Ballina

Autor: Kallxo

  • Video-incizimi i rastit të plagosjes së Pajtim Gashit, mbrojtja e të akuzuarit Shkumbin Sekiraqa kërkon të mos pranohet si provë

    Në gjykimin ndaj Shkumbin Sekiraqës lidhur me akuzën për plagosjen e Pajtim Gashit në mars të vitit 2024, në seancën e së mërkurës më 08.01.2025 janë administruar provat materiale.

    Shkumbin Sekiraqa, djali i Salih Sekiraqës, akuzohet për tri vepra penale: “tentim vrasje”, “armëmbajtje pa leje” e “shkaktim i rrezikut të përgjithshëm”. Përveç tij i përfshirë në këtë rast është edhe M. H., i cili nga Prokuroria po akuzohet për “ndihmë pas kryerjes së veprës penale”.

    Në seancë u paraqit videoincizimi i ngjarjes kritike, e për të cilën prokurorja Bukurije Gjonbalaj tha se shihen i akuzuari Shkumbin Sekiraqa dhe personi NN duke e goditur të dëmtuarin Pajtim Gashi.

    “Fillimisht shihet i akuzuari dhe personi NN, shihen duke e goditur të dëmtuarin me shqelma. Pastaj i akuzuari Shkumbin Sekiraqa shtien një herë me armë në drejtim të dëmtuarit Pajtim Gashi. Pastaj largohet i dëmtuari, ndërsa i akuzuari Shkumbin largohet me veturën Audi ngjyrë të kuqe A7. Ndërsa, personi tjetër me veturën ‘Pik-up’ ngjyrë e bardhë.” – tha prokurorja Gjonbalaj gjatë shfaqjes së video-incizimit.

    “Është e vërtetë se në video-incizim dëgjohet vetëm një e shtënë. Video-incizmi është hudh nga ‘INSAJDERI’. Mirëpo, nga raporti i ekspertimit nga vendi i ngjarjes janë gjetur shtatë (7) gëzhoja. Ky incizim i cili u pa sot vërtetohet edhe me provat tjera, të cilat janë siguruar gjatë hetimeve, si: deklaratat e dëshmitarëve, deklarata e të dëmtuarit, kartela e regjistrimeve”.

    Lidhur me këtë video-incizim mbrojtësi i të akuzuarit Sekiraqa, avokati Naser Sopjani propozoi që kjo provë të shpallet e papranueshme.

    “Sa i përket video-incizimit që e shikuam sot, ashtu siç deklaroi edhe vetë Prokurorja ky incizim nuk është siguruar përmes urdhëresës së ligjshme. I bie që është marrë pa urdhër. Është siguruar përmes portaleve, të cilat nuk dihet se ku e kanë burimin. E, si e tillë e vlerësojmë që kjo CD duhet të veçohet nga shkresat e lëndës si provë e papranueshme.” – tha avokati Sopjani.

    Ndërsa, prokurorja Gjonbalaj tha se Gjykata video-incizimin e ka marrë si provë të pranueshme, pasi i njëjti ndërlidhet me provat tjera të marra gjatë hetimit.

    Ndërkaq lidhur me këtë Trupi Gjykues mori Aktvendim duke refuzuar propozimin e avokatit Sopjani, me arsyetimin se CD-ja e cila paraqet pamjet nga ngjarja e datës 04.03.2024, e cila është objekt i kësaj çështjeje penale dhe se këto pamje Prokuroria i ka siguruar nga portali “INSAJDERI”, të cilat janë shfaqur publikisht dhe në rrjete sociale. Dhe se nuk ka qenë e nevojshme që për sigurimin e këtyre pamjeve, të lëshohet urdhër i veçantë.

    Tutje, avokati Sopjani propozoi që në cilësi të dëshmitarit të dëgjohet Salih Sekiraqa, babai i të akuzuarit Shkumbin Sekiraqa, me arsyetimin se i njëjti me dëshminë e tij do t’i ndihmojë Trupit Gjykues për ta kuptuar mënyrën se si është kryer vepra penale.

