Ballina

Autor: Shqipron Xhema

  • Përkujtohet Masakra e Reçakut, kërkohet që drejtësia të vihet në vend

    Në fshatin Reçak të Shtimes u përkujtua masakra e kryer nga forcat serbe më 15.01.1999.

    Në 26-vjetorin e kësaj masakre u bënë homazhe te memoriali në Reçak dhe u mbajt akademi përkujtimore.

    Presidentja e Kosovës, Vjosa Osmani, në akademinë përkujtimore tha se kjo masakër është përkujtim i forcës dhe qëndrueshmërisë së popullit të Kosovës.

    “Na kujton forcën dhe qëndrueshmërinë e popullit tonë, për t’u ringritur dhe për të triumfuar” – deklaroi presidentja Osmani.

    Ish-shefi i Misionit Verifikues të OSBE-së, William Walker, i cili mori pjesë në homazhe dhe në akademi përkujtimore, tha se për masakrën mori vesh në mëngjesin e 16.01.1999.

    “Ishte e qartë që ajo që kisha parë atë mëngjes, që 45 civilë të pafajshëm ishin qëlluar me armë dhe i kishin larguar nga fshati, burra dhe djem nën përcjelljen e Policisë së Serbisë dhe Ushtrisë së Serbisë dhe u kthyen ditën tjetër të masakruar. Kam një ndjenjë që herën e ardhshme që do të më shihni në Reçak mund të jem në arkivol dhe do isha krenar të varrosem këtu në fshatin Reçak” – deklaroi Walker.

    Kryeministri i Kosovës, Albin Kurti, tha se dhimbja vazhdon të jetë prezente dhe se ata që kryen vrasjet nuk janë dënuar.

    “Varret në tokë, plagët në trup e shpirt, vrasësit në liri në Serbi. Varret e hapura në tokë, plagët e hapura në shpirt, arkivat e mbyllura në Beograd” – deklaroi mes tjerash kryeministri Kurti.

    Në homazhet në Reçak morën pjesë edhe udhëheqës të partive politike.

    “Asnjë prej nesh nuk duhet të ndihemi rehat derisa të ketë drejtësi për secilën jetë të dhënë për lirinë e Kosovës” – deklaroi kryetari i PDK-së, Memli Krasniqi.

    “Ky akt i rëndë çnjerëzor, është akt kundër njerëzimit” – ka thënë kryetari i LDK-së, Lumir Abdixhiku.

    Në homazhe morën pjesë edhe udhëheqës të AAK-së, Nismës Socialdemkrate e të Koalicionit për Familjen.

    “Është absurde kjo gjendje pra, mos me pasë drejtësi, procese gjyqësore, mos me u nxjerrë para gjyqit ata që i kanë kryer këto krime” – deklaroi kryetari i AAK-së, Ramush Haradinaj.

    Kryetari i Komunës së Shtimes, Qemajl Aliu, tha se kjo ditë vulosi fatin e Kosovës.

    “Është një ditë që vulosi fatin e popullit tonë” – deklaroi Aliu.

    Më 15.01.1999, forcat policore dhe ushtarake serbe në Kosovë vranë dhe i masakruan 45 civilë shqiptarë në fshatin Reçak.

    Ish-ambasadori, William Walker, e kishte parë nga afër krimin e kryer mbi civilët shqiptarë dhe ka pasur rol kyç për dokumentimin e Masakrës së Reçakut.

    Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

    Ish-presidenti i Jugosllavisë, Sllobodan Millosheviq, ishte akuzuar për krime lufte dhe për krime kundër njerëzimit, të kryera nga forcat serbe e jugosllave në Kosovë. Millosheviq ishte akuzuar për krime lufte dhe krime kundër njerëzimit të kryera edhe në luftërat në Bosnjë e Hercegovinë, si dhe në Kroaci.

    Gjykimi i tij në Gjykatën ndërkombëtare penale për ish-Jugosllavinë (ICTY), me seli në Hagë, nuk kishte marrë epilog pasi Millosheviq kishte vdekur më 11.03.2006 në qeli teksa po mbahej në paraburgim.

    Millan Millutinoviq, ish-kryetari i Serbisë, ishte liruar nga akuzat për krime lufte gjatë konfliktit në Kosovë.

