Ballina

Autor: Rrahman Ramaj

  • Edhe pas ritenderimit të tretë, dështon tenderi për ushqim dhe pije për organizimet e Policisë së Kosovës

    Ndonëse u hap për herë të tretë, tenderi i cili e kishte të njëjtin qëllim, furnizimin me ushqim dhe pije për koktej për Policët e Kosovës, edhe kësaj here dështoi të finalizohet me Kontratë.

    Sipas njoftimit, arsyeja e anulimit të këtij aktiviteti të prokurimit ishte për shkak se të tre tenderët që u pranuan u vlerësuan të papërgjegjshëm dhe kanë tejkaluar në mënyrë substanciale vlerën e parashikuar të Autoritetit Kontraktues – Policia e Kosovës.

    Në njoftimin për Kontratë të publikuar më 19.12.2024, në platformën elektronike të prokurimit “E-prokurimi”, vlera e parashikuar e Kontratës ishte 52,099.24 euro. Me një kohëzgjatje të Kontratës – 36 muaj.

    Procedura e hapur e prokurimit ishte lloji i procedurës së përdorur në këtë aktivitet, ndërsa si kriter për dhënie të Kontratës ishte përcaktuar: çmimi më i ulët.

    Sipas paramasës janë planifikuar pije të ndryshme joalkoolike, ushqime, biskota dhe produkte të tjera me rastin e organizimit të koktejeve përgjatë tre vjetëve. Koktej për pensionimin e zyrtarëve të Policisë së Kosovës, koktej për fundvit për Zyrën e Drejtorit të Përgjithshëm, koktej për Ceremonitë e Diplomimit të Gjeneratave të PK-së.

    Kujtojmë, se fatin e njëjtë pothuajse e pati edhe tenderi për pizhame dhe çorape për policët e Kosovës. Për blerjen e tyre ishte parashikuar të nënshkruhej Kontratë, në vlerë deri në 333 mijë euro. Me këtë tender ishin paraparë të bliheshin gjithsej 2,400 palë pizhame dimri për meshkuj, 39 mijë palë çorape, si dhe 17,200 palë të tjera pizhame dimri për meshkuj dhe femra.

    https://kallxo.com/lajm/blerja-e-pizhamave-dhe-corapeve-per-policet-e-kosoves-deshtoi-edhe-ne-ritenderim/

  • Viti 2024 u përmbyll me rënie të numrit të përfituesve të ndihmave sociale, rritje evidentohet në kategori të tjera

    Të dhënat nga Agjencia e Statistikave të Kosovës [ASK], në muajin e fundit të vitit 2024, tregojnë për një ndryshim në numrin e përfituesve të skemave sociale e të pensioneve. Në disa kategori, numri i tyre pësoi rënie e në disa të tjera pati rritje.

    Rënie të numrit të përfituesve pati te pensionet e Trepçës, pensionet invalidore, të ndihmave sociale, te skema për familjet e dëshmorëve dhe invalidëve të luftës, si dhe pensionet kontributpaguese të moshës.

    “Në muajin dhjetor 2024 – krahasuar me muajin dhjetor 2023 – kishte rënie të numrit të përfituesve nga: skema për pensionet e Trepçës (-20,8%); skema për pensionet invalidore (-14,9%); skema e ndihmës sociale (-11,1%); skema për pensionet familjare (-3,9%); skema e kompensimeve për personat e verbër (-2,1%); skema për familjet e dëshmorëve dhe invalidët e luftës (-1,7%); skema e pensioneve kontributpaguese të moshës (-1,3%).” – njofton ASK.

    Në anën tjetër, ASK rendit skemat e pensioneve, ku pati rritje të numrit të përfituesve.

    “Në muajin dhjetor 2024 – krahasuar me muajin dhjetor 2023 – kishte rritje të numrit të përfituesve nga: skema për përkrahje financiare familjeve, që kanë fëmijë me aftësi të kufizuara (14,5); skema e pensioneve të Forcës së Sigurisë së Kosovë (11,9%); skema e kompensimit për punëtorët e arsimit, që punuan gjatë vitit shkollor 1990/91 deri në vitin shkollor 1998/99 (5,1%); skema e pensioneve të Trupave Mbrojtëse të Kosovës (TMK) (3,9%); skema për Pensionet Paraplegjike dhe Tetraplegjike (2,9%); skema e pensioneve për personat me aftësi të kufizuara (2,9%); skema e pensioneve bazike të moshës (2,9%); skema për veteranët e luftës (0,3%).” – tregon ASK.

