Ballina

Autor: Kallxo

  • Ukraina: Rusia kryen sulm vdekjeprurës në Kiev

    Një sulm me dron nga Rusia në kryeqytetin ukrainas, Kiev ka vrarë një person dhe ka plagosur katër të tjerë – thanë zyrtarët lokalë.

    Forcat e Moskës, që kanë nisur pushtimin e Ukrainës në shkurt të vitit 2022, kanë përshkallëzuar sulmet ajrore në mbarë Ukrainën, që nga javët e parë të stinës së dimrit, duke kryer sulme edhe në ditën e Vitit të Ri në Kiev – sulme që vranë dy persona.

    “Një person është vrarë dhe katër të tjerë janë plagosur, gjatë një sulmi ajror të armikut në rajonin e Kievit.” – tha Mykola Kalashnyk, kreu i rajonit të Kievit.

    Ai tha se një shofer kamioni është vrarë pasi është goditur nga copëzat e një droni të rrëzuar rus.

    Copëza të dronit, po ashtu, ranë mbi një shtëpi, duke plagosur tre persona – përfshirë një djalë 16 vjeçar.

    Forcat ajrore ukrainase thanë se Rusia ka lëshuar 93 dronë gjatë natës. Ushtria tha se ka rrëzuar dronët ose i ka penguar përmes pajisjeve elektronike.

    Autoritetet thanë se copëzat e dronëve ranë në dy qarqe në Kiev, por nuk u raportua për të plagosur./REL

  • Izraeli raporton për sulme me dronë dhe raketa nga Jemeni

    Ushtria izraelite tha se ka rrëzuar një raketë dhe një dron të lëshuar nga Jemeni, më 03.01.2025. Ky ishte sulmi i fundit në serinë e sulmeve nga Jemeni, që kanë pasur për shënjestër Izraelin në javët e fundit.

    “Një raketë u lëshua nga Jemeni dhe kaloi në territorin izraelit. Raketa u rrëzua.” – tha Ushtria përmes një deklarate të publikuar në kanalin e saj në Telegram.

    “Kemi pranuar një raportim sa i përket rënies së copëzave të raketës së rrëzuar në zonën Modi në Izraelin qendror dhe jemi duke verifikuar detajet e këtij raportimi.” – shtoi Ushtria.

    Autoriteti i Shërbimit të Emergjencave në Izrael tha se disa persona janë trajtuar për shkak të plagëve të marra apo për shkak se kanë përjetuar sulme paniku teksa kanë qenë duke shkuar nëpër strehimore, pas aktivizimit të sirenave për sulme.

    Disa orë më pas, Ushtria izraelite tha se ka rrëzuar një dron të lëshuar nga Jemeni.

    Sipas Ushtrisë, droni u rrëzua para se të hynte në territorin izraelit.

    Të martën, Izraeli tha se kishte rrëzuar një raketë të lëshuar nga Jemeni.

    Shumica e Jemenit kontrollohet nga rebelët Huthi, të cilët mbështeten nga Irani. Rebelët vazhdimisht kanë gjuajtur raketa dhe dronë drejt Izraelit, por edhe ndaj anijeve në Detin e Kuq dhe në Gjirin e Adenit, në atë që ata e quajnë solidaritet me palestinezët në Gazë, në luftën mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

    Rebelët Huthi, po ashtu, kanë intensifikuar sulmet e tyre që nga nëntori i vitit të kaluar, kur u arrit një armëpushim mes Izraelit dhe Hezbollahut – grup i shpallur terrorist nga SHBA-ja në Liban.

    Izraeli, po ashtu, ka sulmuar Jemenin në fund të dhjetorit – duke shënjestruar Aeroportin Ndërkombëtar në Sana./REL

  • Ndalen përpjekjet për arrestimin e presidentit pas konfrontimeve në Korenë e Jugut

    Hetuesit jugkoreanë ndalën përpjekjet e tyre për të arrestuar presidentin Yoon Suk Yeol, në Rezidencën e tij, më 03.01.2025, lidhur me shpalljen e gjendjes së luftës – duke u thirrur në shqetësime të sigurisë pas një konfrontimi me ekipin e tij të sigurisë.

    Yoon, i cili veçse është pezulluar nga detyrat e tij të Presidentit pas një votimi të ligjvënësve, do të bëhej Presidenti i parë në detyrë në historinë e Koresë së Jugut, që do të arrestohej nëse do të zbatohej fletarrestimi.

    Presidenti, i cili më 3 dhjetor 2024, njoftoi për shpalljen e gjendjes së luftës – njoftim që tronditi demokracinë e Azisë Lindore dhe për një kohë të shkurtër riktheu në shtet sundimin ushtarak – përballet me shkarkim ose në skenarin më të keq, me dënim me vdekje.

