Ballina

Autor: Kallxo

  • Perëndimi kërkon të hetohen shkeljet lidhur me shënimin e Ditës Jokushtetuese të Republikës Sërpska

    Komuniteti ndërkombëtar ka bërë thirrje për hetim të çdo shkeljeje të ligjit, lidhur me shënimin e Ditës Jokushtetuese të Republikës Sërpska më 9 janar.

    Ceremonia për shënimin e kësaj Dite Jokushtetuese nis në orën 17:00 në Banjallukë.

    Autoritetet e entitetit të Republikës Sërpska festojnë 9 janarin, datën kur në vitin 1992 në Sarajevë Kuvendi i atëhershëm i popullit serb të Bosnjës dhe Hercegovinës miratoi Deklaratën për shpalljen e Republikës së Popullit Serb të Bosnjës dhe Hercegovinës si një entitet i pavarur brenda Bosnjës dhe Hercegovinës.

    Megjithatë, Gjykata Kushtetuese e Bosnjës dhe Hercegovinës ka vendosur tri herë që kremtimi i 9 janarit si Dita e Republikës Sërpska është antikushtetues.

    Qëllimi i asaj kohe ishte që ky territor i Bosnjës dhe Hercegovinës të bashkohej me Jugosllavinë, e cila po shpërbëhej. Në krye të Republikës së vetëshpallur ishin Radovan Karaxhiq, Bilana Pllavshiq e Momçilo Krajishnik, të cilët janë dënuar për “krime lufte” nga Tribunali i Hagës. Në miratimin e deklaratës nuk kishin marrë pjesë përfaqësuesit e boshnjakëve dhe kroatëve.

    Këta dy popuj e shohin 9 janarin si fillimin e luftës në Bosnjë dhe Hercegovinë, si dhe si fillimin e pastrimit etnik, krimeve të luftës dhe gjenocidit ndaj popullsisë joserbe në territorin e Republikës Sërpska.

    Shtetet e Bashkuara të Amerikës presin që organet e zbatimit të ligjit dhe ato gjyqësore në Bosnjë dhe Hercegovinë të ndërmarrin hapa të shpejtë dhe vendimtarë për të hetuar çdo shkelje ligjore, në lidhje me kremtimin e Ditës Antikushtetuese të Republikës Sërpska më 9 janar – njoftoi Ambasada amerikane përmes një postimi në X.

    Nga Ambasada amerikane kanë thënë gjithashtu se Vendimet e Gjykatës Kushtetuese bazohen në ligj, jo në opinion.

    “Të gjitha entitetet janë të detyruara t’i përmbahen plotësisht Vendimeve të institucioneve të Bosnjës dhe Hercegovinës, përfshirë Vendimet Përfundimtare dhe Detyruese të Gjykatës Kushtetuese. Mosrespektimi i këtyre Vendimeve përbën vepër penale sipas Kodit Penal të Bosnjës dhe Hercegovinës.” – u tha në reagim.

    Delegacioni i Bashkimit Evropian në Bosnjë dhe Hercegovinë, të mërkurën, me rastin e kremtimit të Ditës Antikushtetuese të Republikës Sërpska i bëri thirrje liderëve politikë të këtij entiteti të refuzojnë retorikën provokuese, përfshirë sfidimin e sovranitetit, integritetit territorial dhe tërësisë së vendit.

    “BE thekson detyrimin për të respektuar sovranitetin, integritetin territorial, rendin kushtetues, përfshirë Vendimet e Gjykatës Kushtetuese, si dhe subjektivitetin ndërkombëtar të Bosnjës dhe Hercegovinës.” – u tha në deklaratën e delegacionit të BE-së në Bosnjë e Hercegovinë.

    Përfaqësuesi i Lartë në Bosnjë dhe Hercegovinë, Christian Schmidt kujtoi se kremtimi i 9 janarit si Dita e Republikës Sërpska është një shkelje e qartë dhe e drejtpërdrejtë e zbatimit të Vendimeve Përfundimtare dhe Detyruese të Gjykatës Kushtetuese të Bosnjës dhe Hercegovinës, si dhe Vendimeve të përfaqësuesit të lartë të 1 korrikut të vitit 2023. Ai paralajmëroi se mosrespektimi i Vendimeve të Gjykatës Kushtetuese mund të përbëjë vepër penale – sipas Kodit Penal të Bosnjës dhe Hercegovinës.