    Lidhur me pensionet, në Konferencën e datës 10.01.2025, u bë e ditur se Qeveria e Kosovës miratoi Vendimin për rritjen për 20% të pensioneve për kategoritë e dala nga lufta e fundit, derisa ministri i Financave, Hekuran Murati para mediave u shpreh se kjo bëhet për shkak të rritjes ekonomike.

    Po ashtu, më 07.10.2024, kryeministri i Kosovës Albin Kurti kishte njoftuar se janë rritur pensionet për disa skema pensionale.

    Kurti kishte rritur pensionet 20% për pensionin bazik, kontributdhënësit, personat me aftësi të kufizuara, personat paraplegjikë dhe tetraplegjikë e personat e verbër, invalid i punës dhe për ish-punëtorët e Trepçës.

    Me këtë rritje, pensioni bazik u bë nga 100 euro në 120 euro.

  • Rezidenca e ish-Presidentit Rugova rrezikohet të mbetet pa ngrohje – Ministria hap tender t’i sigurojë peletin

    Rezidenca e ish-Presidentit Ibrahim Rugova duket se ka nevojë për lëndë djegëse për ngrohje, saktësisht pelet, pasi Rezidenca e ish-Presidentit posedon ngrohje me këtë lëndë djegëse.

    Ministria e Kulturës, Rinisë dhe Sportit [MKRS], për këtë qëllim, ka hapur tender për blerjen e 10 tonelatave pelet.

    “Përmes kësaj Kontrate do të bëhet furnizimi me lëndë djegëse – pelet për nevojat e Rezidencës Dr. Ibrahim Rugova, e cila posedon ngrohje me lëndë djegëse – pelet.” – thuhet në njoftimin e Ministrisë.

    Sipas këtij njoftimit, vlera e parashikuar e Kontratës është 3,500 euro. Sipas një llogaritjeje MKRS ka parashikuar të blejë deri 350 euro një ton pelet.

    Procedura e kuotimit të çmimit është lloji i procedurës së përdorur në këtë aktivitet të prokurimit, me kriter për dhënie të Kontratës – çmimi më i ulët.

    Data 22.01.2025, në platformën elektronike E-prokurimi, është afati i përcaktuar për pranimin e ofertave.

  • Afat të shkurtuar, kritere diskriminuese në tenderin për ujësjellësin në fshatin Batushë të Graçanicës

    Më datën 03.10.2024 në platformën elektronike për prokurim “E-prokurimi”, Komuna e Graçanicës si autoritet kontraktues inicioi tenderin për rehabilitimin e rrjetit të ujësjellësit në fshatin Batushë, faza e parë.

    Rehabilitimi i ujësjellësit në këtë fshat ishte paraparë me Planin e prokurimit për vitin 2024 dhe garancia për disponueshmërinë e fondeve ishte siguruar për vlerën e parashikuar të Kontratës deri 55,000 euro.

    Fondet në vlerë 30,000 euro ishin siguruar nga Komuna e Graçanicës dhe 25,000 euro të tjera nga Ujësjellësi Rajonal “Prishtina”.

    Mirëpo, më 04.10.2024, Komuna e Graçanicës e anuloi këtë aktivitet të prokurimit.

    Ndonëse në njoftimin për anulimin e këtij aktiviteti nuk jepen arsye, përveç se ndërprerja e aktivitetit të prokurimit është e nevojshme për shkak të ngjarjeve dhe/apo arsyeve objektive dhe të demonstrueshme të cilat janë jashtë kontrollit të autoritetit kontraktues dhe të cilat kanë qenë të paparashikueshme në kohën e inicimit të aktivitetit të prokurimit.

    Në përgjigje për KALLXO.com, Komuna e Graçanicës tregon më shumë për arsyet e anulimit të këtij tenderi.

    “Procedura e mëparshme në sistemin e prokurimit elektronik ka qenë vetëm 1 ditë. Në përgjigje të Njësisë Kërkuese të Komunës së Graçanicës dhe Ujësjellësit Rajonal “Prishtina”, të cilët kërkuan që kriteret për aftësi profesionale dhe teknike, si dhe Aneksi 7 të ndryshohen për t’iu përshtatur natyrës së projektit. Zyra e Prokurimit, në përputhje me këto kërkesa, ka rishpallur këtë procedurë tenderimi si Ritender.” – thuhet në përgjigjen e Komunës.

    Komuna shkurton afatin për pranim të tenderëve

    Përpjekjet e Komunës që ky projekt të rezultojë me Kontratë bëri që projekti të ritenderohet. Komuna përdori procedurën e hapur të prokurimit dhe si kriter për dhënie të Kontratës u vendos çmimi më i ulët.

