Në palestrën “Minatori” në Mitrovicë më 29.01.2025 është zhvilluar xhiro e dytë e gjysmëfinales për të përcaktuar finalistin e parë për Kupën e Kosovës në basketboll.
Finalisti i parë është KB Trepça.
KB Trepça ka mposhtur KB Sigal Prishtina me rezultat 84:66.
Ndërsa, nesër, më 30.01.2025, nga ora 18:30 zhvillohet ndeshja mes KB Bashkimi dhe KB Vëllaznimi për finalistin e dytë të Kupës së Kosovës.
Është ndërprerë ndeshja mes KB Trepça dhe KB Sigal Prishtina, pasi që tifozët e KB Trepça kanë hedhur shishe në drejtim të lojtarëve të KB Sigal Prishtina.
Ndeshja e xhiros së dytë për të përcaktuar finalistin e parë për Kupën e Kosovës në Basketboll po zhvillohet në palestrën “Minatori”.
Tribuna e cila do të lirohet nga tifozët është tribuna e VIP.
Ndeshja është ndërprerë në përfundim të çerekut të tretë pasi tifozët e KB Trepça kanë hedhur shishe në drejtim të lojtarëve të KB Sigal Prishtina.
Në momentin e ndërprerjes së ndeshjes rezultati ishte 56-48.
Suedia mund të dërgojë kriminelë për të vuajtur dënimet e tyre në Burgjet jashtë vendit – tha një Komision i emëruar nga Qeveria, më 29.01.2025.
Ky shtet po përballet me vështirësi në menaxhimin e kapaciteteve në Burgje, për shkak të rritjes së numrit të të burgosurve të rinj – rritje që lidhet me një valë të krimeve të bandave.
“Ka nevojë të punohet për gjetjen e zgjidhjeve të reja brenda Shërbimit të Burgjeve.” – tha ministri i Drejtësisë, Gunnar Strommer, gjatë një Konference për media.
Strommer tha se Suedia veçse është në bisedime me shtetet e tjera, për marrjen me qira të Burgjeve të tyre, pa përmendur emrat e shteteve.
Nga shtetet evropiane, edhe Danimarka – duke dashur të lehtësojë situatën me mbipopullimin e Burgjeve të saj – ka arritur Marrëveshje me Kosovën për të marrë me qira 300 qeli në Burgun në Gjilan. Megjithatë, kjo Marrëveshje 10-vjeçare, nga e cila Kosova do të përfitojë rreth 200 milionë euro, ende nuk ka nisur së zbatuari.
Ndryshe Suedia po përballet me rritje të krimeve të bandave – krime që janë rritur në dy dekadat e fundit. Ky shtet është në mesin e shteteve me numrin më të lartë për kokë banori të dhunës me armë në Evropë.
Me miratimin e Ligjeve të reja dhe rritjen e personelit dhe buxhetit, Policia suedeze ka korrur sukses në luftën kundër bandave dhe në dy vjetët e fundit ka pasur më pak të shtëna vdekjeprurëse e më shumë dënime.
Përderisa ky sukses është mirëpritur, Sistemi i Burgjeve të shtetit është mbingarkuar. Sipas të dhënave të fundit, që i përkasin vitit 2023, Gjykatat suedeze kanë dënuar persona në një total prej pothuajse 200.000 muajsh burgim, që paraqet një rritje prej 25% me vitin paraprak dhe dyfishim krahasuar me dënimet e shqiptuara më 2014.
Burgjet dhe Qendrat e Paraburgimit në Suedi janë në kapacitete të plota dhe Shërbimi i Burgjeve ka thënë se i duhen rreth 27.000 shtretër të rinj deri më 2033.
Mattias Wahlstedt, kreu i Komisionit, tha se nuk ka pengesa ligjore që Suedia të marrë me qira qeli jashtë vendit, por propozimi për një gjë të tillë duhet fillimisht të miratohet nga Parlamenti./REL
Zyrtarët në disa rajone ruse kanë raportuar për sulme masive ukrainase me dronë gjatë natës që kanë pasur për shënjestër infrastrukturën e energjisë – përfshirë një Central bërthamor. Ndërkaq, Presidentët e Ukrainës dhe Rusisë kanë këmbyer akuza lidhur me mundësinë e negociatave të paqes.
