Ballina

Autor: Shqipron Xhema

  • Lajçak thotë se fokusi i javës në Bruksel është te takimi i parë i Komisionit të Përbashkët për Personat e Zhdukur

    I dërguari i veçantë i Bashkimit Europian për Dialogun Kosovë-Serbi dhe Ballkanin Perëndimor, Miroslav Lajçak ka njoftuar se gjatë kësaj jave në Bruksel fokusi kryesor është te takimi i parë i Komisionit të Përbashkët për Personat e Zhdukur.

    Këtë njoftim, Lajçak e bëri në rrjetet sociale në të cilat foli edhe për vizitën e tij në Shtetet e Bashkuara të Amerikës.

    Në takimet e tij Lajçak thotë se u fol për sfidat dhe mundësitë gjeopolitike në rajonin e Ballkanit Perëndimor.

    “Duke theksuar rëndësinë e bashkëpunimit të vazhdueshëm dhe nevojën për të avancuar në Dialogun e Normalizimit.” – shkroi Lajçak mes të tjerash.

    Lajçak ka njoftuar në rrjete sociale se këto çështje i diskutoi me ndihmëssekretarin amerikan për Europë dhe Euroazi, Jim O’Brien dhe zëvendësndihmëssekretarin e shtetit për Ballkanin Perëndimor, Sasha Kasanof.

    “Për më tepër, pata mundësinë të informoja zëvendëssekretarin e Shtetit të SHBA-së, Richard Verma, përpara vizitës së tij në rajon.” – shkroi tutje Lajçak.

    Lajçak shkoi edhe në New York, me ç’rast thotë se u takua edhe me Sekretarin e Përgjithshëm të Kombeve të Bashkuara, Antonio Guterres.

    Në takim me të, Lajçak thotë se biseduan për dinamikat rajonale.

    “Takimi im me nënsekretaren e përgjithshme të OKB-së, Rosemary DiCarlo përforcoi nevojën për përpjekje shumëpalëshe të mirëkoordinuara, për të mbështetur Ballkanin Perëndimor në rrugën e tij drejt integrimit europian.” – shkroi tutje ai.

    https://kallxo.com/lajm/komisioni-qeveritar-per-persona-te-zhdukur-me-ne-fund-do-te-mund-te-adresojme-te-gjitha-shqetesimet-tona/

  • Qeveria e Kosovës ndan 100 mijë euro për familjen e veprimtarit Enver Hadri

    Qeveria e Kosovës ka miratuar Vendimin për Ndarjen e 100 mijë eurove për familjen e veprimtarit Enver Hadri, i cili është vrarë në Belgjikë në vitin 1990.

    “Propozimi në vlerë prej 100 mijë euro është për familjarët e veprimtarit të vrarë Enver Hadri, i cili u vra në Belgjikë në vitin 1990. Jemi në kontakt me familjarët, por edhe me autoritetet belge. Dy të akuzuarit janë shtetas serbë, se kanë kryer vrasjen. I treti i akuzuar, i cili ishte pjesë e institucioneve serbe akuzohet se ka urdhëruar vrasjen e Enver Hadrit.” – deklaroi ministrja e Drejtësisë, Albulena Haxhiu në mbledhjen e Qeverisë së Kosovës, më 10.01.2025.

    Ministri Hekuran Murati deklaroi se Ministria e Financave e mbështet ndarjen e mjeteve për familjen e Enver Hadrit.

    “Në këtë rast, këto mjete merren nga shpenzimet e paparashikuara dhe më pas do të bëhet ekzekutimi.” – deklaroi Murati në mbledhjen e Qeverisë.

    Enver Hadri, kreu i Komitetit për Mbrojtjen e të Drejtave të Njeriut në Kosovë, u vra në makinën e tij ndërsa priste në semafor në Bruksel më 25.02.1990.

    Në vitin 2016, Gjykata e Krimeve të Rënda në Bruksel dënoi Bozhidar Spasiq, ish-kreu i Operacioneve Speciale të Policisë sekrete jugosllave UDBA dhe anëtarët e një bande kriminale serbe, Andrija Drashkoviq e Veselin Vukotiq me “burgim të përjetshëm” për vrasjen e Enver Hadrit.

    Spasiq organizoi vrasjen dhe Drashkoviq e Vukotiq e kryen atë – tha Gjykata në Vendimin, derisa të tre burrat u gjykuan dhe u dënuan në mungesë.