    Trupi Gjykues këtë propozim të avokatit Sopjani e refuzoi duke vlerësuar se dëshmitari i propozuar është i panevojshëm për ndriçimin e kësaj çështjeje penale.

    Me kërkesë të mbrojtësit të të akuzuarit Shkumbin Sekiraqa, avokatit Naser Sopjani, seanca e sotme, më 08.01.2025, u ndërpre dhe u caktua e radhës për në muajin shkurt 2025.

    Paraprakisht në seancë ka dhënë dëshminë dëshmitari Skender Hoti, i cili tha se ditën kritike ka qenë duke punuar në objektin “Premtimi” në lokalin e “Alba Market” – duke vendosur qeramikë.

    “Deri sa kam qenë brenda lokalit duke punuar, nga dritarja kam parë dy vetura njëra ‘Audi’ dhe tjetra ‘Pik-up’. Unë kam qenë jashtë në atë moment, pasi po zbraznim materialin. Aty kam vërejtur tre persona afër njëri-tjetrit duke biseduar. Njëri nga ta ka qenë Pajtim Gashi, ndërsa dy të tjerë nuk i kam njohur. S’i kam parë kurrë.” – tha dëshmitari Hoti.

    Dëshmitari Hoti tha se njëri nga personat kishte qenë zeshkan dhe më i plotë, ndërsa tjetri më i gjatë e i hollë dhe se nuk kishte arritur ta dëgjonte bisedën e tyre.

    Dëshmitari Hoti, tutje, tha se pasi kishte hyrë në lokal kishte dëgjuar të shtënat me armë, mirëpo deklaroi se nuk e di sa të shtëna ka pasur.

    “Pas të shtënave kam shikuar jashtë dhe e kam parë Pajtimin duke shkuar drejt zyrës së tij, ndërsa dy personat e tjerë kanë hyrë në veturë dhe janë larguar. Krejt ngjarja ka ndodhur për 1-2 minuta.” – deklaroi dëshmitari Skender Hoti.

    Ky rast po trajtohet nga Trupi Gjykues, i përbërë nga: gjyqtari Naser Foniqi – kryetar, Gëzim Ademi dhe Gazmend Bahtiri – anëtarë.

    I akuzuari M. H. nuk ka pranuar fajësinë; Shkumbin Sekiraqa, i akuzuar për tri vepra penale, nuk e ka pranuar fajësinë.

    Seanca ndaj të akuzuarit Shkumbin Sekiraqa - 08.01.-2025 - FOTO Adile Agushi - KALLXO.com
    Seanca ndaj të akuzuarit Shkumbin Sekiraqa – më 08.01.-2025 – FOTO: Adile Agushi – KALLXO.com

    Dosja e Prokurorisë

    Shkumbin Sekiraqa akuzohet nga Prokuroria e Prishtinës se më 04.03.2024 kishte tentuar ta privojë nga jeta Pajtim Gashin. Ky i fundit mbeti i plagosur.

    “Rreth orës 10:00 në rrugën “Bedri Shala” në Prishtinë, derisa ishte duke lëvizur me një veturë të tipit “Audi” pronë e të pandehurit tjetër M. H., ishte takuar me personin NN i cili lëvizte me një “Pick-up”. I pandehuri Shkumbin Sekiraqa për arsye të panjohura me dashje, me qëllim që të privojë nga jeta të dëmtuarin Pajtim Gashi pas bisedës me NN personin, i drejtohet me fjalë ‘Paja shoq, a po më njeh mua!?’, ku më pas e sulmojnë fizikisht.” – përshkruhet ngjarja e cila ndodhi më 04.03.2024.

    Dosja e Prokurorisë përshkruan edhe se Shkumbin Sekiraqa kishte nxjerrë armën e zjarrit, kishte shtënë në drejtim të Pajtim Gashit, e më pas e kishte goditur në kokë me kondak të armës.

