Ballina

Autor: Kallxo

  • Italia dërgon në Shqipëri 49 emigrantë

    Një anije e marinës italiane ka arritur më 28 janar në Shqipëri me 49 emigrantë në bord, të cilët u shpëtuan në ujërat ndërkombëtare.

    Në Shqipëri atyre do t’iu procedohen aplikimet për azil dhe më pas ata do të dërgohen në Qendrën në Gjadër.

    Kjo është përpjekja e tretë për strehimin e emigrantëve në Shqipëri, pasi paraprakisht Gjykatat italiane kishin ndaluar një gjë të tillë.

    Ministria e Brendshme italiane nuk ka specifikuar nacionalitetin e emigrantëve të cilët u dërguan në Portin e Shëngjinit, por mediat në Itali kanë raportuar se bëhet fjalë për persona nga Bangladeshi, Egjipti, Bregu i Fildishtë dhe Gambia.

    Përpjekja për procesimin në Shqipëri vjen pas dy përpjekjesh të dështuara tetorin dhe nëntorin e kaluar, kur gjykatësit italianë refuzuan të miratonin Urdhra për ndalimin e dy grupeve të vogla emigrantësh në Qendrat e ngritura në Shqipëri, sipas një Marrëveshjeje mes Italisë dhe Shqipërisë. Gjykatat vendosën se vendet e origjinës së emigrantëve nuk ishin të sigurta për ta, nëse aplikimet për azil do t’iu refuzoheshin dhe emigrantët do të ktheheshin në shtetet e tyre.

    Rastet janë dërguar në Gjykatën Evropiane të Drejtësisë, e cila më herët ka vendosur se azilkërkuesit nuk mund t’iu nënshtrohen procedurave të përshpejtuara që mund të çojnë në riatdhesim – nëse shtetet e tyre të origjinës nuk vlerësohet se janë plotësisht të sigurta.

    Seanca dëgjimore për këtë rast në Gjykatën Evropiane të Drejtësisë është caktuar për 25 shkurt.

    Qeveria e kryeministres italiane Giorgia Meloni është zotuar se do të rihapë dy Qendrat për Emigrantë në Shqipëri, pasi ato mbeten bosh pas Vendimeve të Gjykatave italiane.

    Qëndrimi i Melonit është mbështetur pjesërisht nga një Vendim i Gjykatës së Lartë të Italisë në dhjetor, në të cilin gjykatësit italianë thanë se nuk mund të zëvendësojnë politikat e Qeverisë sa i përket Vendimit se cilat shtete janë të sigurta për riatdhesimin e emigrantëve, të cilëve u është refuzuar Kërkesa për azil.

    Ky Vendim lejon që Gjykatat e niveleve më të ulëta të bëjnë përcaktime të tilla, në bazë të shqyrtimeve të rasteve individuale, pa vendosur për politikën e përgjithshme.

    Emigrantët priten të regjistrohen në Qendrën e pritjes në Portin e Shëngjinit dhe më pas të dërgohen në Qendrën e Strehimit në Gjadër.

    Marrëveshja mes Italisë dhe Shqipërisë për emigrantët, e arritur në nëntor të vitit 2023, lejon që deri në 3.000 emigrantë të kapur nga rojet bregdetare italiane në ujërat ndërkombëtare çdo muaj të strehohen në Shqipëri, ku do t’iu nënshtrohen procesit të verifikimit për marrjen e mundshme të azilit në Itali.

    Marrëveshja pesëvjeçare është thënë se do t’i kushtojë Italisë 160 milionë euro në vit.

    Sipas Marrëveshjes, procedurat për emigrantët do të kryhen në dy Qendra.

    Qendra e parë në Shëngjin do të përdoret për procedura të identifikimit të emigrantëve, ndërsa Qendra e dytë në Gjadër, rreth 20 kilometra larg Portit, do të shërbejë për strehim të tyre derisa të procesohen Kërkesat për azil.

    Qendrat do të funksionojnë sipas Ligjit italian, me staf italian të sigurisë, ndërsa gjyqtarët do t’i mbajnë seancat përmes video-lidhjes nga Roma.

