Ballina

Autor: Mediana Halili

  • Arrestohen dy persona në Pejë, dyshohet se keqpërdorën kartelat bankare të qytetarëve të tjerë

    Policia e Kosovës ka arrestuar dy persona në Pejë të dyshuar për “keqpërdorim të detyrës zyrtare”, “lëshim i çeqeve pa mbulesë ose të rremë” dhe “keqpërdorim i kartelave të bankës apo të kreditit”.

    Sipas njoftimit organet e rendit më 17.01.2024 kanë kryer kontrolle të tri lokacione sipas urdhrit të Gjykatës Themelore në Pejë.

    “Dy persona të dyshuar në këtë rast, një femër dhe një mashkull kosovarë, dyshohet se me qëllim të përfitimit të dobisë pasurore për vete kanë keqpërdorur kartelat bankare të disa personave dhe ua kanë tërhequr mjetet e përfituara nga skema pensionale. Tërheqja e parave dyshohet se ka ndodhur në vazhdimësi për disa muaj”- thuhet në njoftim.

    Policia gjatë kontrollit kanë sekuestruar gjashtë kartela bankare në emër të personave të tjerë, një telefon dhe dokumentacion me rëndësi.

    Organet e rendit kanë gjetur dhe dy armë zjarri për të cilat pas konsultimit me prokurorin është iniciuar rast i veçantë.

    Personat e dyshuar janë intervistuar dhe me vendim të prokurorit janë dërguar në mbajtje deri 48 orë.

  • Fluks i pacientëve në Klinikën e Pediatrisë

    Në Klinikën e Pediatrisë në Qendrën Klinike Universitare të Kosovës (QKUK) është shtuar fluksi i pacientëve.

    KALLXO.com ka vizituar këtë klinikë më 16.01.2024.

    Lidhur me numrin e pacientëve që po kërkojnë ndihmë mjekësore, drejtoresha e pediatrisë, Voleta Grajçevci Uka ka thënë se në këtë klinikë lajmërohen raste të ndryshme duke përfshirë viruset sezonale por edhe të tjera.

    “Në klinikën e pediatrisë lajmërohen rastet me probleme respiratore edhe me patologji të tjera të cilët kanë nevojë për hospitalizim. Disa prej tyre si shkaktarë të infeksionit janë viruset sezonale por ka edhe raste të tjera”- tha ajo për KALLXO.com

    Grajçevci Uka tha se momentalisht në Klinikën e Pediatrisë nuk ka raste kur në një shtrat janë të vendosur dy fëmijë.

     

  • Sindikata e Punëtorëve të RTK-së shprehet e zhgënjyer me Kuvendin që nuk arriti të zgjidhë statusin e RTK-së

    Sindikata e Punëtorëve të Radio Televizionit të Kosovë (RTK) është shprehur e zhgënjyer ndaj të gjitha legjislaturave të Kuvendit të Kosovës, të cilat sipas tyre nuk kanë arritur të zgjidhin statusin e mediumit publik.

    SPERTK thotë se miratimi i një Ligji të ri do të rregullonte çështjen e pronës dhe financimit të pavarur të RTK-së.

    “Sindikata e Punëtorëve të RTK-së shpreh zhgënjimin e saj të thellë ndaj të gjitha legjislaturave të Kuvendit të Kosovës, të cilat deri më tani nuk kanë arritur ta zgjidhin statusin e RTK-së. Miratimi i një Ligji të ri, që do të rregullonte çështjet e pronës dhe financimit të pavarur të transmetuesit publik është mëse i domosdoshëm për funksionimin e tij.” – thuhet në komunikatën e kësaj Sindikate.

    Kjo Sindikatë kanë theksuar se janë të indinjuar që në kohë fushate dëgjojnë premtime për rritje – duke marrë parasysh që RTK operon me një buxhet të zvogëluar.

    “Jemi të indinjuar që edhe në kohë fushatash zgjedhore dëgjojmë premtime për rritje pagash, ndërkohë që RTK-ja operon me një buxhet 2.2 milionë euro më të ulët. Për më tepër, rritja e pagave për punonjësit e RTK-së nuk ka ndodhur që nga viti 2006 – duke dëshmuar një neglizhencë të madhe ndaj të drejtave të tyre.” – vazhdon komunikata.