    “Me këto veprime i shkakton lëndime në kokë dhe një plagë në këmbën e djathtë. I dëmtuari (Pajtim Gashi) ka arritur të largohet nga vendi i ngjarjes. I pandehuri (Shkumbin Sekiraqa) ka vazhduar që të gjuajë në drejtim të tij.” – përshkruhet tutje në aktakuzën që ka siguruar KALLXO.com.

    Me këto veprime Shkumbin Sekiraqa – sipas Prokurorisë – ka kryer veprat penale: “vrasje në tentativë”, “shkaktim i rrezikut të përgjithshëm” dhe “armëmbajtje pa leje”.

    Shkumbin Sekiraqa në deklarimin e tij në Polici kishte mohuar përfshirjen e tij në rast.

    “Çka kam thënë në Polici është e vërtetë dhe nuk kam tjetër çka të shtoj. Tani nuk dua të deklarohem më. Në Polici ka deklaruar se nuk ka lidhje me rastin që ka ndodhur më 04.03.2024 dhe nuk e njeh të dëmtuarin Pajtim Gashi.” – thuhet tutje në Dosjen e Prokurorisë.

    E Pajtim Gashi, i cili mbeti i plagosur në mars 2024, kishte deklaruar se në datën e lartpërmendur ishte në afërsi të një biznesi familjar.

    “Ka ardhur një person me veturë të kuqe. Personi më është ofru dhe më ka thënë ‘Pse po më këqyrë?’. Ka filluar të më shajë me fjalë banale “Çka k… po më këqyr!”. I kam thënë ‘Nuk jam kah të këqyri, o vlla! Po shko rrugës tande. Ai më ka thënë se ‘Je ka më këqyr shtremtë!’. Pas kësaj ka vazhdu me veturë kah objekti teposhtë. Vetura e ka pasur derën e hapur dhe edhe pse ishte duke vozitur ai e mbante derën çelë. Mandej, pasi që është largu diku 15 metra, e ka ndalë derën, ka dalë nga vetura, është nisur në drejtim të tij; nuk i ka parë asgjë në dorë dhe ka filluar prapë të shajë.” – ka shpjeguar Pajtim Gashi në Prokurori ngjarjen e marsit.

    Gashi kishte treguar për sulmin e më pas edhe për të shtënat me armë.

    “Me sa di ai ka shtënë 5-6 herë. Shkumbin Sekiraqën nuk e njeh, nuk e ka njohur më parë dhe nuk ka pasur asnjëherë probleme me të. Në Polici nuk ka arritur që ta identifikojë Shkumbin Sekiraqën, Pajtim Gashi.” – thuhet tutje në Dosje.

    Si i bashkakuzuar në këtë rast është edhe M. H., i cili ngarkohet se i ka dhënë ndihmë Shkumbin Sekiraqës, pasi është kryer vepra penale duke e fshehur në garazhën e tij veturën Audi A7 e që në deklaratën e dhënë në Polici kishte thënë se të njëjtën veturë e ka shitur.

    Ky rast del të jetë si fillesë e problemit mes familjes Gashi e Sekiraqa, pasi më 01.09.2024 kishte pasur shkëmbim me armë të zjarrit mes disa personave, ku një person kishte ndërruar jetë e pesë të tjerë kishin mbetur të plagosur.

    Si i plagosur në rastin e datës 01.09.2024 është edhe babai i Shkumbin Sekiraqës, Salih Sekiraqa.

    Raportimet e KALLXO.com – LINK 

     

     

  • Dy të dyshuarve për sulmin terrorist në Ibër-Lepenc edhe dy muaj paraburgim

    Gjykata e Prishtinës ua ka vazhduar masën e paraburgimit edhe për 2 muaj tjerë dy të pandehurve, Dragisha Viqentijeviq dhe Jovan Viqentijeviq, të dyshuar për sulmin terrorist të kryer më 29.11.2024 në kanalin e ujit të Ibër-Lepencit, në zonën e Zubin Potokut.