    Emigrantët të cilët fitojnë azil do të mirëpriten në Itali, ndërkaq atyre që iu refuzohet Kërkesa për azil, sipas Marrëveshjes, do të riatdhesohen drejtpërdrejt nga Shqipëria.

    Aktivistët për të drejtat e njeriut kanë kritikuar Marrëveshjen – duke thënë se krijon një precedent të rrezikshëm.

    Deri më tani gjatë këtij viti 3.704 emigrantë kanë arritur në Itali, apo dyfish më shumë sesa në periudhën e njëjtë të vitit të kaluar, kur ishin 1.305 imigrantë.

    Vitin e kaluar 66.317 imigrantë arritën në Itali, apo 58% më pak se viti paraprak. Shumica e emigrantëve ishin nga Bangladeshi, Siria, Tunizia dhe Egjipti – sipas të dhënave të Ministrisë së Brendshme italiane./REL

  • Moti për sot

    Instituti Hidrometeorologjik i Kosovës njofton se sot, më 28.01.2025, mbi vendin tonë moti do të jetë kryesisht me diell dhe vranësira të shpërndara.

    “Temperaturat minimale do të lëvizin ndërmjet 0°C dhe 3°C, ndërsa ato maksimale do të lëvizin nga 13°C deri në 16°C. Do të fryjë erë e lehtë nga drejtimi i jugperëndimit.” – njofton IHMK

  • Vazhdojnë protestat në Serbi, protestuesit bllokojnë kryqëzimin më të ngarkuar të autostradës në Beograd

    22:11

    Vuçiq thotë se janë plotësuar të gjitha kërkesat e studentëve dhe zotohet për falje

    Presidenti serb, Aleksandar Vuçiq, ka pretenduar se janë plotësuar të gjitha kërkesat e studentëve, nisur nga publikimi i gjithë dokumentacionit rreth rindërtimit të stacionit hekurudhor në Novi Sad, e deri te falja e aktivistëve të arrestuar gjatë protestave.

    Në një adresim publik më 27 janar, ai ka thënë se do të publikohen edhe dokumentet tjera, dhe kështu shteti do të ofrojë “gjithçka që ka”.

    “Nuk ka më dokumentacion që ka të bëjë me rindërtimin e stacionit hekurudhor”, ka thënë Vuçiq.

    Ai, gjithashtu, ka thënë se është i gatshëm të nënshkruajë faljen e të gjithë studentëve dhe profesorëve, ndaj të cilëve janë nisur procedura penale, pas arrestimit të tyre në protesta.

    Protestat kanë nisur pas shembjes së një cope të madhe betoni në stacionin hekurudhor të Novi Sadit më 1 nëntor, duke lënë të vrarë 15 persona dhe duke plagosur rëndë dy të tjerë.

    Duke folur për kërkesat e studentëve për ndjekjen penale të përgjegjësve për sulmet ndaj studentëve, profesorëve dhe qytetarëve tjerë në marshe dhe protesta, Vuçiq ka thënë se janë iniciuar raste kundër 37 individëve.

    Sa i përket përfshirjes së zyrtarëve qeveritarë në sulme, Vuçiq ka thënë se “ekziston vetëm një rast në Beogradin e ri” dhe që beson se “tashmë është zgjidhur”.

    Kur ka folur për kërkesën për rritje të buxhetit për 20 për qind për edukimin e lartë, presidenti serb ka thënë se studentët e kanë ndryshuar kërkesën për të përfshirë rritje të pagave të profesorëve dhe zvogëlim për 50 për qind të tarifave studentore, dhe që shteti tashmë ka vendosur të plotësojë edhe këtë kusht.

    Sipas tij, kjo do t’i kushtojë shtetit rreth 73 miliardë dinarë.

