa më 19.09.2024 KALLXO.com ka raportuar se Këshilli Gjyqësor i Kosovës më 04.07.2024 i ka shqiptuar vërejtje me shkrim gjyqtarit Bahri Salihu.

    Sipas vendimit të KGJK-së është arritur marrëveshja vullnetare për pranimin e përgjegjësisë disiplinore me gjyqtarin Bahri Salihu.

    “Aprovohet marrëveshja vullnetare për pranimin e fajësisë. Bahri Salihu është përgjegjës për shkelje disiplinore… Dhe i shqiptohet sanksion disiplinor vërejtje publike me shkrim”- thuhet në vendimin e KGJK-së.

    Sipas vendimit të KGJK-së paneli hetimor i themeluar me vendim të Këshillit Gjyqësor të Kosovës më 14.06.2024 i ka paraqitur KGJK-së raportin mbi hetimin për këtë lëndë disiplinore si dhe marrëveshjen vullnetare për pranimin e fajësisë në mes të panelit hetimor dhe gjyqtarit Bahri Salihu.

    Tutje sipas vendimit të KGJK-së, Këshilli më 04.07.2024 ka caktuar dhe mbajtur seancën dëgjimore për të shqyrtuar raportin hetimor dhe marrëveshjen vullnetare për pranimin e fajësisë të arritur mes gjyqtarit të Gjykatës Themelore të Ferizajt, Bahri Salihu dhe panelit hetimor.

    Gjithnjë sipas vendimit të KGJK-së, nga raporti hetimor u vërtetua fakti se gjyqtari Bahri Salihu ka bërë shkelje disiplinore kur në rrjetin social Facebook, te portali KALLXO.com, në lajmin me titull “Doli në iftar me kolegët e punës burri nuk e lejoi të hyjë në shtëpi”, ka komentuar me tekstin si: “ku me gjet kësi burra në Kosovë! Edhe une nuk e kisha miratu këtë shëtitje të gruas nëpër iftare të hamamit. Gruaja duhet me pasë mend vet dhe mos me ngushtu as burrin. Çfarë bërlloga kam unë në punën ku punoj, kurrë nuk e kisha lënë grua askund e lëre më në iftar të hamamit, se janë tranu krejt shqiptarët. Mbanë more fenë qysh ka qenë para luftës se mas luftës nuk është tu pas hjeshi asgjë”.

    Sipas vendimit të KGJK-së, me këtë veprim gjyqtari ka kryer shkelje disiplinore të përcaktuar me nenin 5 par. 1 lidhur me nenin 2.15 të Ligjit për Përgjegjësinë Disiplinore të Gjyqtarëve dhe Prokurorëve, i cili parasheh: “përfshihet në sjellje, qoftë kur është në detyrë apo privatisht, të cilat dëmtojnë reputacionin e gjykatës ose mund të dëmtojnë besimin e publikut në paanshmërinë ose besueshmërinë e gjyqësorit”.

    “Gjatë procedurës tek paneli hetimor, subjekti i hetimit dhe paneli hetimor kanë arritur marrëveshje vullnetare me të cilën subjekti i hetimit gjyqtari Bahri Salihu ka pranuar përgjegjësinë disiplinore me të cilën është ngarkuar, si dhe është pajtuar me sanksionin disiplinor “vërejtje publike me shkrim”, sipas nenit 5 par. 1 dhe 2 pika 2.15 të Ligjit Nr. 06/L-057 për Përgjegjësinë Disiplinore të Gjyqtarëve dhe Prokurorëve.” – thuhet në vendimin e KGJK-së.

    “KGJK, vlerësoi se marrëveshja vullnetare për pranimin e fajësisë e lidhur në mes të subjektit të hetimit gjyqtari Bahri Salihu dhe panelit hetimor, së bashku me dakordimin e tyre për llojin e sanksionit disiplinor të përcaktuar me nenin 7 par. 1 pika 1.2 të Ligjit Nr. 06/L-057 për Përgjegjësinë Disiplinore të Gjyqtarëve dhe Prokurorëve, i përmbush të gjitha kushtet ligjore, është i drejtë dhe në proporcion me shkeljen disiplinore të tij, andaj si të tillë edhe e aprovoj.” – thuhet tutje në vendimin e KGJK-së.