    Nikolla Shainoviq, zëvendëskryeministër i Republikës Federale të Jugosllavisë, ishte dënuar me 18 vjet burg për krime kundër njerëzimit dhe shkelje të ligjeve apo zakoneve të luftës.

    Dragolub Ojdaniq, ish-shefi i Shtabit të Përgjithshëm të Ushtrisë jugosllave, ishte dënuar me 15 vjet burg për krime kundër njerëzimit.

    Nebojsha Pavkoviq, ish-komandanti i Armatës së Tretë të Ushtrisë jugosllave, ishte dënuar me 22 vjet burg për krime kundër njerëzimit dhe shkelje të ligjeve apo zakoneve të luftës.

    Vlladimir Llazareviq, ish-komandanti i Korpusit të Prishtinës të Ushtrisë jugosllave, ishte dënuar me 14 vjet burg për krime kundër njerëzimit.

    Sreten Llukiq, ish-shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për krime kundër njerëzimit dhe shkelje të ligjeve apo zakoneve të luftës.

    Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

    Ish-presidenti i Jugosllavisë, Sllobodan Millosheviq, ishte akuzuar për krime lufte dhe për krime kundër njerëzimit, të kryera nga forcat serbe e jugosllave në Kosovë. Millosheviq ishte akuzuar për krime lufte dhe krime kundër njerëzimit të kryera edhe në luftërat në Bosnjë e Hercegovinë, si dhe në Kroaci.

    Gjykimi i tij në Gjykatën ndërkombëtare penale për ish-Jugosllavinë (ICTY), me seli në Hagë, nuk kishte marrë epilog pasi Millosheviq kishte vdekur më 11.03.2006 në qeli teksa po mbahej në paraburgim.

    Millan Millutinoviq, ish-kryetari i Serbisë, ishte liruar nga akuzat për krime lufte gjatë konfliktit në Kosovë.

    Nikolla Shainoviq, zëvendëskryeministër i Republikës Federale të Jugosllavisë, ishte dënuar me 18 vjet burg për krime kundër njerëzimit dhe shkelje të ligjeve apo zakoneve të luftës.

    Dragolub Ojdaniq, ish-shefi i Shtabit të Përgjithshëm të Ushtrisë jugosllave, ishte dënuar me 15 vjet burg për krime kundër njerëzimit.

    Nebojsha Pavkoviq, ish-komandanti i Armatës së Tretë të Ushtrisë jugosllave, ishte dënuar me 22 vjet burg për krime kundër njerëzimit dhe shkelje të ligjeve apo zakoneve të luftës.

    Vlladimir Llazareviq, ish-komandanti i Korpusit të Prishtinës të Ushtrisë jugosllave, ishte dënuar me 14 vjet burg për krime kundër njerëzimit.

    Sreten Llukiq, ish-shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për krime kundër njerëzimit dhe shkelje të ligjeve apo zakoneve të luftës.

    Aktgjykimin të plotë, në gjuhën angleze, e gjeni këtu.

  • Kurti takohet me William Walker, flasin për librin e tij që dokumenton Masakrën e Reçakut

    Kryeministri i Kosovës, Albin Kurti, ka takuar ambasadorin William Walker, ish-shef i Misionit Verifikues të OSBE-së.

    Në këtë takim u fol për historinë e viteve të fundit të Kosovës, me theks te Masakra e Reçakut dhe dëshminë e Walkerit për këtë ngjarje.

    Kurti ka shprehur mirënjohje për angazhimin e Walkerit për promovimin e ndihmës ndërkombëtare gjatë luftës në Kosovë.

    Tutje në takim u fol edhe për përpjekjet e Qeverisë së Kosovës për të mundësuar botimin e librit të kujtimeve të William Walkerit përmes të cilit dokumentohet Masakra e Reçakut.

    “Kryeministri Kurti shtoi se ky libër dhe këto dëshmi të ambasadorit Walker do të shërbejnë si një mjet për promovimin e së vërtetës për Kosovën dhe për forcimin e narrativës ndërkombëtare që vendi ynë ka përjetuar gjenocid nga ana e shtetit të Serbisë. Vepra si ky libër na ndihmojnë të ruajmë kujtimin e ngjarjeve të tmerrshme, si Masakra e Reçakut.” – thuhet mes tjerash në komunikatën e Zyrës së Kryeministrit.