    “Pyetja është nëse të gjitha këto që kemi përmbushur do të jenë mjaftueshëm që dikush të thotë se ‘të gjitha kërkesat janë përmbushur’. Nuk jam i sigurt, por shpresoj të jetë ashtu. Por, jam i sigurt që kjo do të nisë një dialog në shoqëri, dhe që dikush prej rektorëve dhe dekanëve, dhe të gjithë të tjerët të nisin të flasin, të niset dialogu dhe kështu të nisë shërimi i shoqërisë sonë”, ka thënë Vuçiq.

    Kryeministri i Serbisë, Millosh Vuçeviq, ka thënë në konferencë të përbashkët me Vuçiqin se i ka ftuar të gjithë rektorët, dekanët, profesorët dhe studentët e universiteteve dhe fakulteteve në Serbi që të shkojnë në Qeveri dhe të diskutojnë për kërkesat e studentëve, që sipas tij, janë plotësuar në tërësi.

    Vuçiq ka thënë të hënën se do t’i dërgojë një kërkesë Qeverisë serbe “për ristrukturimin më urgjent dhe më masiv të mundshëm”.

    “Sepse në këto kohë të vështira politike, është bërë e qartë se kush është i gatshëm të punojë dhe të luftojë, kush jo, dhe duke pasur këtë parasysh, pres që më shumë se 50 për qind e ministrave të shkarkohen dhe zëvendësohen në një ristrukturim shumë, shumë urgjent”, ka thënë Vuçiq më 27 janar.

    Ai ka thënë se në tre muajt e fundit, pas aksidentit në stacionin hekurudhor në Novi Sad – në të cilin kanë vdekur 15 persona – është krijuar një atmosferë që nuk është në të mirë të askujt.

    “Në këta tre muaj, ne kemi dëgjuar shumë akuza kundër trupave shtetërore, thirrje për përmbysje të shtetit, kemi dëgjuar deklarata shumë të papërgjegjshme, jo vetëm nga opozita, por edhe nga ne në pushtet”, ka thënë ai.

    Presidenti serb ka thënë se ka biseduar me përfaqësues qeveritarë dhe që ata “kanë deklaruar se kanë dëshirë të dëgjojnë palën tjetër” [studentët që po protestojnë] dhe që dëshirojnë dialog dhe bisedë.

    Studentët vazhdojnë bllokadën 24-orëshe

    Vuçiq, kryeministri serb, Millosh Vuçeviq dhe kryetarja e parlamentit Ana Bërnabiq, i janë adresuar publikut në ditën kur studentët kanë organizuar bllokadë 24-orëshe në njërën prej pikave kryesore të trafikut në Beograd.

    Bllokada 24-orëshe është organizuar tri ditë pasi mijëra njerëz i janë bashkuar thirrjes për grevë të përgjithshme.

    Studentët, që janë bllokuar punën e më shumë se 60 fakulteteve për më shumë se dy muaj, janë duke kërkuar përgjegjësi penale dhe politike për 15 vdekjet e shkaktuara nga incidenti në Novi Sad.

    Përfaqësuesit qeveritarë kanë thënë paraprakisht se të gjitha kërkesat e studentëve janë plotësuar.

    Akademikët, në anën tjetër, kanë thënë se kërkesat e tyre janë plotësuar pjesërisht dhe që pezullimi i punës do të vazhdojë deri në njoftimin e radhës.

    Më shumë se 5.000 profesorë universitarë në Serbi kanë mbështetur bllokadën e studentëve.

    Përmes një peticioni ata dënojnë tentimet e Qeverisë për t’i frikësuar studentët – duke i bërë publike të dhënat e tyre personale, apo edhe duke dërguar agjentë të agjencive qeveritare në shtëpitë e tyre apo të prindërve të tyre.

    Zyra e Prokurorit të Lartë në Novi Sad ka paditur 13 njerëz lidhur me incidentin e nëntorit.

    Në mesin e tyre janë edhe ish-ministri për Ndërtim, Transport dhe Infrastrukturë, Goran Vesiq, asistentja e tij Anita Dimoski, si dhe ish-drejtorja e kompanisë publike infrastrukturore, Jelena Tanaskoviq.