    Lajmin për vazhdimin e masës së paraburgimit e ka konfirmuar për KALLXO.com, zëdhënësja e Gjykatës së Prishtinës, Mirlinda Gashi.

    “Ju njoftojmë se pas Kërkesës së Prokurorisë Speciale të Republikës së Kosovës të datës 23.12.2014 për vazhdimin e masës së paraburgimit në çështjen penale kundër të pandehurve J. V. dhe D. V., Gjykata Themelore në Prishtinë – Departamenti Special, më 27.12.2024, ka marrë Aktvendim dhe ka aprovuar Kërkesën e PSRK-së, ashtu që masa e paraburgimit të pandehurve J. V. dhe D. V., iu vazhdohet në kohëzgjatje prej 2 (dy) muaj, për secilin.” – thuhet në Vendimin e Gjykatës së Prishtinës.

    Sulmi terrorist

    Shpërthimi që ndodhi më 29.11.2024 në kanalin e ujit të Ibër-Lepencit, në fshatin Varagë të Komunës së Zubin Potokut ishte cilësuar nga Qeveria e Kosovës si “sulm terrorist”.

    Kryeministri i Kosovës, Albin Kurti kishte thënë se sulmi është kryer nga grupe terroriste.

    “Unë nuk i kam emrat e atyre që e kanë vënë detonimin. Por, unë e di një gjë, se elemente të tilla kriminale, qofshin edhe zyrtarisht anëtarë të Mbrojtjes Civile, Brigadës Civile, ata e kanë mbështetjen dhe dirigjimin nga Beogradi zyrtar.” – kishte thënë Kurti.

    Presidenti i Serbisë, Aleksandër Vuçiq e ka mohuar që Serbia ka lidhje me sulmin në kanalin Ibër-Lepenc në Komunën e Zubin Potokut.

    Për sulmin në kanalin e Ibër-Lepencit, drejtori i përgjithshëm i Policisë së Kosovës, Gazmend Hoxha ka thënë se është përdorur një sasi e konsiderueshme e eksplozivit, nga 15 deri në 20 kilogramë, i cili dyshohet se është aktivizuar me detonatorë mekanikë, përmes fitilit ndezës me djegie të ngadalshme.

    “Si pasojë e këtij sulmi janë shkaktuar dëme të mëdha materiale në kanalin e Ibër-Lepencit, si pasojë e të cilave është ndërprerë furnizimi me ujë të pijshëm për shumë zona dhe lokalitete, si dhe duke rrezikuar tej mase edhe furnizimin me energji elektrike apo edhe rrezikun me pasoja më të rënda për avari në Sistemin energjetik të Republikës së Kosovës.” – është shprehur Hoxha.

    Pas shpërthimit, Këshilli i Sigurisë së Kosovës ka mbajtur mbledhje të jashtëzakonshme më 30.11.2024, në ora 01:30.

    Në mbledhje, sipas një komunikate për media, u fol për ndërlidhjen e mundshme të rastit të djeshëm me një sulm të ngjashëm rus në Ukrainë javën e kaluar. Në këtë mbledhje janë diskutuar edhe masat emergjente që janë marrë dhe po merren për të zbutur pasojat e sulmit e për të garantuar sigurinë e infrastrukturës kritike në vend.

    Ndërkohë, ekipe të Misionit Paqeruajtës të NATO-s në Kosovë – KFOR, kanë dalë më 30.11.2024 në vendin e ngjarjes ku ka ndodhur shpërthimi.

    Ministrja e Ekonomisë, Artane Rizvanolli njoftoi më 30.11.2024 se pavarësisht dëmtimit që shpërthimi shkaktoi në kanalin e Ibër-Lepencit, kanë arritur që të sigurojnë energji elektrike për vendin përmes vendosjes së gjashtë gypave të përkohshëm, me kapacitet të mjaftueshëm për të siguruar ujë për ftohjen e termocentralit “Kosova B”.