Zyrtarët qeveritarë në rajonet e Rusisë të Smolenskut, Nizhni Novgorodit, Tverit, Kurskut, Leningradit dhe Brianskut thanë se zonat e tyre janë goditur nga dronët e Ukrainës më 28-29 janar, ndërkaq aeroportet në Kazan dhe Shën Petersburg kanë ndaluar përkohësisht operimin për shkaqe sigurie.
“Në disa zona në rajonin e Smolenskut, objektet civile ishin subjekt i një sulmi masiv” me dronë – shkroi në Telegram guvernatori, Vasily Anokhin.
“Sistemet e mbrojtjes ajrore dhe ato të luftës elektronike të Ministrisë ruse të Mbrojtjes janë duke i shkatërruar dronët… Një nga dronët u rrëzua gjatë përpjekjes për të sulmuar një ndërtesë me energji bërthamore. Nuk ka viktima apo dëme.” – shtoi Anokhin.
Informacione të tjera nuk u dhanë, por Centrali bërthamor në Smolensk është një ndërtesë e madhe për prodhimin e energjisë, që gjendet rreth 100 kilometra nga qyteti i Smolenskut.
Ndërkaq, guvernatori i rajonit rus, Nizhni Novgorod, Gleb Nikitin tha se një dron ra në territorin e një kompleksi të karburanteve dhe energjisë në zonën industriale të Kstovskit, por nuk raportoi për viktima apo dëme të mëdha.
“Shërbimet speciale po punojnë në vendngjarje dhe po përdoren të gjitha mjetet e nevojshme për të lokalizuar zjarrin në një nga Njësitë e rafinerisë së naftës.” – tha Nikitin.
Guvernatorët rajonalë në rajonin Briansk, në kufi me Ukrainën dhe Tver, në afërsi të Moskës, po ashtu raportuan për sulme me dronë. Në këto dy rajone, zyrtarët nuk raportuan për viktima apo dëme.
Autoritetet në Aeroportin e Kazanit – kryeqytetit të Republikës ruse të Tatarstanit – thanë se të gjitha fluturimet janë ndërprerë për shkaqe sigurie, ndonëse nuk njoftuan nëse Aeroporti ishte cak i ndonjë sulmi.
Agjencia shtetërore e lajmeve TASS ka raportuar po ashtu se fluturimet në Aeroportin Pulkovo në Shën Petersburg janë ndërprerë për shkaqe sigurie, por nuk u dhanë më shumë detaje.
Ministria ruse e Mbrojtjes tha se ka rrëzuar 104 dronë ukrainas në disa rajone gjatë natës. Ky pretendim i Rusisë nuk ka mundur të konfirmohet në mënyrë të pavarur.
Të dyja palët e përfshira në luftë kanë intensifikuar përdorimin e dronëve muajve të fundit – fluturake që shpesh kanë pasur për cak infrastrukturën e energjisë së të dyja shteteve.
Rusia ka shkaktuar dëme të mëdha në objektet civile ukrainase përmes sulmeve të kryera me dronë, raketa, artileri dhe lloje të ndryshme të bombave. Kremlini mohon se shënjestron zonat civile, pavarësisht provave se kryen sulme të tilla.
Brenda Ukrainës, guvernatori rajonal Vitaliy Kim tha se dy gra janë vrarë gjatë një sulmi me raketa të kryer nga Rusia në qytetin e Mikolajivit.
Përveç sulmeve në fushëbetejë, krerët e dy shteteve kanë këmbyer akuza. Presidenti ukrainas Volodymyr Zelensky tha se presidenti rus Vladimir Putin ka “frikë” që të hyjë në negociata për përfundimin e luftës, pasi udhëheqësi i Kremlinit refuzoi mundësinë e bisedimeve të drejtpërdrejta me homologun e tij ukrainas.
“Sot Putini edhe një herë e konfirmoi se ai ka frikë nga negociatat, frikë nga udhëheqësit e fuqishëm dhe bën gjithçka që mundet për ta prolonguar luftën.” – shkroi Zelensky në X.
“Çdo lëvizje që ai bën dhe të gjitha marifetet e tij cinike synojnë që kjo luftë të jetë e pafund.” – shtoi ai.
Më herët Putin i tha televizionit shtetëror rus se bisedimet me Ukrainën janë të mundura, por jo me Zelenskyn, të cilin ai e cilësoi si “jolegjitim”, për shkak se mandati i tij presidencial i ka mbaruar, teksa shteti ende është në gjendje lufte.