    Dhjetë prej të paditurve janë në mbajtje, Vesiq është në arrati, ndërsa Tanaskoviq dhe Dimoski janë në arrest shtëpiak./REL.

    21:01

    Vazhdojnë protestat në Serbi, protestuesit bllokojnë kryqëzimin më të ngarkuar të autostradës në Beograd

    Protestuesit vazhduan të rrisin presionin ndaj Qeverisë së Serbisë të hënën, duke bllokuar kryqëzimin më të ngarkuar të autostradës në Beograd, pas një fundjave protestash në të gjithë vendin.

    Studentët në Beograd të mbështetur nga profesorë, mësues dhe anëtarë të publikut të hënën filluan një bllokadë 24-orëshe të një prej kryqëzimeve më të ngarkuara të autostradave në kryeqytetin e Serbisë, Autokomanda.

    Pas dhjetëra incidenteve të dhunshme në protestat dhe bllokadat e mëparshme, kur protestuesit u përplasën nga makina, duke përfshirë dy incidente në të cilat dy studentë u plagosën rëndë, bllokada e së hënës u mbështet nga fermerët me traktorë si dhe nga çiklistët, të cilët siguruan protestuesit.

    Protestuesit po kërkojnë llogari nga qeveria e presidentit Aleksandar Vuçiq për një fatkeqësi në stacionin hekurudhor të Novi Sadit në nëntor 2024, e cila la 15 të vdekur.

    Studentët mbërritën nga pika të ndryshme të qytetit, në varësi të vendndodhjes së fakulteteve të tyre. Rruga më e gjatë ishte nga Fakulteti i Bujqësisë në periferi të Zemunit, kështu që protestuesit bllokuan njërën korsi të autostradës Beograd-Zagreb ndërsa po ecnin në pikën e bllokimit.

    Një motoçiklist që kërkoi të mos përmendet i tha BIRN se ata erdhën në bllokadë individualisht dhe nuk përfaqësonin ndonjë organizatë të veçantë motoristësh.

    “Studentët thirrën për ndihmë dhe ne u organizuam nëpërmjet një forumi të motoçiklistëve në internet, kështu që do të ndahemi në turne dhe do të jemi në Autokomanda deri në fund të bllokadës” – tha ai për BIRN. /BalkanInsight.

     

  • Tre-katër mbrojtës të viktimave për qindra raste të dhunës në familje

    Pavarësisht ligjeve të hartuara për mbrojtjen e viktimave, dështimet sistematike dhe mungesa e burimeve i lënë shumë gra në Kosovë të cenueshme ndaj dhunës.

    Drita, 60 vjeçe nga rajoni i Podujevës, ka duruar gati katër dekada dhunë – nga tri familje të ndryshme, përfshirë edhe të sajën – dhe sot është në pritje…

    Gjatë një rrëfimi për Radion Evropa e Lirë, ajo tregon se drama e jetës së saj ka nisur në të 20-tat, pas vdekjes së bashkëshortit të parë.

    Atëkohë, thotë se familjarët e tij nisën ta dhunonin fizikisht e psikikisht, duke e detyruar të kthehej përfundimisht në shtëpinë e familjes.

    Ambienti ku ishte rritur, nuk ishte më mikpritës për të. Por, duke qenë pa edukim, pa punë dhe nën rrethana të tjera të kohës, ajo duroi edhe fyerjet e ofendimet, të cilat nuk mbetën me aq.

    Me kalimin e viteve, Drita thotë se kunata dhe djali i vëllait nisën ta dhunonin fizikisht.

    Ndryshe prej herës së parë, Drita i raportoi ata në stacionin policor në Podujevë.

    “I kam raportuar 11 vjet më parë, por policia nuk më ka ndihmuar gjë. Vetëm më ka thënë se nuk do të guxojnë të të prekin më me dorë. Dhe, policia nuk është marrë më me rastin”, kujton Drita – emër i vendosur nga redaksia e REL-it për të ruajtur identitetin e saj.

    Derisa drama në shtëpinë e saj vazhdonte, Drita, kur ishte gati në të 50-tat, u martua për herë të dytë, por fatin e kishte thuajse të njëjtë.

