Ballina

Autor: Kallxo

  • Gjykata Supreme miraton ligjin që e ndalon TikTok-un në SHBA

    Gjykata Supreme e Shteteve të Bashkuara të Amerikës të premten (17.01.2025) vendosi njëzëri që të miratojë ligjin federal që e ndalon TikTok-un duke filluar nga e diela (19.01.2025), përveçse nëse shitet nga kompania e saj amë me bazë në Kinë.

    Gjykata argumentoi se rreziku për sigurinë kombëtare i shkaktuar nga lidhjet me Kinën tejkalon shqetësimet për kufizimin e lirisë së shprehjes nga aplikacioni ose 170 milionë përdoruesit e tij në Shtetet e Bashkuara, raporton AP.

    Shitja nuk duket se është afër dhe, megjithëse ekspertët kanë thënë se aplikacioni nuk do të zhduket nga telefonat e përdoruesve ekzistues pasi ligji të hyjë në fuqi më 19 janar, përdoruesit e rinj nuk do të jenë në gjendje ta shkarkojnë atë e as të përditësojnë.

    Kjo, eventualisht, do ta bëjë aplikacionin të papërdorshëm, ka thënë Departamenti i Drejtësisë në dokumentet gjyqësore.

    Presidenti i zgjedhur, Donald Trump, premtoi se mund të negociojë për një zgjidhje, kurse administrata e presidentit Joe Biden ka sinjalizuar se nuk do ta zbatojë ligjin duke filluar nga e diela, dita e tij e fundit e plotë në detyrë.

    Trump, i vetëdijshëm për popullaritetin e TikTok-ut dhe për 14.7 milionë ndjekësit e tij në këtë aplikacion, gjendet në anën e kundërt të argumentit nga republikanët e njohur të Senatit, të cilët fajësojnë pronarin kinez të TikTok-ut për mosgjetjen e një blerësi deri tani.

    Nuk është e qartë se cilat opsione do të jenë të hapura për Trumpin pasi të betohet si president të hënën.

    Reuters raporton se Ligji për TikTok-un i jep presidentit autoritetin për të dhënë një zgjatje të vetme deri në 90 ditë për afatin e shitjes, nëse ai vërteton se ekziston një rrugë dhe prova për përparim drejt një shitjeje, duke përfshirë “marrëveshje ligjore të detyrueshme”, të cilat ligji nuk i përcakton.

    Aplikacioni u mundëson përdoruesve të shikojnë qindra video brenda rreth gjysmë ore, pasi disa prej tyre janë vetëm disa sekonda të gjata, sipas një padie të ngritur vitin e kaluar nga shteti i Kentakit, ku pretendohet se TikTok-u është i dizajnuar për të krijuar varësi dhe dëmton shëndetin mendor të fëmijëve. Padi të ngjashme janë ngritur nga më shumë se një duzinë shtetesh. TikTok-u i ka quajtur këto pretendime të pasakta.

    Mosmarrëveshja mbi lidhjet e TikTok-ut me Kinën ka marrë formën e konkurrencës gjeopolitike ndërmjet Uashingtonit dhe Pekinit.

    Shtetet e Bashkuara kanë deklaruar se janë të shqetësuara për mbledhjen e sasive të mëdha të të dhënave nga TikTok-u, përfshirë informacionin e ndjeshëm mbi zakonet e shikimit, që mund të përfundojnë në duart e Qeverisë kineze përmes detyrimit. Zyrtarët, gjithashtu, kanë paralajmëruar se algoritmi që përcakton çfarë shohin përdoruesit në aplikacion është i cenueshëm ndaj manipulimit nga autoritetet kineze, të cilat mund ta përdorin atë për të formësuar përmbajtjen në platformë në një mënyrë të vështirë për t’u zbuluar.