    Pas vërejtjes së shqiptuar me shkrim nga KGJK, KALLXO.com ka kontaktuar gjyqtarin Salihu për të marrë një përgjigje lidhur me vërejtjen me shkrim të shqiptuar nga KGJK. Salihu tha se nuk do të ankohet në Gjykatën Supreme për vendimin e KGJK-së.

    “Po, jam në dijeni, jo s`kam kurrëfarë komenti, Jo, jo, jo absolut (lidhur me apelimin)”- tha gjyqtari Salihu për KALLXO.com.

    Në këtë LINK mund ta gjeni vendimin e plotë të KGJK-së ndaj Bahri Salihut.

    Historiku

    Një lajm në KALLXO.com i publikuar më 31.03.2024 shpërfaqte një veprim të një burri, i cili nuk e kishte lënë bashkëshorten e tij të futej në shtëpi pasi ajo kishte dalë për iftar me kolegët e saj.

    Detaje më shumë lidhur me lajmin mund t’i gjeni duke klikuar KËTU.

    Në këtë lajm të publikuar në Facebook të KALLXO.com, një koment e kishte bërë edhe gjyqtari për kundërvajtje i Gjykatës së Ferizajt, Bahri Salihu.

    Salihu në komentin që kishte bërë në Facebook thotë që nuk miraton shëtitjet e grave në iftare, duke shtuar që ‘gruaja nuk duhet ta ngushtojë burrin pasi që duhet t’i ketë mendët’.

    Salihu në biografinë e tij, e cila është publike në faqen e Gjykatës së Ferizajt, del të ketë qenë prokuror në Ferizaj nga viti 2012 deri në vitin 2013.

  • Mbi gjysmë milioni euro për restaurimin e shtëpisë së Xhafer Devës, historiani Kelmendi: Thuajse asgjë s’ka mbetur nga origjinali

    Mbi gjysmë milioni euro ka kushtuar restaurimi i shtëpisë së Xhafer Devës në Mitrovicë, e cila para tri vjetësh ishte bërë subjekt i një vale reagimesh pro dhe kundër restaurimit.

    Nga dhjetori i vitit 2024 e deri më tani, ministri i Kulturës, Hajrulla Çeku ka publikuar disa njoftime me fotografi në llogarinë e tij në Facebook për restaurimin e kësaj shtëpie, duke e konsideruar si një ndër sukseset e Ministrisë së Kulturës, Rinisë dhe Sportit (MKRS) për vitin që lamë pas.

    Por, ekspertë të fushës thonë se nga restaurimi nuk ka mbetur thuajse asgjë nga origjinaliteti që kishte dikur kjo shtëpi. Vërejtje janë dhënë edhe për mbylljen e njërës prej dritareve të monumentit pas restaurimit.

    Nga viti 2012, shtëpia e Xhafer Devës është në Listën e Trashëgimisë Kulturore dhe mbrohet nga shteti.

    Në një përgjigje për KALLXO.com nga MKRS kanë thënë se restaurimi i shtëpisë së Devës në Mitrovicë ka kushtuar gjithsej 584,176.56 euro.

    “Kontrata bazë: 489,980.00 euro, punë shtesë: 48,980.06 euro, punë të pa-parapara: 45,216.50 euro”- thuhet në përgjigjen e MKRS-së rreth shpenzimeve të bëra për restaurimin e këtij monumenti.

    Ndërsa, nga Instituti i Kosovës për Mbrojtjen e Monumenteve (IKMM) kanë thënë se restaurimi është bërë sipas planit të miratuar nga ta dhe se dritarja e mbyllur në fasadën perëndimore nuk ka ekzistuar para viteve 1990.