    Schmidt shtoi se është përgjegjësi e organeve të zbatimit të ligjit, Prokurorisë së Bosnjës dhe Hercegovinës dhe Policisë që të ndërmarrin masat e përcaktuara me Ligj, veçanërisht në rastet që lidhen me zyrtarët publikë dhe nëpunësit civilë e pjesëmarrjen e tyre në përgatitjen apo organizimin e kremtimit të 9 janarit.

    Gjykata Kushtetuese e Bosnjë e Hercegovinës nuk ka kundërshtuar të drejtën që Republika Sërpska të ketë një ditë të saj, por ka konstatuar se “Dita e Republikës Sërpska” nuk mund të jetë 9 janari – datë që përkon me ngjarjet e ndodhura në Sarajevë më 1992.

    Ndërkohë, Bashkimi Evropian i ka bërë thirrje Serbisë që të jetë njësoj e përkushtuar ndaj perspektivës evropiane të Bosnjë dhe Hercegovinës, si një vend i unifikuar, i bashkuar dhe sovran – ashtu si të gjithë partnerët e tjerë ndërkombëtarë.

    Me rastin e pjesëmarrjes së përfaqësuesve të institucioneve shtetërore të Republikës së Serbisë në kremtimin e Ditës Antikushtetuese të Republikës Sërpska, nga Brukseli u tha se bashkëpunimi rajonal dhe marrëdhëniet e mira fqinjësore janë një pjesë thelbësore e përparimit drejt integrimeve evropiane.

    “Duhet të shmangen veprimet dhe deklaratat që ndikojnë negativisht në marrëdhëniet e mira fqinjësore dhe kontribuojnë në ndarjet politike.” – i tha në përgjigjen me shkrim dërguar Radios Evropa e Lirë nga Zyra për Media e BE-së.

    Përfaqësuesit nga Serbia marrin pjesë rregullisht në kremtimin e kësaj dite në Republikën Sërpska./REL

  • SHBA: Përse interesohet Donald Trump për Grenlandën?

    Presidenti i zgjedhur i SHBA-së, Donald Trump, sipas deklarimit të fundit, do që ta inkorporojë me SHBA-në Grenlandën, në rast nevoje edhe me ndihmën ushtarake.

    Presidenti i zgjedhur i SHBA-së, Donald Trump që pas fitores në Zgjedhje ka përsëritur deklaratat, se Grenlanda duhet të bëhet pjesë e Shteteve të Bashkuara. Grenlanda është në pjesën më të madhe e mbuluar nga akulli. Ishulli më i madh i botës ka vetëm rreth 56.000 banorë. Ky territor është i pasur në lëndë të para dhe pozicion të rëndësishëm strategjik në Atlantikun e Veriut. Ai i përket Danimarkës që prej 600 vjetësh dhe gëzon autonomi të zgjeruar. Deri tani Grenlanda ka hequr dorë nga një pavarësi e plotë.

    Çfarë kërkon Trump?

    Pak para Krishtlindjes Trump sërish hapi diskutimin për Grenlandën. SHBA-ja është e mendimit, që “në interesin e sigurisë kombëtare dhe të lirisë në botë” është një “domosdoshmëri absolute” ta posedosh dhe ta kontrollosh Groenlandën – deklaroi presidenti i ardhshëm. Me këtë Republikani i referohet përpjekjes së dështuar të tij gjatë mandatit të parë, duke propozuar më 2019 për ta blerë Grenlandën.

    Djali i tij, Trump Jr. vizitoi më 07.01.2025 ishullin, sikurse u komunikua gjatë një udhëtimi privat. Në të njëjtën ditë Trump Senior dha një Konferencë shtypi në Rezidencën e tij në Florida. Në deklarimin e tij ai nuk përjashtoi as hapat ushtarakë apo imponimin ekonomik për të vendosur kontrollin ndaj Grenlandës dhe Kanalit të Panamasë. “Ky është një deal, që duhet të realizohet.” – tha Trump.

    Mund ta blejë Trump Groenlandën?

    Edhe njё herё tjetёr njё president i SHBA-sё ka dashur ta blejё Grenlandёn: Harry Truman, pas Luftёs sё Dytё Botёrore, pёr 100.000 Dollarё. Edhe atёherё Qeveria daneze pati refuzuar. Për propozimin e tij për blerjen e ishullit më 2019 Trump mori një refuzim të prerë nga Danimarka dhe Grenlanda. Ngjashëm ishin reagimet edhe aktualisht. “Grenlanda na përket neve. Ne nuk jemi në shitje dhe asnjëherë nuk do të dalim në shitje.” – deklaroi kryeministri i ishullit, Mute Egede. Megjithatë, në fjalimin e tij me rastin e Vitit të Ri kryeministri i Grenlandës u shpreh për një pavarësi nga Danimarka.

