Ballina

Autor: Rexhep Maloku

  • Influencerja australiane akuzohet për helmimin e bebes së saj

    Një influencere australiane po akuzohet për helmimin e vajzës së saj foshnjore, që të siguronte donacione dhe që të rriste numrin e ndjekësve në internet – raporton të enjten, më 16.01.2025, televizioni britanik BBC.

    Gruaja nga Queensland ka pohuar se po shpaloste kronikisht betejën e fëmijës së saj me një sëmundje terminale në mediat sociale, por detektivët pretendojnë se ajo po e drogonte foshnjën  njëvjeçare dhe më pas e filmonte sa ishte në “shqetësim dhe në dhimbje të madhe”.

    Mjekët kishin ngritur alarmin në tetor, kur foshnja do të shtrohej në Spital, pas një episodi të rëndë mjekësor.

    Pas disa muajsh hetime, 34-vjeçarja u akuzua për “torturë”, “administrim helmi”, “material për shfrytëzimin e fëmijëve dhe mashtrim”.

    “(Nuk ka) fjalë se sa të neveritshme janë shkeljet e kësaj natyre.” – ka deklaruar para gazetarëve të enjten inspektori i Policisë së Queenslandit, Paul Dalton.

    Ndërmjet gushtit dhe tetorit, detektivët thonë se gruaja nga rajoni Sunshine Coast i dha fëmijës disa ilaçe, pa miratim të mjekut.

    Ajo bëri përpjekje të shumta që të merrte medikamente të paautorizuara dhe të fshihte mbuluar veprimet e saj, pretenduan hetuesit – duke bërë të ditur se gruaja përdorte ilaçe të mbetura për një person tjetër në shtëpinë e tyre.

    Policia kishte nisur hetimet më 15 tetor, kur foshnja do të çohej në Spital teksa po përjetonte “shqetësim dhe dëmtim të rëndë emocional dhe fizik”. Testet për ilaçe të paautorizuara treguan rezultat pozitiv në janar.

    Gruaja mblodhi 60 mijë dollarë australianë (37 mijë dollarë amerikanë), nëpërmjet donacioneve të “GoFundMe”, të cilat faqja po përpiqet t’i kthejë – ka njoftuar inspektori Dalton.

    Policia kishte hetuar persona të tjerë për abuzimin e supozuar, por nuk kishte prova për të akuzuar dikë tjetër – shtoi ai.

    Gruaja do të dalë të premten para Drejtësisë, në Gjykatën e Brisbanet.

     

    Përgatiti: Rexhep Maloku – Kallxo.com

  • Bideni e Trumpi shtyhen për meritat e ndërmjetësimit të armëpushimit

    Presidenti amerikan, Joe Biden ka theksuar se janë dashur “muaj të tërë diplomacie intensive”, për arritjen e Marrëveshjes së Armëpushimit ndërmjet Izraelit dhe “Hamasit”, ndërsa ka përshkruar hapat e ardhshëm të Marrëveshjes që pritet t’i japë fund luftës 15-mujore – raporton BBC.

    Në një Konferencë në Shtëpinë e Bardhë të mërkurën, ai ka deklaruar se ishte “thellësisht i kënaqur që erdhi kjo ditë” dhe i cilësoi negociatat prej më të vështirave të karrierës së tij.

    Marrëveshja përbëhet nga tri faza – ka njoftuar Biden. E para prej të cilave përfshin një “armëpushim të plotë”, që do të fillojë më 19 janar – një ditë para se ai të largohet nga detyra.

    Bideni u ka deklaruar gazetarëve se faza e parë do të përfshijë tërheqjen e forcave izraelite nga të gjitha zonat e populluara të Gazës, lirimin e pengjeve në duar të “Hamasit” – duke përfshirë gra, të moshuar dhe të burgosur të plagosur dhe lirimin e qindra të burgosurve palestinezë.