    “Projekti tash më i realizuar i asetit në fjalë është realizuar sipas projektit të miratuar në IKMM, ndërsa për dritaren e mbyllur në fasadën perëndimore, ajo ka qenë një hapësirë ndriçuese e cila është hapur gjatë shfrytëzimit të ndërtesës nga banorët gjatë viteve 1990/2000, kurse në dokumentet e gjendjes burimore të asetit fasada perëndimore është tërësisht e mbyllur pa hapësira ndriçuese, dokumentacion ky i cili është marrë për bazë gjatë hartimit të projektit për ndërhyrjet konservuese dhe restauruese”- kanë thënë nga IKMM për KALLXO.com.

    Sa është ruajtur origjinaliteti i objektit?

    Historiani, Enis Kelmendi ka thënë për KALLXO.com se thuajse asgjë nuk ka mbetur nga origjinaliteti i monumentit pas restaurimit.

    “Sipas kritereve shkencore çdo objekt i trashëgimisë që ka nevojë për ndërhyrje duhet të rekonstruohet, ndërsa objekti në fjalë ka arritur në nivelin e renovimit ku nga origjinaliteti i saj thuajse nuk ka mbet asgjë, si nga fasada, dritaret, plastika e jashtme eksterieri i kornizave te dritareve, etj. Sa i përket dritares se mbuluar është e vërtete që ajo dritare nga ana perëndimore e objektit  ka ekzistuar, por është mbyllur nga ana e MKRS-së”- ka thënë Kelmendi, për KALLXO.com.

    Kelmendi ka thënë se edhe fasada e objektit pas renovimit nuk përkon me origjinalitetin.

    “Ndryshime janë bërë edhe në kulmin e objektit, i cili nuk është me origjinali që ka qenë, fasada e këtij objekti është e ashtuquajtur në zhargonin e ndërtimtareve FULL FASADË që nuk përkon me origjinalin”- ka pohuar historiani Kelmendi.

    Destimini i objektit

    Nga MKRS kanë thënë se shtëpia e restauruar e Xhafer Devës do të jetë një qendër multifuksionale.

    “Monumenti planifikohet të ketë destinim multifunksional: Hapësirë pune ku do të vendoset Qendra Rajonale e Trashëgimisë Kulturore të Mitrovicës; hapësirë pune ku do të vendoset OJQ me programe kulturore; hapësirë ku do të mund të ekspozohen vepra arti”- kanë thënë nga MKRS për KALLXO.com.

    Debatet rreth restaurimit

    Restaurimi i shtëpisë së Xhafer Devës nisi në 2018, pas një zjarri që kishe kalpuar objektin më 2015.

    Por në shkurt të 2022, plani për restaurimin e shtëpisë së Devës nxiti një valë reagimesh, nëse duhet restauruar.

    Ishte ambasadori gjerman në Kosovë, Jörn Rohde, i cili më 7.02.2022, përmes një postimin ne ‘X” (Twitter) shfaqi shqetësimin e tij lidhur me planet e MKRS-së për restaurimin e këtij monumenti, ish-pronari i së cilës, Xhafer Deva, njihet si bashkëpunëtor i ngushtë nazistëve gjatë Luftës së Dytë Botërore.

    “Shumë i shqetësuar për planet e restaurimit të shtëpisë së Xhafer Devës, një bashkëpunëtor/protagonist i njohur nazist i SS famëkeq Skanderbeg Div. Asnjë zbardhje e historisë! Mos e shtrembëroni të vërtetën në lidhje me Holokaustin ose krimet e luftës të kryera nga nazistët dhe bashkëpunëtorët vendas, Mbro Faktet”, pat shkruar në “X”, ambasadori Rohde”- pati deklaruar ambasadori Rohde.

    Reagimi i tij u përcoll me kundër-reagime të shumta, ndërsa ministri Hajrulla Çeku, më 09.2.2022 pait bërë të ditur gjatë një konference për media se MKRS nuk do të heqë dotë nga restaurimi i monumentit.