    Afati për pranimin e tenderëve ishte i përshpejtuar. Sipas thirrjes, data për pranimin e tenderëve ishte 21.10.2024, ndërsa thirrja për Kontratë në “E-prokurimi” u publikua më 14.10.2024 që  rezulton me afat prej 7 ditësh.

    Për dallim nga kërkesat ligjore ku për tenderët me vlerë të mesme të cilit i përket edhe ky tender, afati për dorëzimin e ofertave është 20 ditë, ndërsa i afati i shkurtuar 10 ditë.

    Afati i përshpejtuar për këtë aktivitet të prokurimit u justifikua se u bë për shkak të Memorandumit në mes të Komunës së Graçanicës me Ujësjellësin Rajonal “Prishtina” dhe vonesat në përgatitje të dokumentacionit.

    “Kjo procedurë është shpallur me procedurë të përshpejtuar, sepse Memorandumi ndërmjet Komunës së Graçanicës dhe Ujësjellësit Rajonal ”Prishtina” është nënshkruar vetëm në fillim të shtatorit. Gjithashtu, projekti ishte i ndarë në faza, kështu që përgatitja e dokumentacionit të projektit për fazën e parë mori kohë dhe u desh të përfundonte sa më shpejt procedura e tenderit për të filluar zbatimin e projektit në vitin 2024.” – thuhet në përgjigjen për KALLXO.com.

    Për më tepër, sipas Ligjit të LPP-së, secili autoritet kontraktues, në publikimin e aktivitetit të prokurimit publik është i obliguar të lë një periudhë kohore për pranimin e ofertave nga operatorët ekonomikë. Afatet dallojnë në bazë të vlerave të parashikuara të Kontratës.

    Ndërsa, rregullat e posaçme për mundësimin e shkurtimit të afateve kohore parashihen atëherë “nëse kërkojnë zbatimin e një aktiviteti të prokurimit në raste urgjente; (ii) e bëjnë të pamundur respektimin e afateve kohore të përcaktuara në Nenin 44 të këtij Ligji, ose nëse është e aplikueshme edhe në Nenin 45 të këtij Ligji.

    Kritere diskriminuese

    Komuna e Graçanicës kishte vendosur kritere diskriminuese – duke kufizuar kështu konkurrencën.

    Në Dosjen e tenderit, te specifikimet teknike u kërkuan mjetet pune, si: bulldozherë, eskavatorë, kamionë, ngarkues, makina për prerje të asfaltit dhe të betonit të kapaciteteve dhe tonazheve të ndryshme.

    Kundrejt këtyre kritereve të përcaktuara, përkatësisht mjeteve të kërkuara, ky tender pezullohet për shkak të paraqitjes së një Kërkese për rishqyrtim të Vendimit.

    Kërkesa e operatorit ekonomik Intact Sh.P.K ishte që të korrigjohet Aneksi 7 i listës së mjeteve, pasi kishte kërkesa për makineri me kapacitete të mëdha, për dallim nga natyra e punës.

    Kjo Kërkesë u pranua si pjesërisht e bazuar – thotë Komuna e Graçanicës për KALLXO.com.

    “Kemi marrë një Kërkesë për sqarimin e tenderit. E kemi pranuar këtë Kërkesë si pjesërisht të bazuar. Në bazë të kësaj Kërkese kemi përshtatur disa specifikime teknike, kryesisht Aneksin 7 të Dokumentit të Tenderit, kemi shpallur Formularin Standard B54 për korrigjimin e gabimeve në njoftimin e publikuar dhe kemi shtyrë hapjen e tenderit për 10 ditë të tjera.” – thuhet në përgjigjen e Komunës.

    Kallxo.com gjeti se Komuna e Graçanicës kishte hequr makineri të kapaciteteve të mëdha, Kërkesat si: buldozerë me peshë min. 14 ton – max 16 ton; ekskavatorë min 120 kw – max 125 kw; ngarkues min 135kw  – max 140 kw; cilindër jovibrues me peshë min 11 t – max 13 t; Cistern (Autobot) për karburante u konsideruan kërkesa të larta dhe diskriminuese.

    Korrigjimi i gabimeve vuri në pah kriteret diskriminuese dhe jo të nevojshme, të vendosura nga Komuna e Graçanicës.

    Dokumenti për pezullimin e tenderit, vetëm në serbisht

    Përkundër se Komuna e Graçanicës në përgjigjen e saj thotë se dokumentet e tenderit dhe njoftimet e tjera janë përgatitur në gjuhën shqipe dhe serbe. KALLXO.com evidentoi raste, dokumente që ishin vetëm në gjuhën serbe.