“Por në esencë, nëse ata duan të vazhdojnë përpara, ka rrugë ligjore për ta bërë këtë. Lejoni Kryetarin (e Parlamentit ukrainas) ta udhëheqë këtë gjë, në bazë të Kushtetutës.” – tha Putin.
“Megjithatë, deri më tani ne thjesht nuk shohim se ka një dëshirë të tillë.” – shtoi ai.
Ndërkaq, Axios ka raportuar se ushtria amerikane gjatë kësaj jave ka transferuar në Ukrainë rreth 90 Sisteme kundërajrore Patriot, që janë marrë nga depot në Izrael dhe në Poloni.
Axios, duke cituar tri burime që kanë njohuri për këtë çështje, tha se Sistemet Patriot i ishin dhënë Izraelit mbi 30 vjet më parë gjatë Luftës së parë të Gjirit./REL
Bashkimi Evropian nuk është deklaruar asnjëherë nëse i mbështet ose jo kërkesat e studentëve në Serbi, të cilët për gati tre muaj protestojnë duke kërkuar përgjegjësi për vdekjen e 15 personave nga shembja e një strehe në Stacionin hekurudhor të Novi Sadit.
Zyrtarët e BE-së kanë bërë deklarata vetëm pas pyetjeve të gazetarëve për situatën në Serbi dhe ato kanë pasur të bëjnë kryesisht me të drejtën demokratike për të protestuar, apo me nevojën për të lejuar punën e papenguar të gazetarëve dhe të aktivistëve të Shoqërisë civile.
Për kërkesat konkrete të studentëve, gazetarët nuk kanë marrë asnjë përgjigje konkrete.
Ai u ka kujtuar atyre se e kanë detyrim t’i mbrojnë pjesëmarrësit në tubime nga lëndimet apo dhuna.
“Pjesëmarrja e qytetarëve luan një rol jetik në zhvillimin e një shoqërie të shëndetshme dhe demokratike – duke përfshirë promovimin e transparencës dhe llogaridhënies. Këto janë vlera bazë të Bashkimit Evropian dhe Bashkimi Evropian pret që të gjitha vendet kandidate t’i përqafojnë ato.” – ka thënë Mercier.
Ai u ka bërë thirrje të gjithë aktorëve relevantë në Serbi që ta zgjidhin situatën përmes Dialogut dhe të përmbahen nga përshkallëzimi i tensioneve.
“Të gjithë aktorët politikë duhet të angazhohen në mënyrë konstruktive në Dialog politik ndërpartiak. Kjo do të mundësojë që vëmendja dhe energjia të ridrejtohen drejt përfundimit të reformave në fushat e sundimit të ligjit dhe të drejtave themelore, si dhe harmonizimit me rregullat e BE-së, në mënyrë që procesi i pranimit të Serbisë në BE të përshpejtohet.” – ka thënë Mercier.
Ditëve të fundit reagimi i vetëm i qartë dhe i ashpër nga BE-ja ka ardhur pas dëbimit të një grupi aktivistësh të Shoqërisë civile më 22 janar, të cilët kanë qenë në Beograd si pjesëmarrës në një Konferencë ndërkombëtare. Por, edhe në atë rast, zyrtarët evropianë i kanë anashkaluar kërkesat e studentëve.
Ndryshe nga Bashkimi Evropian, ku çdo qëndrim zyrtar duhet të miratohet nga 27 Kryeqytetet e shteteve anëtare, anëtarët e Parlamentit Evropian kanë liri më të madhe për të shprehur pikëpamjet e tyre, të cilat në përgjithësi paraqesin edhe pikëpamjet e grupeve politike që ata i përfaqësojnë në këtë institucion.
Grupi i dytë më i madh politik në PE – Socialdemokratët Evropianë – ka shprehur hapur solidaritet me kërkesat e studentëve.
“Grupi mbështet me vendosmëri të drejtën e popullit për të protestuar dhe dënon fuqishëm të gjitha aktet e frikësimit, dhunën ndaj demonstruesve dhe shtypjen e shtetasve të huaj.” – thuhet në deklaratën e Socialdemokratëve.
Megjithatë grupi më i madh në PE, Partia Popullore Evropiane (EPP), ku anëtare e asocuar është Partia Përparimtare Serbe (SNS) e kryeministrit në largim të Serbisë Millosh Vuçeviq ka një qëndrim të vakët kur bëhet fjalë për krizën brenda Serbisë.