    Xhafer Deva nga Mitrovica njihet si bashkëpunëtor i nazistëve gjermanë. Ai ishte organizator i themelimit të organizatës “Lidhjes shqiptare të Prizrenit” dhe konsiderohet si ideatori i themelimit të divizionit ushtarak SS “Skanderbeg”. Deva shërbeu si ministër i Punëve të Brendshme të Shqipërisë gjatë viteve 1943-1944, kur vendi ishte nën kontrollin e regjimit nazist të Adolf Hitlerit.

    Sipas të dhënave të MKRS-ë, shtëpia e Devës është ndërtuar në vitin 1930-të, në bërthamën e vjetër të qytetit të Mitrovicës.

    Pamje e Shtëpisë së Xhafer Devës pas restaurimit. Foto: KALLXO.com.
    Pamje e Shtëpisë së Xhafer Devës pas restaurimit. Foto: KALLXO.com.
    Pamje e Shtëpisë së Xhafer Devës pas restaurimit. Foto: KALLXO.com.

     Pamje e Shtëpisë së Xhafer Devës para restaurimit.

    Pamje e vjetër e Shtëpisë së Xhafer Devës. Foto: Facebook/Hajrulla Çeku.

     

     

  • Në grevë e pa Program të miratuar, Teatri Kombëtar e nis vitin me skenë të heshtur

    Në grevë dhe pa Program të miratuar Teatri Kombëtar i Kosovës (TKK) e ka nisur vitin 2025.

    Më 18.11.2024 Shoqata Sindikale e Artistëve të Teatrit Kombëtar të Kosovës (SHSATKK) ka nisur një grevë me kërkesa për rritje të koeficientëve të pagave të punëtorëve të këtij Teatri.

    Greva ka bllokuar dhënien e shfaqjeve, duke bërë që të anulohet edhe Edicioni i tretë i Festivalit Mbarëkombëtar të Dramës “Moisiu”, i cili ishte planifikuar të mbahet nga 20 deri më 27.11.2024, në TKK në Prishtinë.

    Që nga dita e fillimit të grevës, më 18.11.2024 e deri në fund të vitit 2024, Këshilli grevist i SHSATKK-së dhe Ministria e Kulturës, Rinisë dhe Sportit (MKRS) nuk ka arritur të gjejnë ndonjë rrugëdalje nga greva.

    Grevistët e TKK-së kanë mbajtur edhe disa aksione sindikale para dhe gjatë grevës. Grevistët janë të vendosur për vazhdimin e grevës, deri në një sinjal nga MKRS-ja për plotësim të kërkesave të tyre: rritjen e pagave.

    Pritja e përgjigjes

    Aktori i TKK-së, Ardian Morina, nga Këshilli grevist ka thënë për KALLXO.com. se nuk kanë ndonjë shenjë nga MKRS lidhur me kërkesat e tyre. Ai ka shtuar se kërkesat e tyre për ekuivalentimin e koeficientëve të pagave për  punëtorët-aktorët e TKK-së nuk janë marrë seriozisht nga MKRS – pavarësisht paralajmërimeve të vazhdueshme që nga miratimi i Ligjit të Pagave.

    “Komunikim direkt nuk është që kemi, gjithashtu edhe me ndërmjetësin, që ne e kemi angazhuar qysh para fillimit të grevës, nuk është se ka pasur ndonjë kontakt, përveç që e ka kontaktuar sekretari i MKRS-së dhe ndërmjetësi ia ka shpjeguar procedurat e ndërmjetësimit. Dhe, ai (Sekretari) ka mbetur ta informojë Ministrin dhe me pa se cilat janë procedurat e mëtejme – nëse ajo (MKRS) do të vazhdojë komunikimin me ndërmjetësin për kërkesat që tashmë i kemi ngritur qe më shumë se 45 ditë. Kjo është çfarë kemi nga ana e MKRS, jo diçka më tepër.” – ka thënë Morina.

    Morina ka thënë se asnjëherë  nuk kanë marrë ndonjë zotim nga MKRS – lidhur me afatet për realizmin e kërkesave të tyre. Kjo, sipas tij, ka bërë që MKRS të duket joserioze edhe kur thotë se është duke punuar për realizmin e kërkesave të tyre.