    Ç’mund të ndodhë me një pavarësi të Grenlandës?

    Grenlanda që nga viti 1953 është koloni daneze dhe tani është një territor i vetëadministruar brenda mbretërisë. Që nga viti 2009 ishulli ka të drejtën të mbajë referendum për shpalljen e pavarësisë. Nëse ndodh kjo, Grenlanda mund të vendosë për një afrim me SHBA-në në formën e një Marrëveshjeje Asociimi ngjashëm si me ishujt Marshall, Mikronezinë dhe Palaun në Paqësor.

    Shumica e banorëve të ishullit ndonëse duan pavarësinë në sfondin e varësisë ekonomike prej Danimarkës dhe BE-së janë skeptikë. Në pranverë në Grenlandë zhvillohen Zgjedhjet e rregullta parlamentare. Pavarësia nga Danimarka është një temë e rëndësishme në fushatën elektorale.

    Çfarë u ofron Trump Grenlandës dhe banorëve të saj?

    Trump i premton Grenlandës dhe 56.000 banorëve të saj mbrojtje, ndonëse ai asnjëherë deri tani nuk është shprehur për motivet e dëshirës së tij. Ekonomikisht dhe në aspektin gjeopolitik me këtë do të rritej influenca ndaj rajonit të pasur me lëndë të para. Pikërisht tani me shkrirjen e shtresave të akullit dhe daljen në pah të pasurive nëntokësore edhe Rusia e Kina gjithnjë e më shumë po përpiqen me ngulm të ngrehin pretendimet e tyre. SHBA-ja me shtetin federal të Alaskës pranë Árktikut, që prej vitit 1951, ka një bazë aviacioni në veri-perëndim të Grenlandës.

    Profesori i shkencave politike në Këln, Thomas Jäger në një intervistë për televizionin privat NTV, ka shprehur edhe një mendim tjetër të mundshëm që mund të ketë Trump: “Mund të përfytyrohet, se Trump dëshiron që ta vendosë veten në radhën e Presidentëve me traditë, të cilët e kanë zgjeruar dukshëm territorin, në shekullin e XIX, SHBA u shtri më tej në perëndim dhe pastaj bleu Alaskën. Kjo do ta bënte atë vërtetë një ndër Presidentët e mëdhenj.”

    Por pёrse Grenlanda, ishulli mё i madh i botёs – gjashtё herё mё i madh se Gjermania – i pёrket njё vendi tё vogёl siç ёshtё Danimarka? Gjeografikisht ishulli ndodhet qartazi nё Amerikёn e Veriut, skaji mё veriperёndimor i Grenlandёs ndodhet fare pranё brigjeve tё Kanadasё.

    Danimarka nё tё kundёrt ndodhet mё shumё se 3000 km larg Grenlandёs dhe midis tyre ndodhen Islanda dhe njё pjesё e Norvegjisё. Ka pasur mjaft konflikte por mё nё fund danezёt fituan dhe më 1933 Grenlanda e akullt përfundimisht i kaloi Danimarkёs.

    Grenlanda ka qenё dikur e gjelbёr

    Grenlanda quhet Vendi i Gjelbёr. Sepse edhe nëse sot as qё mund tё pёrfytyrohet, pasi 85% e ishullit ndodhet nёn njё shtresё akulli, dikur nё Grenlandё ka qenё shumё mё ngrohtё. Studiuesit kanё gjetur gjurmё tё ADN-sё sё pemёve, tё fluturave dhe insekteve të tjera. Para 450.000 deri nё 900.000 vjetёsh Grenlanda ka qenё e mbuluar prej pyjeve tё dendura.

    Shtresa e akullit, qё ka ende njё trashёsi prej rreth 3800 metra, po pakёsohet sepse akullnajat shkrijnё. Pёrveҁ kёsaj bien gjithnjё e mё shumё shira, e kjo e intensifikon shkrirjen e akullnajave. Studiuesit kanё llogaritur qё niveli i detit nё mbarё botёn do tё rritej mё shumё se shtatё metra, nё rast se do tё shkrihej i gjithё akulli i Grenlandёs.