    Sërish dhunë nga bashkëshorti e familjarët e tij, dhimbje e net pa gjumë.

    Këtë makth thotë se e duroi për plot nëntë vjet, më saktësisht deri më 12 dhjetor të vitit të kaluar, kur vendosi të largohej nga ajo shtëpi, të zhvendosej në një strehimore në Mitrovicë të Jugut dhe ta raportonte dhunën në polici.

    “Veç Zoti e di se si ka qenë jeta ime aty. Jam në një situatë shumë të keqe. Është zor t’i kesh 60 vjet e të mos kesh as shtëpi e as familje”, thotë Drita.

    Në ditën kur REL-i bisedoi me të, javën e kaluar, ajo ishte ende në strehimore, e pasigurt se si do të vazhdojë tutje.

    Ajo u intervistua nga policia pa mbrojtës nga Zyra për Mbrojtje dhe Ndihmë Viktimave, edhe pse praninë e tij e kërkon ligji.

    Përveç kësaj, mbrojtësi, i obliguar edhe për këshillimin e viktimës, nuk e takoi Dritën deri në ditën e pestë të strehimit në strehimore.

    Me ligj, ai duhet ta vizitojë menjëherë viktimën për të diskutuar rastin, e më pas viktima e krimit paraqitet në seanca gjyqësore e prokuroriale bashkë me mbrojtësin.

    “Unë e di që e meritojnë dënimin, por jam lodhur. Dua veç një të ardhme, të kem një vend ku mund të jetoj”, shprehet Drita – pak edhe shpërfillëse se çka do të ndodhë me ish-familjarët dhunues.

    Por, kjo përvojë e saj nuk është e rrallë në Kosovë dhe nxjerr në pah një krizë më të thellë në të gjithë vendin.

    Autoritetet pranojnë se janë me dhjetëra e dhjetëra raste të vonesave për këshillimin e viktimave, të shtyrjes së seancave gjyqësore e prokuroriale me ditë ose me javë, për shkak të mungesës së mbrojtësve nga Zyra për Mbrojtje dhe Ndihmë Viktimave, e cila funksionon në kuadër të Zyrës së Kryeprokurorit të Shtetit.

    Në rajonin e Mitrovicës, ku aktualisht gjendet Drita, vitin e kaluar janë raportuar 246 raste të dhunës në familje, në 231 prej të cilave viktima kanë qenë gratë, tregojnë të dhënat nga Zyra për Mbrojtje dhe Ndihmë Viktimave.

    Ky rajon funksionon me vetëm tre punonjës nga kjo zyrë, të cilët mbulojnë gjithsej shtatë komuna: Mitrovicën e Jugut, Mitrovicën e Veriut, Skenderajn, Vushtrrinë, Leposaviqin, Zubin Potokun dhe Zveçanin.

    Nga kjo zyrë thonë për Radion Evropa e Lirë se në situatat kur mbrojtësi i viktimave nuk mund të ofrojë përfaqësimin e tyre në seanca gjyqësore, gjykatësit i propozohet që seanca të mos mbahet dhe të caktohet për një ditë tjetër.

    Drejtoresha e qendrës ku ndodhet Drita, Fidane Hyseni, thotë se shtyrja e seancave – me ditë ose me javë të tëra – nuk ndikon aspak mirë te viktimat.

    “Do të ishte mirë të shtohej numri i mbrojtësve të viktimave, por edhe i punëtorëve socialë. Ne në Mitrovicë i kemi të dyja pjesët, edhe veriun, edhe jugun. Ka shumë raste [të dhunës] e pak punëtorë”, thotë Hyseni për Radion Evropa e Lirë.

    Situatë e ngjashme në të gjitha pjesët e Kosovës

    Me burime të pamjaftueshme përballet edhe rajoni i Gjilanit. Me vetëm tre mbrojtës, Zyra për Mbrojtje dhe Ndihmë Viktimave në këtë komunë, mbulon edhe gjashtë të tjera: Kamenicën, Vitinë, Parteshin, Kllokotin, Ranillukun dhe Novobërdën.