    Tutje, në komunikatë thuhet se u vlerësua angazhimi i Qeverisë për realizimin e këtij projekti dhe se më 11.01.2023 u miratua vendimi për financimin e hulumtimit, shkrimit, redaktimit, përkthimit, shtypit dhe promovimit të librit.

    Mjetet që u ndanë për këtë libër ishin 70 mijë euro.

    “Ky financim do të sigurojë që ky libër të arrijë deri tek audienca më të gjera dhe të kontribuojë në edukimin e brezave të rinj për historinë e Kosovës dhe luftën e saj për liri” – thuhet tutje në komunikatë.

    Ky libër, sipas ZKM-së, pasqyron prespektivën e Walkerit dhe “dhe është një pasqyrë e vërtetë dhe e pazëvendësueshme e ngjarjeve që ndodhën më 15 janar 1999, në fshatin Reçak”.

    ‘Akt i rëndësishëm’ cilësohet ky libër, i cili në komunikatë thuhet që kontribuoi në dokumentimin dhe shpërndarjen e dëshmive për krimet e kryera nga regjimi i Serbisë në Kosovë.

    Kjo duke çuar përpara njohjen ndërkombëtare të gjenocidit që ka ndodhur gjatë luftës.

    “Libri kujton viktimat e masakrës së Reçakut dhe nderon të gjithë ata që dhanë jetën për lirinë e Kosovës” – thuhet tutje në komunikatë.

    Qeveria thotë se është e angazhuar që përgjegjësit për gjenocidin të përballen me drejtësinë.

  • Dëmtohen mbrojtëset e borës në Sallën e Edukatës fizike në Bresanë të Dragashit

    Në redaksinë e KALLXO.com kanë ardhur disa fotografi të Sallës së Edukatës fizike në fshatin Bresanë të Dragashit.

    Këto fotografi shpërfaqin mbrojtëset e borës të cilat janë dëmtuar.

    Për të kuptuar se çfarë saktësisht ka ndodhur në çatinë e kësaj Salle, në të cilat janë të vendosura mbrojtëset e borës dhe se a ka pasur nxënës apo qytetarë të lënduar, KALLXO.com iu drejtua me pyetje Komunës së Dragashit.

    Në një përgjigje me shkrim, kryetari i Komunës, Bexhet Xheladini ka thënë se nuk ka rrezik nga bora në afërsi të kësaj Salle për shkak se është vend i rrethuar, sepse aty afër po ndërtohet një Çerdhe.

    Megjithatë ai pranon se mbrojtëset janë dëmtuar dhe shton se mbrojtëset në fotografitë e pranuara në KALLXO.com janë larguar.

    “Kulmi i Sallës së Fiskulturës në fshatin Bresanë ka 185 metër gjatësi mbrojtëse të borës. Komuna do të shikojë mundësinë e vendosjes dhe të një rendi të mbrojtëseve në të dy anët e kulmit, si dhe do t’i sanojë të gjithë borëmbajtësit e dëmtuar nga Operatori Ekonomik, i cili i ka kryer punimet, pasi që ato kanë ende garancion. Pjesa e dëmtuar dhe vendosja e mbrojtëseve të reja nuk ka mundur të riparohet, sepse një ditë pasi ato janë dëmtuar ka rënë borë deri 50 centimetra. Dhe sot e kësaj dite vazhdon të bie.” – thuhet në përgjigjen me shkrim nga Bexhet Xheladini, Kryetar i Dragashit.

    Tutje, Xheladini shton se pasi të shkrihet bora do të përgatitet paramasa dhe parallogaria e punimeve për të filluar procedurat e prokurimit.

    Për telashet e kësaj Salle me mbrojtëset e borës ka reguar edhe asamblisti i PDK-së në Dragash, Driton Ademi.

    Ademi në reagimin e tij, në të cilin ka bashkangjitur edhe një fjalim nga Kuvendi Komunal, thuhet se ky problem me mbrojtëset e borës ka ndodhur edhe më herët.