“Studentët dhe qytetarët e Serbisë kanë të drejtë në demonstrata paqësore. Autoritetet në Beograd duhet të dëgjojnë mesazhin e qytetarëve dhe kështu të nisin një proces transparent, gjithëpërfshirës dhe konstruktiv të Dialogut me të gjithë aktorët politikë dhe shoqërorë. Është gjithashtu e rëndësishme të theksohet se Serbisë nuk i duhet radikalizim, por dialog, paqe dhe përkushtim ndaj reformave evropiane.” – ka thënë Davor Ivo Shtier, deputet i Partisë Popullore Evropiane, për Radio Evropa e Lirë.
Kjo deklaratë, sipas tij, është koordinuar me të gjithë përgjegjësit si në klubin e EPP-së, ashtu edhe në parti.
Në anën tjetër Grupi i Gjelbër Evropian në Parlamentin Evropian është i mendimit se Serbia është në krizë të thellë dhe se vendi është në një pikë kthese.
“’Korrupsioni vret’ nuk është thjesht një slogan proteste, por një thirrje e madhe për ndihmë, sepse SNS-ja në pushtet ka kapur plotësisht Policinë, gjyqësorin dhe median – institucione që supozohet se duhet të mbrojnë demokracinë, por ato po i pengojnë hetimet e pavarura.” – ka thënë eurodeputeti nga të Gjelbrit, Vlladimir Prebilliç, nga Sllovenia.
Sipas tij protestat e tilla, që rrallë janë parë në historinë e Serbisë, janë “thirrje për drejtësi dhe normalitet në një vend të shkatërruar nga korrupsioni i shfrenuar, kufizimet mediatike dhe shtypja e kundërshtarëve”.
Ai ka bërë thirrje për plotësimin urgjent të të gjitha kërkesave të studentëve.
“Ne gjithashtu i bëjmë thirrje Komisionit Evropian që ta kuptojë seriozitetin e kësaj krize.” – ka shtuar Prebilliç.
Studentët dhe qytetarët e tjerë të Serbisë kërkojnë përcaktimin e përgjegjësisë politike dhe penale për vdekjen e 15 personave nga shembja e strehës së Stacionit hekurudhor në Novi Sad.
Gati tre muaj pas tragjedisë dhe protestave të vazhdueshme kryeministri i Serbisë Millosh Vuçeviq dhe kryetari i Novi Sadit Millan Gjuriq kanë dhënë dorëheqje.
Këtij akti i ka paraprirë edhe një sulm ndaj një grupi studentësh në Novi Sad.
Komisioni Evropian nuk e ka komentuar dorëheqjen e Kryeministrit – duke vlerësuar se kjo është çështje e brendshme politike në Serbi.
Tonino Picula, raportues për Serbinë në Parlamentin Evropian, ka thënë për Radio Evropa e Lirë se rënia e Qeverisë serbe është rezultat i presionit të vetë qytetarëve të vendit.
“Rënia e Qeverisë serbe, në radhë të parë, është pasojë e presionit në rritje ndaj regjimit të Aleksandër Vuçiqit nga publiku vendas, i cili është mobilizuar spontanisht dhe është udhëhequr nga studentët, e jo nga ndonjë dorë e padukshme nga jashtë, siç e ka prezantuar Kryeministri i dorëhequr.” – ka thënë Picula.
“Presidentët dhe Kancelarët i kanë ofruar Vuçiqit Kontrata për blerjen e avionëve luftarakë, për ndërtimin e Termocentraleve bërthamore ose partneritete për mihjen e litiumit. Dhe këto për një regjim që tregon përbuzje të hapur ndaj vlerave evropiane, por jo ndaj mjeteve evropiane.” – sipas Piculës.
Raportuesi i Parlamentit Evropian për Serbinë ka shtuar se ky institucion ka shprehur gjithmonë interesim për rrugën e Serbisë drejt BE-së dhe gatishmëri për ta ndihmuar atë në atë rrugë.
“Mbetet të shihet se çfarë do të mbizotërojë në të ardhmen e afërt: a do të mbetet e pandryshuar mbështetja politike dhe financiare për autokracinë, edhe pas rënies evidente të modelit aktual të qeverisjes së Serbisë apo do të mbizotërojë këmbëngulja në standardet e demokracisë liberale, pa të cilat nuk ka përparim në negociata, e sidomos drejt BE-së.” – ka përfunduar Picula.