    Ndryshe nga Vendimi i cili ishte përgatitur në të dyja gjuhët: shqip dhe serbe, dokumenti për pezullimin e aktivitetit të prokurimit i cili përgatitet kur parashtrohet Kërkesë për rishqyrtim të Vendimit, në platformën elektronike “E-prokurimi” u gjet se ishte i përgatitur vetëm në gjuhën serbe.

    Po ashtu, edhe te Formulari për informata shtesë dhe korrigjimi të gabimeve njoftimi për korrigjim të gabimeve nuk ishte plotësuar si duhet. Te Neni 4 i këtij Formulari, saktësisht te Neni 4.2.3. “Teksti i cili duhet të përmirësohet/shtohet në njoftimin origjinal.” – është i plotësuar vetëm në gjuhën serbe.

    Mungesa e këtij dokumenti apo e ndonjë informate edhe në gjuhën shqipe, mund të përbëjë diskriminm për palët e interesuara dhe publikun të cilët nuk e flasin serbishten.

    Lidhur me përdorimin e gjuhëve më dokumentet e prokurimit evidentohet në Nenin 13 të Ligjit për Prokurim Publik, ku thuhet, po citoj: ”Autoriteti kontraktues do t’i përgatisë të gjitha dosjet e tenderëve, njoftimet, ftesat dhe dokumentet e tjera që janë publikuar ose u janë dhënë operatorëve ekonomik, gjatë ushtrimit të një aktiviteti të prokurimit që shpien drejt dhënies së një Kontrate ose Konkursi të projektimit me vlerë minimale, të vogël dhe të mesme në gjuhën shqipe dhe serbe…”.

    Ligji i jep mundësi, po ashtu, autoritetit kontraktues t’i përgatisë dokumentet në fjalë edhe në gjuhën angleze.

    Për këtë projekt është pranuar vetëm një ofertë për këtë procedurë tenderimi. Sipas Komunës është përgatitur procesverbal për hapjen e tenderit më 28.10.2024 dhe është publikuar në sistemin E-prokurimi, të njëjtën ditë, në orën 13:52, ndonëse ky proces…

    Kontrata në vlerë 39,992.50 euro iu dha operatorit ekonomik NNT ABC SH.P.K.

  • Kontraktohen mbi 34,600 euro për pakot e vendvotimeve – KQZ vonoi njoftimin për nënshkrimin e Kontratës

    Mbi 34,600 euro Komisioni Qendror i Zgjedhjeve, e-KQZ kontraktoi për t’u furnizuar me pako për vendvotime për Zgjedhjet e 9 shkurtit 2025. Kontrata u nënshkrua më 28.10.2024, mirëpo KQZ-së iu dashtë më shumë se dy muaj të përgatisë dhe të publikojë njoftimin për nënshkrimin e saj.

    KQZ njoftimin për nënshkrimin e Kontratës e kishte paraqitur në E-prokurim më 10.01.2025, ndërsa në këtë platformë elektronike të prokurimit u publikua më 13.01.2025.

    Ndryshe, me Ligjin për Prokurimin Publik, në Nenin 41/A, thuhet, po citoj: „Autoriteti i tillë kontraktues brenda dy (2) ditëve pas nënshkrimit të Kontratës së tillë do të përgatisë njoftimin për nënshkrimin e Kontratës, në gjuhët e cekura në Nenin 13 të këtij Ligji…”.

    Kjo çështje është rregulluar edhe me Rregulloren e Prokurimit Publik në Kosovë, përkatësisht në Nenin 45.35.3, ku thuhet se një Kontratë publike ka hyrë në fuqi. Zyrtari i Prokurimit brenda dy ditëve pas nënshkrimit të Kontratës së tillë do të përgatisë njoftimin për nënshkrimin e Kontratës, duke përdorur Formularin përkatës.

    Lidhur me këtë çështje KALLXO.com ka provuar të marrë përgjigje nga KQZ, mirëpo deri në momentin e publikimit të këtij artikulli nuk kemi pranuar përgjigje.

    Nëpërmjet Kontratës në vlerë 34,633 euro blihen sasi me nga 9,000 copë lapsa shkollorë, mprehëse lapsi, vizore, gërshërë, markera të zi, post notes, letra higjienike, spango-konop rollne.

    Njashtu blihen edhe 90,000 copë kimika të kaltër dhe 18,000 qese të plastikës për paketim.

    Për këtë furnizim KQZ kishte përdorur procedurën e hapur të prokurimit, me kriter për dhënie të Kontratës – çmimi më i ulët.

    Rikujtojmë se Zgjedhjet për Kuvendin e Kosovës pritet të mbahen më 09 shkurt 2025.

    Për më shumë artikuj, për Zgjedhjet në Kosovë, klikoni këtu.