    “Rreziku për nxënësit dhe banorët vazhdon të jetë i pranishëm deri në marrjen e masave të duhura. Ky është tashmë rasti i dytë që mbrojtëset e vendosura dështojnë në funksionin e tyre, për shkak të cilësisë së dobët dhe zbatimit të punës vetëm për sy e faqe.” – shkruan Ademi.

    Për këtë Sallë është diskutuar edhe në emisionin ‘Debat Përnime’ në shtator të vitit 2024.

    Në gusht të vitit 2024, kryetari i Komunës shkruante “Salla e Edukatës fizike në SH.F.M.U ’28 Nëntori’ në Bresanë” e gatshme me të gjitha pajisjet para fillimit të vitit të ri shkollor”.

    Më 04.09.2024, pas fillimit të vitit shkollor, ekipi i KALLXO.com doli në terren për të parë punimet e kryera në këtë Sallë.

    Salla nuk po përdorej nga nxënësit, pajisjet sportive mungonin, muret kishin marrë lagështi e po ashtu rridhte edhe uji.

    Për gjetjet e KALLXO.com, kryetari Xheladini në “Jeta në Komunë” tha se punimet nuk kanë përfunduar ende.

    “Është tash tenderi i fundit, kanë fillu punimet. Të gjitha punët e parkyera, kryhen brenda dy javësh.” – deklaroi Xheladini në ‘Jeta në Komunë’.

    https://kallxo.com/kallxopernime/si-i-shkuan-bexhet-xheladinit-te-dragashit-projektet-qe-i-promovoi-ne-rrjete-sociale/

  • EULEX-i përforcon njësitin policor të specializuar në Kosovë

    Misioni i Bashkimit Evropian për Sundimin e Ligjit në Kosovë – EULEX ka njoftuar se është duke e përforcuar Njësinë Policore të Specializuar (NJPS) të tij përmes dislokimit të përkohshëm të pjesëtarëve të Forcës Evropiane të Xhandarmërisë (EUROGENDFOR) nga Franca, Italia, Lituania dhe Portugalia.

    “Këta policë do të punojnë krah për krah me NJPS-në e siguruar nga Policia e Polonisë, për ta përmbushur mandatin e Misionit në mbështetje të stabilitetit në mbarë Kosovën dhe për të garantuar siguri për të gjitha komunitetet.” – thuhet në njoftimin e EULEX-it të datës 14.01.2025.

    NJPSR-ja do të përbëhet nga asetet EUROGENDFOR-it të siguruara nga Xhandarmëria Kombëtare Franceze, Karabinierët Italianë, Shërbimi i Sigurisë Publike i Lituanisë dhe Garda Kombëtare Republikane e Portugalisë.

    NJPSR-ja pritet të arrijë në Kosovë gjatë ditëve në vijim, për ta adresuar nevojën e Misionit për forca shtesë në terren për t’i mbështetur më mirë homologët kosovarë.

    “Duke përfshirë funksionimin si reagues i dytë i sigurisë në Kosovë, nëse kjo kërkohet dhe është e nevojshme. NJPSR-ja do të kryejë patrullime të dukshme dhe do të kontribuojë që Misioni të ketë pasqyrë të qartë për situatën.” – theksohet në njoftim.

    Ky do të jetë dislokimi i pestë i NJPSR-së së EULEX-it, ndërsa dislokimi i parë është bërë në mars 2022.

    EULEX-i shërben si reagues i dytë i sigurisë në Kosovë, në kuadër të mekanizmit me tri nivele të reaguesve të sigurisë, ku Policia e Kosovës është reaguesi i parë i sigurisë, EULEX-i është i dyti, kurse misioni KFOR i udhëhequr nga NATO është i treti.

    Kosova do të mbajë Zgjedhjet e rregullta parlamentare më 09.02.2025.

    Mbajtja e votimeve bëhet në një kohë kur – në dy vjetët e fundit – tensionet kanë qenë të larta në pjesën veriore të vendit, të banuar me shumicë serbe.

  • Sulmi në kanalin e Ibër-Lepencit – Durmishi njofton se është lëshuar uji pas sanimit

    Zëvendësministri i Infrastrukturës, Hysen Durmishi ka njoftuar se është lëshuar uji në kanalin e Ibër-Lepencit, pas sulmit terrorist që është bërë aty në fund të nëntorit 2024.