    “Ka një numër detajesh për të negociuar për të kaluar nga faza e parë në fazën e dytë, por plani thotë se nëse negociatat zgjasin më shumë se gjashtë javë, armëpushimi do të vazhdojë për sa kohë që negociatat vazhdojnë.” – ka deklaruar Bideni.

    Faza e dytë do të përfshijë lirimin e të gjithë pengjeve të mbetura gjallë, duke përfshirë ushtarët meshkuj, si dhe çdo forcë të mbetur izraelite të tërhiqet nga Gaza. Armëpushimi i përkohshëm do të bëhet i përhershëm në këtë fazë – ka deklaruar ai.

    Faza e tretë përfshin kthimin e eshtrave të pengjeve që janë vrarë te familjet e tyre dhe një “plan të madh rindërtimi” për Gazën.

    Ndërsa Biden deklaroi se Administrata e tij kishte “folur si një ekip” me Administratën e ardhshme të Donald Trumpit. Presidenti theksoi rolin e tij dhe të Administratës së tij për finalizimin e Marrëveshjes. Ai ka theksuar se Korniza për Marrëveshjen ndoqi “konturat e sakta” të një plani, që ai e paraqiti për herë të parë në majin e vitit 2024.

    Dhe, sapo mbaroi Konferenca për shtyp, Presidenti u pyet se kush duhet të marrë meritat për Marrëveshjen – ai apo Trumpi. Biden u kthye dhe para se të largohej tha: “A është kjo një shaka?”.

    Trump, ndërkohë, ka shkruar në Truth Social se Marrëveshja “epike” u mundësua vetëm sepse ai i fitoi Zgjedhjet presidenciale të Nëntorit.

    “Kjo i sinjalizoi të gjithë botës se Administrata ime do të kërkonte paqe dhe do të negocionte Marrëveshje, për të garantuar sigurinë e të gjithë amerikanëve dhe aleatëve tanë.” – ka shkruar ai.

    Megjithë mesazhet e duelit, të dy Administratat punuan në bashkërendim të ngushtë, ndërsa Marrëveshja e Armëpushimit u arrit në ditët e fundit – vlerëson transmetuesi britanik BBC.

    Përgatiti: Rexhep Maloku – Kallxo.com

  • BBC: Armëpushimi mund t’i ndalë vrasjet, por nuk i jep fund konfliktit

    Një zyrtar palestinez i ka thënë BBC-së se “Hamasi” do t’i lirojë tri ushtare në ditën e parë të armëpushimit. Ndërmjetësit në Doha po mundohen që sa më parë të nisë zbatimi i armëpushimit. Madje qysh të enjten mbrëma, e jo të dielën – shkruan Jeremy Bowen, në një analizë në BBC.

    Derisa armëpushimi nuk do të hyjë në zbatim, lufta që nisi kur “Hamasi” sulmoi Izraelin më 7 tetor 2023, ende po vazhdon. Së paku, 12 palestinezë janë vrarë prej sulmeve izraelite në Gazë veriore në kohën kur po bëhej i njohur lajmi për armëpushimin.

    Në atë që ka qenë pothuajse ritual për pesëmbëdhjetë muaj me radhë, pamjet nga Gaza veriore kanë treguar trupat e viktimave që po barteshin me ambulanca dhe të shtrirë në rresht para një Spitali.

    Armëpushimi është një arritje e konsiderueshme diplomatike – vlerëson BBC në analizën pas lajmit për arritjen e ujdisë për armëpushimin. Versione të Marrëveshjes janë vendosur në tavolinë, prej njoftimit të presidentit Joe Biden në maj vjet. “Hamasi” dhe Izraeli fajësonin njëri-tjetrin për vonimin e arritjes së Marrëveshjes.

    Në Khan Younis në Gazë, gazetarët që po punonin për BBC-në kanë filmuar palestinezët duke vallëzuar e brohoritur, derisa po bëhej e qartë se ishte arritur Marrëveshja për armëpushimin.