    Enver Hadri kishte ikur në Belgjikë në vitin 1972. Ai ishte aktiv në Rezistencën Kombëtare të Shqiptarëve të Kosovës dhe më vonë themeloi Komitetin për Mbrojtjen e të Drejtave të Njeriut në Kosovë, i cili mblodhi të dhëna mbi shtypjen e shqiptarëve etnikë nga forcat jugosllave të sigurimit.

    Ai u vra disa ditë para se të ishte programuar të paraqiste një Raport të detajuar të vdekjeve të dhjetëra shqiptarëve etnikë në duart e Policisë jugosllave në Këshillin e të Drejtave të Njeriut të Kombeve të Bashkuara në Nju Jork.

  • Kurti nuk përgjigjet për urën e patestuar te liqeni i Badovcit, Mbrojtja e Afërt nuk lejon ekipin e KALLXO.com t’i afrohet kryeministrit

    “Ura në Badovc është lëshu për qarkullim pa qenë e testuar. A ndiheni ju i sigurt me kalu në atë urë?” dhe “A jeni ftuar për të marrë pjesë në inagurimin e presidentit Trump?”

    Këtyre dy pyetjeve të gazetarit të KALLXO.com nuk u është përgjigjur kryeministri, Albin Kurti, më 08.01.2025.

    Madje, pjesëtarët e Mbrojtjes së Afërt e kanë penguar ekipin e KALLXO.com t’i afrohet kryeministrit, teksa ky ka vizituar Observatorin dhe Planetariumin Kombëtar të Kosovës në fshatin Rashincë të Shtimes.

    Mbrojtja e Afërt ia pamundësoi punën ekipit të KALLXO.com me arsyetimin se vizita e kryeministrit është “private”.

    “I nderuar, po më vjen keq, nuk mundemi me leju, është private, a e di? Mos merr pamje, të lutem!” – tha fillimisht njëri pjesëtar i Mbrojtjes së Afërt.

    Më pas, ekipi i KALLXO.com u detyrua që të largohet më tej, jashtë “perimetrit të sigurisë” sipas Mbrojtjes së Afërt.

    “Është vizitë private, është me familje, është urdhër. Në vizitat zyrtare nuk të kemi pengu asnjëherë. Absolutisht. Kjo është vizitë private, vazhdoni në pjesën atje. Mos xhironi në vizita private! Tek vetura e parë, vazhdoni tek vetura e parë” – tha tutje pjesëtari i Mbrojtjes së Afërt.

    Pasi që ekipi u largua dhe mes tyre dhe kryeministrit u vendosën veturat zyrtare, Mbrojtja e Afërt u pyet se pse po ‘rrezikohet’ siguria vetëm nga gazetarët, kurse qytetarët e pranishëm u lanë në afërsi.

    “Ka raste kur biem ndesh tek aspekti i sigurisë. Pamundësohet puna e juaj, pamundësohet edhe puna e jonë” – tha tutje pjesëtari i Mbrojtjes së Afërt.

    “Ama në këtë ras, sigurinë jemi duke e pengu ne? Komplet ata qytetarë atje, nuk janë duke e pengu? Gazetari dhe kameramani që kanë me ba pyetje, për me iu pamundësu pyetje, ata duhet me i largu” – ishte sqarimi i kërkuar nga ekipi, për ç’gjë nuk mori përgjigje.

    Kryeministri Kurti nuk dha përgjigje as nëse është ftuar në inaugurimin e Donald Trump si president i SHBA-së më 20.01.2025.

    Ura te liqeni i Badovcit është lëshuar për qarkullim më 31.12.2024.

    Ura u lëshua në qarkullim por testimi i strukturës së saj nuk i është bërë ende.

    Testimi, sipas tenderit, i kushton buxhetit të Kosovës 6 mijë euro.

    Më 07.01.2024, KALLXO.com raportoi se si u lëshua kjo urë në qarkullim pa qenë e testuar.

    Se kjo urë nuk u testua e kanë pranuar edhe nga kompania që ka kryer punimet, edhe nga zëvendësministri i Infrastrukturës, Hysen Durmishi.

    Nga kompania “DRENI INGINERING”, e cila është përgjegjëse për kryerjen e testimit, thonë se ura është hapur për qarkullim për shkak të festave të fundvitit.

    “Unë e bëj testimin e urës, nuk është kryer. Kemi dashtë me e lëshu për qarkullim për shkak të festave dhe në një afat tjetër bahet testimi i urës”- tha Adnan Lushtaku për KALLXO.com.

    Kurse, zëvendësministri i Infrastrukturës, Hysen Durmishi, kur u pyet se pse ura është lëshuar për qarkullim pa u testuar struktura e saj, tha se testimi është vetëm formal sepse ura është stabile.