    “Sa i përket ekzekutimit të fletarrestimit sot, u vendos se ekzekutimi do të ishte i pamundur për shkak të përplasjes së vazhdueshme.” – tha përmes një deklarate Zyra për Hetimin e Korrupsionit, që po heton Yoonin lidhur me vendimin e tij për gjendjen e luftës.

    “Shqetësimet për sigurinë e personelit në terren çuan deri te ndalja e vendimit” për përpjekjet për arrestim – u tha në deklaratë, ku u shtua se ka pasur konfrontim me Shërbimin Presidencial të Sigurisë së Yoonit dhe njësisë së tij ushtarake.

    Afati për zbatimin e fletarrestimit është të hënën, teksa Yoon më herët gjatë kësaj jave tha se do të “luftojë” me autoritetet që duan ta marrin atë në pyetje.

    Hetuesit e Zyrës për Hetimin e Korrupsionit, përfshirë prokurorin e lartë, Lee Dae-hwan, më herët u lanë që të kalonin kordonin e sigurisë dhe hynë në Rezidencë, në përpjekje për të zbatuar fletarrestimin për Yoonin.

    Por, ushtarët e Shërbimit Presidencial të Sigurisë më pas u përfshin “në konfrontim me Zyrën për Hetimin e Korrupsionit në Rezidencën presidenciale.” – tha për AFP-në një anëtar i Shtabit të Përgjithshëm të Seulit.

    Shërbimi i Sigurisë së Yoonit, që e mbron ende atë si President i vendit, edhe më herët kishte bllokuar përpjekjet për bastisje policore në Zyrën Presidenciale.

    Presidenti ka injoruar tri thirrje të hetuesve, duke i shtyrë ata që të kërkojnë një fletarrestim.

    Ekipi ligjor i Yoonit ka kritikuar përpjekjet për ekzekutimin e fletarrestimit – duke paralajmëruar se do të ndërmarrin masa të tjera ligjore kundër kësaj.

    “Ekzekutimi i fletarrestimit, që është ilegal dhe i pavlefshëm, realisht është joligjor.” – tha avokati i Yoonit, Yoon Kap-keun.

    Të premten, prokurorët po ashtu ngrenë akuza ndaj dy zyrtarëve të lartë ushtarakë, përfshirë edhe ndaj njërit që u emërua komandant i gjendjes së luftës, duke i akuzuar për kryengritje – raportoi Yonhap. Që të dy veçse janë në paraburgim.

    Dhjetëra autobusë të Policisë dhe qindra policë janë parë në qendër të Seulit. Afër 2.700 policë u dislokuan në zonë për të ndaluar përleshjet – raportoi Yonhap, pasi mbështetësit e Yoonit u përballën me protestuesit kundër tij një ditë më parë.

    Mediat jugkoreane kanë raportuar se hetuesit dëshironin të arrestonin Yoonin dhe ta dërgonin atë në zyrat e tyre për ta marrë në pyetje.

    Pas kësaj, ai mund të dërgohej në mbajtje për 48 orë. Hetuesit më pas do të duhej të kërkonin një tjetër vendim të Gjykatës, për ta mbajtur atë në paraburgim.

    Yoon, po ashtu, përballet me një seancë të ndarë dëgjimore në Gjykatën Kushtetuese, e cila do të konfirmojë apo do të refuzojë votimin në Parlament, për shkarkimin e Presidentit.

    Në deklarimet e rralla të bëra lidhur me situatën politike në Jug, media shtetërore e Koresë së Veriut tha të premten se Seuli gjendet në një “kaos politik”./REL

  • Parashikimi i motit

    Mot me diell dhe vranësira të dendura priten të premten, më 03.01.2025 – sipas Institutit Hidrometeorologjik të Kosovës.

    Mëngjesi pritet të jetë me ngrica dhe kushte për mjegull.

    Pasditja e 03.01.2025 mund të ketë vranësira të intensifikuara dhe reshje bore.

    IHMK-ja njofton se temperaturat minimale do të jenë nga -5 deri në -2 gradë Celsius, kurse maksimalet nga 3 deri në 6.

    Temperatura minimale në Dragash pritet të jetë -5 gradë Celsius, kurse maksimalet, pra 6 gradë Celsius, pritet të jenë në Prizren, Gjakovë dhe Istog.

  • Rastet e vrasjeve që tronditën vendin gjatë vitit 2024

    Viti 2024 nisi me një rast tragjik në Podujevë ku dy të mitur ia morën jetën një 18-vjeçari, e përfundoi me dy të rinj që u vranë në një kafene në qendër të Klinës. Nuk munguan as rastet e vrasjeve të grave nga burrat e tyre.