    Izraeli nuk i lejon gazetarët e huaj të hyjnë në Gazë për të rpaortuar lirisht, kështu që BBC-ja dhe organizatat e tjera informative mbështeten te gazetarët e besueshëm palestinezë, për të mbledhur informacione për BBC-në. Raportimi prej 15 muajsh nga lufta do të ishte i pamundshëm pa ta. Izraeli ka vrarë më shumë se 200 gazetarë palestinezë në Gazë.

    “Njerëzit janë lodhur me shpirt”

    Umm Muhammed, një grua e moshuar palestineze, i ka thënë njërit prej gazetarëve që punojnë për BBC-në se po ndihej e lumtur dhe e lehtësuar.

    “Dhimbja është davaritur pak, megjithëse ende dhemb. Shpresojmë se do t’ia marrë anën gëzimi. Le të lirohen të burgosurit dhe të trajtohen të plagosurit. Njerëzit janë lodhur me shpirt.” – ka thënë ajo.

    Pos mbijetesës nuk është se kanë për çfarë tjetër të festojnë palestinezët në Gazë. Izraeli ka vrarë pothuajse 50 mijë palestinezë. Më shumë se dy milionë persona janë detyruar të zhvendosen prej shtëpive të tyre, prej aksioneve të ushtrisë izraelite.

    Kundërpërgjigjja e Izraelit ndaj sulmeve të “Hamasit” më 7 tetor 2023, ku u vranë pothuajse 1.200 persona, shumica izraelitë, e ka kthyer Gazën në gërmadhë. Sipas Ministrisë së Shëndetësisë, të udhëhequr nga “Hamasi”, sulmet izraelite kanë vrarë pothuajse pesëdhjetë mijë persona – luftëtarë dhe civilë. Një studim i kryer së fundmi nga revista shkencore për mjekësi, “Lancet” ka treguar se kjo shifër mund të jetë edhe më e madhe.

    Shpresë edhe në Tel-Aviv

    Në Tel-Aviv kishte gjithashtu momente lehtësimi dhe frymëmarrjeje për familjet dhe përkrahësit e pengjeve izraelite, të gjallë apo të vdekur. Në fazën fillestare 33 gra, pleq dhe të sëmurë e të plagosur pritet të lirohen në gjashtë javët e ardhshme në këmbim të qindra të arrestuarve dhe të burgosurve palestinezë, por e ardhmja e pengjeve të tjera varet prej negociatave të ardhshme.

    Negociatat në gazën e dytë të Marrëveshjes për Lirimin e pengjeve të mbetura izraelite në këmbim të palestinezëve të burgosur dhe tërheqja izraelite nga Gaza pritet të nisë 16 ditë pas fuqizimit të Marrëveshjes.

    Sfida e parë e madhe është që të sigurohet se Marrëveshja po zbatohet. Diplomatë të lartë perëndimorë druajnë se pas fazës së parë 42-ditëshe do të ketë rishpërthim të luftës.

    Dhe, lufta në Gazë ka pasoja të menjëhershme në mbarë Lindjen e Mesme. Nuk shpiu drejt asaj, që shumëkush i druante, një lufte të përgjithshme në rajon. Administrata e Bidenit ka marrë lavdatën për këtë, por shkaktoi kokëçarje të mëdha gjeostrategjike.

    Dobësimi i Boshtit të Rezistencës

    “Hamasi” është ende në gjendje të luftojë, por është hije e asaj çfarë ishte. Kryeministri izraelit, Benjamin Netanyahu dhe ish-ministri i tij i Mbrojtjes janë akuzuar për “krime lufte” prej Gjykatës Ndërkombëtare Penale. Gjykata Ndërkombëtare e Drejtësisë është duke hetuar një rast të ngritur nga Afrika Jugore, që e akuzon Izraelin për gjenocid.