    Ndërkaq, TikTok-u thekson se SHBA-ja nuk ka paraqitur prova që Kina ka tentuar të manipulojë përmbajtjen në platformën e saj në SHBA ose të mbledhë të dhëna të përdoruesve amerikanë përmes TikTok-ut.

    Pa u shitur te një blerës, ligji ua ndalon gjigantëve teknologjikë Apple, Google dhe të tjerëve që të ofrojnë TikTok-un duke filluar nga e diela./REL

  • Si u kap me drogë shoferi i Gjykatës Themelore të Prishtinës?

    Gjykata Themelore në Prizren i ka caktuar masën e arrestit shtëpiak M. P., i cili po dyshohet për posedim të narkotikëve. I njëjti është shofer i Gjykatës Themelore në Prishtinë.

    Këtë për KALLXO.COM e ka konfirmuar, zëdhënësi i Gjykatës së Prizrenit, Marcel Lekaj.

    “Gjykata Themelore në Prizren – Departamenti i Përgjithshëm, më datë 15.01.2024, ndaj të pandehurit M. P., ka aprovuar kërkesën e Prokurori të Shtetit, dhe ka marrë aktvendim duke i caktuar masën e arrestit shtëpiak, e cila mund të zgjasë deri më 13.02.2025, për shkak të dyshimit të bazuar se ka kryer veprën penale posedimi i paautorizuar i narkotikëve, substancave psikotrope ose analoge”– thuhet në përgjigjen e Gjykatës së Prizrenit.

    Gjykata me rastin e caktimit të arrestit shtëpiak, ndaj të pandehurit M. P. ka vlerësuar se ekzistojnë arsyet ligjore për caktimin e kësaj mase, dhe nga provat e mbledhura deri në këtë fazë, rrjedh dyshimi i bazuar se i njëjti me dashje dhe pa autorizim ka poseduar narkotikë, substanca psikotrope ose analoge të shpelluara të rrezikshme.

    “Më datën 13.01.2025 rreth orës 19:10min, në Prishtine, saktësisht në rr. Xhemajl Mustafa në lagjen Dardania, i pandehuri M. P., me dashje dhe pa autorizim ka poseduar narkotikë, substanca psikotrope ose analoge të shpallura të rrezikshme e në kundërshtim me nenin 9 dhe 14 të Ligjit për Barnat Narkotike, Substanca Psikotrope dhe Prekursorë Nr.02/L-128, dhe atë narkotikun e llojit Marihuanë me peshë 8.71gr dhe Kokainë me peshe 0.26gr, në atë mënyrë që natën kritike njësia policore, gjatë kontrolleve rutinore tek i pandehurit M. P., është gjetur një sasi e substancës së dyshuar narkotike, e cila substancë narkotike sekuestrohen nga ana e zyrtarëve policor”– thuhet në përgjigjjen e Gjykatës së Prizrenit.

    Kallxo.com ka provuar të marrë një përgjigje nga avokati i të dyshuarit M.P., Agim Kabashi, mirëpo i njëjti nuk është përgjigjur.

     

  • Kabineti izraelit i sigurisë rekomandon aprovimin e marrëveshjes për armëpushim në Gazë

    Kabineti i sigurisë i Izraelit e ka rekomanduar miratimin e një armëpushimi, i cili do t’i jepte fund luftimeve në Rripin e Gazës dhe do të mundësonte lirimin e dhjetëra pengjeve që po mbahen nga Hamasi.

    Kabineti i Qeverisë izraelite tani do të votojë për miratimin apo jo të marrëveshjes.

    Zyra e kryeministrit të Izraelit, Benjamin Netanyahu, tha të premten më herët se nëse marrëveshja miratohet, atëherë armëpushimi do të fillojë të zbatohet nga 19 janari, kur edhe do të lirohen pengjet e para.