    Pak njerёz, aspak rrugё

    Sot nё Grenlandё janё vetёm brezat bregdetarë pa akull tё banueshme. Kryesisht nё brigjet perёndimore klima falë rrymёs sё Golfstrimit ёshtё mё e pёrshtatshme pёr jetesё. Kёtu ndodhen edhe shumica e fshatrave, si dhe kryeqyteti Nuuk. Ai ka 18.000 banorё dhe ёshtё qyteti mё i madh i Grenlandёs. Gjithsej nё ishull jetojnё 56.000 banorё dhe dendёsia e popullsisё ёshtё mё e ulёta nё botё. Vetёm nё Artik jetojnё mё pak njerёz se nё Grenlandё.

    Nё mbarё ishullin mungojnё rrugёt e hekurudhat, qё mund tё lidhin qytetet e fshatrat. Rrugё ka midis qyteteve, por ato pёrfundojnё nё periferi tё qytetit. Pёr tё shkuar nga njё qytet nё tjetrin banorёt e Grenlandёs pёrdorin avionё, anije, helikopterё, gomone ose slita me qen.

    Me ndryshimin e klimёs edhe nё Grenlandё mund tё ndryshojё diçka. Mё pak akull nё kёtё ishull nёnkupton edhe mё shumё hapёsirё jetese pёr njerёzit. Shkrirja e akujve çliron lёndё tё para tё rёndёsishme, tё cilat janё tё mbrojtura: Ndёr tё tjera naftё, minerale tё rralla, gaz natyror dhe uran.

    Sё shpejti do tё nisё gjuetia pёr elemente tё tilla. E Presidenti i zgjedhur i SHBA-sё si biznesmen ka njё nuhatje tё fortё pёr tё tilla gjёra./DW

     

  • Sot fillon votimin mërgata e Kosovës

    Nga sot e deri më 8 shkurt mbi 100 mijë shtetas të Kosovës që jetojnë jashtë vendit do të mund të votojnë me postë për Zgjedhjet parlamentare të Kosovës më 9 shkurt. Ndërsa më 8 shkurt, ata do të mund të votojnë fizikisht në përfaqësi diplomatike të Kosovës në 22 vende të botës.

    Mënyra e votimit të tyre varet nga ajo se si ata kanë zgjedhur të votojnë kur janë regjistruar si votues.

    Qysh zhvillohet votimi?

    Nga 104.924 votues të cilët janë regjistruar për të votuar jashtë Kosovës 84.525 prej tyre kanë zgjedhur të votojnë përmes postës – sipas Komisionit Qendror të Zgjedhjeve (KQZ).

    Pra, 67.421 janë regjistruar për të dërguar pakon me fletëvotim në kutinë postare të KQZ-së jashtë Kosovës, kurse 17.104 do ta dërgojnë pakon me fletëvotim në kutinë postare të KQZ-së në Kosovë.

    Mërgimtarët kosovarë kanë mundësi të votojnë fizikisht më 8 shkurt në përfaqësi diplomatike dhe konsullore, në vendet ku jetojnë.

    Vendvotimet në përfaqësi diplomatike dhe konsullore do të jenë të hapura prej orës 07:00 deri në ora 19:00 – sipas kohës lokale në vendet përkatëse.

    Të drejtë vote kanë të gjitha ata që posedojnë dokumentet identifikuese të lëshuara nga Kosova, si letërnjoftim, pasaportë ose lejen e vozitjes dhe që është regjistruar paraprakisht për votim.

    Në rast se dokumenti identifikues i lëshuar nga shteti i Kosovës është me afat të skaduar, atyre u kërkohet ta paraqesin edhe një dokument identifikues të vlefshëm të shtetit ku jetojnë – sipas KQZ-së.

    Ku do të mund të votojë mërgata e Kosovës?

    Qendrat e votimit në përfaqësi diplomatike të Kosovës për Zgjedhjet për Kuvendin e Kosovës, që mbahen më 9 shkurt 2025, sipas Komisionit Qendror të Zgjedhjeve, janë në këto shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kroaci, Mal të Zi, Maqedoni të Veriut, Mbretëri të Bashkuar, Norvegji, Shtetet e Bashkuara të Amerikës, Shqipëri, Slloveni, Suedi, Turqi, Zvicër.

    A mundet një mërgimtar të votojë në Kosovë ditën e Zgjedhjeve?

