Ballina

Autor: Rexhep Maloku

  • Dita e dytë e armëpushimit, lirohen 90 të burgosur palestinezë

    Armëpushimi i brishtë ndërmjet Izraelit dhe “Hamasit” ka hyrë në ditën e dytë – ka konfirmuar për BBC-në të hënën, më 20.01.2025, një qytetar nga Gaza – duke thënë se për herë të parë prej nisjes së luftës ka bërë gjumë të mirë “sepse jam ndier i sigurt”.

    Ndërkohë, 90 të burgosur palestinezë janë liruar gjatë natës si pjesë e fazës së parë të armëpushimit – ka bërë të ditur Shërbimi Korrektues Izraelit. Shumica prej të liruarve janë gra dhe fëmijë.

    Më herët u liruan tri gra izraelite, përfshirë njërën me shtetësi të dyfishtë britanike e izraelite, nga “Hamasi”. Ato janë trajtuar tashmë në Spitalin izraelit në Tel-Aviv dhe janë në gjendje të mirë shëndetësore.

    Ka pasur ritakime emocionale në të dy anët: palestinezët janë pritur me përqafime dhe brohoritje prej familjeve të tyre, derisa Emily Damari, e cila ishte peng në duar të “Hamasit” ka shpërndarë një xhirim të momentit prekës të takimit me familjen e saj.

    Armëpushimi në Gazë është fuqizuar pas një vonese të minutave të fundit, por gëzimi ka mbetur në hije pasi palestinezët janë kthyer në shtëpitë e tyre të shkatërruara dhe ende nuk ka qartësi se çfarë do të sjellë e ardhmja – raportojnë korrespodentët e BBC-së.

    Përgatiti: Rexhep Maloku – Kallxo.com

  • Kinës i bie numri i popullsisë për të tretin vit me radhë

    Popullsia e Kinës ka rënë për të tretin vit me radhë më 2024, me numrin e vdekjeve që po ia marrin anën atyre të lindjeve dhe ekspertët druajnë se trendi mund të thellohet edhe më shumë në vitet e ardhshme – ka raportuar të premten, më 17.01.2025, Agjencia e lajmeve Reuters.

    Zyra Kombëtare e Statistikave ka bërë të ditur se numri i përgjithshëm i banorëve në Kinë ka shënuar rënie prej 1.39 milion banorësh. Në vitin 2023 Kina numëronte 1 miliard e 409 milionë banorë, ndërkaq në vitin 2024 numri ka rënë në 1 miliard e 408 milionë banorë.

    Të dhënat e së premtes, më 17.01.2025, kanë fuqizuar shqetësimet se ekonomia e dytë më e madhe në botë do të ketë telashe, meqë pritet të bjerë numri i punëtorëve dhe konsumatorëve. Çmimet e ngritura për kujdesin e pleqve dhe përfitimet pensionale pritet t’ia shtrëngojnë edhe më fort rripin ekonomisë kineze, derisa Qeveria edhe ashtu po përballet me borxhe të qeverive lokale.

    Numri i përgjithshëm i lindjeve i Kinës ishte 9 milionë e 54 mijë, krahasuar me 9 milionë e 20 mijë më 2023. Numri i lindjeve është rritur në 6.77 për njëmijë banorë më 2024, krahasuar me 6.39 për njëmijë banorë më 2023.

    Numri i vdekjeve më 2024 ishte 10 milionë e 930 mijë, krahasuar me 11 milionë e 100 mijë më 2023.

    Shkalla e lindjeve e Kinës ka shënuar rënie për dekada me radhë, si rezultat i politikës një çift-një fëmijë – zbatuar nga viti 1980 deri më 2015, por edhe si pasojë e urbanizimit.

    Qysh ka ndodhur edhe në Japoninë dhe Korenë e Jugut fqinje, edhe në Kinë është rritur numri i atyre që po zhvendosen nga fshatrat në qytete, ku kushtet e jetesës janë më të shtrenjta.

    Përgatiti: Rexhep Maloku – Kallxo.com

  • Pakistani dënon ish-kryeministrin Khan me 14 vjet burgim për ryshfet

    Një Gjykatë pakistaneze e ka dënuar ish-kryeministrin Imran Khan me 14 vjet burgim, të premten, më 17.01.2026, në një rast korrupsioni për tokë – ka njoftuar transmetuesi lokal ARY News – njofton Reuters.

    Vendimi për këtë çështje, më i madhi për sa i përket keqpërdorimit financiar me të cilin u përball Khan, u shqiptua nga një Gjykatë antikorrupsion në një burg në qytetin garnizon, Rawalpindi, ku Khan është i burgosur prej gushtit 2023.

    Ish-ylli i kriketit, 72 vjeç, ishte paditur me akuzat se atij dhe gruas së tij iu dhurua tokë nga një magnat i pasurive të paluajtshme gjatë mandatit si Kryeministër, gjatë viteve 2018- 2022, në këmbim të favoreve të paligjshme.

    Khani dhe gruaja e tij, Bushra Bibi ishin deklaruar të pafajshëm. Shpallja e Vendimit u vonua tre herë – së fundmi edhe të hënën pas bisedimeve ndërmjet Qeverisë dhe partisë së Khanit.

    Bushra Bibi, e cila është në fund të 40-ave dhe ishte liruar me kusht, u dërgua në paraburgim pasi u shpall fajtore për të njëjtin rast – ka raportuar Geo News.