    Këtë sulm e kanë dënuar edhe nga Shtetet e Bashkuara të Amerikës dhe nga Bashkimi Europian. Edhe Ambasadori i Gjermanisë në Kosovës, Jorn Rohde e ka dënuar, po ashtu, shpërthimin në Zubin Potok.

    Arrestimet në lidhje me sulmin në Ibër-Lepenc

    Prokuroria Speciale e Republikës së Kosovës ka kryer disa kontrolle në lokacione të ndryshme, gjatë të cilave janë gjetur dhe sekuestruar armë të ndryshme e pajisje tjera, lidhur me rastin e ndodhur më 29.11.2024 në fshatin Varagë të Komunës së Zubin Potokut, respektivisht në pjesën e kanalit të “Ibër-Lepencit”.

    “Me këtë rast në Stacionin policor janë shoqëruar 10 persona të dyshuar për veprat penale: “rrezikimi i rendit kushtetues me shkatërrimin apo dëmtimin e instalimeve dhe pajisjeve publike” nga Neni 122; lidhur me veprën penale “kryerja e veprës terroriste” nga Neni 129 Par. 1 dhe Neni 128 Par. 1 Nënpar. 1.8 të KPRK; “mbajtja në pronësi, kontroll ose posedim të pa autorizuar të armëve” nga Neni 366 Par. 2 lidhur me Par. 1  të KPRK.” – thuhet në komunikatën e Prokurorisë Speciale të Republikës së Kosovës.

    Prokuroria Speciale ka thënë se dy të shoqëruarve iu është caktuar masa e ndalimit.

    “Me vendim të Prokurorit, dy prej tyre, me inicialet D. V. dhe D. M., nga komuniteti serb, janë ndaluar. Për personin D. V. është parashtruar kërkesë për caktimin e masës së paraburgimit, e cila është caktuar nga Gjykata për 1 (një) muaj, kurse i dyshuari D. M. nga Prokuroria është liruar në procedurë të rregullt.” – thuhet në komunikatën e Prokurorisë Speciale të Republikës së Kosovës.

    Gjykata e Prishtinës ka caktuar masën e paraburgimit prej një muaji ndaj Dragisha Viqentijeviqit, i arrestuar nën dyshimin se ka marrë pjesë në sulmin terrorist. Caktimin e masës së paraburgimit e ka konfirmuar mbrojtësi i të pandehurit, avokati Millosh Delloviq, i cili ka thënë se klienti i tij nuk e ka pranuar fajësinë.

    Sipas Prokurorisë, me veprimet e tij Viqentijeviq po dyshohet se kreu veprën penale të rrezikimit të rendit kushtetues me shkatërrimin apo dëmtimin e instalimeve dhe pajisjeve publike. Gjatë bastisjes, në shtëpinë e tij, u gjetën edhe armë e municion, për çka Prokuroria po e ndjek edhe për “armëmbajtje pa leje”.

    Ndërkaq, më 02.12.2024, Policia e Kosovës bëri të ditur se më 01.02.2024 ka arrestuar edhe një person të dyshuar për sulmin në kanalin e Ibër-Lepencit.

    Sipas Policisë, i arrestuar është personi me inicialet J. V., nën dyshimin se mund të ketë pasur rol të rëndësishëm në kuadër të grupit përgjegjës për rastin e sulmit terrorist në kanalin e Ibër-Lepencit.

    “Në vazhdimësi të hetimeve lidhur me rastin e sulmit terrorist ndaj infrastrukturës kritike, por edhe rasteve paraprake, nga njësitë relevante hetimore, në bashkëpunim edhe me njësitë e tjera policore, më 01.12.2024 në orët e mbrëmjes, është arrestuar edhe një i dyshuar J. V., nën dyshimin që mund të ketë patur rol të rëndësishëm në kuadër të grupit përgjegjës për rastin e sulmit terrorist ndaj infrastrukturës kritike.” – thuhet në njoftimin e Policisë së Kosovës.