    Marrëveshjea parasheh pauzimin e luftimeve në Rripin e Gazës dhe lirimin e dhjetëra pengjeve që mbahen nga luftëtarët radikalë në Gazë në këmbim të lirimit të të burgosurve palestinezë, që mbahen nga Izraeli. Marrëveshja po ashtu do të lejojë që qindra mijëra të zhvendosur palestinezë të kthehen në shtëpitë e tyre në Gazë.

    Kryeministri izraelit tha se ka udhëzuar një task-forcë speciale që të përgatitet për pranimin e pengjeve që do të kthehen nga Gaza dhe familjarët e tyre janë informuar se marrëveshja është arritur.

    Të enjten, Izraeli shtyu votimin për armëpushimin, duke fajësuar se Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – për mospajtime në minutën e fundit, teksa tensionet në rritje brenda koalicionit qeverisës të Netanyahut shtuan shqetësimet për zbatimin e marrëveshjes.

    Të mërkurën, presidenti i SHBA-së, Joe Biden, dhe ndërmjetësi, Katari, kishin njoftuar se marrëveshja ishte e përfunduar.

    Zyra e Netanyahut akuzoi Hamasin se kishte refuzuar disa pjesë të marrëveshjes në përpjekje për të përfituar koncesione të mëtejme. Në një konferencë për media të enjten, zëdhënësi i Qeverisë izraelite, David Mencer, tha se Hamasi kishte bërë kërkesa të reja. Sipas tij, këto kërkesa kishin të bënin me dislokimin e forcave izraelite në Korridorin Filadelfi, që është një brez i ngushtë toke në kufi me Egjiptin që trupat izraelite e morën nën kontroll majin e vitit të kaluar.

    Hamasi këto akuza i hodhi poshtë dhe Izzat al-Rishq, zyrtar i lartë i grupit, deklaroi se Hamasi është “i përkushtuar për marrëveshjen e armëpushimit, që u bë publike nga ndërmjetësit”.

    Marrëveshja e armëpushimit është përballur me rezistencë të ashpër nga partnerët e koalicionit të Netanyahut, nga të cilët varet qëndrimi i tij në pushtet. Të enjten, ministri i Sigurisë Kombëtare i linjës së ashpër, Itamar Ben-Gvir, kërcënoi se do të largohej nga Qeveria, nëse Izraeli do të miratonte marrëveshjen e armëpushimit.

    Marrëveshja për armëpushim do të pauzonte luftën 15-mujore, që ka trazuar Lindjen e Mesme dhe ka nxitur protesta në gjithë botën.

    Lufta nisi më 7 tetor 2023, kur Hamasi sulmoi Izraelin duke vrarë afër 1.200 persona dhe duke rrëmbyer afër 250 të tjerë.

    Izraeli u kundërpërgjigj me një ofensivë shkatërruese, që ka lënë të vrarë më shumë se 46.000 palestinezë në Gazë.

    Çfarë dihet për marrëveshjen e armëpushimit?

    Hollësitë e marrëveshjes ende nuk janë bërë të ditura zyrtarisht, por ka një pasqyrë të asaj se si do të duket ajo sipas komenteve të zyrtarëve dhe raportimeve në media bazuar në draftet e publikuara të marrëveshjes.

    Në fazën e parë do të nisë një armëpushim gjashtëjavor, gjatë të cilit trupat izraelite do të tërhiqen dalëngadalë nga qendra e Gazës.

    Gjatë kësaj faze, Hamasi do t’i lirojë 33 pengje – që pritet të jenë kryesisht gra, të moshuar dhe të sëmurë – në këmbim të palestinezëve të mbajtur në burgjet izraelite.

    Disa pengje u liruan në nëntor 2023 në këmbim të 240 të burgosurve palestinezë. Hamas ende mban 94 pengje, por Izraeli beson se vetëm 60 prej tyre janë ende gjallë.

    Palestinezët e zhvendosur si pasojë e luftës do të lejohen të kthehen në shtëpitë e tyre në fazën e parë të marrëveshjes, ndërsa ndihma humanitare do të fillojë të hyjë në enklavën e drejtuar nga Hamasi. Gati të gjithë 2.3 milionë banorët e Gazës u detyruan t’i braktisnin shtëpitë e tyre gjatë luftës.

