Ballina

Autor: Kallxo

  • Gjuriq: Serbia mund të jetë nikoqire e takimit eventual mes Trumpit e Putinit

    Ministri i Jashtëm i Serbisë, Marko Gjuriq tha se Serbia është e gatshme të mirëpresë një takim të mundshëm midis presidentit të zgjedhur të SHBA-së, Donald Trump dhe presidentit të Rusisë, Vladimir Putin.

    “Serbia mund të luajë një rol të rëndësishëm si mikpritëse. Presidenti [Aleksandër] Vuçiq ka ndërtuar një reputacion ndërkombëtar, që na mundëson të jemi vend i takimeve të tilla.” – tha Gjuriq për Radio Televizionin e Serbisë.

    Media të ndryshme ndërkombëtare janë duke raportuar ditëve të fundit për mundësinë e një takimi të tillë, derisa Trump – i cili është zotuar se do ta përfundojë shpejt luftën e Rusisë në Ukrainë – pritet ta marrë zyrtarisht detyrën, më 20 janar.

    Kremlini tha të hënën se nuk ka ende ndonjë përgatitje specifike për këtë takim, ndërsa një këshilltar i Trumpit tha se dy udhëheqësit pritet të bisedojnë përmes telefonit në ditët ose javët në vazhdim – raporton Reuters.

    Duke folur për RTS-në, Gjuriq tha se Beogradi mund të bëhet me sukses vend i takimit.

    “Besoj se mund ta japim kontributin tonë dhe të luajmë një rol të vogël, por jo krejtësisht të parëndësishëm dhe t’ua ofrojmë një gjë të tillë partnerëve tanë.” – tha Gjuriq.

    Për gatishmërinë e Serbisë për t’u bërë nikoqire e mundshme e Trumpit dhe Putinit foli një ditë më herët edhe presidenti i Serbisë, Aleksandër Vuçiq.

    Serbia, aleate e Rusisë, është vendi i vetëm në rajonin e Ballkanit Perëndimor, që nuk u është bashkuar sanksioneve të Perëndimit kundër Rusisë, për shkak të pushtimit të Ukrainës.

    Javën e kaluar, industria e saj e naftës, NIS e cila në masë të madhe është nën pronësinë e një kompanie ruse, është sanksionuar nga SHBA-ja.

    Por, Gjuriq tha se Serbia i ka marrë të gjitha masat për t’i shmangur trazirat në treg.

    Ai tha, gjithashtu, se Serbia do të nisë Dialogun Strategjik me Shtetet e Bashkuara dhe e cilësoi këtë si një hap të rëndësishëm në forcimin e marrëdhënieve mes dy vendeve.

    “Kjo është e një rëndësie të jashtëzakonshme për pozicionin ndërkombëtar të Serbisë. Partneriteti e bën të rregullt shkëmbimin ndërmjet institucioneve tona dhe kontribuon në zhvillimin e marrëdhënieve në fushën e ekonomisë, teknologjisë së re, kulturës dhe arsimit, me një numër më të madh të bursave.” – tha Gjuriq.

    Për Zgjedhjet në Kosovë

    Kryediplomati serb foli edhe për Zgjedhjet parlamentare që do të mbahen në Kosovë më 9 shkurt.

    “Është e rëndësishme që populli ynë të mbetet unik dhe që Lista Serbe të marrë pjesë në Zgjedhje, për të treguar se nuk po tërhiqemi.” – tha Gjuriq.

    “Unë vërtet dua që serbët të dalin në Zgjedhje, t’i tregojmë [kryeministrit të Kosovës, Albin] Kurti, se nuk dorëzohemi, se nuk largohemi nga institucionet dhe se serbët dhe Serbia nuk tërhiqen.” – shtoi ai.

    Lista Serbe është formuar në vitin 2013 me mbështetjen e Beogradit zyrtar dhe që atëherë është e vetmja parti që ka mbështetjen e Serbisë për pjesëmarrje në institucionet e Kosovës.