    Po ashtu, Policia ka bërë të ditur se në bashkëpunim me Prokurorinë Speciale të Kosovës është kontrolluar shtëpia e të dyshuarit J.V., në të cilën janë gjetur e sekuestruar si dëshmi: katër granate dore, një pushkë gjuetie, mbi pesëqind copë municion të kalibrave të ndryshëm, dy karikatorë të armës AK-47, një karikator i pushkës së gjatë, një radiolidhje, një palë dylbi, një kamerë kamufluese, uniforma ushtarake dhe dokumente të ndryshme.

     

     

  • Franca thotë se BE-ja nuk do të tolerojë sulme në kufijtë e saj

    Ministri i Jashtëm i Francës tha të mërkurën se Bashkimi Evropian nuk do t’i lejojë vendet e tjera të sulmojnë kufijtë e tij sovran – duke iu përgjigjur kësisoj komenteve të presidentit të zgjedhur amerikan Donald Trump për të marrë nën kontroll Grenlandën.

    Presidenti i zgjedhur nuk përjashtoi përdorimin e forcës ushtarake apo veprimeve ekonomike për të marrë nën kontroll Kanalin e Panamasë dhe Grenlandën – duke thënë se kontrolli amerikan i të dyjave është jetik për sigurinë kombëtare të Shteteve të Bashkuara.

    Ministri i Jashtëm francez Jean-Noel Barrot tha se nuk besonte që Shtetet e Bashkuara do të pushtonin ishullin e madh në Arktik, që është pjesë e Danimarkës për më shumë se 600 vjet.

    “Qartazi nuk ka dyshim që Bashkimi Evropian do t’i lejonte kombet e tjera të botës të sulmonin kufijtë e tij sovranë, kushdo qofshin ata.” – tha ai për radion France Inter. “Ne jemi një kontinent i fortë.” – shtoi ai.

    Komentet e zotit Trump përvijuan më tej një agjendë ekspansioniste, dy javë para se të marrë detyrën më 20 janar në Uashington.

    “Nëse po më pyesni nëse unë mendoj se Shtetet e Bashkuara do të pushtojnë Grenlandën, përgjigja ime është ‘Jo.’. Por, a kemi hyrë në një periudhë kohore kur flitet për mbijetesën e më të fortit? Atëherë përgjigja ime është ‘Po.’.” – tha ministri Barrot.

    Ai tha se BE-ja nuk duhet të lejojë veten të frikësohet ose të shqetësohet tepër, por duhet të zgjohet dhe të forcohet./Marrë nga Reuters/VoA

  • Rritja e inflacionit në Gjermani

    Vala e madhe e rritjes së çmimeve në Gjermani është thyer, por norma e inflacionit është rritur kohët e fundit. Cilat janë shkaqet?

    Inflacioni në Gjermani mbetet më i lartë sesa është pritur. Me një normë prej 2.6%, dhjetori solli rritjen e tretë radhazi dhe normën e dytë më të lartë të inflacionit në vitin 2024 – njoftoi Zyra Federale e Statistikave në Gjermani. Ekonomistët aktualisht nuk presin një ulje të ndjeshme të çmimeve të konsumit, por besojnë se nuk ka gjasa një valë e re e madhe e rritjes së çmimeve.

    “Në janar inflacioni mund të mbetet në një nivel të ngjashëm, për shkak të çmimeve më të larta të karburanteve dhe shërbimeve të sigurimit.” – parashikon ekonomisti i Commerzbank Jörg Krämer. Ai shton: “Problemi i inflacionit nuk është zgjidhur ende.”