    Negociatat e mëtejshme për fazën e dytë dhe të tretë të marrëveshjes do të fillojnë në ditën e 16-të të zbatimit të marrëveshjes, dhe analistët thonë se kjo mund të jetë sfida e parë e vërtetë për jetëgjatësinë e armëpushimit.

    Faza e dytë e marrëveshjes përfshin lirimin e pengjeve të mbetura dhe, më e rëndësishmja, përfundimin e luftës./REL

  • Pse ukrainasit kundërshtojnë uljen e moshës të rekrutimit?

    Svitlana Pokalchuk i dërgoi dy djemtë e saj adoleshentë jashtë vendit në mënyrë që të shmangnin shërbimin ushtarak në Ukrainën, kur të arrinin moshën.

    “E di se sa shumë djem më nuk janë në mesin tonë”, tha Pokalchuk për Shërbimin ukrainas të Radios Evropa e Lirë. “E shihni Facebook-un, sa njerëz po kërkojnë familjarët e tyre dhe, si nënë, ndiej pikëllim. Thjesht, pikëllim”.

    Ajo nuk është e vetme.

    Shtetet e Bashkuara, mbështetësi kryesor ushtarak i Kievit, i kanë bërë thirrje Ukrainës që të ulë moshën e shërbimit ushtarak nga 25 në 18 vjeç, pasi shteti po përballet me vështirësi që të zmbrapsë forcat ruse, që po përparojnë, për shkak të mungesës së rekrutëve të rinj.

    Kjo ka shtyrë disa familje ukrainase që t’i dërgojnë bijtë e tyre jashtë vendit që të shmangin shërbimin ushtarak.

    “Arsyeja e parë është siguria e tyre”, tha Pokalchuk. “Për një nënë, kjo është gjëja më e rëndësishme. E dyta, është mosha e rekrutimit për shërbim ushtarak. Ata ende janë të rinj dhe nuk ka një trajnim të mirëfilltë ushtarak”.

    Në prill të vitit të kaluar, Ukraina uli moshën e mobilizimit nga 27 në 25 vjeç. Në nëntor, administrata e presidentit amerikan, Joe Biden, e shtyu Ukrainën që ta ulë sërish këtë moshë, kësaj radhe në 18 vjeç. Më 12 janar, Mike Waltz, këshilltari i zgjedhur për siguri kombëtare i presidentit të zgjedhur amerikan, Donald Trump, e përsëriti këtë mesazh.

    “Fëmijët në kasaphane”

    Reagimet në rrugët e Kievit ishin krejtësisht negative.

    “Jam nënë dhe gjyshe dhe jam krejtësisht kundër kësaj”, tha një grua për Current Time.

    “Në moshën 18-vjeçare ata janë fëmijë. Ata do të bëheshin mish për top, fëmijët do të dërgoheshin në kasaphane”, shtoi ajo.

    Një grua tjetër tha se “nuk do të mbetet askush që të bëjë fëmijë”, duke prekur një shqetësim të thellë që është në epiqendër të kundërshtimit të këtij propozimi.

    Grup-mosha nga 18 deri në 25 vjeç është më e dobëta nga demografia e moshës së punës në Ukrainë. Një rënie dramatike e natalitetit në vitet ’90, pas rënies së Bashkimit Sovjetik, vazhdoi edhe në vitet 2000, teksa popullsia u përball me sfida të vazhdueshme ekonomike.

    “Niveli më i ulët i yni i natalitetit ishte në vitin 2001”, tha Oleksandr Hladun, zëvendësdrejtor në Institutin Demografik të Akademisë së Shkencave të Ukrainës. “Ky kontingjent është aktualisht më i vogli. Dhe kjo do të thotë që në 25-30 vjet do të lindin edhe më pak fëmijë”.

