Ballina

Autor: Kallxo

  • Dhuna në familje – Viktima dërgohet në Strehimore bashkë me fëmijët

    Një grua ka raportuar në Polici se burri i dyshuar ushtron në vazhdimësi dhunë psiqike ndaj saj.

    Policia ka njoftuar në Raportin 24-orësh se rasti ka ndodhur në Pejë, më 28.01.2025, rreth orës 12:30.

    “Ankuesja femër kosovare ka raportuar se i dyshuari mashkull kosovar në vazhdimësi i shkakton dhunë psiqike. Rasti në procedurë hetimore”.

    Një rast tjetër i dhunës në familje është raportuar në Malishevë, më 28.01.2025, rreth orës 12:00.

    Policia bën të ditur se viktima grua është sulmuar fizikisht dhe se e njëjta ka pranuar tretman mjekësor.

    “Ankuesja femër kosovare ka raportuar se ishte sulmuar fizikisht nga i dyshuari mashkull kosovar. Viktima nuk ka pranuar tretman mjekësor dhe e njëjta është dërguar në Strehimore bashkë me fëmijët. I dyshuari pas intervistimit, me vendim të Prokurorit, lirohet në procedurë të rregullt.” – thuhet në Raportin 24-orësh të Policisë.

  • Moti të mërkurën në Kosovë

    Instituti Hidrometeorologjik i Kosovës ka njoftuar se të mërkurën, më 29.01.2025, moti do të jetë kryesisht i vranët dhe me riga shiu.

    Sipas njoftimit temperaturat minimale pritet të lëvizin ndërmjet 3°C dhe 5°C, ndërsa maksimalet e ditës do të lëvizin ndërmjet 9°C deri në 11°C.

    “Do të fryjë erë nga jugperëndimi me shpejtësi 1-5m/s.” – thuhet në njoftim.

  • Kryeministri i Serbisë jep dorëheqje

    Kryeministri i Serbisë, Millosh Vuçeviq njoftoi të martën se jep dorëheqje nga posti.

    Dorëheqja vjen pas valës së protestave që kanë përfshirë Serbinë për më shumë se dy muaj – raporton Radio Evropa e Lirë.

    Mijëra studentë dhe qytetarë të tjerë kërkojnë përgjegjësi penale dhe politike për tragjedinë në qytetin e Novi Sadit, ku më 1 nëntor të vitit të kaluar 15 persona humbën jetën nga shembja e strehës në Stacionin hekurudhor.

    Presidenti i Serbisë, Aleksandër Vuçiq tha një ditë më herët se të gjitha kërkesat e tyre janë plotësuar.

    Gjatë atij fjalimi ai kërkoi edhe ristrukturimin e Qeverisë së Serbisë, në krye të së cilës Vuçeviq ishte nga maji i vitit 2024.

    Çka tash?

    Neni 132 i Kushtetutës së Serbisë thotë se Kryeministri e paraqet dorëheqjen te Kryetari i Kuvendit dhe e njofton njëkohësisht Presidentin e Republikës dhe publikun për vendimin e tij.

    Kuvendi, në seancën e parë të radhës, konstaton dorëheqjen e Kryeministrit.

    Mandati i Qeverisë përfundon në ditën e konfirmimit të dorëheqjes së kryeministrit.

    Pasi që Kuvendi ta konfirmojë dorëheqjen e Kryeministrit, Presidenti i Republikës është i detyruar të fillojë procedurën për zgjedhjen e Qeverisë së re.

    Nëse Kuvendi nuk arrin të zgjedhë Qeverinë e re brenda 30 ditëve nga data e dorëheqjes së Kryeministrit, Presidenti i Republikës është i detyruar të shpërndajë Kuvendin dhe të shpallë Zgjedhjet e reja.

    Kërkesat e studentëve

    Kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e Stacionit hekurudhor të Novi Sadit, për të përcaktuar përgjegjësinë për aksidentin e 1 nëntorit 2024.

    Ata kërkojnë gjithashtu që sulmuesit e demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.

    Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për Universitetet./REL

  • Arrestohet i dyshuari për largimin e fëmijëve nga nëna e tyre

    Një person është arrestuar, nën dyshimin se ka larguar nga shtëpia fëmijët e tij, derisa nëna e tyre ishte në punë – ka njoftuar Policia në Raportin 24-orësh, më 28.01.2025.

    Policia bën të ditur se rasti ka ndodhur në Gjakovë, më 26.01.2025, rreth orës 22:00.

    Policia ka njoftuar se i dyshuari, pas intervistimit, është liruar në procedurë të rregullt.

    Në Raportin 24-orësh të Policisë së Kosovës rasti është regjistruar si: “dhunë në familje”.

  • Trump thotë se Microsoft-i është në bisedime për blerjen e TikTok-ut

    Presidenti amerikan, Donald Trump u tha gazetarëve se kompania Microsoft është në bisedime për blerjen e TikTok-ut – duke shtuar se do të dëshironte të shihte një betejë ofertash për këtë aplikacion.

    Kompania e teknologjisë, Microsoft nuk ka komentuar për këtë pohim të Trumpit. As TikTok e as ByteDance, që ka pronësi aplikacionin, nuk kanë komentuar po ashtu.

    TikTok, që ka afër 170 milionë përdorues amerikanë, përkohësisht u ndalua para se Ligji që i kërkon pronarit kinez ByteDance ta shiste ose do të ndalohej në Shtetet e Bashkuara të hynte në fuqi më 19.01.2025.

    Pasi mori mandatin e Presidentit më 20.01.2025, Trump nënshkroi një Urdhër Ekzekutiv duke kërkuar shtyrjen për 75 ditë të zbatimit të Ligjit, i cili thirret në shqetësimet për sigurinë kombëtare.

    Trump tha javën e kaluar se ai ishte duke biseduar me disa njerëz lidhur me blerjen e TikTok-ut dhe do të dëshironte që Vendimi për të ardhmen e aplikacionit popullor të merrej brenda 30 ditësh.

    Presidenti amerikan ka thënë më herët se është i hapur që miliarderi Elon Musk ta blejë aplikacionin, nëse pronari i Tesla-s dëshiron ta bëjë një gjë të tillë. Megjithatë, Musk nuk ka komentuar publikisht këtë deklaratë të presidentit Trump.

    Kjo është hera e dytë që Microsoft-i lidhet me blerjen e mundshme të TikTok-ut.

    Gjatë mandatit të parë si President, Trump kishte kërkuar që TikTok-u të ndante versionin për SHBA-në nga ByteDance – duke u thirrur në shqetësime të sigurisë kombëtare.

    Më 2020 Microsoft ishte ofertuesi kryesor, por bisedimet për blerjen e aplikacionit dështuan./REL