    SPERTK ka thënë se nëse nuk trajtohet me urgjencë çështja e buxhetit, do të adresojnë këtë çështje në Gjykatën Kushtetuese.

    Ata kanë apeluar te të gjitha partitë politike, që të kthejnë vëmendjen ndaj RTK-së – duke theksuar se transmetuesi publik ndodhet në një gjendje të rënduar financiare dhe infrastrukturore.

    Që nga viti 2010, RTK financohet direkt nga Buxheti i Shtetit – formë kjo e kritikuar ndër vite. Ndërsa, aktualisht Ligji i RTK-së është i vitit 2012.

  • Prokuroria në Gjilan kërkon paraburgim ndaj të dyshuarit për ‘vrasje në tentativë’

    Prokuroria Themelore në Gjilan ka kërkuar caktimin e masës së paraburgimit nga Gjykata Themelore në Gjilan, ndaj të pandehurit E. H., pasi i njëjti dyshohet se ka kryer veprën penale ‘vrasje në tentativë’.

    Në njoftimin e Prokurorisë thuhet se dyshohet se më 13.11.2024 E. H. ka tentuar ta privojë nga jeta L. H., për shkak të një mosmarrëveshje.

    Ai kishte goditur me thikë viktimën dhe ishte larguar nga vendi i ngjarjes.

    “Sipas kërkesës ekziston dyshimi i bazuar se më datën 13 nëntor 2024, në Gjilan, i pandehuri E. H. ka tentuar ta privojë nga jeta të dëmtuarin L. H., në atë mënyrë që për shkak të mosmarrëveshjeve paraprake verbale, me thikë e godet të dëmtuarin një herë në pjesën e shpatullës së majtë, ku pasi ndërhyjnë dëshmitarët dhe e largojnë i njëjti ikën nga vendi i ngjarjes. Ndërsa, i dëmtuari  si pasojë e plagës së marrë dërgohet fillimisht në Emergjencën e Spitalit Regjional në Gjilan, pastaj për shkak të gjendjes së rëndë shëndetësore transferohet në QKUK.” – thuhet në njoftim.

    Prokuroria ka bërë të ditur se i pandehuri E. H., që nga koha e kryerjes së kësaj vepre penale ka qenë në arrati.

  • Në IKSHPK caktohen Laboratorët Referentë për Influencën, Fruthin dhe Rubellën

    Me Vendim të Ministrit të Shëndetësisë, Instituti Kombëtar i Shëndetësisë Publike (IKShKP) ka caktuar dy laboratorë referentë në kuadër të këtij institucioni.

    Laboratori për Influencë është caktuar si laborator referent për diagnostifikimin e monitorimin e influencës dhe viruseve të tjera respiratore në nivel kombëtar.

    Ndërsa Laboratori për Fruth dhe Rubellë është caktuar si laborator referent për diagnostifikimin, monitorimin dhe studimin e fruthit dhe rubellës.

    Sipas njoftimit të IKShPK-së, ndër të tjera, funksioni i Laboratorit Referent për Influencë është si Qendër Diagnostike për Influencën dhe Virusët Respiratorë në Kosovë dhe shërben si Qendër Trajnimi për Personelin Laboratorik mbi Diagnozën e Influencës dhe Viruseve.

    “Detyrat Specifike të Laboratorit Referent për Influencë: teston mostra për sëmundje të ngjashme me gripin dhe infeksione akute respiratore, sipas mbikëqyrjes së sëmundjeve ngjitëse; identifikon dhe dallon nëntipe të influencës A dhe B, duke përdorur metoda diagnostike të avancuara; përgatit dhe raporton të dhëna statistikore për IKSHPK; ruajtja e mostrave në mikrobanka dhe dërgimi i tyre në Qendrat Bashkëpunuese të OBSH-së për zhvillimin e vaksinave sezonale.” – thuhet në njoftimin e datës 14.01.2025.

    Ndërkaq, detyrat specifike të Laboratorit Referent për Fruth dhe Rubellë janë që të sigurojë teste diagnostifikuese e këshilla shkencore për kontrollin e sëmundjeve dhe ruajtjen e shpërndarjen e produkteve referente biologjike për diagnostifikim.