    Pasi “Hezbollahu” në Liban ndërhyri në luftë, u shtyp pothuajse barabar prej ofensivës izraelite. Ky ishte një faktor që çoi drejt kolapsit të regjimit të Assadit në Siri. Irani dhe Izraeli shkëmbyen sulme të drejtpërdrejta – duke e dobësuar Iranin. Është shpartalluar rrjeti iranian i aleatëve dhe grupeve besnike, të njohura si Boshti i Rezistencës.

    Huthët në Jemen kishin ndërprerë shumicën e qarkullimit me anije ndërmjet Europës dhe Azisë përgjatë Detit të Kuq. Tani raportohet se ata kanë bërë të ditur armëpushimin e vetëshpallur. Prejse ata nisën të sulmonin anijet në fillim të luftës, kanë thënë se vetëm një ujdi armëpushimi në Gazë do t’i frenonte ata.

    Me fat, vullnet politik dhe përpjekje të madhe diplomatike mund të mbahet në fuqi edhe armëpushimi, pavarësisht shkeljeve të pashmangshme – raporton BBC.

    Por pas 15 muajsh të luftës në Gazë, konflikti, më shumë se njëshekullor, është po aq i hidhur dhe i vështirë për t’iu prerë udhë se kurrë më parë.

    Armëpushimi nuk i jep fund konfliktit. Pasojat e shkatërrimit dhe numrit kaq të madh të vdekjeve do t’i ndjejë së paku edhe një brez.

    Përgatiti: Rexhep Maloku – Kallxo.com

  • Reuters: Izraeli dhe Hamasi arrijnë marrëveshje për armëpushim

    Negociatorët kanë arritur të mërkurën (më 15.01.2025) marrëveshje armëpushimi për luftën e Gazës midis Izraelit dhe Hamasit, i ka deklaruar Reutersit një zyrtar i informuar me negociatat.

    Marrëveshja ndodh pas 15 muajsh konflikti që ka vrarë dhjetëra mijëra palestinezë dhe ka ndezur flakët e luftës në Lindjen e Mesme.

    Marrëveshja, që pritet të shpallet edhe zyrtarisht, përshkruan një fazë fillestare gjashtëjavore të armëpushimit dhe përfshin tërheqjen graduale të forcave izraelite nga Gaza dhe lirimin e pengjeve që po mbahen nga Hamasi në këmbim të të burgosurve palestinezë që gjenden në burgjet e Izraelit, ka deklaruar për Reuters një zyrtar i përfshirë në procesin negociator.

    Marrëveshja arrihet pas disa muajsh negociatash të ndërmjetësuara nga ndërmjetësuesit e Egjiptit dhe të Katarit, me mbështetjen e Shteteve të Bashkuara dhe erdhi pak përpara inaugurimit të presidentit të zgjedhur të SHBA-së, Donald Trump, më 20 janar.

    Hamasi, grupi militant palestinez që udhëhiqte Gazën, i ka deklaruar Reutersit se delegacioni i tij u kishte dhënë ndërmjetësuesve miratimin për marrëveshjen e armëpushimit dhe kthimin e pengjeve.

    Një zyrtar palestinez, i cili kërkoi të mos identifikohej, i ka theksuar Reutersit më herët se Hamasi ka dhënë miratimin verbal për propozimin e armëpushimit dhe kthimit të pengjeve në negociatat e Katarit dhe ishte duke pritur për më shumë informacione për të dhënë miratimin përfundimtar me shkrim.

    Ministri i Jashtëm izraelit, Gideon Saar, ka njoftuar se do të ndërpresë vizitën në Europë dhe do të kthehet në Izrael gjatë natës për të marrë pjesë në votimet e kabinetit të sigurisë dhe qeverisë për marrëveshjen – që do të thotë se votimi do të zhvillohet sonte.

    Trupat izraelite pushtuan Gazën pasi persona të armatosur të udhëhequr nga Hamasi depërtuan nëpër barrierat e sigurisë dhe hynë në komunitetet izraelite më 7 tetor 2023, duke vrarë 1,200 ushtarë dhe civilë dhe rrëmbyer më shumë se 250 të huaj dhe izraelitë.