    Të dhënat zyrtare kanë zbuluar atë që quhet “hendek demografik”. Në fakt, shifrat reale të popullsisë janë edhe më të ulëta, pasi popullsia u pakësua edhe më shumë nga emigracioni i nxitur fillimisht nga faktorët ekonomikë dhe më pas nga lufta.

    Hladun tha se studimet tregojnë se 25 për qind e nxënësve të shkollave të mesme në Ukrainë dëshirojnë të vazhdojnë studimet jashtë vendit.

    “Ndoshta kjo do të nxisë edhe më shumë banorë që të largohen, të dërgojnë fëmijët e tyre jashtë vendit”.

    Asnjë stigmë

    Rezistenca ndaj rekrutimit në përgjithësi është nxitur nga raportimet për korrupsion në zyrat për rekrutim dhe gjetje të mënyra ligjore përmes lidhjeve me pushtetin për të shmangur shërbimin ushtarak. Vitin e kaluar, hetuesit zbuluan se zyrtarë qeveritarë kishin shmangur shërbimin ushtarak duke pretenduar në mënyrë të rremë se merrnin përftime për shkak të aftësive të kufizuara.

    Një sondazh i publikuar në qershor gjeti se 46 për qind e ukrainasve mendonin se nuk është turp që të shmangej shërbimi ushtarak, ndërkaq 25 për qind e respodentëve nuk ishin në gjendje që t’i përgjigjeshin kësaj pyetjeje.

    Ndoshta për shkak të kësaj atmosfere, reagimi politik për uljen e moshës së rekrutimit ka qenë negativ po ashtu.

    Në dhjetor presidenti ukrainas, Volodymyr Zelensky, bëri deklarata të ashpra për gazetarët gjatë një vizite në Bruksel. Problemi, sugjeroi ai, nuk ishte numri i trupave, por armatimet dhe pajisjet e pamjaftueshme.

    Prej kohësh, Zelensky u bën thirrje aleatëve perëndimorë të Kievit që të rrisin furnizimet me armë për Ukrainën.

    “Më tregoni ju lutem: nëse një person është para jush, pa armë, çfarë dallimi ka nëse ai është 20 apo 30 vjeç nëse ai nuk është i armatosur? Nuk ka kurrfarë dallimi”, tha presidenti ukrainas.

    Por, Zelensky po ashtu e ka pranuar se ushtria ka nevojë për ushtarë të rinj dhe videot ku shihen rekrutuesit duke tërhequr zvarrë burrat nga rruga, vënë në pah këtë problem.

    Presioni politik mund ta detyrojë Zelenskyn që ta ndryshojë mendjen. Trump veçse e ka bërë të qartë se ai nuk është i prirë të mbështesë Ukrainën ushtarakisht dhe dëshiron të takohet me presidentin rus, Vladimir Putin, për të negociuar për paqe.

    Teksa Zelensky, tenton të jetë në anën e mirë të Trumpit, ai mund të detyrohet të bëjë disa lëshime./REL

  • Ish-drejtori i minierës së Trepçës në Reporting House, kujton protestën e ’89: Kam mendu që kemi me vdekë të gjithë

    Burhan Kavaja kishte marrë detyrën si drejtor i minierës me flotacion “Trepça” në Stantërg, në vitin 1988. Vetëm një vit pas, inxhinieri bashkë me kolegët e tij organizuan një ndër grevat më të mëdha të minatorëve në historinë e Europës moderne – grevën e urisë së minatorëve të Trepçës. Kjo grevë, që nga shumëkush cilësohet si fillimi i fundit të Kosovës nën regjimin e Serbisë, dokumentohet në Reporting House të cilën Kavaja e vizitoi të mërkurën duke iu rikthyer kujtimeve personale.