    “Jam i gëzuar dhe falënderues për të gjithë ata që kontribuan drejtpërdrejt që Kanali të sanohet dhe për asnjë moment qytetarët të mos mbesin pa rrymë e ujë.” – shkroi Durmishi në Facebook, më 14.01.2025.

    Durmishi ka publikuar disa fotografi nga ky Kanal.

    Shpërthimi që ndodhi më 29.11.2024 në kanalin e ujit të Ibër-Lepencit, në fshatin Varagë të Komunës së Zubin Potokut ishte cilësuar nga Qeveria e Kosovës si “sulm terrorist”.

    Kryeministri i Kosovës, Albin Kurti kishte thënë se sulmi është kryer nga grupe terroriste.

    “Unë nuk i kam emrat e atyre që e kanë vënë detonimin. Por, unë e di një gjë, se elemente të tilla kriminale, qofshin edhe zyrtarisht anëtarë të Mbrojtjes Civile, Brigadës Civile, ata e kanë mbështetjen dhe dirigjimin nga Beogradi zyrtar.” – kishte thënë Kurti.

    Presidenti i Serbisë, Aleksandër Vuçiq, e ka mohuar që Serbia ka lidhje me sulmin në kanalin e Ibër-Lepencit në Komunën e Zubin Potokut.

    Për sulmin në kanalin e Ibër-Lepencit, drejtori i përgjithshëm i Policisë së Kosovës, Gazmend Hoxha ka thënë se është përdorur një sasi e konsiderueshme e eksplozivit, nga 15 deri në 20 kilogramë, i cili dyshohet se është aktivizuar me detonatorë mekanikë – përmes fitilit ndezës me djegie të ngadalshme.

    “Si pasojë e këtij sulmi janë shkaktuar dëme të mëdha materiale në kanalin e Ibër-Lepencit, si pasojë e të cilave është ndërprerë furnizimi me ujë të pijshëm për shumë zona dhe lokalitete, si dhe duke rrezikuar tej mase edhe furnizimin me energji elektrike apo edhe rrezikun me pasoja më të rënda për avari në Sistemin energjetik të Republikës së Kosovës.” – ishte shprehur Hoxha.

    Pas shpërthimit, Këshilli i Sigurisë së Kosovës ka mbajtur mbledhje të jashtëzakonshme më 30.11.2024.

    Në mbledhje, sipas një komunikate për media, u fol për ndërlidhjen e mundshme të rastit të djeshëm me një sulm të ngjashëm rus në Ukrainë javën e kaluar. Në këtë mbledhje janë diskutuar edhe masat emergjente që janë marrë dhe po merren për të zbutur pasojat e sulmit, e për të garantuar sigurinë e infrastrukturës kritike në vend.

    Ndërkohë, ekipe të Misionit Paqeruajtës të NATO-s në Kosovë – KFOR, kanë dalë më 30.11.2024 në vendin e ngjarjes ku ka ndodhur shpërthimi.

    Ministrja e Ekonomisë, Artane Rizvanolli njoftoi më 30.11.2024 se pavarësisht dëmtimit që shpërthimi shkaktoi në kanalin e Ibër-Lepencit, kanë arritur që të sigurojnë energji elektrike për vendin përmes vendosjes së gjashtë gypave të përkohshëm, me kapacitet të mjaftueshëm për të siguruar ujë për ftohjen e termocentralit “Kosova B”.

    Këtë sulm e kanë dënuar Shtetet e Bashkuara të Amerikës dhe Bashkimi Europian. Edhe ambasadori i Gjermanisë në Kosovës, Jorn Rohde e ka dënuar, po ashtu, shpërthimin në Zubin Potok.

    Më 09.12.2024, KALLXO.com ka raportuar se një ‘bypass’ është vendosur si zgjidhje alternative, për të liruar kanalin e Ibër-Lepencit nga qarkullimi i ujit. E, më pas u bë edhe vlerësimi i dëmit e rregullimi i tij.