    Përveç Listës Serbe, në garë për dhjetë ulëset e garantuara për serbë në Kuvendin e Kosovës janë edhe pesë subjekte të tjera politike që përfaqësojnë komunitetin serb: Lëvizja Popullore Serbe, Për Liri, Drejtësi dhe Mbijetesë; Partia e Serbëve të Kosovës, Demokracia Serbe dhe Nisma Qytetare Drejtësia Popullore./REL

  • Gjykimi ndaj ish-krerëve të UÇK-së, dëshmitari Goodwin pohoi se nuk ka qenë i përfshirë në analizimin e ADN-së

    Dëshmitari William Goodwin gjatë marrjes në pyetje nga ana e avokates Kerrie Ann Rowan, e cila mbron të akuzuarin Kadri Veseli pohoi se nuk ka qenë i përfshirë në analizimin e ADN-së, vetë, që ka analizuar gjetjet.

    Dëshmitari Goodwin pohoi se nuk ka folur asnjëherë me personat që i kanë krijuar këto Raporte, e se këtë gjë nuk ia kishte kërkuar Prokuroria dhe as nuk e kishte kërkuar ai vetë.

    Tutje, dëshmitari Goodwin gjatë dëshmisë së tij pohoi atë se Prokuroria ia ka dhënë disa të dhëna si bazë për punën e tij dhe se i është kërkuar që të jetë i fokusuar në përgjigjet e tij.

    Ndër të tjera, mbrojtësja e të akuzuarit Kadri Veselit, avokatja Kerrie Ann Rowan pyeti dëshmitarin Goodwin, nëse i është kërkuar nga Prokuroria që ai të bëjë një analizë të re nga e para, që do  t’i analizonte vetë ai profilet e ADN-së.

    Dëshmitari Goodwin lidhur me këtë u përgjigj duke thënë se nga pikëpamja praktike nuk i është kërkuar të bëjë rishikim të analizës.

    “Nga pikëpamja praktike jo nuk më është kërkuar. Unë nuk kam bërë asnjëherë ndonjë rishikim të analizës, unë kam rishikuar gjetjet.” – u përgjigj dëshmitari Goodwin.

    Lidhur me Raportet, dëshmitari Goodwin pohoi atë që mostrat janë nxjerrë nga eshtrat gjatë proceseve të zhvarrimit dhe tutje në pyetjet e avokates Rowan pohoi se nuk i është kërkuar atij që të shikojë metodologjinë e praktikuar.

    Paraprakisht para marrjes në pyetje nga ana e mbrojtjes, mbrojtësja e të akuzuarit Veseli, avokatja Kerrie An Rowan kërkoi që disa emra në Raportin e ekspertit Goodwin të jenë publike.

    “Duke marrë parasysh këtë, dy nga 26 viktimat e mundshme janë të redaktuara dhe këta do t’i përmendim dhe në rrethana kur anëtarët e familjes janë të identifikueshëm, atëherë këto nuk duhet të jenë publike. Por individët që janë publik, të paktën unë gjykoj që duhet t’i përmendim me emra.” – tha avokatja Rowan.

    Tutje, Rowan tha se çdo gjykim, duhet të sigurohemi që informacionet të jenë publike.

    “Arsyeja se pse ne nuk e bëjmë këtë publike është për arsye se një viktimë e caktuar apo një dëshmitar ka masa mbrojtëse në Sallën e Gjyqit. Po ashtu, ka pasoja psikologjike që mund të kenë viktimat, dëshmitarët, të afërmit dhe t’i mbrojmë.” – tha prokurori James Pace, lidhur me këtë.

    Ndërkaq, kryetari i Trupi Gjykues Charls Smith III tha se do të veprohet ashtu siç është vepruar deri më tani dhe nuk do të përmenden emra – duke thënë se Raporti dhe letra me udhëzime do të publikohet e redaktuar, duke shtuar se disa emra nuk duhet të përmendën me zë.

    https://kallxo.com/ligji/procesi-gjyqesor-ndaj-ish-krereve-te-uck-se-fillon-deshmine-eksperti-i-mjekesise-ligjore-william-goodwin/

    Në këtë rast, çështja po drejtohet nga gjyqtarët Charls Smith III (kryesues), Christoph Barthe, Guénawl Mettraux dhe Fergal Gaynor.

    Aktakuza fillestare kundër katër ish-eprorëve të UÇK-së u konfirmua më 26.10.2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27.02.2023 .

    Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.

    Sipas Aktakuzës, krimet e paraqitura u kryen më së paku prej marsit 1998 deri në shtator 1999, në disa vendndodhje në Kosovë, si dhe në Kukës dhe Cahan të Shqipërisë.