    Michael Heise, ekonomist në HQ Trust, nuk sheh ndonjë lehtësim për konsumatorët as në janar. Rritja e taksës së dioksidit të karbonit, rritja e çmimit të biletës së transportit publik, kostot në rritje të sigurimeve shëndetësore dhe shërbimeve ekonomike mund të rezultojnë me një rritje të çmimeve prej rreth 2.5% – thotë ai.

    Inflacioni vjetor 2.2%

    Pavarësisht rritjes së infoacionit në dhjetor, inflacioni në Gjermani ka rënë dukshëm në krahasim me vitet e kaluara. Sipas të dhënave statistikore, për vitin 2024 mesatarisht çmimet e mallrave dhe shërbimeve janë rritur me 2.2% – krahasuar me një vit më parë. Sa për krahasim, norma e inflacionit në vitin 2023 ishte 5.9%, ndërsa në vitin 2022 ishte 6.9%. Si rezultat i sulmit rus në Ukrainë në shkurt 2022 çmimet e produkteve të energjisë u rritën ndjeshëm. Edhe në vitin 2021 inflacioni ishte dukshëm më i lartë, me një normë mesatare prej 3.1%.

    Inflacioni mbi 2%

    Ekonomistët presin që inflacioni të mbetet mbi nivelin e 2% gjatë vitit 2025. Disa ekspertë shohin më pak hapësirë ​​për Bankën Qendrore Evropiane (BQE) për të ulur normat e interesit. Megjithatë, asnjë ekspert nuk pret një valë të re rritjesh të çmimeve, si ato në 2022 dhe 2023, kur norma e inflacionit në ekonominë më të madhe të Evropës arriti në pothuajse 9%. Në vend të kësaj, norma vjetore e inflacionit për vitin 2025 pritet të jetë në nivelin e vitit 2024, e disa ekspertë thonë se ajo mund të jetë rreth 2.1%.

    Normat më të larta të inflacionit ulin fuqinë blerëse të konsumatorëve. Inflacioni anulon edhe efektin e rritjes së të ardhurave. Në dhjetor më së shumti janë rritur shërbimet me rreth 4.1%. Ushqimet janë rritur mesatarisht me rreth 2%. Ndërsa, çmimet e karburanteve kanë rënë me 1.7%. Pavarësisht krizës, shumë ekonomistë mendojnë se gjendja do të stabilizohet në masë në vitin 2025./DW

  • Gjykatësja bllokon përkohësisht publikimin e Raportit të prokurorit Smith për Trumpin

    Një gjykatëse federale bllokoi përkohësisht publikimin e Raportit të Prokurorit të Posaçëm Jack Smith mbi hetimet e tij ndaj Presidentit të zgjedhur Donald Trump, ndërkohë që Gjykata e Apelit po shqyrton kërkesën e avokatëve për të mos i publikuar ato.

    Gjykatësja Aileen Cannon e mori vendimin të martën, pas kërkesës urgjente të avokatëve të mbrojtjes për t’ia ndaluar Departamentit të Drejtësisë publikimin e Raportit – një hap që Prokurori Smith tha se mund të bëhej që të premten.

    Çështja po trajtohet në Gjykatën e Apelit në Atlanta.

    Zoti Trump reagoi duke thënë se “Raporti do të jetë i rremë, ashtu siç ishin edhe hetimet e tij”.

    Prokurori i Posaçëm Smith tha të martën se ekipi i tij po finalizonte Raportin mbi dy çështjet që ai hetoi rreth Presidentit të zgjedhur Donald Trump dhe të paktën njëri prej tyre mund të publikohej që të premten.

    Ai e bëri këtë deklaratë si përgjigje ndaj kërkesës së avokatëve të zotit Trump, që i kishin kërkuar Prokurorit të Përgjithshëm Merrick Garland të bllokonte paraprakisht Raportin para se ai të bëhej publik.