    Me mbi 400 raste të dhunës të raportuara vitin e kaluar, me 303 seanca gjyqësore dhe me 120 seanca në prokurori, “është një punë tepër e madhe për t’u kryer me vetëm tre mbrojtës të viktimave”, thonë nga Zyra për Mbrojtje dhe Ndihmë Viktimave në Gjilan.

    Zyra në Ferizaj i ka dy mbrojtës, të cilët mbulojnë edhe Kaçanikun, Hanin e Elezit, Shtërpcën dhe Shtimen. Në vitin 2023, ata kanë trajtuar gjithsej 288 raste të dhunës në familje.

    Ndërkaq, në Zyrën për Mbrojtje dhe Ndihmë Viktimave në Prizren thonë se janë katër mbrojtës, që vitin e kaluar janë marrë me 310 raste të dhunës në familje, kurse në Gajakovë, Rahovec e Malishevë, dy mbrojtës kanë trajtuar 245 raste të tilla.

    Me vetëm katër mbrojtës, Zyra në Pejë mbulon edhe Klinën, Istogun, Deçanin dhe Junikun. Vitin e kaluar, ata kanë pasur përsipër 291 raste.

    “Kemi një territor me popullsi ndër më të mëdhatë në Kosovë. Por, me përpjekje i jemi përgjigjur secilit rast”, thonë nga Zyra për Mbrojtje dhe Ndihmë Viktimave në Pejë për Radion Evropa e Lirë.

    Zyra në Prishtinë, në anën tjetër, ka pesë persona për t’u ofruar ndihmë ligjore grave të dhunuara dhe mbulon edhe Podujevën, Lipjanin, Fushë Kosovën, Drenasin, Graçanicën dhe Obiliqin.

    Nga kjo zyrë konfirmojnë për REL-in se vitin e kaluar kanë trajtuar gjithsej 817 raste të dhunës në familje.

    Zyra e Kryeprokurorit të Shtetit thotë se ka kërkuar disa herë nga Qeveria e Kosovës që të rrisë numrin e mbrojtësve e punëtorëve – madje edhe me 200 të rinj – por se kjo nuk ka ndodhur.

    “Këtë vit na janë premtuar pesë mbrojtës të rinj nga Qeveria, për të cilët është hapur konkursi, mirëpo atyre u duhet të trajnohen një vit për të qenë të aftë për përfaqësim ligjor të viktimave”, thotë për Radion Evropa e Lirë Fanol Plakiqi, ushtrues i detyrës së udhëheqësit të Zyrës për Shërbime të Përgjithshme.

    Në Qeverinë e Kosovës nuk iu përgjigjën kërkesës së REL-it për komente në këtë temë.

    “Të injoruara dhe të pambrojtura”

    Aktivistët paralajmërojnë se mungesa e mbështetjes në kohë për viktimat e dhunës, minon besimin e tyre në institucione.

    “Ato ndihen të injoruara dhe të pambrojtura, dhe vonesat krijojnë një ndjenjë të thellë të pasigurisë dhe humbjes së shpresës.”, thotë për Radion Evropa e Lirë Neri Ferizi, udhëheqëse e organizatës “Fourth Wave”, e cila merret me avancimin e drejtësisë shoqërore përmes ideologjisë feministe.

    Për më tepër, shton Ferizi, shtyrja e seancave gjyqësore ka ndikim të drejtpërdrejtë edhe në procesin gjyqësor dhe mund të çojë në humbjen e provave.

    Ajo e sheh si tejet të nevojshëm sigurimin e resurseve për të gjitha institucionet që janë të përfshira në luftën kundër dhunës në familje.

    “Jo vetëm kjo, por edhe edukimi i zyrtarëve institucionalë dhe i popullatës duhet të jenë prioritete për përmirësimin e gjendjes aktuale në Kosovë”, sipas Ferizit.

    Në Kosovë, çdo vit raportohen mijëra raste të dhunës në familje, ku shumica e viktimave janë gra.