    Gjykimi filloi më 03.04.2023 me deklaratat hyrëse të Prokurorit të Specializuar dhe të përfaqësuesit të viktimave – ndjekur nga ekipet e mbrojtjes, më 4 e 5 prill 2023.

    Në këtë çështje janë 143 viktima pjesëmarrëse.

    Ndërkaq, Prokuroria ka propozuar mbi 300 dëshmitarë në këtë rast.

    Raportimet e tjera të KALLXO.com lidhur me këtë rast, mund t’i lexoni në këtë LINK.

     

     

  • Gjermania heton spiunazhin e dyshuar rus në Bazat e saj Ushtarake

    Policia gjermane tha se ka nisur një hetim për rastet e dyshuara të spiunazhit rus, pasi disa dronë u vunë re mbi disa instalime ushtarake në Bavari.

    Në vazhdën e luftës së Rusisë në Ukrainë, nuk përjashtohet mundësia që instalimet ushtarake gjermane dhe kompanitë e mbrojtjes, të jenë duke u spiunuar nga dronët – tha Zyra Shtetërore e Hetimit Kriminal e Bavarisë.

    Incidenti i fundit ndodhi të dielën vonë, kur një dron u pa mbi një Bazë Ushtarake pranë Manhingut – tha Policia, duke iu referuar një objekti të gjerë, ku forcat gjermane testojnë avionë të rinj me pilot dhe pa pilot.

    Dronët mbi këtë Bazë u panë edhe gjatë tri ditëve në dhjetor – sipas Policisë.

    Një tjetër fluturim i paautorizuar ndodhi po atë muaj, edhe mbi një instalim ushtarak në Nojburg an der Donau.

    Policia federale e Gjermanisë, Bundeskriminalamt, i paralajmëroi kompanitë në dhjetor se mund të kenë sabotues rusë në mesin e punonjësve dhe kontraktorëve të tyre.

    Rusia i mohoi këto akuza.

    Kreu i Shërbimit të Inteligjencës së Jashtme të Gjermanisë, Bruno Kahl tha muajin e kaluar se aktet e sabotimit të Rusisë kundër objektivave perëndimore mund ta shtyjnë NATO-n të thirret në Nenin 5 të Traktatit të Mbrojtjes.

    Sipas këtij Neni, nëse një anëtar i NATO-s sulmohet, anëtarët e tjerë të Aleancës janë të detyruar ta ndihmojnë atë që të përgjigjet./REL

  • Grevë në Belgjikë, anulohen fluturimet dhe udhëtimet me tren

    Belgjika u përfshi nga një grevë kombëtare të hënën, pasi punonjësit e trafikut ajror dhe hekurudhor u ngritën kundër planeve për reforma të pensioneve.

    Rreth 40% e fluturimeve për dhe nga Aeroporti i Brukselit – më i madhi i Belgjikës – u anuluan, pasi bartësit e bagazheve, stafi i sigurisë dhe personeli tjetër ndërprenë punën.

    Kompania ajrore “Brussels Airlines” tha të shtunën se është detyruar të anulojë paraprakisht gjysmën e fluturimeve të saj brenda Evropës, për t’i mbajtur në funksion linjat e largëta.

    Operatori i aeroportit “Charleroi” – që është një ndër qendrat kryesore evropiane për linjën ajrore me kosto të ulët, Ryanair – tha se priten vonesa të konsiderueshme dhe anulime të mundshme.

    Transporti hekurudhor pësoi gjithashtu. Dy në tre trena që lidhin qytetet e mëdha nuk funksionojnë.

    Shërbimi i Trenave u ndërpre edhe në Bruksel.

    Greva mbarëkombëtare u thirr nga tri Sindikatat kryesore të Belgjikës për të protestuar kundër reformave në pensione, që mund të miratohen nga Qeveria e ardhshme.

    Partitë belge janë ende në bisedime për të formuar një Administratë të re federale, pas Zgjedhjeve që u mbajtën në qershor.

    Pesë partitë që po negociojnë për të arritur një Marrëveshje koalicioni, planifikojnë ta rrisin moshën e pensionit për punonjësit e hekurudhave dhe të tjerët, të cilët tani lejohen të dalin në pension të parakohshëm – sipas sindikatës CSC.