    Të gjithë vizitorët pa dallim, dalin nga Reporting House me përshtypjet e veta. Por janë disa vizitorë që na lënë përshtypje. Këta nuk janë vetëm vizitorë, por protagonistët dhe kontribuuesit në rezistencën e viteve 1989-1999, që shënohet në muzeun “Reporting House/Shtëpia e Gazetarëve”.

    I tillë është Burhan Kavaja, burri në të tetëdhjetat e tij që me të hyrë në katin e parë të ish-objektit “Gërmia” në sheshin Skënderbeu në Prishtinë, ku gjendet Reporting House, u ndalë para ekranit të parë në të cilin shfaqen xhirimet nga greva e minatorëve të Trepçës e vitit 1989, në Mitrovicë.

    Kavaja filloi të emërtoj kolegët e tij, dhe po shpjegonte për secilin se çfarë pune bënte asokohe, derisa në një moment thotë: “Ja ky jam unë”, gjersa bën me dorë drejt një burri të veshur me uniformën e Trepçës e të ulur në tryezën e konferencës duke folur para mediave për kërkesat për të drejtat e shqiptarëve në ish-Jugosllavi të minatorëve grevistë.

    Kjo protestë ku kishte folur Kavaja, u mbajt një muaj para suprimimit të autonomisë së Kosovës si Krahinë Autonome nën Jugosllavi, status që Kosova e gëzoi deri më 23 mars 1989.

    Në vitin 1988 Burhan Kavaja, inxhinier i diplomuar në Fakultetin e Inxhinierisë dhe Xehetarisë në Universitetin e Beogradit, u emërua drejtor i minierës me flotacion “Trepça” në Stantërg. Vetëm një vit pas marrjes së detyrës së tij, ai u ballafaqua me një nga sfidat më të mëdha që kujton – grevën e urisë së minatorëve të Trepçës, si bashkë organizator dhe përgjegjës për mijëra minatorët të cilët hynë në grevë.

    Kjo grevë e iniciuar nga punonjësit e Minierave të Trepçës më 20 shkurt të vitit 1989, ishte protestë që kërkonte përfaqësim të denjë të shqiptarëve në parlamentin jugosllav, shqiptarëve që nuk ishin zgjedhur nga Millosheviqi por ata që do t’i zgjidhte populli i Kosovës. Protesta kërkonte dorëheqjen e deputetëve shqiptarë që shiheshin si marioneta të partisë së Millosheviqit në atë kohë.

    Protesta dallonte prej të tjerave ngase ishte grevë urie dhe ndalonte prodhimin e Trepçës prej së cilës afektohej ekonomia e tërë Jugosllavisë, jo vetëm e Kosovës. Minatorët e dinin që shtypi kroat dhe ai slloven do ta mbulonin në mënyrë më të pavarur këtë ngjarje dhe kështu shpresonin që në republikat tjera të ish – Jugosllavisë do të flitej për të drejtat e munguara të shqiptarëve në këtë shtet.

    “Momenti ma i  vështirë, apo sfida ma e madhe ka qenë se si me i mbajtë gjallë minatorët, të pa lënduar e pa sakrifica”, kujton Kavaja.

    Derisa Kuvendi Kombëtar i Serbisë po përgatiste ndryshimet kushtetuese që do të kishin zyrtarizuar heqjen e autonomisë së Kosovës, mbi 1,300 minatorë të Trepçës filluan grevën e tyre të urisë për tetë ditë, me kërkesë ruajtjen e statusit autonom dhe dorëheqjen e tre politikanëve shqiptarë të emëruar nga Sllobodan Millosheviq në Kosovë. Pas rreth një jave ishte realizuar dalja e parë e minatorëve, dhe afro 180 minatorë ishin shtruar në spital. Ndërsa në mbrëmjen e 27 shkurtit 1989, Rrahman Morina, Ali Shukriu dhe Husamedin Azemi, kryetarët e fraksionit pro Millosheviqit në Kosovë, dhanë dorëheqje. Në orët e vona të mbrëmjes, Presidenca e Jugosllavisë u mblodh dhe vendosi “masa të veçanta” për Kosovën që në fakt vendosi një gjendje të jashtëzakonshme të pakufizuar që nënkuptoi zbarkimin e policisë shtesë që erdhi nga Beogradi, përjashtimin e shërbyesve civil shqiptar nga puna dhe përjashtimin e nxënësve e studentëve shqiptar nga shkolla dhe fakultetet. Pesëdhjetë grevistë u  barrikaduan brenda minierës “Stantërg”, afro 1000 metra në thellësi të tokës.