    Arrestimet në lidhje me sulmin në Ibër-Lepenc

    Prokuroria Speciale e Republikës së Kosovës ka kryer disa kontrolle në lokacione të ndryshme, gjatë së cilave janë gjetur dhe sekuestruar armë të ndryshme e pajisje tjera, lidhur me rastin e ndodhur më 29.11.2024 në fshatin Varagë të Komunës së Zubin Potokut, respektivisht në pjesën e kanalit të Ibër-Lepencit.

    “Me këtë rast në Stacionin Policor janë shoqëruar 10 persona të dyshuar për veprat penale: “rrezikimi i rendit kushtetues me shkatërrimin apo dëmtimin e instalimeve dhe pajisjeve publike” nga Neni 122; lidhur me veprën penale “kryerja e veprës terroriste” nga Neni 129 Par. 1 dhe Neni 128 Par. 1 Nënpar. 1.8 të KPRK-së; “mbajtja në pronësi, kontroll ose posedim të paautorizuar të armëve” nga Neni 366 Par. 2 lidhur me Par. 1  të KPRK-së.” – thuhet në komunikatën e Prokurorisë Speciale të Republikës së Kosovës.

    Prokuroria Speciale ka thënë se dy të shoqëruarve iu është caktuar masa e ndalimit.

    “Me vendim të Prokurorit, dy prej tyre, me inicialet D. V. dhe D. M., nga komuniteti serb, janë ndaluar. Për personin D. V. është parashtruar kërkesë për caktimin e masës së paraburgimit, e cila është caktuar nga Gjykata për 1 (një) muaj, kurse i dyshuari D. M. nga Prokuroria është liruar në procedurë të rregullt.” – thuhet në komunikatën e Prokurorisë Speciale të Republikës së Kosovës.

    Gjykata e Prishtinës ka caktuar masën e paraburgimit prej një muaji ndaj Dragisha Viqentijeviqit, i arrestuar nën dyshimin se ka marrë pjesë në sulmin terrorist. Caktimin e masës së paraburgimit e ka konfirmuar mbrojtësi i të pandehurit, avokati Millosh Delloviq, i cili ka thënë se klienti i tij nuk e ka pranuar fajësinë.

    Sipas Prokurorisë, me veprimet e tij Viqentijeviq po dyshohet se kreu veprën penale të rrezikimit të rendit kushtetues me shkatërrimin apo dëmtimin e instalimeve dhe pajisjeve publike. Gjatë bastisjes, në shtëpinë e tij, u gjetën edhe armë e municion – për çka Prokuroria po e ndjek edhe për “armëmbajtje pa leje”.

    Ndërkaq, më 02.12.2024, Policia e Kosovës bëri të ditur se më 01.02.2024 ka arrestuar edhe një person të dyshuar për sulmin në kanalin e Ibër-Lepencit.

    Sipas Policisë, i arrestuar është personi me inicialet J. V., nën dyshimin se mund të ketë pasur rol të rëndësishëm në kuadër të grupit përgjegjës për rastin e sulmit terrorist në kanalin e Ibër-Lepencit.

    “Në vazhdimësi të hetimeve lidhur me rastin e sulmit terrorist ndaj infrastrukturës kritike, por edhe rasteve paraprake, nga njësitë relevante hetimore, në bashkëpunim edhe me njësitë e tjera policore, më 01.12.2024 në orët e mbrëmjes, është arrestuar edhe një i dyshuar J. V., nën dyshimin që mund të ketë patur rol të rëndësishëm në kuadër të grupit përgjegjës për rastin e sulmit terrorist ndaj infrastrukturës kritike.” – thuhet në njoftimin e Policisë së Kosovës.

    Po ashtu, Policia ka bërë të ditur se në bashkëpunim me Prokurorinë Speciale të Kosovës është kontrolluar shtëpia e të dyshuarit J.V., në të cilën janë gjetur e sekuestruar si dëshmi: katër (4) granate dore, një (1) pushkë gjuetie, mbi pesëqind (500) copë municion të kalibrave të ndryshëm, dy (2) karikatorë të armës AK-47, një (1) karikator i pushkës së gjatë, një (1) radiolidhje, një (1) palë dylbi, një (1) kamerë kamufluese; uniforma ushtarake dhe dokumente të ndryshme.