    Sindikatat planifikojnë të mbajnë edhe një demonstratë në Bruksel, gjatë ditës. /REL

  • Procesi gjyqësor ndaj ish-krerëve të UÇK-së, fillon dëshminë eksperti i mjekësisë ligjore William Goodwin

    Në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, të akuzuar për “krime lufte dhe krime kundër njerëzimit”, më 13.01.2025, ka filluar dëshminë eksperti i mjekësisë ligjore, Willaim Goodwin – dëshmitar i Zyrës së Prokurorit të Specializuar (ZPS).

    Dëshmitari Goodwin në pyetjet e prokurorit Pace deklaroi se ka përgatitur një Raport të datës 22.09.2021 dhe shtoi se ky Raport përfshin opinionin e tij të pavarur në pyetjet që ia ka parashtruar ZPS-ja në letrën udhëzuese së bashku me dokumentet përkatëse, që e kishte marrë më 30.07.2021.

    Tutje, lidhur me këtë Raport prokurori Pace deklaroi se ky është një Raport i ADN-së për një person, por emri i të cilit nuk u përmend në seancë të hapur.

    Gjatë dhënies së dëshmisë së dëshmitarit Goodwin, prokurori James Pace lexoi një pjesë të Raportit të dëshmitarit të lartcekur.

    Prokurori Pace tha se në Raportin e ekspertit mjekoligjor thuhet se profili i ADN-së është i kriptuar, e që e kufizon mundësinë për rishikim të plotë dhe tha se bazuar në pjesëtarët e familjes që janë të disponueshëm dhe leukocitet që përputhen gjasat e përputhjes dhe probabiliteti i identitetit duken të arsyeshme.

    Për këtë, dëshmitari Goodwin deklaroi se nuk ka asgjë për të ndryshuar për këtë pjesë.

    Tutje, prokurori Pace pyeti dëshmitarin nëse kishte përgatitur një Raport tjetër të datës 06.03.2023. Për këtë dëshmitari e pohoi se kishte përgatitur këtë Raport të kësaj date, pas udhëzimeve të ZPS-së.

    Tutje, prokuroi Pace pyeti dëshmitarin për informacione shtesë, lidhur me këtë Raport.

    “Shohim nënë, baba, bashkëshorte, vajzë, djalë. A mund të na thoni informacionet shtesë që po shihni tani, nëna, babai, bashkëshortja, vajza, djali kanë ndonjë ndikim në vlerësimin tuaj në Raportin tuaj?” -pyeti Prokurori dëshmitarin.

    Ndërkaq, për këtë dëshmitari Goodwin deklaroi se për këtë rast ka të dhëna të plota, duke thënë se kemi nënën, babanë, vajzën, djalin dhe bashkëshorten të cilët me personin e zhdukur mund të rrisin jashtëzakonisht gjasat.

    Prokurori Pace përfundoi pyetjet për dëshmitarin Goodwin, ndërsa seanca është duke vazhduar tutje me pyetjet e mbrojtjes.

    Çështja në këtë rast po drejtohet nga gjyqtarët Charls Smith III (kryesues), Christoph Barthe, Guénawl Mettraux dhe Fergal Gaynor.

    Aktakuza fillestare kundër katër ish-eprorëve të UÇK-së u konfirmua më 26.10.2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27.02.2023.

    Secili prej të akuzuarve është akuzuar mbi bazën e përgjegjësisë penale individuale me gjashtë akuza për “krime kundër njerëzimit”: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.

    Sipas Aktakuzës, krimet e paraqitura u kryen më së paku prej marsit 1998 deri në shtator 1999, në disa vendndodhje në Kosovë, si dhe në Kukës dhe në Cahan të Shqipërisë.

    Gjykimi filloi më 03.04.2023 me deklaratat hyrëse të Prokurorit të Specializuar dhe të përfaqësuesit të viktimave – ndjekur nga ekipet e mbrojtjes më 4 e 5 prill 2023.

    Në këtë çështje janë 143 viktima pjesëmarrëse.

    Ndërkaq, Prokuroria ka propozuar mbi 300 dëshmitarë, në këtë rast.

    Raportimet e tjera të KALLXO.com, lidhur me këtë rast, mund t’i lexoni në këtë LINK.