    Aktivistët, më herët, kanë ngritur zërin edhe për dënimet e ulëta që marrin abuzuesit.

    Kodi Penal i Kosovës parasheh dënime me gjobë dhe deri në tre vjet burgim për të akuzuarit për dhunë në familje, por në një raport që publikoi Grupi për Studime Juridike dhe Politike në Kosovë në vitin 2023, thuhej se shumë pak të akuzuar për veprën e tillë u dënuan me burg.

    Raporti analizoi 129 aktgjykime të publikuara nga gjykatat e Kosovës dhe, sipas tij, 98 për qind të të akuzuarve për dhunë në familje iu shqiptua aktgjykim dënues, për shembull me gjobë, dhe vetëm 11 për qind u dënuan me burgim.

    Nga viti 2010, në Kosovë janë vrarë rreth 60 gra. Në të shumtën e rasteve, autorë të krimeve kanë qenë bashkëshortët ose ish-bashkëshortët./REL

  • Lukashenka fiton mandatin e shtatë në Bjellorusi – BE-ja i cilëson votimet si të rreme

    Udhëheqësi autoritar bjellorus, Alyaksandr Lukashenka ka siguruar mandatin e shtatë, pas mbajtjes së Zgjedhjeve presidenciale që udhëheqësit e Bashkimit Evropian i kanë cilësuar si “të rreme”.

    Me të gjitha votat e numëruara, Komisioni Qendror i Zgjedhjeve në Bjellorusi tha se, sipas rezultateve preliminare, Lukashenka ka fituar 86.8% të votave në Zgjedhjet e 26 janarit 2025. Kundërshtari i tij, Sergei Syrankov fitoi 3.2% të votave.

    Ministria e Punëve të Brendshme tha se nuk kishte shkelje të mëdha gjatë procesit zgjedhor. Punëtorët e Ministrisë dhe personeli ushtarak “zbatuan masat për të ofruar siguri publike gjatë Zgjedhjeve.” – tha kjo Ministri përmes një postimi në Telegram.

    Lukashenka, aleat i Rusisë i cili është në pushtet qe tri dekada, pasi votoi, deklaroi për media se Bjellorusia është një “demokraci e fortë”.

    Por, opozita, grupet për të drejtat e njeriut dhe Perëndimi deklaruan të kundërtën.

    Grupi avokues, Freedom House, me seli në Uashington, në Raportin e tij të fundit e ka përshkruar Bjellorusinë si një “shtet autoritar në të cilin Zgjedhjet haptazi vidhen dhe liritë civile janë thellësisht të kufizuara”.

    Udhëheqësja opozitare, Svyatlana Tsikhanouskaya, e cila jeton në Lituani, shkroi në X më 26 janar se tubimet kundër Zgjedhjeve po mbaheshin në disa qytete në mbarë Evropën – duke shtuar se “Bjellorusia kërkon liri”.

    Para Zgjedhjeve, zyrtarë të lartë të BE-së vunë në pikëpyetje legjitimitetin e votimeve dhe fitores së pritur të Lukashenkës.

    Presidentja e Parlamentit Evropian, Roberta Metsola, tha se Zgjedhjet ishin “të rreme”. Ajo shkroi në X se “mesazhi im për popullin e Bjellorusisë është: mbahuni të fortë, keni mbështetjen tonë, diktaturës do t’i vije fundi”.

    Shefja për Politikë të Jashtme e BE-së, Kaja Kallas kritikoi Lukashenkan – duke thënë se ai ka “kapur pushtetin qe 30 vjet” dhe po e “rizgjedh veten edhe përmes një votimi të rremë”.

    “Kjo është një fyerje flagrante për demokracinë.” – shkroi ajo në X.

    Megjithatë, Lukashenka hodhi poshtë kritikat e udhëheqësve perëndimorë.

    “I pranoni ose jo këto Zgjedhje: është çështje shijesh. Nuk më bëhet vonë. Kryesorja për mua është se bjellorusët i njohin këto Zgjedhje.” – tha ai gjatë Konferencës për media, në Minsk, më 26.01.2025./REL