    Po. Një mërgimtar mund të vijë dhe të votojë në Kosovë në ditën e Zgjedhjeve parlamentare më 9 shkurt. Ai mund ta bëjë këtë në vendvotimin e Komunës së tij përkatëse.

    Por, për ta bërë këtë, ai nuk duhet të jetë i regjistruar paraprakisht si votues jashtë vendit.

    Votuesit e regjistruar jashtë vendit nuk e kanë emrin në listën e votuesve në Kosovë.

    Më shumë rreth Zgjedhjeve të 9 Shkurtit

    KQZ-ja ka bërë të ditur se numri i votuesve për Zgjedhjet e 9 Shkurtit do të jetë 2 milionë e 75 mijë e 868 votues brenda dhe jashtë Kosovës.

    Për këto Zgjedhje janë certifikuar 28 subjekte politike, me 1.280 kandidatë.

    Në fletëvotim, votuesit do të mund të zgjedhin një subjekt politik dhe deri në dhjetë kandidatë për deputetë. Ky është një ndryshim pas miratimit të Ligjit të ri për Zgjedhjet. Në të kaluarën qytetarët kanë pasur mundësinë të zgjedhin deri në pesë kandidatë.

    Një grua duke votuar gjatë një procesi zgjedhor në Kosovë. Fotografi nga arkivi.

    SHIKONI EDHE:

    Shorti, fushata, diaspora: Çfarë duhet të dini për Zgjedhjet e 9 Shkurtit?

    Secila parti e certifikuar mund të ketë deri në 110 kandidatë në listën zgjedhore.

    Këtu mund të lexoni se cila është renditja e partive në fletëvotime.

    Nga këto lista do të zgjidhet përbërja e re e Kuvendit me 120 ulëse dhe deputetët më pas zgjedhin Qeverinë e re. Qeveria aktuale në Kosovë udhëhiqet nga Albin Kurti, kreu i Lëvizjes Vetëvendosje.

    Fushata zgjedhore do të nisë të shtunën, më 11 janar dhe për një muaj partitë dhe kandidatët do të tentojnë t’i bindin votuesit, që t’i zgjedhin ata.

    Këto do të jenë Zgjedhjet e para të rregullta që Kosova mban, që nga shpallja e pavarësisë më 2008.

  • Moti për sot

    Instituti Hidrometeorologjik i Kosovës njofton se moti sot, më 09.01.2025, do të jetë i vranët dhe me intervale me diell.

    “Temperaturat minimale -2 deri 2°C, ndërsa ato maksimale 8-12°C. Era do të fryjë nga juglindja me shpejtësi 1-4 m/s.” – njofton IHMK.

     

  • Rasti “Brezovica”, dëshmitari bashkëpunues i Prokurorisë vazhdon dëshminë e tij

    Gjykimi ndaj të akuzuarve lidhur me rastin “Brezovica” në Gjykatën e Pejës ka vazhduar me dëgjimin e dëshmitarit bashkëpunues të Prokurorisë, Alban Çuka.

    Në lidhje me rastin “Brezovica”, Prokuroria e Ferizajt pretendon se janë keqpërdorur pozitat, ka pasur ushtrim ndikimi, marrje ryshfeti, dhënie ryshfeti, me qëllim të lëshimit të lejeve ndërtimore në zonën e Brezovicës.

    Të akuzuar në këtë rast janë Bratisllav Nikoliq, Dimitrije Raçiçeviq, Dragomir Millosavleviq, Hysni Bajrami, Sasha Millosavleviq, Arben Çitaku, Bedri Halimi, Husein Ajdini, Sasha Spasiq dhe Jardan Kostiq.

    Dëshmitari Alban Çuka dëshminë e tij e ka filluar më 06.11.2024 ndërsa gjatë seancës së sotme, më 08.01.2025, vazhdoi t’u përgjigjej pyetjeve të Prokurorisë.

    I njëjti do të vazhdojë dëshminë e tij edhe nesër.

    Në seancën e datës 06.11.2024 me të filluar dëgjimi i dëshmitarit, kryetarja e trupit gjykues, Nushe Kukaj- Mekaj, kishte njoftuar mediat se dëshmia e dëshmitarit nuk mund të bëhet publike deri në përfundim të dëgjimit edhe të dëshmitarëve të tjerë.