    Në varrezat e qytetit në Podujevë me 21.01.2024 iu dha lamtumira e fundit Lulzim Fejzullahut, 18-vjeçarit që vdiq pas plagëve të marra nga rrahja që kishte ndodhur një javë më parë.

    Kjo ishte një prej vrasjeve më të rënda që u regjistrua qysh në fillim të vitit 2024, ku të akuzuar përfunduan dy të mitur me inicialet A.A dhe E.K.

    Ata dyshohet se si rezultat i një sherri të nisur ditë më parë, e kishin rrahur viktimin me shkopinj bejsbolli, duke i shkaktuar lëndime që në fund i morën jetën.

    Më 26.03.2024, rreth orës 13:53, në lagjen Kolovicë të Prishtinës, policia do merrte informacion për të shtëna më armë, ku i plagosur kishte mbetur Naim Berisha.

    Por, kjo ngjarje nuk do përfundonte me kaq, pasi në orët e mbrëmjes të po asaj dite do të qëlloheshin me armë dy persona, njëri prej tyre vdiq atë natë kurse viktima e dytë një grua, qytetare e rastit, që po qëndronte në veturë pranë shëpisë së saj ndërroi jetë një ditë më pas në QKUK.

    Aksidentale nuk do ishte rasti i radhës, që gjithashtu pati për viktimë një grua të re në moshë.

    Rasti tronditës ku viktimë ishte 21 vjeçarja Erona Cokli, ndodhi në Qendrën për Punë Sociale në Ferizaj, ku dorasi është ish-bashkëshorti i viktimës, Valon Aliu, që u arrestua e dërgua në mbajtje.

    Rasti nxiti reagime të ashpra nga presidentja e vendit Vjosa Osmani, kryeministri Kurti, ministrja e Drejtësisë Albulena Haxhiu dhe ai Punëve të Brendshme, Xhelal Sveçla, të cilët e dënuan aktin.

    E pikërisht në atë muaj, deri sa po dënohej vrasja e 21-vjeçares, një vrasje tjetër do trondiste vendin.

    Kësaj radhe në Pejë, përsëri nga bashkëshorti në banesën e tyre në rrugën “Bill Clinton” u vra një grua. Jetën e Gjyljeta Ukellës e mori burri i saj Edmond Lajqi me një plumb në kokë.

    I akuzuari, kishte edhe një dënim për dhunë në familje në vitin 2021. Arsyejet ishin mosmarrëveshjet familjare ndërkaq, gjersa i njëjti kishte një aktgjykim për dhunë në familje gjatë vitit 2021.

    Kolektivi për Mendim dhe Veprim Feminist, pas vrasjes në Pejë, kanë protestuar në Forumin për Gratë, Paqen dhe Sigurinë, që po mbahej nën organizimin e presidentes Vjosa Osmani.

    Përmes një baneri gjigant, ata kanë kërkuar të anulohet ky forum, derisa në Kosovë po vriten gratë.

    Më 20.09.2024, një burrë u vra nga një një grua në Prishtinë.

    Një 56-vjeçare vrau kunatin e saj me të cilin jetonin në një shtëpi, shkaku i problemeve familjare, dhe ishte dorëzuar menjëherë në polici.

    I vrarë mbeti edhe një person në lagjën “Aktash” dhe 5 të tjerë të plagosur, shkak si një mosmarrëveshje më herët mes dy grupeve të njohura nga organet e rendit.

    Rastet e vrasjeve brenda familjes nuk do të përfundonin me rastin që ndodhi në Kodrën e Triamve, pasi që më 27.10.2024 u regjistrua një tjetër rast i rëndë.

    Vëllai do të vriste vëllain me thikë, në incidentin që ndodhi në rrugën “Tirana” të kryeqytetit.

    Policia por edhe familja thanë se nuk i dinë ende arsyejet e kësaj vrasje andaj kërkuan që të pritet një raport i organeve të rendit.

    Në rrugën “Mërgimtarët e Gjilanit”, në Gjilan, më 07.11.2024, Sokol Osmani do të ekzekutohej, rast për të cilin u arrestuan Valmir Salihu dhe Florian Mitev nga ky qytet.

    Kurse nata e 15.11.2024 do të ishte fatale për dy të rinj në Klinë, që po qëndëronin në një kafene në qender të qytetit.

    Rexhep dhe Albison Shlivova, 23 dhe 21-vjeçar, u qëlluan për vdekje nga 19-vjeçari Jon Hoti.

    Të gjithë ishin të nga i njëjti fshat, dhe kishin pasur një konfikt disa ditë më parë para se të ndodhte ngjarja.

    Përgjatë vitit 2024, policia bëri angazhime të shtuara në reduktimin e armëve të zjarrit në duart e kosovarëve, por që megjithatë, rezultuan me raste të shumta që përfunduan me fatalitet./Dukagjini