    “Dëgjo, duheni me e pyet menaxheren e kontratës, por ura testohet gjatë gjithë fazës se ndërtimit, do të thotë merren atestet paraprake sepse është material. Sasia e armaturës që vendoset aty, çfarë marke e betonit vendoset aty. Merren mostrat edhe dihet se a është ajo markë e beton a jo, a është ajo klasë e armaturës a jo, nëse gjatë këtyre fazave është vendos armatura, është vendos betoni sipas projektit, natyrisht që ura është stabile. Ai testimi është vetëm formal” – tha ai për KALLXO.com.

    https://kallxo.com/lajm/ekskluzive-ura-e-badovcit-u-leshua-ne-qarkullim-pa-u-testuar-video/

    https://kallxo.com/lajm/leshimi-i-ures-se-badovcit-pa-u-testuar-reagon-zevendesministri-hysen-durmishi/?fbclid=IwZXh0bgNhZW0CMTEAAR3MoUu1fzD-TfOL1ceYXAR1mYDAj8nRf4Q-7OnpHKUfDzw_e5DcyXDX40I_aem_PVfWYNd7qjZR-Jd1kGgwOg

  • Pak para nisjes së fushatës, Kurti shpërndau kartelat punonjësve të rinj në KEK

    Korporata Energjetike e Kosovës pranoi 220 punëtorë të rinj më 06.01.2025.

    Në ditën e pranimit të tyre në punë, kryeministri i Kosovës Albin Kurti disa prej tyre jua shpërndau kartelat e punës.

    Kurti mori pjesë në këtë ceremoni pak ditë para fillimit të fushatës zgjedhore e cila fillon më 11.01.2025 për zgjedhjet për Kuvendin e Kosovës të datës 09.02.2025.

    Për këtë ceremoni të shpërndarjes së kartelave të punonjësve dhe kontratave të punës për ta, nuk pati njoftim për media.

    Në hyrje të Termocentralit Kosova B, ekipit të KALLXO.com fillimisht iu pamundësua hyrja.

    “Ai që iu ka thanë me hi, e thirrni në telefon, vjen ai iu merr. Se pa leje s’guxojmë”– është fjalia e punëtorit të sigurimit në hyrje të këtij Termocentrali.

    Pas disa përpjekjeve, ekipi hyri në objektin në të cilin u mbajt ceremonia, kjo në brendësi të hapësirës së Termocentralit.

    Në ceremoni përveç kryeministrit, mori pjesë edhe ministrja e Ekonomisë, Artane Rizvanolli dhe U.D kryeshefi ekzekutiv i KEK-ut, Bekir Gërguri, si dhe kryesuesi i Bordit të KEK-ut, Valdrin Krasniqi.

    Pas fjalëve hyrëse, kryeministri dhe ministrja Rizvanolli shpërndanë kartelat për disa punonjës.

    Kur kryeministri, pas ceremonisë u pyet se a lidhet ky aktivitet me fushë zgjedhore dhe për të marrë vota nga punonjësit e rinj, ai pati një përgjigje jodirekte.

    “Kjo është në funksion të mihjes, prodhimit të qymyrit”– është përgjigja e kryeministrit.

    Edhe pse përsëri u pyet se a është ky aktivitet edhe në kuadër të fushatës zgjedhore, kryeministri nuk ktheu përgjigje.

    220 punëtorët e rinj do të punojnë në Divizionin e Qymyrit në KEK

    Gjatë dy viteve të fundit, në KEK janë pranuar 525 punëtorë.

  • Theret me thikë në kraharor një person në Prizren, arrestohen dy të dyshuar

    Një person është therur me thikë në krahëror në Prizren. Në lidhje me këtë rast janë arrestuar dy persona.

    Kështu ka bërë të ditur Shaqir Bytyqi, zëdhënës i Policisë Rajonale të Prizrenit. Ai ka njoftuar se më 02.01.2015 rreth orës 16:35 u mor informacioni se R.Sh i lindur më 1980 nga fshati Poslishtë po trajtohej në Emergjencën e Spitalit Rajonal.

    Policia ka kontaktuar me viktimën, i cili ka deklaruar se në qendrën e Poslishtës kishte ndodhur një mosmarrëveshje mes tij dhe të dyshuarit 18-vjeçar.

    Sipas Bytyqit, të dyshuarit viktima nuk ia dinte emrin por nga ai ishte goditur me thikë në kraharor, me ç’rast mori lëndime trupore.

    “Sipas mjekëve viktima është jashtë rrezikut për jetë. Dy persona janë arrestuar si të dyshuar lidhur me rastin, një i mitur dhe një madhor” – deklaroi Bytyqi për KALLXO.com