    “Është dashtë me përgatit daljen e dytë, e në atë kohë pusi i ventilimit ka qenë komplet në akull. U deshtë me i angazhu ekipet me pastru akullin edhe me mundësu daljen nga 1000 metra nën tokë ku kanë qenë minatorët, pra me i nxjerrë. Ajo ka qenë për mua ngjarja kryesore dhe mundem me thanë që ka pas trauma psikike dhe fizike, sepse ka qenë shumë vështirë me realizu”, rrëfeu Kavaja, gjersa qëndroi në Reporting House/Shtëpinë e Gazetarëve më 15 janar të këtij viti, duke treguar tutje se asnjëherë nuk e kishte besuar se do të dilnin të gjallë nga miniera.

    “Duke e ditur që i kemi pasur edhe 2,400 kilogramë eksplozivë aty, kam mendu që të gjithë kemi me qenë të vdekur. Mirëpo, ja sot edhe pas 36 vjetëve jam i gjallë”, thotë ai me një buzëqeshje të lehtë, derisa me kërkesën tonë e dha edhe një mesazh për gjeneratat e reja.

    “Më duket që [rinia] nuk kanë shumë njohuri për sakrificat të cilat ne i kemi bërë, që ata sot me qenë të arsimuar dhe me qenë nëpër pozita dhe me qenë të shkolluar e me pas familje. Më duket që shumë pak po lexohet për historinë dhe pak janë të informuar për të kaluarën tonë të vështirë”, tha ai.

    “Nuk ka qenë lehtë, në vitet e ’45-ta i kemi pas diku 7-8 intelektualë, e në vitet ’77 e ’78 ky numër u rrit në 70 mijë. Domethënë lidershipi i atëhershëm ka bërë çmos që të mësojnë popullin, me eduku, që me pas profesionistë për ditët e sotme”, kujtoi Kavaja duke e vlerësuar dokumentimin e rezistencë së brezave, për lirinë e Kosovës, në Reporting House.

    Me modesti, pranon sakrificën, dhe ka një mesazh edhe për “bajraktarizmin”.

    “Shikoni, me bajraktarizëm kishim pas ma pak sukses se që kemi pas. Greva e minatorëve është greva më e madhe në botë. Tetë ditë e tetë netë [në grevë] për çështje politike. Zakonisht grevat e minatorëve janë sociale, por këto kanë qenë greva puro politike, e për liri”, tha Burhan Kavaja.

    Burhan Kavaja u lind në Mitrovicë me 9 maj 1943. Ka diplomuar për Inxhinieri e Xehetari në Universitetin e Beogradit. Ndërkaq në vitin 1970 ka punuar si zëvendës sekretar i Sekretariatit Krahinor për Ekonomi. Nga viti 1990 e deri më 1994, ai ishte kryetar i Këshillit Ekzekutiv të Bashkimit të Sindikatave të Pavarura të Kosovës. Kavaja po ashtu ka qenë deputet në Parlamentin e Kosovës dhe Kryetar i Komisionit parlamentar për energjetikë, resurse natyrore dhe industri.

    Ai së bashku me miqtë e tij e vizituan Reporting House më 15 janar 2025.

     

    Lexoni më shumë për Reporting House/Shtëpinë e Gazetarëve – LINK