    “Ndërsa ne presim një Vendim të detajuar, është e rëndësishme të theksohet se, rasti i ‘Al-Qadir Trust’ kundër Imran Khanit dhe Bushra Bibit nuk ka ndonjë bazë të fortë dhe detyrimisht do të rrëzohet.” – ka shkruar në një deklaratë krahu i mediave i partisë së Khanit në Pakistan, Tehreek-e-Insaf.

    Vendimi është pengesa më e madhe për Khanin dhe partinë e tij, që nga rezultati çuditërisht i mirë në Zgjedhjet e përgjithshme të vitit 2024, kur kandidatët e saj, të cilët u detyruan të konkurronin si të pavarur fituan shumicën e mandateve, por nuk arritën shumicën e nevojshme për të formuar një Qeveri.

    I burgosur që nga gushti 2023 Khan është përballur me dhjetëra raste, duke filluar nga akuzat për ryshfet dhe shpërdorim pushteti, deri te nxitja e dhunës kundër shtetit, pasi u hoq nga detyra në një votëbesim parlamentar në prill 2022.

    Ai ose shpallej i pafajshëm, ose i pezulloheshin dënimet në shumicën e rasteve, me përjashtim të njërit, bazuar mbi akuzën e nxitjes së mbështetësve për të sulmuar nëpër objektet ushtarake gjatë protestave kundër arrestimit të tij, më 9 maj 2023.

    Mbështetësit i kanë udhëhequr disa protesta të dhunshme që nga incidentet e 9 majit.

    Ai është gjykuar brenda burgut për arsye sigurie.

    Përgatiti: Rexhep Maloku – Kallxo.com

  • Izraeli do ta aprovojë Marrëveshjen e armëpushimit dhe pengjeve – thotë Zyra e Netanyahut

    Kabineti izraelit do t’ia japë aprovimin përfundimtar ujdisë me grupin militant palestinez, “Hamas”, për armëpushim në Rripin e Gazës dhe për lirimin e pengjeve – ka bërë të ditur të premten, më 17.01.2025, Zyra e kryeministrit Benjamin Netanyahu – raporton Agjencia e lajmeve Reuters.

    Në vetë Gazën, aeroplanët izraelitë kanë vazhduar sulmet e intensifikuara dhe autoritetet palestineze kanë thënë se të enjten janë vrarë 86 persona një ditë pas arritjes së Marrëveshjes.

    Me ndasitë e kahershme që janë të dukshme në mesin e Ministrave, Izraeli ka shtyrë takimet e pritura për të enjten kur Kabineti pritej të votonte paktin – duke fajësuar “Hamasin” për rigrupim.

    Por në orët e hershme të mëngjesit të së premtes, zyra e Netanyahut ka thënë se aprovimi do të jetë i menjëhershëm.

    “Kryeministri Benjamin Netanyahu është informuar prej ekipit negociues se Marrëveshjet janë arritur me pajtimin për lirimin e pengjeve.” – ka njoftuar Zyra Kryeministrore, në një deklaratë të shkruar.

    Kabineti i Sigurisë do të takohet të premten para një takimi të krejt ekipit qeveritar, për ta aprovuar Marrëveshjen e ndërmjetësuar në Katar, për të cilin rol kritik kanë pasur Administrata e presidenti amerikan, Joe Biden dhe ajo e presidentit të zgjedhur, Donald Trump.

    Marrëveshja parashihet të hyjë në fuqi më 19 janar – një ditë para inaugurimit të Trumpit president të Shteteve të Bashkuara të Amerikës.

    Përgatiti: Rexhep Maloku – Kallxo.com

  • Kryeministri britanik në Kiev, që të zotojë mbështetjen historike për Ukrainën

    Kryeministri britanik, Keir Starmer ka arritur në Kiev, për të nënshkruar atë që Downing Street po e quan “partneritet 100-vjeçar historik” me Ukrainën – bën të ditur të enjten, më 16.01.2025, televizioni britanik BBC.

    Pakti do të formalizonte mbështetjen ekonomike dhe ushtarake që tashmë e ka zotuar Mbretëria e Bashkuar ndaj Ukrainës, por do të ofrojë edhe shumë më shumë.

    Është vizita e parë e Kryeministrit britanik në këtë vend, pasi mori detyrën verës, si një dëshmi e mbështetjes për Ukrainën, pak ditë para se presidenti i zgjedhur amerikan, Donald Trump të marrë detyrën në Shtëpinë e Bardhë.

    Presidenti ukrainas, Volodymyr Zelensky pritet të ketë diskutime të rëndësishme për garancitë e sigurisë nga aleatët kyç, si Britania e Madhe, në kohën kur raportohet se Administrata e re amerikane mund ta shtyjë Ukrainën që të arrijë Marrëveshje paqësore me Rusinë.

    Ndryshe prej Kryeministrave të tjerë që menjëherë vizitonin Kievin, Keirit ka marrë kohën e nevojshme para vizitës, por pas gjashtë muajsh në krye të Ekzekutivit britanik, ai i ka shprehur zotimin Ukrainës për mbështetje afatgjate, kundër atij që e ka quajtur “invazion barbar dhe ilegal” të Rusisë.

    Ai është pritur në Stacionin e trenit në Kiev prej ambasadorit britanik në Kiev, Martin Harris dhe emisarit ukrainas në Londër, Valeri Zaluzhnyi.

     

    Përgatiti: Rexhep Maloku – Kallxo.com