    Raporti pritet të përshkruajë gjetjet që çuan në ngritjen e akuzave nga Prokurori Smith për dy Aktpadi të veçanta: atë të marrjes së dokumenteve sekrete dhe dërgimin e tyre në pronën e zotit Trump në Mar-a-Lago, si dhe përpjekjet e ish-Presidentit për të përmbysur rezultatin e Zgjedhjeve presidenciale të vitit 2020 para trazirave të 6 janarit të vitit 2021 në Kapitol.

    Çështja e dokumenteve sekrete, për të cilën u akuzua zoti Trump dhe dy të pandehur të tjerë, u pushua në muajin korrik nga një Gjykatëse që ishte emëruar nga vetë zoti Trump kur ai ishte President. Gjykatësja e pushoi çështjen nën argumentin se emërimi i Prokurorit të Posaçëm Smith ishte bërë në shkelje të ligjit. Ndaj zotit Trump ishte ngritur edhe një Aktpadi tjetër për ndërhyrje në procesin zgjedhor, por akuzat në Aktpadi u kufizuan ndjeshëm pas Vendimit të Gjykatës së Lartë mbi imunitetin e gjerë që gëzojnë Presidentët.

    Ekipi i Prokurorit Smith vendosi t’i pushojë të dyja rastet në nëntor, pas fitores së zotit Trump, duke iu referuar një praktike të hershme të Departamentit të Drejtësisë, sipas së cilës Presidentët që janë duke ushtruar detyrën nuk mund të jenë subjekt i hetimeve federale.

    Avokatët mbrojtës të zotit Trump, përfshirë avokatin Todd Blanche, i cili është emëruar nga ai për të shërbyer si Zëvendësprokuror i Përgjithshëm në Administratën e re, i bënë thirrje Prokurorit të tanishëm të Përgjithshëm Garland përmes një letre, që u bë publike në orët e vona të hënën, që ta bllokonte publikimin e Raportit dhe ta largonte prokurorin Smith “menjëherë”, ose t’ia delegonte vendimin për publikimin e Raportit Prokurorit të ardhshëm të Përgjithshëm.

    Me një gjuhë të ngjashme me sulmet e zotit Trump ndaj prokurorit Smith dhe punës së tij, avokati Blanche i shkruante prokurorit Garland se “publikimi i një Raporti konfidencial, të përgatitur nga një qytetar privat, i cili ka dalë jashtë kontrollit dhe, që në shkelje të Kushtetutës, hiqet si Prokuror, do të ishte një veprim politik i jashtëligjshëm, që synon të dëmtojë presidentin Trump dhe të justifikojë paratë e taksapaguesve, të cilat zoti Smith i shpenzoi në kundërshtim me Kushtetutën për hetimet e tij të dështuara dhe të hedhura tashmë poshtë”.

    Si kundërpërgjigje ndaj kësaj kërkese, ekipi i prokurorit Smith tha të martën se do t’ia dorëzonte Raportin prokurorit Garland në orët e pasdites dhe se pjesa e parë, që ka të bëjë me hetimet mbi dokumentet sekrete, nuk do të bëhej publike para orës 10 të mëngjesit të ditës së premte. Pritshmëria është që të dyja pjesët e Raportit të prokurorit Smith të publikohen në të njëjtën kohë.

    Sipas Rregulloreve të Departamentit të Drejtësisë, prokurorët e posaçëm duhet të dorëzojnë një Raport konfidencial rreth gjetjeve të hetimeve të tyre te Prokurori i Përgjithshëm.

    Prokurori i Përgjithshëm Garland deri më tani i ka publikuar në tërësi Raportet e hartuara nga Prokurorët e Posaçëm të cilët kanë vepruar nën mbikëqyrjen e tij, përfshirë Raportin e prokurorit Robert Hur mbi hetimet për dokumentet sekrete nga koha kur ishte Nënpresident, që iu gjetën në mjediset private presidentit Joe Biden, si dhe Raportin e prokurorit John Durhman mbi hetimet e FBI-së për ndërhyrjet ruse në Zgjedhje./ VOA