    Arsyeja pse u mor ky vendim sipas gjyqtares ishte për shkak të ruajtjes së konfidencialitetit të deklarimit të dëshmitarit dhe për të mos pasur ndikim te dëshmitarët e tjerë që pritet të dëshmojnë në këtë rast.

    Çuka është dëshmitar bashkëpunues i Prokurorisë.

    Po ashtu në fillim të seancës së sotme kryetarja e trupit gjykues Kuka-Mekaj vendosi për kërkesën e të akuzuarit Bedri Halimi, duke aprovuar që procedura ndaj tij të veçohet.

    Po ashtu është aprovuar edhe propozimi i mbrojtësit të të akuzuarit Husein Ajdini, avokatit Shkelzen Sopjani, që ndaj tij të vazhdohet gjykimi në mungesë.

    Më 04.11.2024 dhe 05.11.2024 prokurori, avokatët dhe të akuzuarit kanë dhënë fjalën hyrëse lidhur me këtë rast.

    Çka thotë aktakuza e Prokurorisë?

    Sipas aktakuzës së Prokurorisë së Ferizajt, kryetari i Komunës së Shtërpcës, Bratisllav Nikoliq, nga 21 janari 2016 e deri më 10 shtator 2018 ka keqpërdorur detyrën zyrtare me qëllim të përfitimit të dobisë pasurore për vete dhe i ka mundësuar një investitori marrjen e lejeve ndërtimore në mënyrë të kundërligjshme për të cilin shërbim ka marrë 200 mijë euro për 19 leje ndërtimore, për një shtëpi vikendi dhe një pëlqim rrugor dhe 100 mijë euro për lejen ndërtimore për objektin e hotelerisë “Rimida”.

    Ish-kryetari i Komunës së Shtërpcës akuzohet edhe në disa dispozitivë të tjerë të aktakuzës për keqpërdorim të detyrës zyrtare.

    Në pikën dytë të aktakuzës i njëjti akuzohet se nga 30 janari i vitit 2015 e deri më 27 maj 2019 përsëri sipas Prokurorisë ka keqpërdorur detyrën zyrtare me qëllim të përfitimit të pasurisë për vete duke i mundësuar një personi tjetër përfitimin e lejes ndërtimore në mënyrë të kundërligjshme për të cilin shërbim ka marrë 140 mijë euro për 14 leje ndërtimore dhe për shtëpi vikendi.

    60 mijë euro të tjera akuzohet nga Prokuroria se i ka marrë ish-kryetari i Komunës së Shtërpcës për lëshimin e 5 lejeve ndërtimore në mënyrë të kundërligjshme për ndërtimin e shtëpive të vikendit. Këto objekte ishin ndërtuar në zonën e tretë të mbrojtur të Parkut “Sharri”.

    Në pikën katër të aktakuzës thuhet se nga 23 nëntor 2018 deri më 6 gusht 2019 ish- kryetari i Komunës së Shtërpcës kishte marrë 40 mijë euro për lëshimin e 6 lejeve ndërtimore për shtëpi vikendi.

    Aktakuza kësisoj vazhdon për keqpërdorim të detyrës zyrtare për ish-kryetarin e Komunës së Shtërpcës edhe në pikën 5, 6, 7, 8, 9.

    Në po këtë aktakuzë Bratisllav Nikoliq akuzohet edhe për marrje ryshfeti e ushtrim ndikimi.

    Në këtë aktakuzë të përfshirë janë edhe Dimitrije Raçiçeviq – si drejtor i Urbanizimit, inspektorët komunalë të ndërtimit Hysni Bajrami dhe Dragomir Millosavleviq dhe Arben  Çitaku si ish-sekretar i përgjithshëm i Ministrisë së Mjedisit, Mustafë Hyseni si shef i Departamentit për Mbrojte dhe Mjedis të Ujërave, Husen Ajdini si investitor, Raif Bajrami si shef i Inspeksionit të Shtërpcës dhe të akuzuarit Sasha Spasiq, Bedri Halimi i akuzuar në cilësinë e kryeinspektorit, Sasha Millosavleviq si shef i Drejtorisë së Kadastrës.

    Të lartcekurit akuzohen për vepra penale si marrje ryshfeti, keqpërdorim i pozitës zyrtare, ushtrim ndikimi dhe për vepra si armëmbajtje pa leje.

    Më 17.09.2023 prokurori që po përfaqëson këtë rast, Rasim Maloku, kishte ndarë detaje ekskluzive për KALLXO.com lidhur me hetimin e këtij rasti.