    Fushata e Izraelit në Gazë ka vrarë më shumë se 46 mijë njerëz, sipas shifrave të Ministrisë së Shëndetësisë të Gazës, dhe e ka kthyer enklavën bregdetare në një shkretëtirë rrënojash me qindra mijëra që i mbijetuan të ftohtit të dimrit në tenda dhe strehimore të improvizuara.

    Ndërsa inaugurimi i tij afrohej, presidenti i zgjedhur Trump përsëriti kërkesën e tij që një marrëveshje të arrihej shpejt, duke paralajmëruar hakmarrje nëse pengjet nuk do të liroheshin. I dërguari i tij në Lindjen e Mesme, Steve Witkoff, punoi me ekipin e presidentit Joe Biden për ta arritur marrëveshjen.

    Përgatiti: Rexhep Maloku/Kallxo.com

  • Këshilltarët e Trumpit e pranojnë se ujdia për paqe në Ukrainë është muaj larg

    Këshilltarët e presidentit të zgjedhur amerikan, Donald Trump e pranojnë tani se lufta në Ukrainë do të marrë muaj, ose më shumë kohë për ta zgjedhur një pranim të një realiteti kokëfort, për premtimin e tij më të madh të politikës së jashtme – duke pasur parasysh se kishte premtuar se në ditën e parë të Presidencës do të jetësonte një Marrëveshje të Paqes pas kthimit në Shtëpinë e Bardhë – raporton të mërkurën, më 15.01.2025, Agjencia e lajmeve Reuters.

    Dy njerëz të afërt të Trumpit, të cilët kanë folur për luftën me presidentin e zgjedhur për luftën në Ukrainë, i kanë thënë Reutersit se presin të ketë një afat kohor prej muajsh për ta zgjidhur konfliktin – duke i përshkruar premtimet e Ditës së Parë si kombinim të rrëmbimit të fushatës dhe mungesës së njohjes së drejtpërdrejtë të rrjedhave të luftës. Ata kanë thënë gjithashtu se stafit të Administratës së re do t’i duhet më shumë kohë për të ndërmarrë veprime konkrete.

    Këto vlerësime përputhen me komentet e të dërguarit të ardhshëm të Trumpit për Rusi-Ukrainë, gjenerallejtënant në pension Keith Kellogg, i cili ka deklaruar në një intervistë me Fox News javën e kaluar se do të dëshironte të kishte një “zgjidhje” për luftën brenda 100 ditëve – larg afatit kohor të premtuar prej Presidentit të zgjedhur.

    Megjithatë, edhe afati i zgjatur i Kelloggut ishte “tepër optimist”, ka deklaruar John Herbst, ish-ambasador amerikan në Ukrainë, i cili tani është pjesë e Institutit të Mendimit të Këshillit Atlantik në Uashington.

    “Që kjo të funksionojë, Trump duhet të bindë (presidentin rus, Vladimir) Putin se ka anën e vet negative që të ndryshojë përnjëherë mendimin.” – ka theksuar Herbst.

    Në prag të fitores së tij në Zgjedhjet e 5 nëntorit, Trumpi ka deklaruar dhjetëra herë se do të kishte një Marrëveshje midis Ukrainës dhe Rusisë në ditën e tij të parë në detyrë – nëse jo edhe më parë.

    Në fund të tetorit, megjithatë, ai bëri një ndryshim të kujdesshëm në retorikën e tij dhe filloi të thoshte se mund ta zgjidhte luftën “shumë shpejt”.

    Që nga Zgjedhjet, Trumpi e ka zbutur më tej retorikën, shpesh duke thënë thjesht se do ta “zgjidhte” konfliktin – pa ofruar një afat kohor. Dhe, Presidenti i zgjedhur ka thënë se përfundimi i luftës në Ukrainë do të jetë më i vështirë sesa arritja e një armëpushimi në Gazë.

     

    Përgatiti: Rexhep Maloku – Kallxo.com