    “Asnjëherë të vetme ne nuk kemi kërkuar që puna të kryhet sot për sot (rritja e pagave), por të paktën të kemi një zotim publik prej MKRS-së për punë që janë të thirrur me kry. Sepse, vërtet ka degraduar pozita e artistit (aktorit) në TKK në raport me atë të aktorëve të teatrove në rajon.” – ka thënë ai, duke lënë të kuptohet se greva do të  vazhdojë deri në realizmin e kërkesave të tyre.

    KALLXO.com ka dërguar pyetje në edhe në adresë të  MKRS-së – lidhur me hapat që po bën për plotësimin e kërkesave të grevistëve të TKK-së, por nuk ka marrë përgjigje deri në publikimin e artikullit.

    Heshtja e skenës

    Në anën tjetër, Kushtrim Mehmeti, udhëheqës artistik (UA) në TKK ka thënë për KALLXO.com se greva e aktorëve të TKK-së ka bllokuar repertorin e teatrit.

    Por si menaxhment, ka thënë ai, janë në kontakt të vazhdueshëm me grevistët, me qëllim të gjetjes së një zgjidhjeje për vazhdimin e aktiviteteve artistike në teatër.

    Përveç se në grevë, TKK-ja ende nuk ka një projekt-program të miratuar për 2025.

    Mehmeti ka thënë për KALLXO.com se Plani dhe diskutimet për repertorin e vitit 2025 janë në fazën e fundit dhe, siç ka thënë ai, brenda gjysmës së parë të këtij muaji (janar 2025) pritet miratimi i Programit vjetor.

    “Për më tepër, kemi ideuar që viti 2025 të shpallet ‘Viti i Grave’ – duke përfshirë vetëm regjisore gra dhe jemi duke shqyrtuar mundësitë për ta realizuar këtë ide.” – ka shtuar Mehmeti.

    Kërkesa e aktorëve dhe Ligji i Pagave

    Pas disa aksioneve sindikale, SHSATKK nisi më 18.11.2024 një grevë, duke bllokuar dhënien e  shfaqjeve në TKK.

    Kërkesat e grevistëve janë për rishikimin dhe rritjen e koeficientëve të pagave për punëtorët – aktorët e TKK-së.

    “Arsyeja për mbajtjen e grevës: mosrealizimi i kërkesës për përmirësimin, ngritjen e koeficientëve pas degradimit që i është bërë Ansamblit Rezident nga Ligji i Pagave.” – thuhet në Vendimin e SHSATKK për mbajtjen e grevës.

    Sipas Ligjit për Paga në Sektorin Publik, krijuesit dhe performuesit e kulturës e artit, ku përfshihen edhe aktorët e Ansamblit Rezident të TKK-së, janë të ranguar në tetë klasa.

    Në Shtojcën nr. 12 të Ligjit për Paga është dhënë edhe Tabela me koeficientët e pagave për krijuesit dhe performuesit e artit në Sektorin publik.

    Pas paralajmërimeve të shumta, më 16.09.2024, SHSATKK nisi një aksion sindikal paralajmërues me kërkesë për rishikimin dhe rritjen e koeficientëve të pagave për aktorët e Trupës Rezidente dhe të punëtorëve të tjerë të TKK-së.

    Së pari, duke filluar provat me 10 minuta vonesë, më 16.09.2024. Hapin e radhës lidhur me këtë kërkesë SHSATKK e mori më 14.10.2024, me shtyrjen për një orë të dhënies së shfaqjes “1984” në kuadër të Festivalit “Skupi International Theatre Festival 2024”, në Shkup, që nisi Edicionin me shfaqjen e TKK-së. Ndërsa, më  01.11.2024, SHSATKK e shtyu për 15 ditë grevën e përgjithshme në TKK.

    Më 15.11.2024 SHSATKK mori vendim për futjen në grevë dhe nga 18 nëntori 2024 skena e TKK-së është “kapluar” nga heshtja për shkak të grevës.